Institute
Kapitulo 5: Doktrina ug mga Pakigsaad 6; 8–9

Kapitulo 5

Doktrina ug mga Pakigsaad 6; 8–9

Pasiuna ug Timeline

Tungod walay tigsulat kanunay, ang paghubad sa Basahon ni Mormon hinay ang pag-uswag hangtud sa Marso 1829, sa dihang si Propeta Joseph Smith gisugo sa paghunong ug paghulat alang sa tabang (tan-awa sa D&P 5:30–34). Sa katumanan sa saad sa Ginoo nga “mosangkap sa mga paagi” (D&P 5:34), si Oliver Cowdery miabut sa panimalay sa Propeta sa Harmony, Pennsylvania, ug mitanyag og tabang. Uban sa nabag-o nga paningkamot, niadtong Abril 7, 1829 gisugdan pag-usab ni Joseph Smith ang paghubad, uban ni Oliver nga mitabang isip tigsulat. Sa ulahing bahin nianang bulana, nakadawat ang propeta og pagpadayag nga narekord sa Doktrina ug mga Pakigsaad 6. Niini nga pagpadayag nakadawat si Oliver og tambag ug kumpirmasyon bahin sa iyang tahas sa buhat sa Ginoo.

Samtang ang paghubad sa Basahon ni Mormon nagpadayon, si Oliver nagtinguha nga mohubad. Sa usa ka pagpadayag nga nadawat niadtong Abril 1829 ug narekord sa Doktrina ug mga Pakigsaad 8, ang Ginoo misaad ni Oliver og gasa sa pagpadayag ug abilidad sa paghubad og karaang mga rekord.

Gisulayan ni Oliver ang paghubad apan wala makapadayon. Sa hangyo ni Oliver, nangutana si Joseph Smith sa Ginoo ug nakadawat sa pagpadayag nga narekord sa Doktrina ug mga Pakigsaad 9, diin gipasabut sa Ginoo ngano nga naglisud si Oliver sa paghubad ug usab mihatag og mga baruganan kabahin sa pagpadayag.

Ulahing bahin sa 1828Nakahibalo si Oliver Cowdery mahitungod ni Joseph Smith samtang nagpuyo sa Manchester, New York.

Abril 1829Mibiyahe si Oliver Cowdery ngadto sa Harmony, Pennsylvania, aron makigkita ni Joseph Smith.

Abril 1829Ang hubad sa Basahon ni Mormon nagpadayon sa tumang kadasig uban ni Oliver Cowdery isip tigsulat.

Abril 1829Ang Doktrina ug mga Pakigsaad 6 ug 8 nadawat.

Abril 1829Misulay si Oliver Cowdery sa paghubad.

Abril 1829Ang Doktrina ug mga Pakigsaad 9 nadawat.

Doktrina ug mga Pakigsaad 6: Dugang nga Makasaysayanong Background

Sa sayo pa niadtong 1829, si Propeta Joseph Smith ug ang iyang asawa, nga si Emma, nagpuyo sa usa ka gamay nga balay duol sa mga ginikanan ni Emma sa Harmony, Pennsylvania. Nagpadayon si Joseph sa paghubad sa mga palid sa Basahon ni Mormon niining higayuna uban sa tabang ni Emma, apan hinay ang dagan sa trabaho. Niadtong Marso, mihangyo si Joseph sa Ginoo og tabang, ug agig tubag misaad ang Ginoo, “Ako mosangkap sa mga paagi diin ikaw makatuman sa butang diin Ako misugo kanimo” (D&P 5:34). Sa wala madugay, miabut si Oliver Cowdery ug nahimong full-time nga tigsulat ni Joseph.

Si Oliver Cowdery usa ka magtutudlo nga nagpuyo sa balay sa mga ginikanan ni Propeta Joseph Smith nga sila si Joseph Smith Sr. ug Lucy Mack Smith, atol sa tingtugnaw niadtong 1828–29. Samtang didto sa dapit sa Palmyra, New York, si Oliver nakadungog og istorya mahitungod sa bulawan nga mga palid. Gipangutana niya ang pamilyang Smith mahitungod sa iyang nadunggan, ug human makuha ang pagsalig ni Joseph Smith Sr., nakahibalo siya og dugang pa mahitungod sa paningkamot ni Joseph Smith Jr. sa paghubad sa mga palid. Unya girekord ni Propeta Joseph Smith nga ang “Ginoo nagpakita ngadto sa usa ka batan-ong lalaki nga ginganlan og Oliver Cowd[e]ry ug gipakita ngadto kaniya ang mga palid pinaagi sa panan-awon. … Busa nagtinguha siya nga moanhi ug mosulat alang kanako” (sa The Joseph Smith Papers, Histories, Volume 1:Joseph Smith Histories, 1832–1844, ed. Karen Lynn Davidson ug uban pa [2012], 16).

Hugot nga nagtuo si Oliver Cowdery nga kabubut-on sa Ginoo nga moadto siya ni Joseph Smith ug motabang kaniya, mao nga mibiyahe siya uban sa igsoon si Joseph Smith nga si Samuel ngadto sa Harmony, Pennsylvania, miabut niadtong Abril 5, 1829. Si Joseph ug Oliver nagsugod sa paghubad niadtong Abril 7, 1829. Wala madugay human sila makasugod sa pagtrabaho, ang Propeta nakadawat og mga instruksyon gikan sa Ginoo nga naghatag og direksyon ngadto ni Oliver ug miklaro sa iyang tahas sa pagtabang ni Joseph.

Mapa 3: Amihanang Silangang Estados Unidos

Doktrina ug mga Pakigsaad 6:1–24

Ang Ginoo mitudlo ni Oliver Cowdery kabahin sa iyang tahas sa buhat sa Dios

Doktrina ug mga Pakigsaad 6:6. “Paningkamot sa pagdala ug pagtukod sa kahimoan sa Zion”

Ang Ginoo midapit ni Propeta Joseph Smith ug Oliver Cowdery “sa paghupot sa [Iyang] mga sugo, ug pagpaningkamot sa pagdala ug pagtukod sa kahimoan sa Zion” (D&P 6:6). Mao kini ang unang paghisgut sa Zion diha sa Doktrina ug mga Pakigsaad. Sa “pagpaningkamot sa pagdala ug pagtukod sa kahimoan sa Zion” mahimong sabton nga ang buhat sa pagpahiuli sa ebanghelyo ni Jesukristo, pag-organisar sa Simbahan ni Jesukristo pag-usab sa atong panahon, ug pagsangyaw sa ebanghelyo aron sa pagpundok sa uban ngadto sa Zion.

Doktrina ug mga Pakigsaad 6:7, 11. “Ang mga misteryo sa Dios”

Ang Ginoo misaad ni Oliver Cowdery nga kon magtinguha siya og kaalam, “ang mga misteryo sa Dios [pag]ablihan ngadto [kaniya]” (D&P 6:7). Sa mga kasulatan, ang mga pulong nga “mga misteryo sa Dios” nagpasabut sa “espirituhanong mga kamatuoran nga mahibaloan lamang pinaagi sa pagpadayag. Ang Dios nagpadayag sa iyang mga misteryo niadto kinsa mga masulundon sa ebanghelyo” (Giya ngadto sa mga Kasulatan, “Misteryo sa Dios, Mga,” scriptures.lds.org). Samtang kini nga mga kamatuoran wala mahibaloi ug masabti ug mapasalamati sa kalibutan, ang mga sumusunod ni Jesukristo makaangkon og kahibalo ug pagsabut sa mga kamatuoran sa ebanghelyo pinaagi sa pagtuon sa mga kasulatan ug sa mga pulong sa buhi nga mga propeta ug gikan sa personal nga pagpadayag nga nadawat pinaagi sa Espiritu Santo. Ang Doktrina ug mga Pakigsaad nag-awhag sa mga magbabasa sa pagtinguha og mas dakong espirituhanong pagsabut sa mga misteryo sa Dios pinaagi sa pagsunod sa mga sugo ug pagpangutana sa Dios pinaagi sa hugot nga pagtuo (tan-awa sa D&P 8:11; 42:61, 65; 63:23; 76:5–10, 114–17).

Doktrina ug mga Pakigsaad 6:10–12. Ang gasa ni Oliver Cowdery

Ang gasa nga gihuptan ni Oliver Cowdery nga gihulagway sa Doktrina ug mga Pakigsaad 6:10–12 mao ang gasa sa pagpadayag (tan-awa sa D&P 8:2–5). Ang tanang mga anak sa Langitnong Amahan makadawat og espirituhanong giya kon sila mag-ampo ug magtinguha sa Iyang panabang. Kadtong kinsa nabunyagan, makadawat sa gasa sa Espiritu Santo, ug kon nagkugi sa pagsunod sa mga sugo makadawat sa gasa sa pagpadayag.

Doktrina ug mga Pakigsaad 6:14–17. “Sa makadaghan nga ikaw nagpakisayud”

Si Oliver Cowdery mao ang usa sa unang mga indibidwal nga nangutana sa Dios mahitungod sa buhat ni Propeta Joseph Smith. Sama nga buhaton sa matag usa nato, si Oliver kinahanglang makat-on unsaon sa pag-ila sa mga pagpakita sa Espiritu. Gikan sa mga pulong sa Ginoo nga anaa sa Doktrina ug mga Pakigsaad 6:14–15, si Oliver nakahibalo nga nakadawat siya og balaang giya kon mag-ampo siya kanuna. Gipahinumduman sa Ginoo si Oliver nga agig tubag sa iyang mga pag-ampo ang Espiritu mitudlo kaniya ug milamdag sa iyang hunahuna (tan-awa sa D&P 6:14–15). Ang Ginoo mipasabut usab nga ang saksi sa pagkatinuod sa gipahiuli nga ebanghelyo nga nadawat ni Oliver niining paagiha maoy migiya kaniya gikan sa Palmyra hangtud sa Harmony ug sa buhat nga karon iyang gitrabaho. Pinaagi sa pagpahinumdom ni Oliver sa nangaging mga kasinatian sa pagpadayag, ang Ginoo mitabang nga madugangan ang kapasidad ni Oliver sa pag-ila og pagpadayag pinaagi sa Espiritu sa umaabut.

Si Elder Richard G. Scott (1928–2015) sa Korum sa Napulog Duha ka mga Apostoles mitudlo:

“Usa sa mahinungdanong mga leksyon nga angayng makat-unan sa matag usa nato mao ang pagpangayo. Nganong ang Ginoo gusto nga kita mag-ampo Kaniya ug mangayo? Kay kana ang paagi nga ang pagpadayag madawat. …

“Kon inyong gibati nga wala tubaga sa Ginoo ang inyong mga pag-ampo, pamalandunga kining mga kasulatan [D&P 6:14–15]—dayon pangita og mga ebidensya sa inyong kaugalingong kinabuhi nga Siya nakatubag na ninyo” (“Unsaon Pag-angkon og Pagpadayag ug Inspirasyon alang sa Inyong Personal nga Kinabuhi,” Liahona, Mayo 2012, 45, 47).

Doktrina ug mga Pakigsaad 6:18–19. “Pagmaunungon sa akong sulugoon nga si Joseph”

Pinaagi sa pagpadayag nga narekord sa Doktrina ug mga Pakigsaad 6, ang Ginoo misiguro ni Oliver Cowdery nga si Joseph Smith mao ang Iyang sulugoon. Nakahibalo si Oliver nga siya adunay katungdanan nga “magmaunungon,” o matinud-anon, ug mosuporta sa sulugoon sa Ginoo (D&P 6:18) ug mapailubong modawat og “pahimangno,” o koreksyon, gikan kaniya (D&P 6:19). Sa iyang suod nga pakig-uban sa pagtrabaho uban sa Propeta, si Oliver gitambagan usab sa Ginoo sa “pagpahimangno” ni Joseph kon gikinahanglan (D&P 6:19). Ang Propeta adunay tawhanong mga kahuyang ug wala moangkon nga perpekto. Sa duol na ang katapusan sa iyang kinabuhi, si Joseph Smith mipahayag, “Wala gayud ako moingon kaninyo nga perpekto ako; apan walay sayop sa mga pagpadayag nga akong gipanudlo” (Mga Pagtulun-an sa mga Presidente sa Simbahan: Joseph Smith [2007], 632). Hinoon, sa paghulagway sa mga kahuyang sa iyang kabatan-on, mipasabut ang Propeta sa iyang kinaiya: “Walay usa nga angay maghunahuna nga ako nasayop sa usa ka dako o bug-at nga mga sala. Ang kabubut-on sa paghimo niini wala gayud sa akong kinaiya” (Joseph Smith—Kasaysayan 1:28).

Si Elder D. Todd Christofferson sa Korum sa Napulog Duha ka mga Apostoles nakaobserbar: “Si Joseph Smith usa ka mortal nga tawo nga naningkamot sa pagtuman sa dako, balaang natudlo nga misyon batok sa bisan unsa nga mga babag. Ang katingalahan lang dili nga wala siya magpakita og tawhanong mga kapakyasan, apan nga siya nagmalampuson sa iyang misyon. Ang iyang mga bunga dili ikalimud ug dili ikalimud nga maayo” (“The Prophet Joseph Smith” [Brigham Young University–Idaho devotional, Sept. 24, 2013], byui.edu/devotionalsandspeeches).

gawas nga bahin sa balay nga tabla sa pamilyang Smith

Ang balay nga tabla nila ni Joseph Smith Sr. ug Lucy Mack Smith sa Manchester Township, New York, diin nagpuyo si Oliver Cowdery samtang nagtudlo niana nga dapit

Doktrina ug mga Pakigsaad 6:22–24. “Wala ba Ako magsulti og kalinaw nganha sa imong hunahuna …?”

Ang pagpadayag madawat sa lain-laing mga paagi. Sumala sa narekord sa Doktrina ug mga Pakigsaad 6:22–24, ang Ginoo mitabang ni Oliver Cowdery nga makahibalo nga siya espirituhanong gigiyahan pinaagi sa pagdawat og pagbati sa kalinaw. Si Elder Richard G. Scott mipamatuod: “Ang pagbati og kalinaw mao ang kasagaran nga mapamatuorong saksi nga akong nasinati sa personal. Dihang ako nabalaka kaayo sa usa ka importanting butang, naningkamot og sulbad nga walay paglampus, gipadayon nako ang paningkamot uban sa pagtuo. Unya, ang kalinaw nga anaa kanunay miabut, mihupay sa akong mga kabalaka, sigun sa Iyang gisaad” (“Ang Paggamit sa Langitnon nga Gasa sa Pag-ampo,” Liahona, Mayo 2007, 10).

Doktrina ug mga Pakigsaad 6:25–37

Mitambag ang Ginoo ngadto ni Joseph Smith ug Oliver Cowdery sa paghubad ug dili magduha-duha ug mahadlok

Doktrina ug mga Pakigsaad 6:25–28. Duha ka saksi sa Pagpahiuli

Ang ikaduhang gasa nga gisaad ngadto ni Oliver Cowdery mao ang gasa ug mga yawe sa paghubad. Ang Ginoo mipasabut nga si Propeta Joseph Smith ug Oliver mahimong duha ka saksi nga mopamatuod nga ang Iyang mga pulong gidala ngadto sa kahayag. Importante nga si Oliver anaa sa kiliran ni Joseph isip saksi kon ang laing importante nga mga panghitabo sa Pagpahiuli mahitabo. Pananglit, si Oliver miapil sa mosunod:

  1. Ang paghubad sa Basahon ni Mormon ug sa pagmantala niini (tan-awa sa pahibalo sa Joseph Smith—Kasaysayan 1:71).

  2. Ang pagpahiuli sa Aaronic Priesthood pinaagi ni Juan nga Bautista (tan-awa sa D&P 13).

  3. Ang pagpahiuli sa Melchizedek Priesthood pinaagi nila ni Pedro, Santiago, ug Juan (tan-awa sa Joseph Smith—Kasaysayan 1:72).

  4. Ang organisasyon sa Simbahan uban sa duha ka elder nga mangulo niini (tan-awa sa D&P 20:2–3).

  5. Ang pagpahiuli sa mga yawe sa priesthood pinaagi nila ni Moises, Elias, ug Elijah (tan-awa sa D&P 110).

Doktrina ug mga Pakigsaad 6:32, 37. “Hunahunaa … ang akong mga kamot ug mga tiil”

Wala mahibaloi kon ang Doktrina ug mga Pakigsaad 6:32, 37 nagpasabut sa literal o sa kasinatian nga adunay gisimbolo. Ang Ginoo nagpahinumdom lang ni Oliver sa usa ka kasinatian nga iyang nasinati sa sayo pa sa dihang una niyang nadunggan ang mahitungod ni Propeta Joseph Smith ug ang bulawan nga mga palid (tan-awa sa komentaryo sa dugang makasaysayanong background alang sa D&P 6 niini nga manwal).

Doktrina ug mga Pakigsaad 8: Dugang nga Makasaysayanong Background

Samtang naglihok isip tigsulat alang ni Propeta Joseph Smith atol sa paghubad sa Basahon ni Mormon, si “Oliver Cowdery ganahan na kaayo nga makabaton og gahum sa paghubad nga itugyan diha kaniya” (Joseph Smith, sa History of the Church, 1:36). Misaad ang Ginoo ni Oliver nga “bisan ingon nga ikaw nagtinguha kanako busa kini mahimo nganha kanimo” ug misulti kaniya, “Ako motugyan nganha kanimo og usa ka gasa, kon ikaw magtinguha kanako, sa paghubad, bisan ang akong sulugoon nga si Joseph” (D&P 6:8, 25). Ang tinguha ni Oliver sa paghubad mahimo nga nagkadako samtang siya ug si Joseph nakasinati sa mga istorya diha sa Basahon ni Mormon nga may kalabutan sa gasa sa paghubad (tan-awa sa Mosiah 8:9–16). Ubos niini nga mga kahimtang, si Oliver pinaagi ni Propeta Joseph Smith nakadawat og mga instruksyon nga narekord sa Doktrina ug mga Pakigsaad 8.

Doktrina ug mga Pakigsaad 8

Ang Ginoo mitabang ni Oliver Cowdery nga makasabut sa espiritu sa pagpadayag

Doktrina ug mga Pakigsaad 8:1, 10–11. “Pangayoon sa hugot nga pagtuo, uban sa matinuoron nga kasingkasing”

Sa miaging pagpadayag, si Oliver Cowdery gisaaran og gasa sa paghubad (tan-awa sa D&P 6:25). Kini nga gasa, hinoon, magkinahanglan nga si Oliver “mangayo sa hugot nga pagtuo, uban sa matinuoron nga kasingkasing, nagtuo” (D&P 8:1) aron makadawat sa tabang sa Dios sa paghubad.

Ang saad nga makadawat og kahibalo ug pagpadayag gikan sa Dios alang sa tanan nga mangayo pinaagi sa hugot nga pagtuo uban sa matinuoron nga kasingkasing, magtuo nga sila makadawat. Si Elder M. Russell Ballard sa Korum sa Napulog Duha ka mga Apostoles mihatag og gibug-aton sa importansya sa pagpangutana sa Dios kon kita nagkinahanglan og kahibalo ug pagsabut:

“Karon nagpuyo kita sa usa ka kalibutan diin ang mga tawo dili mangutana sa Dios—mura og ganahan sila mangutana kang Google. Bisan gani mahitungod sa mga pangutana sa pagtuo, adunay daghan kinsa nagsalig sa Internet nga mohatag og tukma, makiangayon, ug balanse nga mga tubag sa ilang mga pangutana kay sa ilang pagsalig sa sukaranan nga tinubdan sa kamatuoran, ang atong Langitnong Amahan. …

“… Karon ang Internet puno niadtong naghulat aron sa pagpangilad sa mga walay kahibalo ug walay kasinatian.

“Sa atong pagsiksik alang sa kamatuoran sa ebanghelyo, dili lamang nato gikinahanglan ang pagpangita og masaligan nga mga tinubdan apan kinahanglan usab natong mohatag sa Ginoo og pareha nga panahon sa atong inadlaw-adlaw nga mga paninguha. Kinahanglan natong tun-an ang mga kasulatan ug ang mga pulong sa mga sulugoon sa Ginoo. Kinahanglan natong magpakabuhi og matarung sa atubangan sa Dios—kinahanglan natong magbuhat sa Iyang kabubut-on [tan-awa sa Juan 7:16–17]. Ug dili gayud nato mapalabihan ang kamahinungdanon sa pagdala sa atong espirituhanon nga mga kabalaka ngadto sa Dios ug mosalig sa Iyang pagdasig ug paggiya”(“Women of Dedication, Faith, Determination, and Action” [pakigpulong nga gihatag sa Brigham Young University Women’s Conference, Mayo 1, 2015], 5–6, womensconference.ce.byu.edu/transcripts).

Doktrina ug mga Pakigsaad 8:2–3. “Ako mosulti kanimo diha sa imong hunahuna ug sa imong kasingkasing”

Usa ka paagi nga ipadayag sa Dios ang Iyang kabubut-on ngadto sa Iyang mga anak mao ang pinaagi “sa espiritu sa pagpadayag” (D&P 8:3). Sama sa gipasabut sa Ginoo ngadto ni Oliver Cowdery pinaagi ni Propeta Joseph Smith, naglakip kini sa hunahuna (salabutan) ug sa kasingkasing (mga pagbati) (tan-awa sa D&P 8:2).

Ang pagpadayag mahimong moabut sa atong kasingkasing o sa atong hunahuna o sa duha. Usa ka paagi nga moabut ang pagpadayag sa atong kasingkasing ug hunahuna kon ang dinasig nga mga hunahuna o mga ideya moabut sa atong hunahuna ug ikumpirmar nga tinuod pinaagi sa espirituhanong mga pagbati nga moabut sa atong kasingkasing. Si Elder Richard G. Scott mipasabut og dugang nga mga paagi nga ang Espiritu makigsulti sa atong hunahuna ug kasingkasing:

“Ang usa ka impresyon ngadto sa hunahuna piho kaayo. Ang detalyado nga mga pulong mahimong madungog o mabati ug masulat nga daw gidikta ang mga instruksyon.

“Ang komunikasyon ngadto sa kasingkasing mao ang kinatibuk-ang impresyon. Ang Ginoo sa kasagaran magsugod pinaagi sa paghatag og impresyon. Kon nahibaloan ang kaimportante niini ug kini gisunod, ang tawo makaangkon og dugang nga kapasidad sa pagdawat pa og detalyado nga instruksyon ngadto sa hunahuna. Ang impresyon ngadto sa kasingkasing, kon sundon, malig-on pinaagi sa mas piho nga instruksyon ngadto sa hunahuna” (“Helping Others to Be Spiritually Led” [address to Church Educational System religious educators, Ago. 11, 1998]; tan-awa usab sa Teaching Seminary: Preservice Readings [manwal sa Church Educational System, 2004], 55).

Harmony, Pennsylvania, dapit

Talan-awon sa dapit sa Harmony, Pennsylvania, (litrato ca. 1897–1927)

Sa Maayong Kabubut-on sa Church History Library and Archives

Doktrina ug mga Pakigsaad 8:3. Si Moises ug ang espiritu sa pagpadayag

Mipasabut ang Ginoo nga “ang espiritu sa pagpadayag” nga gisaad ngadto ni Oliver Cowdery, nga naangkon ni Propeta Joseph Smith, mao ang sama nga espiritu nga naggiya ni Moises samtang nangulo siya sa mga anak ni Israel agi sa Pulang Dagat (tan-awa sa D&P 8:3). Si Elder Jeffrey R. Holland sa Korum sa Napulog Duha ka mga Apostoles mipasabut sa pipila ka mga paagi diin ang ehemplo ni Moises makatabang nato nga mas makasabut sa espiritu sa pagpadayag:

“Ngano nga ang Ginoo mogamit sa ehemplo sa pagtabok sa Pulang Dagat isip sukaranang ehemplo ‘sa espiritu sa pagpadayag’? Nganong wala Niya gamita ang Unang Panan-awon? … O ang panan-awon sa igsoon ni Jared? Hinoon, magamit unta Niya ang bisan unsa niini, apan wala Niya gamita. Dinhi aduna Siyay laing gihunahuna nga katuyoan.

“Una sa tanan, ang pagpadayag hapit kanunay moabut agig tubag sa usa ka pangutana, sa kasagaran sa dinalian nga pangutana—dili kanunay, apan kasagaran. Ang hagit ni Moises mao kon unsaon nga siya ug ang mga anak ni Israel makalingkawas [sa] ilang lisud kaayo nga kahimtang. …

“Magkinahanglan usab ikaw og impormasyon, apan sa mga butang nga labing importante ingon og dili kini moabut gawas kon gusto nimo kini sa dinalian, matinud-anon, mapainubsanon nga paagi. Gitawag kini ni Moroni nga magtinguha ‘uban sa tinuod nga katuyoan’ (Moroni 10:4). Kon ikaw magtinguha sa ingon nga pamaagi, ug magpabilin niana, wala kaayoy mahimo ang kaaway sa pagbatok nga makapalayo kaninyo gikan sa matarung nga dalan.

“Ang Pulang Dagat maabli ngadto sa matinuorong nagtinguha og pagpadayag. Ang kaaway adunay gahum sa pagbabag sa agianan, sa pagpundok sa kasundalohan ni Paraon ug mosunod sa atong pag-ikyas hangtud sa daplin sa katubigan, apan dili makabuntog kon mopili kita nga dili motugot kaniya. Mao kana ang unang leksyon mahitungod sa pagtabok sa Pulang Dagat, sa imong mga Pulang Dagat, pinaagi sa espiritu sa pagpadayag.

“Sa proseso sa pagpadayag ug sa paghimo og importante nga mga desisyon, ang kahadlok, hapit kanunay maoy makaingon sa kadaut, usahay makaparalisar. …

“Mao gyud kana ang problema nga giatubang sa mga anak ni Israel sa daplin sa katubigan sa Pulang Dagat. Mao kana ang ikaduhang leksyon. Kini adunay kalabutan tanan sa pagpabilin nga matinud-anon sa unang gihatag nga kahayag. Ang rekord nag-ingon, ‘Ug sa paghiduol ni Paraon, ang mga anak sa Israel nanaghayat sa ilang mga mata, ug ania karon, ang mga Ehiptohanon nanagsunod kanila; ug nangahadlok sila pag-ayo’ (Exodo 14:10).

“… Ang atong hugot nga pagtuo pagasulayan samtang atong batukan ang pagduha-duha sa kaugalingon. Sa umaabut nga mga adlaw milagroso kitang makagawas sa Ehipto—ingon og gawasnon, ingon og padulong na sa atong dalan—apan maabtan gihapon sa laing babag, sama nianang naghulat kanato nga katubigan. Nianang mga higayuna kinahanglang batukan nato ang tintasyon nga matarantar ug mohunong.

“‘Ug si Moises miingon sa katawhan, Ayaw kahadlok; dili kamo maglihok, ug tan-awa ninyo ang kaluwasan sa Ginoo. … Ang Ginoo makig-away alang kaninyo’ (Exodo 14:13–14).

“Usab, mao kana ang ikaduhang leksyon sa espiritu sa pagpadayag. Human nimo makuha ang mensahe, human nimo mabayri ang bili sa pagbati sa Iyang gugma ug madungog ang pulong sa Ginoo, padayon. Ayaw kahadlok, ayaw pagtan-aw sa gagmay nga mga tumong, ayaw pagbagulbol.

“Ang ikatulong leksyon gikan sa espiritu sa pagpadayag sa Ginoo sa milagro nga pagtabok sa Pulang Dagat mao nga, kon ang Dios misulti kanimo nga ang usa ka butang eksakto, kon ang usa ka butang tinuod gayud alang kanimo, mohatag Siya sa paagi kanimo aron matuman kini” (“Remember How You Felt,” New Era, Ago. 2004, 7–8).

Doktrina ug mga Pakigsaad 8:4–5. “Kini mao ang imong gasa; gamita kini”

Ang tanan nga nagtinguha sa pagsunod ni Jesukristo makatagamtam sa gasa sa pagpadayag nga gisaad ngadto ni Oliver Cowdery (tan-awa sa D&P 6:10–12). Ang Ginoo mitudlo nga aron makadawat niini nga gasa kinahanglan nga kita “mogamit niini” (D&P 8:4). Si Elder David A. Bednar sa Korum sa Napulog Duha ka mga Apostoles mihisgot unsaon nato sa “paggamit” ang espiritu sa pagpadayag:

“Ang sinsero nga tinguha ug pagkatakus nagdapit sa espiritu sa pagpadayag nganhi sa atong mga kinabuhi. …

“… Diha sa mga kasulatan, ang impluwensya sa Espiritu Santo sa kasagaran gihulagway isip ‘usa ka hinay nga hinagawhaw nga tingog’ (1 Mga Hari 19:12; 1 Nephi 17:45; tan-awa usab sa 3 Nephi 11:3) ug sa ‘tingog nga hingpit sa kalumo’ (Helaman 5:30). Tungod kay ang Espiritu mohagawhaw ngari kanato sa hinay ug sa kalumo, kini sayon rang sabton nganong kita kinahanglan nga maglikay sa dili maayo nga media, pornograpiya, ug makadaut, makaadik nga mga butang ug mga kinaiya. Kini nga mga himan sa kaaway makadaut ug sa kadugayan moguba sa atong kapasidad sa pag-ila ug sa pagtubag sa malumo nga mga mensahe gikan sa Dios nga gihatud pinaagi sa gahum sa Iyang Espiritu. Ang matag usa kanato kinahanglan tinuoray nga maghunahuna ug mainampuon nga mamalandong kon unsaon nato sa pagsalikway ang mga pagdani sa yawa ug sa minatarung “gamita kini,” gani ang espiritu sa pagpadayag diha sa atong mga kinabuhi ug sa atong mga pamilya” (“Ang Espiritu sa Pagpadayag,” Liahona, Mayo 2011, 88).

Doktrina ug mga Pakigsaad 8:6–9. Unsa “ang gasa ni Aaron”?

Sa dihang ang pagpadayag sa Doktrina ug mga Pakigsaad 8 unang gimantala niadtong 1833 Basahon sa mga Sugo, ang gasa ni Oliver Cowdery gihulagway nga “ang gasa sa paggamit sa sungkod” (tan-awa sa “Book of Commandments, 1833,” pahina 19, josephsmithpapers.org; tan-awa usab sa Jeffrey G. Cannon, “Oliver Cowdery’s Gift,” footnote 9, sa Revelations in Context, ed. Matthew McBride and James Goldberg [2016], 19, tan-awa usab sa history.lds.org). Kini tingali nagpasabut sa usa ka butang nga gigamit ni Oliver Cowdery usahay, nga nailhan nga usa ka makabalaan nga sungkod. Hinoon, si Propeta Joseph Smith ug Oliver Cowdery walay gibilin nga istorya kon sa unsa nga paagi nga kadto nga usa ka “sungkod” gigamit. Sa 1835 nga edisyon sa Doktrina ug mga Pakigsaad, ang mga pulong nga “ang gasa nga maggamit og sungkod” giusab ngadto sa “ang gasa ni Aaron” (tan-awa sa Doctrine and Covenants, 1835,” pahina 161 [seksyon XXXIV, bersikulo 3], josephsmithpapers.org; tan-awa usab sa Melvin J. Petersen, “Preparing Early Revelations for Publication,” Ensign, Peb. 1985, 20). Kini nga kausaban nagpakita nga ang importante nga mensahe mao ang gasa sa pagdawat og pagpadayag ug usab ang gahum nga balaang gigiyahan sa paghubad sa karaang mga rekord.

Sa Biblia mabasa nato ang “katawhan nga nagdawat og espirtuhanong pagpakita pinaagi sa pisikal nga mga butang sama sa mga sungkod, sa bitin nga tumbaga nga gibutang sa usa ka tukon … , usa ka ephod (kabahin sa sinina sa pari nga adunay duha ka bililhong mga bato), ug ang Urim ug Thummim” (Richard E. Turley Jr., Robin S. Jensen, and Mark Ashurst-McGee, “Joseph the Seer,” Ensign, Okt. 2015, 49). Mga istorya sa Biblia nila ni Moises ug sa iyang igsoon nga si Aaron naghulagway sa ilang paggamit sa mga sungkod isip mga instrumento ug dayag nga pagpakita sa kabubut-on ug gahum sa Dios (tan-awa sa Exodo 4:1–5, 17; 7:9–12; 14:15–18; Numeros 17:1–10). Mao nga, ang pulong nga “ang gasa ni Aaron” (D&P 8:6) tingali usa ka kinatibuk-ang pagpasabut sa gasa ni Oliver nga “maggamit og sungkod” ingon man usab nagkumpirma sa sumpay nga gihuptan nila ni Propeta Joseph Smith ug Oliver Cowdery uban sa mga tahas nga gihuptan nila ni Moises ug Aaron. Human giila ang “gasa ni Aaron” nga anaa ni Oliver, ang Ginoo misiguro na usab ni Oliver nga ang gasa sa paghubad idugang ngadto sa mga gasa sa pagpadayag nga iya nang gihuptan kon siya magpakita og hugot nga pagtuo ug “dili [mag]tiaw-tiaw” niining sagrado nga mga gasa (tan-awa sa D&P 8:8–11).

sulod sa balay ni Joseph ug Emma Smith sa Harmony, Pennsylvania

Ang sulod sa giayo nga balay nila ni Joseph ug Emma Smith sa Harmony, Pennsylvania, diin didto nahubad ang kasagaran sa Basahon ni Mormon

Doktrina ug mga Pakigsaad 9: Dugang nga Makasaysayanong Background

Pareha ni Joseph Smith, si Oliver Cowdery makasulti lamang og Iningles ug dili makahubad og karaang rekord gawas kon siya adunay tabang pinaagi sa gahum sa Dios. Gisugdan ni Oliver Cowdery ang iyang pagsulay sa paghubad sa mga palid sa Basahon ni Mormon pinaagi sa gasa ug gahum sa Dios, apan siya “wala mopadayon sumala sa [iyang] nasugdan,” ug mao nga ang kahigayunan gikuha gikan kaniya (D&P 9:5). Sa usa ka pagpadayag nga gihatag pinaagi ni Propeta Joseph Smith, misaad ang Ginoo ni Oliver nga siya adunay umaabot nga oportunidad sa paghubad sa ubang mga rekord. Gitambagan siya sa Ginoo sa pagpadayon sa pagserbisyo isip tigsulat alang sa Propeta hangtud ang hubad sa mga palid makompleto.

Doktrina ug mga Pakigsaad 9

Ang Ginoo nagpadayag sa mga baruganan kabahin sa pagpadayag

Doktrina ug mga Pakigsaad 9:1–11. Ang pagsulay ni Oliver Cowdery sa paghubad

Kita walay daghang mga detalye mahitungod sa pagsulay ni Oliver Cowdery sa paghubad. Siya adunay dakong tinguha sa paghubad sa rekord sa Basahon ni Mormon, apan human siya makasugod, wala siya makapadayon. Ang Ginoo mipasabut nga si Oliver “wala mopadayon sumala sa [iyang] nasugdan” (D&P 9:5) ug miingon nga kon gigamit niya ang mga baruganan sa pagdawat sa pagpadayag, siya “unta makahubad” (D&P 9:10). Gisuspenso sa Ginoo ang oportunidad ni Oliver sa paghubad, apan giingnan Niya si Oliver nga aduna pay “ubang mga talaan” nga siya tugutan nga makatabang sa paghubad (D&P 9:2).

gawas sa balay ni Joseph ug Emma Smith (tunga nga bahin) sa Harmony, Pennsylvania

Ang balay nila ni Joseph ug Emma Smith sa Harmony, Pennsylvania; ang orihinal nga balay mao ang tunga nga bahin (litrato mga 1907).

Sa Maayong Kabubut-on sa Church History Library and Archives

Doktrina ug mga Pakigsaad 9:2. “Uban nga mga talaan Ako aduna”

Bisan og gipahibalo sa Ginoo si Oliver Cowdery nga Siya adunay “uban nga mga talaan” nga magkinahanglan nga hubaron (D&P 9:2; tan-awa usab sa D&P 6:26), wala kita makahibalo kon si Oliver mitabang ba gayud sa paghubad sa bisan hain niini. Hinoon, si Oliver nahimong tigsulat alang ni Propeta Joseph Smith atol sa dinasig nga hubad sa Biblia. Usab, si Joseph Smith sa wala madugay nakakuha og pipila ka mga Egyptian artifacts nga adunay papyri, ug ang pagsusi sa Propeta sa papyri migiya kaniya sa pagdawat og pagpadayag mahitungod sa kinabuhi ug mga pagtulun-an ni Abraham. Samtang wala gayud kita masayud sa tukma giunsa ni Joseph Smith paghubad ang basahon ni Abraham, nakahibalo kita nga si Oliver mitabang kaniya isip usa ka tigsulat.

Doktrina ug mga Pakigsaad 9:5–9. “Ikaw wala maghunahuna gawas sa pagpangutana kanako”

Makadawat kita og personal nga pagpadayag sumala sa kabubut-on ug tayming sa Ginoo. Ang pipila ka paagi nga kita makaandam sa pagdawat og personal nga pagpadayag naglakip sa pag-angkon og matarung nga tinguha (tan-awa sa D&P 6:8, 20), mangayo pinaagi sa hugot nga pagtuo (tan-awa sa D&P 8:1), ug pagsunod sa mga sugo sa Dios (tan-awa sa D&P 63:23). Nakat-on si Oliver Cowdery nga sa dili pa mangayo sa Dios alang sa mga tubag mahitungod sa usa ka isyu, kinahanglan siyang “magtuon niini diha sa [iyang] hunahuna” (D&P 9:8).

Si Elder Dallin H. Oaks sa Korum sa Napulog Duha ka mga Apostoles miklaro sa panginahanglan nga si Oliver kinahanglan nga magtuon ug magbaton og hugot nga pagtuo: “Ang eksakto nga relasyon tali sa pagtuon ug hugot nga pagtuo sa pagdawat sa sagrado nga kahibalo gihulagway sa pagsulay ni Oliver Cowdery sa paghubad sa karaang mga rekord. Napakyas siya tungod kay siya ‘wala maghunahuna,’ gawas sa pagpangutana lang sa Dios. (D&P 9:7.) Gisultihan siya sa Ginoo nga ‘[mag]tuon niini diha sa [iyang] hunahuna’ ug dayon mangutana kon kini husto ba. (D&P 9:8.) Diha lamang ang Ginoo mopadayag kon ang hubad husto ba o dili. Ug sa pagdawat lamang niana nga pagpadayag ang teksto masulat, tungod kay ‘ikaw dili makasulat niana nga sagrado gawas kon kini ihatag kanimo gikan kanako.’ (D&P 9:9.) Sa pag-angkon og sagrado nga kahibalo, ang pagka-eskolar ug rason dili mga alternatibo sa pagpadayag. Kini mao ang mga paagi ngadto sa katapusan, ug ang katapusan mao ang pagpadayag gikan sa Dios” (“Alternate Voices,” Ensign, Mayo 1989, 30).

Ang proseso sa pag-angkon og personal nga pagpadayag sa kasagaran magkinahanglan og paningkamot ug gani pakigbisog sa atong bahin. Si Elder Richard G. Scott mitudlo nganong kinahanglan nga kita mobuhat pa og dugang kay sa pagpangutana lamang: “Nakumbinsir ko nga walay yano nga pormula o pamaagi nga motugot dayon kaninyo sa pagkahimong hanas sa abilidad nga magiyahan pinaagi sa tingog sa Espiritu. Ang atong Amahan naglaum nga kamo makakat-on kon unsaon sa pagbaton nianang balaanong tabang pinaagi sa pagpakita og hugot nga pagtuo diha Kaniya ug sa Iyang Balaang Anak, nga si Jesukristo. Kon kamo nakadawat og dinasig nga giya pinaagi lamang sa pagpangayo, mahimo kamong huyang ug mas magdepende pa diha Kanila. Nasayud sila nga ang mahinungdanong personal nga pagtubo moabut samtang manglimbasug kamo sa pagkat-on kon unsaon nga magiyahan sa Espiritu” (“Aron Makabaton og Espirituhanong Giya,” Liahona, Nob. 2009, 7).

Doktrina ug mga Pakigsaad 9:8–9. “Ang imong dughan moinit diha sulod kanimo … [o] ikaw makabaton og kasamok sa hunahuna”

Pinaagi sa tambag sa Ginoo nga narekord sa Doktrina ug mga Pakigsaad 8:2–3, nakat-unan ni Oliver Cowdery nga ang Ginoo mamulong ngadto sa mga hunahuna ug mga kasingkasing sa Iyang mga anak pinaagi sa gahum sa Espiritu Santo. Sa Doktrina ug mga Pakigsaad 9:8–9, ang Ginoo mipahinumdom ni Oliver nga siya makaila og pagpadayag pinaagi sa iyang mga pagbati ug mga hunahuna. Gitudloan siya sa Ginoo nga kon ang hubad husto, siya “mobati nga kini husto” (D&P 9:8). Ang Ginoo migamit usab sa mga pulong “imong dughan nga moinit diha sa sulod kanimo” (D&P 9:8) sa paghulagway sa mga binuhatan sa Espiritu.

Si Elder Dallin H. Oaks miklaro kon sa unsa nga paagi ang Espiritu makigsulti kanato pinaagi sa kainit sa atong dughan: “Unsa ang gipasabut sa ‘kainit sa dughan’? Pagbati ba kini sa pisikal nga kainit, sama sa kainit tungod sa kalayo? Kon kana mao ang kahulugan, wala gayud ako makasinati og kainit sa dughan. Sa pagkatinuod, ang pulong ‘kainit’ niini nga kasulatan nagpasabut sa usa ka pagbati sa kahupayan ug kakalma. Mao kana ang saksi nga nadawat sa kadaghanan. Mao kana ang pamaagi nga ang pagpadayag maglihok” (“Teaching and Learning by the Spirit,” Ensign, Mar. 1997, 13).

Importante nga hinumduman nga ang mga pamahayag sa Ginoo “imong dughan nga moinit” (D&P 9:8) ug “ikaw makabaton og kasamok sa hunahuna” (D&P 9:9) gihatag ngadto ni Propeta Joseph Smith ug Oliver Cowdery aron sa paggiya kanila samtang maghubad sila sa Basahon ni Mormon. Kon magtinguha kita alang sa espirituhanon nga giya, tingali dili maayo nga maghunahuna nga ang Espiritu Santo makigsulti kanunay kanato niining piho nga paagi. Ang mga kasulatan nagpahinumdom nato nga ang Espiritu Santo makigsulti nato sa lain-laing mga paagi (tan-awa sa D&P 6:23; 8:2–3; 9:8; 11:12–13; 85:6; 128:1).

Si Elder Richard G. Scott mipasabut unsay kahulugan sa “kasamok sa hunahuna” nga gihulagway sa Doktrina ug mga Pakigsaad 9:9: “Ang Ginoo mipasabut, ‘Apan kon [ang imong gihangyo] dili husto ikaw … makabaton og samok nga hunahuna.’ Kana, alang kanako, usa ka makahasol, bug-at nga pagbati” (“Ang Paggamit sa Langitnong Gasa sa Pag-ampo,” 10).

Si Presidente Spencer W. Kimball (1895–1985) mitudlo:

“Sa atong panahon karon, ingon man sa miaging panahon, daghang mga tawo nagpaabut nga kon duna man ugaling pagpadayag kini moabut uban sa makapatingalang kadasig, mga pagpakita nga makapakurog sa kalibutan. …

“Nagpaabut sa katingalahan, ang usa ka tawo mahimong dili hingpit nga makabantay sa makanunayong pagdagayday sa gipadayag nga komunikasyon” (Mga Pagtulun-an sa mga Presidente sa Simbahan: Spencer W. Kimball [2006], 299–300).

Doktrina ug mga Pakigsaad 9:8–9. Unsa kon kamo wala mobati nga kamo nakadawat og tubag?

Kon kita magdala og importante nga mga pangutana ngadto sa Ginoo pinaagi sa pag-ampo, gisaaran kita nga “kon kini husto … imong mabati nga kini husto. Apan kon kini dili husto ikaw dili makabaton niana nga mga pagbati” (D&P 9:8–9). Hinoon, usahay lisud ang pag-ila kon kita nakadawat ba og tubag.

Si Elder Richard G. Scott mitudlo unsay atong buhaton kon kita wala mobati nga nakadawat kita og tubag gikan sa Dios: “Unsay inyong buhaton kon kamo nangandam og maayo, tinud-anay nga nag-ampo, naghulat og dugay alang sa tubag, ug gihapon walay gibati nga tubag? Mahimo kamong magpasalamat kon mahitabo man kana, kay kana ebidensya sa Iyang pagsalig. Kon kamo nagpuyo nga takus ug ang inyong pagpili uyon kanunay sa pagtulun-an sa Manluluwas ug kamo kinahanglan nga mobuhat, mopadayon uban sa pagsalig. Kon kamo sensitibo sa pagdasig sa Espiritu, usa sa duha ka butang piho nga mahitabo sa tukma nga panahon: mahimong kasamok sa hunahuna, buot ipasabut sayop nga pagpili, o ang kalinaw o ang kainit sa dughan mabati, sa pagpamatuod nga ang inyong gipili husto. Kon kamo nagpuyo nga matarung ug nagbuhat uban sa pagsalig, ang Dios dili motugot nga kamo moabut og layo nga walay pahimangno kon nasayop kamo sa inyong desisyon” (““Ang Paggamit sa Langitnong Gasa sa Pag-ampo,” 10).

Si Presidente Brigham Young mihatag sa mosunod nga pagpasabut: “Kon ako mangayo kaniya sa paghatag kanako og kaalam mahitungod sa gikinahanglan sa kinabuhi, o mahitungod sa akong kaugalingong pagkabutang, o sa akong mga higala, sa akong pamilya, sa akong mga anak, o niadtong akong gidumala, ug dili makadawat og tubag gikan kaniya, ug dayon mobuhat sa labing maayo kutob sa ikatudlo sa akong paghukom, siya mapugos sa pagdawat ug pagtahud niana nga kasabutan, ug iyang buhaton ang tanang paagi” (Mga Pagtulun-an sa mga Presidente sa Simbahan: Brigham Young [1997], 54).