Kapitulo 19

Doktrina ug mga Pakigsaad 50

Pasiuna ug Timeline

Sa dihang miabut si Joseph Smith sa Kirtland, Ohio, sayo sa Pebrero 1831, napanid-an niya nga “pipila ka kahibudngan nga mga hunahuna ug dili tinuod nga mga espiritu ang mikuyanap taliwala sa pipila” ka mga Santos. Misugod siya sa pagtudlo “uban ang gamay nga pagmatngon, ug pipila ka kaalam” aron sa pagtapos niining dili tinuod nga espiritwal nga mga pagpakita (sa Manuscript History of the Church, vol. A-1, pahina 93, josephsmithpapers.org). Pipila ka bulan ang milabay, si Elder Parley P. Pratt mipauli gikan sa usa ka misyon ug nakapaniid og susama nga kinaiya sa mga branch sa Simbahan sa gawas sa Kirtland, busa siya ug pipila sa ubang mga elder miduol ni Joseph Smith alang sa paggiya (tan-awa sa Manuscript History of the Church, vol. A-1, pahina 114, josephsmithpapers.org). Niadtong Mayo 1831, ang Propeta nangutana sa Ginoo kabahin niini nga isyu ug nakadawat sa pagpadayag nga gi-rekord diha sa Doktrina ug mga Pakigsaad 50. Niini nga pagpadayag, ang Ginoo mitudlo sa mga Santos sa pagtudlo ug pagdawat sa ebanghelyo pinaagi sa Espiritu sa Kamatuoran.

Tingpamulak sa 1831Ang pipila sa mga miyembro sa Simbahan sa Kirtland na-impluwensya pinaagi sa dili tinuod nga espiritwal nga mga pagpakita.

Hinapos sa Marso 1831Mibalik si Parley P. Pratt ngadto sa Kirtland gikan sa usa ka misyon didto sa Teritoryo sa Indian ug sa Missouri.

Abril 30, 1831Nanganak og kaluha si Emma Smith, usa ka lalaki ug usa ka babaye, kinsa ang duha namatay sulod sa pipila ka oras.

Mayo 9, 1831Ang Doktrina ug mga Pakigsaad 50 nadawat.

Mayo 9, 1831Gisagup ni Joseph ug Emma Smith ang masuso nga kaluha ni John ug Julia Murdock, human mamatay si Julia sa pagpanganak sa kaluha niadtong Abril 30.

Hunahunaa ang bisan unsang mga pangutana nga ikaw aduna mahitungod sa doktrina, kasaysayan, o posisyon sa Simbahan kabahin sa sosyal nga mga isyu. Unsa ang angay nga mga paagi sa pag-angkon sa mga tubag sa Ginoo ngadto niining matang sa mga pangutana? Samtang inyong tun-an ang Doktrina ug mga Pakigsaad 50, pangitaa ang mga panudlo nga motabang kaninyo sa pagdapit ug matudloan pinaagi sa Espiritu samtang kamo nangita sa mga tubag.

Doktrina ug mga Pakigsaad 50: Dugang nga Makasaysayanong Background

Nabalaka mahitungod sa mga pagpakita sa dili tinuod nga mga espiritu taliwala sa mga Santos, si Parley P. Pratt ug uban miduol ni Propeta Joseph Smith sa 1831 alang sa panudlo.

Si Elder Parley P. Pratt usa sa upat ka mga misyonaryo kinsa mitabang sa pagkabig og sobra sa 100 ka mga tawo didto dapit sa Kirtland, Ohio, hinapos sa tinglarag sa 1830. Human magpadayon sa iyang misyon sa pagsangyaw sa ebanghelyo taliwala sa mga American Indian sa kasadpan sa Missouri, si Elder Pratt mibalik sa Ohio sa hinapos sa Marso 1831. Nianang panahona nasaksihan niya ang makahibulong nga mga kinaiya sa mga miyembro sa Simbahan sa Kirtland. Misaysay siya: “Samtang mibisita ako sa nagkalain-laing mga branch, pipila ka katingalahang espiritwal nga mga kalihokan ang gipakita, nga makalagot, kay sa makapalig-on. Pipila ka mga tawo ingon og kakuyapon, ug naghimo og katingalahang mga lihok, ug nagpatuy-od o ngil-aron ang ilang mga nawong. Ang uban nagsalimuang, ug ang ilang mga lawas naglubag-lubag, nagkonbulsyon, nagsalimuang, ug uban pa. Ang uban ingon og adunay mga panan-awon ug mga pagpadayag, nga dili makapalig-on, ug dili nahiuyon sa doktrina ug espiritu sa ebanghelyo. Sa laktod, usa ka dili tinuod ug bakakon nga espiritu ingon og misulod sa Simbahan” (Autobiography of Parley P. Pratt, ed. Parley P. Pratt Jr. [1938], 61).

Gihulagway ni Propeta Joseph Smith ang dili tinuod nga espiritwal nga mga pagpakita nga diha atol niana nga panahon: “Wala madugay human ang Ebanghelyo na-estabilisar sa Kirtland, ug atol sa pagkawala diha sa mga awtoridad sa Simbahan, daghang dili tinuod nga mga espiritu ang gipaila, daghang katingalahang mga panan-awon ang nakita, ug daghang binuang, masibutong mga ideya giabi-abi; mga lalaki [managan] guwa sa pultahan ubos sa impluwensya niini nga Espiritu, ug pipila kanila mitungtong sa mga tuod sa kahoy ug misinggit, ug tanang matang sa mga pagpatuyang ilang gihimo: usa ka lalaki migukod og bola nga iyang giingon nga nakita niya nga naglupad sa hangin, hangtud miabut siya sa usa ka pangpang sa dihang milukso siya ngadto sa tumoy sa usa ka kahoy nga miluwas sa iyang kinabuhi, ug daghang binuang nga mga butang ang gisudlan, gituyo sa pagdala og kaulawan sa simbahan sa Dios; aron ang Espiritu sa Dios mopahawa; ug sa pagwagtang ug paglukat ug pagguba niadtong mahimayaong mga baruganan nga napalambo alang sa kaluwasan sa tawhanong pamilya” (sa Manuscript History of the Church, vol. C-1, pahina 1311, josephsmithpapers.org).

Naila ni Parley P. Pratt nga kining makalibug nga kinaiya migiya sa uban sa pagpangita og katin-awan gikan sa Propeta: “Gibati ang atong kahuyang ug kawalay kasinatian, ug aron kita dili masayop sa paghukom kabahin niining katingalahang espiritwal nga butang, ako mismo, si John Murdock, ug pipila sa ubang mga Elder, miadto ni Joseph Smith, ug naghangyo kaniya sa pagpangutana sa Ginoo kabahin niining mga espiritu o mga pagpakita” (Autobiography of Parley P. Pratt, 61–62).

Doktrina ug mga Pakigsaad 50:1–9

Ang Ginoo mipasidaan sa mga elder sa Simbahan mahitungod sa dili tinuod nga mga espiritu

Basaha ang Doktrina ug mga Pakigsaad 50:1–9, nga mangita sa pasidaan sa Ginoo mahitungod sa mga katuyoan ug mga pamaagi ni Satanas.

Ang Doktrina ug mga Pakigsaad 50:2–3. “Si Satanas nagtinguha sa paglimbong kaninyo”

Mipasidaan ang Ginoo sa mga Santos nga adunay dili tinuod nga mga espiritu ibabaw sa yuta kinsa, uban ni Satanas, nagtinguha sa paglimbong ug paglaglag sa mga anak sa Dios. Si Presidente Boyd K. Packer (1924–2015) sa Korum sa Napulog Duha ka mga Apostoles mipahimatngon sa mga miyembro sa Simbahan sa dili magpalinga sa hinimo-himo nga mga pagbati o dili tinuod nga mga espiritu:

“Kanunay gayud pagbantay basin pa unya kamo malingla pinaagi sa inspirasyon gikan sa sayop nga tinubdan. Mahimong mahatagan kamo og dili tinuod nga espiritwal nga mga mensahe. Adunay mini nga mga espiritu sama lamang nga adunay mini nga mga anghel. (Tan-awa sa Moro. 7:17.) …

“Ang espiritwal nga bahin kanato ug ang emosyonal nga bahin kanato higpit kaayo nga pagkasumpay nga [kini] posible nga masaypan ang kalit nga emosyonal nga kadasig nga usa ka butang nga espiritwal. Usahay nakahibalo kita og mga tawo kinsa nakadawat og unsay ilang gituohan nga espiritwal nga mga pag-aghat gikan sa Dios, nga kadto kalit nga mga pag-aghat diha sa mga emosyon o mga gikan sa kaaway” (“The Candle of the Lord,” Ensign, Ene. 1983, 55–56).

Sa laing higayon, si Presidente Packer namulong kalabut sa importansya sa pag-ila tali sa tintasyon gikan sa yawa ug sa usa ka tinuod nga pagpadayag gikan sa Ginoo:

“Adunay mini nga mga pagpadayag, mga pag-aghat gikan sa yawa, mga tintasyon! Kutob nga kamo buhi, sa bisan unsang paagi ang kaaway mosulay sa pagdala nga kamo mahisalaag. …

“Si Propeta Joseph Smith miingon nga ‘walay mas dako nga kadaot ngadto sa mga tawo kay sa mahimong ubos sa impluwensya sa usa ka dili tinuod nga espiritu kon ilang gihunahuna nga anaa kanila ang Espiritu sa Dios’ [Teachings of the Prophet Joseph Smith, p. 205]. …

“Kon nakadawat kamo og pag-aghat sa paghimo og butang nga naghimo kaninyo nga mobati og dili maayo, butang nga inyong nahibaloan sa inyong hunahuna nga sayop ug sukwahi sa mga baruganan sa pagkamatarung, ayaw pagsunod niini!” (“Personal Revelation: The Gift, the Test, and the Promise,” Ensign, Nob. 1994, 61).

Doktrina ug mga Pakigsaad 50:4–9. “Mga limbongan ug mga tigpakaaron -ingnon”

Mipasidaan ang Ginoo sa mga Santos sa Kirtland mahitungod sa “mga limbongan ug mga tigpakaaron-ingnon” tali sa mga miyembro sa Simbahan (D&P 50:6). Si Elder M. Russell Ballard sa Korum sa Napulog Duha ka mga Apostoles mipasabut nga kinahanglan gayud nga kita magbantay sa mini nga mga propeta ug mini nga mga magtutudlo:

“Isip mga Apostoles ni Ginoong Jesukristo, amo kining katungdanan nga mahimong magbalantay diha sa tore, magpasidaan sa mga miyembro sa Simbahan nga magbantay sa mini nga mga propeta ug mini nga mga magtutudlo kinsa naghulat aron sa paglaang ug pagguba sa hugot nga pagtuo ug pagpamatuod. Karon kami mopasidaan kaninyo nga adunay mitumaw nga mini nga mga propeta ug mini nga mga magtutudlo; ug kon kita dili magbantay, bisan kadtong lakip sa matinud-anong mga miyembro sa Ang Simbahan ni Jesukirsto sa mga Santos sa Ulahing mga Adlaw mabiktima sa ilang pagpanglingla. …

“Kon maghunahuna kita og mini nga mga propeta ug mini nga mga magtutudlo, mahunahuna nato kadtong misuporta sa klaro kaayo nga sayop nga doktrina o nagdahum nga adunay awtoridad sa pagtudlo sa tinuod nga ebanghelyo ni Kristo sumala sa ilang kaugalingong paghubad. Kanunay kitang maghunahuna nga kanang maong mga indibidwal adunay kalambigitan sa gagmay nga mga grupo nga sukwahi og mga hunahuna diha sa mga ngilit sa katilingban. Hinoon, akong balikon: adunay mini nga mga propeta ug mini nga mga magtutudlo kinsa o sa labing minos nangangkon nga miyembro sa Simbahan. Aduna niadto kinsa, walay awtoridad, nangangkon nga gisuportahan sa Simbahan ang ilang mga produkto ug mga binuhatan. Magbantay kanila” (“Beware of False Prophets and False Teachers,” Ensign, Nob. 1999, 62).

Ang pipila sa mga miyembro sa area sa Kirtland naglihok ingon og sila adunay espiritwal nga gahum o awtoridad nga sa tinuod wala nila mahupti. Busa, ang Ginoo mipaila kanila isip “mga limbongan ug mga tigpakaaron-ingnon” (D&P 50:6). Si Elder Joseph B. Wirthlin (1917–2008) sa Korum sa Napulog Duha ka mga Apostoles mipatin-aw sa tigpakaaron-ingnon ug misugyot kanato sa pagkuha niini gikan sa atong mga kinabuhi:

“Ang pagpakaaron-ingnon … mao ang dili tinuod nga hulagway sa hiyas o pagkamatarung ug nanghambug nga ingon niana nga sa tinuod kita dili. Kon kita nahibalo unsa ang husto ug nagpatuo nga nagsunod niana nga kahibalo apan, sa tinuod, wala, kita mga tigpakaaron-ingnon. Gisalikway sa Manluluwas ang mga tigpakaaron-ingnon sa klaro nga pinulongan [tan-awa sa Mateo 23:27–28; D&P 50:6, 8]. …

“Unsa ang pagabuhaton sa mga Santos sa Ulahing mga Adlaw? Ang tubag yano. Sa hingpit ang mga Santos sa Ulahing mga adlaw walay pagpanlimbong sa tanang aspesto sa ilang mga kinabuhi: diha sa ilang mga panimalay ug mga pamilya, mga calling diha sa Simbahan, sa tanang mga pakigsabut sa negosyo, ug, ilabi na, sa pribado ug personal nga mga bahin sa ilang mga kinabuhi diin sila lamang ug ang Ginoo ang nakakita.

“Mosugyot ako nga eksaminon nato ang atong kinailadmang mga hunahuna ug mga pagbati ug tan-awon kon ang atong mga motibo ug mga lihok putli ba ug dili masaway ug tan-awon kon wala bay pagpanlimbong ug pagpanikas” (“Without Guile,” Liahona, Mayo 1988, 82).

Doktrina ug mga Pakigsaad 50:10–36

Nagtudlo ang Ginoo sa mga elder kon sa unsa nga paagi mahibaloan tali ang dili tinuod nga mga espiritu ug ang Espiritu sa Kamatuoran

Basaha ang Doktrina ug mga Pakigsaad 50:10–25, nga mangita sa mga baruganan nga motabang kaninyo nga mas makasabut kon giunsa sa Espiritu pag-impluwensya kanato.

Doktrina ug mga Pakigsaad 50:13–18. Pagtudlo pinaagi sa Espiritu sa Kamatuoran

Ang mga miyembro sa Simbahan sa Kirtland, Ohio, mitugot sa ilang mga kaugalingon nga ma-impluwensya sa dili tinuod nga mga espiritu, nga nakahimo og kalibog. Nasaypan nila ang katingalahang relihiyosong lihok sa uban nga mga pagpakita sa Espiritu Santo. Gitino sa Ginoo ang tahas sa Espiritu Santo isip ang usa ka “Maghuhupay” ug gipahayag nga ang Espiritu Santo “gipadala aron sa pagtudlo sa kamatuoran” (D&P 50:14), dili sa pagpakaylap og kalibog. Gipasabut usab sa Ginoo nga ang mga elder sa Simbahan gisugo sa pagsangyaw sa ebanghelyo uban ang Espiritu ug kon sila mosulay sa pagbuhat sa mao pinaagi sa lain nga paagi, ang ilang mga pagtudlo dili gikan sa Dios (tan-awa sa D&P 50:17–18). Si Elder Dallin H. Oaks sa Korum sa Napulog Duha ka mga Apostoles mihatag og mga panig-ingnan sa pagtudlo sa mga paagi nga dili pinaagi sa Espiritu:

“Kon kita nagtudlo sa pamaagi nga gisugo sa Ginoo, makapadala siya sa iyang Espiritu aron sa paglig-on ug paglamdag niadtong atong gitudloan. Kon kita wala magtudlo sa iyang paagi—kon kita nagtudlo sumala sa atong kaugalingong kahibalo ug sumala sa atong kaugalingong panabut, ug kon kita nagpaulipon sa atong kaugalingong pagpangandam o ngadto sa kaalam o basahon sa uban—ang atong pagtudlo dili gikan sa Dios’ [D&P 50:18]. …

“Kon kita nagsalig sa pamaagi sa paglalis o pamaligya nga paagi o grupo nga sikolohiya, nagsangyaw kita sa ebanghelyo sa laing paagi, ug kini dili gikan sa Dios. …

“Ang mga butang sa salabutan—rason ug tarung nga panabut—makaandam sa paagi, ug kini makatabang kanato sa atong pagpangandam. Apan kon nahigot kita ngadto niini kay sa ngadto sa Espiritu sa Ginoo, wala kita magtudlo sa ebanghelyo diha sa paagi sa Ginoo” (“Teaching and Learning by the Spirit,” Liahona, Mar. 1997, 8–9).

Kadtong gitawag sa pagtudlo sa ebanghelyo ni Jesukristo kinahanglan gayud nga magtudlo pinaagi sa Espiritu sa kamatuoran (tan-awa sa D&P 50:14, 17).

Gihulagway sa Ginoo ang Iyang ebanghelyo isip “ang pulong sa kamatuoran” (D&P 50:17); busa, kadtong kinsa nagsangyaw sa ebanghelyo kinahanglan nga maningkamot sa pagbuhat sa mao “pinaagi sa Maghuhupay, diha sa Espiritu sa kamatuoran” (D&P 50:17). Ang Espiritu Santo nagpamatuod sa kamatuoran ingon sa pagtudlo niini. Si Elder L. Tom Perry (1922–2015) sa Korum sa Napulog Duha ka mga Apostoles mipasabut kon sa unsa nga paagi kadtong kinsa nagsangyaw sa ebanghelyo makasarang niining importanting panabang sa Espiritu:

“Kini atong pribilehiyo nga makabaton sa Espiritu Santo, usa ka miyembro sa Dios nga Kapangulohan, isip atong kanunay nga kauban, sa paglig-on ug pagdasig kanato sa atong pagpangandam isip mga magtutudlo. Kinahanglan nga andamon nato ang atong mga kaugalingon pinaagi sa pagmasulundon ngadto sa mga sugo sa Dios, nga ang atong pagsalig malig-on kon kita motawag diha sa Ginoo, nga ang Iyang Espiritu unta magpalambo kanato samtang kita nagtudlo. Kon kita aduna sa Espiritu nga mogiya kanato, kita makahimo sa pagtudlo uban sa dakong gahum. …

“Ang atong pagtudlo mahimong epektibo kon kita mobuhat niini nga mapainubsanon pinaagi sa pag-ampo ug sa pagtuon. Kita dayon pagatabangan sa Espiritu sa pagtudlo sa pulong, pinasubay ug pinauyon sa unsay buot sa Ginoo kanato nga itudlo” (“Tudloi sila sa Pulong sa Dios uban sa Tanang Kakugi,” Liahona, Mayo 1999, 8).

Kon ang ebanghelyo itudlo uban sa Espiritu, kadto kinsa andam sa pagdawat sa pulong sa Ginoo malig-on ug maamumahan. Si Elder Jeffrey R. Holland sa Korum sa Napulog Duha ka mga Apostoles mitudlo kon ngano nga ang matag magtutudlo diha sa Simbahan kinahanglang maningkamot nga magiyahan pinaagi sa Espiritu Santo:

“Ang Ginoo sukad wala gayud maghatag og mas tin-aw nga tambag ngadto sa Simbahan kay sa nianang kinahanglan kitang magtudlo sa ebanghelyo ‘pinaagi sa Espiritu, gani ang Maghuhupay nga gipadala sa pagtudlo sa kamatuoran’ [D&P 50:14]. …

“Walay mahangturong pagkat-on ang mahitabo kon wala ang pagpalihok sa Espiritu gikan sa langit. …

“Kana sa tinuod mao ang unsay gusto sa atong mga miyembro kon sila magpundok diha sa usa ka miting o mosulod sa usa ka klasehanan sa bisan unsang paagiha. Kadaghanan sa mga tawo wala moanha sa simbahan sa pagpangita lamang og pipila ka bag-ong mga kamatuoran sa ebanghelyo o sa pakigkita og daang mga higala, bisan tuod kanang tanan importante. Sila mianha nga nagpangita og espirituhanong kasinatian. Gusto sila og kalinaw. Gusto sila nga ang ilang pagtuo malig-on ug ang ilang paglaum mabag-o. Gusto sila, sa ato pa, nga maamumahan pinaagi sa maayong pulong sa Dios, pagalig-unon pinaagi sa mga gahum sa langit. Kita kinsa gitawag sa pagpamulong o pagtudlo o pagpangulo adunay obligasyon sa pagtabang nga mahatag kana, kutob sa labing maayo nga atong mahimo” (“A Teacher Come from God,” Ensign, Mayo 1998, 26).

Kanus-a ang higayon nga inyong gibati ang impluwensya ug paggiya sa Espiritu samtang nagtudlo sa ebanghelyo? Unsa ang kalainan ang nahimo niini diha kaninyo isip usa ka magtutudlo ug ngadto sa inyong gitudloan?

Doktrina ug mga Pakigsaad 50:19–22. Pagdawat sa ebanghelyo pinaagi sa Espiritu sa Kamatuoran

Kadtong kinsa nakadungog sa ebanghelyo ni Jesukristo nga gisangyaw pinaagi sa Espiritu sa Kamatuoran adunay oportunidad sa pagbati sa Maghuhupay, nga malig-on, ug sa pagdawat sa kamatuoran. Kon ang tawo magtudlo og kamatuoran pinaagi sa Espiritu ug ang tigdawat andam sa pagdawat niini pinaagi sa Espiritu “ang duha makadawat og kaayohan ug maglipay nga maghiusa” (D&P 50:22).

Aron ang usa ka tawo makadawat sa mensahe sa ebanghelyo kon kini gitudlo pinaagi sa Espiriru Santo, siya kinahanglan gayud andam nga ma-impluwensya sa Espiritu sa Kamatuoran. Si Brother A. Roger Merrill, kanhiay Presidente sa Kinatibuk-ang Sunday School, mitudlo kon sa unsa nga paagi atong madawat o makat-unan ang ebanghelyo sa labing maayo pinaagi sa Espiritu:

“Kita kanunay nakatutok, sa tukma nga paagi, sa importansya sa pagtudlo pinaagi sa Espiritu. Apan kita kinahanglan mahinumdom nga ang Ginoo nagbutang og managsama, gani labaw pa, nga importansya sa pagdawat pinaagi sa Espiritu. (Tan-awa sa D&P 50:17–22.) …

“Sa atong mga miting sa Simbahan, sa atong personal ug sa pamilya nga pagtuon sa kasulatan, ug … sa atong pagpaminaw sa mga propeta ug mga apostoles sa Ginoo, ang uban kanato makadawat og mas daghan kay sa uban. Ngano? Akong nakat-unan nga kadtong kinsa tinud-anay nga midawat mobuhat dili mominos sa tulo ka mga butang nga wala mabuhat sa uban.

“Una, sila mangita. Nagpuyo kita sa usa ka kalibutan sa kalingawan, usa ka kalibutan nga manan-away. Wala makaamgo niini, makita nato ang atong kaugalingon nga moanha sa komperensya o mosimba nga may kinaiya nga, ‘Ania ako, karon dasiga ko.’ Mahimo kitang magpaling-paling sa espiritwal nga paagi.

“Kon kita mopunting hinoon sa pagdawat sa Espiritu, kita mahimo nga dili na kaayo ma-interesado sa magtutudlo o sa mamumulong nga mokuha sa atong pagtagad ug labaw nga mainteresado kita kabahin sa atong paghatag sa atong pagtagad sa Espiritu. Hinumdumi, nga ang dawata usa ka pulong nga verbo [aksyon]. Kini usa ka prinsipyo sa aksyon. Kini mao ang basihanan sa pagpakita sa hugot nga pagtuo.

“Ikaduha, kadtong kinsa modawat, mobati. Samtang ang pagpadayag moabut sa hunahuna ug kasingkasing, kasagaran kini mabati. Hangtud makat-on kita sa pagpanumbaling niining espirituhanon nga mga pagbati, kasagaran kita dili gani makaila sa Espiritu. …

“Ikatulo, kadtong kinsa nakadawat pinaagi sa Espiritu may hunahuna sa pagbuhat. Ingon sa panudlo ni propeta Moroni, aron makadawat og pagpamatuod sa Basahon ni Mormon, kita kinahanglan gayud nga mangutana ‘uban sa tinuod nga katuyoan’ (Moroni 10:4). Ang Espiritu motudlo kon kita tinuod nga may katuyoan nga mobuhat sa atong nakat-unan” (“Pagdawat pinaagi sa Espiritu,” Liahona, Nob. 2006, 93–94).

Ang mga tigkat-on sa ebanghelyo adunay responsibilidad sa pagkat-on pinaagi sa Espiritu sa kamatuoran (tan-awa sa D&P 50:19–21).

Si Elder Bruce R. McConkie (1915–1985) sa Korum sa Napulog Duha ka mga Apostoles mitudlo sa mosunod nga pag-agid-agid [analogy] aron sa pagtabang sa mga magtutudlo ug sa mga estudyante sa pagsabut sa ilang tahas sa pagkat-on sa ebanghelyo: “Ang lubos, tinuod, tiunay, dinasig sa Espiritu nga pagsimba, diha sa sakrament miting pananglitan, moabut kon ang usa ka mamumulong mamulong pinaagi sa gahum sa Espiritu Santo, ug kon ang kongregasyon nakadungog pinaagi sa gahum sa Espiritu Santo.” Mipadayon si Elder McConkie pinaagi sa pag-ingon nga unsay kasagarang mahitabo sa atong sakrament miting mao nga ang kongregasyon moanha nga andam sa espiritwal nga paagi sa ilang mga kaugalingon sa pagkat-on sa ebanghelyo, “nagtinguha nga pakan-on. Nagdala sila og usa ka dakong sudlanan sa tubig. Ang mamumulong moanha uban sa iyang kalibutanong kaalam ug nagdala og usa ka gamay nga botelya sa tubig ug kini iyang gibu-bu ug nagkagalkal kini sulod sa dako nga sudlanan sa tubig. O kon dili, ingon nga usahay mahitabo, ang tigsangyaw nagkuha sa iyang sugo gikan sa Ginoo ug nahiuyon sa Espiritu ug moanha nga may usa ka dakong sudlanan sa tubig aron sa paghatag sa mensahe, ug walay usa diha sa kongregasyon nga nagdala og bisan unsa nga mas dako kay sa tasa. Ug iyang ibu-bu ang dakong sudlanan sa mahangturon nga kamatuoran ug ang mga tawo mikuha lamang og gamay, igo sa pagtagbaw sa usa ka higayon sa mahangturong kauhaw, kay sa mokuha sa lubos nga mensahe nga naapil. Kini nagkinahanglan sa magtutudlo ug estudyante, nagkinahanglan sa tingsangyaw ug kongregasyon, ang duha kanila naghiusa diha sa hugot nga pagtuo nga makaangkon og tukma nga pagsangyaw o sitwasyon sa pagtudlo” (“The Foolishness of Teaching” [pakigpulong ngadto sa Church Educational System religious educators, Sept. 18, 1981], 9–10).

Doktrina ug mga Pakigsaad 50:23–24. “Kana nga dili makahatag og kaayohan … iya sa kangitngit. Kana nga gikan sa Dios mao ang kahayag”

Ang kangitngit nagrepresentar sa dautang mga impluwensya sa kaaway ug nagsimbolo sa tanan nga dili makapalig-on (tan-awa sa D&P 50:23–24). Ang Basahon ni Mormon nagpahinumdom sa mga magbabasa nga kadtong kinsa “nagpahaylo ngadto sa yawa ug mipili sa mga buhat sa kangitngit kay sa kahayag” gihukman nga “manaog ngadto sa impyerno” (2 Nephi 26:10). Kon ang mga tawo dili mosunod sa mga sugo sa Dios, ang ilang mga sala mobabag sa kahayag nga moabut gikan sa Espiritu sa Ginoo ug makaplagan nila ang ilang mga kaugalingon nga “naglakaw diha sa kangitngit sa udtong tutok” (D&P 95:6). Si Presidente Joseph Fielding Smith (1876–1972) mitudlo: “Walay panultihon nga mas mahinungdanon ang kamatuoran kay sa ‘niana nga dili makahatag og kaayohan dili gikan sa Dios.’ Ug nga kanang dili gikan sa Dios kangitngit, dili kini igsapayan kon kini miabut nga nagtakuban nga relihiyon, mga kinaadman bahin sa pamatasan, pilosopiya, o pagpadayag. Walay pagpadayag gikan sa Dios nga mapakyas sa paghatag og kaayohan” (Church History and Modern Revelation [1953], 1:201–2).

Kadtong kinsa nakadawat sa kahayag sa Dios mahatagan og mag-anam og labaw hangtud sa hingpit nga adlaw (tan-awa sa D&P 50:23–25).

Sa panahon sa Iyang mortal nga pangalagad, ang Manluluwas miingon, “Siya nga magasunod kanako dili gayud magalakaw sa kangitngit, hinonoa magabaton siya sa kahayag nga magahatag og kinabuhi” (Juan 8:12; tan-awa usab sa D&P 45:7). Kadtong kinsa nagsunod sa Ginoo “makadawat og labaw pa nga kahayag” nga nagtugot kanila nga “mahibalo sa kamatuoran” ug “mopapahawa sa kangitngit” palayo (D&P 50:24–25). Si Elder Robert D. Hales sa Korum sa Napulog Duha ka mga Apostoles nagtudlo:

“Ang kahayag mobugaw sa kangitngit. Kon ang kahayag anaa, ang kangitngit mabuntog ug kinahanglan gayud nga mobiya. Labaw ka importante, ang kangitngit dili makabuntog sa kahayag gawas kon ang kahayag mokunhod o mobiya. Kon ang espiritwal nga kahayag sa Espiritu Santo anaa, ang kangitngit ni Satanas mobiya. …

“… Kon atong tugutan ang kahayag sa Espiritu nga magka-awop pinaagi nga mapakyas sa pagsunod sa mga sugo o pinaagi sa dili pag-ambit sa sakrament o pag-ampo o sa pagtuon sa mga kasulatan, ang kangitngit sa kaaway sa tinuod mosulod” (“Gikan sa Kangitngit ngadto sa Katingalahang Kahayag,” Liahona, Mayo 2002, 70–71).

Paghunahuna mahitungod sa usa ka panahon sa dihang kamo nahatagan og kaayohan sa usa ka sitwasyon sa pagkat-on sa ebanghelyo, isip usa ka magtutudlo o usa ka tigkat-on. Ikonsiderar ang pagsulat sa inyong mga hunahuna diha sa inyong journal.

Doktrina ug mga Pakigsaad 50:23–24. “Siya nga nakadawat sa kahayag, ug magpadayon diha sa Dios, makadawat og labaw pa nga kahayag”

Ang ebanghelyo ni Jesukristo nag-andam sa mga anak sa Dios nga mahimong hingpit pinaagi sa usa ka proseso sa espiritwal nga pagtubo. Kadtong kinsa naningkamot sa pagsunod sa Ginoo ug sa pagbaton og kahingpitan sa Iyang kahayag sa kadugayan mahimong hingpit sama Kaniya (tan-awa sa Moroni 10:32; D&P 67:13). Ang Prophet Joseph Smith (1805–1844) mitudlo kon ngano ang pagdawat og espiritwal nga kahayag nag-andam kanato nga mahimong sama sa Dios: “Atong giisip nga ang Dios milalang sa tawo nga adunay pangutok nga mahimong matudloan, ug salabutan nga mahimong mapalambo sa kaangayan sa pagpakabana ug pagkugi nga gihatag sa kahayag nga gitugyan gikan sa langit ngadto sa maalamon; ug kon magkaduol ang tawo sa kahingpitan, mas labaw pa ka tin-aw ang iyang mga panglantaw, ug mas dako pa ang iyang kalipay, hangtud nga iyang mabuntog ang mga kadautan sa iyang kinabuhi ug mawala ang matag tinguha sa pagpakasala; ug sama sa karaan, nga midangat nianang higayon sa hugot nga pagtuo diin giputos siya sa gahum ug himaya sa iyang Tiglalang, ug gibayaw aron magpuyo uban Kaniya. Apan atong hunahunaon nga kini usa ka dapit diin wala pay tawo sukad nga nakaabut niini nga panahona” (Mga Pagtulun-an sa mga Presidente sa Simbahan: Joseph Smith [2007], 251–252).

Ang pagdawat og espiritwal nga kahayag mao ang proseso sa pag-angkon og espiritwal nga kahibalo ug sa pagtubo diha sa personal nga pagkamatrung. Si Presidente Dieter F. Uchtdorf sa Unang Kapangulohan mipasabut kon sa unsa nga paagi ang paninguha sa pagbaton og kahayag naglig-on ug nagklaro og usa ka personal nga pagpamatuod sa kamatuoran:

“Kon mas ipaduol nato ang atong kasingkasing ug hunahuna ngadto sa Dios, mas dugang nga langitnong kahayag ang ihatag kanato. Ug matag higayon nga kita andam ug mangita niana nga kahayag, gipakita nato sa Dios ang atong kaandam sa pagdawat og dugang nga kahayag. Anam-anam, ang mga butang nga kaniadto lubog, ngitngit, ug layo magkaklaro, magkahayag, ug mas mapamilyar ngari kanato.

“Sa samang paagi, kon mopalayo kita sa kahayag sa ebanghelyo, ang atong kahayag magkaawop—dili diha-diha dayon o sa usa ka semana apan anam-anam—hangtud sa atong paglingi ug dili na kita makasabut nganong mituo kita nga ang ebanghelyo tinuod. Ang kanhi natong kahibalo daw sama na og binuang ngari kanato tungod kay ang klaro kaniadto nalubog na usab, hanap, ug layo. …

“Kini akong pagpamatuod nga kining espiritwal nga kahayag makab-ot sa matag anak sa Dios. Modan-ag kini sa inyong hunahuna ug moayo sa inyong kasingkasing ug magdala og kalipay sa inyong mga adlaw. Akong minahal nga mga higala, palihug ayaw ilangay ang oras sa pagpangita ug paglig-on sa inyong personal nga pagpamatuod sa balaang buhat sa Dios, nga mao ang buhat sa kahayag ug kamatuoran.

Ang inyong personal nga pagpamatuod sa kahayag ug kamatuoran dili lamang mopanalangin kaninyo ug sa inyong kaliwatan dinhi sa mortalidad, apan magauban usab kini kaninyo hangtud sa kahangturan, sa mga kalibutan nga walay katapusan” (“Pagdawat og usa ka Pagpamatuod sa Kahayag ug Kamatuoran,” Liahona, Nob. 2014, 22–23).

Sa unsa nga mga paagi kamo nakasinati og dugang nga espirtwal nga kahayag sa inyong pagkaandam nga modawat sa Espiritu sa Dios ug direksyon? Unsa ang inyong mabuhat sa pagpadayon sa pagdapit sa Iyang kahayag nga mas tugob diha sa inyong kinabuhi?

Basaha ang Doktrina ug mga Pakigsaad 50:26–36, nga mangita sa mga saad nga gihimo sa Ginoo ngadto sa Iyang mga sulugoon nga tabangan sila nga mahimong sama Kaniya.

Doktrina ug mga Pakigsaad 50:26–30. “Kini ihatag nganha kaninyo unsa ang inyong pangayoon”

Ang gi-orden nga mga sulugoon sa Ginoo adunay agianan ngadto sa langitnong gahum aron sa pagtabang kanila sa pagtuman sa tanan nga Iyang gikinahanglan. Kining balaan nga tabang mahatag lamang ngadto niadtong kinsa mga “putli ug malimpyohan sa tanan nga sala” (D&P 50:28). Si Elder Richard G. Scott (1928–2015) sa Korum sa Napulog Duha ka mga Apostoles mipasabut kon ngano nga ang atong mga paningkamot nga malimpyohan gikan sa sala nag-andam kanato sa pagdawat sa mga tubag sa atong mga pag-ampo:

“Walay usa nga magdahum nga makadawat og resulta gikan sa pisikal nga balaod nga walay pagsunod niini. Ang espiritwal nga balaod parehas. Ingon nga kita gusto og tabang, kinahanglan gayud kita nga maghunahuna sa pagsunod sa espiritwal nga balaod nga nagkontrolar niana nga tabang. Ang espiritwal nga balaod dili misteryoso. Kini usa ka butang nga atong masabtan. …

“Ang Ginoo adunay gahum sa pagpanalangin kanato sa bisan kanus-a nga panahon. Apan nahibalo kita nga aron makadawat sa Iyang tabang, kita kinahanglan gayud nga makanunayong mosunod sa Iyang mga sugo. …

“‘Ug kon kamo nahimo nga putli ug nalimpyohan gikan sa tanan nga sala, kamo makapangayo og bisan unsa diha sa ngalan ni Jesus ug kini matuman. Apan hibaloi kini, kini ihatag nganha kaninyo unsa ang inyong pangayoon.’ (D&P 50:29–30; italics gidugang.) …

“Ang atong matinguhaon nga pag-ampo matubag kon kini subay sa kabubut-on sa Ginoo. Tungod kay kita dili hingpit nga makasabut sa Iyang kabubut-on, kita kinahanglan gayud nga maglakaw uban sa hugot nga pagtuo. Siya nasayud sa tanan, ug ang Iyang mga desisyon walay sayop. Ang kamatuoran nga ang may kinutuban nato nga kapasidad dili motugot kanato sa pagsabut sa tanan Niya nga mga pakigsabut sa tawo wala magkuto Kaniya sa pagpanalangin kanato. Ang Iyang kabubut-on mao ang atong labing maayo nga pagpili sa kinabuhi, masabtan nato kini sa hingpit o dili. Kon kita molihok naggamit sa atong matarong nga kabubut-on sa makinaadmanong paagi, ang Ginoo molihok sumala sa Iyang kabubut-on.

Ingon ka limitado nga bahin ang atong makita sa mahangturong plano nga Iyang gilalang alang sa matag usa kanato. Salig Kaniya, bisan kon sa mahangturong panan-aw kini temporaryong nagpasakit og maayo. Pagbaton og pailub kon kamo gisugo sa paghulat sa dihang gusto ninyo og diha-diha dayon nga lihok. Mahimo nga sugoon kamo sa pagbuhat og mga butang nga sobra kaayo ka supak sa inyong kabubut-on. Gamit sa hugot nga pagtuo ug sulti, Ang Imong kabubut-on ang matuman. Ang mao nga mga kasinatian, dungganong gibuhat, nag-andam kaninyo ug nagkondisyon kaninyo gani alang sa mas dako nga mga panalangin. Isip inyong Amahan, ang Iyang katuyoan mao ang inyong mahangturong kalipay, inyong mapadayunong paglambo, ang inyong nagtubo nga kapasidad. Ang Iyang tinguha mao ang pagpakigbahin uban kaninyo sa tanan nga Siya aduna” (“Pagbaton og Tabang gikan sa Ginoo,” Liahona, Nob. 1991, 84, 86).

Si Presidente Marion G. Romney (1897–1988) sa Unang Kapangulohan mipasabut kon sa unsa nga paagi ang atong mga pag-ampo makauswag ngadto sa punto nga kini nagpahayag sa kabubut-on sa Dios: “Ang panahon moabut nga kita mahibalo sa kabubut-on sa Dios sa dili pa kita mangayo. Niana ang tanan nga atong giampo mahimong ‘angay’ [D&P 88:64]. Ang tanan nga atong pangayoon mahimong ‘matarung’ [3 Nephi 18:20]. Kana mahimo isip resulta sa matarung nga pagpuyo, kita magpahimulos og maayo sa pakig-uban sa espiritu nga siya modiktar unsay atong pangayoon” (sa Conference Report, Okt. 1944, 56).

Doktrina ug mga Pakigsaad 50:31–35. “Gahum sa pagbuntog sa tanan nga mga butang nga wala niya itugot”

Ingon nga narekord diha sa Doktrina ug mga Pakigsaad 50:31–35, naghatag ang Ginoo sa Iyang mga sulugoon og gahum sa pag-ila sa kalainan tali sa dili tinuod nga mga espiritu ug sa tinuod nga mga espiritu ug sa mga pagpakita gikan sa Dios. Uban niini nga gahum, ang mga lider sa priesthood kinahanglan nga moila o mopahibalo kon sila makamatikod og dili tinuod o dautan nga espiritu, apan sila kinahanglan nga dili manghambug sa ilang abilidad o sila mismo malingla.

Doktrina ug mga Pakigsaad 50:37–46

Nagtawag ang Ginoo sa Iyang mga sulugoon aron sa paglig-on sa Simbahan ug nagsaad nga mag-uban kanila

Basaha ang Doktrina ug mga Pakigsaad 50:37–46, nga mangita sa unsay gisaad sa Ginoo nga buhaton alang niadtong kinsa nagpili nga mosunod Kaniya.

Ang Maayong Magbalantay, ni Del Parson. “Ako ang maayo nga magbalantay” (D&P 50:44).

Doktrina ug mga Pakigsaad 50:40–46. “Kamo dili makaantus sa tanan nga mga butang karon; kamo kinahanglan nga motubo”

Miingon ang Ginoo nga ang mga elder sa Simbahan sama sa “gagmay nga mga bata” sa ilang kahibalo sa ebanghelyo, apan misaad Siya nga kon sila modawat Kaniya, sila “motubo diha sa grasya ug diha sa kamatuoran” (D&P 50:40) ug pila ka adlaw mahimong usa uban sa Amahan ug sa Anak (tan-awa sa D&P 50:43). Si Elder Neal A. Maxwell (1926–2004) sa Korum sa Napulog Duha ka mga Apostoles mipahinumdom sa mga Santos nga dili mawad-an og kadasig uban sa hinay nga espiritwal nga pagtubo:

“Hinay-hinay apan kanunay nga pag-uswag dili lamang nga dawaton sa Ginoo apan Iya usab nga girekomendar. Ang balaan nga mga pahayag nag-ingon: ‘Kamo gagmay nga mga bata ug kamo dili makaantus sa tanan nga mga butang karon’ (D&P 50:40); ‘Ako mogiya kaninyo’ (D&P 78:18). Ingon nga ang balaan nga pagpahayag kasagaran mahitabo lagda ngadto sa lain nga lagda, pagtulun-an ngadto sa lain nga pagtulun-an, karon gamay ug sa lain nga panahon gamay, niana usab atong matuman ang atong espiritwal nga pag-uswag sa hinay-hinay apan kanunay (tan-awa sa D&P 128:21; 98:12).

“Kay sa tan-awon ang atong mga kaugalingon nga napakyas tungod lamang kay wala dayon kita nahimong hingpit, sama sa kinaiya sa kamaloloy-on, kinahanglan kitang maningkamot nga mahimong mas maloloy-on sa ‘dagan sa panahon.’ Bisan taliwala sa kakugi, walay panginahanglan sa dili tinuod nga mga pagpaabut. Bisan og dili hingpit, ang nag-uswag nga tawo sa tinuod makahibalo nga ang dagan sa iyang kinabuhi sa kinatibuk-an madawat sa Ginoo bisan og aduna pay dako nga buluhaton sa pagpalambo (Men and Women of Christ [1991], 23).

Ribyuha ang mga baruganan nga gitudlo diha sa Doktrina ug mga Pakigsaad 50 nga motabang kaninyo sa pag-ila tali sa kamatuoran ug sa kasaypanan. Unsay inyong mabuhat nga mas maayo aron sa pagdapit sa Espiritu nga kamo makalikay sa pagkamalimbungan ug sa espiritwal nga kangitngit?