Institute
Kapitulo 17: Doktrina ug mga Pakigsaad 43–45

Kapitulo 17

Doktrina ug mga Pakigsaad 43–45

Pasiuna ug Timeline

Sa dihang miabut si Joseph Smith sa Kirtland, Ohio, niadtong Pebrero 1831, iyang nahibaloan nga ang pipila sa mga nakabig nadala ngadto sa sayop pinaagi sa naghingapin nga relihiyosong kadasig ug dili tinuod nga mga pagpadayag. Miangkon ang uban nga nakadawat og mga pagpadayag, lakip sa usa ka babaye nga nailhang si Gng. Hubble kinsa mitawag sa iyang kaugalingon nga propetang babaye. Tungod kay iyang gilingla ang pipila sa mga Santos, si Propeta Joseph Smith nag-ampo mahitungod niini nga hitabo ug nakadawat og pagpadayag nga girekord diha sa Doktrina ug mga Pakigsaad 43. Niini nga pagpadayag mihatag ang Ginoo og mga kamatuoran nga mipahinumdom sa mga Santos sa sundanan sa Dios alang sa paghatag og pagpadayag ngadto sa Simbahan.

Mitawag kaniadto ang Ginoo og mga elder sa Simbahan aron sa pagsangyaw sa ebanghelyo (tan-awa sa D&P 42:4–8). Wala madugay human nahatag kana nga sugo, mihatag ang Ginoo og pagpadayag, nga karon girekord diha sa Doktrina ug mga Pakigsaad 44, nagtudlo sa mga elder sa pag-andam alang sa usa ka komperensya. Misaad ang Ginoo kanila nga kon gamiton nila ang hugot nga pagtuo diha Kaniya, makadawat sila sa Iyang Espiritu diha kanila ug makabuntog sa ilang mga kaaway.

Samtang nagtubo ang Simbahan diha sa Kirtland, ang pagdumot ngadto sa Simbahan nagkadako. Ang mga kritiko miatake sa Simbahan diha sa mga pamantalaan ug mihimo og ubang mga paningkamut sa pagbatok sa mga Santos. Niadtong Marso 1831, atol niining panahon sa oposisyon, nadawat ni Propeta Joseph Smith ang pagpadayag nga girekord diha sa Doktrina ug mga Pakigsaad 45. Niini nga pagpadayag gihulagway sa Ginoo ang ulahing mga adlaw, ang Ikaduhang Pag-anhi ni Jesukristo, ug ang Bag-ong Jerusalem, o Zion.

Nobyembre 1830–Pebrero 1831Human mibiya ang mga misyonaryo, ang pipila sa bag-ong mga kinabig sa Kirtland, Ohio, miangkon nga nakadawat og mga sulat o mga panulat gikan sa langit.

Sayo sa 1831Bakak nga mga taho mahitungod sa mga Santos ug sa ilang mga tinuohan migawas diha sa mga pamantalaan sa Ohio, sama sa Painesville Telegraph.

Pebrero 1831Si “Gng. Hubble,” usa ka bag-ong kinabig diha sa Ohio, miangkon nga usa ka babaye nga propeta sa Ginoo.

Pebrero 1831Ang Doktrina ug mga Pakigsaad 43 nadawat.

Pebrero 1831Ang Doktrina ug mga Pakigsaad 44 nadawat.

Marso 7, 1831Ang Doktrina ug mga Pakigsaad 45 nadawat.

Sayo sa Hunyo 1831Usa ka komperensya sa Simbahan ang gipahigayon didto sa Kirtland, Ohio.

Doktrina ug mga Pakigsaad 43: Dugang nga Makasaysayanong Background

Sa dihang miabut si John Whitmer sa Kirtland, Ohio, niadtong Enero 1831, iyang nahibaloan nga pipila sa bag-ong mga kinabig nalingla sa pipila kinsa miangkon nga nakadawat og kahibulongan ug mahinuklugon nga mga komunikasyon gikan sa langit. Kining dili tinuod nga mga pagpadayag kintahay mipakita isip “mga sinulat diha sa gawas nga hapin sa Biblia, ug diha sa panit sa karnero nga sulatanan [parchment], nga milupad sa hangin, ug diha sa luyo sa ilang mga kamot, ug daghang binuang ug walay bili nga mga butang” (sa The Joseph Smith Papers, Documents, Volume 1: Hulyo 1828–Hunyo 1831, ed. Michael Hubbard MacKay ug uban pa [2013], 256).

Ang mga kabalaka nagtubo sa dihang usa ka babaye nga ginganlan og Gng. Hubble “mianha uban sa grabing pagpakaaron-ingnon sa pagpadayag og mga sugo, mga balaod, ug ubang kahibulongang mga butang” (Joseph Smith, sa Manuscript History of the Church, vol. A-1, page 101, josephsmithpapers.org). Si John Whitmer, ang tigsaysay sa Simbahan niana nga panahon, mipasabut nga ang impluwensya niini nga babaye midala sa pipila ka mga miyembro sa Simbahan nga mahisalaag: “Niining mga panahona dihay usa ka babaye nga ginganlan og Hubble kinsa nagpatuo nga usa ka propetang babaye sa Ginoo, ug nagpatuo nga adunay daghang mga pagpadayag, ug nahibalo nga ang Basahon ni Mormon tinuod; ug [siya mituo] nga kinahanglan nga siya mahimong usa ka magtutudlo diha sa Simbahan ni Kristo. Siya mipakita [kunohay] nga diosnon kaayo ug milingla og pipila kinsa wala makamatikod kaniya sa iyang pagpakaaron-ingnon” (sa The Joseph Smith Papers, Histories, Volume 2: Assigned Histories, 1831–1847, ed. Karen Lynn Davidson ug uban pa [2012], 29; spelling, capitalization, and punctuation standardized; tan-awa usab sa The Joseph Smith Papers, Documents, Volume 1: Hulyo 1828–Hunyo 1831, 257, note 95).

Ang mga lihok niini nga babaye nahimong usa ka hagit sa doktrina nga ang Ginoo mipadayag pipila ka buwan og una ngadto sa Simbahan sa Fayette, New York: Si Propeta Joseph Smith mao lamang ang tawo kinsa “makadawat og mga sugo ug mga pagpadayag”alang sa Simbahan (D&P 28:2). Hinoon, pipila ka mga Santos gikan sa New York kinsa gipahibalo kalabut niining pagpadayag kaniadto nagsingabut pa sa Kirtland, ug walay mga pagpadayag kaniadto ang namantala. Ang mga Santos sa Kirtland bag-ong mga kinabig, ug kadaghanan kanila wala mahibalo sa gitudlo nga balaang paagi sa pagpadayag sa Iyang kabubut-on ngadto sa Iyang Simbahan. Busa, ang Propeta nangutana sa Ginoo kabahin sa butang ug nadawat ang usa ka pagpadayag aron “nga [ang mga Santos] dili malimbungan” (D&P 43:6).

Mapa 5: Ang New York, Pennsylvania, ug Ohio Area sa Estados Unidos

Doktrina ug mga Pakigsaad 43:1–7

Nagpahayag ang Ginoo nga ang mga pagpadayag ug mga sugo moabut lamang pinaagi sa Iyang gitudlo nga propeta

Doktrina ug mga Pakigsaad 43:2–7. Ang pagpadayag alang sa Simbahan moabut pinaagi sa buhing propeta

Agi og tubag ngadto sa pangutana sa Propeta mahitungod ni Gng. Hubble ug sa ubang bakak nga mga pagpadayag nga nahitabo sa Kirtland, Ohio, gitudloan sa Ginoo ang mga Santos nga “walay lain nga itudlo nganha kaninyo sa pagdawat sa mga sugo ug mga pagpadayag” gawas sa Presidente sa Simbahan (D&P 43:3). Si Presidente J. Reuben Clark Jr. (1871–1961) sa Unang Kapangulohan mitudlo sa mosunod:

“Ang Presidente sa Simbahan adunay … espesyal nga espirituhanong tuga … , kay siya mao ang Propeta, Manalagna, ug Tigpadayag alang sa tibuok Simbahan.

“Kini kinahanglan gayud nga atong ibutang sa hunahuna—kinahanglan gayud nga mahibaloan—nga ang Presidente lamang sa Simbahan, ang Tigdumalang High Priest, … ang adunay katungod sa pagdawat og mga pagpadayag alang sa Simbahan, mabag-o man o usbununon, o sa paghatag og awtoridad sa paghubad sa mga kasulatan nga mahimong kalig-unan sa Simbahan, o sa pag-ilis sa bisan unsa nga paagi sa anaa nga mga doktrina sa Simbahan. Siya ang bugtong tigpama-ba dinhi sa yuta alang sa Ang Simbahan ni Jesukristo sa mga Santos sa Ulahing mga Adlaw, ang mao lamang nga tinuod nga Simbahan. Siya lamang ang mahimong mopahayag sa hunahuna ug kabubut-on sa Dios ngadto sa iyang mga katawhan” (“When Are the Writings and Sermons of Church Leaders Entitled to the Claim of Scripture?” [pakigpulong ngadto sa Church Educational System religious educators, Hulyo 7, 1954], 6, emp.byui.edu/marrottr/ClarkWhenAreWritings.pdf).

paghulagway ni Propeta Joseph Smith nga nag-ampo

Ang mga pagpadayag ug mga sugo alang sa Simbahan moabut lamang pinaagi sa sulugoon nga gitudlo sa Ginoo (tan-awa sa D&P 43:2–7).

Adunay mga balaod nga nagdumala sa paagi nga ang pagpadayag madawat sa Simbahan. AngDoktrina ug mga Pakigsaad 43 nagpakita nga bisan tuod og ang mga tawo makahimo ug kinahanglan makadawat og personal nga pagpadayag (tan-awa sa D&P 43:16), adunay paagi nga ang pagpadayag ihatag alang sa tibuok Simbahan. Si Presidente James E. Faust (1920–2007) sa Unang Kapangulohan mi-summarize sa lima ka sukaranang mga kamatuoran kalabut ngadto kon sa unsa nga paagi ang Ginoo nagpadayag og kamatuoran diha sa Iyang Simbahan:

“Una, ang mga yawe ug ang awtoridad sa Dios gihatag pinaagi Kaniya ngadto ni Joseph Smith ug sa iyang matag mga sumusunod kinsa gitawag isip mga Presidente sa Simbahan.

“Ikaduha, kadto nga mga yawe ug awtoridad dili gayud ihatag ngadto sa laing tawo, ug kadtong kinsa aduna sa maong awtoridad ‘nahibaloan sa Simbahan’ [D&P 42:11].

“Ikatulo, ang padayon nga pagpadayag ug pagpangulo sa Simbahan moabut pinaagi sa Presidente sa Simbahan, ug dili gayud siya mopahisalaag sa mga Santos.

“Ikaupat, ang kada miyembro sa Simbahan mahimong makadawat og pagpadayag alang sa ilang kaugalingong mga calling ug mga gidak-on sa responsibilidad ug alang sa ilang kaugalingong mga pamilya. Mahimong dili sila makadawat og espiritwal nga panudlo alang niadtong mas taas og awtoridad.

“Ikalima, kadtong kinsa nangangkon og pagpadayag diretso gikan sa Dios alang sa Simbahan nga wala magsunod sa na-establisar nga paagi ug agianan sa priesthood nahisalaag. Kini masulti usab ngadto ni bisan kinsa nga nagsunod kanila” (“The Prophetic Voice,” Ensign, Mayo 1996, 7).

Doktrina ug mga Pakigsaad 43:4. “Siya dili makabaton sa gahum gawas sa pagtudlo og lain sa iyang dapit”

Ang panudlo sa Ginoo kalabut sa paagi sa pagpadayag diha sa Simbahan naglakip og tagana nga bisan og si Joseph Smith mawad-an sa pribilehiyo sa pagka-propeta sa Dios, siya sa gihapon adunay gahum sa pagtudlo og lain isip usa ka awtorisado nga sumusunod. Si President George Q. Cannon (1827–1901) sa Unang Kapangulohan mipasabut niining linain nga kahimtang: “Sa dihang ang Ginoo misulti ngadto ni Joseph mahitungod sa pagkabulag, miingon siya nga siya adunay awtoridad sa pagtudlo og lain diha sa iyang dapit [tan-awa sa D&P 43:4], ug nga walay tawo nga adunay katungod sa paglihok gawas kon siya gi-orden pinaagi sa awtoridad, o mosulod sa ganghaan [tan-awa sa D&P 43:7]. Mahimo kamong mahibalo pinaagi sa pagpadayag nga akong nabasa nga walay tawo makakuha sa awtoridad sa laing dapit. Kini kinahanglan gayud nga moabut pinaagi sa balaang Priesthood. Ang mga tawo mahimong moingon nga ilang nadungog ang tingog ni Jesus, o nadungog kini, kana o ang uban; apan inyong mahibaloan nga ang gahum sa Dios mouban sa mga yawe [sa priesthood], ug ang Iyang mga panalangin mosunod sa pagpangalagad sa Iyang mga sulugoon kinsa naghupot sa awtoridad” (“Discourse by Elder Geo. Q. Cannon,” Deseret News, Dis. 15, 1869, 532).

Doktrina ug mga Pakigsaad 43:7. “Sulod sa ganghaan ug i-orden”

Bisan unsa nga pangutana mahitungod kon kinsa ang napili sa Ginoo sa pagpangulo sa Iyang mga katawhan klaro nga gitubag diha sa kasulatan. Ang Manluluwas mitudlo:

“Siya nga mosulod sa toril nga dili moagi sa pultahan, kondili mokatkat sa laing alagian, kana siya kawatan ug tulisan.

“Apan ang mosulod agi sa pultahan mao ang magbalantay sa mga karnero” (Juan 10:1–2).

Ang mga miyembro sa Simbahan makasalig nga walay lider nga mosaka pinaagi sa dili sagad nga mga kahimtang o pinaagi sa tinago nga pag-orden, tungod kay ang Ginoo misaad nga ang mga lider sa priesthood “ma-orden pinaagi sa usa kinsa adunay pagtugot, [awtoridad] ug nahibaloan sa simbahan nga siya adunay pagtugot ug na-orden pinaagi sa mga pangulo sa simbahan” (D&P 42:11).

Ang mga miyembro sa Simbahan kinahanglan nga magpakabana niadtong kinsa nangangkon nga adunay linain nga awtoridad o pag-orden sa paggiya sa mga anak sa Dios. Si Presidente James E. Faust mipahimatngon:

“Sukad sa sinugdanan pipila nga gikan sa sulod ug gawas sa Simbahan naninguha sa paghaylo sa mga miyembro sa Simbahan batok sa pagsunod sa dinasig nga mga pamahayag niadtong kinsa naghupot sa mga yawe sa gingharian sa Dios dinhi sa yuta. Ang pipila niadtong nagtinguha sa pagpasalaag naghimo sa mao nga pagpangangkon og linain nga mga pagtuga sa salabutan o inspirasyon lapas sa na-estabilisar nga paagi sa Simbahan. …

“Gipasabut ni Propeta Joseph niadtong tingtugnaw sa 1832–33 nga ‘walay tinuod nga anghel gikan sa Dios nga moanhi gayud sa pag-orden ni bisan kinsa nga tawo, tungod kay sila sa makausa gipadala aron sa pag-estabilisar sa priesthood pinaagi sa pag-orden kanako ngadto niana; ug ang priesthood ingon nga na-estabilisar na makausa dinhi sa yuta, uban [ang] gahum sa pag-orden sa uban, walay langitnong mensahero nga moari pa aron sa pagsamok niana nga gahum pinaagi sa pag-orden pa og lain. … Busa kamo mahimong mahibalo, sukad niini nga panahon, nga kon bisan kinsa nga tawo moanha kaninyo nagpaila nga gi-orden pinaagi sa usa ka anghel, siya usa ka bakakon o napahimuslan agi og sangputanan sa kalapasan pinaagi sa usa ka anghel sa yawa, tungod kay kini nga priesthood dili gayud makuha gikan niini nga simbahan’ [Orson Hyde, ‘Although Dead, Yet He Speaketh,’ Millennial Star, Nob. 20, 1846, 139]” (“The Prophetic Voice,” 5, 7).

Doktrina ug mga Pakigsaad 43:8–16

Usa ka sugo sa pagtudlo ug paglig-on sa usag usa

Doktrina ug mga Pakigsaad 43:8–11. “Maghiusa sa inyong mga kaugalingon sa pagbuhat sa tanan nga pagkabalaan diha sa akong atubangan”

Kon ang mga miyembro sa Simbahan magpundok aron “magtudlo ug maghatag og kaayohan sa usag usa” (D&P 43:8), sila nagsunod og balaang gitudlo nga sundanan sa pagtudlo ug pagkat-on sa mga kamatuoran sa ebanghelyo. Ang mga panudlo sa ebanghelyo nag-andam sa mga anak sa Dios nga mabalaan samtang sila naglihok diha sa unsay ilang nakat-unan. Kini dili igo nga magbaton lamang og kahibalo sa espiritwal nga mga butang. Kadtong kinsa midawat sa ebanghelyo ni Jesukristo naghimo og mga pakigsaad nga “naghiusa [kanila] sa pagbuhat sa tanan nga pagkabalaan diha sa atubangan [sa Ginoo]” (D&P 43:9).

Ang kinatibuk-ang mga komperensya, gihimo kaduha matag tuig, naghatag og importanting oportunidad alang sa mga miyembro sa Simbahan nga makadawat og mga panudlo sa ebanghelyo. Si Elder Paul V. Johnson sa Seventy mipasabut kon ngano nga kini dili igo nga maminaw lamang sa mga mensahe nga gipamulong diha sa kinatibuk-ang komperensya: “Aron ang mga mensahe sa kinatibuk-ang komperensya makausab sa atong mga kinabuhi, kita gikinahanglan nga andam sa pagsunod sa tambag nga atong nadungog. Ang Ginoo mipasabut diha sa usa ka pagpadayag ngadto ni Propeta Joseph Smith ‘nga kon kamo magpundok kamo magtudlo ug maghatag og kaayohan sa usag usa, nga kamo masayud … unsaon sa pagbuhat diha sa mga katuyoan sa akong balaod ug mga sugo’ [D&P 43:8]. Apan ang pagkahibalo kon ‘unsaon sa pagbuhat’ dili igo. Ang Ginoo sa sunod nga bersikulo miingon, ‘Kamo maghiusa sa inyong mga kaugalingon sa pagbuhat sa tanan nga pagkabalaan diha sa akong atubangan’ [D&P 43:9]. Kini nga pagkaandam sa paglihok kon unsay atong nakat-unan nag-abli sa mga pultahan alang sa makapahibulong nga mga panalangin” (“Ang mga Panalangin sa Kinatibuk-ang Komperensya,” Liahona, Nob. 2005, 52).

Agi og dugang sa gipasabut sa atong personal nga responsibilidad sa paglihok diha sa mga balaod ug mga sugo nga atong nadawat gikan sa Ginoo, ang Doktrina ug mga Pakigsaad 43:8–9 nagsugyot nga samtang kita nagpundok aron matudloan ug mahatagan og kaayohan pinaagi sa ebanghelyo, naghiusa kita sa atong mga kaugalingon isip usa ka kapunongan sa mga Santos. Si Presidente Lorenzo Snow (1814–1901) mipasabut:

“Kinahanglan nga atong sabton nga kinahanglan gayud nga atong lihokon ang pipila ka mga baruganan diin kita magkahiusa sa atong mga kaugalingon isip katawhan, sa pagbugkos sa atong mga pagbati nga mahimo kitang usa, ug kini dili gayud matuman gawas kon pipila ka mga butang gihimo, ug ang mga butang nga nagkinahanglan og sobra nga paningkamot sa atong bahin.

“Sa unsang paagi kamo motrabaho sa paghiusa sa inyong mga kaugalingon? Sa unsang paagi ang usa ka tawo motrabaho sa paghiusa sa iyang kaugalingon uban sa iyang silingan? Kon duha ka mga tawo gikuyog kinsa wala pa gayud sukad magkaila, sa unsang paagi sila motrabaho nga makabaton og panaghigalaay, pagkasuod ug pagbati ngadto sa usag usa? Ngano nga usa ka butang ang kinahanglan nga pagahimoon, ug nga dili sa usa lamang ka tawo, apan kinahanglan nga pagabuhaton sa usa ingon man sa lain. Kini dili angay sa usa lamang sa pagbuhat sa gikinahanglan nga trabaho; kini dili mahimo alang sa usa sa pagtubag niadto nga mga pagbati ug buhaton ang trabaho sa iyang kaugalingon, apan aron mahimo isip usa diha sa ilang mga sentimento ug pagbati—ang lihok sa duha kinahanglanon” (Mga Pagtulun-an sa mga Presidente sa Simbahan: Lorenzo Snow [2012] 234–35).

Doktrina ug mga Pakigsaad 43:12–14. Pagbulig sa propeta pinaagi sa hugot nga pagtuo ug pag-ampo

Ingon nga narekord diha sa Doktrina ug mga Pakigsaad 43:12–14, misulti ang Ginoo ngadto sa mga Santos nga sila makabulig ni Propeta Joseph Smith pinaagi sa hugot nga pagtuo ug pag-ampo ug sa paghatag usab alang sa temporal nga mga panginahanglan sa iyang pamilya. Ang Propeta naghatag sa tibuok niya nga pagtagad ngadto sa administratiba ug espiritwal nga mga kalihokan sa Simbahan. Ang paghatag og materyal nga suporta ngadto kaniya moresulta og mga panalangin alang sa mga miyembro sa Simbahan, lakip ang pagsabut sa doktrina nga maangkon gikan sa dinasig nga hubad sa Biblia.

Doktrina ug mga Pakigsaad 43:17–35

Ang mga sulugoon sa Dios gikinahanglang magsangyaw og paghinulsol agi og pagpangandam alang sa Ikaduhang Pag-anhi ug sa Milenyum

Doktrina ug mga Pakigsaad 43:17–28. Mga Tingog sa Pagpasidaan

“Ang mahinungdanong adlaw sa Ginoo” (D&P 43:17) nagpasabut sa Ikaduhang Pag-anhi ni Jesukristo ug ang pagsugod sa Milenyum. Gimandoan sa Ginoo ang Iyang mga sulugoon sa pagpahayag og paghinulsol aron sa pagpugong sa Iyang mga anak nga dili malaglag uban sa dautan kon mobalik na ang Manluluwas. Samtang ang uban mamati ug maghinulsol, ang uban mobaliwala ug mosalikway sa tingog sa mga sulugoon sa Ginoo. Busa, ang Ginoo nagpataas sa tingog sa pagpasidaan sa paghinulsol pinaagi sa lain-laing mga paagi: Sa Iyang mga sulugoon, pagpangalagad sa mga anghel, Iyang kaugalingong tingog, ug gani ang makaguba nga gahum sa kinaiyahan.

Doktrina ug mga Pakigsaad 43:29–33. Ang mahinungdanon nga Milenyum

“Ang mahinungdanon nga Milenyum” (D&P 43:30) nagpasabut ngadto sa 1,000 ka tuig nga pasiunhan sa Ikaduhang Pag-anhi sa Manluluwas (tan-awa sa Pinadayag 20:4; D&P 29:11). Atol sa Milenyum, “Si Kristo mohari dinhi sa yuta” (Mga Artikulo sa Hugot nga Pagtuo 1:10). Gipaniguro sa Ginoo ang matarung nga sila maghari uban Kaniya sa panahon sa Milenyum (tan-awa sa D&P 43:29). Pagagapuson si Satanas sa panahon sa Milenyum ug walay gahum sa pagtintal niadtong kinsa buhi niana nga panahon (tan-awa sa D&P 43:31; 101:28).

Si Presidente Gordon B. Hinckley (1910–2008) naghunahuna sa mga panalangin nga mapahimuslan kon pagagapuson si Satanas: “Kay ang mahinungdanon nga milenyum moabut (D&P 43:30) liboan ka tuig nga panahon nga si Satanas pagagapuson ug ang Ginoo maghari sa iyang katawhan. Makahunahuna ba kamo sa katingalahan ug sa kaanindot niana nga panahon nga ang kaaway walay impluwensya? Hunahunaa ang iyang impluwensya diha kaninyo karon ug hunahunaa ang kalinaw niana nga panahon nga kamo malingkawas gikan sa mao nga impluwensya. Maadunay kahilum ug kaayo diin sa pagka-karon adunay panagbingkil ug kadautan” (“Dili Kita Angay Mahadlok sa Iyang Pagbalik,” Liahona, Hulyo 1982, 3).

Doktrina ug mga Pakigsaad 44: Dugang nga Makasaysayanong Background

Human moabut sa Kirtland, Ohio, nadawat dayon ni Propeta Joseph Smith ang mga pagpadayag nga gi-rekord diha sa Doktrina ug mga Pakigsaad 42, nga nag-outline og mga balaod sa paggiya sa Simbahan. Gilakip mao ang sugo nga ang mga elder kinahanglan nga “manglakaw pinaagi sa gahum sa akong Espiritu, magsangyaw sa akong ebanghelyo, sa tinagurha. … Ug gikan niini nga dapit kamo manglakaw” (D&P 42:6, 8). Ang pagpadayag nga gi-rekord diha sa Doktrina ug mga Pakigsaad 44 nagtawag sa mga elder sa Simbahan sa pagpundok sa dili pa manglakaw aron sa pagsangyaw sa ebanghelyo.

Mituman si Propeta Joseph Smith niana nga panudlo ug mipadala og usa ka sulat kaniadtong Pebrero 22, 1831, ngadto ni Martin Harris, kinsa nagpuyo pa sa New York. Gihisgutan sa Propeta ang pagpadayag sa dihang iyang gipasabut ngadto ni Martin nga “ang buhat ania nagkaylap ngadto sa silangan, kasadpan, amihanan, ug habagatan; pahibaloon usab nimo ang mga Elder kinsa anaa dinha nga silang tanan kinsa mahimong ipadala moari sa walay paglangan kon mahimo, kini pinaagi sa Sugo sa Ginoo ingon nga siya adunay dakong buhat alang kanilang tanan” (sa The Joseph Smith Papers, Documents, Volume 1: Hulyo 1828–Hunyo 1831, 263; punctuation ug spelling gi-standardize).

Sa mosunod nga mga semana atol sa tingpamulak sa 1831, daghang mga Santos gikan sa New York mipaingon ngadto sa Kirtland, Ohio. Ang ikaupat nga komperensya sa Simbahan gihimo kaniadtong Hunyo 1831, ug daghang mga elder ang miapil sa mga miting niini nga komperensya, nga miandam kanila sa pagbiya human niana aron sa pagsangyaw sa ebanghelyo.

Doktrina ug mga Pakigsaad 44

Nagmando ang Ginoo sa Iyang mga sulugoon nga magpundok

Doktrina ug mga Pakigsaad 44:1–2. “Ako mobu-bu sa akong Espiritu diha kanila sa adlaw nga sila magtigum sa ilang mga kaugalingon”

Misaad ang Ginoo sa mga elder sa Simbahan nga kon sila magtigum ug maggamit og hugot nga pagtuo diha Kaniya, Siya mobu-bu sa Iyang Espiritu diha kanila. Si Elder Joseph B. Wirthlin (1917–2008) sa Korum sa Napulog Duha ka mga Apostoles mitudlo nga kini usa sa mga katuyoan sa mga miting sa atong Simbahan: “Diha sa kinatibuk-ang mga komperensya ug diha sa ubang mga miting sa Simbahan sa tibuok kalibutan, magpundok kita nangita og panag-uban—ang maayong kauban nga mga kaigsoonan sa ebanghelyo ug ang kahayahay sa matam-is nga panag-abin sa Espiritu sa Dios. Sa atong mga serbisyo sa pagsimba, ang presensya niana nga Espiritu nagpuno sa atong mga kasingkasing uban sa gugma alang sa Dios ug alang sa atong isig ka mga Santos” (“Valued Companions,” Ensign, Nob. 1997, 32).

paghulagway sa usa ka gamay nga grupo nga nagpundok aron sa pagpaminaw sa ebanghelyo

Ang Ginoo misaad sa pagbu-bu sa Iyang Espiritu kon ang mga matinud-anon magtigum (tan-awa sa D&P 44:2).

Doktrina ug mga Pakigsaad 44:4–5. “Paghan-ay sa inyong mga kaugalingon sumala sa mga balaod sa tawo”

Samtang ang Simbahan legal nga na-organisar didto sa estado sa New York, susama nga paningkamot ang gikinahanglan didto sa Ohio samtang ang mga Santos nagpundok ngadto sa Kirtland. Kini magtugot sa Simbahan nga ma-organisar isip usa ka relihiyosong organisasyon ug mohimo niini nga posible alang sa Simbahan sa pagpanag-iya og yuta ug magpahimulos og sama nga pribilehiyo nga gihatag ngadto sa ubang relihiyosong mga grupo sa Ohio. Sa pagpadayag nga gi-rekord diha sa Doktrina ug mga Pakigsaad 44, giklaro sa Ginoo nga kini nga lakang gikinahanglan aron sa pagpugong sa mga kaaway sa pagguba sa Simbahan. (Tan-awa sa Steven Harper, Making Sense of the Doctrine and Covenants: A Guided Tour through Modern Revelations [2008], 153.)

Doktrina ug mga Pakigsaad 45: Dugang nga Makasaysayanong Background

Sa pagka-tingpamulak sa 1831, daghang mga kinabig nagpundok uban sa mga Santos sa Kirtland, Ohio. Kining kusog nga pagtubo sa Simbahan gisugat og nagkadaghang oposisyon. Gihulagway ni Propeta Joseph Smith ang mga hagit nga gisinati sa mga Santos niini nga panahon: “Niini nga gidugayon sa simbahan daghang sayop nga mga balita, mga bakak, ug b[in]uang nga mga istorya, nga gimantala diha sa mga pamantalaan, ug gipakaylap sa tanang direksyon, aron sa pagpugong sa mga tawo sa pag-imbestigar sa buhat, o pagdawat sa tinuohan. … Apan sa hingpit nga kalipay sa mga santos kinsa kinahanglan nga manlimbasug batok sa tanang butang nga ma-imbento sa pagdaot ug pagkadautan, akong nadawat ang mosunod [Doktrina ug mga Pakigsaad 45]” (sa Manuscript History of the Church, vol. A-1, pahina 104, josephsmithpapers.org). Nadawat sa Propeta kini nga pagpadayag niadtong Marso 7, 1831, ug kini mitabang sa mga Santos nga mas masabtan ang oposisyon nga ilang giatubang sulod sa kinatibuk-ang kahulugan sa ulahing mga adlaw, ang mga timailhan sa mga panahon, ug ang Ikaduhang Pag-anhi ni Jesukristo.

Doktrina ug mga Pakigsaad 45:1–14

Naghatag og gibug-aton si Jesukristo sa Iyang mga tahas isip ang Tiglalang, Manlalaban, ug ang Kahayag ug Kinabuhi sa Kalibutan

Doktrina ug mga Pakigsaad 45:3–5. Si Jesukristo mao ang atong Manlalaban, nangamuyo sa atong kawsa

Kitang tanan may sala, ug sumala sa kaangayan sa Dios, walay mahugaw nga butang nga makasulod sa Iyang presensya. Hinoon, mianhi si Jesukristo sa yuta aron paghimo sa kaluwasan nga posible alang sa tanang anak sa Langitnong Amahan. Pinaagi sa Pag-ula sa Manluluwas kita mahimo nga malimpyo ug maluwas gikan sa sala ug kamatayon. Ang Iyang maayong mga buhat, kalooy, ug grasya naghimo sa paghinulsol ug pagpasaylo nga mapahimuslan sa tanan. Tungod kay si Jesukristo hingpit nga matarung ug gitagbaw ang mga gipangayo sa hustisya alang sa mga sala sa uban, Siya mahimo nga Manlalaban kanato pinaagi sa pagpangamuyo sa atong kawsa diha sa atubangan sa AmahanSi Presidente Russell M. Nelson sa Korum sa Napulog Duha ka mga Apostoles mipasabut:

“Si Jesus mao ang atong Manlalaban ngadto sa Amahan (tan-awa sa 1 Juan 2:1; D&P 29:5; 32:3; 45:3; 110:4). Ang pulong nga manlalaban nagagikan sa Latin nga pulong nga nagpasabut og ‘tingog alang,’ o ‘usa kinsa mangamuyo alang sa uban.’ Ang ubang may kalabutan nga mga pulong gigamit diha sa kasulatan, sama sa mangatubang o tigpataliwala (tan-awa usab sa 1 Timoteo 2:5; 2 Nephi 2:28; D&P 76:69). …

“… Ang pagsabut kaniya isip atong manlalaban-mangatubang-tigpataliwala ngadto sa Amahan naghatag kanato og kasigurohan sa iyang dili katupngan nga pagsabut, hustisya, ug kalooy (tan-awa sa Alma 7:12)” (“Jesus the Christ—Our Master and More” [Brigham Young University fireside, Peb. 2, 1992], 4, speeches.byu.edu).

paghulagway ni Jesus nga nagpas-an sa krus

Tungod sa Iyang pag-antus ug kamatayon, si Jesukristo mao ang Manlalaban sa tanan niadtong kinsa nagtuo sa Iyang ngalan (tan-awa sa D&P 45:3–5).

Mahinungdanon, ang Manluluwas nangamuyo sa atong kawsa diha sa atubangan sa Amahan ug naghangyo nga kadtong kinsa nagtuo diha Kaniya ipalingkawas sa mahangturong gipangayo sa hustisya, dili pinasikad sa atong pagkawalay sala apan sa Iyang maulaong sakripisyo. Ang Iyang kapasikaran alang sa atong kaluwasan gikan sa silot sa sala mao “ang mga pag-antus ug ang kamatayon kaniya kinsa wala makabuhat og sala” (D&P 45:4).

Doktrina ug mga Pakigsaad 45:15–59

Ang Manluluwas nagpadayag og mga timailhan ug mga kahibulongan nga mahitabo wala madugay human sa Iyang kamatayon ug kadtong mag-una sa Iyang Ikaduhang Pag-anhi

Doktrina ug mga Pakigsaad 45:15–59. “Ako mopakita niini sa yano nga paagi ingon nga Ako mipakita niini ngadto sa akong mga tinun-an samtang Ako nagbarug diha sa ilang atubangan diha sa lawas”

Nakigkita si Jesukristo sa Iyang mga tinun-an didto sa Bungtod sa mga Olivo atol sa Iyang katapusang semana sa pagkamortal. Niana nga panahon Siya nanagna bahin sa pagkahugno sa templo sa Jerusalem, ug ang Iyang mga tinun-an nangutana kon kanus-a kana nga pagkahugno mahitabo ug kon kanus-a Siya mobalik nganhi sa yuta (tan-awa sa Joseph Smith—Mateo 1:2–4). Agi og tubag ang Ginoo nagpadayag sa mga timailhan nga mahitabo dili madugay human sa Iyang kamatayon ug kadtong mag-una sa Iyang Ikaduhang Pag-anhi. Gibalik Niya kini nga panagna ngadto sa Iyang mga Santos sa ulahing mga adlaw, ingon nga gi-rekord diha sa Doktrina ug mga Pakigsaad 45:16–59.

modelo sa templo ni Herodes

Sa panahon sa Iyang mortal nga pangalagad, nanagna si Jesukristo bahin sa pagkahugno sa templo sa Jerusalem isip usa ka timailhan sa Iyang Ikaduhang Pag-anhi (tan-awa sa D&P 45:18–20).

Doktrina ug mga Pakigsaad 45:16–59. Mga Timailhan sa Ikaduhang Pag-anhi

Kadtong kinsa nakahibalo sa mga timailhan sa Ikaduhang Pag-anhi ni Jesukristo ug nagsunod sa tambag nga gihatag pinaagi sa mga propeta sa Ginoo maandam sa pag-atubang sa mga hagit niining makahuluganon nga panahon ug “maglantaw alang nianang mahinungdanon nga adlaw sa Ginoo nga moabut” (D&P 45:39). Dili sila makuratan apan magpaabut nga mabalak-on sa Ikaduhang Pag-anhi sa Ginoo.

Ang mga kasulatan mao ang labing maayo nga kapanguhaan alang niadtong kinsa gusto nga magtuon sa mga timailhan ug mga panghitabo sa Ikaduhang Pag-anhi. Sama pananglit, daghang mga detalye ang makat-unan gikan sa mga panudlo nga gihatag ngadto sa mga tinun-an sa Bag-ong Tugon sa dihang sila nangutana sa Manluluwas, “Unsa man ang ilhanan sa imong pag-anhi, ug sa pagkatapos sa kapanahonan?” (Mateo 24:3). Ang mga pagtulun-an ni Jesukristo nga makaplagan diha sa Mateo 24:3–51 gipatataw og maayo pinaagi sa dinasig nga hubad nga gihimo ni Propeta Joseph Smith, ingon nga makaplagan diha sa Joseph Smith—Mateo 1:4–55 (diha sa Perlas nga Labing Bililhon). Daghang mga seksyon diha sa Doktrina ug mga Pakigsaad ang nagtabang usab sa pagpasabut sa mga panghitabo sa katapusang mga adlawa ug sa unsa nga paagi ang mga anak sa Dios makaandam niini (ang mga pananglitan naglakip sa D&C 29; 38; 45; 63; 84; 88; 101; 133).

Ang mga timailhan sa Ikaduhang Pag-anhi sa Ginoo mahimong bahinon ngadto sa duha ka dagko nga mga kategoriya: (1) mga timailhan nga mga bahin sa Pagpahiuli sa ebanghelyo ug ang kalagmitang pagpatataw niini sa tibuok kalibutan ug (2) mga timailhan nga mga bahin sa nagkadaghang mga dautan ug mga kalamidad ug mga paghukom nga moabut sa kalibutan. Ang pipila sa mga timailhan ug mga panghitabo sa Ikaduhang Pag-anhi nga gihulagway diha sa Doktrina ug mga Pakigsaad 45:16–59 naglakip sa mosunod:

  • Mga Hentil ug mga Judeo pagapundukon (tan-awa sa D&P 45:25, 30, 43)

  • “Mga gubat ug mga hungihong sa mga gubat, ug ang tibuok kalibutan magkaguliyang” (D&P 45:26)

  • Ang kahingpitan sa ebanghelyo ipahiuli (tan-awa sa D&P 45:28)

  • “Ang makalaglag nga sakit motabon sa yuta” (D&P 45:31)

  • Ang mga tinun-an sa Ginoo “magbarug sa balaan nga mga dapit, ug dili mabalhin” (D&P 45:32)

  • “Mga linog … sa nagkalain-lain nga mga dapit, ug daghan nga mga kalaglagan” (D&P 45:33)

  • “Mga timailhan ug mga kahibulongan … ipakita diha sa taas sa langit, ug sa ubos sa yuta” (D&P 45:40)

  • “Ang adlaw pagatabunan sa kangitngit, ug ang bulan mabalhin ngadto sa dugo” (D&P 45:42)

  • Ang Ginoo moabut “sinul-uban sa gahum ug dako nga himaya; uban sa tanan nga balaan nga mga anghel” (D&P 45:44)

  • “Ang mga santos nga nakatulog mobangon” (D&P 45:45)

  • Ang Ginoo mopakita diha sa Bungtod sa mga Olivo ug makigsulti sa mga Judeo (tan-awa sa D&P 45:48, 51–53)

Doktrina ug mga Pakigsaad 45:32. “Ang akong mga tinun-an magbarug sa balaan nga mga dapit”

Usa sa mga katuyoan sa pagpadayag nga gi-rekord diha sa Doktrina ug mga Pakigsaad 45 mao ang pagtabang sa mga anak sa Langitnong Amahan nga makaandam alang sa Ikaduhang Pag-anhi ni Jesukristo. Samtang mag-antus ang mga dautan ug pagalaglagon, ang mga tinun-an sa Ginoo makakaplag og kalinaw ug mga panalangin kon sila “magbarug sa balaan nga mga dapit ug … dili mabalhin” (D&P 45:32).

Si Sister Ann M. Dibb, kinsa miserbisyo isip usa ka Magtatambag sa Kinatibuk-ang Kapangulohan sa Young Women, mipasabut kon sa unsa nga paagi kita makabarug sa balaan nga mga dapit: “Mitambag si Presidente Ezra Taft Benson, ‘Ang balaan nga mga dapit naglakip sa atong mga templo, mga chapel, atong mga balay, ug sa mga stake sa Zion, nga … “alang sa usa ka panalipod, ug alang sa usa ka dangpanan’’ [D&P 115:6]’ [‘Prepare Yourself for the Great Day of the Lord,’ New Era, Mayo 1982, 50]. Dugang niini, nagtuo ako nga makakita pa kita og daghang balaan nga dapit. Ang unahon natong hunahunaon mao ang pulong nga dapit isip palibut o geograpikanhong dapit. Apan, ang usa ka dapit pwede sab nga ‘lahi nga kondisyon, posisyon, o panghunahuna’ [Merriam-Webster Online, ‘place,’ merriam-webster.com/dictionary/place]. Nagpasabut kini nga ang balaan nga mga dapit maglakip usab og mga gutlo sa panahon—mga gutlo nga ang Espiritu Santo mopamatuod kanato, mga gutlo nga mobati kita sa gugma sa Langitnong Amahan, o mga gutlo nga gitubag ang atong mga pag-ampo. Dugang pa, nagatuo ako nga sa bisan kanus-a nga may kaisug kamo sa pagbarug sa husto, ilabi na sa mga sitwasyon nga walay gustong mohimo niini, nagahimo kamo og balaan nga dapit” (“Inyong Balaan nga mga Dapit,” Liahona, Mayo 2013, 115).

nagkahinog nga igos diha sa kahoy

Sama lamang nga ang mga salingsing sa kahoy nga igos nagpaila sa sinugdanan sa ting-init, ang pagtungha sa gipanagna nga mga timailhan magpaila sa nagsingabut nga Ikaduhang Pag-anhi sa Ginoo (tan-awa sa D&P 45:36–38).

Doktrina ug mga Pakigsaad 45:35. Ang mga saad matuman

Samtang daghan sa mga timailhan sa Ikaduhang Pag-anhi naglakip sa mga kalamidad og makahahadlok nga mga panghitabo, gihupay sa Manluluwas ang Iyang mga sumusunod pinaagi sa pagpasabut nga “ang mga saad nga nabuhat nganha kaninyo matuman” (D&P 45:35). Kini nga mga saad mahimong nagpasabut ngadto sa mga panalangin nga naghulat sa matarung samtang ang Milenyum nagsugod na.

Doktrina ug mga Pakigsaad 45:56–59. Ang maalamon makadawat sa kamatuoran ug makadawat sa Balaan nga Espiritu isip ilang giya

Ang sambingay sa napulo ka mga birhen orihinal nga gihatag sa dihang si Jesus mihatag og mga panudlo ngadto sa iyang mga tinun-an didto sa Bungtod sa mga Olivo (tan-awa sa Mateo 25:1–13). Ang Doktrina ug mga Pakigsaad naghatag og pipila ka interpretasyon niini nga sambingay, nagpasabut nga ang mga panalangin nga gisaad niadtong kinsa maalamon naglakip sa saad nga mauban sa Ginoo sa Iyang paghari atol sa Milenyum (tan-awa sa D&P 45:56–59). Ang maalamon gihulagway ingon kadtong kinsa “nakadawat sa kamatuoran, ug nakadawat sa Balaan nga Espiritu alang sa ilang paggiya, ug wala malimbongi” (D&P 45:57).

Lima Kanila Mga Maalamon, ni Walter Rane

Lima Kanila Mga Maalamon, ni Walter Rane. Sa Ikaduhang Pag-anhi ni Jesukristo, ang sambingay sa napulo ka mga birhen matuman (tan-awa sa D&P 45:56–57).

Si Elder David A. Bednar sa Korum sa Napulog Duha ka mga Apostoles mipasabut nga matag miyembro sa Simbahan adunay oportunidad nga makadawat sa Espiritu Santo isip giya: “Nakadawat sa Balaang Espiritu alang sa [atong] paggiya’ (D&P 45:57) posible ug importante alang sa atong espiritwal nga pagtubo ug pagpakabuhi sa nagtubong kadautan nga kalibutan. Usahay isip Santos sa Ulahing mga Adlaw kita nagsulti ug naglihok ingon og ang pagkaila sa impluwensya sa Espiritu Santo diha sa atong mga kinabuhi mao ang dili sagad o talagsaon nga panghitabo. Kinahanglan atong hinumduman, bisan pa niana, nga ang pakigsaad nga saad mao nga kita kanunay nga makabaton sa Iyang Espiritu uban kanato. Kining langitnong panalangin magamit sa tanang miyembro sa simbahan kinsa nabunyagan, nakumpirmahan, ug natudloan sa ‘pagdawat sa Espiritu Santo’” (“That We May Always Have His Spirit to Be with Us,” Ensign or Liahona, Mayo 2006, 30).

Doktrina ug mga Pakigsaad 45:60–75

Gihulagway sa Ginoo ang Bag-ong Jerusalem, o Zion

Doktrina ug mga Pakigsaad 45:60–61. “Hangtud ang Bag-ong Tugon mahubad”

Ang dinasig nga hubad sa Biblia nga gisugdan ni Propeta Joseph Smith sa New York kaniadtong Hunyo 1830 gipadayon human siya miabut sa Kirtland, Ohio. Sukad sa pagsugod og hubad, gitrabaho lamang sa Propeta ang Daang Tugon. Sa pagka-Marso 7, 1831, sa dihang ang pagpadayag diha sa Doktrina ug mga pakigsaad 45 nadawat, ang paghubad milambo hangtud ngadto sa Genesis 19:35. Dayon gisugo sa Ginoo si Joseph Smith sa pagsugod og hubad sa Bag-ong Tugon (tan-awa sa D&P 45:60–61). Ang Propeta ug si Sidney Rigdon misugod sa trabaho diha sa Ebanghelyo ni Mateo sa sunod gyud dayon nga adlaw. “Ang pahina 1 sa manuskrito gipetsahan og ika-8 sa Marso 1831, gisundan og mubo nga timaan ‘Usa ka Hubad sa Bag-ong Tugon nga gihubad pinaagi sa gahum sa Dios.’ Kini nga komentaryo nagpakita kon unsa ang gibati sa mga kaigsoonan mahitungod sa buhat nga ilang gihimo” (Robert J. Matthews, A Plainer Translation: Joseph Smith’s Translation of the Bible, A History and Commentary [1985], 73).

Doktrina ug mga Pakigsaad 45:62–71. Ang mga Santos gimandoan sa pagtukod sa Bag-ong Jerusalem

Ingon nga gi-rekord diha sa Doktrina ug mga pakigsaad 45:62–71, gitudloan sa Ginoo ang mga Santos kon unsaon sa pagpangandam alang sa mga kasamok ug mga kalamidad nga gipanagna nga magtubo sa dili pa ang Ikaduhang Pag-anhi sa Ginoo. Sa piho, gisultihan sila sa pagpundok ug pag-establisar og usa ka siyudad sa Zion subay sa sundanan sa siyudad ni Enoch (tan-awa sa Moises 7:18–20). Kini pagatawgon og “Bag-ong Jerusalem” ug mahimong “usa ka yuta sa kalinaw, usa ka dakbayan nga dangpanan usa ka dapit sa kahilwasan” (D&P 45:66). Ang pulong nga Zion usahay gigamit sa pagpasabut og gamay nga kalainan sa mga butang. Usahay ang pulong nagpasabut ngadto sa katawhan sa Zion ug naghulagway kanila isip “ang putli og kasingkasing” (D&P 97:21). Sa laing dapit ang Zion nagpasabut sa tibuok Simbahan ug sa mga istaka [stake] niini sa tibuok kalibutan (tan-awa sa D&P 82:14). Ang pulong nga Zion mahimong nagpasabut usab sa piho nga geograpikanhong mga dapit. Niini nga pagpadayag, ang Zion nagpasabut og usa ka pisikal nga siyudad nga i-estabilisar sa mga Santos ug ngadto diin sila magpundok.

Si Propeta Joseph Smith (1805–1844) mihimo sa mosunod nga mga pamahayag mahitungod sa Zion sa ulahing mga adlaw:

“Ang pagtukod sa Zion mao ang katuyoan nga nakapaikag sa katawhan sa Dios sa matag panahon; usa kini ka tema diin ang mga propeta, mga pari ug mga hari nagpakabuhi uban sa talagsaong kahimuot; ila kining gilauman uban sa malipayon nga pagpaabut sa adlaw diin kita magpuyo; ug gidasig uban sa langitnon ug mahimayaon nga mga pagpaabut nga ilang giawit ug gisulat ug gipanagna kining atong panahon; apan namatay sila nga wala makakita sa mga panghitabo sa atong kapanahonan; kita ang gikahimut-an nga mga katawhan nga gipili sa Dios aron sa pagdala sa Ulahing mga adlaw nga kahimayaan; anaa ra kanato ang pagtan-aw niini, pag-apil ug pagtabang sa pagpalambo sa Ulahing mga adlaw nga kahimayaan.

“Bisan asa nga dapit diin ang mga Santos nagpundok mao ang Zion, diin ang matag matarung nga tawo magtukod og dapit sa kaluwasan alang sa ilang mga anak.

“Atua didto sa nagkalain-laing dapit ang usa ka Stake [sa Zion] alang sa panagpundok sa mga Santos. … Didto ang inyong mga anak mapanalanginan, ug kamo sa taliwala sa inyong mga kahigalaan mapanalanginan. Ang pukot sa Ebanghelyo nagpundok sa nagkalain-lain nga matang.

“… Maoy atong tinguha nga matukod ang Zion isip atong pinakamahinungdanon nga katuyoan. … Ang panahon nagkaduol na, diin ang tawo dili makakaplag og kalinaw gawas lamang diha sa Zion ug sa mga stake niini” (Mga Pagtulun-an sa mga Presidente sa Simbahan: Joseph Smith [2007], 221).

Gipatutok ni Presidente Brigham Young (1801–1877) ang mga Santos diha sa importansya sa pag-estabilisar og Zion sa ulahing adlaw:

“Ang katuyoan sa atong kinabuhi kinahanglan mao ang pagtukod sa Zion sa atong Dios, ang pagpundok sa Balay ni Israel, … pagtigum og mga bahandi sa kahibalo ug kaalam diha sa atong kaugalingong panabut, paglimpyo sa atong kaugalingong mga kasingkasing ug pag-andam sa usa ka katawhan sa pagsugat sa Ginoo kon siya moabut. …

“Kita walay tuyo dinhi gawas sa pagtukod ug pagpahiluna sa Zion sa Dios. Kinahanglan kining buhaton sumala sa kabubut-on ug balaod sa Dios [tan-awa sa D&P 105:5], subay nianang sumbanan ug kahusayan diin si Enoch mitukod ug mihingpit sa Zion sa unang mga adlaw, nga gidala didto sa langit. … Kita, pinaagi sa atong pagkamatinud-anon, kinahanglang moandam sa atong mga kaugalingon sa pagsugat sa Zion gikan sa kahitas-an sa higayon nga mobalik kini nganhi sa yuta, ug sa paghulat sa kahayag ug himaya sa pag-abut niini” (Mga Pagtulun-an sa mga Presidente sa Simbahan: Brigham Young [1997], 130–31).