Kapitulo 26
Doktrina ug mga Pakigsaad 71–75
Pasiuna ug Timeline
Sa tinglarag sa 1831, ang kanhiay nga mga miyembro sa Simbahan nga sila si Ezra Booth ug Symonds Ryder misulay sa pagdaut sa dungog sa Simbahan ug sa mga lider niini ug gitambagan ang mga tawo nga dili magpa-miyembro sa Simbahan. Gibuhat ang mao pinaagi sa pagsulti batok sa Simbahan diha sa publiko nga mga miting ug aktibong pagmantala sa mga anti-Mormon nga mga pagsaway diha sa lokal nga mga pamantalaan, nga migiya sa pagkanap sa panagbatok. Kaniadtong Disyembre 1, 1831, gidikta ni Propeta Joseph Smith ang pagpadayag nga gi-rekord diha sa Doktrina ug mga Pakigsaad 71. Niini, gitudlo sa Ginoo si Joseph Smith ug Sidney Rigdon sa pagdepensa sa Simbahan ug ipawagtang ang mga bakak pinaagi sa pagsangyaw sa ebanghelyo gikan sa mga kasulatan ingon nga gigiyahan sa Espiritu.
Ang kusog nga pagtubo sa Simbahan sa Kirtland, Ohio, inubanan sa pagbalhin ni Bishop Edward Partridge ngadto sa Missouri, nagkinahanglan sa pagtawag og bag-ong bishop sa pagserbisyo didto sa Ohio. Kaniadtong Disyembre 4, 1831, nadawat ni Joseph Smith ang tulo ka mga pagpadayag nga karon gitipon diha sa Doktrina ug mga Pakigsaad 72 (mga bersikulo 1–8, 9–23, ug 24–26). Niini nga mga pagpadayag gitawag sa Ginoo si Newel K. Whitney sa pagserbisyo isip bishop sa Ohio ug gi-outline ang iyang mga responsibilidad.
Human sa usa ka buwan nga pagsangyaw aron sa pagwagtang sa mga bakak nga gipakaylap ni Ezra Booth ug Symonds Ryder, mibalik si Joseph Smith ug Sidney Rigdon ngadto sa Hiram, Ohio. Kaniadtong Enero 10, 1832, nadawat ni Joseph Smith ang pagpadayag nga gi-rekord diha sa Doktrina ug mga Pakigsaad 73, diin ang Ginoo mitudlo nila ni Joseph ug Sydney sa pagbalik sa ilang paghubad sa Biblia.
Ang pagpadayag nga girekord diha sa Doktrina ug mga Pakigsaad 74 nadawat sa 1830 sa wala pa mobalhin si Joseph Smith ngadto sa Ohio. Kini naglangkub sa pagpasabut as Ginoo kabahin sa 1 Mga Taga-Corinto 7:14.
Diha sa usa ka komperensya sa Simbhan nga gihimo kaniadtong Enero 25, 1832, nadawat ni Joseph Smith ang duha ka mga pagpadayag nga gi-rekord diha sa Doktrina ug mga Pakigsaad 75 (mga bersikulo 1–12 ug 13–36). Niini nga mga pagpadayag gitudloan sa Ginoo ang mga elder kabahin sa ilang misyonaryo nga mga katungdanan ug gihatagan sila og mga kompanyon sa misyon.
-
1830Ang Doktrina ug mga Pakigsaad 74 nadawat.
-
Oktubre 1831Ang Ohio Star nga pamantalaan misugod sa pagmantala og siyam ka mga sulat gikan sa mibiya sa kamatuoran nga si Ezra Booth nagsaway sa Simbahan ug sa mga lider niini.
-
Nobyembre 1, 1831Usa ka komperensya sa Simbahan mipasaka og resolusyon sa pagmantala sa mga pagpadayag ni Joseph Smith isip ang Basahon sa mga Sugo.
-
Disyembre 1, 1831Ang Doktrina ug mga Pakigsaad 71 nadawat.
-
Disyembre 4, 1831Ang Doktrina ug mga Pakigsaad 72 nadawat.
-
Enero 10, 1832Ang Doktrina ug mga Pakigsaad 73 nadawat.
-
Enero 25, 1832Ang Doktrina ug mga Pakigsaad 75 nadawat.
Doktrina ug mga Pakigsaad 71: Dugang nga Makasaysayanong Background
Kaniadtong Oktubre 1831, ang Ohio Star nga pamantalaan misugod sa pagmantala og mga sulat nga misaway sa Simbahan ug sa mga lider niini. Ang mga sulat gisulat ni Ezra Booth, usa ka kanhiay Methodist nga magwawali kinsa nahimong usa ka miyembro sa Simbahan human mabasa ang Basahon ni Mormon ug nakakita sa Propeta nga milagrosong nag-ayo sa riyumahong bukton ni Alice (Elsa) Johnson. Bisan pa niana, ang garbo migiya ni Ezra nga mahimong hinawayon sa Propeta ug sa Simbahan. Nakabiyahe siya ngadto sa Missouri isip usa ka misyonaryo sa ting-init sa 1831, apan nadismaya siya sa pisikal nga mga kalisud sa panaw. Nahigawad usab siya sa dihang ang yuta sa Zion ug ang pagkapangulo ni Joseph Smith wala makaabut sa iyang mga gidahum. (Tan-awa sa Matthew McBride, “Ezra Booth ug Isaac Morley,” sa Revelations in Context, ed. Matthew McBride ug James Goldberg [2016], 131–32, o history.lds.org; Mark Lyman Staker, Hearken, O Ye People: The Historical Setting for Joseph Smith’s Ohio Revelations [2009], 296.)
Human mibalik gikan sa Missouri kaniadtong Septiyembre 1831, si Ezra Booth misugod sa pagpanaway sa Simbahan ug ni Propeta Joseph Smith. Diha sa usa ka komperensya sa mga elder nga gihimo kaniadtong Septyembre 6, “gidid-an si Ezra gikan sa pagsangyaw isip usa ka Elder niini nga Simbahan” (diha sa The Joseph Smith Papers, Documents, Volume 2: Hulyo 1831–Enero 1833, ed. Matthew C. Godfrey ug uban [2013], 61). Wala madugay niana nga bulan, siya ug lain nga masupilon, si Symonds Ryder, mibiya sa ilang pagka-miyembro sa Simbahan. Diha sa iyang sulat ngadto sa Ohio Star, gipasanginlan ni Ezra Booth si Propeta Joseph Smith nga usa ka impostor, nag-angkon nga ang iyang mga pagpadayag usa ka paagi aron malimbongan ang mga tawo sa ilang kwarta. Ang kasaysayan ni Propeta Joseph Smith nagrekord nga ang mga sulat ni Ezra Booth, “pinaagi sa ilang mga pagdaut, paghimakak, ug kawang nga mga pagbana-bana sa pagguba sa buhat sa Ginoo, naglantad [sa kang Booth] nga kahuyang, kadautan, ug kabuang, ug mibilin kaniya og handumanan sa iyang kaugalingong kaulaw alang sa kalibutan nga mahinumduman” (in Manuscript History of the Church, vol. A-1, page 154, josephsmithpapers.org).
Nahibaloan ni Symonds Ryder (o Simonds Rider) ang mahitungod sa gipahiuli nga ebanghelyo gikan ni Ezra Booth. Nahimong miyembro sa Simbahan si Symonds human makasaksi unsay iyang gihunahuna nga usa ka milagro. Wala madugay human sa iyang bunyag gi-orden siya nga elder sa Simbahan. Sa kadugayan ang mga istorya nagsugyot nga sa dihang iyang nadawat ang opisyal nga sugo sa pagsangyaw sa ebanghelyo, nakit-an niya nga ang iyang ngalan sayop pagka-spelling diha sa sertipiko. Nagtuo nga ang usa ka pinadayag nga tawag unta wala bisan gamay nga mga sayop, misugod si Symonds sa pagduda sa katinuod sa propetikanhong inspirasyon ni Joseph Smith. Na-impluwensya usab si Symonds sa nagkawala nga hugot nga pagtuo sa iyang suod nga higala si Ezra Booth, kinsa mipauli nga nawad-an og kadasig gikan sa iyang misyon ngadto sa Missouri. Labaw sa tanan, ang iyang mga kabalaka sa baruganan sa pagpahinungod ingon og migiya ngadto sa iyang pagkanawad-an og pagbati. (Tan-awa sa A. S. Hayden, Early History of the Disciples in the Western Reserve, Ohio [1875], 220–21, 251–52.) Human ipahimulag ang iyang kaugalingon gikan sa Simbahan sa tinglarag sa 1831, mihatag si Symonds Ryder og mga kopya sa usa sa wala mamantala nga mga pagpadayag ni Propeta Joseph Smith ngadto sa Western Courier nga pamantalaan sa pagsulay og sugyot sa mga tawo sa dili pag-apil sa Simbahan. Sa kadugayan miangkon si Ryder nga ang bag-o nga mga kinabig makahibalo gikan niini nga mga pagpadayag nga “usa ka plano ang gihimo sa pagkuha sa ilang katigayunan gikan kanila ug ibutang kini ubos sa pagkontrolar ni Joseph Smith ang propeta” (sa Joseph Smith Papers, Documents, Volume 2: Hulyo 1831–Enero 1833, 144–45; tan-awa usab sa Hayden, Early History of the Disciples, 221).
Ang pagpadayag sa Ginoo nga gi-rekord diha sa Doktrina ug mga Pakigsaad 71 miabut isip usa ka resulta sa paghulhog ug negatibo nga pagmantala nga gihimo ni Ezra Booth ug Symonds Ryder.
Doktrina ug mga Pakigsaad 71
Nagtudlo ang Ginoo ni Joseph Smith ug Sidney Rigdon sa pagtubag sa mga nanghinaway sa Simbahan
Doktrina ug mga Pakigsaad 71:1. Isangyaw ang ebanghelyo “gikan sa mga kasulatan, sumala ngadto [sa] Espiritu”
Misulti ang Ginoo ngadto ni Propeta Joseph Smith ug Sidney Rigdon sa pagtubag sa pagsaway kabahin sa Simbahan pinaagi sa pagtudlo sa mga kamatuoran sa ebanghelyo “gikan sa mga kasulatan, sumala niana nga bahin sa Espiritu ug gahum nga ihatag nganha kaninyo” (D&P 71:1) Kini nga tambag nagsilbi isip usa ka sumbanan alang sa tanang miyembro sa Simbahan kon motubag ngadto niadtong kinsa nagsaway sa Simbahan ug sa mga pagtulun-an niini. Ang propeta Alma diha sa Basahon ni Mormon mitudlo nga ang pagsangyaw sa pulong sa Dios adunay “labaw nga gamhanan nga sangputanan diha sa mga hunahuna sa mga katawhan kay sa espada, o sa bisan unsa pa” (Alma 31:5). Si Elder Neal A. Maxwell (1926–2004) sa Korum sa Napulog Duha ka mga Apostoles mitudlo: “Ang Ginoo namulong kanamo nga ‘ang espada nga mao ang Espiritu … mao ang pulong sa Dios’ (Mga Taga-Efeso 6:17); kini makatabang sa komunikasyon ug makatuhop og mas maayo kay sa bisan unsa pa. Busa ang balaang kasulatan ug ang mga pulong sa buhing mga propeta nag-okupar og pinalabi nga kahimtang; kini mao ang yawe sa pagtudlo pinaagi sa Espiritu aron kita makasulti sa unsay gitawag ni Propeta Joseph Smith og ‘ang pinulongan sa inspirasyon’ (Teachings of the Prophet Joseph Smith, sel. Joseph Fielding Smith [Salt Lake City: Deseret Book Co., 1976], p. 56)” (“Teaching by the Spirit—‘The Language of Inspiration’” [pamulong nga gihatag didto sa Church Educational System Symposium, Ago. 15, 1991], 1).
Doktrina ug mga Pakigsaad 71:2–7. “Buntuga ang inyong mga kaaway”
Misugo ang Ginoo ni Propeta Joseph Smith ug Sidney Rigdon sa pagsangyaw sa ebanghelyo ngadto sa mga Santos ug sa mga katawhan diha sa palibut nga rehiyon (tan-awa sa D&P 71:2). Dugang pa, mitudlo ang Ginoo kanila “buntuga ang [ilang] mga kaaway” (D&P 71:7), o sa laing pagkasulti, ipanghimakak ang ilang sayop nga mga gisulti pinaagi sa pagdapit kanila sa pakigkita ug pakighisgot sa ilang mga tumo-tumo. Agi og pagsunod sa sugo sa Ginoo, gidapit ni Sidney Rigdon si Ezra Booth sa pakigkita kaniya diha sa usa ka lecture kaniadtong Disyembre 25, 1831, “diin iyang ‘ribyuhon’ ang mga sulat ni Booth ug ipakita kini nga ‘usa ka dili matarung ug sayop nga pagkarepresentar sa mga hilisgutan nga gisulat’” (sa Joseph Smith Papers, Documents, Volume 2: Hulyo 1831–Enero 1833, 145). Gihangyo usab niya si Symonds Ryder ngadto sa usa ka publiko nga miting diin mahimo silang maghisgot sa Basahon ni Mormon. Ni usa ka tawo midawat sa imbitasyon.
Si Propeta Joseph Smith ug ang iyang asawa, nga si Emma, mibalhin ngadto sa Hiram, Ohio, ngadto sa panimalay ni John Johnson, aron ang Propeta makapadayon sa iyang trabaho sa paghubad sa Biblia (tan-awa sa D&P 64; 71 mga ulohan sa seksyon).
Alang sa sunod nga bulan si Propeta Joseph Smith ug Sidney Rigdon mitrabaho sa pagwagtang sa dili mahigalaon nga mga pagbati ngadto sa Simbahan resulta gikan sa mga artikulo ni Ezra Booth diha sa pamantalaan. Ang duha ka mga lalaki misangyaw sa tibuok amihanang Ohio, nagtudlo sa ebanghelyo ug misalikway sa mga pagsaway nga gidirekta sa Simbahan ug sa mga lider niini. Sumala sa Propeta, ang ilang mga paningkamot sa pagsunod sa tambag sa Ginoo ug sa pagtubag pinaagi sa pagsangyaw sa mga kamatuoran sa ebanghelyo pinaagi sa gahum sa Espiritu “nakahimo og dako sa paghupay sa naukyab nga mga pagbati tungod sa eskandalosong mga sulat nga gimantala sa ‘Ohio Star,’ sa Ravenna, sa … mibiya sa kamatuoran nga si Ezra Booth” (sa Manuscript History of the Church, vol. A-1, pahina 179, josephsmithpapers.org).
Si Elder Robert D. Hales sa Korum sa Napulog Duha ka mga Apostoles mitudlo nga kon kita makasugat og pagsaway batok sa Simbahan ug sa mga pagtulun-an niini, mahinungdanon kining tubagon sa Kristohanong paagi sumala sa paggiya sa Espiritu Santo:
“Kon kita motubag sa atong mga tig-akusar sama sa gihimo sa Manluluwas, dili lamang kita mahimong mas mahisama ni Kristo, nagdapit kita sa uban nga mobati sa Iyang gugma ug mosunod usab Kaniya.
“Ang pagtubag sa paagi nga sama kang Kristo dili kahimoan og tamdanan o pinasikad sa usa ka pormula. Ang Manluluwas mitubag sa lahing paagi sa matag sitwasyon. …
“Samtang kita motubag sa uban, matag sitwasyon managlahi. Maayo na lang, ang Ginoo nasayud sa mga kasingkasing sa atong mga tig-akusar ug sa unsa nga paagi kita labing epektibo nga makatubag kanilaSamtang ang tinuod nga mga disipulo mangayo og giya gikan sa Espiritu, madawat nila ang inspirasyon nga gihaum ngadto sa matag panagharong. Ug sa matag panagharong, ang tinuod nga mga disipulo nagtubag sa mga paagi nga nagdapit sa Espiritu sa Ginoo” (“Kristohanong Kaisug: Ang Bugti sa Pagkadisipulo,” Liahona, Nob. 2008, 73).
Doktrina ug mga Pakigsaad 71:9. “Walay hinagiban nga gihimo batok kaninyo nga mouswag”
Nadawat ni Propeta Joseph Smith ug ni Sidney Rigdon ang saad sa Ginoo nga kon sila magpabilin nga matinud-anon, ang ilang mga kaaway maulawan (tan-awa sa D&P 71:7). Gibalik sa Ginoo ang saad nga Iyang gihimo ngadto sa karaang Israel pinaagi ni propeta Isaias nga “walay hinagiban nga gibuhat batok kanimo nga magmalampuson” (Isaias 54:17; tan-awa sa D&P 71:7). Sa laing pagkasulti, ang Dios ug ang Iyang buhat kanunay nga modaug, walay pagsapayan sa mga pag-atake gikan sa mga nanghinaway sa Simbahan. Bisan pa sa apostasiya ug mga pang-atake ni Ezra Booth ug Symonds Ryder, ang mga misyonaryo mipadayon sa pagkaplag og kalampusan sa pagsangyaw sa ebanghelyo. Si Ira Ames, kinsa nagpuyo sa New York, nahinumdom nga sa dihang iyang gibasa ang mga sulat ni Booth diha sa pamantalaan, iyang “gibati ang usa ka pagtoo nga adunay usa ka butang sa Mormonismo. Dihay ubay-ubay nga tabi mahitungod niini diha sa kasilinganan” (sa Hayden, Early History of the Disciples, 302). Pila ka higayon human mabasa ni Ira Ames ang mga sulat ni Booth, ang mga misyonaryo mianha sa baryo ni Ira ug siya gibunyagan isip usa ka miyembro sa Simbahan (tan-awa sa Hayden, Early History of the Disciples, 303). Busa, samtang si Booth ug si Ryder nanghinaut nga ang mga tawo masugyutan sa dili pagdawat sa gipahiuli nga ebanghelyo, ang ilang impluwensya mipatubo sa paglantad sa mga tawo ngadto sa Simbahan, ug diha sa pipila ka mga higayon kini nakahatag og mas daghang pagkakabig.
Doktrina ug mga Pakigsaad 72: Dugang nga Makasaysayanong Kaagi
Agi og pagsunod sa mga sugo sa Ginoo (tan-awa sa D&P 71:1–7), kaniadtong Disyembre 3, 1831, si Propeta Joseph Smith ug Sidney Rigdon mibiyahe gikan sa Hiram ngadto sa Kirtland, Ohio, sa pagsangyaw sa ebanghelyo aron sa pagtabang og wagtang sa masinupakong mga pagbati batok sa Simbahan. Sumala sa kasaysayan sa Propeta, ang sunod nga adlaw, Disyembre 4 “pipila ka mga Elder ug mga miyembro ang nagpundok aron sa pagkat-on sa ilang katungdanan ug alang sa paglig-on,” ug human sa paghisgot sa ilang “temporal ug Espiritwal nga kaayohan,” nadawat sa Propeta ang tulo ka may kalabutan nga mga pagpadayag, nga gi-rekord karon diha sa Doktrina ug mga Pakigsaad 72 (sa Manuscript History of the Church, vol. A-1, pahina 176, josephsmithpapers.org). Uban sa pag-uswag sa Simbahan ngadto sa Missouri ug sa pagbalhin ni Bishop Edward Partridge ngadto sa Independence, ang mga Santos sa Ohio nabiyaan nga walay bishop. Sa usa sa mga pagpadayag, mipahayag ang Ginoo sa panginahanglan sa pagtawag og bag-ong bishop sa Ohio (tan-awa sa D&P 72:2).
Doktrina ug mga Pakigsaad 72
Nagtawag ang Ginoo ni Newel K. Whitney isip bishop sa Ohio ug nagpasabut sa mga katungdanan sa usa ka bishop
Doktrina ug mga Pakigsaad 72:2–3. “Sa paghatag og asoy sa iyang pagkatinugyanan, karon ug sa kahangturan”
Tungod kay pipila sa mga miyembro sa Simbahan sa Ohio nanagpuyo sa balaod sa pagpahinungod, usa ka bishop ang gikinahanglan sa pagdawat sa gipahinungod nga mga kabtangan, sa pag-apud-apod ug sa pagdumala sa indibidwal nga mga pagkatinugyanan, pagkolekta og mga sobra, ug sa paghatag og mga pundo gikan sa balay tipiganan ngadto niadtong nanginahanglan (tan-awa ang komentaryo alang sa D&P 42:30–39 niini nga manwal). Gikinahanglan sa Ginoo ang mga Santos sa “paghatag og asoy” sa ilang mga pagkatinugyanan ngadto sa bishop (D&P 72:3). Ang baruganan sa pagkatinugyanan gibase diha sa pagtulun-an nga ang tanang mga butang iya sa Ginoo ug kita Iyang mga tinugyanan (tan-awa sa D&P 104:13–16). Samtang kita wala hatagi og mga pagkatinugyanan ubos sa balaod sa pagpahinungod karon, ang Ginoo naghatag diha kanato og espiritwal ug temporal nga mga responsibilidad diin kita may tulubagon ngadto Kaniya.
Si Elder Joseph B. Wirthlin (1917–2008) sa Korum sa Napulog Duha ka mga Apostoles mitudlo sa usa sa maong responsibilidad diin kita nagkinahanglan nga mohatag og asoy:
“Matag usa kanato adunay mahangturong calling diin walay opisyal sa Simbahan ang adunay awtoridad sa pag-release kanimo. Kini usa ka calling nga gihatag nganha kaninyo sa Langitnong Amahan Mismo. Niini nga mahangturon nga calling, sama sa uban nga mga calling, kamo adunay pagkamay tulubagon. … Kining labing importante nga pagkatinugyanan mao ang mahimayaong responsibilidad nga gihatag nganha kaninyo sa inyong Amahan sa Langit sa pagbantay ug pag-amuma sa inyong kaugalingon nga kalag.
“Sa umaabut nga pipila ka adlaw, kamo ug ako kada usa makadungog sa tingog sa Ginoo nga nagtawag kanato sa pagduol aron sa paghatag og asoy sa atong mortal nga pagkatinugyanan. Kini nga asoy mahitabo kon kita tawgon nga ‘makabarug sa atubangan [sa Ginoo] sa adlaw sa dako nga paghukom’ [2 Nephi 9:22]” (“True to the Truth,” Ensign, Mayo 1997, 16).
Doktrina ug mga Pakigsaad 72:8. “Ang akong sulugoon nga si Newel K. Whitney mao ang tawo kinsa itudlo”
Si Newel K. Whitney usa ka magpapatigayon kinsa tag-iya og usa ka tindahan sa Kirtland, Ohio, uban sa iyang kasosyo sa negosyo, si A. Sidney Gilbert. Sa wala pa mahibalo mahitungod sa gipahiuli nga ebanghelyo, si Newel ug ang iyang asawa, si Ann, kauban sa kongregasyon ni Sidney Rigdon nga Reformed Baptists, ug ilang “gitinguha ang mga butang sa Espiritu.” Usa ka gabii sa 1829, samtang sila nag-ampo aron magiyahan, nadawat nila ang gamhanang espiritwal nga pagpakita. Mipasabut si Ann:
“‘Ang Espiritu mikunsad kanamo ug ang usa ka panganod milandong sa balay. … Usa ka ligdong nga katingala mituhop kanamo. Nakita namo ang panganod ug gibati ang Espiritu sa Ginoo. Dayon nakadungog kami og usa ka tingog gikan sa panganod, nga nag-ingon, “Pangandam sa pagdawat sa pulong sa Ginoo, kay kini moabut.” Diha niini nahibulong kami og dako, apan sukad niana nga higayon nahibalo kami nga ang pulong sa Ginoo nagsingabut sa Kirtland’ [Andrew Jenson, Latter-day Saint Biographical Encyclopedia, 4 vols. (1901–36), 1:223]” (“Newel K. Whitney: A Man of Faith and Service,” Museum Treasures, history.lds.org).
Wala madugay human niana nga kasinatian, ang mga Whitney nakadungog sa tingog sa Ginoo sa dihang si Sidney Rigdon midapit og mga misyonaryo sa pagsangyaw ngadto sa iyang mga kongregasyon. Namiyembro ang mga Whitney sa Simbahan kaniadtong Nobyembre 1830. Human sa pipila ka mga bulan si Joseph ug si Emma Smith miabut sa Kirtland. Misulat ang Propeta: “Ako ug ang akong asawa mipuyo [uban] sa pamilya ni Brother Whitney pipila ka mga semana, ug nakadawat sa tanang kalooy ug pagtagad, nga gidahum, ug ilabi na gikan ni Sister Whitney” (sa Manuscript History of the Church, vol. A-1, pahina 93, josephsmithpapers.org). Sa kadugayan, sa Septiyembre 1832, gidapit sa mga Whitney si Joseph ug si Emma Smith sa pagpuyo sa mapuy-an nga bahin sa ilang tindahan, nga nahimong mga punoang buhatan sa Simbahan sulod sa pipila ka panahon.
Gitawag og bishop si Newel K. Whitney. Ang iyang tindahan sa kadugayan nahimong balay tipiganan diin makatabang siya sa pagtubag sa mga panginahanglan sa kabus (tan-awa sa D&P 72:8–12).
Sa dihang gitawag si Newel kaniadtong Disyembre 1831 sa pagserbisyo isip bishop sa Ohio, mipahayag siya og mga pagbati sa kakulangan ngadto ni Propeta Joseph Smith. Ang apong lalaki ni Bishop Whitney, si Elder Orson F. Whitney (1855–1931) sa Korum sa Napulog Duha ka mga Apostoles, miistorya kon unsa ang gibati sa iyang apohang lalaki sa dihang gitawag isip bishop ug ang mga pasalig nga iyang nadawat:
“Ang hunahuna sa pagdawat niining importanting responsibilidad (ang katungdanan sa bishop) hapit labaw kay sa iyang mahimo. Hinoon sa kinaiyanhong mga gasa pipila ka mga lalaki ang mas maayo sa maong katungdanan, siya bisan pa niana walay pagduda sa iyang abilidad, ug naghunahuna sa iyang kaugalingon nga dili makahimo sa pagbuhat sa dako ug balaang pagsalig. Sa iyang kalibug, mihangyo siya ngadto sa Propeta:
“‘Dili ako makahunahuna sa akong kaugalingon nga usa ka bishop, Brother Joseph, apan kon ikaw moingon nga kini kabubut-on sa Ginoo, ako maninguha.’
“‘Dili ka kinahanglan nga motuo sa akong pulong lamang;’ mitubag ang Propeta, palihug, ‘Lakaw ug pangutana sa Amahan alang sa imong kaugalingon.’
“Si Newel … determinado sa pagbuhat ingon nga [ang Propeta] mitambag. Ang iyang mapainubsanon, kinasingkasing nga pag-ampo gitubag. Diha sa kahilum sa kagabhion ug sa kamingaw sa iyang lawak, nadungog niya ang usa ka tingog gikan sa langit: ‘Ang imong kalig-on ania kanako.’ Ang mga pulong diyutay ug yano, apan dako kaayo og kahulugan. Ang iyang mga pagduda nawagtang sama sa yamog sa wala pa ang kaadlawon. Diha-diha dayon miadto siya sa Propeta, gisultihan niya nga siya nakasabut, ug andam sa pagdawat sa katungdanan nga siya gitawag” (sa B. H. Roberts, A Comprehensive History of the Church, 1:271).
Miserbisyo si Newel K. Whitney isip bishop hangtud sa iyang kamatayon kaniadtong 1850.
Doktrina ug mga Pakigsaad 72:9–19. Ang mga katungdanan sa usa ka bishop
Atol niining una nga panahon sa pag-organisar, ang Simbahan wala mabahin ngadto sa mga ward o mga branch nga may mga bishop o mga branch president nga nagdumala sa kada ward o branch sama niini karon. Sa pagka-Disyembre 4, 1831, dihay duha lamang ka mga bishop—Bishop Edward Partridge sa Missouri ug Bishop Newel K. Whitney sa Ohio. Ang mga responsibilidad nga gi-outline sa Ginoo ingon nga gi-rekord diha sa Doktrina ug mga Pakigsaad 72:9–19 kalabut una sa tanan ngadto sa tahas ni Bishop Whitney ubos sa balaod sa pagpahinungod.
Samtang kita wala magsunod sa balaod sa pagpahinungod sa samang paagi nga gibuhat sa unang mga Santos, daghan sa mga katungdanan nga gi-outline diha sa Doktrina ug mga Pakigsaad 72 magamit gihapon sa mga bishop karon. Ang mga bishop responsable sa pagdumala sa pag-apud-apod sa pagkaon ug mga kagamitan gikan sa balay tipiganan sa bishop ngadto sa mga miyembro kinsa nanginahanglan, ug sila nagdawat ug may responsibilidad alang sa mga salapi sa Simbahan pinaagi sa ikapulo, mga halad sa puasa, ug ubang mga donasyon (tan-awa sa D&P 72:10). Ang mga bishop nagserbisyo isip mga tinugyanan sa Ginoo kon ang mga miyembro mohatag og asoy sa ilang mga responsibilidad ug mga calling (tan-awa sa D&P 72:11). Nagbantay sila sa espiritwal ug temporal nga kaayohan sa mga Santos. Ilabi na, sila adunay katungdanan sa pagpangita ug sa pag-amuma alang sa mga kabus ug timawa nga anaa sa mga utlanan sa ilang ward (tan-awa sa D&P 72:11–12). Isip mga maghuhukom sa Israel, ang mga bishop usab adunay ligdong nga responsibilidad sa pagdeterminar ug pagmatuod sa katakus sa mga miyembro nga pagabunyagan, pagdawat sa priesthood, pagserbisyo og mga misyon, pagsulod sa balay sa Ginoo, ug sa pagserbisyo diha sa mga calling sa ward (tan-awa sa D&P 72:17). Dugang pa, isip maghuhukom responsable sila sa pagtawag ug pagdumala og mga konseho sa pagdisiplina diha sa ilang ward sa mga hitabo nga seryosong paglapas (tan-awa sa D&P 58:17–18).
Doktrina ug mga Pakigsaad 73: Dugang nga Makasaysayanong Kaagi
Human naggahin og usa ka bulan sa pagsangyaw sa ebanghelyo didto sa silangang Ohio, naningkamot sa pag-usab sa mga epekto sa mga sulat ni Ezra Booth batok sa Simbahan ug sa mga lider niini, si Propeta Joseph Smith ug si Sidney Rigdon mibalik ngadto sa panimalay ni John Johnson sa Hiram, Ohio. Human sa pipila ka mga adlaw, pagka-Enero 10, 1832, ang Propeta midiktar sa pagpadayag nga gi-rekord diha sa Doktrina ug mga Pakigsaad 73, “nagpahibalo sa kabubut-on sa Ginoo” ngadto sa mga elder sa Simbahan hangtud sa pagtawag og sunod nga komperensya, nga gihimo duha ka semana wala madugay (sa Manuscript History of the Church, vol. A-1, pahina 179, josephsmithpapers.org).
Doktrina ug mga Pakigsaad 73
Nagsugo ang Ginoo ni Joseph Smith ug Sidney Rigdon sa pagpadayon sa paghubad sa Biblia
Doktrina ug mga Pakigsaad 73:3–4. “Kini angay nga mohubad pag-usab”
Misugo ang Ginoo ni Propeta Joseph Smith ug Sidney Rigdon sa pagtrabaho pag-usab sa dinasig nga hubad sa Biblia ug sa pagpadayon sa pagsangyaw diha sa palibut hangtud sa sunod nga komperensya sa Simbahan (tan-awa sa D&P 73:3–4). Human sa komperensya, hinoon, gikinahanglan silang mohatag sa ilang tibuok nga panahon ngadto sa “buluhaton sa paghubad hangtud nga kini matapos” (D&P 73:4). Makugihon nga mitrabaho ang Propeta ug si Sidney Rigdon sa paghubad sa Biblia gikan niini nga panahon hangtud sa Hulyo 2, 1833, sa dihang ang mga tighubad misulat ngadto sa mga kaigsoonan sa Missouri nga sila, nianang adlawa, nakahuman sa paghubad sa Biblia. Mga bahin sa hubad ni Joseph Smith anaa karon gilangkub sa Perlas nga Labing Bililhon (ang basahon ni Moises ug Joseph Smith—Mateo) ug sa nagkadaghang mga pinulongan diha sa Santos sa Ulahing Adlaw nga edisyon sa Biblia. Ang Hubad ni Joseph Smith sa Biblia dihay “usa ka mahinungdanong impluwensya sa Simbahan sa paagi nga kini miumol sa sulod sa Doktrina ug mga Pakigsaad. Labaw sa katunga sa karon nga Doktrina ug mga Pakigsaad naglangkub sa mga pagpadayag nga nadawat sulod sa tulo ka tuig nga panahon diin si Joseph Smith nanlimbasug sa paghubad sa Biblia. Daghang mga pagpadayag ang nadawat isip direkta nga mga tubag sa mga pangutana nga nadasig si Joseph sa pagpangutana ingon nga ang iyang pagsabut sa ebanghelyo milambo atol sa pagpaningkamot sa pagpahiuli sa yano ug bililhon nga mga bahin sa Biblia” (Elizabeth Maki, “Joseph Smith’s Bible Translation,” sa Revelations in Context, 103, o history.lds.org).
Alang sa dugang nga pagpasabut sa hubad ni Joseph Smith sa Biblia, tan-awa ang komentaryo alang sa Doktrina ug mga Pakigsaad 35:20 niini nga manwal.
Doktrina ug mga Pakigsaad 74: Dugang nga Makasaysayanong Kaagi
Sa dihang ang tigsaysay ug tigrekord sa Simbahan nga si John Whitmer mikopya sa pagpadayag nga gi-rekord diha sa Doktrina ug mga Pakigsaad 74 ngadto sa opisyal nga basahon sa rekord, gi-rekord niya ang petsa og 1830 (tan-awa sa The Joseph Smith Papers, Documents, Volume 1: Hulyo 1828–Hunyo 1831, ed. Michael Hubbard MacKay ug uban pa [2013], 228). Mga katuigan milabay, kadtong nag-andam sa pagmantala sa kasaysayan ni Propeta Joseph Smith nasayop sa pagsulat nga nadawat sa Propeta kini nga pagpadayag sa Enero 1832 samtang siya naghimo sa dinasig nga mga pag-usab sa Bag-ong Tugon. Hinoon, gitino ni John Whitmer ang Wayne County, New York, isip ang dapit diin gidiktar ni Joseph Smith ang pagpadayag ug ang 1830 isip ang petsa nga kini nadawat. Gihulagway sa ulahing kasaysayan sa Propeta kini nga pagpadayag isip “usa ka Pagpasabut sa sulat ngadto sa unang mga Taga-Corinto, ika-7 nga Kapitulo, ika-14 nga bersikulo” (sa Manuscript History of the Church, vol. A-1, pahina 178, josephsmithpapers.org). Ang tudling diha sa 1 Mga Taga-Corinto 7:14 kanunay nga gikutlo aron sa paghatag og katarungan sa bunyag sa masuso.
Doktrina ug mga Pakigsaad 74
Gipasabut sa Ginoo ang kahulugan sa 1 Mga Taga-Corinto 7:14
Doktrina ug mga Pakigsaad 74:1–5. Ang sayop nga mga tradisyon sa atong mga amahan
Ang Doktrina ug mga Pakigsaad 74 naghatag og importanting makasaysayanong kinatibuk-ang pagpasabut ngadto sa mga pagtulun-an ni Apostol Pablo diha sa 1 Mga Taga-Corinto 7:14. Ang iyang tambag ngadto sa mga Santos sa Corinto mitubag og usa ka problema nga milambo sa dihang ang mga asawa nakabig ngadto sa ebanghelyo ni Jesukristo ug ang ilang mga bana nagsunod gihapon sa balaod ni Moises. Atong mabasa diha sa Doktrina ug mga Pakigsaad 74:3 nga ang panagbangi miabut sa dihang ang mga amahan mitinguha sa pagpatuli sa ilang anak nga mga lalaki ug nahimong ubos sa balaod ni Moises, nga natuman sa Manluluwas ug sa Iyang maulaong sakripisyo. Daghang mga bata niini nga mga sitwasyon, gipatubo ubos sa balaod ni Moises, nagdako ug “misunod sa mga tradisyon sa ilang mga amahan ug wala mituo sa ebanghelyo ni Kristo” (D&P 74:4). Gitambagan ni Pablo ang mga Santos kinsa naminyo ngadto sa mga dili matuohon sa dili pagpakigbulag sa ilang mga kapikas apan sa pagpabilin nga minyo ug magpuyo nga matinud-anon. Sa pagbuhat sa mao, ang mga kapikas adunay balaanong impluwensya diha sa ilang mga pamilya (tan-awa sa 1 Mga Taga-Corinto 7:13–14; D&P 74:1).
Si Apostol Pablo wala magtudlo nga ang mga bata natawo nga dili limpyo o may sala. Hinoon, iyang gitudlo nga ang usa ka matuohon nga kapikas makabaton og matarung nga impluwensya nga makagiya sa mga anak, kon sila moabut sa edad nga pagkamay-tulubagon, sa pagsunod sa ebanghelyo ug mahimong “balaan” (1 Mga Taga-Corinto7:14; D&P 74:1) pinaagi sa Manluluwas, si Jesukristo.
Sumala sa Doktrina ug mga Pakigsaad 74:5, mitambag si Pablo niadtong kinsa wala pa maminyo batok sa pagminyo og mga dili matuohon gawas kon ang mga kapikas miuyon nga ang balaod ni Moises “mawala diha kanila.” Mipasabut ang Ginoo nga kining mga rekomendasyon dili mga sugo gikan Kaniya, apan tambag gikan mismo ni Pablo.
Doktrina ug mga Pakigsaad 74:6–7. “Ang tradisyon … nga ang gagmay nga mga bata dili mga balaan”
Giklaro ni Propeta Joseph Smith ang 1 Mga Taga-Corinto 7:14, nagpasabut nga ang gagmay nga mga bata mga balaan ug wala magkinahanglan og mga ordinansa sa kaluwasan hangtud sila mahimong may pagka-tulubagon (tan-awa sa D&P 68:27; 74:5–7).
Ang pipila sa mga Judeo kinsa misunod sa balaod ni Moises sa panahon ni Apostol Pablo mituo sa sayop nga tradisyon nga ang mga lalaking masuso nangatawo nga dili balaan, o dili limpyo, gawas kon sila mosulod og usa ka pakigsaad uban sa Dios pinaagi sa pagtuli. Ang mao nga pagtulun-an, hinoon, sumpaki sa tambag sa mga propeta nga ang gagmay nga mga bata mga walay sala tungod sa Pag-ula ni Jesukristo (tan-awa sa Mosiah 3:16), “makabaton og kinabuhi nga dayon” (Mosiah 15:25), ug “mga buhi diha ni Kristo” (Moroni 8:12, 22). Agi ug dugang, ang pagtudlo nga ang mga bata dili balaan nagsupak sa katuyoan sa Ginoo sa pagsugo og pagpatuli uban ni Abraham. Uban sa dugang nga panabut gikan sa Hubad ni Joseph Smith, atong nakat-unan nga ang pagpatuli nagrepresentar og usa ka pakigsaad tali sa Ginoo ug sa kaliwatan ni Abraham ug nga “ang mga bata walay tulubagon sa atubangan [sa Ginoo] hangtud nga sila magpanuigon og walo ka mga tuig” (Hubad ni Joseph Smith, Genesis 17:11 [diha sa Mga Pinili gikan sa Hubad ni Joseph Smith sa Biblia], scriptures.lds.org).
Alang sa dugang nga mga pagtulun-an kalabut sa kaluwasan sa gagmay nga mga bata, tan-awa ang komentaryo alang sa Doktrina ug mga Pakigsaad 29:46–50 niini nga manwal.
Doktrina ug mga Pakigsaad 75: Dugang nga Makasaysayanong Kaagi
Gi-orden si Propeta Joseph Smith kaniadtong Enero 25, 1832, didto sa Amherst, Ohio, isip ang Presidente sa High Priesthood, nagpasabut nga Presidente sa Simbahan (tan-awa sa D&P 75, ulohan sa seksyon).
Kaniadtong Enero 25, 1832, ang Simbahan mitawag og usa ka komperensya didto sa Amherst, Ohio, mga 80 ka kilometro silangan sa Kirtland. Ang kasaysayan ni Propeta Joseph Smith nagpahayag nga atol sa komperensya “ang mga Elder matinguhaon kanako nga mangutana sa Ginoo, nga sila unta makahibalo sa iyang kabubut-on, o makakat-on kon unsa ang labing makapahimuot kaniya, nga ilang buhaton, aron sa pagdala sa mga tawo og pagsabut sa ilang kahimtang” (sa Manuscript History of the Church, vol. A-1, pahina 180, josephsmithpapers.org). Si Orson Pratt, kinsa gitudlo nga presidente sa mga elder diha sa komperensya, wala madugay miasoy, “Niini nga Komperensya si Propeta Joseph Smith giila nga Presidente sa High Priesthood, ug mga kamot gipatong diha kaniya ni Elder Sidney Rigdon kinsa mi-seal diha sa iyang ulo sa mga panalangin nga kaniadto iyang nadawat.” Nakita usab ni Elder Pratt nga “pinaagi sa hangyo sa Priesthood, nangutana ang Propeta sa Ginoo, ug usa ka pagpadayag gihatag ug gisulat diha atubangan sa tibuok katiguman, nagtudlo og daghan sa mga Elder sa pagmisyon” (“History of Orson Pratt,” The Latter-day Saints’ Millennial Star, vol. 27 [Ene. 28, 1865], 56). Midiktar ang Propeta og duha ka mga pagpadayag diha sa komperensya, nga sa kaulahian gihiusa ug gi-rekord diha sa Doktrina ug mga Pakigsaad 75. Ang unang pagpadayag (D&P 75:1–22) gihatag ngadto sa usa ka grupo sa mga elder kinsa misumiter sa ilang mga pangalan alang sa misyonaryo nga serbisyo. Ang ikaduhang pagpadayag (D&P 75:23–36) gihatag ngadto sa grupo sa mga elder kinsa nagtinguha nga makahibalo sa kabubut-on sa Ginoo kabahin kanila.
Doktrina ug mga Pakigsaad 75
Ang Ginoo nagtawag ug nagtudlo og mga missionary companionship
Doktrina ug mga Pakigsaad 75:2–5. Ang mga ganti sa matinud-anong pagsangyaw sa ebanghelyo
Misaad ang Ginoo og mahinungdanong mga panalangin ngadto niadtong kinsa sa matinud-anong paagi nagsangyaw sa ebanghelyo, lakip ang dungog, himaya, ug kinabuhing dayon (tan-awa sa D&P 75:5). Si Presidente Spencer W. Kimball (1895–1985) mitudlo og dugang nga mga panalangin nga moabut kanato samtang kita sa matinud-anong paagi makigbahin sa ebanghelyo ngadto sa uban:
“Ang pagpakigbahin sa ebanghelyo nagdalag kalinaw ug kalipay nganhi sa atong kaugalingong mga kinabuhi, mopadako sa atong kaugalingong mga kasingkasing ug mga kalag alang sa uban, mopauswag sa atong kaugalingong hugot nga pagtuo, mopalig-on sa atong kaugalingong relasyon sa Ginoo, ug mopauswag sa atong kaugalingong salabutan sa mga kamatuoran sa ebanghelyo.
“Ang Ginoo nagsaad og dagkong mga panalangin alang kanato katugbang kon unsa kita ka maayo nga mipakigbahin sa ebanghelyo. Kita makadawat og panabang gikan sa pikas nga tabil samtang ang espiritwal nga mga milagro mahitabo. Ang Ginoo miingon kanato nga ang atong mga sala mapasaylo og dali kon kita makadala og mga kalag ngadto ni Kristo ug magpabilin nga makanunayon sa paghatag og pagpamatuod ngadto sa kalibutan” (Mga Pagtulun-an sa mga Presidente sa Simbahan: Spencer W. Kimball [2006], 322).
Ang matinud-anong mga Santos kinsa nagsangyaw sa ebanghelyo makabaton og kinabuhing dayon (tan-awa sa D&P 75:1–5).
Doktrina ug mga Pakigsaad 75:27. “Mahimo nga masayran gikan sa kahitas-an … bisan asa sila moadto”
Sa duha ka mga pagpadayag nga gi-rekord diha sa Doktrina ug mga Pakigsaad 75, gihatagan og gibug-aton sa Ginoo ang importansya sa pag-ampo diha sa misyonaryo nga buhat. Misaad ang Ginoo nga kon kadtong kinsa gitawag isip mga misyonaryo mangutana Kaniya pinaagi sa pag-ampo, “ang Maghuhupay [mo]tudlo kanila sa tanan nga mga butang nga angay alang kanila” (D&P 75:10) ug mogiya kanila “bisan asa sila moadto” sa pagsangyaw sa ebanghelyo (D&P 75:27). Si Elder Dallin H. Oaks sa Korum sa Napulog Duha ka mgaApostoles mipamatuod nga samtang kita nag-ampo alang sa panabang ug nagsunod sa mga pag-aghat sa Espiritu, ang Ginoo mogiya kanato sa pagpakigbahin sa ebanghelyo ngadto sa uban:
“Kita kinahanglan gayud nga mag-ampo alang sa panabang ug mga direksyon sa Ginoo aron kita mahimong mga instrumento diha sa Iyang mga kamot alang sa usa ka tawo kinsa andam na karon—usa ka tawo nga gusto Niya nga atong tabangan karon. Niana, kinahanglan gayud nga kita magmabinantayon sa pagpaminaw ug sa pagtagad sa mga pag-aghat sa Iyang Espiritu kon unsaon nato sa pagpadayon.
“Kadto nga mga pag-aghat moabut. Nahibalo kita gikan sa dili maihap nga personal nga mga pagpamatuod nga sa Iyang kaugalingon nga paagi ug sa Iyang kaugalingon nga panahon ang Ginoo nag-andam og mga tawo sa pagdawat sa Iyang ebanghelyo. Ang maong mga tawo nagsiksik, ug kon kita maningkamot sa pag-ila kanila ang Ginoo motubag sa ilang mga pag-ampo pinaagi sa pagtubag sa ato. Siya moaghat ug mogiya niadtong kinsa nagtinguha ug kinsa sa sinsero nga paagi naninguha og paggiya sa unsaon, hain, kanus-a, ug kang kinsa makigbahin sa Iyang ebanghelyo” (“Sharing the Gospel,” Ensign, Nob. 2001, 8).
Doktrina ug mga Pakigsaad 75:29. “Himoa nga magmakugihon diha sa tanan nga mga butang”
Ang sugo sa Ginoo nga “himoa nga magmakugihon sa tanan nga mga butang” (D&P 75:29) naglakip sa Iyang mga sugo ngadto niadtong gitawag og mga misyon sa pakigsabut alang sa suporta sa ilang mga pamilya samtang sila nagserbisyo. Kon ang maong pagpakigsabut dili mahimo, kadtong mga lalaki mapugos sa pagpabilin diha sa panimalay, pag-amuma alang sa ilang mga pamilya, ug pagtrabaho diha sa lokal nga Simbahan (tan-awa sa D&P 75:24–28). Ang magmakugihon sa tanang mga butang mao ang paghatag og makanunayon, mabinantayon, ug maabtik nga paninguha ilabi na sa pagserbisyo sa Ginoo ug sa pagsunod sa Iyang mga sugo. Ang mga kasulatan naglangkob og daghang mga panig-ingnan ug mga pahimangno kalabut sa kakugi. Si Elder Dieter F. Uchtdorf sa Korum sa Napulog Duha ka mga Apostoles mitudlo, “Ang makugihon nga pagbuhat sa mga butang nga labing mahinungdanon mogiya kanato ngadto sa Manluluwas sa kalibutan” (“Kabahin sa mga Butang nga Labing Mahinungdanon,” Liahona, Nob 2010, 21).