Kapitulo 6

Doktrina ug mga Pakigsaad 7; 13; 18

Pasiuna ug Timeline

Panahon sa paghubad sa Basahon ni Mormon niadtong April 1829, nagkalahi ang opinyon nila ni Joseph Smith ug Oliver Cowdery mahitungod kon si Apostol Juan namatay ba o nagpadayon sa pagpuyo sa yuta. Nangutana si Propeta Joseph Smith sa Ginoo pinaagi sa Urim ug Thummim ug nakadawat sa pagpadayag nga narekord sa Doktrina ug mga Pakigsaad 7. “Ang pagpadayag mao ang usa ka hinubad nga saysay sa talaan nga gibuhat diha sa papel katalan ni Juan” (D&P 7, ulohan sa seksyon) ug nagtudlo nga ang Ginoo mihatag ni Juan sa iyang tinguha nga magpakabuhi pa ug magdala og mga kalag ngadto ni Jesukristo hangtud sa Ikaduhang Pag-anhi.

Samtang naghubad sa 3 Nephi sa mga palid sa Basahon ni Mormon, sila si Joseph ug Oliver nakahibalo mahitungod sa awtoridad sa pagbunyag alang sa kapasayloan sa mga sala. Niadtong Mayo 15, 1829, miadto sila sa kakahoyan duol sa uma ni Joseph Smith sa Harmony, Pennsylvania, ug nag-ampo mahitungod niini nga awtoridad. Agig tubag sa ilang pag-ampo, si Juan nga Bautista nagpakita isip nabanhaw nga personahe ug mitugyan ngadto kanila sa Aaronic Priesthood. Ang mga pulong nga gisulti ni Juan nga Bautista anaa sa Doktrina ug mga Pakigsaad 13.

Niadtong Hunyo 1829, sa dihang hapit na mahuman paghubad ang Basahon ni Mormon didto sa panimalay ni Peter Whitmer Sr. sa Fayette, New York, si Propeta Joseph Smith nakadawat og pagpadayag nga adunay mga instruksyon mahitungod sa pagtukod sa Simbahan ni Kristo. Kini nga pagpadayag, nga narekord sa Doktrina ug mga Pakigsaad 18, mitawag nila ni Oliver Cowdery ug David Whitmer sa pagsangyaw sa ebanghelyo ug sa pagtudlo nila nga mangita sa napulog duha ka mga tawo nga moserbisyo isip mga Apostoles. Ang pagpadayag midetalye usab sa daghang mga katungdanan niadtong gitawag nga mga Apostoles.

Abril 1829Sila si Joseph Smith ug Oliver Cowdery nagpadayon sa paghubad sa bulawang mga palid.

Abril 1829Ang Doktrina ug mga Pakigsaad 7 nadawat.

Mayo 15, 1829Gipahiuli ni Juan nga Bautista ang Aaronic Priesthood (tan-awa sa Doktrina ug mga Pakigsaad 13).

Mayo–Hunyo 1829Gipahiuli nila ni Pedro, Santiago ug Juan ang Melchizedek Priesthood.

Hunyo 1829Ang Tulo ka mga Saksi gipakita sa bulawan nga mga palid.

Hunyo 1829Ang Doktrina ug mga Pakigsaad 18 nadawat.

Doktrina ug mga Pakigsaad 7: Dugang nga Makasaysayanong Background

Ang pangutana nila ni Propeta Joseph Smith ug Oliver Cowdery kon si Apostol Juan namatay ba o nagpabilin sa yuta hangtud sa Ikaduhang Pag-anhi ni Jesukristo gibase sa Juan 21:18–23. Niini nga tudling nanagna ang Ginoo sa kamatayon ni Pedro, ug dayon nangutana si Pedro sa Manluluwas unsay mahitabo ni Apostol Juan. Ang Ginoo mitubag, “Pananglitan maoy akong pagbuot nga magapabilin siya hangtud sa akong pag-anhi, unsa may imong labut?” (Juan 21:23). Ang pangutana mahitungod sa kapalaran ni Juan komon sa mga Kristiyano sa panahon ni Joseph Smith.

Sila si Joseph Smith ug Oliver Cowdery nakahukom sa pagsulbad sa ilang pangutana pinaagi sa pagpangutana sa Ginoo pinaagi sa Urim ug Thummim. Human mangutana sa Ginoo, nakadawat si Joseph sa pagpadayag nga narekord sa Doktrina ug mga Pakigsaad 7. Kini nga pagpadayag “mao ang usa ka hinubad nga saysay sa talaan nga gibuhat diha sa papel katalan ni Juan ug gitago pinaagi sa iyang kaugalingon” (D&P 7, ulohan sa seksyon). Wala kita masayud kon si Joseph Smith aduna ba gayuy aktwal nga papel katalan nga gihuptan. Tingali nakita niya ang papel katalan sa panan-awon o nakadawat sa hinubad nga mga pulong pinaagi sa Urim ug Thummim.

Imahe

Mapa 3: Amihanang Silangang Estados Unidos

Doktrina ug mga Pakigsaad 7

Si Juan nga Hinigugma usa ka nabalhin sa pagkahimaya nga binuhat nga nagtrabaho sa pagdala og mga kalag ngadto ni Kristo hangtud sa Ikaduhang Pag-anhi

Doktrina ug mga Pakigsaad 7:1–3. “Ikaw magpabilin hangtud Ako moabut sa akong himaya”

Gihatag sa Ginoo ang hangyo ni Apostol Juan nga gahum ibabaw sa kamatayon aron si Juan magpadayon sa pagpuyo ug pagdala og mga kalag ngadto ni Kristo (tan-awa sa Juan 21:21–23). Ang mga panalangin sa Ginoo ngadto ni Juan wala magpasabut nga si Juan dili na mamatay; hinoon, nagpasabut kini nga dili siya mamatay hangtud sa Ikaduhang Pag-anhi ni Jesukristo (tan-awa sa Mateo 16:28; Marcos 9:1; Lucas 9:27; 3 Nephi 28:7–8). Aron si Juan mabuhi pa sa yuta hangtud sa Ikaduhang Pag-anhi, ang iyang mortal nga lawas giusab aron mahimong usa ka nabalhin sa pagkahimaya nga binuhat. Ang nabalhin sa pagkahimaya nga mga binuhat mao ang “mga tawo kinsa giusab aron dili makasinati og sakit o kamatayon hangtud sa ilang pagkabanhaw ngadto sa pagka-imortal” (Giya ngadto sa mga Kasulatan, “Nabalhin sa Pagkahimaya nga mga Binuhat,” scriptures.lds.org).

Ang gitukod pag-usab nga balay nila ni Joseph ug Emma Smith sa Harmony, Pennsylvania

Doktrina ug mga Pakigsaad 7:4–5. Nagtinguha si Juan sa paghimo og mas dako nga trabaho

Agig tubag sa pangutana ni Pedro mahitungod sa kapalaran ni Apostol Juan, ang Manluluwas mipasabut nga si Juan nagtinguha nga magpabilin sa yuta ug magpadayon sa iyang trabaho. Si Elder Jeffrey R. Holland sa Korum sa Napulog Duha ka mga Apostoles migamit sa tinguha ni Juan sa paghulagway sa kaimportante sa pagsangyaw sa ebanghelyo:

“Si Apostol Juan mihangyo sa Ginoo nga siya, si Juan mahimo bang magpabilin sa yuta lapas sa normal nga gidugayon sa kinabuhi alang sa walay laing katuyoan kay sa pagdala og dugang nga mga kalag ngadto sa Dios. Sa paghatag niana nga hangyo, ang Manluluwas miingon nga kini ‘usa ka dakong buhat’ ug usa ka halangdong ‘tinguha’ bisan nianang nagtinguha nga moadto sa presensya sa Ginoo ‘nga dinalian’ [tan-awa sa D&P 7].

“Sama sa tanang mga propeta ug mga apostoles, si Propeta Joseph Smith nakasabut sa lawom nga kahulugan sa hangyo ni Juan sa dihang miingon siya, ‘Human sa tanan nga nasulti, ang [atong] pinakadako ug pinakaimportante nga katungdanan mao ang pagsangyaw sa Ebanghelyo’ [Teachings of the Prophet Joseph Smith, sel. Joseph Fielding Smith (1976), 308]” (“Witnesses unto Me,” Ensign, Mayo 2001, 16).

Doktrina ug mga Pakigsaad 7:6. “Siya moalagad alang niadto kinsa … nagpuyo ibabaw sa yuta”

Bisan og nasayud kita nga si Apostol Juan gitugutan nga magpabilin sa yuta, wala kaayo kita makahibalo mahitungod sa iyang pangalagad isip nabalhin sa pagkahimaya nga binuhat. Nasayud kita nga si Juan nagpakita uban sa nabanhaw nga sila si Pedro ug Santiago aron itugyan ang Melchizedek Priesthood ngadto nila ni Propeta Joseph Smith ug Oliver Cowdery. Usab, sumala sa istorya ni John Whitmer sa usa ka komperensya sa Simbahan niadtong Hunyo 1831, sa Kirtland, Ohio, “ang Espiritu sa Ginoo gibati ni Joseph [Smith] sa dili kasagaran nga paagi, ug nanagna siya nga si Juan ang Tigpadayag anaa uban sa Napulo ka Tribo sa Israel nga nahisalaag … , sa pag-andam nila alang sa ilang pagpauli gikan sa dugay nga pagkatibulaag” (sa History of the Church, 1:176).

Doktrina ug mga Pakigsaad 7:7. “Ug nganha kaninyong tulo Ako mohatag … niini nga gahum ug sa mga yawe niini nga pagpangalagad”

Misaad ang Ginoo nila ni Pedro, Santiago, ug Juan nga makabaton sila sa mga yawe sa pagpangalagad alang sa ilang dispensasyon hangtud sa Ikaduhang Pag-anhi (tan-awa sa D&P 27:12–13; tan-awa usab sa Mateo 17:1–9). Si Presidente Joseph Fielding Smith (1876–1972) mipasabut unsa kini nga mga yawe: “Ang mga yawe sa pagpangalagad nga gisulti ni Juan … gihatag ngadto nila ni Pedro, Santiago, ug kaniya, naglangkob sa awtoridad sa Kapangulohan sa Simbahan sa ilang dispensasyon” (Church History and Modern Revelation [1953], 1:49). Sila si Pedro, Santiago, ug Juan mihatag niining sama nga yawe ngadto nila ni Propeta Joseph Smith ug Oliver Cowdery, naghatag nila og awtoridad sa pagdumala ug paggiya sa Simbahan sa Dios dinhi sa yuta niining katapusang dispensasyon, ang dispensasyon sa kahingpitan sa mga panahon.

Doktrina ug mga Pakigsaad 13: Dugang nga Makasaysayanong Background

Ang milagroso nga buhat sa paghubad sa mga palid sa Basahon ni Mormon dali nga miuswag niadtong Abril ug Mayo 1829. Si Oliver Cowdery mihulagway sa iyang mga pagbati mahitungod niini nga proseso: “Kini ang mga adlaw nga dili gayud makalimtan—nga naglingkod ubos sa tunog sa usa ka tingog nga gidiktahan pinaagi sa paglamdag sa langit, nakapahigmata sa tuman nga pagpasalamat niini nga dughan! Adlaw-adlaw ako mipadayon, sa walay hunong, sa pagsulat gikan sa iyang ba-ba, samtang siya [Joseph Smith] mihubad gamit ang Urim ug Thummim” (Joseph Smith—Kasaysayan 1:71, note).

Niadtong Mayo, si Propeta Joseph Smith ug Oliver Cowdery naghubad sa “ang asoy nga gihatag mahitungod sa pangalagad sa Manluluwas ngadto sa salin sa binhi ni Jacob, dinhi niining [kayutaan sa Amerika] dako nga kayutaan” (Joseph Smith—Kasaysayan 1:71, note). Kana nga istorya naglakip sa 3 Nephi 9–28, diin ang bunyag pinaagi sa tukma nga awtoridad gihisgutan sa makadaghang higayon. Sila si Joseph ug Oliver nagtinguha nga makahibalo og dugang pa ug miadto sa kakahoyan aron sa pagpangutana sa Ginoo pinaagi sa pag-ampo alang sa direksyon.

Girekord sa Propeta, “Samtang kami nagbuhat sa ingon, nag-ampo ug nagtawag ngadto sa Ginoo, usa ka sulugoon nga gikan sa langit mikunsad sa usa ka panganod sa kahayag, ug samtang nagpandong sa iyang mga kamot kanamo, siya mi-orden kanamo” (Joseph Smith—Kasaysayan 1:68).

Ang mensahero nga anghel mao si Juan nga Bautista, karon nahimaya, nabanhaw nga binuhat, ug iyang gisultihan sila si Joseph ug Oliver nga bunyagan ang usag usa. Tuod man, miadto sila sa duol nga Suba sa Susquehanna, diin gibunyagan ni Joseph si Oliver, ug dayon si Oliver mibunyag ni Joseph. Human magbinunyagay, ilang giordinahan ang usag usa ngadto sa Aaronic Priesthood, sumala sa sugo ni Juan nga Bautista. (Tan-awa sa Joseph Smith—Kasaysayan 1:70–72.)

Gisultihan usab ni Juan nga Bautista sila si Joseph Smith ug Oliver Cowdery nga siya naglihok ubos sa direksyon nila ni Pedro, Santiago, ug Juan, kinsa naghupot sa mga yawe sa Melchizedek Priesthood. Mipasabut siya nga sa tukmang panahon sila si Joseph ug Oliver makadawat usab sa Melchizedek Priesthood. (Tan-awa sa Joseph Smith—Kasaysayan 1:72.) Ang ebidensya sa kasaysayan nagsugyot nga sila si Pedro, Santiago, ug Juan nagpakita ngadto nila ni Propeta Joseph Smith ug Oliver Cowdery sa wala pa ang Hunyo 1, 1829, ug mitugyan sa Melchizedek Priesthood ngadto kanila (tan-awa sa Larry C. Porter, “The Restoration of the Aaronic and Melchizedek Priesthoods,” Ensign, Dis. 1996, 33).

Ang Aaronic Priesthood gipahiuli ni Juan nga Bautista duol sa panimalay ni Joseph Smith sa Harmony, Pennsylvania.

Doktrina ug mga Pakigsaad 13

Gitugyan ni Juan nga Bautista ang Aaronic Priesthood diha nila ni Joseph Smith ug Oliver Cowdery

Doktrina ug mga Pakigsaad 13:1. Usa ka pagpasabut sa mga yawe sa priesthood

Ang pagpahiuli sa Aaronic ug Melchizedek Priesthood nahitabo sa dihang ang langitnong mga mensahero mitugyan sa awtoridad ug mga yawe ngadto nila ni Propeta Joseph Smith ug Oliver Cowdery (tan-awa sa D&P 13:1; 110:11–16; 128:20–21). Si Presidente Joseph F. Smith (1838–1918) mipasabut sa kalainan tali sa awtoridad sa priesthood ug sa mga yawe sa priesthood:

“Ang Priesthood sa kinatibuk-an mao ang awtoridad nga gihatag ngadto sa tawo aron makalihok alang sa Dios. Ang matag tawo nga giordinahan sa bisan unsa nga ang-ang sa Priesthood aduna niini nga awtoridad nga gitugyan kaniya.

“Apan gikinahanglan nga ang matag lihok nga gipahigayon ubos niini nga awtoridad kinahanglan nga buhaton sa tukma nga panahon ug dapit, sa tukma nga paagi, ug pinasubay sa tukma nga han-ay. Ang gahum sa paggiya niini nga mga paningkamot naglangkob sa mga yawe sa Priesthood” (Mga Pagtulun-an sa mga Presidente sa Simbahan: Joseph F. Smith [1998], 171)

*Diha Kaninyo nga Akong Kauban nga mga Sulugoon,* ni Linda Curley Christensen. Niadtong Mayo 15, 1829, ang Aaronic Priesthood gipahiuli ni Juan Bautista ngadto nila ni Joseph Smith ug Oliver Cowdery.

Doktrina ug mga Pakigsaad 13:1. “Ang mga yawe sa pagpangalagad sa mga anghel”

Ang Doktrina ug mga Pakigsaad naghulagway nga ang mga anghel mao ang mga sulugoon sa Ginoo kinsa mohatud sa mga mensahe ug mangalagad ngadto sa mga anak sa Dios dinhi sa yuta (tan-awa sa D&P 7:5–6; 20:5–10; 29:42; 43:25; 84:42; 103:19–20; 109:22). Makat-unan nato gikan sa Basahon ni Mormon nga “pinaagi sa hugot nga pagtuo ang mga milagro mahimo; ug pinaagi sa hugot nga pagtuo ang mga anghel mopakita ug mangalagad sa mga tawo; busa, kon kini nga mga butang mohunong alaot ngadto sa mga katawhan, kay kini tungod sa pagkawalay pagtuo, ug ang tanan kawang.” (Moroni 7:37). Ang mga anghel mangalagad ngadto sa mga lalaki ug mga babaye, ug mga bata (tan-awa sa Alma 32:23).

Si Juan nga Bautista mipasabut ngadto nila ni Propeta Joseph Smith ug Oliver Cowdery nga ang Aaronic Priesthood “naghupot sa mga yawe sa pagpangalagad sa mga anghel” (D&P 13:1). Si Elder Dallin H. Oaks sa Korum sa Napulog Duha ka mga Apostoles mitanyag sa mosunod nga panabut:

“Unsay gipasabut nga ang Aaronic Priesthood naghupot ‘sa yawe sa pagpangalagad sa mga anghel’ ug sa ‘ebanghelyo sa paghinulsol ug sa bunyag, ug sa kapasayloan sa mga sala’ [D&P 84:26–27]? Ang kahulugan makita sa ordinansa sa bunyag ug sa sakrament. Ang bunyag alang sa kapasayloan sa mga sala, ug ang sakrament mao ang pagbag-o sa mga pakigsaad ug mga panalangin sa bunyag. Ang duha kinahanglang unhan sa paghinulsol. Kon kita motuman sa mga pakigsaad nga gihimo niini nga mga ordinansa, gisaaran kita nga makabaton kanunay sa Iyang Espiritu uban kanato. Ang pagpangalagad sa mga anghel mao ang usa sa mga pagpakita niana nga Espiritu. …

“… Isip usa ka batan-ong naghupot sa Aaronic Priesthood, wala ko magtuo nga makakita og anghel, ug naghunahuna ko unsay labut sa maong mga pagpakita sa Aaronic Priesthood.

“… Apan ang pagpangalagad sa mga anghel mahimo usab nga dili makita. Ang mga mensahe sa anghel mapadala usab pinaagi sa usa ka tingog o pinaagi lamang sa mga hunahuna o mga pagbati nga ipahayag ngadto sa salabutan. …

“… Ang kadaghanan nga komunikasyon sa anghel bation o madunggan kay sa makita. …

“Sa kinatibuk-an, ang mga panalangin sa pagpakig-uban sa espiritu ug komunikasyon maangkon lamang niadtong kinsa limpyo. Sumala sa gipasabut sa sayo pa, pinaagi sa Aaronic Priesthood nga mga ordinansa sa bunyag ug sa sakrament, malimpyohan kita sa atong mga sala ug gisaaran nga kon tumanon nato ang atong mga pakigsaad makabaton kita kanunay sa Iyang Espiritu nga magauban kanato. Nagtuo ko nga ang saad wala lamang maghisgot sa Espiritu Santo apan usab sa pagpangalagad sa mga anghel, ‘mga anghel mamulong pinaagi sa gahum sa Espiritu Santo; busa, sila namulong sa mga pulong ni Kristo’ (2 Ne. 32:3). Mao nga kadtong naghupot sa Aaronic Priesthood nag-abli sa pultahan alang sa tanang mga miyembro sa Simbahan kinsa takus nga moambit sa sakrament aron makatagamtam sa pagpakig-uban sa Espiritu sa Ginoo ug sa pagpangalagad sa mga anghel” (“The Aaronic Priesthood and the Sacrament,” Ensign, Nob. 1998, 37–39).

Doktrina ug mga Pakigsaad 13:1. Ang mga yawe sa paghinulsol ug bunyag alang sa kapasayloan sa mga sala

Si Elder Dallin H. Oaks mipasabut unsay gipasabut sa paghupot sa mga yawe sa ebanghelyo sa paghinulsol ug bunyag alang sa kapasayloan sa mga sala:

“Walay usa [nato] nga buhi nga walay sala sukad sa [atong] bunyag. Kon walay pipila ka probisyon alang sa dugang nga paglimpyo human sa atong bunyag, ang matag usa nato nawad-an sa mga butang nga espirituhanon. …

“Gisugo kita sa paghinulsol sa atong mga sala ug sa pagduol ngadto sa Ginoo uban sa masulub-on nga kasingkasing ug mahinulsulon nga espiritu ug moambit sa sakrament agig pagtuman sa mga pakigsaad niini. Kon bag-uhon nato ang atong mga pakigsaad sa bunyag niining paagiha, ang Ginoo mobag-o sa epekto sa paglimpyo sa atong bunyag. Niining paagiha nahimo kita nga limpyo ug makabaton kanunay sa Iyang Espiritu uban kanato. …

“Dili kita makasulti pa og labaw sa kaimportante sa Aaronic Priesthood dinhi niini. Kining tanang importante nga mga lakang sa kapasayloan sa mga sala ipahigayon pinaagi sa makaluwas nga ordinansa sa bunyag ug sa makapabag-o nga ordinansa sa sakrament. Kini nga mga ordinansa ipahigayon sa mga naghupot sa Aaronic Priesthood ubos sa direksyon sa bishopric, kinsa naggamit sa mga yawe sa ebanghelyo sa paghinulsol ug sa bunyag ug sa kapasayloan sa mga sala” (“The Aaronic Priesthood and the Sacrament,” 38).

Doktrina ug mga Pakigsaad 13:1. Unsay gipasabut sa ang mga anak ni Levi maghalad “og halad ngadto sa Ginoo diha sa pagkamatarung”?

Sa karaang mga panahon, gisugo sa Dios ang Iyang katawhan sa paghalad og mga sakripisyo nga hayop isip kabahin sa ilang pagsimba. Ang katuyoan sa pagpaagas og dugo sa usa ka hayop mao ang pagtabang sa mga tawo nga magpaabut pinaagi sa hugot nga pagtuo ngadto sa panahon nga ang dugo ni Jesukristo ipaagas aron iula alang sa ilang mga sala. Gikan sa panahon ni Moises hangtud sa kamatayon ni Jesukristo, ang balaod ni Moises nagdiktar nga ang mga sakripisyo nga hayop ug mga halad nga sinunog ipahigayon sa mga pari nga nangalagad sa tabernakulo o sa templo. Kini nga mga pari mga kaliwat ni Levi nga gitudlo sa Ginoo nga moserbisyo sa santuwaryo (tan-awa sa Numeros 18:20–21). Sa ingon ang termino nga “mga anak ni Levi” nagpasabut sa mga naghupot sa priesthood.

Ang mga kasulatan naghulagway og pipila ka importante nga mga paagi nga ang mga miyembro sa Simbahan makahimo og “halad ngadto sa Ginoo diha sa pagkamatarung” (D&P 13:1). Ang Basahon ni Mormon nagtudlo nato nga “moduol ngadto kang Kristo … ug ihalad ang [atong] tibuok nga mga kalag ingon nga usa ka paghalad ngadto kaniya” (Omni 1:26). Nanagna si Isaias nga sa katapusang mga adlaw, kadtong kinsa gipundok sa Ginoo “ila nga dad-on ang tanan [nilang] mga kaigsoonan gikan sa tanan nga mga nasud alang sa usa ka halad ngadto sa Ginoo” (Isaias 66:20), nagpasabut nga kadtong kinsa nakabig dad-on ngadto sa templo. Dugang pa, si Propeta Joseph Smith mihatag og dinasig nga instruksyon nga ang mga Santos sa Ulahing mga Adlaw kinahanglang mohalad og “usa ka halad sa pagkamatarung; ug … kita mohalad sa sulod sa iyang balaan nga templo … usa ka basahon nga naglangkob sa mga talaan sa atong mga patay.” (D&P 128:24).

Kabahin sa sakripisyo nga hayop, si Propeta Joseph Smith (1805–1844) mihatag sa mosunod nga pagpahayag:

“Gituohan sa kadaghanan kana nga sakripisyo hingpit nga gihunong sa dihang ang Dakong Sakripisyo [mao kana, ang sakripisyo ni Ginoong Jesus] gihalad, ug nga wala na kinahanglana ang ordinansa sa sakripisyo sa umaabut: apan kinsa kadtong mopahayag niini wala makasinati sa mga katungdanan, pribilehiyo ug sa awtoridad sa priesthood, o uban sa mga Propeta.

“Ang halad sa sakripisyo konektado ug may kabahin sa mga katungdanan sa Priesthood. Nagsugod kini sa Priesthood, ug magpadayon hangtud sa pag-anhi ni Kristo, gikan sa henerasyon ngadto sa henerasyon. …

“Kini nga mga sakripisyo, ingon man usab ang matag ordinansa nga iya sa Priesthood, kon, ang Templo sa Ginoo pagatukuron, ug ang mga anak ni Levi mabalaan, hingpit nga mapahiuli ug magamit ang tanang mga gahum niini, mga sangputanan, ug mga panalangin. Anaa na kini kaniadto ug sa umaabut kon ang mga gahum sa [Melchizedek] Priesthood mapakita na ang tanan; kay kon dili sa unsa nga paagi nga mapahinabo ang pagpahiuli sa tanang mga butang nga gipamulong sa balaan nga mga Propeta? Dili kini pagasabton nga ang balaod ni Moises i-establisar pag-usab uban sa tanang mga tulumanon ug nagkalain-laing mga seremonya, wala gayud kini hisguti sa mga Propeta; apan kadtong mga butang nga diha na sa wala pa ang panahon ni Moises, sa ato pa, ang sakripisyo, magpadayon” (sa History of the Church, 4:211–12).

Si Presidente Joseph Fielding Smith mihatag og dugang nga pagpatin-aw mahitungod sa sakripisyo nga hayop sa katapusang mga adlaw: “Ang sakripisyo sa mga hayop pagahimoon sa pagkompleto sa pagpahiuli kon ang templo nga gihisgutan pagatukuron; sa sinugdanan sa milenyum, o sa pagpahiuli, mga sakripisyo sa dugo ipahigayon og dugay-dugay aron sa pagkompleto sa kahingpitan sa pagpahiuli niini nga dispensasyon. Pagkahuman ang sakripisyo himoon sa laing karakter” (Doctrines of Salvation, comp. Bruce R. McConkie [1955], 3:94).

Doktrina ug mga Pakigsaad 18: Dugang nga Makasaysayanong Background

Gipadayag sa Ginoo ngadto ni Propeta Joseph Smith, tingali sayo niadtong 1828, nga ang Iyang Simbahan pagatukuron pag-usab sa makausa dinhi sa yuta (tan-awa sa D&P 10:53–55). Niadtong Hunyo 1829, sila si Joseph Smith ug Oliver Cowdery nagpadayon sa paghubad sa Basahon ni Mormon didto sa panimalay ni Peter Whitmer Sr. sa Fayette, New York. Niining higayuna, sila si Joseph ug Oliver nagtinguha usab unsaon sa paggamit sa mga yawe sa Melchizedek Priesthood nga bag-o lang gitugyan kanila sa langitnong mga mensahero. Samtang nag-ampo sa usa ka kwarto sa panimalay sa Whitmer, ang pulong sa Ginoo miabut ngadto kanila ug misugo nila sa paggamit sa priesthood sa pag-orden og mga elder, pagpangalagad sa sakrament, ug sa pagtugyan sa gasa sa Espiritu Santo pinaagi sa pagpandong sa mga kamot. Hinoon, ang Ginoo misugo nila sa paghulat sa pagpahigayon niini nga mga ordinansa hangtud adunay grupo sa mga tumutuo ang mapundok. (Tan-awa sa The Joseph Smith Papers, Histories, Volume 1: Joseph Smith Histories, 1832–1844, ed. Karen Lynn Davidson ug uban pa [2012], 326, 328.)

Samtang naghulat sila sa sugo sa Ginoo sa pag-organisar sa Simbahan, ang Propeta ug si Oliver Cowdery hapit na mahuman sa paghubad sa Basahon ni Mormon, nga naglakip sa paghubad sa mga basahon sa 3 Nephi ug Moroni. Kining duha ka libro adunay mga instruksyon sa mga ordinansa sa priesthood ug pamaagi sa Simbahan, nga maoy nakadasig ug nakagiya nila samtang namalandong sa panahon sa dihang ang Ginoo mosugo nila sa pag-organisar sa Iyang Simbahan pag-usab dinhi sa yuta.

Dungan sa mga panghitabo niini nga panahon ang Propeta nakadawat sa pagpadayag nga narekord sa Doktrina ug mga Pakigsaad 18. Kini nga pagpadayag alang nila ni Joseph Smith, Oliver Cowdery, ug David Whitmer, naghatag og direksyon mahitungod sa pagtukod sa Simbahan. Kini adunay mga instruksyon usab ngadto niadtong kinsa tawagon isip Napulog Duha ka mga Apostoles.

*Ang Tingog nila ni Pedro, Santiago, ug Juan,* ni Linda Curley Christensen. Ang Melchizedek Priesthood gipahiuli nila ni Pedro, Santiago, ug Juan ngadto nila ni Joseph Smith ug Oliver Cowdery.

Doktrina ug mga Pakigsaad 18:1–25

Ang Ginoo mihatag og mga instruksyon alang sa pagtukod sa Iyang Simbahan ug sa pagtawag nila ni Oliver Cowdery ug David Whitmer sa pagsangyaw og paghinulsol

Doktrina ug mga Pakigsaad 18:1–5. “Salig sa mga butang nga gisulat”

Niadtong Hunyo 1829, samtang sila si Propeta Joseph Smith ug Oliver Cowdery mitapos sa paghubad sa Basahon ni Mormon, gipadayag sa Ginoo ang direksyon kabahin kon unsaon sa pagtukod sa Simbahan sa pag-andam sa panahon nga ang Simbahan pormal nga i-organisar (tan-awa sa D&P 18, ulohan sa seksyon). Sa paggiya ni Oliver niini nga paningkamot, ang Ginoo mitambag kaniya sa pagsalig sa mga butang nga gisulat diha sa Basahon ni Mormon. Sa wala pa maorganisar ang Simbahan, si Oliver migamit sa Basahon ni Mormon aron maghimo og dokumento sa lista sa importante nga mga ordinansa ug mga pakigsaad nga gitawag og “Mga Artikulo sa Simbahan ni Kristo.” Kini nga dokumento nahimong giya sa mga tumutuo sa nag-unang mga bulan sa wala pa pormal nga maorganisar ang Simbahan niadtong Abril 6, 1830. (Tan-awa sa The Joseph Smith Papers, Documents, Volume 1: July 1828–June 1831, ed. Michael Hubbard MacKay ug uban pa [2013], 368–69.)

Doktrina ug mga Pakigsaad 18:9–16. Sila si Oliver Cowdery ug David Whitmer gitawag sa samang katungdanan ni Pablo

Sa wala madugay human magpakita si Moroni ngadto sa Tulo ka mga Saksi, sila si Oliver Cowdery ug David Whitmer, duha sa mga saksi, gisugo sa “pagsangyaw og paghinulsol ngadto niini nga mga katawhan” (D&P 18:14). Ang Ginoo miingon nga sila “natawag bisan niana nga mao gihapon nga katungdanan diin [si Apostol Pablo] gitawag.” (D&P 18:9). Sumala sa narekord sa Mga Buhat 26:15–20, gipasabut ni Pablo ngadto ni Haring Agripa nga ang Ginoo mitawag kaniya sa “pag-alagad ug pagpanghimatuod” sa mga butang nga iyang nakita (Mga Buhat 26:16). Miingon si Pablo nga ang iyang katungdanan mao ang pagsangyaw “ngadto kanila sa Damasco, unya sa Jerusalem, ug sa tibuok kayutaan sa Judea” (Mga Buhat 26:20) ingon man usab sa mga Hentil, “aron sa pagbuka sa ilang mga mata, aron sila managpamali gikan sa kangitngit ngadto sa kahayag” (Mga Buhat 26:18). Human sa iyang pagkakabig, nagtrabaho si Pablo sa nahibilin sa iyang kinabuhi sa pagtabang sa uban nga maghinulsol ug makabig ngadto sa ebanghelyo ni Jesukristo.

Ang pagpahiuli sa Melchizedek Priesthood nahitabo sa kamingawan tunga-tunga sa Harmony, Pennsylvania, ug Colesville, New York (litrato ca. 1907).

Doktrina ug mga Pakigsaad 18:10. “Ang bili sa kalag mahinungdanon sa panan-aw sa Dios”

Sila si Oliver Cowdery ug David Whitmer gipahinumduman nga ang pagsangyaw sa ebanghelyo importante tungod kay ang mga kalag sa mga anak sa Dios bililhon (tan-awa sa D&P 18:10). Si Presidente Thomas S. Monson mihatag sa mosunod nga istorya mahitungod sa bili sa usa ka kalag:

“Niadtong Marso 1967, sa unang mga adlaw sa akong pagserbisyo isip usa ka sakop sa Konseho sa Napulog Duha, nagtambong ko og komperensya sa Monument Park West Stake sa Siyudad sa Salt Lake. Ang akong kompanyon alang sa komperensya usa ka sakop sa General Church Welfare Committee, nga si Paul C. Child. …

“Sa dihang oportunidad na niya ang pag-apil, iyang gidala ang Doktrina ug mga Pakigsaad ug mibiya sa pulpito aron mobarug atubangan sa mga kaigsoonan sa priesthood nga maoy iyang gitumong sa iyang mensahe. Miabli siya sa seksyon 18 ug nagsugod sa pagbasa sa [mga bersikulo 10 ug 15]. …

“Dayon si Presidente Child nangutana sa kaigsoonan: ‘Unsay bili sa usa ka kalag sa tawo?’ Naglikay siya nga motawag sa bishop, presidente sa stake, o high councilor para sa tubag. Hinoon, mipili siya sa presidente sa elders quorum—usa ka brother nga medyo gikapoy ug wala makakuha sa kaimportante sa pangutana.

“Ang nakuratan nga tawo mitubag, ‘Brother Child, mahimo bang usbon nimo ang pangutana?’

“Giusab ang pangutana: ‘Unsa ang bili sa usa ka kalag sa tawo?’

“… Nag-ampo ko og maayo alang nianang presidente sa korum. Nagpabilin siya nga hilom nga ingon og dugay na kaayo ug dayon mipahayag, ‘Brother Child, ang bili sa kalag sa tawo mao ang iyang kapasidad nga mahimong Dios.’

“Ang tanan nga nanambong namalandong niana nga tubag. Mibalik si Brother Child ngadto sa pulpito, misandig nako, ug miingon, ‘Usa ka bug-at nga tubag; usa ka bug-at nga tubag!’ Mipadayon siya sa iyang mensahe, apan nagpadayon ko sa pagpamalandong nianang makadasig nga tubag” (“My Brother’s Keeper,” Ensign, Nob. 1994, 43).

Si Presidente Monson sa wala madugay mipahayag: “Usab, kita dunay responsibilidad sa pagtan-aw sa indibidwal dili kon unsa sila karon apan kon unsa sila sa umaabut. Ako mangamuyo sa paghunahuna nila sa ingon niini nga paagi” (“Tan-awa ang Uban kon Unsa Sila sa Umaabut,” Liahona, Nob. 2012, 70).

Doktrina ug mga Pakigsaad 18:15–16. Unsay buot ipasabut sa pagsangyaw og paghinulsol?

Si Elder Neil L. Andersen sa Korum sa Napulog Duha ka mga Apostoles mipasabut nga ang “pagsangyaw og paghinulsol nagpasabut lang sa pagtabang sa mga tawo nga mobalik ngadto sa Dios” (“Preparing for Your Spiritual Destiny” [Brigham Young University fireside address, Ene. 10, 2010], 7, speeches.byu.edu).

Doktrina ug mga Pakigsaad 18:20. “Ayaw pakig-away … gawas sa simbahan sa yawa”

Ang Doktrina ug mga Pakigsaad 18:20 kinahanglang dili sabton isip usa ka sugo sa pagpakig-away o pakigdebati sa uban mahitungod sa ebanghelyo. Si Presidente Joseph Fielding Smith mitudlo, “Sa dihang gisugo kita sa ‘ayaw pakig-away sa uban nga simbahan gawas sa simbahan sa yawa,’ kinahanglan nga masabtan nato nga mao kini ang instruksyon ngari nato nga makig-away batok sa tanang dautan, kana nga supak sa pagkamatarung ug kamatuoran” (Church History and Modern Revelation, 1:83). Dili kini panawagan sa pagpakigbatok sa ubang mga simbahan o sa ilang mga sakop.

Doktrina ug mga Pakigsaad 18:21–25. Ang tanan kinahanglang modala sa ilang kaugalingon sa ngalan ni Kristo

Pinaagi sa paghinulsol, bunyag, ug paglahutay hangtud sa katapusan, gipakita nato ang atong tinguha sa pagdala sa ngalan ni Kristo ngari nato. Si Presidente Henry B. Eyring sa Unang Kapangulohan mipasabut unsa ang gipasabut niana: “Misaad kita sa pagdala sa Iyang ngalan ngari nato. Kana nagpasabut nga kita kinahanglan gayud nga makakita sa atong kaugalingon ingon nga Iya. Ato Siyang unahon diha sa atong mga kinabuhi. Kita gusto sa unsay Iyang gusto kay sa unsay atong gusto o unsay gitudlo sa kalibutan nga atong gustohon” (“That We May Be One,” Ensign, Mayo 1998, 67).

Alang sa dugang impormasyon mahitungod sa pagdala ngari nato sa ngalan ni Jesukristo, tan-awa ang komentaryo sa Doktrina ug mga Pakigsaad 20:77, 79 niini nga manwal.

Doktrina ug mga Pakigsaad 18:26–47

Ang Ginoo mipadayag sa calling ug misyon sa Napulog Duha ka mga Apostoles

Doktrina ug mga Pakigsaad 18:27–32. “Ang Napulog Duha … modala diha kanila sa akong ngalan uban sa hingpit nga katuyoan sa kasingkasing.”

Ang Korum sa Napulog Duha ka mga Apostoles naorganisar niadtong Pebrero 1835. Hinoon, unom ka tuig sa sayo pa, niadtong Hunyo 1829, si Propeta Joseph Smith nakadawat og pagpadayag nga narekord sa Doktrina ug mga Pakigsaad 18. Kini nga pagpadayag adunay mga instruksyon mahitungod sa misyon sa Napulog Duha sa pagpaabut sa ilang tawag. Nagpasabut kini nga ang Napulog Duha kinahanglang mopahayag sa ebanghelyo ngadto sa mga Hentil ug sa mga Judeo, sa pagdala nganha kanila sa ngalan ni Jesukristo, sa paghatag og importante nga mga ordinansa, ug sa pag-organisar sa trabaho sumala sa giya sa Espiritu Santo.

Si Elder Dallin H. Oaks sa Korum sa Napulog Duha ka mga Apostoles mipasabut unsay gipasabut alang sa mga Apostoles sa pagdala nganha kanila sa ngalan ni Jesukristo: “Daghang mga kasulatan nga naghisgot ‘sa ngalan ni Jesukristo’ klaro nga nagpasabut sa awtoridad sa Manluluwas. Mao gayud kini ang kahulugan nga gipasabut sa dihang ang seventy mi-report ngadto ni Jesus nga ‘bisan pa gani ang mga yawa nagapailalum nga masinugtanon kanamo tungod sa imong ngalan.’ (Lucas 10:17.) Ang Doktrina ug mga Pakigsaad naghatag niining sama nga kahulugan sa dihang naghulagway kini sa Napulog Duha niini nga dispensasyon nga ‘sila kinsa magtinguha sa pagdala diha kanila sa akong ngalan uban sa hingpit nga katuyoan sa kasingkasing.’ (D&P 18:27.) Ang Napulog Duha sa wala madugay gitudlo nga ‘talagsaon nga mga saksi sa ngalan ni Kristo sa tibuok kalibutan,’ ug ingon sa ‘pagpangalagad sa ngalan sa Ginoo, ubos sa pagdumala sa Kapangulohan sa Simbahan.’ (D&P 107:23, 33.)” (“Taking upon Us the Name of Jesus Christ,” Ensign, Mayo 1985, 81).

Doktrina ug mga Pakigsaad 18:34–36. “Kamo nakadungog sa akong tingog”

Ang Ginoo misulti sa umaabut nga mga Apostoles nga ang mga pulong nga anaa sa Doktrina ug mga Pakigsaad 18 wala gihatag sa tawo apan gihatag pinaagi sa Iyang tingog. Si Elder Kim B. Clark sa Seventy mipasabut unsay kinahanglan natong buhaton aron makadungog sa tingog sa Ginoo: “Kon atong tan-awon si Kristo ug ablihan ang atong mga mata ug dalunggan, ang Espiritu Santo manalangin kanato nga makakita ni Ginoong Jesukristo nga naglihok sa atong kinabuhi, naglig-on sa atong pagtuo Kaniya uban sa kasiguroan ug panghimatuod. Molambo ang atong pagtan-aw sa atong mga kaigsoonan sama sa pagtan-aw sa Dios kanila, uban sa gugma ug kalooy. Atong mabati ang tingog sa Manluluwas diha sa mga kasulatan, sa mga paghunghong sa Espiritu, ug diha sa mga pulong sa buhing mga propeta” (“Mata nga Makakita ug Dalunggan nga Makabati,” Liahona, Nob. 2015, 125).

Makadungog kita sa tingog sa Manluluwas nga nagsulti kanato pinaagi sa mga kasulatan.

Doktrina ug mga Pakigsaad 18:37. “Kamo mangita niadto kinsa mahimo nga mga Napulog Duha”

Nianang higayuna nga ang pagpadayag sa Doktrina ug mga Pakigsaad 18 gihatag, si Martin Harris wala maapil sa mga instruksyon sa Ginoo. Hinoon, si Martin miapil uban nila ni Oliver Cowdery ug David Whitmer sa pagpili sa Napulog Duha ka mga Apostoles. Ang Tulo ka mga Saksi, kinsa nakadawat og talagsaon nga saksi sa pagkatinuod sa Pagpahiuli, mituman sa ilang buluhaton sa “pagpangita sa Napulog Duha” (D&P 18:37), kinsa giordinahan dayon nga mga Apostoles. Sa dihang ang mga Apostoles gitawag niadtong Pebrero 1835, si Oliver Cowdery mipahayag nga gikan sa panahon nga kini nga pagpadayag nadawat niadtong 1829, “ang among mga hunahuna kanunay nga naningkamot sa pagpangita kinsa ang Napulog Duha” (sa The Joseph Smith Papers, Documents, Volume 1: July 1828–June 1831, 70).

Doktrina ug mga Pakigsaad 18:44. “Pinaagi sa inyong mga kamot Ako magbuhat og kahibulongan nga buhat”

Si Presidente Dieter F. Uchtdorf sa Unang Kapangulohan mitudlo sa unsa nga paagi ang Ginoo naghimo sa Iyang buhat pinaagi kanato:

“Samtang kita mosunod sa hingpit nga ehemplo [sa Manluluwas], ang atong mga kamot mamahimong Iyang mga kamot; ang atong mga mata, Iyang mga mata; ang atong kasingkasing, Iyang kasingkasing. …

“… Tuguti nga ang atong mga kasingkasing ug mga kamot sa kalooy matunol ngadto sa uban, kay ang tanan naglakaw diha sa iyang kaugalingong lisud nga agianan. Isip mga disipulo ni Jesukristo, nga atong Magtutudlo, gitawag kita aron sa pagsuporta ug sa pag-ayo kay sa pagpanghimaraut. …

“… Atong ipasalig nga mahimo nga Iyang mga kamot, nga ang uban pinaagi kanato mahimong mobati sa Iyang mahigugmaon nga paggakos” (“Kamo ang Akong mga Kamot,” Liahona, Mayo 2010, 68–69, 75).