Kapitulo 2

Doktrina ug mga Pakigsaad 1

Pasiuna ug Timeline

Niadtong Nobyembre 1831, ang Ginoo mihatag og sobra sa 60 ka pagpadayag pinaagi ni Propeta Joseph Smith alang sa kaayohan sa Simbahan ug sa indibidwal nga mga miyembro. Aron mas daling maka-access ang mga miyembro sa Simbahan niini nga mga pagpadayag, ang mga lider sa Simbahan nakahukom nga imantala kini isip usa ka volume nga tawagon og Basahon sa mga Sugo. Niadtong Nobyembre 1, 1831, ang Propeta nagpahigayon og komperensya sa mga elder sa balay ni John ug Alice (Elsa) Johnson didto sa Hiram, Ohio, diin ang komitiba sa mga elder nga gilangkuban nila ni Sidney Rigdon, Oliver Cowdery, ug William E. McLellin misulay sa pagsulat og pasiuna sa Basahon sa mga Sugo apan wala magmalampuson (tan-awa sa The Joseph Smith Papers, Documents Volume 2, Hulyo 1831–Enero 1833, ed. Matthew C. Godfrey ug uban pa [2013], 104). Human niini nga pagsulay, si Joseph Smith nakadawat og pagpadayag nga narekord sa Doktrina ug mga Pakigsaad 1. Niini ang Ginoo mipahayag, “Kini nga [pagpadayag] mao … ang akong pasiuna ngadto sa basahon sa akong mga sugo” (D&P 1:6). Mipahayag usab Siya nga ang tanang katawhan maminaw sa Iyang “tingog sa pagpasidaan” (D&P 1:4) ug nga kadtong kinsa nagdumili sa pagpatalinghug sa Iyang tingog ug sa mga pulong sa Iyang mga sulugoon isalikway gikan sa katawhan sa Dios. Ang Ginoo mipamatuod nga ang mga pagpadayag nga gihatag ngadto ni Propeta Joseph Smith tinuod ug misugo sa Iyang katawhan sa pagsiksik niini.

Septyembre 1831Sila si Joseph ug Emma Smith mibalhin gikan sa Kirtland ngadto sa Hiram, Ohio.

Nobyembre 1831Usa ka komperensya sa mga elder mibotar sa pagmantala og 10,000 ka kopya sa Basahon sa mga Sugo.

Nobyembre 1, 1831Ang Doktrina ug mga Pakigsaad 1 nadawat.

Nobyembre 20, 1831Sila si Oliver Cowdery ug John Whitmer mibiya padulong sa Missouri dala ang manuskrito sa Basahon sa mga Sugo aron ipaimprinta.

Doktrina ug mga Pakigsaad 1: Dugang Makasaysayanong Background

Niadtong Nobyembre 1, 1831, si Propeta Joseph Smith nagpahigayon og espesyal nga komperensya sa 10 ka elder didto sa Hiram, Ohio, aron hisgutan ang koleksyon ug publikasyon sa mga pagpadayag nga iya nang nadawat. Ang gisugyot nga publikasyon makahatag sa mga miyembro sa Simbahan og access sa mga pagpadayag sa Ginoo ug mobarug isip pagpamatuod ngadto sa tibuok kalibutan nga ang Dios sa makausa pa misugod sa pagpadayag sa Iyang hunahuna ug kabubut-on ngadto sa Iyang mga anak dinhi sa yuta.

Atol sa komperensya ang mga nanambong nakahukom nga moimprinta og 10,000 ka kopya sa nakolekta nga mga pagpadayag (kini nga gidaghanon gipaubsan ngadto sa 3,000 ka kopya) sa usa ka volume nga pagaulohan nga Basahon sa mga Sugo. Usa ka komitiba sa mga elder gihangyo sa pagsulat og pasiuna alang sa publikasyon. Sa dihang ang komitiba mipresentar sa bersyon sa pasiuna, ang nagpundok nga grupo misalikway sa pagsulay ug mihangyo sa Propeta sa pagpangamuyo sa Ginoo alang sa direksyon. “Human si [Joseph Smith] ug ang mga elder mag-ampo, si [Joseph], nga ‘naglingkod sa may bintana,’ midiktar sa pasiuna ‘pinaagi sa Espiritu,’ samtang si [Sidney] Rigdon mao ang nahimong tigsulat. ‘Mosulti si Joseph og pipila ka sentence ug si Sidney mosulat niini,’ [nahinumdom si William E. McLellin], ‘dayon mobasa niini og kusog, ug kon sakto, si Joseph mopadayon ug mohatag pa og dugang’” (sa The Joseph Smith Papers, Documents, Volume 2, Hulyo 1831–Enero 1833, 104). Kini nga pagpadayag gimantala isip pasiuna sa 1833 Basahon sa mga Sugo ug karon seksyon 1 sa atong Doktrina ug mga Pakigsaad.

Imahe

Map 5: The New York, Pennsylvania, and Ohio Area of the United States

Doktrina ug mga Pakigsaad 1:1–23

Ang tingog sa Ginoo sa pagpasidaan alang sa tanang katawhan

Doktrina ug mga Pakigsaad 1:1. “Patalinghug, O kamo nga mga katawhan sa akong simbahan”

Gisugdan sa Ginoo ang Iyang pagpadayag sa Doktrina ug mga Pakigsaad 1 pinaagi sa pagsugo sa Iyang katawhan sa pagpatalinghug. Ang pulong nga patalinghug makita sa 69 ka higayon sa tibuok Doktrina ug mga Pakigsaad. Si Presidente Russell M. Nelson sa Korum sa Napulog Duha ka mga Apostoles mipasabut nga “ang Hebreohanon nga pinulongan sa Daang Tugon sa kasagaran migamit sa sama nga termino alang sa patalinghug (ngadto sa Ginoo) ug pagkamasulundon (ngadto sa Iyang pulong)” (“Listen to Learn,” Ensign, Mayo 1991, 24). Pinaagi lamang sa pagpatalinghug, o pagsunod, sa Ginoo nga makalikay kita sa mga paghukom nga moabut sa kalibutan.

Doktrina ug mga Pakigsaad 1:2. “Ang tingog sa Ginoo alang ngadto sa tanan nga mga tawo”

Mitudlo ang Ginoo nga ang Iyang mga pulong ug pasidaan dili lamang alang sa katawhan sa Iyang Simbahan apan alang sa tanang katawhan. Si Presidente Joseph Fielding Smith (1876–1972) mipasabut kon sa unsa nga paagi nga ang tingog sa Ginoo sa pagpasidaan ipataas ngadto sa tanang katawhan:

“Wala ako makasabut … nga gikinahanglan nga ang matag kasingkasing mobati ug ang matag dunggan makadungog niini nga kinabuhi. Apan kon wala sila makadungog, kon kini nga oportunidad wala moabut kanila pinaagi sa pagsangyaw sa mga Elder ug pinaagi sa mga butang nga gimantala sa pulong sa Ginoo nga napadala pinaagi sa pagpadayag, ang oportunidad moabut ngadto kanila ug sila kinahanglang makadungog niini didto sa kalibutan sa espiritu.

“Ug mao nga ang Ginoo sa iyang kamabination ug kalooy gusto nga mopadala niini nga kamatuoran niining gipahiuli nga Ebanghelyo ngadto sa matag kalag nga buhi o patay. Niini nga paagiha ang matag kasingkasing mobati ug ang matag dunggan makadungog” (sa Conference Report, Okt. 1931, 16).

Doktrina ug mga Pakigsaad 1:8–9. I-seal ang “dili motuo ug masukulon”

Kadtong modawat sa ebanghelyo ni Jesukristo , makadawat sa makaluwas nga mga ordinansa, ug magpabilin nga masulundon ngadto sa mga sugo makaangkon og kinabuhing dayon (tan-awa sa D&P 14:7; 20:25, 29). Ang dautan nga nagdumili sa pagtuo o kinsa mipili sa pagsukol batok sa kahayag sa ebanghelyo nga ilang nadawat mag-antus sa silot sa ilang pagkamasinupakon (tan-awa sa D&P 133:71–72).

Doktrina ug mga Pakigsaad 1:14. “Maminaw sa mga pulong sa mga propeta ug mga apostoles”

Ang Ginoo mipasidaan nga kadtong dili maminaw sa Iyang tingog ug sa mga pulong sa Iyang mga propeta ug mga apostoles “isalikway gikan sa katawhan sa Dios. Ang “pagkasalikway” mao ang pagkabulag gikan sa gahum, impluwensya, ug mga panalangin sa Dios ug sa katapusan gikan sa Iyang presensya. Si Presidente Henry B. Eyring sa Unang Kapangulohan mipamatuod sa panalangin sa pagpaminaw sa tambag sa mga propeta: “Sa matag higayon sa akong kinabuhi nga ako mipili sa paglangay sa pagsunod sa dinasig nga tambag o mihukom nga ako walay labut, akong nahibaloan nga akong gibutang ang akong kaugalingon sa kadaot. Sa matag higayon nga ako namati ngadto sa tambag sa mga propeta, gibati ang paghimatuod niini diha sa pag-ampo, ug dayon gisunod kini, akong namatngunan nga ako nagpaingon ngadto sa kahilwasan” (Finding Safety in Counsel,” Ensign, Mayo 1997, 25).

Si Elder M. Russell Ballard sa Korum sa Napulog Duha ka mga Apostoles mitudlo sa mga panalangin nga moabut kanato kon kita mosunod dayon sa mapanagnaong tambag: “Dili gamay nga butang, akong mga kaigsoonan, nga dunay propeta sa Dios sa atong taliwala. Katalagsaon ug katingalahan sa mga panalangin nga moabut sa atong mga kinabuhi samtang maminaw kita sa mga pulong sa Ginoo nga gihatag ngari kanato pinaagi kaniya. … Kon makadungog kita og tambag sa Ginoo nga gipahayag pinaagi sa mga pulong sa Presidente sa Simbahan, kinahanglan nga positibo ang atong pagsanong ug diha dayon. Ang kasaysayan nagpakita nga anaa ang kasiguroan, kalinaw, kalamboan, ug kalipay sa pagsanong sa propetikanhong tambag sama sa gihimo ni Nephi sa karaan, ‘Ako moadto ug mobuhat sa mga butang nga ang Ginoo nagsugo’ (1 Ne. 3:7)” (“His Word Ye Shall Receive,” Ensign, Mayo 2001, 65).

Si Sister Carol F. McConkie, magtatambag sa Kinatibuk-ang Kapangulohan sa Young Women, mitudlo sa kaimportante sa pagpaminaw sa mapanagnaong mga pagtulun-an bisan og dili kini sayon o dili popular:

“Ang Atong Amahan sa Langit nahigugma sa tanan Niyang anak ug nagtinguha nga sila masayud ug makasabut sa Iyang plano sa kalipay. Busa, mitawag Siya og mga propeta, kinsa gi-orden uban sa gahum ug awtoridad sa paglihok sa ngalan sa Dios alang sa kaluwasan sa Iyang mga anak. …

“Mosunod kita sa mapanagnaong pulong bisan kon kini ingon og dili resonable, hasol ug lisud. Sumala sa mga sumbanan sa kalibutan, ang pagsunod sa propeta mahimong dili popular, sayop ug dili madawat sa politikanhon ug sosyal nga paagi. Apan ang pagsunod sa propeta kanunayng husto. …

“Kon kita mosunod sa mga pulong sa mga propeta, atong gitukod ang atong mga panimalay ug kinabuhi diha sa siguradong tukuranan, ‘sa lig- on nga sukaranan sa atong Manunubos kinsa mao si Kristo, ang Anak sa Dios’ [Helaman 5:12]” (“Pagpuyo sumala sa mga Pulong sa mga Propeta,” Liahona, Nob. 2014, 77–79).

Ang Sagrado nga Kakahoyan, duol sa Palmyra, New York, diin nakita sa batan-ong si Joseph Smith ang Dios nga Amahan ug si Jesukristo sa tingpamulak niadtong 1820 (litrato mga 1926)

Doktrina ug mga Pakigsaad 1:16. “Ang matag tawo naglakaw diha sa iyang kaugalingon nga paagi, ug sama sa hulagway sa iyang kaugalingon nga dios”

Sumala sa narekord niining dinasig nga pasiuna sa mga pagpadayag nga anaa sa Doktrina ug mga Pakigsaad, gihulagway sa Ginoo ang pipila ka mga kahimtang sa pagkadili matarung ug pagka-apostate nga anaa sa kalibutan tungod kay “ang matag tawo naglakaw diha sa iyang kaugalingon nga paagi, ug sama sa hulagway sa iyang kaugalingon nga dios” (D&P 1:16). Si Elder D. Todd Christofferson sa Korum sa Napulog Duha ka mga Apostoles mihulagway sa unsa nga paagi ang mga tawo mobuhat niana karon:

“Ang mga katilingban diin daghan kanato ang nagpuyo adunay sobra pa sa usa ka henerasyon nga nagpakyas sa pag-ugmad og matarung nga disiplina. Kini nagtudlo nga ang kamatuoran nag-agad-agad ug ang matag usa naghukom alang sa iyang kaugalingon kon unsay husto. Ang mga konsepto sama sa sala ug sayop gihukman isip ‘mga paghukom sa hiyas.’ Sama sa paghulagway niini sa Ginoo, ‘Ang matag tawo naglakaw diha sa iyang kaugalingon nga paagi, ug sama sa hulagway sa iyang kaugalingon nga dios’ (D&P 1:16).

“Isip sangputanan, ang pagdisiplina sa kaugalingon nagkaminus ug ang mga katilingban gipasagdan sa pagsulay nga mapadayon ang kahusay ug pagtahud pinaagi sa pagpugos” (“Matarung nga Disiplina,” Liahona, Nob. 2009, 106).

Doktrina ug mga Pakigsaad 1:16. “Ang gamhanan nga Babelonia”

Ang Ginoo nag-refer sa dautan nga kalibutan nga ang “gamhanan nga Babelonia” (D&P 1:16). Tungod sa pagkakalibutanon ug pagkadautan sa karaang Babelonia, ug tungod kay kini mao ang dapit nga gidad-an sa mga anak ni Israel ug gihimong ulipon, ang Babelonia sa kasagaran gihimo nga simbolo diha sa mga kasulatan nga nagrepresentar sa sala ug kadautan sa kalibutan ug sa espirituhanong pagkabihag nga ikapahamtang niini diha sa mga anak sa Dios (tan-awa sa D&P 133:14).

Si Elder David R. Stone sa Seventy mihulagway sa Babelonia ug sa iyang malukpanong impluwensya karon:

“Walay partikular nga siyudad karon nga naglarawan sa Babelonia. Ang Babelonia, niadto pa sa panahon sa karaang Israel, usa ka siyudad nga nahimong mahilayon, nagkakunhod, ug dautan. Ang pinakamahinungdanong bilding diha sa siyudad mao ang templo sa dios-dios, nga sa kasagaran gitawag nato og Bel o Baal. …

“Hinoon, kana nga pagkamahilayon, pagkadautan ug pagkakunhod ug ang pagsimba sa mga dios-dios ang makita sa daghang mga siyudad, dagko ug gagmay, nga nagkatap sa tibuok kalibutan. …

“Daghan kaayo nga mga tawo sa kalibutan nahimo nga sama sa Babelonia sa karaan tungod sa ilang kaugalingong mga pamaagi ug nagsunod sa usa ka dios ‘kansang hulagway sama sa kalibutan’ [D&P 1:16]” (“Zion Taliwala sa Babelonia,” Liahona, Mayo 2006, 90–91).

Doktrina ug mga Pakigsaad 1:17. Pag-andam sa kalibutan alang “sa kalamidad nga moabut”

Uban sa balaang panglantaw, gitawag sa Dios si Propeta Joseph Smith aron matabangan nga makaandam ang kalibutan alang “sa kalamidad nga moabut diha sa mga lumulupyo sa yuta” (D&P 1:17). Si Elder Robert D. Hales sa Korum sa Napulog Duha ka mga Apostoles mitudlo nga pinaagi sa pagpaminaw sa mga pulong sa mga propeta makalikay kita sa kalamidad sa katapusang mga adlaw: “Kon maminaw kita sa mga propeta niining panahona, ang kakabus mapulihan og mahigugmaong pag-amuma alang sa kabus ug timawa. Daghang seryoso ug makamatay nga mga problema sa panglawas malikayan pinaagi sa pagsunod sa Pulong sa Kaalam ug sa mga balaod sa sekswal nga kaputli. Ang pagbayad sa ikapulo makapanalangin kanato ug kita adunay igo alang sa atong panginahanglan. Kon sundon nato ang tambag nga gihatag sa mga propeta, maangkon nato ang kinabuhi sa mortalidad diin dili kita mag-antus sa wala kinahanglanang kasakit ug pagkalaglag sa kaugalingon. Wala kini magpasabut nga wala kitay mga kalisdanan. Aduna. Wala kini magpasabut nga dili kita sulayan. Sulayan kita, kay kabahin man kini sa atong katuyoan dinhi sa kalibutan. Apan kon maminaw kita sa tambag sa atong propeta, mas magkalig-on kita ug makabarug sa mga pagsulay sa mortalidad. Aduna kitay paglaum ug kalipay” (“Hear the Prophet’s Voice and Obey,” Ensign, May 1995, 17).

*Nakakita Ako og Kahayag,* ni Jon McNaughton. Deskripsyon sa Unang Panan-awon, sa dihang ang Dios nga Amahan ug si Jesukristo nagpakita ngadto sa batan-ong Joseph Smith samtang nag-ampo siya

Doktrina ug mga Pakigsaad 1:24–33

Ang Ginoo mihatag ni Joseph Smith og gahum sa paghubad sa Basahon ni Mormon ug sa pagtukod sa Iyang tinuod nga Simbahan

Doktrina ug mga Pakigsaad 1:24. “Gihatag ngadto sa akong mga sulugoon diha sa ilang kahuyang”

Miingon ang Ginoo nga gihatag Niya ang mga sugo ug pagpadayag ngadto sa Iyang mga sulugoon “diha sa ilang kahuyang, subay sa paagi sa ilang pinulongan” (D&P 1:24). Sa pagpasabut sa matang sa pagpadayag nga gisulti sa balaan nga mga binuhat ngadto sa mga lalaki ug mga babaye, si Presidente Brigham Young (1801–1877) mitudlo: “Ang mga pagpadayag sa Dios adunay sakto nga doktrina ug baruganan bisan og dili hingpit; apan imposible alang sa alaot, huyang, ubos, nagsukarap, makasasala nga mga lumulupyo sa yuta sa pagdawat og pagpadayag gikan sa Makagagahum sa iyang tanang kahingpitan. Kinahanglang makigsulti Siya kanato sa paagi nga kita makasabut” (“Discourse,” Deseret News, Ago. 1, 1855, 162).

Si Elder Marlin K. Jensen sa Seventy mipasabut nga si Propeta Joseph Smith “miisip nga ang manuskrito sa mga pagpadayag mao ang iyang pinakamaayo nga paningkamot sa pagrekord sa tingog sa Ginoo nga nakig-angay aron sa pagpakig-istorya sa unsay gitawag ni Joseph nga ‘baliko, putol-putol, nagkatibulaag, ug dili perpekto nga pinulongan’ sa katawhan” (“Ang mga Sinulat ni Joseph Smith: Ang Manuskrito sa mga Basahon sa Pagpadayag,” Liahona, Hulyo 2009, 9).

Ang ubang unang mga miyembro sa Simbahan misaway sa pinulongan sa mga pagpadayag, wala makasabut nga ang katinuod sa mga pagtulun-an nga anaa niini wala magpasabut sa spelling, punctuation, o sa grammar. Samtang giandam nga imantala ang mga pagpadayag, si Joseph Smith, ug ang uban ubos sa iyang direksyon, mihimo og mga kausaban ug mga koreksyon sa pipila ka mga teksto sa paningkamot sa pagpatin-aw sa pinulongan ug tumong sa mga pagpadayag.

Sayo niadtong Nobyembre 1831, usa ka komperensya sa Simbahan miresolbar nga si “Joseph Smith Jr mokorihir niadtong mga sipyat o sa mga sayop nga iyang makit-an pinaagi sa balaang Espiritu samtang magribyu sa mga pagpadayag [ug] mga sugo [ug] usab sa kahingpitan sa mga kasulatan” (sa The Joseph Smith Papers, Documents, Volume 2: July 1831–January 1833, 123).

Hinoon, si Propeta Joseph Smith, nakasabut nga ang mga pagpadayag sa Ginoo mahimong usbon o palapdan samtang magpadayon ang Ginoo sa pagpadayag sa Iyang kamatuoran (tan-awa sa Gerrit Dirkmaat, “Great and Marvelous Are the Revelations of God,” Ensign, Ene. 2013, 47).

Doktrina ug mga Pakigsaad 1:29. Gihimo sa Ginoo nga posible ang paghubad sa Basahon ni Mormon

Nadawat ni Joseph Smith gikan ni anghel Moroni ang karaang rekord nga gihisgutan sa Doktrina ug mga Pakigsaad 1:29 nga “ang talaan sa mga Nephite.” Sa panahon nga migawas ang Basahon ni Mormon, ang batan-ong Propeta wala makahibalo og bisan unsa nga pinulongan gawas sa Iningles. Busa, ang iyang abilidad sa paghubad sa Basahon ni Mormon miabut isip usa ka maloloy-ong gasa nga gihatag pinaagi sa gahum sa Dios (tan-awa usab sa D&P 5:4; 135:3).

Ang Bungtod sa Cumorah (background), duol sa Palmyra, New York, diin nakuha ni Joseph Smith ang karaang mga palid sa Basahon ni Mormon (litrato mga 1907)

Doktrina ug mga Pakigsaad 1:30. Ang Simbahan mogawas “gikan sa kangiub”

Ang Ginoo mihatag og gahum sa Iyang mga sulugoon sa pagtukod sa Iyang Simbahan ug sa “pagdala niini gikan sa kangiub” (D&P 1:30). Si Elder Neal A. Maxwell (1926–2004) sa Korum sa Napulog Duha ka mga Apostoles mitudlo unsa ang gipasabut niini nga ekspresyon:

“Ang miaging kangiub sa Simbahan gipulihan sa kahayag. Ang kangiub nagpasabut niana nga sa ‘kinatibuk-ang wala mailhi’ ug ‘gikuha gikan sa mga sentro sa kalihokan’: mao nga, ang kangiub sa kasagaran wala masabti.

“Ang Ginoo mihulagway unsaon Niya pagdala ang Iyang buhat sa ulahing adlaw ‘gikan sa kangiub ug gikan sa kangitngit.’ (D&P 1:30; tan-awa usab sa 1 Ne. 22:12; 2 Ne. 1:23; 27:29.) Sa ingon, sumala sa nakita, si Kristo ug ang Iyang buhat nahimong kahayag nga dili na ikatago. (Tan-awa sa D&P 14:9.)” (“Out of Obscurity,” Ensign, Nob. 1984, 8).

Doktrina ug mga Pakigsaad 1:30. “Mao lamang ang tinuod ug buhi nga simbahan diha sa ibabaw sa tibuok yuta”

Ang Ginoo yanong mipamatuod nga Ang Simbahan ni Jesukristo sa mga Santos sa Ulahing mga Adlaw mao lamang “ang tinuod ug buhi nga simbahan diha sa ibabaw sa tibuok yuta,”(D&P 1:30). Si Presidente Henry B. Eyring sa Unang Kapangulohan mipasabut sa usa ka rason ngano nga kini mao ang bugtong tinuod nga Simbahan:

“Samtang atong gi-sustain [ang mga propeta ug ubang mga general authority], atong nakita ug nabati ang ebidensya nga Ang Simbahan ni Jesukristo sa mga Santos sa Ulahing mga Adlaw tinuod ug buhi. …

“Kini ang tinuod nga Simbahan, ang bugtong tinuod nga Simbahan, tungod kay anaa niini ang mga yawe sa priesthood. Niini lamang nga Simbahan nga gihatag sa Ginoo ang gahum sa pagbugkos didto sa langit sama sa Iyang gibuhat sa panahon ni Apostol Pedro. Kadtong mga yawe gipahiuli ngadto ni Joseph Smith, kinsa gitugutan sa pagtugyan niini ngadto sa mga sakop sa Korum sa Napulog Duha” (“Ang Tinuod ug Buhi nga Simbahan,” Liahona, Mayo 2008, 20).

Si Elder David A. Bednar sa Korum sa Napulog Duha ka mga Apostoles mipasabut og dugang kon sa unsa nga paagi nga Ang Simbahan ni Jesukristo sa mga Santos sa Ulahing mga Adlaw tinuod ug buhi: “Ang Ginoo mipahayag nga Ang Simbahan ni Jesukristo sa mga Santos sa Ulahing mga Adlaw mao lamang ‘ang matuod ug buhi nga simbahan diha sa ibabaw sa tibuok yuta’ (D&P 1:30). Kini nga gipahiuli nga Simbahan tinuod tungod kay Simbahan man kini sa Manluluwas; Siya ang ‘dalan, ang kamatuoran, ug ang kinabuhi’ (Juan 14:6). Ug buhi kini nga simbahan tungod sa mga buhat ug mga gasa sa Espiritu Santo. Kadako sa atong panalangin nga makapuyo sa panahon nga anaa sa yuta ang priesthood ug makadawat kita sa Espiritu Santo” (“Dawata ang Espiritu Santo,” Liahona, Nob. 2010, 97).

Tungod kay ang Simbahan usa ka buhi nga Simbahan, gigiyahan ug gidumala sa Ginoo pinaagi sa Espiritu Santo, nagpadayon kini sa pagtubo ug pagpahiangay sa nagkausab nga mga sirkumstansya ug mga kondisyon sa kalibutan pinaagi sa nagpadayon nga pagpadayag gikan sa Dios ngadto sa Iyang mga propeta. Ang pagpamatuod sa Ginoo nga namahayag nga Ang Simbahan ni Jesukristo sa mga Santos sa Ulahing mga Adlaw nga mao lamang ang tinuod ug buhi nga simbahan wala magpasabut nga ang ubang mga simbahan wala maghupot og pipila ka kamatuoran. Si Presidente Boyd K. Packer (1924–2015)sa Korum sa Napulog Duha ka mga Apostoles mipasabut:

“Dili kini sa pag-ingon nga ang mga simbahan, silang tanan, walay pipila ka kamatuoran. Sila dunay pipila ka kamatuoran—pipila kanila adunay daghan kaayo niini. Sila may hulagway sa pagkadiosnon. Sa kasagaran ang kaparian ug ang mga miyembro mahalaron, ug daghan kanila talagsaong nagsunod sa mga hiyas nga Kristiyanismo. Bisan pa niana, sila dili kompleto. Pinaagi sa iyang pamahayag, ‘… sila nagtudlo og mga doktrina nga mga sugo sa mga tawo, nga may hulagway sa pagkadiosnon, apan sila nanghimakak sa gahum niana.’ [Joseph Smith—Kasaysayan 1:19.] …

“Karon wala kita mag-ingon [nga ang ubang mga simbahan] sayop sama sa atong pag-ingon nga sila dili kompleto. Ang kahingpitan sa ebanghelyo gipahiuli. Ang gahum ug awtoridad sa pagbuhat alang Kaniya ania kanato. Ang gahum ug awtoridad sa priesthood ania niini nga simbahan” (“The Only True and Living Church,” Ensign, Dis. 1971, 40–41).

Doktrina ug mga Pakigsaad 1:31–33. “Siya nga maghinulsol ug magbuhat sa mga sugo sa Ginoo”

Sa Doktrina ug mga Pakigsaad 1:31–33, ang Ginoo klaro nga mipahayag unsay Iyang tan-aw sa sala. Pinaagi sa kalooy, Iyang gidugang ang Iyang pamahayag sa saad sa pagpasaylo alang niadtong maghinulsol ug mosunod sa Iyang mga sugo. Si Elder Richard G. Scott (1928–2015) sa Korum sa Napulog Duha ka mga Apostoles mipasabut kon sa unsa nga paagi nga ang pagkamasulundon sa mga sugo makatabang sa kapasayloan sa mga sala: “Kana nga kasulatan [D&P 1:31–32] naghatag og gibug-aton nga ang Ginoo dili motugot sa sala apan Siya mopasaylo sa naghinulsol nga makasasala tungod sa Iyang hingpit nga gugma. Nagtudlo usab kini nga dili lamang mahinungdanon ang pagtuman sa sugo nga inyong gisupak, apan pinaagi sa pagsunod sa tanan nga mga sugo kamo makaangkon og dugang kalig-on ug suporta panahon sa paghinulsol” (“Aron Luwas sa Mabug-at nga mga Palas-anon,” Liahona, Nob. 2002, 87).

Doktrina ug mga Pakigsaad 1:34–39

Ang mga pulong ug mga pagpadayag sa Ginoo nga anaa sa Doktrina ug mga Pakigsaad mga tinuod ug “ang tanan matuman”

Doktrina ug mga Pakigsaad 1:37. “Siksika kini nga mga sugo, kay sila mga tinuod”

Ang Ginoo nagsaksi sa katinuod sa mga pagpadayag nga anaa sa Doktrina ug mga Pakigsaad ug nag-awhag sa Iyang mga Santos sa “pagsiksik niini nga mga sugo” (D&C 1:37). Si Presidente Brigham Young mipamatuod: “Ang basahon nga Doktrina ug mga Pakigsaad gihatag alang sa mga Santos sa Ulahing mga Adlaw sa piho nga paagi alang sa ilang inadlaw-adlaw nga pagpakabuhi ug mga kalihokan” (Mga Pagtulun-an sa mga Presidente sa Simbahan: Brigham Young [1997], 141).

Usa ka kopya sa 1833 nga Basahon sa mga Sugo nga gipanag-iya ni Presidente Wilford Woodruff

Doktrina ug mga Pakigsaad 1:38. “Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra”

Ipadayag sa Ginoo ang Iyang mga pulong ug mga pasidaan pinaagi sa Iyang pinili ug gitawag nga mga sulugoon. Kon mamulong ang mga propeta isip gitugutan nga mga sulugoon sa Ginoo, ingon og ang Ginoo Mismo ang namulong. Si Elder M. Russell Ballard mitudlo: “Akong nadiskubrihan sa akong pagpangalagad nga kadtong nahisalaag [ug] anaa sa kalibug mao kadtong sa kasagaran … nakalimot nga kon ang Unang Kapangulohan ug ang Korum sa Napulog Duha mamulong uban sa hiniusa nga tingog, mao kini ang tingog sa Ginoo nianang higayona. Gipahinumduman kita sa Ginoo, “‘Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra’ [D&P 1:38].”(“Pabilin sa Sakayan ug Manggunit!” Liahona, Nob. 2014, 90).

Si Elder D. Todd Christofferson mipasabut sa unsa nga paagi nga ang tingog sa Ginoo nahibaloan sa Iyang mga propeta ug mga apostoles:

Ang Presidente sa Simbahan mopahibalo o mopasabut sa mga doktrina base sa gipadayag kaniya (tan-awa, pananglit, sa D&P 138). Ang doktrinal nga pagpasabut moabut usab pinaagi sa hiniusa nga council sa Unang Kapangulohan ug sa Korum sa Napulog Duha ka mga Apostoles (tan-awa, pananglit ang, Opisyal nga Pahayag 2). Ang panagsabut sa council sagad maglakip sa pagtimbang-timbang sa gibalaan nga mga kasulatan, sa mga pagtulun-an sa mga lider, ug sa nangagi nga gipanghimo sa Simbahan. Apan sa katapusan … ang tuyo dili lang ang panag-uyon tali sa konseho apan ang pagpadayag gikan sa Dios. Proseso kini nga naglakip sa katarungan ug hugot nga pagtuo aron maangkon ang hunahuna ug kabubut-on sa Ginoo.

“Sa samang higayon kinahanglang hinumduman nga dili tanang pahayag nga gihimo sa usa ka lider sa Simbahan, kaniadto o karon, maglangkob gayud og doktrina. Nasabtan na sa Simbahan nga ang pahayag nga himoon sa usa ka lider sa usa ka okasyon sagad magrepresentar sa personal, bisan maayo ang tuyo, opinyon, wala magpasabut nga opisyal kini nga para gayud sa tibuok Simbahan. Si Propeta Joseph Smith mitudlo nga ang ‘propeta [usa] ka propeta kon siya naglihok sa sama niini’ [Joseph Smith, sa History of the Church, 5:265]” (“Ang Doktrina ni Kristo,” Liahona, Mayo 2012, 88–89).