Kapitulo 23
Doktrina ug mga Pakigsaad 63
Pasiuna ug Timeline
Niadtong ting-init sa 1831, si Propeta Joseph Smith nagdumala sa pagpahinungod sa yuta sa Independence, Missouri, diin ang mga Santos motukod sa Zion. Sa dihang ang Propeta mibalik ngadto sa Kirtland, Ohio, kaniadtong Agosto 27, ang mga Santos matinguhaong makahibalo pa mahitungod niining bag-o nga yuta ug ang ilang tahas sa pagpahimutang sa Zion.
Sa kaalaot, sa panahon nga ang Propeta wala diha, pipila sa mga miyembro sa Simbahan sa Kirtland misupak sa mga sugo sa Ginoo ug mibuhat og seryoso nga mga sala. Niadtong Agosto 30, 1831, nadawat sa Propeta ang pagpadayag nga gi-rekord diha sa Doktrina ug mga Pakigsaad 63, diin ang Ginoo mipasidaan sa mga Santos mahitungod sa mga sangputanan sa pagkadautan ug sa rebelyon. Misulti usab ang Ginoo ngadto sa mga Santos kon unsaon pag-andam ang pagpundok ngadto sa Zion ug ang pag-andam alang sa Iyang Ikaduhang Pag-anhi.
-
Hulyo 14, 1831Si Joseph Smith ug ang uban miabut sa Independence, Missouri.
-
Agosto 2–3, 1831Ang yuta sa Jackson County, Missouri gipahinungod alang sa pagtukod sa Zion, ug usa ka dapit alang sa templo gipahinungod didto sa Independence, Missouri.
-
Agosto 27, 1831Mibalik si Joseph Smith ug Oliver Cowdery ngadto sa Kirtland, Ohio.
-
Agosto 30, 1831Ang Doktrina ug mga Pakigsaad 63 nadawat.
Doktrina ug mga Pakigsaad 63: Dugang nga Makasaysayanong Kaagi
Sa dihang si Propeta Joseph Smith ug ang uban nga mga lider sa Simbahan mibalik ngadto sa Ohio gikan sa Missouri kaniadtong Agosto 27, 1831, gi-anunsyo nila sa mga miyembro sa Simbahan didto nga giila sa Ginoo ang Jackson County, Missouri, isip ang dapit alang sa dakbayan sa Zion. Gi-rekord sa Propeta, “Sa bag-o pa ang Simbahan, dihay usa ka dako nga kabalaka sa pag-angkon sa … pulong sa Ginoo diha sa matag hilisgutan nga sa bisan unsa nga paagi kalabut sa atong kaluwasan; ug ingon nga ‘ang yuta sa Zion’ nga karon mao ang labing mahinungdanon nga kalibutanon nga butang nga makita, ako nagpakisayud sa Ginoo alang sa dugang nga kasayuran diha sa pagpundok sa mga Santos, ug sa pagpalit sa yuta, ug sa uban pa nga mga butang” (sa Manuscript History of the Church, vol. A-1, pahina 146, josephsmithpapers.org). Kaniadtong Agosto 30, agi og tubag sa iyang pagpakisayud, nadawat ni Joseph Smith ang pagpadayag nga gi-rekord diha sa Doktrina ug mga Pakigsaad 63. Ang “ubang mga butang” nga gipakisayran sa Propeta mahimong nag-apil sa iyang kabalaka alang sa pipila ka mga miyembro sa Simbahan sa Ohio kinsa nakahimo og seryoso nga mga sala ug nawala samtang siya ug ang ubang inilang mga elder didto sa Missouri. Ang pagpadayag mitabang sa pagklaro nga kadto lamang kinsa matinud-anon nga mga sumusunod ni Jesukristo ang moadto ug motabang sa pagtukod sa Zion didto sa Missouri.
Doktrina ug mga Pakigsaad 63:1–21
Ang Ginoo nagpasidaan mahitungod sa mga sangputanan sa rebelyon ug pagkadautan ug nagsaad sa matinud-anon og panulundon
Doktrina ug mga Pakigsaad 63:1–6. “Paminaw, kamo nga mga nagtawag sa inyong mga kaugalingon nga mga katawhan sa Ginoo”
Sa nag-unang mga pagpadayag ang Ginoo misulti sa mga Santos nga aron sa pagtukod ug pagpuyo sa Zion sila kinahanglan gayud nga matarung nga mga tawo (tan-awa sa D&P 58:19; 59:1, 3). Misugod siya sa pagpadayag nga gi-rekord diha sa Doktrina ug mga Pakigsaad 63 uban sa usa ka ligdong nga pahinumdom nga ang Iyang mga sugo kinahanglan nga dili pakasayunon ug nga kadto kinsa mobaliwala o morebelde batok niini pagasilutan. Kini nga pahinumdom gikinahanglan tungod kay daghang mga miyembro sa Simbahan miangkon nga matinguhaon sa pagtukod sa Zion apan wala misunod sa mga balaod sa Dios.
Doktrina ug mga Pakigsaad 63:7–13. “Ang mga timailhan mosunod niadto nga motuo”
Atol sa ting-init ug tinglarag sa 1831, pipila sa mga miyembro sa Simbahan nawad-an og hugot nga pagtuo diha sa gipahiuli nga ebanghelyo ug namulong sa dayag batok ni Propeta Joseph Smith. Ilabi na sa duha ka tunog nga mga kritiko nga mibiya sa kamatuoran ug misugod sa pagpamantala og anti-Mormon nga basahon diha sa mga pamantalaan sugod sa Septyembre ug Oktubre sa 1831. Ang usa sa mga kritiko mao si Ezra Booth, usa ka kanhiay tigwali nga Methodist kinsa mipasakop sa Simbahan sayo sa 1831 human mabasa ang Basahon ni Mormon, nakigkita uban ni Joseph Smith, ug nagsaksi sa Propeta nga nag-ayo sa piang nga bukton ni Alice (Elsa) Johnson. Human sa iyang bunyag, si Ezra Booth gi-orden nga usa ka high priest ug gitawag sa pagserbisyo og usa ka misyon ngadto sa Missouri. Nagdahum siya nga makakabig og daghan pinaagi sa pagpakita og katingalahan nga mga timailhan ug sa paghimo og mga milagro. Bisan pa niana, human magsangyaw sa mubo nga panahon nga wala makita ang resulta nga iyang gipaabut, si Booth “mitalikod, ug … nahimong mibiya sa kamatuoran” (Joseph Smith, sa Manuscript History of the Church, vol. A-1, pahina 154, josephsmithpapers.org).
Ang Pag-ayo sa Abaga ni Elsa Johnson, ni Sam Lawlor. Ang abaga ni Alice (Elsa) Johnson milagrosong naayo ni Propeta Joseph Smith.
Ang lain nga kritiko mao si Symonds Ryder (o Simonds Rider), kinsa gipaila ngadto sa Simbahan ni Ezra Booth. Mibiyahe si Ryder ngadto sa Kirtland, Ohio, aron sa pag-usisa sa Simbahan, ug samtang didto siya nakadungog og usa ka miyembro sa Simbahan nga gitagna ang linog sa China. Human sa pipila ka semana, kaniadtong Abril 1831, nabasa ni Symonds sa pamantalaan ang istorya kabahin sa makalumpag nga linog didto sa Peking, China, ug mituo nga iyang nasaksihan ang usa ka milagrosong panagna. Gibunyagan siya human dayon niana, apan human sa pipila ka buwan mipakita siya og dayag nga pagbatok sa Simbahan.
Ang mga panudlo nga gi-rekord diha sa Doktrina ug mga Pakigsaad 63 mahitungod niadtong kinsa nangita og mga timailhan nagtabang sa pagklaro nga samtang ang mga Santos sa Ulahing mga Adlaw kinahanglan nga mangita og espiritwal nga mga gasa, sila kinahanglan nga dili mangita og mga timailhan aron sa pagtagbaw sa pagka-mapakisayron, aron sa pagkonbinse sa uban kabahin sa kamatuoran, o aron sa pagpalahutay sa ilang kaugalingon nga hugot nga pagtuo. Hinoon, ang mga timailhan ug mga milagro moabut isip usa ka resulta sa hugot nga pagtuo diha ni Jesukristo uban sa kabubut-on sa Dios (tan-awa usab sa D&P 35:8; 58:64).
Si Elder Dallin H. Oaks sa Korum sa Napulog Duha ka mga Apostoles mitambag sa mga miyembro sa Simbahan mahitungod sa pagpangita og mga timailhan:
“Sa pagpamatuod ug sa atong mga pagpamulong diha sa publiko dili kaayo nato hisgutan ang atong labing milagroso nga mga kasinatian, ug dili kaayo kita mosalig sa mga timailhan nga ang ebanghelyo tinuod. Kasagaran ato lamang ipanghimatuod ang atong pagpamatuod kalabut sa katinuod sa gipahiuli nga ebanghelyo ug maghatag og pipila ka mga detalye kon sa unsa nga paagi ato kini nga naangkon. Ngano man kini? Ang mga timailhan mosunod niadto nga motuo. Ang pagpangita og milagro aron sa pagkabig sa usa ka tawo usa ka dili maayo nga pagpangita og timailhan. …
“Adunay maayo nga mga rason kon nganong kita dili motinguha sa pagkabig sa uban pinaagi sa pagpakita og mga timailhan. ‘Ang pagpakita og mga timailhan o mga milagro dili lig-on nga sukaranan alang sa pagkakabig. Ang eskriptural nga kasaysayan nagpakita nga ang mga tawo nga nakabig pinaagi sa mga timailhan ug mga katingalahan sa dili madugay makalimot niini ug mobalik na usab sa pagkadaling motuo sa mga bakak ug mga pagdaot ni Satanas ug sa iyang mga sulugoon (Hel. 16:23; 3 Ne. 1:22; 2:1; 8:4.). …
“‘Lahi sa pagsaksi sa Espiritu, nga mahimong bag-ohon sa ngadto-ngadto ingon nga gikinahanglan sa usa ka takus nga tigdawat, ang pagtan-aw og timaihan o ang pagsinati sa usa ka milagro maoy usa ka higayon nga panghitabo nga mopahanap sa panumduman sa saksi niini ug makakunhod sa gibug-aton diha kaniya’ [Dallin H. Oaks, The Lord’s Way (1991), 87]” (“Miracles,” Ensign, Hunyo 2001, 10).
Si Ezra Booth, usa ka ministro nga Methodist, nahimong miyembro sa Simbahan human nakasaksi sa usa ka milagrosong pagkaayo dinhi niini nga kwarto sa panimalay ni Newel K. Knight sa Kirtland, Ohio.
Si Presidente Boyd K. Packer (1924–2015) sa Korum sa Napulog Duha ka mga Apostoles mipasabut kon giunsa sa hugot nga pagtuo sa pag-andam og usa ka tawo nga motuo:
“Sa kalibutan nga puno sa pagduda ug katahap, ang panultihon nga ‘makit-an tuohan’ nagpalambo sa kinaiya, ‘Pakit-a ko, ug ako motuo.’ Gusto una nato ang tanan nga mga pruweba ug ang tanan nga ebidensya. Kini ingon og malisud sa pagdawat og mga butang diha sa pagtuo.
“Kanus-a kita makakat-on nga kalabut sa espiritwal nga mga butang kini naglihok sa bale nga paagi—nga ang pagtuo mao ang pagkakita niini? Ang espiritwal nga pagtuo nag-una sa espiritwal nga kahibalo. Kon kita motuo sa mga butang nga wala makita apan bisan pa niana tinuod, nan kita adunay hugot nga pagtuo” (“What Is Faith?” diha sa Faith [1983], 43).
Doktrina ug mga Pakigsaad 63:14–19. Ang sala sa pagpanapaw
Ingon nga gi-rekord diha sa Doktrina ug mga Pakigsaad 63:14–19, mipasidaan ang Ginoo nga ang pipila sa mga Santos nakasala sa pagpanapaw. Ang pulong nga panapaw nagpasabut ngadto sa usa ka tawo nga adunay sekswal nga relasyon sa usa ka tawo gawas sa iyang kapikas (tan-awa sa D&P 42:22–26; 59:6; 66:10). Kadto kinsa nakasala “dili makabaton sa Espiritu, apan molimud sa hugot nga pagtuo” (D&P 63:16), nagpasabut nga kon ang mga mananapaw dili maghinulsol, sila sa kadugayan makakaplag sa ilang mga kaugalingon diha sa pakigbatok sa buhat sa Dios. Tungod kay ang imoralidad ug pagpanapaw lakip sa labing seryosong mga sala, kadtong kinsa magpili nga magpadayon diha sa pagkadautan kay sa maghinulsol mag-antus og hilabihang emosyonal nga kasakit—“nianang lim-aw nga nagdilaab uban sa kalayo ug asupre”—ug espiritwal nga kamatayon, nga mao ang “ikaduhang kamatayon” (D&P 63:17; tan-awa usab sa Alma 12:16; Helaman 14:16–19; D&P 29:27–29; 76:36–38).
Doktrina ug mga Pakigsaad 63:16. “Siya nga motan-aw diha sa usa ka babaye nga may kahigal kaniya … dili makabaton sa Espiritu”
Ang Ginoo mipasabut nga kadtong kinsa nagtan-aw uban ang kahigal diha sa lain “dili makabaton sa Espiritu, apan molimud sa hugot nga pagtuo” (D&P 63:16). Diha sa unang pagpadayag nga nailhan isip “ang balaod sa Simbahan,” ang Ginoo mihatag og susama nga pasidaan ngadto sa mga Santos batok sa kahigal ug sa sala sa pagpanapaw (tan-awa sa D&P 42:22–24). Sa kinatibuk-an, ang kahigal usa ka hilabihan nga kamingaw o kahidlaw. Hinoon, sa kinatibuk-ang kahulugan niini nga mga tudling sa kasulatan, ang kahigal nagpasabut ngadto sa dili angay nga lawasnong tinguha sa paghimo og sekswal nga sala. Sa kalibutan karon, ang pagkaanaay pornograpiya nakagiya sa daghang mga tawo sa pag-antus sa makadaot nga mga epekto sa kahigal. Si Elder Dallin H. Oaks mihulagway kon giunsa sa pornograpiya pagguba ang espiritwalidad:
“‘Ang pornograpiya o mga istorya ug mga hulagway nga malaw-ay mas grabe pa kay sa mahugaw o nahugawan nga pagkaon. Ang lawas adunay mga panagang nga malikay ang kaugalingon sa dili maayong pagkaon. Uban sa pipila ka walay labut nga makamatay, ang dautang pagkaon makahatag lamang kanimo og sakit apan dili permanente nga kadaut. Sa kalahi, ang tawo nga kanunayng magbusog sa hugaw nga mga istorya o pornograpiya o malaw-ay nga mga hulagway ug mga basahonon nagrekord niini diha sa katingalahang panumduman nga atong gitawag og utok. Ang utok dili mosuka og balik sa hugaw. Human marekord, kini kanunay nga magpabiling hilisgutan nga mahinumduman, magkidlap sa hiwi niini nga mga imahe sa inyong hunahuna ug nagpalayo kaninyo gikan sa maayo nga mga butang sa kinabuhi’ [Dallin H. Oaks, Challenges for the Year Ahead (pamphlet, 1974), 4–5; gibalik og imprinta diha sa “Things They’re Saying,” New Era, Peb. 1974, 18)]. …
“… Kadtong kinsa nangita ug naggamit og pornograpiya nagwagtang sa gahum sa ilang priesthood. …
“Ang mga tawo nga nagtan-aw og pornograpiya mawagtangan usab sa pakig-uban sa Espiritu. Ang pornograpiya nagdala og malaw-ay nga mga hunahuna nga nagdaot sa espiritwalidad. …
“Gibalik-balik og tudlo sa mga kasulatan nga ang Espiritu sa Ginoo dili mopuyo sa usa ka dili balaan nga lawas. Kon kita takus nga moambit sa sakrament, gisaaran kita nga kita ‘kanunay makabaton sa iyang Espiritu uban [kanato].’ Aron makasarang alang niana nga saad nakigsaad kita nga kita sa ‘kanunay mohinumdom kaniya’ (D&P 20:77). Kadtong kinsa nangita ug naggamit sa pornograpiya alang sa sekswal nga pagpagana sa tataw naglapas niana nga pakigsaad. Gilapas usab nila ang usa ka sagrado nga pakigsaad sa paglikay gikan sa dili balaan ug mahugaw nga mga buhat. Dili sila makabaton sa Espiritu sa Ginoo nga mag-uban kanila. …
“Ang pornograpiya usab nagpahamtang og makamatay nga mga samad sa atong labing bililhon nga personal nga mga pakigrelasyon. …
“Ang pornograpiya makadaut sa abilidad sa usa ka tawo sa pagtagamtam og usa ka normal nga pagbati, romantiko, ug espiritwal nga pakigrelasyon uban sa usa ka tawo nga kaatbang og sekso. Gidaut niini ang moral nga mga sumbanan nga nagtabang sa paglikay batok sa dili angay, dili sagad, o supak sa balaod nga pamatasan. Samtang ang konsensya nagkadili sensitibo, ang mga tiggamit og pornograpiya madala sa pagbuhat sa unsay ilang nasaksihan, sa walay pagpanumbaling sa mga epekto niini diha sa ilang kinabuhi ug sa mga kinabuhi sa uban.
“Ang pornograpiya makapaadik usab. Makaguba kini sa mga kapasidad sa paghimo og desisyon ug ‘mogawung’ kini sa mga tiggamit niini, mobitad kanila balik sa sobra nga tinguha alang sa pagdugang pa. …
“… Kon ang mga tawo moabi-abi og dugay sa dautang mga hunahuna igo alang sa Espiritu sa pagbiya, mawad-an sila sa ilang espiritwal nga panalipod ug sila ubos ngadto sa gahum ug direksyon sa usa nga dautan” (“Pornography,” Ensign o Liahona, Mayo 2005, 88–89).
Sa atong panahon, ang pagkaylap sa pornograpiya nagbantang sa daghan ngadto sa tintasyon sa kahigal alang sa uban. Si Elder Richard G. Scott (1928–2015) sa Korum sa Napulog Duha ka mga Apostoles nanghimatuod nga ang paggamit sa pornograpiya usa ka mahigalong kalihokan nga nagpugong sa abilidad sa usa ka tawo sa pagtagamtam sa mga panalangin sa Espiritu:
“Makigbahin ako og pasidaan. Si Satanas hilabihan ka maayo sa pagbabag sa espiritwal nga komunikasyon pinaagi sa paghaylo sa mga indibidwal, pinaagi sa tintasyon, sa pagsupak sa mga balaod diin ang espirituhanong komunikasyon gipasikad. Sa uban, siya makahimo sa pagkumbinser kanila nga sila dili makahimo sa pagdawat sa ingon nga paggiya gikan sa Ginoo.
“Si Satanas nahimong usa ka hanas sa paggamit sa makapaadik nga gahum sa pornograpiya sa pagpugong sa kapasidad sa indibidwal nga magiyahan pinaagi sa Espiritu. Ang pagdagsang sa pornograpiya sa tanan niining makadaut, makakankan, makapalaglag nga mga panagway maoy hinungdan sa hilabihang kagul-anan, pag-antus, kasakit sa dughan, ug pagkaguba sa mga kaminyoon. Usa kini sa hilabihan ka makadaut nga mga impluwensya dinhi sa yuta. Pinaagi man kini sa gi-imprinta nga mga pahina, mga salida, telebisyon, law-ay nga mga pulong sa kanta, mga binastos diha sa telepono, o sa nagdan-ag nga screen sa personal computer, ang pornograpiya hilabihan gayud ka makapaadik ug grabe kaayong makadaot. Kining gamhanan nga gamit ni Lucifer mopaut-ut sa hunahuna ug sa kasingkasing ug sa kalag ni bisan kinsa nga mogamit niini. Ang tanan kinsa masakpan sa makapadani, makatintal nga lit-ag ug magpabilin nga mao mahimong maadik ngadto sa imoral, makadaut nga impluwensya niini. Alang sa kadaghanan, kana nga pagkaadik dili mabuntog kon walay panabang. Ang makalilisang nga sumbanan pamilyar kaayo. Kini nagsugod sa pagkakuryoso nga gisugnoran pinaagi sa pagpagana niini ug gihatagan og pangatarungan pinaagi sa sayop nga ideya nga kon buhaton sa hilum, dili kini makadaot ngadto ni bisan kinsa pa. Alang niadtong nalukmay pinaagi niini nga bakak, ang pag-ekspiremento mas nagkakusog, uban sa mas gamhanang mga pagana hangtud ang lit-ag mosira ug usa ka hilabihan ka imoral, makapaadik nga buhat gigamit sa dautang pagkontrolar niini. …
“Kon nalit-ag kamo sa pornograpiya, paghimo og hingpit nga pasalig sa pagbuntog niini karon. Pangita og hilum nga dapit; pag-ampo sa dinalian nga paagi alang sa panabang ug suporta. Magmapailubon ug magmasulundon. Ayaw og hunong” (“Aron Makabaton og Espirituhanong Giya,” Liahona, Nob. 2009, 8–9).
Doktrina ug mga Pakigsaad 63:20–21. Ang pagkabalhin sa dagway sa yuta
Ang Ginoo nagsaad nga ang mga Santos kinsa nagpili sa pagbuhat sa Iyang kabubut-on ug molahutay ngadto sa katapusan mopanunod sa terrestrial nga yuta kon ang Milenyum magsugod ug usab kon ang yuta mahimong usa ka celestial nga kalibutan ug kabahin sa celestial nga gingharian human sa Milenyum ug sa Katapusang Paghukom (tan-awa sa D&P 38:17–20; 45:58; 63:49; 88:17–20). Ang hugpong sa mga pulong “ang adlaw sa pagkahimaya” diha sa Doktrina ug mga Pakigsaad 63:20 nagpasabut ngadto sa panahon human sa Ikaduhang Pag-anhi sa Ginoo, nga “ang yuta pagabag-uhon ug makadawat sa iyang paraisohanon nga himaya” (Mga Artikulo sa Hugot nga Pagtuo 1:10). Kini nga pagkausab, o pagkabalhin sa dagway, mahitabo human ang tanang mga dautan ug madunot nga mga butang sa yuta “maugdaw,” o nawagtang na, ug ang “tanang mga butang mahimo nga bag-o” (D&P 101:24–25). Ang yuta mismo mobalik ngadto sa paraisohanong himaya nga kini aduna kaniadto sa wala pa ang Pagkapukan ni Adan ug Eva (tan-awa sa Isaias 11:6–7; 51:3; D&P 133:22–24, 29). Sumala sa Doktrina ug mga Pakigsaad 63:21, kini nga pagkabalhin sa dagway sa yuta gipakita diha sa usa ka panan-awon ngadto ni Apostol Pedro, Santiago, ug Juan atol sa ilang sagradong kasinatian didto sa Bukid sa Transpigurasyon (tan-awa sa Mateo 17:1–3, 9).
Kadtong kinsa molahutay uban sa hugot nga pagtuo ug mobuhat sa kabubut-on sa Ginoo “makadawat og kabilin diha sa yuta … sa panahon nga ang yuta mabalhin ang panagway” (D&P 63:20–21).
Litrato sa maayong kabubut-on sa NASA Johnson Space Center
Si Presidente Joseph Fielding Smith (1876–1972) miila sa upat ka ang-ang sa pagkaadunay yuta: “Kini nga yuta nag-agi og upat ka bililhong mga ang-ang: 1. Ang paglalang ug ang kahimtang nga gipaunhan og petsa [anaa sa wala pa] ang pagkapukan. 2. Ang telestial nga kahimtang nga diha na sukad sa pagkapukan ni Adan. 3. Ang terrestrial nga kahimtang [alang sa pagkabalhin sa dagway sa yuta] nga maanaa sa panahon nga ang Manluluwas mobalik ug magsugod ang panahon sa milenyum. 4. Ang celestial o ang katapusang kahimtang sa yuta sa dihang maangkon na ang kahimayaan niini” (Doctrines of Salvation, comp. Bruce R. McConkie [1954], 1:82).
Doktrina ug mga Pakigsaad 63:22–56
Naghatag ang Ginoo sa mga Santos og mga giya alang sa pagpahimutang sa Zion ug nagsaad og mga panalangin ngadto sa mga matinud-anon
Doktrina ug mga Pakigsaad 63:22–23. “Usa ka atabay sa buhi nga tubig, nga magtubod ngadto sa walay katapusan nga kinabuhi”
Ang Ginoo misaad sa paghatag og kahibalo, o “sa mga misteryo sa [Iyang] gingharian,” ngadto niadtong kinsa nagsunod sa Iyang mga sugo (D&P 63:23). Ang mga misteryo sa gingharian sa Dios nagpasabut ngadto sa mahangturong mga kamatuoran nga mahimong madawat o mahibaloan lamang pinaagi sa pagpadayag. Ang Ginoo mipahisama sa pagdawat niining espiritwal nga pagbu-bu sa kahibalo ngadto sa pag-angkon og “usa ka atabay sa buhi nga tubig” (D&P 63:23). Si Presidente Boyd K. Packer mipasabut kon sa unsa nga paagi ang atong pagkamatinud-anon nagdapit og mapadayunong pagpadayag: “Magmatinuohon ug ang inyong hugot nga pagtuo mahimong kanunay nga madugangan, ang inyong kahibalo sa kamatuoran magtubo, ang inyong pagpamatuod sa Manunubos, sa Pagkabanhaw, sa Pagpahiuli mahimong sama sa ‘usa ka atabay sa buhi nga tubig , nagtubod ngadto sa walay katapusan nga kinabuhi’ [D&P 63:23]. Kamo dayon mahimong makadawat og paggiya kabahin sa mapuslanong mga desisyon sa inadlaw-adlaw nga kinabuhi” (“Personal Revelation: The Gift, the Test, and the Promise,” Ensign, Nob. 1994, 61).
Doktrina ug mga Pakigsaad 63:24–31, 41. “Sila kinahanglan nga magpundok sa ilang mga kaugalingon ngadto sa yuta sa Zion, dili magdali”
Sa dihang si Propeta Joseph Smith mibalik ngadto sa Kirtland, Ohio, ug ang mga Santos nahibalo nga giila sa Ginoo ang dapit sa Independence, Missouri, isip ang sentro nga dapit alang sa dakbayan sa Zion, daghan ang nagtinguha sa pagsugod sa proseso sa pagbalhin didto. Bisan pa niana, ang Ginoo mitataw niini nga ang mga Santos dili magpundok ngadto sa yuta sa Zion nga “magdali” (D&P 63:24; tan-awa usab sa D&P 58:56). Sa tinuod, mihatag ang Ginoo sa Propeta og abilidad sa “pag-ila pinaagi sa Espiritu” kinsa ang mobalhin didto (D&P 63:41).
Kalabut niini nga panudlo gikan sa Ginoo, si Presidente Joseph Fielding Smith mipasabut kon ngano nga ang mga Santos magpundok sa husay nga paagi ubos sa direksyon sa mga lider sa Simbahan: “[Ang unang mga miyembro] gipahimangnoan batok sa panag-away diha sa ilang mga silingan, daghan kinsa hilabihan ka nasuko sa mga miyembro sa Simbahan. Miingon ang Ginoo nga ang yuta dili maangkon pinaagi sa pagpaagas sa dugo. Kadtong kinsa adunay pribilehiyo sa pagpundok didto kinahanglan nga dili mosaka ngadto sa Zion nga nagdali, apan sa hinay-hinay. Ang rason alang niini nga tambag klaro, kay ang pagdali mogiya ngadto sa kalibug, dili maayo nga mga kahimtang ug kamatay, ug unya, usab, kini magmugna og kasamok ug kahadlok diha sa mga kasingkasing sa ilang mga kaaway ug magsugyot og mas dako nga pakigbatok. Gitinguha ni Satanas ang paglaglag kanila ug diha sa iyang kasuko naninguha sa pagkutaw kanila ngadto sa panag-away ug panagbingkil ingon man sa mas unang mga lumulupyo sa Missouri” (Church History and Modern Revelation [1953], 1:232).
Sa pagdumala sa gidaghanon sa mga Santos nga magpundok ngadto sa Zion, ang mga lider sa Simbahan nagkinahanglan niadtong anaa sa Ohio nga nagtinguha sa pag-adto sa Missouri sa pagkuha og sertipiko nga hinatag sa Simbahan sa dili pa sila makabalhin ug makaapil sa balaod sa pagpahinungod didto sa Missouri. Bisan pa niana, daghang nagtinguha nga mga miyembro ang mibaliwala sa panudlo ug miadto ngadto sa Missouri sa dinaghan. Usa ka tigsaysay sa Simbahan nga gitudlo ni Propeta Joseph Smith wala madugay misulat, “Ang simbahan misugod dayon sa pagpundok didto sa Jackson County, ug kabahin niini nga hilisgutan nahimo silang matinguhaon. Sila gisugo sa dili pag-adto nga magdali, ni pinaagi sa paglupad, apan sa pag-andam sa tanang mga butang diha sa ilang atubangan. Ang kwarta kinahanglan nga ipadala ngadto sa bishop, ug diha dayon tungod sa mga yuta nga paliton, ug mga pangandam gihimo, ang bishop magpahibalo, nga ang simbahan tingali pagapundukon. Apan kini nga balaod wala masunod, tungod kay ang simbahan nanobra ka matinguhaon mahitungod sa pag-adto sa Zion, ingon nga kini kaniadto gitawag. Ang mga adunahan nahadlok sa pagpadala sa ilang kwarta nga ipalit og mga yuta, ug ang mga kabus misamot sa pagkadaghan, walay bisan usa nga dapit nga kapuy-an, supak sa tambag sa bishop ug sa uban, hangtud nga ang tigulang nga mga lungsuranon misugod sa pagkahilabihan ka wala mahimuot” (John Corrill, A Brief History of the Church of Christ of Latter Day Saints [1839], 18–19, josephsmithpapers.org; tan-awa usab sa The Joseph Smith Papers, Histories, Volume 2: Assigned Histories, 1831–1847, ed. Karen Lynn Davidson ug uban pa [2012], 146).
Doktrina ug mga Pakigsaad 63:25–27. “Ako, ang Ginoo, ihatag ngadto ni Cesar ang mga butang nga iya ni Cesar”
Sa Lucas 20:19–26 atong mabasa kon giunsa sa mga punoang sacerdote [chief priests] ug sa mga escriba sa pagpaninguha og bitik ni Jesus pinaagi sa pagpangutana Kaniya kon uyon ba sa balaod ang pagbayad sa mga Judeo og buhis ngadto sa Romanong emperador nga si Cesar. Nasayud sila nga kon moingon Siya og oo, ang mga Judeo mosalikway Kaniya tungod kay gikasilagan nila ang mga Romano, kinsa nakabuntog kanila. Kon si Jesus moingon og dili, maka-report sila Niya ngadto sa mga Romano, kinsa modakop Kaniya tungod sa pagbudhi batok sa kamandoang Romano. Mipakita si Jesus og kwarta nga may dagway ni Cesar nga nahisulat niini ug miingon, “Nan, bayri ninyo si Cesar sa mga butang nga iya ni Cesar, ug ang Dios sa mga butang nga iya sa Dios” (Lucas 20:25).
Mitudlo ang Ginoo nga ang mga Santos, sama Kaniya, kinahanglan nga “bayran si Cesar sa mga butang nga iya ni Cesar” (tan-awa sa D&P 63:25–27).
Ang paggamit sa Ginoo niini nga panghitabo diha sa Doktrina ug mga Pakigsaad 63:26–27 mitabang sa pagtudlo sa mga Santos nga bisan tuod ang tibuok yuta iya sa Ginoo, ang mga Santos sa gihapon kinahanglang mopalit sa mga yuta diin ang Ginoo misugo kanila sa pagtukod sa dakbayan sa Zion. Kini nga pagpalit gikinahanglan alang sa mga Santos aron adunay legal nga pagpanag-iya sa yuta ug sa pagpugong sa panagbingkil mahitungod niini sa umaabut.
Doktrina ug mga Pakigsaad 63:33–35. “Ug ang mga santos usab maglisud sa pag-ikyas”
Agi og tubag sa nagtubo nga pagkadautan dinhi sa yuta, nagmando ang Ginoo og mga paghukom ug mga sangputanan. Ingon nga gi-rekord diha sa Doktrina ug mga Pakigsaad 63:33–35, ang masukulon pagapantunon, ug bisan ang mga Santos mag-antus usab, ang saad sa Ginoo mao nga Siya magauban kanila. Si Propeta Joseph Smith (1805–1844) mirekord sa unsay nahitabo atol sa usa ka miting diha sa iyang panimalay kaniadtong Septyembre 1839: “[Akong] gipasabut ang mahitungod sa pagbalik sa Anak sa Tawo; nga usab kini usa ka sayop nga pagtuo nga ang mga Santos makalingkawas sa tanang mga paghukom, samtang ang dautan mag-antus; kay ang tanang tawo ubos sa pag-antus, ug ‘ang matarung maglisud sa pag-ikyas’ [tan-awa sa D&P 63:34]; bisan pa man daghang mga Santos makaikyas, kay ang matarung mabuhi pinaagi sa hugot nga pagtuo [tan-awa sa Habacuc 2:4]; unya daghang mga matarung mabiktima sa sakit, sa katalagman, ug uban pa, nga ang hinungdan gumikan sa kahuyang sa unod, ug bisan pa niana mangaluwas ngadto sa Gingharian sa Dios. Mao nga dili kini balaan nga prinsipyo sa pag-ingon nga siya ug kini nakasala tungod kay sila nahimong biktima sa sakit o kamatayon, kay ang tanang tawo ubos sa kamatayon; ug ang Manluluwas nag-ingon, ‘Ayaw kamo pagpanghukom, aron dili kamo pagahukman’ [tan-awa sa Mateo 7:1]” (Mga Pagtulun-an sa mga Presidente sa Simbahan: Joseph Smith [2007], 304).
Doktrina ug mga Pakigsaad 63:38–40. Si Titus Billings gisugo sa pagpundok ngadto sa Zion
Mitudlo ang Ginoo sa mga Santos kinsa mipuyo diha sa uma ni Isaac Morley—lakip ni Joseph ug ni Emma Smith—sa paghimo sa gikinahanglan nga mga andamunon sa pagbalhin. Sa dihang si Isaac Morley gitawag kaniadtong Hunyo 1831 sa pagserbisyo og misyon ngadto sa Missouri, ang iyang bayaw nga lalaki si Titus Billings gihatagan sa responsibilidad sa yuta. Ingon nga gi-rekord diha sa Doktrina ug mga Pakigsaad 63:38–40, gisugo si Titus Billings sa pagbaligya sa yuta ug sa paggamit sa halin sa pag-adto sa Missouri ug sa pagtabang sa uban sa pagbuhat og sama. Tungod sa panginahanglan sa pagbalhin, nadawat ni Joseph ug Emma Smith ang usa ka pagdapit gikan nila ni John ug Alice (Elsa) Johnson sa pagbalhin ngadto sa ilang uma didto sa Hiram, Ohio, kapin o kulang sa 48 ka kilometro habagatan-silangan sa Kirtland.
Gihatag ni Isaac Morley ang responsibilidad sa iyang uma didto sa Kirtland, Ohio, diin daghang mga Santos namuyo, ngadto ni Titus Billings, iyang bayaw nga lalaki. Agi og pagsunod sa sugo sa Ginoo, ang uma gibaligya (tan-awa sa D&P 63:38-–40).
Doktrina ug mga Pakigsaad 63:49–52. “Bulahan ang mga patay nga namatay diha sa Ginoo”
Kadtong kinsa nakalahutay diha sa hugot nga pagtuo ug sa pagkamatarung, gani ngadto sa kamatayon, pagabanhawon sa Ikaduhang Pag-anhi sa Ginoo. Sila moambit sa Iyang himaya ug mokuyog uban sa mga matarung kinsa buhi niana nga adlaw sa pagpanunod og usa ka dapit diha sa dakbayan sa Zion sa panahon sa MiIenyum (tan-awa sa D&P 61:39; 63:49; 88:96–98; 101:35). Ang mga bata kinsa buhi dinhi sa yuta kon magsugod ang Milenyum “motubo hangtud nga sila mahimo nga tigulang” ug dayon mamatay ug mabanhaw “diha sa usa ka pagpamilok sa mata” (D&P 63:51; tan-awa usab sa Isaias 65:20). Gitudlo ni Presidente Joseph Fielding Smith “Ang mga tawo sa yuta mortal lamang gihapon, apan usa ka kausaban moabut diha kanila aron sila adunay gahum ibabaw sa sakit, balatian ug kamatayon. Ang kamatayon tanan hinginlan gikan sa yuta, tungod kay ang mga tawo mabuhi hangtud sila moabut sa edad sa usa ka kahoy o usa ka gatus ang panuigon (Tan-awa sa [D&P] 63:50–51), ug dayon mamatay sa katigulangon, apan kini nga kamatayon moabut diha sa usa ka pagpamilok sa mata ug ang mortalidad sa kalit mohatag og luna sa imortalidad. Walay mga lubnganan, ug ang matarung pagabayawon ngadto sa usa ka mahimayaong pagkabanhaw” (Church History and Modern Revelation 1:461).
Doktrina ug mga Pakigsaad 63:53–54. “Kini nga mga butang … hapit na moabut”
Gikan sa panan-aw sa Dios sa panahon, ang mga panghitabo sa Ikaduhang Pag-anhi “hapit na moabut” (D&P 63:53). Samtang kita wala mahibalo sa takna sa Ikaduhang Pag-anhi, ang sambingay sa Ginoo sa buang ug sa maalamon nga mga birhen nagpahinumdom kanato sa pag-andam karon alang niana nga adlaw (tan-awa sa Mateo 25:1–13). Kini mahinungdanon nga atong hunahunaon nga ang Ikaduhang Pag-anhi hapit na gayud aron andamon nato ang atong mga kaugalingon. Ang pagtataw sa Doktrina ug mga Pakigsaad 63:54 nga “hangtud niana nga takna adunay dili maalamon nga mga birhen taliwala sa maalamon” nagpasabut nga bisan taliwala sa mga Santos sa Ulahing mga Adlaw aduna niadto kinsa makaplagan nga dautan ug kinsa ibulag ug isalikway gikan sa mga matarung, sama diha sa sambingay sa trigo ug sa bunglayon (tan-awa sa Mateo 13:24–30, 36–43). Busa, misugo ang Ginoo sa mga Santos sa paghinulsol ug sa pag-andam alang sa Iyang pag-anhi. Si Elder Dallin H. Oaks mipasabut sa panginahanglan alang sa mga miyembro sa Simbahan sa pag-andam:
“Samtang kita walay gahum sa pag-usab sa katinuod sa Ikaduhang Pag-anhi ug walay mahimo nga makahibalo sa tukma nga panahon, mapadali nato ang atong kaugalingong pagpangandam ug mosulay sa pag-impluwensya sa pagpangandam niadtong anaa sa atong palibut.
“Ang usa ka sambingay nga naglangkob og importante ug mahagiton nga pagtulun-an niini nga hilisgutan mao ang sambingay sa napulo ka mga dalagang birhen. Kabahin niini nga sambingay, ang Ginoo miingon, ‘Ug niana nga adlaw kon Ako moanhi diha sa akong himaya, nga ang sambingay matuman diin Ako namulong mahitungod sa napulo ka mga dalagang birhen’ (D&P 45:56).
“Gihatag diha sa ika-25 nga kapitulo sa Mateo, kini nga sambingay gipakita ang kalahi sa mga kahimtang sa lima ka buang ug sa lima ka maalamon nga dalagang mga birhen. Ang tanang napulo giimbitar sa kumbira sa kasal, apan katunga lamang kanila ang andam nga adunay lana diha sa ilang mga lamparahan sa dihang miabut ang pamanhunon. Ang lima nga andam nakaadto sa kumbira sa kasal, ug ang pultahan gisirado. Ang lima nga milangay sa ilang mga pagpangandam wala makaabut. Ang pultahan nasirado na, ug mibalibad ang Ginoo kanila sa pagsulod, nag-ingon, ‘Wala ako makaila kaninyo’ (v. 12). ‘Busa, pagtukaw kamo,’ ang Manluluwas mitapos, ‘kay wala ninyo hibaloi ang adlaw o takna nga ang Anak moabut’ (v. 13).
“Ang numero nga nalakip niini nga sambingay makakurat. Ang napulo ka mga dalagang birhen tataw nga nagrepresentar sa mga miyembro sa Simbahan ni Kristo, kay ang tanan giimbitar sa kumbira sa kasal ug ang tanan nahibalo sa unsay gikinahanglan aron makasulod inig abut sa pamanhonon. Apan katunga lamang ang andam sa dihang siya miabut” (Preparation for the Second Coming,” Ensign o Liahona, Mayo 2004, 8).
Doktrina ug mga Pakigsaad 63:55–56. Nagpahayag ang Ginoo nga ang kang Sidney Rigdon nga “sinulat dili angay nga dawaton”
Usa ka bulan sa wala pa ang pagpadayag nga gi-rekord diha sa Doktrina ug mga Pakigsaad 63 nahatag, misugo ang Ginoo ni Sidney Rigdon sa pagsulat og usa ka paghulagway sa yuta sa Zion nga ipakigbahin ngadto sa uban aron ang mga pundo mapun-an nga ipalit og mga yuta diha sa Missouri (tan-awa sa D&P 58:50–52). Human si Sidney misulat niini, mipahayag ang Ginoo nga ang iyang paghulagway sa yuta “dili angay nga dawaton” tungod kay siya “nagbayaw sa iyang kaugalingon diha sa iyang kasingkasing, ug dili modawat og tambag, apan nakapasuko sa Espiritu” (D&P 63:55–56). Bisan og ang unang pagsulay ni Sidney sa paghulagway sa Jackson County, Missouri, nahimong gipasobrahan ang kalidad niini (tan-awa sa The Joseph Smith Papers, Documents, Volume 2: Hulyo 1831–Enero 1833, ed. Matthew C. Godfrey ug uban [2013] 54, note 305), kini tataw nga wala mitubag sa gipaabut sa Ginoo. Sa walay pagsapayan, ang Ginoo mimando kaniya sa pagsulat og ikaduhang sulat, nga nadawat ug nahimong paagi sa pagdugang og kwarta alang sa Zion.
Doktrina ug mga Pakigsaad 63:57–66
Nagtudlo si Jesukristo sa Iyang mga sulugoon sa paghinumdom sa ka sagrado sa Iyang ngalan ug sa pagsulti uban sa ligdong nga pagtahud sa sagradong mga butang
Doktrina ug mga Pakigsaad 63:57–64. “Busa, himoa nga ang tanan nga mga tawo magbantay giunsa nila paggamit ang akong ngalan diha sa ilang mga ngabil”
Sa panahon nga ang pagpadayag nga gi-rekord diha sa Doktrina ug mga Pakigsaad 63 nahatag, ang pipila sa mga Santos naglihok diha sa ngalan sa Ginoo nga walay tukma nga awtoridad ug, busa, ubos sa panghimaraut (tan-awa sa D&P 63:60–63). Gitawag sa Ginoo ang mga Santos sa paghinulsol, nagsugo sa tanan sa “pagbantay giunsa nila paggamit ang [Iyang] ngalan sa ilang mga ngabil” (D&P 63:61). Si Elder Dallin H. Oaks mipasabut nga ang ngalan sa Ginoo pagagamiton uban ang awtoridad ug sa balaang pagtahud:
“Kini nga kasulatan [D&P 63:61–62] nagpakita nga atong gigamit ang ngalan sa Ginoo sa kawang kon atong gamiton ang iyang ngalan nga walay awtoridad. Kini tataw nga mahitabo kon ang sagradong mga ngalan sa Dios nga Amahan ug sa iyang Anak, si Jesukristo, gigamit sa unsay gitawag og pasipala, sa madumtanong mga pagtunglo, sa masuk-anong mga pagsaway, o isip paghatag og gibug-aton sa unsay kasagaran nga gisulti.
“Ang mga ngalan sa Amahan ug sa Anak gigamit uban ang awtoridad kon kita sa ligdong nga pagtahud nagtudlo ug nagpamatuod kanila, kon kita nag-ampo, ug kon kita nagpahigayon og sagradong mga ordinansa sa priesthood.
“Wala nay labaw ka sagrado o ka importanting mga pulong sa tanan natong pinulongan kay sa mga ngalan sa Dios ang Amahan ug sa iyang Anak, si Jesukristo. …
“Kon ang mga ngalan sa Dios ang Amahan ug sa iyang Anak, si Jesukristo, gigamit uban ang ligdong nga pagtahud ug awtoridad, kini nagtawag og gahum lapas sa unsay masabut sa tawo.
“Kini kinahanglan nga tataw sa matag tumutuo nga kining gamhanang mga ngalan—diin ang mga milagro nahimo, diin ang kalibutan naporma, diin ang tawo nalalang, ug diin kita maluwas—mga sagrado ug kinahanglan gayud nga tagdon uban sa labing ligdong nga pagtahud. Ingon nga atong mabasa sa modernong pagpadayag, ‘Hinumdumi nga kana nga moabut gikan sa kahitas-an sagrado, ug kinahanglan gayud ipamulong uban sa pag-amping, ug pinaagi sa pagtugot sa Espiritu.’ (D&P 63:64.)” (“Reverent and Clean,” Ensign, Mayo 1986, 49–51).
Doktrina ug mga Pakigsaad 63:65–66. “Usa ka panimalay, ingon nga sila gitudloan sa pag-ampo pinaagi sa Espiritu”
Si Propeta Joseph Smith ug Sidney Rigdon matag usa adunay gagmay nga mga panimalay nga nahimutang sa uma ni Isaac Morley. Ingon nga gisugo nga ang uma ibaligya, ang Ginoo misulti ni Joseph ug Sidney sa pagpangayo og balaang paggiya sa pagpangita og bag-ong mga dapit nga puy-an (tan-awa sa D&P 63:65). Kaniadtong Septyembre 17, 1831, mibalhin si Joseph ug Emma Smith ngadto sa Hiram, Ohio aron mopuyo uban sa pamilya ni John ug Alice (Elsa) Johnson. Wala madugay human niana, ang mga Rigdon mibalhin ngadto sa usa ka troso nga panimalay didto usab sa Hiram. Sa tinuod, ang mga pamilya sa Propeta ug ni Sidney Rigdon mabalaka unta mahitungod sa ilang temporal nga mga panginahanglan sa dihang ilang nahibaloan nga mawad-an sila sa ilang panimalay diha sa uma ni Morley. Naninguha ang Ginoo sa pagkalma sa ilang mga kaguol pinaagi sa pagpahinumdom kanila nga sila pagagiyahan sa Espiritu samtang sila magtawag sa Ginoo diha sa pag-ampo ug nga pinaagi sa ilang pagpailub sila mapanalanginan (tan-awa sa D&P 63:65–66).