Kapitulo 9
Doktrina ug mga Pakigsaad 20–22
Pasiuna ug Timeline
Sa usa ka pagpadayag ngadto ni Propeta Joseph Smith, gisugo sa Ginoo nga ang Iyang Simbahan i-organisar niadtong Abril 6, 1830. Bisan kon kini nga pagpadayag, nga makita karon isip Doktrina ug mga Pakigsaad 20, narekord pipila ka adlaw human maorganisar ang Simbahan, ang mga porsyon niini mahimong napadayag na pagka-Hunyo 1829. Kini nga pagpadayag naghatag og gibug-aton sa kaimportante sa Basahon ni Mormon, nag-outline sa mga responsibilidad sa mga katungdanan sa priesthood, ug naghatag og mga instruksyon alang sa mga ordinansa sa bunyag ug sa sakrament.
Sa adlaw nga naorganisar ang Simbahan, si Propeta Joseph Smith nakadawat sa pagpadayag nga narekord sa Doktrina ug mga Pakigsaad 21. Niini ang Ginoo mitudlo kaniya isip propeta, manalagna, ug lider sa gipahiuli nga Simbahan ug miawhag sa mga miyembro sa Simbahan sa pagpatalinghug sa mga pulong sa Propeta. Sa wala madugay human maestablisar ang Simbahan, ang ubang tawo nangutana kon kadtong nabunyagan na kaniadto sa ubang simbahan kinahanglan bang bunyagan og usab aron mahimong mga miyembro sa gipahiuli nga Simbahan. Nangutana si Joseph sa Ginoo ug nakadawat sa pagpadayag sa Doktrina ug mga Pakigsaad 22, diin gitudlo sa Ginoo nga ang bunyag kinahanglan gayud nga ipahigayon niadtong adunay tukmang awtoridad.
-
Hinapus sa Marso 1830Ang pag-imprinta sa Basahon ni Mormon nahuman na.
-
Abril 6, 1830Ang Simbahan giorganisar ni Joseph Smith didto sa Fayette, New York.
-
Abril 6, 1830Ang Doktrina ug mga Pakigsaad 21 nadawat.
-
Human sa Abril 6, 1830Ang Doktrina ug mga Pakigsaad 20 nahuman ug narekord (bisan kon ang mga porsyon tingali nadawat pipila ka bulan sa sayo pa).
-
Abril 16, 1830Ang Doktrina ug mga Pakigsaad 22 nadawat.
-
Hunyo 9, 1830Ang unang komperensya sa Simbahan gipahigayon didto sa Fayette, New York.
Doktrina ug mga Pakigsaad 20: Dugang nga Makasaysayanong Background
Si Propeta Joseph Smith mirekord nga niadtong Hunyo 1829, didto sa panimalay ni Peter Whitmer Sr., ang tingog sa Ginoo misugo kaniya ug ni Oliver Cowdery sa pag-orden sa usag usa isip mga elder apan mitino nga kinahanglan nilang ilangay ang ordinasyon hangtud mapundok ang ilang kaigsoonan ug makahatag sa ilang pagtugot pinaagi sa pagboto (tan-awa sa The Joseph Smith Papers, Histories, Volume 1: Joseph Smith Histories, 1832–1844, ed. Karen Lynn Davidson ug uban pa [2012], 326; tan-awa usab sa D&P 128:21). Usab niadtong Hunyo, ang Ginoo misugo ni Oliver Cowdery nga motabang sa “[pag]tukod sa simbahan [sa Ginoo]” (D&P 18:5) pinaagi sa pagsalig diha sa Basahon ni Mormon, nga hapit na mahuman nianang higayuna. Isip resulta, si Oliver mihugpong og usa ka dokumento nga gitawag og “Mga Artikulo sa Simbahan ni Kristo [Articles of the Church of Christ],” nga naglakip sa mga detalye mahitungod sa mga ordinansa, mga katungdanan sa priesthood, ug mga pamaagi sa Simbahan sigun sa makita diha sa Basahon ni Mormon (tan-awa sa The Joseph Smith Papers, Documents, Volume 1: July 1828–June 1831, ed. Michael Hubbard MacKay ug uban pa [2013], 368–74). Kining impormasyon mahimong gitumong aron magiyahan ang mga tumutuo hangtud sa panahon nga maestablisar ang Simbahan.
Lawak sa itaas sa gitukod pag-usab nga panimalay ni Peter Whitmer Sr. didto sa Fayette, New York, diin ang paghubad sa Basahon ni Mormon nahuman ug diin ang tingog sa Dios nadungog (tan-awa sa D&P 128:21)
Samtang wala mahibaloi kon kanus-a gayud nadawat ang narekord nga pagpadayag sa Doktrina ug mga Pakigsaad 20, gi-summarize ni Propeta Joseph Smith ang dagan sa balaanong direksyon: “Niining paagiha gipadayon sa Ginoo ang paghatag kanamo og mga instruksyon matag karon ug unya, kalabut sa mga katungdanan nga gitugyan ngari kanamo, ug lakip sa daghan pang laing butang niana nga matang, among nabatunan gikan kaniya ang mosunod, pinaagi sa Espiritu sa Panagna ug pagpadayag; nga wala lamang maghatag kanamo og daghang impormasyon, apan mipasabut usab kanamo sa tukmang adlaw diin, sumala sa iyang kabubut-on ug sugo, kinahanglan namong ipadayon ang pag-organisar na usab sa iyang Simbahan, dinhi sa yuta” (sa The Joseph Smith Papers, Histories, Volume 1: Joseph Smith Histories, 1832–1844, 336; ang spelling gi-standardize). Kadtong mga instruksyon nailhan isip “Mga Artikulo ug mga Pakigsaad sa Simbahan ni Kristo [Articles and Covenants of the Church of Christ].”
Ang kompleto nga teksto sa mga Artikulo ug mga Pakigsaad gisulat sa wala madugay human sa miting sa pag-organisar nga gipahigayon niadtong Abril 6, 1830, ug naghatag og overview sa mga gituohan sa Simbahan ni Jesukristo ug sa mga katungdanan ug mga ordinansa nga anaa niini. Sa unang komperensya sa Simbahan, nga gipahigayon niadtong Hunyo 9, 1830, sa panimalay ni Peter Whitmer Sr., ang mga Artikulo ug mga Pakigsaad gibasa ug gipresentar ngadto sa mga miyembro alang sa pag-aprubar (tan-awa sa The Joseph Smith Papers, Documents, Volume 1: July 1828–June 1831, 116–26). Sulod sa nagsunod nga pipila ka tuig, ang mga Artikulo ug mga Pakigsaad, nga karon mao ang Doktrina ug mga Pakigsaad 20, giusab matag karon ug unya samtang nagpadayon si Propeta Joseph Smith sa pagdawat og pagpadayag kalabut sa estruktura sa Simbahan. Pananglitan, ang Doktrina ug mga Pakigsaad 20:65–67 gidugang human nga ang katungdanan sa high priest gipadayag didto sa Kirtland, Ohio, niadtong Hunyo 1831 (tan-awa sa ulohan sa seksyon sa D&P 52).
Doktrina ug mga Pakigsaad 20:1–36
Ang mga panghitabo bahin sa Pagpahiuli gisaysay pag-usab ug ang mga kamatuoran nga gitudlo diha sa Basahon ni Mormon gi-summarize
Ang gitukod pag-usab nga panimalay ni Peter Whitmer Sr. sa Fayette, New York
Doktrina ug mga Pakigsaad 20:1. “Ang pagsugod sa Simbahan ni Kristo niining katapusan nga mga adlaw”
Human sa kamatayon sa karaang mga Apostoles, ang wala tuguti nga mga kausaban gihimo sa organisasyon, doktrina, ug mga ordinansa sa Simbahan ni Jesukristo. Human sa mga siglo nga apostasiya, gipahiuli sa Ginoo ang Iyang ebanghelyo ug ang Iyang Simbahan pinaagi kang Propeta Joseph Smith. Kining pagpahiuli naglakip sa pag-organisar sa Simbahan ni Kristo niadtong Abril 6, 1830. Si Presidente Gordon B. Hinckley (1910–2008) mipamatuod bahin sa padulngan sa Simbahan sa Ginoo:
“Si Joseph Smith ug ang iyang mga kaubanan nagpundok sa hilit nga balay nga ginama sa troso didto sa umahan ni Peter Whitmer sa hilum nga balangay sa Fayette, New York, ug miorganisar sa Simbahan ni Kristo.
“Gikan nianang ubos nga sinugdanan usa ka butang nga tinud-anay nga talagsaon ang nahitabo. Halangdon ang kasaysayan niini nga buhat. Ang atong katawhan nakasinati sa matag matang sa pag-antus. Dili mahulagway ang ilang mga sakripisyo. Ang ilang mga paghago hilabihan nga halos dili matuohan. Apan gikan niining tanang mapintas nga gipas-an dunay butang nga mahimayaon. Karon nagbarug kita sa dapit diin atong makita ang resulta niadtong katuigan ug tan-awa kon unsay atong nakab-ot.
“Gikan sa orihinal nga unom ka miyembro midaghan ang pundok sa mga tigsimba. … Gikan nianang hilum nga balangay milambo ang usa ka pundok nga nagkatag karon sa mga 160 ka nasud sa kalibutan. … Sulod sa kinabag-ang hut-ong niini mao ang mga miyembro gikan sa daghang kanasuran nga namulong og daghang pinulongan. Usa kini ka talagsaong butang nga wala damha. Samtang ang kagahapon niini gipadayag, usa ka matahum nga sumbanan ang makita. Makita kini diha sa kinabuhi sa malipayon ug talagsaong mga tawo. Nagpakita kini og katingalahang mga butang nga moabut pa” (“The Church Goes Forward,” Ensign, Mayo 2002, 4).
Doktrina ug mga Pakigsaad 20:1. Ang Simbahan ni Kristo
Sa dihang ang napahiuli nga Simbahan opisyal nga naorganisar niadtong Abril 6, 1830, gitawag kini nga ang Simbahan ni Kristo. Niadtong 1834, usa ka konseho sa Simbahan ang miaprubar sa tawag nga Simbahan sa mga Santos sa Ulahing mga Adlaw isip alternatibong ngalan alang sa Simbahan. Sa katapusan, diha sa usa ka pagpadayag nga gihatag ngadto ni Propeta Joseph Smith niadtong Abril 1838, ang Ginoo namahayag nga ang Iyang Simbahan pagatawagon og Ang Simbahan ni Jesukristo sa mga Santos sa Ulahing mga Adlaw (tan-awa sa D&P 115:4).
Si Elder M. Russell Ballard sa Korum sa Napulog Duha ka mga Apostoles mipasabut sa katuyoan ug kamahinungdanon sa Simbahan sa Dios sa atong pagpaningkamot alang sa kahimayaan:
“Ang kahimayaan mao ang tumong niining mortal nga panaw, ug walay makaabut didto kon dili pinaagi sa ebanghelyo ni Jesukristo: Sa Iyang Pag-ula, mga ordinansa, ug naggiya nga mga doktrina ug mga baruganan nga anaa sa Simbahan.
“Sa Simbahan kita makakat-on sa mga buhat sa Dios ug modawat sa grasya ni Ginoong Jesukristo nga nagluwas kanato. Diha sa Simbahan atong maporma ang atong mga pasalig ug pakigsaad sa mahangturong mga pamilya nga mao unya ang atong passport sa kahimayaan. Kini ang Simbahan nga gikontrolar sa gahum sa priesthood nga mogiya nato sa paglawig sa dili matag-an nga katubigan sa mortalidad” (“Dios ang Nagtimon,” Liahona, Nob. 2015, 27).
Doktrina ug mga Pakigsaad 20:2–16. Ang mga panghitabo sa Basahon ni Mormon ug sa Pagpahiuli
Si Joseph Smith mihubad sa Basahon ni Mormon pinaagi sa gasa ug gahum sa Dios.
Ang Doktrina ug mga Pakigsaad 20 nagribyu sa pipila ka mahinungdanong mga panghitabo sa Pagpahiuli. Pananglitan, si Joseph Smith gibisitahan sa Dios nga Amahan ug sa Iyang Anak, nga si Jesukristo, ug “nakadawat og kapasayloan sa iyang mga sala” atol sa Unang Panan-awon (D&P 20:5). Ang “balaan nga anghel” nga si Moroni mipakita kang Joseph Smith ug mitudlo kaniya ug “naghatag ngadto kaniya ug mga sugo nga nakapadasig kaniya” (D&P 20:6–7). Naangkon ni Joseph Smith sa wala madugay ang bulawan nga mga palid ug gihatagan og “gahum” ug “mga paagi” sa paghubad sa Basahon ni Mormon (D&P 20:8). Ang uban, sama sa Tulo ka mga Saksi, nakadawat og kumpirmasyon bahin sa balaanong gigikanan sa Basahon ni Mormon (tan-awa sa D&P 20:10). Ang pagpahiuli sa awtoridad sa priesthood klaro diha sa ordinasyon nila ni Joseph Smith ug Oliver Cowdery isip ang una ug ang ikaduhang mga elder sa Simbahan (tan-awa sa D&P 20:2–3).
Kining pagpadayag nagpamatuod usab nga ang Basahon ni Mormon nag-establisar sa katinuod sa Biblia (tan-awa sa D&P 20:11; tan-awa usab sa 1 Nephi 13:40; Mormon 7:8–9). Dugang pa, kining pagpadayag naghatag og gibug-aton sa mahinungdanong tahas sa Basahon ni Mormon pinaagi sa pagsaad og kinabuhing dayon ngadto “[niadto] kinsa modawat niini sa hugot nga pagtuo” ug mipanghimaraut “[niadto] nga nagpatig-a sa ilang mga kasingkasing sa pagkawalay pagtuo, ug nagsalikway niini” (D&P 20:14–15).
Doktrina ug mga Pakigsaad 20:9. Ang Basahon ni Mormon naglangkob “sa kahingpitan sa ebanghelyo ni Jesukristo”
Ang Ginoo mitino “sa kahingpitan sa ebanghelyo ni Jesukristo” (D&P 20:9) isip “ang pakigsaad diin Ako mipadala aron sa pagkuha pag-usab sa akong mga katawhan, diin anaa sa balay ni Israel” (D&P 39:11). Ang Doktrina ug mga Pakigsaad naglangkob sa pipila ka pagpadayag nga nagpasabut nga ang Basahon ni Mormon naglangkob sa kahingpitan sa ebanghelyo (tan-awa sa D&P 20:9; 27:5; 42:12; 135:3).
Si Presidente Ezra Taft Benson (1899–1994) mipasabut: “Ang Ginoo Mismo namahayag nga ang Basahon ni Mormon naglangkob ‘sa kahingpitan sa ebanghelyo ni Jesukristo.’ (D&P 20:9.) Kana wala magpasabut nga kini naglangkob sa tanang pagtulun-an, sa tanang doktrina nga gipadayag. Hinoon, kini nagpasabut nga diha sa Basahon ni Mormon kita makakaplag sa kahingpitan niadtong mga doktrina nga gikinahanglan sa atong kaluwasan. Ug kini gitudlo sa yano ug simple nga paagi aron bisan ang mga bata makakat-on sa mga pamaagi sa kaluwasan ug kahimayaan. Ang Basahon ni Mormon nagtanyag og daghan kaayo nga makapalapad sa atong pagsabut sa mga doktrina sa kaluwasan. Kon wala kini, kadaghanan sa gipangtudlo sa ubang mga kasulatan dili mahimong yano ug bililhon” (“The Keystone of Our Religion,” Ensign, Ene. 1992, 5).
Doktrina ug mga Pakigsaad 20:17–36. “Pinaagi niini nga mga butang kami nahibalo”
Diha sa Doktrina ug mga Pakigsaad 20:17, ang mga pulong nga “pinaagi niini nga mga butang” nagpasabut sa mga kamatuoran nga atong nahibaloan pinaagi sa Basahon ni Mormon (tan-awa sa D&P 20:8–10). Pinaagi sa Basahon ni Mormon ug sa Pagpahiuli sa kahingpitan sa ebanghelyo, ang mga Santos sa Ulahing mga Adlaw gihatagan og mas klaro nga panabut bahin sa mga doktrina nga may kalabutan sa atong personal nga kaluwasan, ilabi na sa mahinungdanong tahas ni Jesukristo isip atong Ginoo ug Manluluwas. Si Presidente Ezra Taft Benson nagtudlo:
“Sa ikabaynte nga seksyon sa Doktrina ug mga Pakigsaad, gigahin sa Ginoo ang pipila ka bersikulo sa pag-summarize sa mahinungdanong mga kamatuoran nga gitudlo sa Basahon ni Mormon. (Tan-awa sa mga ber. 17–36.) Naghisgot kini bahin sa Dios, sa paglalang sa tawo, sa Pagkapukan, sa Pag-ula, sa pagkayab ni Kristo ngadto sa langit, sa mga propeta, hugot nga pagtuo, paghinulsol, bunyag, sa Espiritu Santo, paglahutay, pag-ampo, kapaangayan ug kabalaanan pinaagi sa grasya, ug paghigugma ug pagserbisyo sa Dios.
“Kinahanglan gayud kitang masayud niining mahinungdanong mga kamatuoran. Sila si Aaron ug Ammon ug ang ilang mga kaigsoonan diha sa Basahon ni Mormon nagtudlo niining samang matang sa mga kamatuoran ngadto sa Lamanite nga katawhan (tan-awa sa Alma 18:22–39), kinsa anaa ‘sa labi nga mangitngit nga sulad [abyss]’ (Alma 26:3). Human madawat kining mahangturong mga kamatuoran, ang Basahon ni Mormon namahayag, kadtong nakabig nga mga Lamanite wala gayud mibiya sa kamatuoran. (Tan-awa sa Alma 23:6.)
“Kon ang atong mga anak ug mga apo gitudloan ug mopatalinghug niining samang mga kamatuoran, mobiya ba sila sa kamatuoran? Matudloan nato sila ug tarong sa Basahon ni Mormon diha sa atong mga kan-anan, sa atong mga fireside, ug sa ilang higdaanan, ug sa tanan natong mga sulat ug mga tawag sa telepono—sa tanan natong mga kalihokan” (“A New Witness for Christ,” Ensign, Nob. 1984, 7).
Ang mga pulong nga “kami nahibalo” gigamit sa pipila ka higayon diha sa Doktrina ug mga Pakigsaad 20:17–36 (tan-awa sa Doktrina ug mga Pakigsaad 20:17, 29, 30, 31, 35). Nagpakita kini sa diwa sa pagpamatuod ug nagpahinumdom sa mga miyembro sa Simbahan nga kining sukaranang mga doktrina mohulma sa atong mga gituohan.
Doktrina ug mga Pakigsaad 20:37–84
Gitakda sa Ginoo ang mga responsibilidad sa mga katungdanan sa priesthood ug naghatag og mga instruksyon alang sa bunyag ug sa sakrament
Doktrina ug mga Pakigsaad 20:37. Unsay gipasabut sa pagbaton og masulub-on nga kasingkasing ug mahinulsulon nga espiritu?
Ang pagdawat og kapasayloan sa atong mga sala nagkinahanglan nga kita “moduol uban ang masulub-on nga mga kasingkasing ug mahinulsulon nga mga espiritu” (D&P 20:37). Si Presidente Ezra Taft Benson (1899–1994) nagtudlo kon unsay buot ipasabut sa pagbaton og masulub-on nga kasingkasing ug mahinulsulon nga espiritu: “Ang diosnong kasubo usa ka gasa sa Espiritu. Usa kini ka lawom nga pagkaamgo nga ang atong mga gipangbuhat nakapasakit sa atong Amahan ug sa atong Dios. Ang sakit ug maayo kaayo nga pag-ila nga ang atong mga pamatasan ang mihimo sa Manluluwas, Siya kinsa walay sala, gani ang labing gamhanan sa tanan, sa paglahutay sa panghingutas ug sa pag-antus. Ang atong mga sala mihimo sa pag-agas sa dugo sa matag lungag sa Iyang panit. Kining tinuod gayud nga pag-antus sa hunahuna ug sa espirituhanon mao ang gipasabut sa mga kasulatan nga makabaton og ‘masulub-on nga kasingkasing ug mahinulsulon nga espiritu’” (Mga Pagtulun-an sa mga Presidente sa Simbahan: Ezra Taft Benson [2014], 99).
Doktrina ug mga Pakigsaad 20:38. “Ang usa ka apostol mao ang usa ka anciano [elder]”
Sa unang katuigan sa gipahiuli nga Simbahan, ang termino nga apostol kanunay nga gigamit ngadto sa mga elder nga nalambigit sa misyonaryo nga buhat (tan-awa, pananglitan, sa pagpasabut sa Ginoo kang Oliver Cowdery ug David Whitmer diha sa D&P 18:9, 14). Makatabang usab nga hinumduman nga nianang higayuna nga gihatag ang pagpadayag nga narekord sa Doktrina ug mga Pakigsaad 20, ang katungdanan sa high priest sa Melchizedek priesthood wala pa gipadayag. Ang tawag nga “Elder” gigamit na karon sa paghulagway ni bisan kinsa nga naghupot sa Melchizedek Priesthood nga gitawag sa pagsangyaw sa ebanghelyo, bisan unsa pa ang iyang katungdanan sa priesthood. “Sama pananglit, mga misyonaryo nga lalaki gitawag og mga anciano (elder). Usab, ang usa ka Apostol usa ka anciano (elder), ug kini angay nga motawag sa mga sakop sa Korum sa Napulog Duha o mga Korum sa Kapitoan pinaagi niini nga ngalan (D&P 20:38; 1 Ped. 5:1)” (Giya ngadto sa mga Kasulatan, “Anciano,” scriptures.lds.org).
Doktrina ug mga Pakigsaad 20:38–59. Mga katungdanan sa priesthood
Sa dihang giorganisar ang Simbahan niadtong 1830, gi-outline sa Ginoo ang mga responsibilidad ug mga katungdanan sa mga elder, mga priest, mga teacher, ug mga deacon. Sukad nianang panahona, dugang nga mga detalye ang gipadayag kalabut niining mga katungdanan sa priesthood. Bisan pa man niana, ang importante nga mga instruksyon nga gi-outline diha sa Doktrina ug mga Pakigsaad 20:38–59 mga baruganan nga kinahanglang padayon nga tun-an ug sundon sa tanang naghupot sa priesthood. Si Presidente Thomas S. Monson mihatag og gibug-aton sa panginahanglan nga masayud sa atong katungdanan ug sa pagbuhat niini diha sa pagserbisyo sa uban:
“Ang priesthood labaw pa sa gasa kay kini usa ka sugo sa pagserbisyo, pribilehiyo sa pagbayaw, ug oportunidad sa pagpanalangin sa kinabuhi sa uban.
“Ang tawag sa katungdanan moabut kon kitang naghupot sa priesthood mobuhat sa atong buluhaton. Si Presidente George Albert Smith, kanang hilumon apan epektibo nga lider, namahayag, ‘Inyo kining katungdanan una sa tanan ang pagkat-on kon unsay gusto sa Ginoo ug dayon pinaagi sa gahum ug kalig-on sa Iyang balaang Priesthood aron mopalambo sa inyong calling diha sa atubangan sa inyong isigkatawo aron ang mga tawo magmaya nga mosunod kaninyo’ [sa Conference Report, Abr. 1942, 14]” (“Do Your Duty—That Is Best,” Ensign o Liahona, Nob. 2005, 59).
Doktrina ug mga Pakigsaad 20:75–79. Moambit sa sakrament “agi og handumanan ni Ginoong Jesus”
Ang sakrament gidumala nila ni Propeta Joseph Smith ug Oliver Cowdery niadtong Abril 6, 1830, sa adlaw nga ang Simbahan naorganisar. Gisugo sa Ginoo ang mga miyembro sa Iyang Simbahan nga “magtigum kanunay aron sa pag-ambit [sa sakrament] agi og handumanan ni Ginoong Jesus” (D&P 20:75).
Si Elder D. Todd Christofferson sa Korum sa Napulog Duha ka mga Apostoles mipasabut sa usa sa mga rason nganong usa ka panalangin ang pag-apil niining sagradong ordinansa: “Ang mga pag-ampo sa sakrament nagmatuod nga usa sa importante nga mga katuyoan sa sakrament nga gisugdan ni Ginoong Jesukristo mao nga kita ‘kanunay mohinumdom kaniya’ (D&P 20:77, 79). Ang paghinumdom sa Manluluwas naglakip gayud sa paghinumdom sa Iyang Pag-ula, nga sa simbolo girepresentar sa pan ug tubig isip timaan sa Iyang pag-antus ug kamatayon. Kinahanglan nga dili gayud kita makalimot unsay Iyang gibuhat alang kanato, kay kon wala ang Iyang Pag-ula ug Pagkabanhaw, ang kinabuhi walay kahulugan. Uban sa Iyang Pag-ula ug Pagkabanhaw, ang atong mga kinabuhi adunay mahangturon, balaan nga mga posibilidad” (“Sa Kanunay Mohinumdom Kaniya,” Liahona, Abr. 2011, 49).
Sulod sa kwarto sa panimalay ni Peter Whitmer Sr. sa Fayette, New York, diin giorganisar ang Simbahan niadtong Abril 6, 1830
Si Elder Dale G. Renlund sa Korum sa Napulog Duha ka mga Apostoles mipasabut kon sa unsang paagi nga ang pagtuman sa pakigsaad nga kanunayng mohinumdom kang Jesukristo makatabang kanato nga makahimo og mas maayong mga pagpili:
“Kon ang atong inadlaw nga mga hagit motumaw, natural lang nga mag-focus sa unsay nahitabo niana gayung higayuna. Apan kon buhaton nato kana, mahimong makabuhat kita og dili maayong mga pagpili, masagmuyo, o makasinati og pagkawalay paglaum. Tungod niining tawhanong kalagmitan, ang mga propeta mitambag kanato nga hinumduman ang mahangturong panglantaw. Niana lamang higayuna nga malampuson kitang makalawig sa mortalidad. …
“Matag Dominggo ang sakrament makatabang nato nga mahinumdom sa kaayo ug talagsaong mga saad sa Dios. Pinaagi sa pag-ambit sa yano, mahikap nga mga butang—usa ka piraso nga pan ug mainom nga tubig—misaad kita nga kanunayng mohinumdom sa Manluluwas ug sa Iyang mahinungdanon nga maulaong sakripisyo. Pinaagi sa sakrament, atong gibag-o ang atong mga pakigsaad ug gipahayag ang atong kaandam sa pagtuman sa Iyang mga sugo. …
“Pinaagi sa tabang sa sakrament, mahimo nato nga kanunayng mahinumdom Kaniya ug mapabilin ang usa ka mahangturong panglantaw” (“Maintaining an Eternal Perspective,” Ensign, Mar. 2014, 56, 59).
Doktrina ug mga Pakigsaad 20:77. “Andam sa pagdala nganha kanila sa ngalan sa imong Anak”
Kon kita takus nga moambit sa sakrament, kita nagpahayag sa atong kaandam sa pagdala diha sa atong mga kaugalingon sa ngalan ni Jesukristo. Si Elder Dallin H. Oaks sa Korum sa Napulog Duha ka mga Apostoles mipasabut kon unsay kahulugan sa pagdala diha kanato sa ngalan ni Jesukristo:
“Ang atong pagsaksi nga kita andam sa pagdala sa ngalan ni Jesukristo adunay pipila ka managlahing kahulugan. …
“… Atong gidala ang ngalan ni Kristo sa dihang gibunyagan kita pinaagi sa iyang ngalan, sa dihang nahisakop kita sa iyang Simbahan ug miangkon sa atong pagtuo diha kaniya, ug sa dihang naghimo kita sa buhat sa iyang gingharian …
“Mahinungdanon nga kon moambit kita sa sakrament wala kita mosaksi nga kita nagdala diha kanato sa ngalan ni Jesukristo. Nagsaksi kita nga kita andam sa pagbuhat sa ingon. (Tan-awa sa D&P 20:77.) Ang kamatuoran nga mosaksi lamang kita sa atong kaandam nagsugyot nga dunay laing butang nga kinahanglan gayud nga mahitabo sa dili pa kita modala nianang sagradong ngalan ngari kanato sa labing importante nga kahulugan. …
“Ang kaandam nga modala diha kanato sa ngalan ni Jesukristo mahimong … masabut isip kaandam nga modala diha kanato sa awtoridad ni Jesukristo. Sumala niini nga kahulugan, pinaagi sa pag-ambit sa sakrament kita mosaksi sa atong kaandam sa pag-apil sa sagradong mga ordinansa sa templo ug sa pagdawat sa kinatas-ang mga panalangin nga anaa pinaagi sa ngalan ug awtoridad sa Manluluwas sa dihang mipili siya sa pagtugyan niini ngari kanato. …
“… Kon mosaksi kita sa atong kaandam nga modala diha kanato sa ngalan ni Jesukristo, nagmatuod kita sa atong pasalig sa pagbuhat sa tanan kutob sa atong mahimo aron maangkon ang kinabuhing dayon sa gingharian sa atong Amahan. Atong gipahayag ang atong pag-apil—atong determinasyon sa pagpaningkamot alang sa—kahimayaan diha sa celestial nga gingharian” (“Taking upon Us the Name of Jesus Christ,” Ensign, Mayo 1985, 80–82).
Doktrina ug mga Pakigsaad 21: Dugang nga Makasaysayanong Background
Human sa mga instruksyon sa Ginoo sa pag-organisar sa Iyang Simbahan, si Propeta Joseph Smith mipundok sa gibana-bana nga mga 60 ka tumutuo didto sa panimalay ni Peter Whitmer Sr. sa Fayette, New York, pagka-Martes, Abril 6, 1830. Giorganisar nila ni Joseph Smith ug Oliver Cowdery ang Simbahan sumala sa kabubut-on sa Dios ug sumala sa mga balaod sa estado sa New York. Ang panagtigum naglangkob sa pag-ampo, mga pagpaluyo, mga ordinasyon, sa pagdumala sa sakrament, ug mga kumpirmasyon niadtong nabunyagan na. Atol niini nga miting, nakadawat ang Propeta sa pagpadayag nga narekord diha sa Doktrina ug mga Pakigsaad 21.
Doktrina ug mga Pakigsaad 21
Ang mga miyembro sa Simbahan kinahanglang mopatalinghug sa mga pulong ni Joseph Smith
Doktrina ug mga Pakigsaad 21:1. Mga responsibilidad ni Joseph Smith
Ngadto sa mga tumutuo nga nagpundok sa adlaw nga naorganisar ang Simbahan, gihulagway sa Ginoo ang balaanong mga tawag nga gihatag ngadto sa Iyang giordinahan nga sulugoon nga si Joseph Smith. Si Joseph pagailhon isip “manalagna, maghuhubad, propeta, apostol ni Jesukristo, anciano sa simbahan” (D&P 21:1; tan-awa usab sa D&P 107:91–92; 124:125; 127:12; 135:3). Kining sagradong mga responsibilidad nakapalahi kang Joseph Smith gikan sa uban pang mga lider sa relihiyon sa iyang panahon. Kining bantugan nga propeta sa ulahing mga adlaw dili lamang mahimong usa ka tigdumalang opisyal; gihatagan siya og awtoridad sa Dios sa pag-establisar sa Simbahan sa Ginoo ug sa pagpagawas sa gipadayag nga pulong sa Ginoo.
Ang Simbahan giorganisar niadtong Abril 6, 1830, sa Fayette, New York.
Doktrina ug mga Pakigsaad 21:1. “Kinahanglan adunay talaan nga pagatipigan diha kaninyo”
Ang kaimportante sa pagtipig og rekord sa Simbahan gihatagan og gibug-aton diha sa pagpadayag nga gihatag atol sa miting sa pag-organisar sa Simbahan. Si Elder Marlin K. Jensen sa Seventy ug kanhi Church Historian mipahibalo nga ang sugo sa Ginoo sa pagtipig og rekord nagpabiling lig-on karon: “Ang kasaysayan sa Simbahan ni Jesukristo ug ang katawhan niini angayan nga atong handumon. Ang mga kasulatan mihatag sa kasaysayan sa Simbahan og taas nga prayoridad. Gani, daghan sa kasulatan mga kasaysayan sa Simbahan. Sa adlaw mismo nga ang Simbahan na-organisar, ang Dios misugo kang Joseph Smith, ‘Tan-awa, kinahanglan adunay talaan nga pagatipigan diha kaninyo’ [D&P 21:1]. Si Joseph mibuhat niini nga sugo pinaagi sa pagtudlo kang Oliver Cowdery, ang ikaduhang elder sa Simbahan ug iyang chief assistant, isip ang unang magsusulat sa kaagi sa Simbahan. Naghipos kita og mga rekord aron makatabang kanato sa paghinumdom, ug usa ka rekord sa pagsaka ug paglambo sa Simbahan ang gihipos gikan sa panahon ni Oliver Cowdery hangtud karon. Kining talagsaon nga makasaysayanong rekord nagpahinumdom kanato nga ang Dios miabli pag-usab sa kalangitan ug mipadayag og mga kamatuoran nga nanawagan sa atong henerasyon sa pagbuhat” (“Hinumdumi ug Ayaw Pagkalaglag,” Ensign o Liahona, Mayo 2007, 37).
Doktrina ug mga Pakigsaad 21:4–6. “Kay ang iyang pulong ikaw makadawat … sa tanan nga pagpailub ug hugot nga pagtuo”
Ang Ginoo naggiya sa Iyang katawhan pinaagi sa Iyang pinili nga mga sulugoon. Niadtong Abril 1830, kadtong mga tumutuo nga nahimong mga miyembro sa Simbahan gimanduan nga “maminaw” sa mga pulong ug mga sugo ni Propeta Joseph Smith nga ingon og nagagikan kini sa ba-ba sa Ginoo (tan-awa sa D&P 21:4–5). Sa laing pagpadayag gipasabut sa Ginoo nganong ang propeta makonsiderar isip tigpama-ba sa Dios: “Unsa nga Ako ang Ginoo namulong, Ako namulong, ug Ako dili mangayo og pasaylo alang sa akong kaugalingon; ug bisan pa ang mga langit ug ang yuta mahanaw, ang akong mga pulong dili mahanaw, apan ang tanan matuman, bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38).
Gitambagan usab sa Ginoo kadtong mahimong mga miyembro sa Iyang Simbahan sa pagdawat sa mga pulong ni Propeta Joseph Smith “sa tanan nga pagpailub ug hugot nga pagtuo” (D&P 21:5). Si Presidente Harold B. Lee (1899–1973) mipasabut kon sa unsang paagiha nga kining tudling magamit sa tanang miyembro sa Simbahan karon: “Ang bugtong kasiguroan nga anaa kanato isip mga miyembro niini nga simbahan mao ang pagbuhat sa tukma unsa ang gisulti sa Ginoo ngadto sa Simbahan niana nga adlaw sa pag-organisar sa Simbahan. Kinahanglan gayud nga kita magkat-on sa pagpaminaw sa tanan nga mga pulong ug mga sugo nga ang Ginoo mohatag pinaagi sa Iyang propeta, ‘ingon nga siya nakadawat niini, maglakaw sa tanan nga pagkabalaan diha sa akong atubangan; … ingon og kini gikan sa akong kaugalingong ba-ba, sa tanan nga pagpailub ug hugot nga pagtuo’ (D&P 21:4–5). Maanaay pipila ka mga butang nga nagkinahanglan og pailub ug hugot nga pagtuo. Mahimo nga kamo dili makauyon unsa ang moabut gikan sa awtoridad sa Simbahan. Mahimo nga kini supak sa inyong politikanhong mga panglantaw. Mahimo nga supak kini sa inyong sosyal nga mga panglantaw. Mahimong mobalda kini sa inyong sosyal nga kinabuhi. Apan kon kamo maminaw niini nga mga butang, ingon og kini gikan sa ba-ba sa Ginoo Mismo, uban ang pagpailub ug hugot nga pagtuo, ang saad mao ‘ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug sa himaya sa iyang ngalan’ (D&P 21:6)” (Mga Pagtulun-an sa mga Presidente sa Simbahan: Harold B. Lee [2000], 101).
Doktrina ug mga Pakigsaad 22: Dugang nga Makasaysayanong Background
Sa wala madugay human ang pag-organisar sa Simbahan, ang uban nga nagtinguha nga magpasakop sa bag-ong naestablisar nga Simbahan ni Kristo nanglimbasug sa panginahanglan nga kinahanglan gayud silang bunyagan pag-usab. Si Presidente Joseph Fielding Smith mipasabut: “Ang pangutana bahin sa balaanong awtoridad … wala kaayo motuhop sa ilang mga hunahuna. Sa dihang nagtinguha sila nga mopasakop sa Simbahan, kay nakadawat na sa pagpamatuod nga si Joseph Smith misaysay og tinuod nga istorya, naghunahuna sila nganong kinahanglan man nga bunyagan sila pag-usab nga nakatuman na man sila sa ordinansa sa bunyag pinaagi sa pag-unlod” (Church History and Modern Revelation [1953], 1:109).
Ang pagpadayag nga narekord diha sa Doktrina ug mga Pakigsaad 22 nadawat niadtong Abril 16, 1830. Ang labing una nga mga istorya bahin niini nga pagpadayag usahay gilakip isip kabahin sa mga Artikulo ug mga Pakigsaad, tingali tungod kay ang pagpadayag nagklaro sa doktrina sa bunyag nga gitudlo diha sa Doktrina ug mga Pakigsaad 20.
Doktrina ug mga Pakigsaad 22
Ang mga bunyag kinahanglang ipahigayon gayud niadtong naghupot og tukmang awtoridad
Doktrina ug mga Pakigsaad 22:1. “Usa ka bag-o ug walay katapusan nga pakigsaad”
Gitubag sa Ginoo ang pangutana mahitungod sa panginahanglan alang sa bag-ong mga miyembro nga mabunyagan pag-usab pinaagi sa pagpahayag nga “usa ka bag-o ug walay katapusan nga pakigsaad” ang gihatag (D&P 22:1). Ang kahingpitan sa ebanghelyo gitawag og bag-o ug walay katapusan nga pakigsaad kon ipadayag kini sa usa ka bag-ong dispensasyon. Si Presidente Joseph Fielding Smith mipasabut:
“Ang bag-o ug walay katapusan nga pakigsaad mao ang kahingpitan sa ebanghelyo. Gilangkuban kini sa ‘Tanang pakigsaad, mga kontrata, mga kasabutan, mga obligasyon, mga panumpa, mga saad, mga gihimo, mga koneksyon, mga asosasyon, o mga gilauman’ nga gisilyo diha sa mga miyembro sa Simbahan pinaagi sa Balaang Espiritu sa saad, o sa Espiritu Santo, pinaagi sa awtoridad sa Presidente sa Simbahan nga naghupot sa mga yawe. …
“Ang kaminyoon alang sa kahangturan usa ka bag-o ug walay katapusan nga pakigsaad. Ang bunyag usa usab ka bag-o ug walay katapusan nga pakigsaad, ug ingon man usab ang ordinasyon sa priesthood, ug ang matag laing pakigsaad walay katapusan ug kabahin sa bag-o ug walay katapusan nga pakigsaad nga naghangup sa tanang butang” (Answers to Gospel Questions, comp. Joseph Fielding Smith Jr. [1966], 1:65).
Daghan sa unang mga Santos nabunyagan didto sa Seneca Lake, duol sa Fayette, New York (litrato ca. 1897–1927).
Sa maayong kabubut-on sa Church History Library and Archives
Doktrina ug mga Pakigsaad 22:2. “Dili ka makasulod sa higpit nga ganghaan pinaagi sa balaod ni Moises”
Ang “higpit nga ganghaan” nagpasabut sa bunyag (tan-awa sa 2 Nephi 31:17–18). Sa pagpadayag nga narekord diha sa Doktrina ug mga Pakigsaad 22, gitandi sa Ginoo ang mga indibidwal nga nagtinguha sa pagpasakop sa Iyang gipahiuli nga Simbahan nga dili magpabunyag pag-usab ngadto niadtong nagsalig sa balaod ni Moises nga walay hugot nga pagtuo kang Jesukristo. Gamit kini nga pagtandi, gihatagan sa Ginoo og gibug-aton ang panginahanglan nga kalimtan ang “walay hinungdan” nga mga binuhatan sa relihiyon (D&P 22:3)—lakip na ang mga bunyag nga gipahigayon nga walay awtoridad sa priesthood—nga dili makaluwas ug sa paghangup sa bag-o ug walay katapusan nga pakigsaad sa ebanghelyo, sama sa kinahanglang buhaton sa unang mga kinabig nga Judeo ngadto sa Kristiyanismo.