Kapitulo 1
Pasiuna ngadto sa Doktrina ug mga Pakigsaad; Doktrina ug mga Pakigsaad 2
Pasiuna ug Timeline
“Ang Doktrina ug mga Pakigsaad mao ang usa ka tinipon nga balaang mga pagpadayag ug dinasig nga mga pahayag nga gihatag alang sa pagpahimutang ug pagdumala sa gingharian sa Dios dinhi sa yuta sa ulahing mga adlaw” (pasiuna sa Doktrina ug mga Pakigsaad, paragraph 1). Kini nga mga pagpadayag nadawat ni Propeta Joseph Smith ug sa pipila sa iyang sumusunod ug “naglakip og pagdapit sa tanan nga mga katawhan sa tanan nga dapit sa pagpaminaw sa tingog sa Ginoong Jesukristo, namulong ngadto kanila alang sa ilang temporal nga kaayohan ug sa ilang walay katapusan nga kaluwasan” (pasiuna sa Doktrina ug mga Pakigsaad, paragraph 1).
Ang seksyon sa Doktrina ug mga Pakigsaad nga dunay labing sayo nga petsa naglangkob sa mga pulong nga gipamulong ni anghel Moroni ngadto ni Joseph Smith niadtong 1823, sa dihang ang pamilyang Smith nagpuyo duol sa Palmyra, New York. Atol niana nga pagbisita, mipakigbahin si Moroni og pipila ka importante nga mga panagna gikan sa Daan ug Bag-ong Tugon, lakip sa usa nga gikan sa Malaquias mahitungod sa gisaad nga misyon ni propeta Elijah sa ulahing mga adlaw. Kana nga panagna, narekord sa Doktrina ug mga Pakigsaad 2, importante sa atong pagsabut sa plano sa Langitnong Amahan sa pagtubos sa Iyang mga anak.
-
Ulahing Bahin sa 1816Ang pamilyang Smith mibalhin gikan sa Vermont ngadto sa Palmyra, New York.
-
Tingpamulak sa 1820Ang Dios nga Amahan ug si Jesukristo nagpakita kang Joseph Smith.
-
Septyembre 21–22, 1823Si anghel Moroni mibisita ni Joseph Smith (Doktrina ug mga Pakigsaad 2).
-
Nobyembre 19, 1823 Ang magulang nga igsoon ni Joseph Smith nga si Alvin namatay.
-
Enero 18, 1827Si Joseph Smith ug Emma Hale naminyo.
Doktrina ug mga Pakigsaad: Dugang nga Makasaysayanong Background
Ang Ginoo mihatag og balaang giya ngadto ni Propeta Joseph Smith kabahin sa Pagpahiuli sa ebanghelyo, sa organisasyon sa Simbahan, ug sa mga panginahanglan ug mga responsibilidad sa piho nga mga indibidwal. Daghan niini nga mga pagpadayag nga nadawat sa Propeta gisulat sa mga escriba, sa kasagaran mga papel-papel lang, ug dayon gikopya ngadto na gayud sa gihimo nga mga libro.
Niadtong Nobyembre 1831 si Propeta Joseph Smith ug ubang mga lider sa Simbahan nagkita sa komperensya sa mga elder didto sa Hiram, Ohio. Atol niini nga komperensya, ang mga lider sa Simbahan mihukom sa pagpundok ug pagmantala sa pipila sa mga pagpadayag nga nadawat sa Propeta ngadto sa usa ka volume nga giulohan og ang Basahon sa mga Sugo. Si William W. Phelps gitawag nga “usa ka tig-imprinta ngadto sa simbahan” (D&C 57:11), ug ang mga kopya sa mga pagpadayag gihatud ngadto kaniya didto sa Independence, Missouri, alang sa pag-imprinta. Ang publikasyon hapit na mahuman niadtong Hulyo 1833 sa dihang ang manggugubot nga panon miataki sa imprintahan ni Phelps ug miguba sa building, sa printing press, ug sa kadaghanan sa naimprinta nga mga papel sa mga pagpadayag. Pipila ka mga indibidwal, lakip sa duha ka batan-ong mga babaye—si Mary Elizabeth Rollins ug ang iyang igsoon nga si Caroline—nakahimo sa pagluwas sa pipila ka naimprinta nga mga pahina, ug bisan dili kompleto, ang pipila ka mga kopya niini gihimo nga libro.
Niadtong 1835 ang ikaduhang natigum nga mga pagpadayag nga nadawat ni Joseph Smith gimantala ug gitawag nga Doktrina ug mga Pakigsaad. Kini nga edisyon adunay 103 ka mga pagpadayag ug pasiuna. Gilakip usab mao ang Lectures on Faith [Mga Pakigpulong sa Hugot nga Pagtuo], pito ka teyolohikanhong mga pakigpulong nga gihatag ngadto sa Tulunghaan sa mga Elder panahon sa tingtugnaw niadtong 1834–1835. Ang unang edisyon naorganisar sa duha ka bahin: unang bahin (doktrina)—ang Lectures on Faith; ikaduhang bahin (ang mga pakigsaad ug mga sugo)—ang mga pagpadayag nga nadawat hangtud nianang higayuna. (Tan-awa sa The Joseph Smith Papers, Documents, Volume 4: April 1834–September 1835, ed. Matthew C. Godfrey ug uban pa [2016], 382–96.) Ang Lectures on Faith wala apila sa 1921 nga edisyon sa Doktrina ug mga Pakigsaad ug sa misunod nga mga edisyon tungod kay mga pakigpulong kini sa teyolohiya o mga leksyon nga wala ihatag o ipresentar nga mga pagpadayag ngadto sa Simbahan.
Sa dihang ang ulahing mga edisyon sa Doktrina ug mga Pakigsaad giimprinta, bag-ong mga pagpadayag ang gidugang, ug kini nga mga edisyon naglakip sa gamay nga mga kausaban kon sa unsa nga paagi nga ang mga pagpadayag naorganisar. Niadtong 1981 mimantala ang Simbahan og bag-ong edisyon sa pinulongang Iningles sa “triple combination” (ang Basahon ni Mormon, ang Doktrina ug mga Pakigsaad, ug ang Perlas nga Labing Bililhon) nga dunay gidugang nga mga footnote ug mga cross-reference ug bag-ong indeks. Nianang higayuna ang 1836 nga panan-awon ni Propeta Joseph Smith sa celestial nga gingharian ug sa 1918 nga panan-awon ni Presidente Joseph F. Smith sa katubsanan sa mga patay gidugang ngadto sa Doktrina ug mga Pakigsaad ingon nga mga seksyon 137 ug 138. Duha ka opisyal nga pahayag ang opisyal usab nga gidugang: (1) ang Manipesto, nga giisyu ni Presidente Wilford Woodruff, nagpahibalo nga ang praktis sa dinaghan nga kaminyoon sa Simbahan wala na padayuna, ug (2) usa ka pahibalo sa Unang Kapangulohan sa pagpadayag nga nadawat ni Presidente Spencer W. Kimball sa paghatag sa mga panalangin sa priesthood ug sa templo ngadto sa tanang takus nga mga lalaki nga miyembro sa Simbahan. Ang pasiuna, nga giulohan nga Pagpasabut nga Pasiuna sukad niadtong 1921 nga edisyon, giusab usab niadtong 1981 nga edisyon sa Doktrina ug mga Pakigsaad. Kining giusab nga pasiuna naghatag og dugang nga impormasyon kabahin ni Propeta Joseph Smith ug sa matang ug katuyoan sa Doktrina ug mga Pakigsaad.
Niadtong Marso 1, 2013, ang Unang Kapangulohan mipahibalo sa gibag-o nga edisyon sa mga kasulatan nga Iningles. Uban sa gagmay nga mga koreksyon sa spelling sa teksto, kadaghanan sa mga giusab nga gihimo niini nga edisyon sa mga kasulatan anaa sa mga tabang sa pagtuon ug sa mga ulohan sa mga seksyon sa Doktrina ug mga Pakigsaad. Sa Doktrina ug mga Pakigsaad usab, ang Pagpasabut nga Pasiuna giusab ngadto sa Pasiuna ug pipila ka dugang nga mga detalye ang gihatag mahitungod sa miaging mga edisyon uban sa mga rason sa pag-usab sa Doktrina ug mga Pakigsaad ngadto sa bag-ong edisyon.
Pasiuna sa Doktrina ug mga Pakigsaad
Ang Doktrina ug mga Pakigsaad naglakip sa mga pagpadayag nga gihatag ngadto ni Propeta Joseph Smith ug sa iyang mga sumusunod
Pasiuna sa Doktrina ug mga Pakigsaad. “Usa ka koleksyon sa balaang mga pagpadayag”
Ang Doktrina ug mga Pakigsaad naglakip og daghang mga balaang pagpadayag nga nadawat ni Propeta Joseph Smith. Kini nga mga pagpadayag gihatag pinaagi sa espiritu sa panagna ug pagpadayag pinaagi sa mga panan-awon (tan-awa sa D&P 76; 137; 138), langitnong mga pagbisita (tan-awa sa D&P 2; 13; 27; 110), sa Urim ug Thummim (tan-awa sa D&P 3; 6–7; 11; 14–17), ug sa inspirasyon sa Espiritu Santo. Pipila sa mga pagpadayag miabut isip resulta sa mga pagpangutana sa Propeta samtang nagtrabaho siya sa dinasig nga paghubad sa Biblia (tan-awa sa D&P 35; 73; 76–77; 86; 91; 132). Ang ubang mga pagpadayag miabut atol sa paghubad sa Basahon ni Mormon ug tungod sa mga pangutana sa estraktura sa Simbahan ug sa pagtukod sa Zion.
Duol niini nga monumento sa Sharon, Vermont, nagbarug ang balay diin si Propeta Joseph Smith natawo niadtong Disyembre 23, 1805.
Si Presidente Gordon B. Hinckley (1910–2008) mihulagway sa ka bililhon niining moderno nga basahon sa kasulatan:
“Ang Doktrina ug mga Pakigsaad talagsaon uban sa atong mga basahon sa kasulatan. Mao kini ang konstitusyon sa Simbahan. Samtang ang Doktrina ug mga Pakigsaad naglakip sa mga sinulat ug mga pamahayag sa nagkalain-laing mga gigikanan, kini usa gayud ka basahon sa pagpadayag nga gihatag pinaagi sa Propeta niini nga dispensasyon.
“Kini nga mga pagpadayag nag-abli uban ang gamhanang pamahayag sa malukpanong mga katuyoan sa Dios sa pagpahiuli sa Iyang mahinungdanong buhat sa ulahing mga adlaw. …
“Gikan nianang harianong pasiuna, talagsaong mga doktrina ang gitudlo gikan sa tinubdan sa mahangturong kamatuoran. Ang uban direkta nga pagpadayag, nga gidiktar sa Ginoo ngadto sa Iyang propeta. Ang uban mao ang pinulongan ni Joseph Smith, gisulat o gipamulong samtang gidasig siya sa Espiritu Santo. Gilakip usab sa iyang istorya ang mga panghitabo nga nahitabo sa nagkalain-laing mga sirkumstansya. Ang tanan nga gihiusa, naglangkob og dako kaayo nga bahin sa doktrina ug mga ginahimo sa Ang Simbahan ni Jesukristo sa mga Santos sa Ulahing mga Adlaw. …
“Ang nagkalain-laing mga butang nga gihisgutan sa basahon talagsaon. Naglakip kini sa mga baruganan ug mga pamaagi kabahin sa pagdumala sa Simbahan. Talagsaon ug mahinungdanong mga lagda sa panglawas, uban sa mga saad nga pisikal ug espirituhanon, gihatag. Ang pakigsaad sa mahangturong priesthood gihulagway sa paagi nga dili makita bisan asa sa kasulatan. Ang mga pribilehiyo ug mga panalangin—ug ang mga limitasyon ug mga oportunidad—sa tulo ka ang-ang sa himaya gipahibalo, base sa daklit nga paghisgot ni Pablo sa himaya sa adlaw, ug sa bulan ug sa mga bitoon. Ang paghinulsol gipahayag sa pinulongan nga klaro ug maaghaton. Ang sakto nga paagi sa bunyag gihatag. Ang kinaiya sa Dios nga Kapangulohan, nga nakapalibug sa mga batid sa teyolohiya sa daghang mga siglo, gihulagway sa pinulongan nga masabtan sa tanan. Ang balaod sa Ginoo sa panalapi gipahibalo, nagsugo sa unsa nga paagi kuhaon ug gastuhon ang mga kwarta alang sa pagpadagan sa Simbahan. Ang buhat alang sa mga patay gipadayag aron sa pagpanalangin sa mga anak sa Dios sa tanang mga henerasyon” (“The Order and Will of God,” Ensign, Jan. 1989, 2, 4).
Ang Doktrina ug mga Pakigsaad usa sa mga sumbanan nga mga basahon nga gidawat nga kasulatan sa Ang Simbahan ni Jesukristo sa mga Santos sa Ulahing mga Adlaw. Ang mga pagpadayag ug dinasig nga mga sinulat nga anaa sa Doktrina ug mga Pakigsaad naglangkob sa gamhanang pagpamatuod sa nagpadayon nga buhat sa kaluwasan sa tanang mga anak sa Dios. Si Presidente Ezra Taft Benson (1899–1994) mipasabut nga ang Doktrina ug mga Pakigsaad nagkahiusa sa Basahon ni Mormon sa pagdala og mga tawo ngadto ni Kristo ug ngadto sa Iyang gingharian:
“Kining duha ka importanting mga basahon nga kasulatan sa ulahing mga adlaw naghiusa isip mga pagpadayag gikan sa Dios sa Israel alang sa katuyoan sa pagpundok ug sa pag-andam sa Iyang katawhan alang sa ikaduhang pag-anhi sa Ginoo. …
“Matag usa niining duha ka importanting mga kasulatan sa ulahing mga adlaw nagdala og gamhanan ug makapatandog nga saksi ni Ginoong Jesukristo. Hapit matag pahina sa Doktrina ug mga Pakigsaad ug sa Basahon ni Mormon nagtudlo mahitungod sa Agalon—sa Iyang dakong gugma alang sa Iyang mga anak ug sa Iyang maulaong sakripisyo—ug nagtudlo kanato unsaon sa pagpuyo aron kita makabalik ngadto Kaniya ug sa atong Langitnong Amahan.
“Matag usa niining importanting mga basahon sa kasulatan sa ulahing mga adlaw naglangkob sa kahibalo ug sa gahum sa pagtabang kanato sa pagpuyo og mas maayong kinabuhi sa panahon sa dakong kadautan ug kayawan-on. Niadtong kinsa mabinantayon ug mainampoon nga nagsiksik sa mga pahina niini nga mga basahon makakaplag og kahupayan, tambag, paggiya, ug hilom nga gahum sa pagpalambo sa ilang mga kinabuhi.
“Ang Doktrina ug mga Pakigsaad mao ang bugkos nga nagsumpay tali sa Basahon ni Mormon ug sa nagpadayong buhat sa Pagpahiuli pinaagi ni Propeta Joseph Smith ug sa iyang mga sumusunod.
“Diha sa Doktrina ug mga Pakigsaad atong makat-unan ang buhat sa templo, mahangturong mga pamilya, ang mga ang-ang sa himaya, organisasyon sa Simbahan, ug daghan pang mahinungdanong mga kamatuoran kabahin sa Pagpahiuli. …
“Ang Basahon ni Mormon mao ang ‘sukaranang bato’ sa atong relihiyon, ug ang Doktrina ug mga Pakigsaad mao ang ulohang bato, uban sa nagpadayong pagpadayag sa ulahing mga adlaw. Ang Ginoo nagbutang sa Iyang selyo sa pagtugot diha sa sukaranang bato ug sa ulohang bato” (Mga Pagtulun-an sa mga Presidente sa Simbahan: Ezra Taft Benson [2014], 159–60).
Si Presidente Joseph F. Smith (1838–1918) mihulagway kon sa unsa nga paagi nga ang mga pagpadayag nga gihatag sa atong dispensasyon makapadugang sa unsay nahibaloan na nato mahitungod sa ebanghelyo ni Jesukristo: “Ako moingon ngadto sa akong mga kaigsoonan nga ang basahon sa Doktrina ug mga Pakigsaad naglangkob sa pipila sa pinakamahimayaong mga baruganan nga napadayag sukad nganhi sa kalibutan, ang pipila nga napadayag sa mas dako nga kahingpitan kay sa kini napadayag sukad nganhi sa kalibutan; ug kini, agig katumanan sa saad sa karaang mga propeta nga sa kaulahiang mga adlaw ang Ginoo mopadayag sa mga butang nganhi sa kalibutan nga gitago gikan sa wala pa ang katukuran sa kalibutan; ug ang Ginoo mipadayag niini pinaagi kang Propeta Joseph Smith” (Mga Pagtulun-an sa mga Presidente sa Simbahan: Joseph F. Smith [1998], 51–52).
Si Presidente Joseph Fielding Smith (1876–1972) miingon nga kadaghanan sa kasulatan orihinal nga gihatag ngadto sa mga tawo sa karaan. Sa pagkomparar, ang Doktrina ug mga Pakigsaad naglakip sa pulong sa Dios nga pihong gihatag ngadto sa mga anak sa Dios sa atong dispensasyon. Mipamatuod siya nga ang “Doktrina ug mga Pakigsaad naglakip sa pulong sa Dios niadtong nagpuyo dinhi karon. Ato kini nga basahon. Sa mga Santos sa Ulahing mga Adlaw kini. Mas bililhon pa kay sa bulawan, si Propeta [Joseph Smith] miingon nga kinahanglan nga ibahandi nato kini labaw pa sa mga katigayunan sa tibuok kalibutan” (Doctrines of Salvation, comp. Bruce R. McConkie [1956], 3:199).
Pagpadayag Basahon 1, diin si John Whitmer mikopya sa pinili sa unang mga pagpadayag nga nadawat ni Propeta Joseph Smith
Pasiuna sa Doktrina ug mga Pakigsaad. Pagpamatuod sa Napulog Duha ka mga Apostoles
Sa dihang ang mga lider sa Simbahan nakahukom niadtong Nobyembre 1831 nga komperensya sa pagkolekta sa mga pagpadayag ug pag-organisar niini aron imantala, si Propeta Joseph Smith miandam og pamahayag sa pagpamatuod kabahin sa balaan nga gigikanan sa mga pagpadayag (tan-awa sa The Joseph Smith Papers, Documents, Volume 2: July 1831–January 1833, ed. Matthew C. Godfrey ug uban pa [2013], 110–14). Kadtong diha mitambong nagpakita sa ilang pagkaandam sa paghatag og pagpamatuod sa katinuod sa mga pagpadayag. Tingali kini nga pagpamatuod imantala sa likod sa Basahon sa mga Sugo sama nga ang mga pagpamatuod sa Tulo ug Walo ka mga Saksi gilakip sa katapusan sa 1830 nga edisyon sa Basahon ni Mormon. Apan, ang pamahayag sa pagpamatuod wala makita sa mga kopya sa Basahon sa mga Sugo. Tingali tungod kay ang pagmantala naputol sa dihang giguba ang imprintahanan. Ang pagpamatuod sa Napulog Duha ka mga Apostoles gilakip sa 1835 nga edisyon sa Doktrina ug mga Pakigsaad.
Doktrina ug mga Pakigsaad 2: Dugang nga Makasaysayanong Background
Niadtong Septyembre 21, 1823, mga tulo ka tuig human madawat ang Unang Panan-awon, ang 17-anyos nga si Joseph Smith nag-ampo alang sa kapasayloan sa iyang mga sala samtang nagtinguha siya nga makahibalo sa iyang kahimtang sa atubangan sa Dios. Agig tubag sa iyang pag-ampo, usa ka langitnong mensahero nga ginganlan og Moroni nagpakita ug nagpahayag nga ang Dios adunay ipabuhat ni Joseph (tan-awa sa Joseph Smith—Kasaysayan 1:29–33). Human makasulti bahin sa pag-abut sa karaang rekord nga gisulat diha sa bulawan nga mga palid, si Moroni mikutlo og pipila ka mga kasulatan gikan sa Daan ug Bag-ong Tugon, lakip na sa kalainan sa panagna ni Malaquias mahitungod sa pagbalik ni Elijah (tan-awa sa Malaquias 4:5–6). Gilakip ni Propeta Joseph Smith ang kalainan sa panagna ni Malaquias sa iyang opisyal nga kasaysayan diin iyang gisugdan sa pag-andam niadtong 1838. Mga kinutlo gikan niana nga istorya sa wala madugay giapil sa ang Perlas nga Labing Bililhon (tan-awa sa Joseph Smith—Kasaysayan 1:38–39) ug giapil sa Doktrina ug mga Pakigsaad sugod sa 1876 nga edisyon. Ang kaimportante niini nga panagna maklaro pinaagi sa kon makapila kini makita sa sumbanan nga mga kasulatan (tan-awa sa Malaquias 4:4–6; Lucas 1:17; 3 Nephi 25:5–6; D&P 2; Joseph Smith—Kasaysayan 1:38–39). Kon sa kronolohiya nga paagi, ang Doktrina ug mga Pakigsaad 2 mao ang labing una nga seksyon sa Doktrina ug mga Pakigsaad.
Doktrina ug mga Pakigsaad 2
Usa ka anghel nagpakita ni Joseph Smith agig tubag sa iyang pag-ampo
Doktrina ug mga Pakigsaad 2:1–3. Elijah ang propeta
Ang propeta sa Daang Tugon nga si Elijah adunay importante nga tahas sa Pagpahiuli sa ebanghelyo ni Jesukristo, ug siya ang gihinganlan sa pipila ka seksyon sa Doktrina ug mga Pakigsaad (tan-awa sa D&P 2:1; 27:9; 35:4; 110:13–16; 128:17; 133:55; 138:46–48). Si Elder David A. Bednar sa Korum sa Napulog Duha ka mga Apostoles mipasabut kinsa si Elijah ug ngano nga mibalik siya sa atong panahon:
“Si Elijah usa ka propeta sa Daang Tugon kinsa pinaagi kaniya dagkong mga milagro ang nahimo. Iyang gisilyohan ang kalangitan ug wala moulan sa karaang Israel sulod sa 3 ka tuig ug tunga. Iyang gipadaghan ang pagkaon ug lana sa biyuda. Iyang gibuhi ang batang lalaki gikan sa kamatayon, ug iyang gipakanaog ang kalayo gikan sa langit agig paghagit sa mga propeta ni Baal. (Tan-awa sa 1 Mga Hari 17–18.) Sa katapusan sa mortal nga pangalagad ni Elijah, siya “mikayab ngadto sa langit pinaagi sa usa ka alimpulos’ (2 Mga Hari 2:11) ug nabalhin sa pagkahimaya.
“‘Kita nakakat-on gikan sa pagpadayag sa ulahing mga adlaw nga si Elijah naghupot sa gahum sa pagbugkos sa Melchizedek Priesthood ug mao ang katapusang propeta nga naghupot niini sa wala pa si Jesukristo’ (Giya ngadto sa mga Kasulatan, ‘Elijah’). …
Si Elijah mipakita uban ni Moises didto sa Bukid sa Transpigurasyon (tan-awa sa Mateo 17:3) ug mihatag niini nga awtoridad ngadto nila ni Pedro, Santiago, ug Juan. Si Elijah mipakita pag-usab uban ni Moises ug sa lain pa niadtong Abril 3, 1836, didto sa Templo sa Kirtland ug mihatag sa sama nga mga yawe ngadto nila ni Joseph Smith ug Oliver Cowdery” (“Ang mga Kasingkasing sa mga Anak Mobati,” Liahona, Nob. 2011, 24–25).
Gitukod pag-usab nga troso nga balay sa pamilyang Smith didto sa Lungsod sa Palmyra, New York, diin ang anghel nga si Moroni nagpakita ngadto sa batan-ong Joseph Smith
Doktrina ug mga Pakigsaad 2:1. “Ako mopadayag nganha kaninyo sa Pagkapari”
Sa dihang nagpakita si Elijah didto sa Templo sa Kirtland niadtong Abril 3, 1836, si Propeta Joseph Smith ug Oliver Cowdery nakadawat na sa Melchizedek Priesthood ubos sa mga kamot ni Pedro, Santiago, ug Juan (sa mga Mayo–Hunyo 1829). Ang saad nga ang Ginoo “mopadayag … sa Pagkapari, pinaagi sa kamot ni Elijah” (D&P 2:1) nagpasabut sa mga yawe sa gahum sa sealing sa priesthood nga gitugyan ngadto nila ni Joseph ug Oliver pinaagi ni Elijah sa dihang mibisita siya sa Templo sa Kirtland Temple (tan-awa sa D&P 110:13–16).
Si Propeta Joseph Smith (1805–1844) mipasabut kon sa unsa nga paagi nga ang pagbisita ni Elijah gikinahanglan aron matabangan kita nga modawat sa tanang mga panalangin sa priesthood:
“Ang espiritu, gahum, ug tawag ni Elijah mao, nga kamo adunay gahum sa paghupot sa yawe sa pagpadayag, mga ordinansa, mga orakulo, mga gahum ug mga tuga sa kahingpitan sa Melchizedek Priesthood ug sa gingharian sa Dios dinhi sa yuta; ug sa pagdawat, pag-angkon, ug pagpahigayon sa tanang mga ordinansa nga anaa sa gingharian sa Dios, gani ngadto sa pagbalik sa mga kasingkasing sa mga amahan ngadto sa mga anak, ug ang mga kasingkasing sa mga anak ngadto sa mga amahan, gani bisan kadtong didto sa langit. …
“… Unsa kini nga katungdanan ug trabaho ni Elijah? Kini mao ang usa ka pinakadako ug pinaka importate nga hilisgutan nga ang Dios mipahayag. Mopadala siya ni Elijah aron pag-seal sa mga anak ngadto sa mga amahan, ug ang mga amahan ngadto sa mga anak… …
“Usab: Ang doktrina o ang gahum sa pag-seal ni Elijah mao kining mosunod:—kon kamo adunay gahum sa pag-seal sa yuta ug sa langit, nan kinahanglan kita magmaalamon. Ang unang butang nga inyong buhaton, moadto ug mo-seal sa yuta sa inyong mga anak nga lalaki ug mga anak nga babaye, ug sa inyong kaugalingon ngadto sa inyong amahan sa mahangturong himaya” (Mga Pagtulun-an sa mga Presidente sa Simbahan: Joseph Smith [2007], 376–77).
Si Presidente Joseph Fielding Smith mipasabut kon sa unsa nga paagi nga ang pagbisita ni Elijah niadtong 1836 nakahimo nga posible ang daghang mga panalangin alang sa mga anak sa Dios pinaagi sa gahum sa priesthood:
“Ang misyon ni Elijah mao ang gahum sa sealing. Naghupot siya sa mga yawe diin ang mga ginikanan ma-seal ug ang mga anak ma-seal ngadto sa mga ginikanan. Gitugyan niya kini nga mga yawe diha ni Propeta Joseph Smith. Ug kana magamit usab sa mga patay ingon man sa mga buhi sukad sa pag-anhi ni Ginoong Jesukristo.
“… Apan unsa ang matang sa iyang misyon sa yuta niining ulahing mga adlaw? Kini mao ang pagpahiuli sa gahum ug awtoridad nga sa makausa gihatag ngadto sa mga tawo sa yuta ug diin importante nga makompleto ang kaluwasan ug kahimayaan sa tawo sa gingharian sa Dios. Sa laing mga pulong, mianhi si Elijah aron ipahiuli dinhi sa yuta, pinaagi sa pagtugyan ngadto sa mortal nga mga propeta nga gitudlo sa Ginoo, ang kahingpitan sa gahum sa priesthood. Kini nga priesthood naghupot sa mga yawe sa pagbugkos ug pag-seal dinhi sa yuta ug didto sa langit sa tanang mga ordinansa ug mga baruganan kalabut sa kaluwasan sa tawo, aron kini mahimong balido didto sa celestial nga gingharian sa Dios” (Doctrines of Salvation, 2:117).
Doktrina ug mga Pakigsaad 2:1. “Mahinungdanon ug makalilisang nga adlaw”
Ang “mahinungdanon ug makalilisang nga adlaw” nga gihisgutan sa Doktrina ug mga Pakigsaad 2:1 nagpasabut sa Ikaduhang Pag-anhi ni Jesukristo. Panahon kini sa kalipay ug kamaya alang niadtong nakaandam sa Iyang pag-anhi (tan-awa sa Malaquias 4:2–3; D&P 101:32–35), apan usa kini ka makalilisang nga panahon sa kalaglagan sa dautan (tan-awa sa Malaquias 4:1; D&P 29:9; 101:24–25).
Ang kwarto sa attic sa gitukod pag-usab nga balay nga troso diin nagpakita si anghel Moroni ngadto sa batan-ong Joseph Smith
Doktrina ug mga Pakigsaad 2:2. Kinsa ang mga amahan ug mga anak nga gihisgutan niini nga panagna?
Ang Doktrina ug mga Pakigsaad 2:2 nagtudlo nga ang mga anak ug mga amahan maimpluwensyahan sa saad nga pagbisita ni Elijah sa ulahing mga adlaw. Nagkomentaryo sa panagna nga si Elijah “motanom diha sa mga kasingkasing sa anak sa mga saad nga gihimo ngadto sa mga amahan” (D&P 2:2), si Elder Bruce R. McConkie (1915–1985) sa Korum sa Napulog Duha ka mga Apostoles mipasabut: “Kinsa ang mga amahan? Sila mao si Abraham, Isaac, ug Jacob, nga mao ang gihatagan sa mga saad. Unsa ang mga saad? Kini ang mga saad sa pagpadayon sa yunit sa pamilya sa kahangturan” (The Millennial Messiah: The Second Coming of the Son of Man [1982], 267; tan-awa usab sa D&P 27:10).
Ang pagpadayag sa ulahing mga adlaw makatabang nato nga makasabut nga ang mga miyembro sa Simbahan mao ang kaliwat ni Abraham, Isaac, ug Jacob pinaagi sa linya sa kaliwat o pinaagi sa pagsagop (tan-awa sa Abraham 2:9–10). Ang mga saad nga gihatag pinaagi sa pakigsaad ngadto niining karaan nga mga patriyarka gihatag usab ngadto sa mga Santos sa Ulahing mga Adlaw. Si Presidente Russell M. Nelson sa Korum sa Napulog Duha ka mga Apostoles mihulagway sa mga saad nga nakita sa pakigsaad nga gihimo sa Dios uban ni Abraham ug sa uban:
“Ang pakigsaad nga gihimo sa Dios uban kang Abraham ug sa wala madugay gipanghimatuod og usab uban ni Isaac ug ni Jacob usa ka talagsaong kahulugan. Kini naglangkob og daghang mga saad, nga naglakip:
“• Ni Jesus ang Kristo nga matawo pinaagi sa kaliwatan ni Abraham.
“• Sa mga kaliwat ni Abraham dili maihap, may katungod sa walay katapusang pagdaghan ug usab may katungod sa pagdala sa priesthood.
“• Ni Abraham nga mahimong amahan sa daghang nasud.
“• Sa mga yuta nga mapanunod sa iyang kaliwat.
“• Sa tanang kanasuran sa yuta mapanalanginan pinaagi sa iyang binhi.
“• Ug kana nga pakigsaad walay katapusan—gani ngadto sa ‘usa ka libo ka kaliwat’ [Deuteronomio 7:9; 1 Cronicas 16:15; Salmo 105:8].
“Pipila niining mga saad natuman na; ang uban wala pa. …
“… Atong nadawat, sama kanila sa karaan, ang balaang priesthood ug ang mahangturong ebanghelyo. Kita adunay katungod sa pagdawat sa kahingpitan sa ebanghelyo, pagpahimulos sa mga panalangin sa priesthood, ug pagpakasarang sa labing dako nga panalangin sa Dios—kana mao ang kinabuhing walay katapusan.
“Ang uban nato mga tinuod nga binhi ni Abraham; ang uban gipundok sa iyang pamilya pinaagi sa pagsagop. Ang Ginoo wala maghimo og kalainan. Madawat natong tanan ang gisaad nga mga panalangin—kon atong pangitaon ang Ginoo ug sundon ang Iyang mga sugo” (“Mga Pakigsaad,” Liahona, Nob. 2011, 87–88).
Usa ka lahi nga paggamit sa pulong mga amahan makita usab sa Doktrina ug mga Pakigsaad 2:2, diin ang panagna nag-ingon nga “ang mga kasingkasing sa mga anak mobati sa ilang mga amahan.” Sumala ni Presidente Joseph Fielding Smith, ang mga pulong nga “ilang mga amahan” nagpasabut sa atong patay na nga mga katigulangan kinsa namatay nga walay pribilehiyo sa pagdawat sa Ebanghelyo, apan kinsa nakadawat sa saad nga ang panahon moabut nga kana nga pribilehiyo ihatag ngadto kanila. Ang mga anak mao kadtong karon nga mga buhi kinsa nag-andam sa mga impormasyon sa kaliwatan ug kinsa nagpahigayon sa pagpuli nga mga ordinansa diha sa mga Templo” (Mga Pagtulun-an sa mga Presidente sa Simbahan: Joseph Fielding Smith [2013], 252).
Ang Anghel nga si Moroni Nagpakita ni Joseph Smith, ni Tom Lovell. Si Moroni nagpakita ngadto sa batan-ong Joseph Smith niadtong Septyembre 1823.
Doktrina ug mga Pakigsaad 2:2. “Ang kasingkasing sa mga anak mobati ngadto sa ilang mga amahan”
Ang plano sa Dios sa pagtubos sa mga patay wala mapahiuli diha-diha apan gihatag matag karon ug unya ngadto ni Propeta Joseph Smith ug sa iyang mga sumusunod. Ang panagna ni Moroni ngadto ni Joseph Smith niadtong 1823 mao ang unang pagtudlo niini nga hilisgutan nga gihatag niini nga dispensasyon. Kini nga instruksyon nadawat sayo kaayo sa proseso sa Pagpahiuli nga naghatag og gibug-aton sa kaimportante sa doktrina sa pamilya sa ebanghelyo ni Jesukristo.
Si Presidente Joseph Fielding Smith mipasabut sa tahas sa pamilya sa pagtubos sa mga patay: “Ang pagpabati sa mga kasingkasing sa mga anak ngadto sa mga amahan mao ang pagbutang o pagtisok diha sa kasingkasing sa mga anak nianang pagbati ug tinguha nga modasig kanila sa pagpangita sa mga rekord sa mga patay. Dugang pa, ang pagtisok sa tinguha ug sa inspirasyon diha sa ilang mga kasingkasing gikinahanglan. Kinahanglan gayud nga aduna sila niini nga sila unta mosulod sa balay sa Ginoo ug mopahigayon sa gikinahanglan nga buhat alang sa ilang mga amahan, kinsa namatay nga walay kahibalo sa ebanghelyo, o walay pribilehiyo sa pagdawat sa kahingpitan sa ebanghelyo” (Doctrines of Salvation, 2:127–28).
Doktrina ug mga Pakigsaad 2:2. Ang impluwensya sa gisaad nga pagbisita ni Elijah
Ang pagbisita ni propeta Elijah niadtong 1836 didto sa Templo sa Kirtland maoy sinugdanan sa espirituhanong impluwensya sa mga tawo sa tibuok yuta. Si Presidente Russell M. Nelson mihulagway sa epekto nga “ang Espiritu ni Elijah”:
“Ang pagbalik ni Elijah sa kalibutan nahitabo diha sa unang templo nga gitukod niini nga dispensasyon, diin siya ug ang ubang langitnong mga mensahero, ubos sa direksyon sa Ginoo, misalig sa espesyal nga mga yawe sa awtoridad sa priesthood ngadto sa gipahiuli nga Simbahan:
“• Si Moises mitugyan sa mga yawe sa pagpundok sa Israel;
“• Si Elias mitugyan sa kapaigoan sa ebanghelyo ni Abraham; ug
“• Si Elijah mianhi aron sa pagpabati sa mga kasingkasing sa mga amahan ngadto sa ilang mga anak ug sa mga anak ngadto sa ilang mga amahan.
“Tungod niana, ang natural nga pagbati tali sa mga henerasyon nagsugod sa paglambo. Kini nga pagpahiuli giubanan sa unsay gitawag usahay nga Espiritu ni Elijah—usa ka pagpakita sa Espiritu Santo nga nagsaksi sa balaan nga matang sa pamilya. Tungod niini, ang mga tawo sa tibuok kalibutan, bisan unsa pa ang ilang relihiyon, nagkapaspas ang ilang pagpangolekta og mga rekord sa patay na nga mga kabanay” (“A New Harvest Time,” Ensign, Mayo 1998, 34).
Si propeta Elijah nagpakita ngadto nila ni Joseph Smith ug Oliver Cowdery didto sa Templo sa Kirtland niadtong Abril 3, 1836.
Doktrina ug mga Pakigsaad 2:3. “Ang tibuok yuta sa hingpit malaglag”
Sa plano sa Ginoo sa katubsanan, usa sa mga katuyoan sa yuta mao ang mahimong katapusan nga celestial nga panimalay alang niadtong nakahimo ug nakatuman sa ilang mga pakigsaad uban sa Langitnong Amahan (tan-awa sa D&P 88:17–20). Usa kini ka dapit diin ang mga pamilya maghiusa sa pagpuyo sa kahangturan. Ang gahum sa sealing sa priesthood nga gipahiuli ni Elijah nakapasumpay sa mga bana ug mga asawa ug mga ginikanan ug mga anak—usa ka buhat nga importante alang sa kahimayaan sa mga buhi ug sa mga patay. Kon wala ang gahum sa sealing, ang mga anak sa Dios dili makadawat sa hingpit nga mga panalangin sa kahimayaan ug kini nga katuyoan sa paglalang sa yuta dili unta matuman.
Si Presidente Joseph Fielding Smith mipasabut: “Nganong pagalaglagon ang kalibutan? Tungod lamang kay walay pagkasumpay tali sa mga amahan ug sa mga anak—nga mao ang buluhaton alang sa mga patay—nan tanan kita magbarug nga isalikway; ang tanang buhat sa Dios mapakyas ug hingpit nga malaglag” (Mga Pagtulun-an: Joseph Fielding Smith, 250).
Si Elder Jeffrey R. Holland sa Korum sa Napulog Duha ka mga Apostoles miklaro og dugang nga ang importante nga lakang sa kaluwasan sa mga anak sa Dios mao ang pagpahiuli sa gahum sa pag-seal:
“Kon wala kana nga sumpay walay panaghiusa sa pamilya nga mahitabo sa kahangturan, ug sa pagkatinuod ang pamilya sa tawo mabiyaan sa kahangturan nga ‘walay gamut [mga katigulangan] ni sanga [kaliwatan].’
“Tungod kay … ang na-seal, nahiusa, naluwas didto sa celestial nga pamilya sa Dios mao ang labing taas nga katuyoan sa pagkamortal, ang bisan unsa nga kapakyasan dinhi usa gayud ka tunglo, maghimo sa tibuok plano sa kaluwasan nga ‘hingpit nga malaglag’” (Christ and the New Covenant: The Messianic Message of the Book of Mormon [1997], 297–98).