Kapitulo 13

Doktrina ug mga Pakigsaad 30–34

Pasiuna ug Timeline

Pagkahuman dayon sa ikaduhang komperensya sa Simbahan, nga gipahigayon sa ulahing bahin sa Septyembre 1830 didto sa Fayette, New York, si Propeta Joseph Smith nakadawat og mga pagpadayag alang nila ni David Whitmer, Peter Whitmer Jr., ug John Whitmer. Kining mga pagpadayag narekord diha sa Doktrina ug mga Pakigsaad 30. Atol sa samang panahon, ang Ginoo mitawag usab kang Thomas B. Marsh sa pagsangyaw sa ebanghelyo ug sa pagtabang sa pag-establisar sa Simbahan. Kini nga tawag, nga narekord sa Doktrina ug mga Pakigsaad 31, naglakip usab sa mga saad ug tambag nga mogiya kaniya isip usa ka misyonaryo ug sa iyang personal nga kinabuhi.

Niadtong Oktubre 1830, si Propeta Joseph Smith nakadawat sa pagpadayag nga narekord sa Doktrina ug mga Pakigsaad 32, diin ang Ginoo mitawag nila ni Parley P. Pratt ug Ziba Peterson nga moapil nila ni Oliver Cowdery ug Peter Whitmer Jr. sa usa ka misyon ngadto sa mga Lamanite didto sa kasadpang Missouri. Sa laing pagpadayag, nga narekord sa Doktrina ug mga Pakigsaad 33, ang Ginoo mitawag nila ni Ezra Thayre ug Northrop Sweet sa pagsangyaw sa ebanghelyo. Ang pagpadayag nga narekord sa Doktrina ug mga Pakigsaad 34 gihatag pagka-Nobyembre 1830. Niana gidayeg sa Ginoo si Orson Pratt alang sa iyang pagtuo ug misugo kaniya sa pagsangyaw sa ebanghelyo agig pagpangandam alang sa Ikaduhang Pag-anhi ni Jesukristo.

Ting-init sa 1830Si Parley P. Pratt nagbasa sa Basahon ni Mormon ug nabunyagan.

Septyembre 1830Si Thomas B. Marsh ug ang iyang pamilya namalhin gikan sa duol sa Boston, Massachusetts, ngadto sa Palmyra, New York, ug nabunyagan siya.

Septyembre 19, 1830Si Orson Pratt gibunyagan sa iyang magulang nga si Parley.

Septyembre 26–28, 1830Ang ikaduhang komperensya sa Simbahan gipahigayon didto sa Fayette, New York.

Hinapus nga bahin sa Septyembre 1830Ang Doktrina ug mga Pakigsaad 30–31 nadawat.

Oktubre 1830Ang Doktrina ug mga Pakigsaad 32–33 nadawat.

Oktubre 1830Si Oliver Cowdery ug ang iyang mga kompanyon mibiya alang sa usa ka misyon ngadto sa mga Lamanite.

Nobyembre 4, 1830Ang Doktrina ug mga Pakigsaad 34 nadawat.

Doktrina ug mga Pakigsaad 30: Dugang nga Makasaysayanong Background

Ang ikaduhang komperensya sa Simbahan, nga gipahigayon didto sa Fayette, New York, pagka-Septyembre 1830, milungtad og tulo ka adlaw. Ang komperensya naglakip sa panaghisgutan mahitungod sa bato nga gigamit ni Hiram Page aron madawat ang iyang giingon nga mga pagpadayag (tan-awa sa komentaryo alang sa Doktrina ug mga Pakigsaad 28 niini nga manwal). Si Propeta Joseph Smith mirekord nga si “Brother Page, ingon man ang tibuok simbahan nga mitambong, misalikway sa maong bato, ug sa tanang butang nga may kalabutan niini, nga hinungdan sa among dakong katagbawan ug kalipay” ug nga ang mga Santos dayon “miambit sa sakrament, mikumpirmar, ug mi-orden og daghan, ug miatiman sa daghang buluhaton sa Simbahan nianang adlawa ug sa misunod nga adlaw; diin atol sa maong panahon gipakita ngari kanamo ang dakong gahum sa Dios; ang Espiritu Santo miabut ngari kanamo, ug mipuno kanamo sa dili masulti nga kalipay; ug kalinaw, ug pagtuo, ug paglaum, ug ang gugmang putli anaa sa among taliwala” (sa The Joseph Smith Papers, Histories, Volume 1: Joseph Smith Histories, 1832–1844, ed. Karen Lynn Davidson ug uban pa [2012], 452). Sa wala pa mibiya ang mga Santos gikan sa komperensya, ang mga pagpadayag gihatag alang sa managsoong David Whitmer, Peter Whitmer Jr., ug John Whitmer. Kining mga pagpadayag orihinal nga namantala nga lain-lain diha sa Basahon sa Kasugoan, apan gihiusa kini ni Joseph Smith ngadto sa usa ka seksyon sa 1835 nga edisyon sa Doktrina ug mga Pakigsaad.

Mapa 5: Ang Dapit sa New York, Pennsylvania, ug Ohio sa Estados Unidos

Mapa 6: Misyon ngadto sa mga Lamanite, 1830–1831

Doktrina ug mga Pakigsaad 30

Gitudloan sa Ginoo sila si David, Peter Jr., ug John Whitmer kalabut sa ilang tahas diha sa buhat sa Dios

Doktrina ug mga Pakigsaad 30:1–4. “Ikaw nahadlok sa tawo ug wala mosalig kanako”

Isip usa sa Tulo ka mga Saksi, si David Whitmer nakakita og anghel ug nakakita ug nakahikap sa mga palid sa Basahon ni Mormon. Nakadawat usab siya og lain pang mga pagpadayag nga gihatag pinaagi kang Propeta Joseph Smith (tan-awa sa D&P 14; 17; 18). Apan sa dihang ang iyang bayaw, si Hiram Page, nangangkon nga nakadawat og mga pagpadayag alang sa Simbahan, nahisalaag si David. Gipanton sa Ginoo si David tungod sa kahadlok sa tawo imbis nga mosalig sa Dios (tan-awa sa D&P 30:1).

Si Presidente Ezra Taft Benson (1899–1994) mipasabut kon sa unsang paagi nga ang garbo maoy mahimong hinungdan nga kita mahadlok sa tawo:

“Ang mga mapahitas-on mas mahadlok sa hukom sa mga tawo kay sa hukom sa Dios. (Tan-awa sa D&P 3:6–7; 30:1–2; 60:2.) Ang ‘Unsay hunahunaon sa mga tawo kanako?’ mas bug-at kay sa ‘Unsay hunahuna sa Dios kabahin nako?’

“Buhian na unta ni Haring Noah si propetang Abinadi, apan tungod sa iyang garbo nga gisulsolan sa iyang dautang mga pari gisunog si Abinadi. (Tan-awa sa Mosiah 17:11–12.) Si Herodes nasubo sa hangyo sa iyang asawa nga putlan sa ulo si Juan Bautista. Apan ang iyang mapasigarbuhong tinguha sa pagpakita nga maayo ‘sa iyang mga dinapit’ mao ang nakaingon nga iyang gipapatay si Juan. (Mat. 14:9; tan-awa usab sa Marcos 6:26.)

“Ang kahadlok nga mahukman sa tawo makita mismo sa pagbuhatunsay gikaangayan sa mga tawo. Ang mga mapahitas-on ganahan kaayo ‘sa pagdayeg sa katawhan kaysa pagdayeg sa Dios.’ (Juan 12:42–43.) Ang atong motibo sa pagbuhat og mga butang mao sab ang dapit diin anaa ang sala. Si Jesus miingon nga Siya ‘kanunay mobuhat’ sa mga butang nga makapahimuot sa Dios. (Juan 8:29.) Dili ba angay kitang mobuhat og maayo aron ang atong motibo ikahimuot sa Dios kaysa magpataas sa atong kaugalingon aron molabaw sa uban?” (Mga Pagtulun-an sa mga Presidente sa Simbahan: Ezra Taft Benson [2014], 282).

Si Elder Dallin H. Oaks sa Korum sa Napulog Duha ka mga Apostoles mipasabut kon sa unsang paagi nga ang mga Santos kinahanglang dili maimpluwensyahan sa mga butang sa kalibutan: “Dili kaayo kita makaserbisyo sa atong Manluluwas kon mas nahadlok kita sa tawo kay sa Dios. Iyang gibadlong ang pipila sa mga lider sa Iyang gipahiuli nga Simbahan sa pagtinguha sa pagdayeg sa kalibutan ug sa pagbutang sa ilang mga hunahuna diha sa mga butang sa yuta labaw kay sa mga butang sa Ginoo (tan-awa sa D&P 30:2; 58:39). Kadto nga mga pagpanton nagpahinumdom kanato nga kita gitawag aron sa pag-establisar sa mga sumbanan sa Ginoo, dili aron mosunod sa sumbanan sa kalibutan. Si Elder John A. Widtsoe namahayag, ‘Kita dili mahimong mopuyo sama sa uban nga mga tawo, o mosulti sama sa uban nga mga tawo, o mobuhat sama sa uban nga mga tawo, kay kita adunay lahi nga kapalaran, obligasyon, ug responsibilidad nga gisangun nganhi kanato, ug kinahanglan nga atong ipahiangay ang atong mga kaugalingon [ngadto niini]’ [sa Conference Report, Abr. 1940, 36]. Kana nga kamatuoran magamit karon sa matag uso nga buhat” (“Dili Hinakog nga Pagserbisyo,”Liahona, Mayo 2009, 94–95).

Doktrina ug mga Pakigsaad 30:5–8. “[Ipadayag ang] akong ebanghelyo”

Niadtong Hunyo 1829 gisultihan sa Ginoo si Peter Whitmer Jr. nga ang pagpadayag og paghinulsol mao ang butang nga “labing bililhon” nga iyang buhaton (tan-awa sa D&P 16:4, 6). Pagka-Septyembre 1830, gitudlo si Peter nga moserbisyo og misyon isip kompanyon ngadto ni Oliver Cowdery sa pag-establisar sa Simbahan taliwala sa mga Lamanite. Ang paghatag og gibug-aton sa kaimportante sa misyonaryo nga buhat nagpadayon sa tibuok kasaysayan sa Simbahan.

Si Elder Jeffrey R. Holland sa Korum sa Napulog Duha ka mga Apostoles mipasabut nganong ang mga Santos kanunayng mo-focus sa pagsangyaw sa ebanghelyo ngadto sa uban: “Ang misyonaryo nga buhat dili lamang mao ang butang nga angay natong buhaton niining dako, lapad, talagsaon nga Simbahan. Apan hapit tanang butang nga angay natong buhaton magdepende sa unang pagkadungog sa mga tawo sa ebanghelyo ni Jesukristo ug mopasakop sa tinuohan. Sa tinuoray mao kana nganong ang katapusang mando ni Jesus sa Napulog Duha mao lamang kanang sukaranan—nga ‘busa panglakaw kamo ug himoa ninyong mga tinun-an ang tanang kanasuran, sa pagpamautismo kanila sa ngalan sa Amahan, ug sa Anak, ug sa Espiritu Santo’ [Mateo 28:19]. Dayon, ug niana lamang higayuna, nga ang nahabiling mga panalangin sa ebanghelyo hingpit nga moabut—kalig-on sa pamilya, mga programa sa mga kabatan-onan, mga saad sa priesthood, ug mga ordinansa nga anaa gayud sa templo. Apan sama sa gipamatuod ni Nephi, walay usa niana ang moabut hangtud nga ang usa ka tawo ‘[mi]sulod ngadto sa … ganghaan’ [2 Nephi 33:9]. Sa tanan nga angayang buhaton diha sa dalan padulong sa kinabuhing dayon, nagkinahanglan kita og daghan pang mga misyonaryo nga moabli nianang ganghaan ug motabang sa mga tawo nga makasulod niini” (“Apil Kitang Tanan,”Liahona, Nob. 2011, 46–47).

Doktrina ug mga Pakigsaad 30:6. “[Tukura ang] akong simbahan taliwala sa mga Lamanite”

Alang sa impormasyon kalabut sa paggamit sa termino nga mga Lamanite diha sa Doktrina ug mga Pakigsaad, tan-awa sa komentaryo alang sa Doktrina ug mga Pakigsaad 28:8–10, 14–16 niini nga manwal.

Doktrina ug mga Pakigsaad 30:9–11. “[Isangyaw ang] akong ebanghelyo, sama sa tingog sa trumpeta”

Si John Whitmer usa sa Walo ka mga Saksi sa mga palid sa Basahon ni Mormon ug nagserbisyo sulod sa mubong panahon isip tigsulat ngadto kang Propeta Joseph Smith atol sa iyang dinasig nga paghubad sa Biblia. Sa usa ka pagpadayag pinaagi sa Propeta niadtong Hunyo 1829, gisultihan siya sa Ginoo, “Ang butang nga labing bililhon nganha kanimo mao ang pagpahayag og paghinulsol ngadto niini nga mga katawhan, nga ikaw unta makadala og mga kalag ngari kanako” (D&P 15:6). Human sa komperensya sa Simbahan pagka-Septyembre 1830, gisugo sa Ginoo si John nga moadto ug motrabaho sa Iyang buhat, sugod sa dapit kon asa nagpuyo si Philip Burroughs, sa Seneca Falls, New York, dili layo sa pamilyang Whitmer (tan-awa sa D&P 30:9–10). Mga pipila pa lang ka semana sa wala pa madawat kining pagpadayag, nagsangyaw si Parley P. Pratt og usa ka wali ngadto sa usa ka grupo nga nagpundok sa panimalay ni Philip Burroughs, ug ang ubang mga tawo nakabig. Bisan kon si Philip Burroughs gitawag nga “igsoon” diha sa Doktrina ug mga Pakigsaad 30:10, walay rekord nga siya nahimo gayung miyembro sa Simbahan. Hinoon, ang iyang asawa, nabunyagan.

Si Elder L. Tom Perry (1922–2015) sa Korum sa Napulog Duha ka mga Apostoles mipahinumdom sa mga miyembro sa Simbahan nganong kinahanglan silang mopalanog sa ilang tingog sa pagpakigbahin sa ebanghelyo: “Kinahanglan nga ‘uban sa dako nga kakugi’ (D&P 123:14) nga atong dad-on ang kahayag sa ebanghelyo ngadto niadtong kinsa nagpangita sa mga tubag nga gitanyag sa plano sa kaluwasan. Daghan ang nabalaka alang sa ilang mga pamilya. Ang uban nangita alang sa kasiguroan diha sa usa ka kalibutan nga nag-usab-usab ang mga hiyas. Ang atong oportunidad mao ang paghatag kanila og paglaum ug kaisug ug sa pagdapit kanila nga mouban kanato ug moapil niadtong kinsa mihangup sa ebanghelyo ni Jesukristo. Ang ebanghelyo sa Ginoo ania sa yuta ug mopanalangin sa ilang mga kinabuhi dinhi ug didto sa mga kahangturan nga moabut” (“Pagdala og mga Kalag ngari Kanako,”Liahona, Mayo 2009, 110).

Doktrina ug mga Pakigsaad 31: Dugang nga Makasaysayanong Background

Isip minyo nga batan-on nga nagpuyo duol sa Boston, Massachusetts, gibasa ni Thomas B. Marsh ang Biblia ug miimbistegar sa mga relihiyon, apan siya mibati nga naaghat nga “usa ka bag-ong simbahan ang motumaw, nga aduna sa putli niini nga kamatuoran” (Thomas B. March, “History of Thos. Baldwin Marsh (Written by Himself in Great Salt Lake City, November, 1857),” Deseret News, Mar. 24, 1858, 18). Giaghat siya sa Ginoo nga mobiyahe ngadto sa kasadpang New York. Didto nakadungog siya mahitungod ni Joseph Smith ug sa bulawan nga mga palid ug nagtinguha nga masayud pa og dugang. Nahimamat niya si Martin Harris didto sa Palmyra ug si Oliver Cowdery usab, kay si Joseph Smith nagpuyo man didto sa Harmony, Pennsylvania, nianang panahona. Mipauli si Thomas ngadto sa Boston ug nagpadayon sa pagkat-on mahitungod sa buhat sa Dios pinaagi sa pakigsinulatay kang Oliver Cowdery. Human mahibalo nga ang Simbahan ni Jesukristo naorganisar na, gibalhin niya ang iyang pamilya ngadto sa Palmyra, New York, nga miabut niadtong Septyembre 1830. Sa wala madugay gibunyagan siya ni David Whitmer, ug mitambong siya sa ikaduhang komperensya sa Simbahan nianang sama nga bulan. Dunay pribilehiyo si Thomas Marsh nga makadawat og personal nga direksyon gikan sa Ginoo pinaagi sa usa ka pagpadayag nga gihatag pinaagi kang Propeta Joseph Smith atol niana nga komperensya.

Doktrina ug mga Pakigsaad 31

Gitawag sa Ginoo sila ni Thomas B. Marsh, Parley P. Pratt, ug Ziba Peterson sa pagsangyaw sa ebanghelyo

Doktrina ug mga Pakigsaad 31:1–6. Samtang matinud-anon kitang moserbisyo sa Ginoo, ang atong mga pamilya mapanalanginan

Sigurado, nga isip amahan sa bag-o lang nga pamilya, si Thomas Marsh dunay mga kabalaka alang sa iyang asawa ug mga anak sa ilang pagbalhin gikan sa Massachusetts paingon sa New York. Sa pagpadayag nga narekord diha sa Doktrina ug mga Pakigsaad 31, gisaaran siya nga pinaagi sa iyang hugot nga pagtuo ug pagserbisyo sa Ginoo, ang iyang pamilya sa umaabut nga adlaw motuo ug makauban niya diha sa Simbahan. Nianang panahona, si Thomas ug ang iyang asawa, si Elizabeth, dunay tulo ka mga anak nga lalaki, nga nag-edad og nuybe, siyete, ug tres. Si Elizabeth nakabig sa wala madugay niadtong 1831 (tan-awa sa The Joseph Smith Papers, Documents, Volume 1: July 1828–June 1831, ed. Michael Hubbard MacKay ug uban pa [2013], 194, note 412). Ang saad sa Ginoo nga panalanginan ang pamilyang Marsh nakapalig-on ni Thomas samtang gitawag siya sa pag-abag sa buhat sa Dios.

Ang susama nga mga saad anaa karon alang niadtong naningkamot sa pagpahinungod sa ilang kaugalingon ngadto sa pagserbisyo sa Ginoo. Si Elder Robert D. Hales sa Korum sa Napulog Duha ka mga Apostoles mipakigbahin sa mosunod nga kasinatian:

“Usa ka magtiayon [full-time nga misyonaryo] nabalaka mahitungod sa pagbiya sa ilang kinamanghuran nga anak nga babaye nga dili na aktibo sa Simbahan. Ang iyang matinud-anong amahan misulat: ‘Nag-ampo kami alang kaniya kanunay ug nagpuasa pirme. Dayon, sa kinatibuk-ang komperensya, ang Espiritu mihunghong kanako, “Kon moserbisyo kamo, dili na kamo mabalaka sa inyong anak nga babaye.” Mao nga nakigkita kami sa among bishop. Usa ka semana human namo nadawat ang among tawag, siya ug ang iyang trato mipahibalo nga sila nagkasabut na nga magminyo. Sa wala pa kami mogikan paingon sa Africa, adunay kasal sa among balay. [Unya among giawhag ang among pamilya sa pagpundok ug] naghimo og konseho sa pamilya. … Mipamatuod ako mahitungod sa Ginoo ug ni Joseph Smith … ug gisultihan ko sila nga buot nakong hatagan ang matag usa kanila sa panalangin sa usa ka amahan. Nagsugod ako sa kamagulangang anak nga lalaki ug unya sa iyang asawa ug padayon ngadto sa kamanghuran … [lakip na ang among bag-ong umagad nga lalaki].’ …

“… Samtang ang matinud-anong amahan niini nga istorya mipanalangin sa mga sakop sa iyang pamilya, ang iyang umagad nga lalaki mibati sa impluwensya sa Espiritu Santo. Ang amahan misulat: ‘Paglabay sa usa namo ka tuig [ang] kasingkasing [sa among umagad nga lalaki] nagsugod na sa pagpaduol sa Simbahan. Sa wala pa kami mopauli gikan sa among misyon, siya ug ang among anak nga babaye mibisita kanamo. Sa iyang maleta may kinaunahang sinina alang sa Dominggo nga sukad iyang napanag-iya. Miuban sila namo sa Simbahan, ug sa nakapauli na kami gikan sa misyon nabunyagan siya. Paglabay sa usa ka tuig, na-sealed sila sa templo’” (“Mga Magtiayon nga Misyonaryo: Mga Panalangin gikan sa Sakripisyo ug Serbisyo,” Liahona, Mayo 2005, 40).

Doktrina ug mga Pakigsaad 31:5. “Igalab ang imong sanggot uban sa imong tibuok nga kasingkasing, ug ang imong mga sala mapasaylo diha kanimo”

*Ang Bulawanon nga Ani,* ni David Merrill. Ang mga kasulatan nagpasabut sa binugkos sa naani nga trigo nga nagrepresentar sa mga bunga sa misyonaryo nga mga paghago, lakip na ang nakabig nga mga kalag (tan-awa sa D&P 31:4–5; 33:7, 9).

Apil sa mga panalangin nga gisaad ngadto kang Thomas B. Marsh mao ang pasalig nga ang iyang mga sala mapasaylo pinaagi sa iyang makugihong mga paningkamot sa pagpahayag sa ebanghelyo ngadto sa uban (tan-awa sa D&P 31:5). Si Elder M. Russell Ballard sa Korum sa Napulog Duha ka mga Apostoles miklaro sa koneksyon tali sa pagpakigbahin sa ebanghelyo ug sa pagpabilin og kapasayloan sa atong mga sala:

“Usa ka natural nga sangputanan sa pagkakabig mao ang padayon nga kapasayloan sa sala pinaagi sa pagsunod sa ebanghelyo, nga naglakip sa pagpakigbahin sa ebanghelyo ngadto sa uban. Si Presidente Spencer W. Kimball namahayag, ‘Ang Ginoo misulti kanato nga ang atong mga sala mapasaylo dayon samtang andam kitang modala og mga kalag ngadto kang Kristo ug magpabiling makanunayon sa paghatag og pagpamatuod ngadto sa kalibutan, ug sigurado nga ang matag usa kanato nangita og dugang nga tabang aron mapasaylo ang atong mga sala.’ (Ensign, Okt. 1977, p. 5.)

“Diha sa Doktrina ug mga Pakigsaad atong mabasa: ‘Kay Ako mopasaylo kaninyo sa inyong mga sala uban niini nga sugo—nga kamo magpabilin nga makanunayon diha sa inyong mga hunahuna sa kaligdong ug sa espiritu sa pag-ampo, diha sa pagpamatuod ngadto sa tibuok kalibutan niadto nga mga butang nga gipahayag nganha kaninyo.’ (D&P 84:61; italics gidugang.) Ug diha usab sa Doktrina ug mga Pakigsaad: ‘Bisan pa niana, kamo mga bulahan, kay ang pagpamatuod nga inyong napamulong gitala diha sa langit alang sa pagtan-aw sa mga anghel, ug sila magmaya diha kaninyo, ug ang inyong mga sala gipasaylo diha kaninyo.’ (D&P 62:3; italics gidugang.)

“… Ang doktrina daw klaro ngari kanako; ang kapasayloan sa mga sala usa ka nagpadayon nga proseso. Samtang ang matag usa kanato naningkamot nga mahimong limpyo, putli, ug gani nabalaan, wala koy laing nakit-an nga mas maayong paagi para kanato sa pagbuhat niini kay sa pagtabang sa ubang mga anak sa atong Langitnong Amahan nga makakita sa kamatuoran” (“Write Down a Date,” Ensign, Nob. 1984, 16).

Doktrina ug mga Pakigsaad 31:9–13. Mga pahimangno ug mga pasidaan alang ni Thomas B. Marsh

Samtang gidayeg si Thomas B. Marsh tungod sa iyang hugot nga pagtuo (tan-awa sa D&P 31:1) ug gisaaran og dagkong mga panalangin, gihatagan usab siya sa Ginoo og importante nga mga pahimangno ug tambag. Niadtong 1835, gitawag si Thomas nga moserbisyo sa unang Korum sa Napulog Duha ka mga Apostoles niining dispensasyon. Sa wala madugay gitawag siya nga mahimong Presidente niana nga Korum. Apan, sulod lang sa pipila ka tuig—niadtong Marso 1839—gi-excommunicate siya tungod sa apostasiya. Ang mga instruksyon sa Ginoo diha sa Doktrina ug mga Pakigsaad 31 makapanalangin unta kaniya og espiritwal nga proteksyon kon mipatalinghug pa siya niini. Gibunyagan pag-usab si Thomas B. Marsh niadtong Hulyo 16, 1857, didto sa Florence, Nebraska, ug miadto sa Utah nianang samang tuig. Nangayo siya og pasaylo gikan sa mga lider sa Simbahan, ug gihatagan siya ni Presidente Brigham Young og oportunidad nga mamulong ngadto sa mga Santos. Miingon siya sa mosunod mahitungod sa iyang apostasiya:

“Kanunay kong gustong masayud kon giunsa pagsugod sa akong apostasiya, ug miabut ko sa konklusyon nga nawala gayud siguro nako ang Espiritu sa Ginoo sa akong kasingkasing.

“Ang sunod nga pangutana mao, ‘giunsa ug kanus-a man nimo nawala ang Espiritu?’ Nasina ko sa Propeta, ug dayon ang akong panglantaw nausab ug wala na makabantay sa tanang butang nga husto, ug gigahin nako ang tanan nakong panahon sa pagpangita sa unsay dautan, ug dayon sa dihang ang yawa nagsugod na sa paggiya nako sayon na lang alang sa kalibutanong hunahuna nga motumaw, nga mao ang kasuko, kasina ug kayugot. Ako kining mabati sa sulod nako; mibati ko nga masuk-anon ug mayuguton, ug kay nawala na man ang Espiritu sa Ginoo, sama sa giingon sa Kasulatan, ako nabutahan” (“Remarks by Thomas B. Marsh,” Deseret News, Sept. 16, 1857, 220; ang spelling gi-standardize).

Nagpuyo si Thomas B. Marsh sa nahabilin niyang kinabuhi didto sa Utah. Namatay siya niadtong Enero 1866 sa Ogden, diin siya gilubong.

Doktrina ug mga Pakigsaad 31:10. Sa unsang paagi nga si Thomas B. Marsh “mananambal ngadto sa simbahan”?

Si Thomas B. Marsh nakaangkon og kahanas sa paggamit sa mga hilba [herbs] isip tambal, ug pinaagi niana nga kahibalo nakahimo siya sa pagtabang sa daghang tawo. Hinoon, ang iyang kinadak-ang tawag mao ang pag-ayo sa mga kalag (tan-awa sa Thomas B. Marsh, “History of Thos. Baldwin Marsh,” 18.)

Doktrina ug mga Pakigsaad 32: Dugang nga Makasaysayanong Background

Sa ting-init sa 1830, si Parley P. Pratt ug ang iyang asawa, nga si Thankful, mibiyahe gikan sa ilang panimalay sa Amherst, Ohio, aron mobisita og mga paryente didto sa estado sa New York. Ang Espiritu Santo miaghat kang Parley nga mohunong sa balangay sa Newark, New York, duol sa Palmyra, diin nakahibalo siya mahitungod sa Basahon ni Mormon. Sa kaulahian iyang gisulat ang iyang reaksyon ngadto sa basahon:

“Naghinam-hinam ko nga miabli niini, ug gibasa ang ulohang pahina niini. Gibasa dayon nako ang pagpamatuod sa pipila ka saksi nga may kalabutan kon sa unsang paagi kini nakit-an ug nahubad. Human niini gisugdan nako kini pagbasa sa han-ay nga paagi. Nagbasa ko sa tibuok adlaw; langay na gani ang mokaon, wala na koy tinguha alang sa pagkaon; langay na gani ang pagkatulog dihang miabut na ang gabii, kay mas ganahan ko nga magbasa kay sa matulog.

“Samtang nagbasa ko, ang espiritu sa Ginoo diha kanako, ug ako nasayud ug nakasabut nga ang basahon tinuod, ingon kayano ug nagpakita nga sama sa pagkasabut ug pagkasayud sa usa ka tawo nga siya anaa” (Autobiography of Parley Parker Pratt, ed. Parley P. Pratt Jr. [1938], 37).

Mibiyahe si Parley ngadto sa Palmyra, diin iyang nahimamat ug gitudloan ni Hyrum Smith. Sa wala madugay, mibiyahe sila si Hyrum ug Parley ngadto sa Fayette, New York, aron mahimamat ang mga miyembro sa nagkadako nga branch sa Simbahan. Si Parley nabunyagan ug naordinahan nga usa ka elder ni Oliver Cowdery niadtong Septyembre 1830.

Gamay ra ang nahibaloan mahitungod sa pagkakabig ni Ziba Peterson. Nahibaloan nato nga nabunyagan siya ni Oliver Cowdery niadtong Abril 1830 ug naordinahan nga usa ka elder pagka-Hunyo sa samang tuig. Sa wala pa mobiya sila si Oliver Cowdery ug Peter Whitmer Jr. paingon sa ilang misyon, nangutana si Propeta Joseph Smith sa Ginoo aron masayud kon duna bay lain nga mouban kanila. Nadawat niya ang pagpadayag nga narekord diha sa Doktrina ug mga Pakigsaad 32, nga mitawag nila ni Parley P. Pratt ug Ziba Peterson sa pagkuyog.

Atol sa tinglarag sa 1830 ug sa tingtugnaw sa 1830–31, ang gamayng pundok sa mga misyonaro lakip na nila ni Oliver Cowdery, Peter Whitmer Jr., Parley P. Pratt, ug Ziba Peterson (nga gikuyugan sa wala madugay sa usa ka kinabig gikan sa Ohio nga ginganlan og Frederick G. Williams), mibiyahe og dul-an sa 1,500 ka milya (mga 2,400 ka kilometro) gikan sa Fayette, New York, ngadto sa Independence, Missouri—nga kasagaran naglakaw lang. Diha sa dalan, kining mga misyonaryo misangyaw sa ebanghelyo didto sa Mentor ug Kirtland, Ohio, ngadto sa usa ka kongregasyon sa mga tawo nga nangita alang sa pagpahiuli sa Kristiyanismo sa Bag-ong Tugon. Si Sidney Rigdon, ang lider sa grupo, ug daghan sa kongregasyon nakabig ngadto sa gipahiuli nga ebanghelyo. Ang mga misyonaryo sa katapusan miabut sa Independence sa tunga-tunga sa Enero 1831. Parte sa ilang biyahe, nag-antus sila sa katugnaw, kusog nga hangin, ug kakapoy, nga nabuhi lang sa frozen nga pan nga hinimo gikan sa mais ug hilaw nga karne sa baboy. Sa ubang dapit ang snow nga ilang gilakawan tulo ka pye ang gilawmon. Bisan pa man niining mga kalisud, ang mga misyonaryo milampus sa pagpaila sa ebanghelyo ngadto sa mga American Indian nga nagpuyo sa Indian Territory duol sa kasadpang utlanan sa Missouri. Gituman sa Ginoo ang Iyang saad nga magauban Siya niining mga misyonaryo ug nga walay makabuntog kanila. (Tan-awa sa Church History in the Fulness of Times, 2nd ed. [manwal sa Church Educational System, 2003], 83–85.)

Doktrina ug mga Pakigsaad 32

Gitawag sa Ginoo silang Parley P. Pratt ug Ziba Peterson sa pagsangyaw ngadto sa mga Lamanite

Doktrina ug mga Pakigsaad 32:1–3. “Ako sa akong kaugalingon mouban kanila ug maanaa sa ilang taliwala”

*Lakaw ngadto sa Kamingawan,* ni Robert Theodore Barrett. Sila si Oliver Cowdery, Parley P. Pratt, Peter Whitmer, ug Ziba Peterson gitawag sa pagsangyaw sa ebanghelyo “taliwala sa mga Lamanite” (D&P 32:2).

Sila si Parley P. Pratt ug Ziba Peterson gitudlo nga mouban nila ni Oliver Cowdery ug Peter Whitmer Jr. sa ilang misyon ngadto sa mga Lamanite (tan-awa sa D&P 28:8–9; 30:5–8). Misaad ang Ginoo niining mga misyonaryo nga kon mosangyaw sila sa ebanghelyo diha sa kaaghup, Siya “mouban kanila ug maanaa sa ilang taliwala” (D&P 32:3). Si Presidente Henry B. Eyring sa Unang Kapangulohan mipakigbahin sa mosunod nga kasinatian sa pagtudlo sa pipila ka paagi nga ang Ginoo magauban kanato samtang moserbisyo kita diha sa atong mga calling:

“Ang Dios mopalambo niadtong Iyang gitawag bisan kon sa inyong pagtuo gamay o dili mamatikdan nga pag-alagad. Makabaton kamo sa mga gasa nga makakita sa inyong pag-alagad nga molambo. Pagpasalamat samtang kana nga gasa inyoha pa. …

“Ang Ginoo dili lamang mopalambo sa gahum sa inyong mga paningkamot. Siya mobuhat uban kaninyo. Ang iyang tingog ngadto sa upat ka mga misyonaryo, nga gitawag pinaagi kang Propeta Joseph Smith ngadto sa usa ka lisud nga buluhaton, makahatag og kaisug sa tanan nga Iyang gitawag diha sa Iyang gingharian: ‘Ug Ako sa akong kaugalingon mouban kanila ug maanaa sa ilang taliwala; ug Ako mao ang ilang manlalaban ngadto sa Amahan, ug walay makabuntog batok kanila’ [D&P 32:3]. …

“Makabaton kamo sa labing dako nga kasiguroan nga ang inyong gahum pilo-piloon pa sa Ginoo sa makadaghan. Ang Iya lamang nga gipangayo nga kamo mohatag sa inyong pinakamaayo nga paningkamot ug sa inyong bug-os nga kasingkasing. Magmalipayon nga mobuhat niini ug uban sa pag-ampo diha sa hugot nga pagtuo. Ang Amahan ug ang Iyang Pinalanggang Anak mopadala sa Espiritu Santo isip inyong kauban aron mogiya kaninyo. Ang inyong mga paningkamot mapalambo diha sa mga kinabuhi sa mga tawo nga inyong gialagaran. Ug kon mobalik kamo sa pagtan-aw sa unsay daw lisud nga mga panahon sa pag-alagad ug sakripisyo, ang sakripisyo mahimong usa ka panalangin, ug kamo masayud nga inyong nakita ang gahum sa Dios nga miagak niadtong inyong gialagaran alang Kaniya, ug miagak kaninyo” (“Barugi ang Inyong Balaang Tawag,” Liahona, Nob. 2002, 77–78).

Doktrina ug mga Pakigsaad 33: Dugang nga Makasaysayanong Background

Si Ezra Thayre nagpuyo duol sa Palmyra, New York, sa dihang nahibalo siya mahitungod sa Pagpahiuli sa ebanghelyo ni Jesukristo. Gisuhulan niya kaniadto ang mga sakop sa pamilyang Smith aron motabang kaniya sa mga proyekto sa konstruksyon. Sa katapusan nakumbinser siya nga motambong og usa ka miting diin si Hyrum Smith misangyaw sa ebanghelyo. Sa wala madugay misulat siya mahitungod sa iyang reaksyon sa unsay gitudlo ni Hyrum: “Matag pulong nakapatandog kanako sa kinahiladman sa akong kalag. Naghunahuna ko nga ang matag pulong gipunting ngari nako. … Ang mga luha midagayday sa akong mga aping, labihan ko ka mapasigarbuhon ug gahi og ulo. Dihay daghan nga nakaila nako. … Milingkod ko hangtud nga naulian ko sa wala pa ko mosulay og hangad” (gikutlo sa Matthew McBride, “Ezra Thayre: From Skeptic to Believer,” sa Revelations in Context, ed. Matthew McBride ug James Goldberg [2016], 62, o history.lds.org).

Nakadawat si Ezra og gamhanang pagsaksi bahin sa kamatuoran sa Basahon ni Mormon. Duna usab siyay panan-awon diin ang “usa ka tawo miabut ug midala kaniya og linukot nga papel ug gipresentar kini ngari kanako, ug usa usab ka trumpeta ug gisultihan ko nga tayhupon kini. Giingnan nako siya nga wala pa gayud ako nakatayhup og bisan usa sa akong kinabuhi. Miingon siya nga mahimo nimo kining tayhupon, sulayi kini. Ako kining gibutang sa akong ba-ba ug gitayhup kini, ug nakahimo kini og labing nindot nga tingog nga akong nadungog sukad. Ang linukot nga papel mao ang pagpadayag bahin nako ug ni Northrop Sweet. Si Oliver [Cowdery] mao ang tawo nga midala sa linukot ug sa trumpeta. Sa dihang gidala niya ang pagpadayag bahin nako ug ni Northrop Sweet, miingon siya, ania ang usa ka pagpadayag gikan sa Dios alang kanimo” (sa The Joseph Smith Papers, Documents, Volume 1: July 1828–June 1831, 206). Si Ezra Thayre gibunyagan ni Parley P. Pratt, ug niadtong Oktubre 1830, diha sa pagpadayag nga narekord diha sa Doktrina ug mga Pakigsaad 33, siya ug si Northrop Sweet gitawag ngadto sa buhat sa Ginoo.

Si Northrop Sweet gibunyagan nga usa ka miyembro sa Simbahan pinaagi ni Parley P. Pratt niadtong Oktubre 1830, didto sa Palmyra, New York. Naminyo siya sa pag-umangkon ni Martin Harris. Sa wala madugay human sa iyang bunyag, sigun sa narekord diha sa Doktrina ug mga Pakigsaad 33, gitudlo siya nga moserbisyo og misyon. Si Northrop mibalhin ngadto sa Kirtland, Ohio, pagka-Hunyo 1831, diin naordinahan siya nga usa ka elder; hinoon, mibiya siya sa Simbahan sa wala madugay human niana ug misulay, uban sa lain, sa paghimo og laing simbahan, nga nangangkon nga si Joseph Smith usa ka mini nga propeta.

Doktrina ug mga Pakigsaad 33

Gitawag sa Ginoo sila si Ezra Thayre, Northrup Sweet, ug Orson Pratt sa pagpahayag sa ebanghelyo

Doktrina ug mga Pakigsaad 33:4. “Nasayop sa daghan nga mga higayon tungod sa mga panapi sa mga kaparian”

Ang paghulagway sa nadunot nga ubasan diha sa Doktrina ug mga Pakigsaad 33:4 nagpasabut sa kondisyon sa apostasiya nga midaut sa kalibutan tungod sa sala sa panapi sa mga kaparian. Si Elder Dallin H. Oaks mipasabut sa kahulugan sa panapi sa mga kaparian [priestcraft]:

“Ang mga kasulatan dunay pulong sa pagserbisyo sa ebanghelyo ‘alang sa katigayunan ug dungog’; kini ang ‘panapi sa mga kaparian.’ (Alma 1:16.) Miingon si Nephi, ‘Ang panapi sa mga pari mao nga ang mga tawo mowali ug mopahiluna sa ilang mga kaugalingon ingon og usa ka kahayag ngadto sa kalibutan, nga sila makaangkon og bahandi ug pagdayeg sa kalibutan; apan sila wala magtinguha sa kaayohan sa Zion.’ (2 Ne. 26:29.) Niining ulahing mga adlaw, gisugo kita sa ‘[pag]paningkamot sa pagdala ug pagtukod sa kahimoan sa Zion.’ (D&P 6:6.) Walay swerte, dili tanan kinsa nga nakatuman sa mga buhat ubos niana nga ulohan ang nagtinguha gayud sa pagtukod sa Zion o sa pagpalig-on sa pagtuo sa katawhan sa Dios. Ang uban pang mga tinguha mahimong maoy nakaingon.

“Ang pagserbisyo nga dayag sa tanan nga dili hinakog apan sa pagkatinuod alang sa katigayunan o dungog sigurado nga naapil sa pagpanghimaraut sa Manluluwas niadtong kinsa ‘nagapakita nga daw mga matarung sa atubangansa mga tawo, apan sa sulod ninyo … natugob kamo sa kamaut ug sa kadautan.’ (Mat. 23:28.) Ang maong matang sa pagserbisyo dili makadawat og ganti sa ebanghelyo” (“Why Do We Serve?” Ensign, Nob. 1984, 13).

Si Elder Marlin K. Jensen sa Seventy namulong mahitungod sa kalainan tali sa panapi sa mga kaparian ug pagserbisyo nga dunay bug-os nga tinguha ngadto sa himaya sa Dios:

“Kadtong kinsa nagtinguha og dungog ug kaayohan alang sa ilang kaugalingon sa paghimo sa buhat sa Ginoo sad-an sa unsay gitawag sa mga kasulatan nga panapi sa mga kaparian. …

“Ang mga Santos sa Ulahing mga Adlaw kansang mga mata dunay bug-os nga tinguha ngadto sa himaya sa Dios magtan-aw sa kinabuhi gikan sa lahi gayud kaayo nga panglantaw kay sa niadtong kansang pagtagad gitumong sa laing butang. Ang maong mga miyembro, pananglitan, wala kaayo magtagad mahitungod sa pagdawat og pagdayeg o pag-ila alang sa ilang maayong binuhatan. Mas interesado sila sa pagpakaon sa mga karnero sa Ginoo kay sa pag-ihap niini. Gani, kanunay silang makakita sa ilang labing dako nga kalipay diha sa pagserbisyo nga dili magpahibalo, sa ingon mobilin sa mga nakabenepisyo sa ilang pagkamabination nga walay pasalamatan o dayegon gawas sa Ginoo” (“An Eye Single to the Glory of God,” Ensign, Nob. 1989, 27).

Doktrina ug mga Pakigsaad 33:8–10. “Ablihi ang inyong mga ba-ba”

*Si Nephi Nagsulat diha sa Bulawan nga mga Palid,* ni Paul Mann. Gisugo sa Ginoo ang Iyang mga sulugoon nga ablihan ang ilang mga ba-ba uban sa mensahe sa paghinulsol, ug sila “mahimo nga sama kang Nephi sa karaan” (tan-awa sa D&P 33:8–10).

Sa tulo ka bersikulo (tan-awa sa D&P 33:8–10) gisugo sila si Ezra Thayre ug Northrop Sweet og katulo ka higayon sa pag-abli sa ilang mga ba-ba ug sa pagpahayag og paghinulsol. Nagkinahanglan ang Ginoo og mga sulugoon nga isug ug andam nga mosangyaw sa ebanghelyo. Si Presidente Henry B. Eyring mipakigbahin sa mosunod nga ehemplo kon nganong importante kaayo nga ablihan nato ang atong mga ba-ba ug mopakigbahin sa ebanghelyo ngadto sa uban nga atong nailhan:

“Adunay higayon sa kalibutan nga umaabut, ang matag usa nga inyong nahimamat niini nga kinabuhi makahibalo unsa ang inyong nahibaloan karon. Sila masayud nga ang bugtong paagi nga makapuyo sa kahangturan uban sa atong mga pamilya ug diha sa presenya sa atong Langitnong Amahan ug sa Iyang Anak, si Jesukristo, mao ang pagpili sa pagsulod ngadto sa ganghaan pinaagi sa pagpabunyag sa mga kamot nga adunay katungod gikan sa Dios. Sila makahibalo nga ang bugtong paagi nga ang pamilya mahimong mag-uban sa kahangturan mao ang pagdawat ug paghupot og sagradong mga pakigsaad nga gitanyag diha sa mga templo sa Dios dinhi sa kalibutan. Ug sila makahibalo nga kamo nakahibalo. Ug sila makahinumdom kon kamo mitanyag ba kanila unsa ang gitanyag sa usa ka tawo diha kaninyo.

“Sayon ra ang pagsulti, ‘Dili pa ang hustong panahon.’ Apan adunay kuyaw sa paglangay-langay. Sa milabay nga mga tuig ako mitrabaho alang sa usa ka tawo sa California. Iya akong gipatrabaho, siya mabination kanako, siya ingon og taas og respeto kanako. Tingali ako lamang ang Santos sa Ulahing Adlaw nga iyang sukad nailhan og maayo. Ako wala masayud sa tanan nga mga rason nga akong nakita nga nagpaabut og mas maayong higayon nga makig-istorya kaniya kabahin sa ebanghelyo. Nahinumduman lamang nako ang akong gibati nga kaguol sa dihang akong nahibaloan, human siya miretiro ug ako mipuyo sa layo, nga siya ug ang iyang asawa namatay sa usa ka lawum sa kagabhiong pagmaneho padulong sa ilang balay sa Carmel, California. Gihigugma niya ang iyang asawa. Gihigugma niya ang iyang mga anak. Iyang gihigugma ang iyang mga ginikanan. Gihigugma niya ang iyang mga apo, ug iyang higugmaon ang ilang mga anak ug gusto nga makig-uban kanila sa kahangturan.

“Karon, ako wala masayud unsaon ang tanang katawhan paghan-ay didto sa kalibutan sa espiritu. Apan ako nagtuo nga ako siyang ikahibalag, nga siya motan-aw sa akong mga mata, ug nga akong makita diha niini ang pangutana: ‘Hal, ikaw nasayud. Nganong wala ko nimo sultihi?’” (“A Voice of Warning,” Ensign, Nob. 1998, 33).

Doktrina ug mga Pakigsaad 34: Dugang nga Makasaysayanong Background

Si Orson Pratt igsoon ni Parley P. Pratt. Gihulagway ni Orson ang iyang mga paningkamot nga mahiduol sa Ginoo isip usa ka batan-on: “Kanunay kong mibati og dakong kabalaka nga maandam alang sa usa ka kahimtang sa umaabut; apan wala gayud nako sugdi, sa tinud-anay gayud, sa pagtinguha sa Ginoo, hangtud sa tinglarag sa 1829. Misugod ko sa pag-ampo nianang higayuna sa kinasingkasing gayud, nga naghinulsol sa matag sala. Sa hilum nga kagabhion, samtang nahinanok ang uban diha sa ilang mga unlan, kanunay kong moadto sa sekreto nga dapit sa mamingaw nga umahan o kamingawan, ug moduko sa atubangan sa Ginoo, ug mag-ampo sulod sa mga oras nga adunay usa ka masulub-on nga kasingkasing ug mahinulsulon nga espiritu; kini ang akong kahupayan ug kamaya. Ang labing dako nga tinguha sa akong kasingkasing mao nga ang Ginoo mopakita nako sa Iyang kabubut-on kalabut nako” (sa The Orson Pratt Journals, comp. Elden J. Watson [1975], 8–9). Niadtong Septyembre 1830, gibisitahan si Orson sa usa sa iyang magulang nga mga igsoong lalaki, si Parley P. Pratt, kinsa bag-ohay pa lang nga nabunyagan. Sama ni Parley, si Orson nakabig sa kamatuoran, ug gibunyagan siya niadtong Septyembre 19, 1830, sa iyang ika-19 nga adlawng natawhan. Mibiyahe dayon siya og 200 ka milya aron mahimamat si Propeta Joseph Smith didto sa Fayette, New York. Nangutana siya aron masayud sa kabubut-on sa Ginoo alang kaniya, ug si Joseph Smith nakadawat sa pagpadayag nga narekord diha sa Doktrina ug mga Pakigsaad 34.

Doktrina ug mga Pakigsaad 34

Gitawag si Orson Pratt sa pagsangyaw sa ebanghelyo

Doktrina ug mga Pakigsaad 34:10. “Kini ihatag pinaagi sa gahum sa Espiritu Santo”

Si Orson Pratt 19 anyos ug namiyembro sa Simbahan sulod lamang sa pipila ka semana sa dihang ang Ginoo mihatag kaniya, pinaagi kang Propeta Joseph Smith, sa pagpadayag nga narekord diha sa Doktrina ug mga Pakigsaad 34. Niini nga pagpadayag misaad ang Ginoo kang Orson nga makahimo siya sa pagpamatuod uban sa espiritu sa panagna (tan-awa sa D&P 34:10).

Daghang katuigan human niana, isip usa ka Apostol sa Ginoo, si Elder Orson Pratt (1811–1881) miingon bahin niana nga saad: “‘Ipabati ang imong tingog ug panagna, ug ihatag kini pinaagi sa gahum sa Espiritu Santo.’ Usa kini ka piho nga punto diha sa pagpadayag nga alang kanako daw dako ra kaayo aron akong makab-ot, apan dunay usa ka positibong sugo nga kinahanglan nako kining buhaton. Kanunay kong namalandong niini nga pagpadayag, ug kasagaran mangutana diha sa akong kasingkasing—‘Ako bang natuman kana nga sugo sigun sa unsay kinahanglan unta nakong buhaton? Gitinguha ba nako sa kinasingkasing sigun sa unsay kinahanglan unta nakong mabatunan ang gasa sa panagna, aron matuman ang gikinahanglan sa langit?’ Ug usahay akong gibati nga ipanghimaraut ang akong kaugalingon, tungod sa akong pagtinapulan ug tungod sa gamayng pag-uswag nga akong nahimo nga may kalabutan niining dako, langitnon ug balaanong gasa. Sigurado nga wala koy hilig nga managna sa mga tawo gawas kon ihatag ngari kanako pinaagi sa inspirasyon ug gahum sa Espiritu Santo” (“Discourse by Elder Orson Pratt,” Deseret News, Mar. 3, 1875, 68).

Si Presidente Henry B. Eyring mipamatuod nga ang Ginoo mohatag og balaanong suporta pinaagi sa Espiritu Santo ngadto sa tanan Niyang mga anak samtang magtinguha sila sa pagtuman sa ilang mga calling ug mga responsibilidad:

“Ang Ginoo mogiya kaninyo pinaagi sa pagpadayag sama sa Iyang pagtawag kaninyo. Kinahanglan kamo nga mangayo diha sa hugot nga pagtuo alang sa pagpadayag nga masayud kon unsay angayan ninyong buhaton. Uban sa inyong tawag anaa ang saad nga ang mga tubag moabut. Apan kana nga giya moabut lamang kon ang Ginoo sigurado nga kamo motuman. Aron masayud sa Iyang kabubut-on kamo kinahanglan nga adunay pasalig nga mobuhat niini. Ang mga pulong ‘Ang imong pagbuot maoy matuman,’ nga nasulat diha sa kasingkasing, mao ang bintana sa pagpadayag.

“Ang tubag moabut pinaagi sa Balaang Espiritu. Magkinahanglan kamo kanunay niana nga giya. Aron makabaton sa Espiritu Santo isip inyong kauban, kinahanglan kamo nga takus, malimpyuhan pinaagi sa Pag-ula ni Jesukristo. Busa, ang inyong pagkamasulundon ngadto sa mga sugo, ang inyong tinguha nga makabuhat sa Iyang kabubut-on, ug ang inyong pagpangutana sa hugot nga pagtuo motino kon unsa ka klaro nga makagiya kaninyo ang Magtutudlo pinaagi sa mga tubag sa inyong mga pag-ampo.

“Sa kasagaran ang mga tubag moabut samtang magtuon kamo sa mga kasulatan. Kini naglangkob sa mga asoy sa unsay gibuhat sa Ginoo sa Iyang mortal nga pangalagad ug sa giya nga Iyang gihatag ngadto sa Iyang mga sulugoon. Aduna kini doktrina nga magamit sa tanang panahon ug sa tanang sitwasyon. Ang pagpamalandong sa mga kasulatan mogiya kaninyo sa pagpangutana sa husto nga mga pangutana diha sa pag-ampo. Ug ingon ka siguro sa pag-abli sa kalangitan ngadto kang Joseph Smith human nga siya namalandong sa mga kasulatan diha sa hugot nga pagtuo, ang Dios motubag sa inyong mga pag-ampo ug Siya moagak kaninyo pinaagi sa mga kamot. …

Doktrina ug mga Pakigsaad 34:11. “Ako mouban kanimo”

Misaad ang Ginoo sa makadaghang higayon nga magauban Siya niadtong kinsa matinud-anon ug mopatalinghug sa pagdapit nga moabag sa Iyang buhat (tan-awa sa, pananglit, D&P 30:11; 31:13; 32:3; 33:9; 34:11). Si Elder David A. Bednar sa Korum sa Napulog Duha ka mga Apostoles mipasabut kon sa unsang paagi nga kining saad makapahupay:

“Ang paghimo ug paghupot og sagradong mga pakigsaad nagyugo kanato ngadto ug uban ni Ginoong Jesukristo. Sa tinuod nga kahulugan, ang Manluluwas nagtawag kanato sa pagsalig diha ug pagbitad og dungan uban Kaniya, bisan tuod ang atong labing maayo nga paningkamot dili makatumbas ug dili ikatandi sa Iya. Samtang kita nagsalig ug nagbitad sa atong luwan uban Kaniya panahon sa atong panaw sa mortalidad, sa tinuod masayon ang Iyang yugo ug magaan ang Iyang luwan.

“Kita dili ug dili gayud kinahanglan nga mag-inusara. Makalahutay kita sa atong inadlaw nga mga kinabuhi uban sa langitnong panabang. Pinaagi sa Pag-ula sa Manluluwas makadawat kita og kapasidad ug ‘kalig-on lapas sa [atong] kaugalingon’ (‘Lord, I Would Follow Thee,’ Hymns, nu. 220). Sama sa gipahayag sa Ginoo, ‘Busa, padayon sa inyong panaw ug himoa ang inyong mga kasingkasing nga malipay, kay tan-awa ug sud-onga, Ako mouban kaninyo gani ngadto sa katapusan’ (D&P 100:12)” (“Makadaug sa Ilang mga Alantuson uban sa Kasayon,” Liahona, Mayo 2014, 88).