Kapitulo 14

Doktrina ug mga Pakigsaad 35–36; 39–40

Pasiuna ug Timeline

Sa tingtugnaw sa 1830, mibiyahe sila si Sidney Rigdon ug Edward Partridge gikan sa Ohio ngadto sa New York aron makighimamat kang Propeta Joseph Smith. Ang duha ka lalaki nakadungog sa gipahiuli nga ebanghelyo nga gisangyaw nila ni Oliver Cowdery, Parley P. Pratt, Ziba Peterson, ug Peter Whitmer Jr. didto sa dapit sa Kirtland, Ohio. Sa wala madugay human sa pag-abut nila ni Sidney ug Edward didto sa Fayette, New York, nakadawat si Joseph Smith og mga pagpadayag alang sa matag usa kanila. Diha sa pagpadayag nga narekord diha sa Doktrina ug mga Pakigsaad 35, gihatagan sa Ginoo si Sidney Rigdon og piho nga mga responsibilidad sulod sa bag-ong napahiuli nga Simbahan. Diha sa pagpadayag nga narekord sa Doktrina ug mga Pakigsaad 36, gitawag sa Ginoo si Edward Partridge nga mosangyaw sa ebanghelyo.

Pipila ka semana human niana, si James Covel, kinsa nahimong usa ka ministro nga Methodist sulod sa 40 ka tuig, mibisita kang Propeta Joseph Smith ug nakigsaad sa Ginoo nga motuman sa bisan unsa nga sugo nga ihatag ngadto kaniya pinaagi sa Propeta. Isip resulta, niadtong Enero 5, 1831, nadawat ni Joseph Smith ang pagpadayag nga narekord diha sa Doktrina ug mga Pakigsaad 39. Niini gisugo sa Ginoo si James Covel nga magpabunyag ug mosangyaw sa gipahiuli nga ebanghelyo. Hinoon, sa adlaw nga nadawat ang pagpadayag, mibiya si James sa Fayette, New York, nga wala mabunyagi ug “mibalik sa daan niya nga mga baruganan ug mga katawhan” (Joseph Smith, sa The Joseph Smith Papers, Documents, Volume 1: July 1828–June 1831, ed. Michael Hubbard MacKay ug uban pa [2013], 237). Ang Ginoo mihatag kang Joseph Smith sa pagpadayag nga narekord diha sa Doktrina ug mga Pakigsaad 40, nga mipasabut nga ang kang James Covel nga “kahadlok sa pagpanggukod ug ang mga kabalaka sa kalibutan nakaingon kaniya sa pagsalikway sa pulong [sa Dios]” (D&P 40:2).

Oktubre 29, 1830Sila si Oliver Cowdery, Parley P. Pratt, Ziba Peterson, ug Peter Whitmer Jr. gitawag sa pagsangyaw sa ebanghelyo sa amihanang-silangan sa Ohio sulod sa pipila ka semana.

Sayong bahin sa Disyembre 1830Mibiyahe sila si Sidney Rigdon ug Edward Partridge gikan sa Ohio paingon sa New York aron makighimamat kang Propeta Joseph Smith.

Disyembre 7, 1830Ang Doktrina ug mga Pakigsaad 35 nadawat.

Disyembre 9, 1830Ang Doktrina ug mga Pakigsaad 36 nadawat.

Disyembre 11, 1830Si Edward Partridge gibunyagan ni Joseph Smith.

Enero 2, 1831Ang ikatulong komperensya sa Simbahan gipahigayon, ug gipahibalo ni Joseph Smith nga ang mga Santos kinahanglang magpundok ngadto sa Ohio.

Enero 1831Si James Covel, usa ka ministro nga Methodist, nakig-ila ni Joseph Smith.

Enero 5, 1831Ang Doktrina ug mga Pakigsaad 39 nadawat.

Enero 6, 1831Ang Doktrina ug mga Pakigsaad 40 nadawat.

Samtang magtuon ka sa Doktrina ug mga Pakigsaad 35, pangitaa ang ebidensya nga ang Ginoo nagpakabana kon si kinsa ka, ug unsa ang imong nahimo, ug unsa ang imong matuman.

Doktrina ug mga Pakigsaad 35: Dugang nga Makasaysayanong Background

Sulod sa unom ka bulan human sa pag-organisar sa Simbahan, gitawag sila si Oliver Cowdery, Peter Whitmer Jr., Ziba Peterson, ug Parley P. Pratt aron mosangyaw sa ebanghelyo ngadto sa mga American Indian. Sa ilang pagpaingon ngadto sa kasadpang mga utlanan sa Missouri, mihunong sila sa Mentor ug sa Kirtland, Ohio, diin sila mipakigbahin sa mensahe sa gipahiuli nga ebanghelyo sa higala ni Elder Pratt ug kanhi ministro nga si Sidney Rigdon. Sulod lang sa mubo nga panahon, sobra sa 120 ka tawo, lakip na nilang Sidney Rigdon ug daghan pang miyembro sa iyang kongregasyon, ang nabunyagan. Morag nidoble kini sa total nga gidaghanon sa mga miyembro sa Simbahan.

Si Sidney Rigdon naordinahan nga usa ka ministro nga Baptist niadtong 1821. Sa wala madugay human niana, mipasakop siya sa kalihokan sa Reformed Baptist ni Alexander Campbell. Kadtong misunod ni Campbell sa katapusan gitawag nga mga Disipulo ni Kristo o mga Campbellite, ug matinguhaon silang nangita alang sa pagpahiuli sa Kristiyanismo sa Bag-ong Tugon. Nakabaton si Sidney Rigdon og reputasyon isip impluwensyal nga tigsangyaw nga Reformed Baptist sa Mentor, Ohio, ug sa naglibut nga mga komunidad, lakip na sa Kirtland. Ang pasalig ni Sidney ngadto sa usa ka pagpahiuli sa Kristiyanismo sa Bag-ong Tugon miandam kaniya ug sa iyang mga sumusunod sa pagpaminaw og maayo sa mensahe nga gidala sa mga misyonaryo gikan sa New York.

Gitawag sa Ginoo si Sidney Rigdon, usa ka bag-o pa lang nga kinabig gikan sa Ohio, nga “mosulat alang kang [Joseph]” samtang gihubad niya ang Biblia (D&P 35:20).

Sa dihang nakadawat si Sidney Rigdon og kopya sa Basahon ni Mormon gikan sa mga misyonaryo, misugod siya sa tinuoray nga pagtuon niini. Ang iyang anak nga lalaki namulong human niana nga si Sidney labihan nga nalambigit sa pagbasa sa Basahon ni Mormon nga “maglisud na gani siya sa pagbutang niini og dugay aron mokaon. Nagpadayon siya sa pagbasa niini sa gabii ug sa adlaw hangtud nga nahuman niya kini pagbasa ug dayon naghunahuna ug namalandong siya niini” (John W. Rigdon, “Lecture on the Early History of the Mormon Church” [1906], 18, Church History Library, Salt Lake City; ang capitalization ug punctuation gi-standardize). Sa dihang nakumbinser siya bahin sa katinuod sa gipahiuli nga ebanghelyo ni Jesukristo, miingon si Sidney ngadto sa iyang asawa, nga si Phebe, “‘Akong Minahal misunod ka kanako sa kakabus, andam ka ba gihapong mobuhat sa samang butang[?]’” Mitubag siya, “Gitimbang-timbang nako kanang butanga, namalandong ko sa mga kahimtang kon asa kita mahimutang, akong gikwenta ang bugti, ug hingpit nang natagbaw nga mosunod kanimo. [O]o, ako kining tinguha nga buhaton ang kabubut-on sa Dios, sa kinabuhi man o sa kamatayon” (sa The Joseph Smith Papers, Documents, Volume 1: July 1828–June 1831, 213, note 91).

Nasuko sa pagkakabig nila ni Sidney ug Phebe ngadto sa bag-ong napahiuli nga Simbahan, daghang sakop sa kanhi kongregasyon ni Sidney nga mga Reformed Baptist kinsa wala maapil niadtong midawat sa mensahe sa mga misyonaryo mibalibad nga mobalhin ang mga Rigdon ngadto sa bag-ong balay nga ilang gitukod alang kanila ug gusto nga wala na silay labut kanila. Kay nawad-an man og gigikanan sa ilang kinitaan, panimalay, ug daghan sa ilang mga higala ug mga kaubanan, gibalhin nila ni Sidney ug Phebe ang ilang pamilya ngadto sa Kirtland aron mopuyo uban sa laing bag-o pa lang nga nabunyagan nga mga miyembro sa Simbahan.

Doktrina ug mga Pakigsaad 35

Ang Ginoo mitawag ni Sidney Rigdon sa mas dako nga buluhaton

Basaha ang Doktrina ug mga Pakigsaad 35:1–6, nga mangita sa unsay nahibaloan sa Ginoo mahitungod ni Sidney Rigdon ug sa unsay Iyang giingon nga Iyang buhaton alang kaniya.

Doktrina ug mga Pakigsaad 35:2. “Nahiusa ngari kanako sama nga Ako nahiusa diha sa Amahan”

Ang Ginoo wala magtudlo nga Siya ug ang Langitnong Amahan mao ra ang susamang tawo sa dihang miingon Siya, “Ako nahiusa diha sa Amahan, ingon nga ang Amahan nahiusa ngari kanako” (D&P 35:2). Kondili, kini nga tudling miklaro nga ang Langitnong Amahan ug ang Iyang Anak, nga si Jesukristo, nagkahiusa sa katuyoan ug nakabaton sa samang kinaiya, kahingpitan, ug mga hiyas. Gidapit Nila ang tinuod nga mga sumusunod nga mahimong usa uban Kanila. Si Elder D. Todd Christofferson sa Korum sa Napulog Duha ka mga Apostoles mipasabut kon sa unsang paagi kita mahimong “usa” uban sa Langitnong Amahan ug sa Iyang Anak:

“Si Jesus nakakab-ot sa hingpit nga panaghiusa ngadto sa Amahan pinaagi sa pagtugyan sa Iyang kaugalingon, sa lawas ug sa espiritu, ngadto sa kabubut-on sa Amahan. Ang Iyang pangalagad kanunay nga tataw nga nakapokus tungod kay wala siyay mga hunahuna o mga tinguha nga wala mahiuyon sa Amahan . Nagpasabut sa Iyang Amahan, si Jesus miingon, ‘Sa kanunay ginabuhat ko man ang makapahimuot kaniya’ (Juan 8:29). …

“Sa pagkatinuod dili kita mahiusa sa Dios ug ni Kristo hangtud nga atong himoon ang Ilang kabubut-on ug kagustohan nga maoy atong pinakadakong tinguha. Ang ingon ka pagkamanunuton dili mahitabo sa usa ka adlaw, apan pinaagi sa Balaang Espiritu, ang Ginoo maoy motudlo kanato kon kita mouyon hangtud sa pagdagan sa panahon, mamahimong tukma ang pag-ingon nga Siya anaa kanato ingon nga ang Amahan anaa Kaniya. Usahay ako mahadlok nga maghunahuna kon unsa ang gikinahanglan, apan ako nasayud nga niini lang nga hingpit nga panaghiusa nga ang hingpit nga kalipay mahimong makit-an. Mapasalamaton ko lapas pa sa mapahayag nga gidapit ko nga mahimong usa uban niadtong balaang mga binuhat nga akong gitahud ug gisimba isip akong Langitnong Amahan ug Manunubos” (“Aron Nga Sila Mausa Ngari Kanato,” Liahona, Nob. 2002, 72–73).

Doktrina ug mga Pakigsaad 35:3. “Ako … nag-andam kanimo alang sa mahinungdanon nga buhat”

Gisultihan sa Ginoo si Sidney Rigdon nga Siya “nagtan-aw diha” kaniya ug sa iyang mga buhat ug nakadungog sa iyang mga pag-ampo (D&P 35:3). Wala lamang nahibalo ang Ginoo bahin ni Sidney, sa iyang kasinatian, ug sa iyang buhat isip ministro nga Protestante, apan nasayud Siya sa dakong potensyal ni Sidney. Miingon usab ang Ginoo nga Iyang giandam si Sidney Rigdon alang sa “mahinungdanon nga buhat” kay sa buhat nga iya nang nahimo (D&P 35:3). Kining “mahinungdanon nga buhat” naglakip sa pagtabang sa uban nga makadawat og bunyag ug gasa sa Espiritu Santo pinaagi sa tukma nga awtoridad ug sa ingon moabli sa ganghaan sa pagdawat sa kahingpitan sa ebanghelyo ni Jesukristo (tan-awa sa D&P 35:5–6). Sama sa Iyang gibuhat kang Sidney Rigdon, ang Ginoo mohatag og mga oportunidad ug mga kasinatian nga moandam kanato aron makatuman sa “mahinungdanon nga buhat” nga Iyang gitawag nga atong himoon.

Human mipakigbahin og mga kasinatian gikan sa iyang kinabuhi, si Presidente Henry B. Eyring sa Unang Kapangulohan mipamatuod: “Ang inyong kinabuhi gibantayan gayud og maayo, sama kanako. Ang Ginoo nasayud og unsay Iyang gusto nga angay ninyong buhaton ug unsay angay ninyong masayran sa pagbuhat niini. Siya maloloy-on ug Siya nakahibalo sa tanan. Busa ikaw makahimo uban sa pagsalig sa pagpaabut nga Siya nag-andam og mga kahigayunan alang kanimo nga makakat-on alang sa serbisyo nga imong ihatag. Dili kamo hingpit nga makaila niadtong mga kahigayunan, sama sa nahitabo kanako. Apan kon inyong ibutang ang espirituhanong mga butang og una sa inyong kinabuhi kamo mapanalanginang mobati nga gigiyahan ngadto sa siguro nga pagkat-on, ug kamo maagni sa pagkugi pa gayud og maayo. Inyong mahibaloan sa dili madugay nga ang inyong gahum sa pagserbisyo milambo, ug kamo magmapasalamaton” (“Education for Real Life” Ensign, Okt. 2002, 18–19).

Kanus-a ka mibati nga ang Ginoo miandam kanimo alang sa mga calling, mga buluhaton, o mahinungdanong mga panghitabo sa imong kinabuhi?

Doktrina ug mga Pakigsaad 35:4–6. Sama ni Juan Bautista, si Sidney Rigdon “gipadala … sa pag-andam sa agianan”

Sama kang Juan Bautista nga miandam sa agianan alang kang Jesukristo, ang buhat nga gipahigayon ni Sidney Rigdon isip usa ka ministro nga Reformed Baptist miandam sa agianan alang sa pagsangyaw sa gipahiuli nga ebanghelyo.

Gitandi sa Ginoo ang buhat ni Sidney Rigdon isip usa ka ministro nga Protestante ngadto nianang kang Juan Bautista sa Bag-ong Tugon (tan-awa sa D&P 35:4). Pinaagi sa ilang pangalagad, kining duha ka indibidwal miandam sa mga tawo nga maminaw ug modawat sa kahingpitan sa ebanghelyo ni Jesukristo. Si Presidente Joseph Fielding Smith (1876–1972) mipasabut kon giunsa pag-andam ni Sidney Rigdon ang agianan alang sa uban nga modawat sa mensahe sa gipahiuli nga ebanghelyo: “Kinahanglan gayud kining hinumduman nga dunay daghang lig-on, intelihente nga kalalakin-an nga nahimong mga lider sa Simbahan ang napundok ni Sidney Rigdon, inubanan sa tabang sa Ginoo, niining bahina sa yuta. … Busa, sa dihang sila si Parley P. Pratt, Ziba Peterson ug ang ilang mga kompanyon miabut sa Kirtland ilang nakita nga giandam na ang agianan alang kanila pinaagi sa pagsangyaw, tungod gayud ni Sidney Rigdon, mao nga dili kadto lisud nga butang alang niining mga misyonaryo ang pagkumbinser niini nga pundok bahin sa kamatuoran. Samtang nagsangyaw ug nagbunyag si Sidney pinaagi sa pag-unlod nga walay awtoridad, nga gipahibalo sa Ginoo kaniya diha niining pagpadayag, apan kining tanan miresulta sa maayo sa dihang miabut ang mensahe sa Ebanghelyo ngadto kanila. Kining mga tawhana wala lamang makumbinser ug maandam alang sa bunyag, apan anaa sa kahimtang diin ang Priesthood mahimong mahatag Kanila, ug nahitabo kini” (Church History and Modern Revelation [1953], 1:160).

Basaha ang Doktrina ug mga Pakigsaad 35:7–19, nga mangita sa unsay gitudlo sa Ginoo mahitungod sa mga milagro ug mahitungod niadtong Iyang gitawag sa Iyang buhat.

Doktrina ug mga Pakigsaad 35:8–11. Ang Ginoo naghimo og mga milagro sumala sa hugot nga pagtuo niadtong mituo Kaniya

Gitudloan sa Ginoo si Sidney Rigdon nga ang “mga milagro, mga timailhan, ug mga kahibulongan” gihatag agig tubag sa hugot nga pagtuo (D&P 35:8; itandi sa D&P 63:7–12). Importante nga hinumduman nga ang mga milagro ug mga kahibulongan “kinahanglang dili isipon isip pagtipas gikan sa ordinaryo nga paagi sa kinaiyahan sama sa mga pagpakita sa balaanon o espiritwal nga gahum. Dunay mas ubos nga balaod ang anaa sa matag kahimtang nga nalabwan sa aksyon sa mas taas” (Bible Dictionary, “Miracles”). Si Elder Dallin H. Oaks sa Korum sa Napulog Duha ka mga Apostoles mihulagway sa duha ka matang sa “tinuod nga mga milagro”:

“Una, ang mga milagro nga gibuhat pinaagi sa gahum sa priesthood anaa gayud kanunay sa tinuod nga Simbahan ni Jesukristo. Ang Basahon ni Mormon nagtudlo nga ang ‘Dios mihimo og usa ka paagi nga ang tawo, pinaagi sa hugot nga pagtuo, unta makabuhat og kahibulongan nga mga milagro’ (Mosiah 8:18). Ang ‘paagi’ nga gihatag mao ang gahum sa priesthood (tan-awa sa Santiago 5:14–15; D&P 42:43–48), ug kana nga gahum naghimo og mga milagro pinaagi sa hugot nga pagtuo (tan-awa sa Ether 12:12; Moro. 7:37). …

“Ang ikaduhang matang sa tinuod nga milagro mao ang milagro nga gihimo pinaagi sa gahum sa hugot nga pagtuo, nga dili piho nga mogamit sa gahum sa priesthood. Daghan niining mga milagro mahitabo diha sa atong Simbahan, sama sa pinaagi sa mga pag-ampo sa matinud-anong kababayen-an, ug daghan ang nahitabo sa gawas niini. Sama sa gitudlo ni Nephi, ang Dios ‘magpakita sa iyang kaugalingon ngadto sa tanan kinsa motuo kaniya, pinaagi sa gahum sa Espiritu Santo; oo, ngadto sa matag kanasuran, kaliwatan, pinulongan, ug mga katawhan, magbuhat ug gamhanan nga mga milagro, mga timailhan, ug mga katingalahan, taliwala sa mga katawhan sumala sa ilang hugot nga pagtuo’ (2 Ne. 26:13; tan-awa usab sa 1 Ne. 7:12; Santiago 5:15)” (“Miracles,” Ensign, Hunyo 2001, 8–9).

Si Elder Oaks mipasabut pa og dugang nganong ang ubang mga milagro mahimong dili mahitabo bisan kon igo pa ang atong hugot nga pagtuo: “Naghisgot na ko bahin sa mga milagro nga mahitabo. Kumusta man ang mahitungod sa mga milagro nga wala mahitabo? Kadaghanan kanato mihalad og mga pag-ampo nga wala matubag pinaagi sa milagro nga atong gihangyo nianang higayuna nga nagtinguha kita. Ang mga milagro dili kay igo lang nga pangayuon. … Ang kabubut-on sa Ginoo kanunay nga mopatigbabaw. Ang priesthood sa Dios dili mahimong gamiton aron mahimo ang usa ka milagro nga sukwahi sa kabubut-on sa Ginoo. Kinahanglan usab natong hinumduman nga bisan kon mahitabo ang usa ka milagro, dili kini mahitabo sa gitinguha nato nga panahon. Ang mga pagpadayag nagtudlo kanato nga ang milagrusong mga kasinatian mahitabo ‘diha sa iyang kaugalingon nga higayon, ug sa iyang kaugalingon nga paagi’ (D&P 88:68)” (“Miracles,” 9).

Doktrina ug mga Pakigsaad 35:13. “Ako nagtawag diha sa mahuyang nga mga butang sa kalibutan”

Ang “mahuyang nga mga butang sa kalibutan” (D&P 35:13) nagpasabut niadtong kinsa gikonsiderar nga huyang sa kalibutanong mga sumbanan sama sa impluwensya, katigayunan, ug edukasyon, apan gikonsiderar sa Ginoo nga adunay espiritwal nga kalig-on tungod kay sila maaghup, mapainubsanon, puno sa gugma, ug nagsalig diha sa kalig-on ug inspirasyon sa Dios. Si Presidente James E. Faust (1920–2007) sa Unang Kapangulohan mipasabut nganong gitawag sa Ginoo ang maong mga indibidwal sa pagtuman sa Iyang mahinungdanon nga buhat:

“Ang Ginoo adunay mahinungdanon nga buhat nga ipahimo sa matag usa kanato. Tingali maghunahuna kamo kon unsaon kini pagkahitabo. Mahimong mobati kamo nga walay butang nga espesyal o superyor mahitungod ninyo o sa inyong abilidad. …

“Ang Ginoo makahimo og talagsaong mga milagro pinaagi sa usa ka tawo nga adunay ordinaryo nga abilidad kinsa mapainubsanon, matinud-anon, ug kugihan nga moserbisyo sa Ginoo ug nagtinguha nga molambo. … Tungod kini kay ang Dios mao ang labing mahinungdanon nga tinubdan sa gahum” (“Acting for Ourselves and Not Being Acted Upon,” Ensign, Nob. 1995, 47).

Si Presidente Boyd K. Packer (1924–2015) sa Korum sa Napulog Duha ka mga Apostoles nagtudlo, “Ang buhat sa Simbahan karon gipahigayon sa ordinaryong mga lalaki ug mga babaye nga gitawag ug gipaluyohan sa pagpangulo, sa pagtudlo, ug sa pagpangalagad. Pinaagi sa gahum sa pagpadayag ug sa gasa sa Espiritu Santo kadtong mga gitawag gigiyahan aron makahibalo sa kabubut-on sa Ginoo” (“Gigiyahan saEspiritu Santo,” Liahona, Mayo 2011, 31).

Doktrina ug mga Pakigsaad 35:13. Unsa ang buot ipasabut sa “sa pag-ayag sa mga kanasuran pinaagi sa gahum sa Espiritu”?

Ingon nga ang mga lugas kinahanglang malahi gayud gikan sa tahup, ang mga sulugoon sa Ginoo ipadala aron sa “pag-ayag sa mga kanasuran” aron malahi ang mga kabus ug mga maaghup dinhi sa yuta ug masangyaw ang ebanghelyo ngadto kanila (tan-awa sa D&P 35:13, 15).

Ang pulong nga pag-ayag diha sa Doktrina ug mga Pakigsaad 35:13 nagpasabut sa buhat sa pag-ayag og mga lugas. Ang pag-ayag mao ang proseso diin ang lugas, sama sa trigo, ilahi gikan sa dagami ug tipasi niini. Ang mga lugas tipigan, ug ang dagami ug tipasi ilabay. Busa, ang “pag-ayag sa mga kanasuran” nagpasabut sa buhat sa pagsangyaw sa ebanghelyo aron ang mga kinabig mapundok isip mga lugas. (Pahinumdom: Sa miaging Iningles nga mga edisyon sa Doktrina ug mga Pakigsaad, ang D&P 35:13 migamit sa pulong nga thrash [paggiok] imbis nga thresh [pag-ayag]. Sa 2013 nga edisyon giusab ang pulong ngadto sa pag-ayag aron mapakita ang pulong sa orihinal nga pagpadayag.)

Doktrina ug mga Pakigsaad 35:14. “Ang ilang bukton mao ang akong bukton”

Gigamit sa Ginoo ang paghulagway sa gubat aron matabangan ang Iyang gitawag nga mga sulugoon nga makasabut kon unsaon Niya sila pagtabang nga “makig-away nga maisugon” (D&P 35:14), alang sa Iyang kawsa. Sama sa paggamit diha sa D&P 35:14, ang bukton nagpasabut sa gahum o kalig-on. Misaad ang Ginoo nga ang Iyang gahum ug kalig-on magauban niadtong Iyang gitawag sa pagtuman sa Iyang buhat. Dugang pa, gipasaligan sa Ginoo ang Iyang mga sulugoon nga Siya “ang ilang taming ug ang ilang kalasag” (D&P 35:14), buot ipasabut nga Siya modepensa ug mopanalipod kanila. Ang Ginoo usab “mobakus sa ilang mga bat-ang” (D&P 35:14). Kini nga mga pulong nagpasabut sa kustombre sa karaang Israel bahin sa pagpundok ug pagsiguro sa luag nga saput ubos sa bakus o bat-ang agig pagpangandam alang sa trabaho o gubat. Gamit kini nga paghulagway, misaad ang Ginoo sa pagtabang sa Iyang mga sulugoon sa pagpundok sa nagkatibulaag nga Israel pinaagi sa pagsangyaw sa ebanghelyo.

Si Presidente Thomas S. Monson nagtudlo nga ang Ginoo motabang kanato aron matuman ang buhat nga Iyang gipahimo kanato: “Pipila kaninyo mahimong may kinaiya nga maulawon o naghunahuna sa inyong mga kaugalingon nga dili sarang sa pagdawat sa usa ka calling. Hinumdumi nga kini nga trabaho dili lamang inyo ug ako. Trabaho kini sa Ginoo, ug kon kita anaa sa buluhaton sa Ginoo, may katungod kita sa panabang sa Ginoo. Hinumdumi nga ang Ginoo mohulma sa buko-buko aron maplastar ang palas-anon nga ibutang niini” (“Sa Pagkat-on, sa Pagbuhat, sa Pagkahimo,” Liahona, Nob. 2008, 62).

Sa unsang paagi nga ang mga kamatuoran nga gitudlo diha sa Doktrina ug mga Pakigsaad 35:13–14 makatabang kon mobati ka nga dili sarang nga moserbisyo sa Ginoo?

Doktrina ug mga Pakigsaad 35:17. “Diha sa iyang ka kulang sa kaalam Ako nagpanalangin kaniya”

Gitawag sa Ginoo “[ang] mahuyang nga mga butang sa kalibutan” aron mohimo sa Iyang buhat (D&P 35:13), lakip na ni Joseph Smith. Ang paghubad sa Basahon ni Mormon naghulagway sa usa ka paagi diin gipanalanginan sa Ginoo si Joseph diha sa iyang kahuyang. Sa hinapus nga bahin sa iyang kinabuhi, si Emma Smith (1804–1879) mipamatuod:

“Si Joseph Smith [sa batan-on pa] … dili makasulat ni makadiktar og klaro ug maayong pagkahan-ay nga sulat; unsa pa kaha ang pagdiktar sa usa ka libro sama sa Basahon ni Mormon. Ug, bisan ako aktibo nga partisipante sa mga talan-awon nga nahitabo, ug anaa didto atol sa paghubad sa mga palid, ug nasayud sa mga butang ingon nga kini nahitabo, talagsaon kini kanako, ‘usa ka kahibulongan ug katingalahan,’ ingon man ni bisan kinsa. …

“Akong nahibaloan nga ang Basahon ni Mormon naggikan sa balaanong tinubdan—ako wala gayud magduda bisan gamay sa katinuod niini. Natagbaw ko nga walay tawo nga makadiktar sa mga sinulat diha sa manuskrito gawas kon siya dinasig; tungod kay, sa dihang [ako] nagsilbing iyang tigsulat, si [Joseph] modiktar ngari kanako matag karon ug unya; ug inigbalik human og kaon, o human sa mga pagkabalda, mobalik siya kon diin siya mohunong, nga dili magtan-aw sa manuskrito o ipabasa ang bisan asa nga bahin niini ngadto kaniya. Usa kini ka naandang butang nga iyang himoon. Dili kadto mahitabo nga ang usa ka maalamon nga tawo makahimo niini; ug, alang sa usa nga hilabihan ka walay alamag ug walay nakat-unan sama niya, imposible gayud kaayo kadto” (“Last Testimony of Sister Emma,” The Saints’ Herald, Okt. 1, 1879, 290).

Doktrina ug mga Pakigsaad 35:18. “[Ang] mga yawe sa misteryo”

“[Ang] mga yawe sa misteryo niadto nga mga butang nga nasilyohan” (D&P 35:18) nagpasabut sa balaanong kahayag ug kahibalo nga mahibaloan lamang pinaagi sa pagpadayag. Gihuptan ni Joseph Smith ang mga yawe sa priesthood, nga mitugot niya nga makadawat, pinaagi sa Espiritu, sa balaanong mga kamatuoran nga gitago sa Dios gikan sa kalibutan (tan-awa sa D&P 84:19). Si Propeta Joseph Smith (1805–1844) namahayag:

“[Ang Melchizedek Priesthood] mao ang paagi diin ang tanang kahibalo, doktrina, ang plano sa kaluwasan, ug ang tanang importante nga butang ipadayag gikan sa langit. …

“… Mao kini ang paagi diin ang Makagagahum nagsugod sa pagpadayag sa Iyang himaya sa sinugdanan sa paglalang niini nga yuta, ug pinaagi niini diin Siya mopadayon sa pagpadayag sa Iyang kaugalingon ngadto sa mga anak sa tawo hangtud karon, ug pinaagi niini Siya mopaila sa Iyang mga katuyoan hangtud sa katapusan sa panahon” (Mga Pagtulun-an sa mga Presidente sa Simbahan: Joseph Smith [2007], 127–28).

Basaha ang Doktrina ug mga Pakigsaad 35:20–27, nga mangita sa dugang nga mga sugo ug tambag nga gihatag sa Ginoo ngadto ni Sidney Rigdon.

Doktrina ug mga Pakigsaad 35:20. “Ikaw mosulat alang kaniya”

Si John Whitmer, kinsa miserbisyo isip tigsulat ngadto kang Propeta Joseph Smith atol sa paghubad sa Biblia, gitawag og misyon aron mosangyaw (tan-awa sa D&P 30:9–11). Nianang samang higayon, nabunyagan si Sidney Rigdon ug, human niana, maoy nahimong nag-unang tigsulat alang niining sagradong buhat. Agig tubag ngadto sa instruksyon diha sa pagpadayag nga narekord diha sa Doktrina ug mga Pakigsaad 35, daling gisugdan ni Sidney ang pagsulat alang sa Propeta samtang gidiktar ni Joseph ang taas nga dinasig nga hubad sa Genesis 5:22–24 (sama sa narekord diha sa Moises 6:26–8:4; tan-awa sa The Joseph Smith Papers, Documents, Volume 1: July 1828–June 1831, 223, note 147).

Gisulat ni Joseph Smith ang mosunod sulod sa King James Version sa Biblia nga iyang gigamit alang sa iyang dinasig nga paghubad: “Ang Basahon sa mga Judeo Ug ang gipanag-iya ni Joseph Smith Junior ug Gipalit ni Oliver Cowdery ika-8 sa Oktubre 1829, sa Egbert Grandins Book Store Palmyra Wayne County New York Presyo $3.75 Pagkabalaan ngadto sa Ginoo.”

Namahayag ang Ginoo nga ang paghubad sa Biblia “ihatag, gani ingon nga sila anaa sa akong kaugalingon nga dughan” (D&P 35:20). Si Propeta Joseph Smith wala “mohubad” sa Biblia diha sa tradisyunal nga kahulugan sa pulong. Wala siya magtuon og karaang mga pinulongan aron makahimo og bag-ong paghubad ngadto sa Iningles. Hinoon, nakadawat siya sa espiritwal nga gasa nga mohimo og dinasig nga mga kausaban. Samtang ang pipila sa mga kausaban nga gihimo sa Propeta ngadto sa teksto mipahiuli sa orihinal nga biblikanhong mga tudling nga nangawala, laing mga kausaban ang nakorihian, napalambo, ug misuplemento sa unsay anaa na nga biblikanhong teksto. Sa kinatibuk-an, pinaagi sa pagpadayag, giusab ni Joseph ang mga tudling aron mapakita ang kahulugan nga gitinguha sa Dios. Ang mga kausaban nga makita nato karon diha sa Hubad ni Joseph Smith sa Biblia mipahiuli sa yano ug bililhon nga mga kamatuoran ug mga pakigsaad nga kausa makita diha sa Biblia (tan-awa sa 1 Nephi 13:28–36). Gipasabut sa Ginoo nga ang dinasig nga paghubad mas daghan pa ang mabuhat kay sa paghatag og impormasyon o gani paglig-on alang sa mga Santos. Miingon siya nga gihatag usab kini alang “sa kaluwasan sa akong kaugalingon nga pinili” (D&P 35:20). Dugang pa, ang pipila ka pagpadayag nga anaa sa Doktrina ug mga Pakigsaad nadawat isip direkta nga resulta sa buhat sa paghubad ni Joseph (tan-awa sa D&P 76; 77; 91). Ang dinasig nga paghubad sa Biblia dugang nga pagsaksi bahin sa balaanong calling ug pagpangalagad ni Propeta Joseph Smith.

Doktrina ug mga Pakigsaad 35:22. “Pabilin uban kaniya, … ayaw siya og isalikway”

Gituman ni Sidney Rigdon ang sugo sa Ginoo nga “pabilin uban” ni Propeta Joseph Smith (D&P 35:22) hangtud sa pagkamartir sa Propeta. Siya lamang ang magtatambag sa Unang Kapangulohan nga miserbisyo atol sa tibuok administrasyon sa Propeta. Siya usab ang tigsulat sa pipila ka pagpadayag , ang uban niini nadawat nilang duha ni Joseph Smith (tan-awa sa D&P 40; 44; 71; 73; 76; 100). Gituman niya ang sugo nga “ayaw siya og isalikway” (D&P 35:22) sa dihang nakalahutay siya sa pagbutang og alkitran ug mga balahibo didto sa Hiram, Ohio, niadtong 1832 ug nag-antus didto sa Liberty Jail uban sa Propeta atol sa tingtugnaw sa 1838–39.

Doktrina ug mga Pakigsaad 35:24. “Ako makahimo sa pag-uyog sa kalangitan alang sa imong kaayohan”

Misaad ang Ginoo kang Sidney Rigdon nga Siya “makahimo sa pag-uyog sa kalangitan alang sa [iyang] kaayohan” (D&P 35:24). Usa ka kahulugan sa pag-uyog mao ang pagtaktak o pagpagawas og butang gikan sa usa ka suporta o sudlanan. Sa ingon, ang usa ka interpretasyon niini nga bersikulo mahimo nga kon ang kalangitan mouyog “alang sa [atong] kaayohan,” ang mga pagpadayag ug mga panalangin mapagawas ug mabu-bu ngari kanato.

Doktrina ug mga Pakigsaad 36: Dugang nga Makasaysayanong Background

Human nga nahimamat si Edward Partridge, miingon si Joseph Smith nga siya “usa ka sumbanan sa pagtahud, ug usa sa halangdon nga mga tawo sa Ginoo” (D&P 36, ulohan sa seksyon).

Gihulagway ni Propeta Joseph Smith si Edward Partridge isip “usa ka sumbanan sa pagtahud, ug usa sa halangdon nga mga tawo sa Ginoo” (sa Manuscript History of the Church, 1838–1856, vol. A-1, pahina 78). Si Edward usa ka malampusong negosyante gikan sa Painesville, Ohio, kinsa gitahud pag-ayo diha sa iyang komunidad. Siya ug ang iyang asawa, nga si Lydia, nakadungog sa gipahiuli nga ebanghelyo nga gitudlo nila ni Oliver Cowdery, Parley P. Pratt, ug sa ilang mga kompanyon. Sa wala madugay si Lydia nabunyagan, apan si Edward nagpabiling maduha-duhaon. Si Lydia misulat nga ang iyang bana “mituo og gamay apan kinahanglan niyang mobiyahe ngadto sa Estado sa New York ug makigkita sa Propeta” una pa siya matagbaw (istorya bahin ni Lydia Partridge, sa rekord sa genealogy ni Edward Partridge, 1878, 6, Church History Library, Siyudad sa Salt Lake). Mibiyahe si Edward uban ni Sidney Rigdon ngadto sa New York, nga miabut pagka-Disyembre 1830. Human makadungog kang Propeta Joseph Smith nga nagsangyaw, gipahayag ni Edward ang iyang pagtuo sa gipahiuli nga ebanghelyo ug miingon nga andam siya nga magpabunyag kon mobunyag niya ang Propeta. Sa wala madugay, gidiktar sa Propeta ang usa ka pagpadayag, nga narekord karon diha sa Doktrina ug mga Pakigsaad 36, alang kang Edward. Paglabay sa duha ka adlaw, niadtong Disyembre 11, 1830, gibunyagan ni Joseph Smith si Edward Partridge.

Doktrina ug mga Pakigsaad 36

Ang Ginoo mipasaylo sa mga sala ni Edward Partridge ug mitawag kaniya sa pagsangyaw sa ebanghelyo

Ikonsiderar ang mga panalangin nga imong nadawat pinaagi sa gasa sa Espiritu Santo. Basaha ang Doktrina ug mga Pakigsaad 36, nga mangita kon sa unsang paagi nga ang gasa sa Espiritu Santo motabang ni Edward Partridge nga matuman ang buhat nga gipahimo sa Ginoo kaniya.

Doktrina ug mga Pakigsaad 36:2. “Ako mopandong sa akong kamot diha kanimo pinaagi sa kamot sa akong sulugoon”

Sa Doktrina ug mga Pakigsaad 36:2, ang Ginoo miingon nga Siya “mopandong sa [Iyang] kamot diha” kang Edward Partridge pinaagi sa Iyang “sulugoon nga si Sidney Rigdon” ug mohatag kaniya sa gasa sa Espiritu Santo. Si Presidente Harold B. Lee (1899–1973) mipasabut niini nga bersikulo isip ehemplo sa paagi nga ang Ginoo mipakita sa Iyang gahum pinaagi sa Iyang mga sulugoon: “Ang Ginoo dinhi [sa D&P 36:2] nag-ingon nga kon usa sa iyang awtorisado nga mga sulugoon mopandong sa iyang mga kamot pinaagi sa awtoridad diha sa ulo sa usa ka tawo nga panalanginan, ingon og siya mismo ang nagpandong sa iyang kamot uban kanila aron mapahigayon kana nga ordinansa. Busa magsugod kita sa pagkakita kon giunsa niya pagpakita ang iyang gahum taliwala sa katawhan pinaagi sa iyang mga sulugoon kang kinsa Iyang gisalig ang mga yawe sa awtoridad” (Be Secure in the Gospel of Jesus Christ, Brigham Young University Speeches of the Year [Peb. 11, 1958], 6).

Doktrina ug mga Pakigsaad 36:2–3. “[Ang] malinawon nga mga butang sa gingharian”

Gisugo sa Ginoo si Edward Partridge sa pagsangyaw sa Iyang ebanghelyo, o “sa malinawon nga mga butang sa gingharian,” nga itudlo kaniya sa Espiritu Santo (tan-awa sa D&P 36:1–2). Si Elder M. Russell Ballard sa Korum sa Napulog Duha ka mga Apostoles mipasabut kon sa unsang paagi nga ang ebanghelyo ni Jesukristo makadala og kalinaw: “Ang kalinaw—ang tinuod nga kalinaw, nga mabati ninyo sa tinuod nga matang sa tibuok ninyong kalag—moabut lamang diha ug pinaagi sa hugot nga pagtuo kang Ginoong Jesukristo. Kon kanang bililhong kamatuoran madiskubrihan ug ang mga baruganan sa ebanghelyo masabtan ug gamiton, dakong kalinaw ang modagayday sa kasingkasing ug kalag sa mga anak sa atong Langitnong Amahan. Miingon ang Manluluwas pinaagi kang Joseph Smith, ‘Siya kinsa nagbuhat og mga buluhaton sa pagkamatarung makadawat sa iyang ganti , gani ang kalinaw niini nga kalibutan, ug kinabuhi nga dayon diha sa kalibutan nga umaabut’ (D&P 59:23)” (“The Peaceable Things of the Kingdom,” Ensign, Mayo 2002, 88).

Ngano kaha nga gikinahanglan man ang gasa sa Espiritu Santo sa pagtabang kanimo nga makakat-on “sa malinawon nga mga butang” sa gingharian sa Dios? Unsa ang pipila ka ehemplo sa mga baruganan sa ebanghelyo nga, sa dihang gituman, nakapanalangin kanimo og kalinaw?

Doktrina ug mga Pakigsaad 36:6. Unsay buot ipasabut sa “biya gikan sa kalayo, masilag bisan sa mga saput nga gibulingan sa unod”?

Ang mga Santos gisugo nga masilag “sa mga saput nga gibulingan sa unod” (D&P 36:6; tan-awa usab sa Judas 1:23; Pinadayag 3:4). Si Presidente Joseph Fielding Smith (1876–1972) mipasabut: “Kini simbolikanhon nga pinulongan, apan yano ra nga masabtan. Kini [usa kadautan] nga henerasyon, nga naglakaw diha sa espiritwal nga kangitngit, ug ang silot alang sa sala gihisgutan isip silot diha sa kalayo. Ang mga saput nga gibulingan sa unod mao ang mga saput nga nahugawan pinaagi sa mga gipangbuhat sa kalibutanon nga mga tinguha ug pagkadili masulundon ngadto sa mga sugo sa Ginoo. Gisugo kita nga ipabilin ang atong mga saput nga dili mabulingan gikan sa tanang sala, gikan sa matag gipangbuhat nga makapahugaw. Busa gisugo kita nga mogawas sa kalibutan sa pagkadautan ug isalikway ang mga butang niining kalibutana” (Church History and Modern Revelation, 1:163).

Doktrina ug mga Pakigsaad 39: Dugang nga Makasaysayanong Background

Sa dihang nagpundok ang mga Santos didto sa Fayette, New York, sa sayong bahin sa Enero 1831, alang sa ikatulong komperensya sa Simbahan, ilang gihisgutan ang sugo sa Ginoo alang kanila nga mobalhin ngadto sa Ohio (tan-awa sa D&P 37:3; 38:32). Usa ka ministro nga Methodist nga ginganlan og James Covel ang mahimong nakatambong niana nga komperensya ug pagkahuman nakig-istorya sa mga lider sa Simbahan. Morag ingon nga andam na siya nga makabig sa gipahiuli nga ebanghelyo. Sumala ni John Whitmer, si James Covel “mipakigsaad sa Ginoo nga motuman siya sa bisan unsa nga sugo nga ihatag sa Ginoo pinaagi sa iyang sulugoon nga si Joseph” (sa The Joseph Smith Papers, Documents, Volume 1: July 1828–June 1831, 233–34). Si Propeta Joseph Smith nakadawat og pagpadayag alang kang James Covel niadtong Enero 5, 1831.

Ang pinakaunang kopya sa pagpadayag nga narekord diha sa Doktrina ug mga Pakigsaad 39 nagpakita lamang nga usa kini ka pagpadayag nga gihatag alang sa usa ka tawo nga ginganlan og James. Ang namantalang kopya sa pagpadayag nga midugang sa ngalan sa tigdawat ngadto sa “James (C.,).” Sa 1835 nga edisyon sa Doktrina ug mga Pakigsaad, ang iyang ngalan nailhan isip “James Covill.” Sa 1981 nga edisyon sa Doktrina ug mga Pakigsaad, nailhan siya isip usa ka ministro nga Baptist. Hinoon, ang bag-ong pag-research nagpakita nga kini nga pagpadayag gihatag ngadto kang James Covel, kinsa usa ka ministro nga Methodist.

Doktrina ug mga Pakigsaad 39

Gisugo ni Jesukristo si James Covel nga magpabunyag ug motrabaho diha sa Iyang ubasan

Basaha ang Doktrina ug mga Pakigsaad 39:1–12, nga mangita sa unsay gipaabut sa Ginoo gikan niadtong nagtinguha nga mosunod Kaniya.

Doktrina ug mga Pakigsaad 39:5–6. “Siya nga modawat sa akong ebanghelyo modawat kanako”

Aron madawat si Jesukristo, ang usa ka tawo kinahanglan gayud nga andam nga motuo ug motuman sa Iyang ebanghelyo, nga naglakip sa paghinulsol, pagpabunyag, ug pagdawat sa gasa sa Espiritu Santo. Tungod kay nahimo man siya nga usa ka tigsangyaw nga Methodist sulod sa mga 40 ka tuig, tingali gibati ni James Covel nga nadawat na niya ang Manluluwas ug ang Iyang ebanghelyo. Bisan pa niana, ang mensahe sa Ginoo ngadto ni James Covel mao ang paghinulsol sa iyang mga sala ug magpabunyag ngadto sa Iyang gipahiuli nga Simbahan. Ang mensahe sa Ginoo mao ra gihapon karon. Bisan unsa pa man ang gipangangkon nga gituohan sa usa ka tawo o sa miaging bunyag ngadto sa laing Kristohanong denominasyon, ang Ginoo misugo sa katawhan bisan asa nga modawat Kaniya pinaagi sa pagdawat sa gipahiuli nga ebanghelyo, paghinulsol sa ilang mga sala, ug pagdawat sa bunyag gikan sa Iyang awtorisado nga mga sulugoon.

“Siya nga modawat sa akong ebanghelyo modawat kanako” (D&P 39:5).

Doktrina ug mga Pakigsaad 39:7–9. “Ang imong kasingkasing karon matarung diha sa akong atubangan”

Gipadayag sa Ginoo nga sa nangagi, nanglimbasug si James Covel sa garbo ug sa mga kabalaka sa kalibutan (tan-awa sa D&P 39:9). Hinoon, sa higayon nga nadawat ang pagpadayag nga narekord diha sa Doktrina ug mga Pakigsaad 39, ang iyang kasingkasing matarung diha sa atubangan sa Dios (tan-awa sa D&P 39:8). Si Elder Dallin H. Oaks sa Korum sa Napulog Duha ka mga Apostoles nagtudlo nga makabansay kita sa mga tinguha sa atong mga kasingkasing, nga mohimo sa atong kasingkasing nga matarung diha sa atubangan sa Dios:

“Kanus-a man nga ang atong kasingkasing matarung diha sa atubangan sa Dios? Ang atong kasingkasing matarung diha sa atubangan sa Dios kon tinud-anay kitang magtinguha kon unsay matarung, kon magtinguha kita sa unsay gitinguha sa Dios.

“Ang gihatag ngari kanato sa balaanong paagi nga gahum sa kabubut-on naghatag kanato og pagkontrol sa atong mga tinguha, apan mahimong mokabat kini og daghang katuigan aron atong masiguro nga ato kining gitinguha ug gibansay ngadto sa punto nga ang tanan sa kinatibuk-an matarung.

“Si Presidente Joseph F. Smith nagtudlo nga ang ‘pagbansay … sa atong mga tinguha importante gayud kaayo sa atong kalipay sa kinabuhi.’ (Gospel Doctrine, Salt Lake City: Deseret Book Co., 1939, p. 297.)

“Unsaon man nato pagbansay ang atong mga tinguha? Sugdan siguro nato, sa atong mga pagbati. Ang mga tinguha sa atong mga kasingkasing nakagamot na gayud ug mahinungdanon. Apan ang atong mga pagbati mas duol sa ibabaw ug mas sayon alang kanato nga mailhan ug maimpluwensyahan. …

“Aron makabaton og matarung nga mga tinguha, kinahanglan natong kontrolahon ang atong mga hunahuna ug makaangkon og tukma nga mga pagbati. Ang akong biyuda nga inahan nakasabut niana nga baruganan. ‘Pag-ampo mahitungod sa inyong mga pagbati,’ kasagaran siyang moingon. Gitudloan niya ang iyang tulo ka anak nga kinahanglan kaming mag-ampo aron makabaton sa hustong matang sa mga pagbati mahitungod sa among mga kasinatian—positibo o negatibo—ug mahitungod sa mga tawo nga among nailhan. Kon husto ang atong mga pagbati, mas posible nga makahimo kita og matarung nga mga aksyon ug sa pagbuhat alang sa husto nga mga rason” (“The Desires of Our Hearts,” Ensign, Hunyo 1986, 65).

Doktrina ug mga Pakigsaad 39:9. “Ikaw nagsalikway kanako sa daghan nga mga higayon tungod sa garbo”

Sa mata sa Ginoo, nanglimbasug si James Covel sa garbo ug misalikway Kaniya sa nangagi. Si Presidente Ezra Taft Benson (1899–1994) mipasabut kon sa unsang paagi nga ang garbo maoy makapugong kanato sa pagdawat sa pulong sa Dios ug sa awtoridad diha sa atong kinabuhi:

“Ang mga mapahitas-on dili makadawat nga ang awtoridad sa Dios ang modumala sa ilang kinabuhi. (Tan-awa sa Hel. 12:6.) Ang ilang panglantaw sa kamatuoran sukwahi sa talagsaong kahibalo sa Dios, ang ilang mga abilidad batok sa gahum sa priesthood sa Dios, ang ilang mga nahimo gitan-aw nga batok sa Iyang talagsaong mga buhat.

“… Ang mga mapahitas-on nanghinaut nga ang Dios mouyon kanila. Dili sila ganahang mousab sa ilang mga opinyon aron mauyon sa Dios. …

“Ang mapahitas-on dili sayon nga modawat og tambag o pagkorihir. (Tan-awa sa Prov. 15:10; Amos 5:10.) Ang pag-una og depensa sa kaugalingon ilang gamiton aron sa pagpangatarungan sa ilang mga kahuyang ug kapakyasan. (Tan-awa sa Mat. 3:9; Juan 6:30–59.) …

“… Ang mga mapahitas-on dili sayon tudloan. (Tan-awa sa 1 Ne. 15:3, 7–11.) Dili nila usabon ang ilang hunahuna aron dawaton ang mga kamatuoran, para nila ang pagbuhat niini nagpasabut nga sila nasayop” (Mga Pagtulun-an sa mga Presidente sa Simbahan: Ezra Taft Benson [2014], 280, 284–85).

Doktrina ug mga Pakigsaad 39:12. “Ang gahum magpabilin diha kanimo … ug Ako mag-uban kanimo”

Misaad ang Ginoo kang James Covel nga kon magpabunyag siya, makadawat siya og gahum, dakong pagtuo, ug suporta gikan sa Dios. Si Elder Joseph B. Wirthlin (1917–2008) sa Korum sa Napulog Duha ka mga Apostoles mipasabut kon sa unsang paagi nga ang saad sa Ginoo ngadto kang James Covel diha sa Doktrina ug mga Pakigsaad 39:12 magamit sa mga miyembro sa Simbahan karon: “Unsay gisulti dinhi ngadto kang James [Covel] niini nga dispensasyon, sa dihang ang Simbahan siyam pa lang ka bulan, magamit uban sa parehong pwersa ngari kanato karon—ug usa ka talagsaon ug gamhanang pagbalik sa saad nga gihimo sa Manluluwas atol sa iyang pagpangalagad dinhi sa yuta. Ang iyang panumpa nga anaa siya sa atong taliwala kon duha o tulo magpundok diha sa iyang ngalan usa ka talagsaong pamahayag sa iyang walay kinutuban nga gugma alang sa matag usa kanato ug mipasalig kanato sa iyang presensya diha sa atong mga tulumanon sa simbahan, diha sa atong indibidwal nga kinabuhi, ug diha sa suod nga pundok sa atong mga pamilya” (“There Am I in the Midst of Them,” Ensign, Mayo 1976, 55).

Sa unsang mga paagi nga imong nakita ang saad sa Ginoo nga magauban kanato nga natuman diha sa kaugalingon nimong kinabuhi?

Basaha ang Doktrina ug mga Pakigsaad 39:13–24, nga mangita sa mga sugo nga gihatag sa Ginoo ngadto ni James Covel mahimong lisud alang kaniya sa pagsunod.

Doktrina ug mga Pakigsaad 39:21. “Ang adlaw o ang takna walay tawo nga nasayud”

Niadtong Enero 1831, gibalik sa Ginoo ang unsay Iyang gitudlo sa Iyang mga disipulo didto sa Jerusalem—nga walay tawo nga nasayud sa takna sa Iyang Ikaduhang Pag-anhi (tan-awa sa D&P 39:21; tan-awa usab sa Mateo 24:36). Si Elder M. Russell Ballard sa Korum sa Napulog Duha ka mga Apostoles namahayag:

“Gitawag ko isip usa sa mga Apostoles aron mahimong linain nga saksi ni Kristo niining makapahinam, puno sa pagsulay nga mga panahon, ug wala ko masayud kon kanus-a Siya moanhi pag-usab. Kutob sa akong nahibaloan, walay usa sa akong mga kaigsoonan sa Korum sa Napulog Duha ka mga Apostoles o bisan ang Unang Kapangulohan ang nasayud. Ug mapainubsanon akong mosugyot nga kon wala kami masayud, nan walay usa nga nasayud, bisan unsa pa man ka mapugsanon ang ilang mga argumento o unsa ka resonable ang ilang mga pagkalkulo. Ang Manluluwas miingon nga ‘apan niana nga adlaw, ug takna, walay usa nga nasayud; wala, bisan ang mga anghel sa Dios sa langit, apan ang akong Amahan lamang’ (JST, Mat. 1:40).

“Mituo ko nga kon moingon ang Ginoo nga ‘walay usa’ nga nasayud, nagpasabut gayud Siya nga walay usa ka tawo nga nasayud” (“When Shall These Things Be?” Ensign, Dis. 1996, 56).

Doktrina ug mga Pakigsaad 40: Dugang nga Makasaysayanong Background

Niadtong Enero 6, 1831, sa adlaw human nadawat ang narekord nga pagpadayag diha sa Doktrina ug mga Pakigsaad 39, si James Covel daling mibiya sa Fayette, New York. Nianang sama nga adlaw mihatag ang Ginoo kang Propeta Joseph Smith ug ni Sidney Rigdon sa pagpadayag nga narekord diha sa Doktrina ug mga Pakigsaad 40, nga “nagpasabut nganong si [James Covel] wala motuman sa pulong.” Si Propeta Joseph Smith sa wala madugay miingon nga si James “misalikway sa pulong sa Ginoo, ug mibalik sa daan niya nga mga baruganan ug mga katawhan” (sa The Joseph Smith Papers, Documents, Volume 1: July 1828–June 1831, 237).

Doktrina ug mga Pakigsaad 40

Gipadayag sa Ginoo nganong gisalikway ni James Covel ang Iyang mga pulong

Basaha ang Doktrina ug mga Pakigsaad 40, nga mangita sa mga rason nganong wala motuman si James Covel sa pulong sa Ginoo.

Doktrina ug mga Pakigsaad 40:2. “Ang kahadlok sa pagpanggukod ug ang mga kabalaka sa kalibutan nakaingon kaniya sa pagsalikway sa pulong”

Gamit ang pinulongan nga susama nianang sa Iyang sambingay sa magpupugas diha sa Bag-ong Tugon, gihulagway sa Ginoo si James Covel nga “midawat sa pulong uban ang kalipay,” apan “ang kahadlok sa pagpanggukod ug ang mga kabalaka sa kalibutan nakaingon kaniya sa pagsalikway sa pulong” (D&P 40:2; tan-awa sa Mateo 13:20–22). Gipadayag sa Ginoo nga ang kasingkasing ni James “ matarung diha sa [Iyang] atubangan” (D&P 40:1; mga italic gidugang) ug nga ang pulong tinud-anay nga nakagamot diha sa iyang kasingkasing, apan bisan pa niana mipili siya sa paglapas sa iyang pakigsaad ngadto sa Ginoo (tan-awa sa D&P 40:3).

Sa panahon nga nakadungog si James Covel sa gipahiuli nga ebanghelyo ni Jesukristo, mga 60 anyos na siya. Usa siya ka prominente nga lider sa Methodist reform movement ug nakaugmad og ekstensibo nga mga koneksyon sa sobra sa 40 anyos niyang trabaho isip tigbiyahian nga ministro. Dugang pa, duha sa iyang mga anak mga tigsangyaw nga Methodist. Ang pagkahimong miyembro sa Simbahan ug pagbalhin ngadto sa Ohio aron matuman ang tawag sa Ginoo sa pagsangyaw sa ebanghelyo magkinahanglan unta nga biyaan niya ang iyang panimalay didto sa New York ug pagputol sa iyang mga koneksyon sa kanhi niya nga mga kauban. Ang pagsakripisyo nga gikinahanglan sa Ginoo klaro nga sobra ra kaayo alang kaniya sa pagdawat. Ang kaaway mitintal kaniya, ug ang kahadlok sa pagpanggukod ug personal nga mawala kaniya maoy nakaingon nga iyang gisalikway ang pulong sa Dios.

Si Presidente Thomas S. Monson miawhag sa mga miyembro sa Simbahan nga makabaton og kaisug kon mag-atubang og pagtamay ug pagsupak: “Siyempre, mag-atubang kita og kahadlok, makasinati og pagbugal-bugal, ug makasugat og pagsupak. Magbaton kita og kaisug sa pagbatok sa unsay gipili sa kadaghanan, sa kaisug sa pagbarug sa prinsipyo. Kaisug, dili pagkompromiso, maoy makahatag og pahiyum sa pagtugot sa Dios. Ang kaisug mahimong usa ka buhi ug madanihong hiyas kon isipon kini dili lamang isip usa ka pagkaandam nga mamatay nga madungganon, pero isip usa usab ka determinasyon nga magpakabuhing matarung. Ang usa ka talawan sa moral mao ang usa ka tawo kinsa mahadlok sa pagbuhat unsa sa iyang hunahuna maoy sakto tungod kay ang uban dili uyon niini o mangatawa. Hinumdumi nga ang tanang mga tawo dunay ilang mga kahadlok, pero kadtong moatubang sa ilang mga kahadlok uban sa kaligdong mopakita usab og kaisug” (“Ang Tawag alang sa Kaisug,” Liahona, Mayo 2004, 55–56).

Si Elder Dale G. Renlund sa Korum sa Napulog Duha ka mga Apostoles misaysay og usa ka kasinatian diin ang mga kabalaka sa kalibutan makapahimo unta kaniya nga kaswal sa iyang mga paningkamot sa pagtuman sa mga sugo:

“Niadtong 1980 mibalhin kami isip pamilya sa atbang sa ospital diin ako nagbansay ug nagtrabaho. Nagtrabaho ko kada adlaw, lakip ang mga Dominggo. Kon makahuman ako sa akong trabaho sa Dominggo pagka alas 2:00 sa hapon, makakuyog ako sa akong asawa ug anak nga babaye ug moadto sa simbahan alang sa mga miting nga magsugod og alas 2:30.

“Usa niana ka Dominggo sa hinapos sa akong unang tuig sa pagbansay, nasayud ko nga malagmit mahuman ako pagka alas 2:00. Bisan pa niana, nakaamgo ako, nga kon mopabilin ako sa ospital og dugay-dugay, ang akong asawa ug anak molakaw ra nga wala ako. Dayon mopauli ako ug matulog. Nagmahay ako nga mosulti nga ako gayud kana nga nabuhat. Naghulat ako hangtud nag alas 2:15, hinay nga milakaw pauli, ug mihigda sa sofa, naglaum nga makatulog. Pero wala ako makatulog. Naglibog ako ug nabalaka. Kanunay gyud unta kong gusto nga moadto sa simbahan. Natingala ko ngano nga karong adlawa, ang kainit sa akong pagpamatuod ug kadasig nga akong gibati sa una nawala.

“Wala kinahanglana nga maghunahuna pa ko og dugay. Tungod sa akong iskedyul, ako wala nay pagtagad sa akong mga pag-ampo ug pagtuon sa kasulatan. Mobangon ko usa ka buntag, mag-ampo, ug moadto sa trabaho. Kasagaran ang adlaw mahimong gabii ug mahimong adlaw na usab una pa ako mopauli og dugay pagka sunod gabii. Dayon kapoyon ko pag-ayo nga makatulog ko nga dili makaampo o magbasa sa mga kasulatan. Pagkasunod buntag ang proseso magsugod na usab. Ang problema mao nga wala na ko maghimo sa unang mga butang nga kinahanglan nakong buhaton aron pagpadayon sa akong dako og kausaban nga kasingkasing nga mahimong bato.

“Mibangon ko, miluhod, ug nangamuyo sa Dios alang sa kapasayloan. Misaad ko sa akong Langitnong Amahan nga mag-usab na ko. Pagkasunod adlaw nagdala ko og Basahon ni Mormon sa ospital. Sa akong lista sa “angay buhaton” nianang adlawa, ug kada adlaw sukad niadto, dunay duha ka mga butang: mag-ampo labing memos buntag ug gabii ug magbasa sa mga kasulatan. Usahay ang tungang gabii moabut, ug magdali dayon ko pagpangita og pribadong dapit aron mag-ampo. Sa ubang mga adlaw ang akong pagtuon sa kasulatan mubo ra. Misaad usab ako sa Langitnong Amahan nga kanunay kong maninguha nga moadto sa simbahan, bisan makapalta sa ubang miting. Sulod sa pipila ka mga semana, ang kadasig mibalik ug ang kainit sa pagpamatuod nagdilaab na usab pag-ayo. Misaad ko nga dili na gayud ko mahulog ngadto sa laang sa espirituhanong kamatayon sa pagka walay pagtagad kalabut niining daw gamay nga mga buhat ug tungod niana nakapapiligro sa mga butang nga adunay mahangturon nga kinaiyahan, dili igsapayan ang mga kahimtang” (“Pagpatunhay sa Dako og Kausaban nga Kasingkasing,” Liahona, Nob. 2009, 98–99).

Sa unsang paagi nga ang kasinatian ni Elder Renlund naghulagway kon sa unsang paagi nga ang mga kabalaka sa kalibutan makapugong sa usa ka tawo nga matinud-anong mosunod sa ebanghelyo? Unsa man ang nakatabang kanimo aron mabuntog ang “kahadlok sa pagpanggukod ug ang mga kabalaka sa kalibutan” (D&P 40:2) aron magpabiling matinud-anon sa Dios ug sa imong mga pakigsaad?

Itandi ang mga paagi sa pagtubag nila ni Sidney Rigdon ug James Covel sa mensahe sa gipahiuli nga ebanghelyo. Hunahunaa ang imong kaugalingong mga desisyon ug kon kini naimpluwensyahan ba sa mga kabalaka sa kalibutan. Ikonsiderar kon unsa nga mga kausaban ang tingali kinahanglan nimong himoon.