Kapitulo 22
Doktrina ug mga Pakigsaad 59–62
Pasiuna ug Timeline
Sa Dominggo, Agosto 7, 1831, nadawat ni Propeta Joseph Smith ang pagpadayag nga girekord diha sa Doktrina ug mga Pakigsaad 59 samtang didto sa Jackson County, Missouri. Dinhi niini nga pagpadayag ang Ginoo mihan-ay sa iyang mga gipaabut alang sa mga Santos kinsa bag-ohay nga miabut sa Zion, lakip ang hustong pagbalaan sa adlaw nga Igpapahulay. Gipanghimatuod usab sa Ginoo nga kadtong kinsa nagsunod sa Iyang mga sugo makadawat og temporal ug espiritwal nga mga panalangin.
Sa pagkasunod adlaw si Joseph Smith ug pipila ka mga elder nangandam sa pagbiya sa Independence, Missouri, ug mobalik ngadto sa Ohio. Sa pagpadayag nga gi-rekord diha sa Doktrina ug mga Pakigsaad 60, mitudlo ang Ginoo sa mga elder sa pagsangyaw sa ebanghelyo samtang sila nagbiyahe. Sa ikatulong adlaw sa ilang panaw ang panon nakasinati og kuyaw diha sa Suba sa Missouri. Sulod sa sunod duha ka mga adlaw, Agosto 12 ug 13, nadawat sa Propeta ang duha ka mga pagpadayag, diin gi-rekord diha sa Doktrina ug mga Pakigsaad 61 ug 62. Naglakip kini og mga pulong sa panudlo, pahimangno, paghupay, ug pag-awhag.
-
Agosto 2–3, 1831Ang yuta sa Jackson County, Missouri gipahinungod alang sa pagtukod sa Zion, ug usa ka dapit alang sa templo gipahinungod didto sa Independence, Missouri.
-
Agosto 4, 1831Usa ka komperensya sa Simbahan gihimo didto sa Jackson County, Missouri.
-
Agosto 7, 1831Human masakit samtang nagbiyahe gikan sa Ohio ngadto sa Missouri uban sa mga Santos sa Colesville, si Polly Knight, ang asawa ni Joseph Knight Sr., namatay sa Jackson County, Missouri.
-
Agosto 7, 1831Ang Doktrina ug mga Pakigsaad 59 nadawat.
-
Agosto 8, 1831Ang Doktrina ug mga Pakigsaad 60 nadawat.
-
Agosto 9, 1831Si Joseph Smith ug napulo ka mga elder mibiya sa Missouri alang sa Kirtland, Ohio, nagbiyahe agi sa Suba sa Missouri.
-
Agosto 12–13, 1831Ang Doktrina ug mga Pakigsaad 61 ug 62 nadawat.
-
Agosto 27, 1831Si Joseph Smith miabut sa Kirtland, Ohio.
Doktrina ug mga Pakigsaad 59: Dugang nga Makasaysayanong Background
Usa ka Domingo, niadtong Agosto 7, 1831, mitambong si Propeta Joseph Smith sa serbisyo sa lubong alang ni Polly Knight, ang asawa ni Joseph Knight Sr. ug ang unang miyembro sa Simbahan nga namatay sa Zion. Si Polly usa ka miyembro sa Colesville Branch ug mibiya sa Ohio determinado nga makakita sa yuta sa Zion. Bisan pa sa iyang nagkaluya nga panglawas, “siya dili mosugot nga mohunong sa pagbiyahe,” nahinumduman sa iyang anak nga lalaki nga si Newel. “Ang iya lamang, o ang iyang labing dakong tinguha, mao ang pagtunob sa iyang mga tiil diha sa yuta sa Zion, ug pagpalubong sa iyang lawas diha niana nga yuta. … Gihatag sa Ginoo ang tinguha sa iyang kasingkasing, ug siya buhi nga nakabarug diha niana nga yuta” (“Newel Knight’s Journal,” sa Scraps of Biography: Tenth Book of the Faith-Promoting Series [1883], 70; tan-awa usab sa History of the Church, 1:199, footnote). Sa samang adlaw sa paglubong ni Polly Knight, nadawat ni Joseph Smith ang pagpadayag nga gi-rekord diha sa Doktrina ug mga Pakigsaad 59, nga nagsaad og mahangturon nga mga panalangin alang sa matinud-anong mga Santos sa Zion.
Atol sa ting-init sa 1831, samtang nagpuyo ang mga miyembro sa Jackson County, Missouri, nakakita sila og usa ka utlanan nga komunidad nga wala pa maugmad nga ang kinaiya hilabihan ka lahi sa mga balaod ug mga sumbanan sa ebanghelyo. Ang pagsugal, pag-inom, ug pagpangisog nagpasulabi sa mga lumulupyo, pipila kanila miabut sa walaa maugmad nga utlanan sa Missouri aron sa paglikay sa hustisya sa balaod. Kini nga mga lumulupyo tataw usab nga walay pagtahud alang sa adlaw nga Igpapahulay nga namatikdan dili lamang sa mga Santos apan sa ubang mga tigbiyahe kinsa mianha sa Missouri. Usa ka Protestante nga misyonaryo mi-obserbar: “Ang pagsunod sa Kristiyano nga Igpapahulay dinhi ingon og wala ilhi. Kini usa ka adlaw alang sa pagnegosyo, lingaw-lingaw, inom, sugal, ug sa kinatibuk-an batok sa Kristiyanong kinaiya” (sa T. Edgar Lyon, “Independence, Missouri, and the Mormons, 1827–1833,” BYU Studies, vol. 13, nu. 1 [1972], 16). Ang usa ka tigbiyahe nga moagi ngadto sa kasadpang Missouri sa 1833 mi-obserbar nga “ang mga mailhan lamang nga kini Dominggo [mao] ang dili kasagarang Sugal ug langas ug panagpundok libut diha sa mga baligyaanan og alak” (Edward Ellsworth, sa John Treat Irving Jr., Indian Sketches: Taken during an Expedition to the Pawnee Tribes (1833), ed. John Francis McDermott, bag-ong ed. [1955], xxii). Niini nga kahimtangan gilatid sa Ginoo ang mga sumbanan sa kinaiya alang niadtong mga Santos nga nagpundok ngadto sa Zion.
Doktrina ug mga Pakigsaad 59
Nagtudlo ang Ginoo sa mga Santos mahitungod sa adlaw nga Igpapahulay ug nagsaad og yutan-on ug mahangturon nga mga panalangin ngadto sa matinud-anon
Doktrina ug mga Pakigsaad 59:1–4. “Pagakoronahan … uban sa daghan nga mga sugo”
Ang matinud-anon nga mamatay “makapahulay gikan sa ilang tanan nga mga kahago” ug pagakoronahan sa langit (D&P 59:2).
Misaad ang Ginoo og mahangturong mga panalangin ngadto sa mga Santos kinsa misunod sa Iyang ebanghelyo ug mianha sa yuta sa Zion uban sa mata nga bug-os ngadto sa Iyang himaya. Misaad usab Siya sa pagkorona, o sa pagganti, sa Iyang matinud-anon nga mga Santos “uban sa daghan nga mga sugo ug uban sa mga pagpadayag diha sa ilang panahon” (D&P 59:4). Si Elder Dallin H. Oaks sa Korum sa Napulog Duha ka mga Apostoles mipasabut nga ang mga sugo sa Ginoo mga panalangin:
“Ang mga sugo mga panalangin … tungod kay ang atong Amahan sa langit naghatag niini ngari kanato aron kita tabangan sa pagtubo ug sa pagpalambo sa mga kalidad nga kinahanglan gayud kita aduna kon kita gikinahanglan nga makaangkon og mahangturong kinabuhi ug mopuyo uban kaniya. Pinaagi sa pagsunod sa iyang mga sugo, kita makasarang sa iyang mga panalangin. …
“Kinahanglan kitang magmaya diha sa mga sugo sa Dios ug ilhon kini nga mahimong bililhon nga mga gasa gikan sa usa ka mahigugmaong Amahan ngadto sa iyang mga anak” (“The Blessings of Commandments,” [debosyonal sa Brigham Young University , Sept. 10, 1974], 2, 4, speeches.byu.edu).
Doktrina ug mga Pakigsaad 59:5–8. “Higugmaa ang Ginoo nga inyong Dios”
Human magpasabut nga ang matinud-anon pagakoronahan og mga panalangin, mga sugo, ug mga pagpadayag, mihatag og gibug-aton ang Ginoo sa daghang mga sugo ngadto sa mga Santos, sugod sa sugo sa paghigugma sa Dios uban sa atong kasingkasing, gahum, hunahuna ug kusog. Si Presidente Ezra Taft Benson (1899–1994) mipasabut nga ang sugo nga higugmaon ang Dios naglukop sa tanang bahin sa atong mga kinabuhi:
“Ang paghigugma sa Dios uban sa tibuok ninyo nga kasingkasing, kalag, hunahuna, ug kusog tingub ug malukpanon. Dili kini taphaw nga paningkamot. Kini tibuok nga pasalig sa ato gayud nga kinabuhi—sa pisikal, mental, emosyunal, ug espiritwal—ngadto sa usa ka gugma sa Ginoo.
“Ang kalapdon, kalawmon, ug katas-on niini nga gugma sa Dios nagkatay ngadto sa tanang bahin sa kinabuhi sa usa ka tawo. Ang atong mga tinguha, sa espiritwal o temporal, kinahanglan nga ipagamot diha sa gugma sa Ginoo. Ang atong mga hunahuna ug mga pagbati kinahanglang nakasentro diha sa Ginoo. …
“Kinahanglan nga ibutang nato ang Dios diha sa kinaunahan sa tanang butang sa atong mga kinabuhi. Kinahanglan gayud nga siya ang unahon, ingon nga Siya nagpahayag diha sa una sa Iyang Napulo ka mga Sugo: ‘Dili ka magbaton og lain nga mga dios sa atubangan ko’ (Exodo 20:3).
“Kon atong unahon ang Dios, ang ubang tanan nga mga butang mapahimutang sa tukma nilang dapit o mawala sa atong mga kinabuhi. Ang atong gugma sa Ginoo modumala sa mga pang-angkon sa atong pagbati, sa mga panginahanglan sa atong panahon, sa mga interes nga atong gitinguha, ug sa han-ay sa atong mga prayoridad” (“The Great Commandment—Love the Lord,” Liahona, Mayo 1988, 4).
Kon atong higugmaon ang Dios uban sa atong tibuok nga mga kasingkasing, dayag lamang nga atong tinguhaon ang pagsunod sa Iyang mga sugo, pag-alagad Kaniya, ug sa paghigugma sa atong silingan sama sa atong mga kaugalingon (tan-awa sa D&P 59:6). Kon sa tinud-anay nahigugma kita sa Dios ug sa atong silingan, dili kita magtinguha sa pagpakasala batok sa uban pinaagi nga mangawat, manapaw, magpatay, o magbuhat “sa bisan unsa nga butang nga sama niini” (D&P 59:6). Kon kita nahigugma sa Dios atong mailhan ang Iyang kamot diha sa atong mga kinabuhi ug magpasalamat ngadto Kaniya “sa tanan nga mga butang” (D&P 59:7) ug malipayong mohalad Kaniya og masulub-on, o mahinulsulon nga kasingkasing ug usa ka mahinulsulon, masulundon nga espiritu (tan-awa sa D&P 59:8).
Doktrina ug mga Pakigsaad 59:8. “Kamo mohalad og usa ka sakripisyo … usa ka masulub-on nga kasingkasing ug usa ka mahinulsulon nga espiritu”
Human sa Iyang kamatayon ug Pagkabanhaw, ang Manluluwas misulti sa mga Nephite nga sila kinahanglan nga dili na mohalad og mga sakripisyo sa dugo ngadto Kaniya, sila karon mohalad na og mga sakripisyo sa usa ka masulub-on nga kasingkasing ug usa ka mahinulsulon nga espiritu (tan-awa sa 3 Nephi 9:19–20). Gibalik-balik kini sa Ginoo kining bag-o nga sakripisyo sa makadaghan nga higayon diha sa moderno nga pagpadayag, lakip ang pagpadayag ngadto sa mga Santos kinsa naningkamot sa pagtukod sa Zion (tan-awa sa D&P 59:8; tan-awa usab sa D&P 20:37; 56:17–18; 97:8).
Sa pagbaton og usa ka masulub-on nga kasingkasing ug mahinulsulon nga espiritu nagpasabut nga kita mapainubsanon ug manunuton ngadto sa kabubut-on sa Dios. Kini nagpasabut nga mobati kita og kaguol alang sa sala ug sinsero nga nagtinguha sa paghinulsol ug sa pagpuyo sa panag-uyon uban sa plano sa Dios. Si Elder Bruce D. Porter (1952–2016) sa Seventy mipasabut kon giunsa sa kinabuhi sa Manluluwas sa pagpakita kon unsa ang gipasabut niana:
“Unsa ang usa ka masulub-on nga kasingkasing ug mahinulsulon nga espiritu? Ug nganong gi-konsiderar kini nga usa ka sakripisyo?
“Sama sa tanan nga mga butang, ang kinabuhi sa Manluluwas nagtanyag kanato sa hingpit nga ehemplo: bisan og si Jesus nga Nazareno hingpit nga walay sala, naglakaw Siya sa kinabuhi uban ang masulub-on nga kasingkasing ug mahinulsulon nga espiritu, ingon nga gipakita Niya sa pagnunot ngadto sa kabubut-on sa Amahan. ‘Kay ako nanaog gikan sa langit, dili sa pagbuhat sa akong kaugalingong kabubut-on, kon dili sa kabubut-on sa nagpadala kanako’ (Juan 6:38). Ngadto sa Iyang mga disipulo Siya miingon, ‘Pagtuon kamo gikan kanako; kay ako maaghup ug mapaubsanon sa kasinkasing’ (Mateo 11:29). Ug sa miabut na ang panahon sa pagbayad sa katapusang sakripisyo nga gikinahanglan diha sa Pag-ula, si Kristo mikurog nga dili unta moinom sa mapait nga kopa apan sa hingpit minunot ngadto sa kabubut-on sa Iyang Amahan.
Ang hingpit nga pagnunot sa Manluluwas ngadto sa Mahangturong Amahan mao gayud ang kinaiyahan sa usa ka masulub-on nga kasingkasing ug mahinulsulon nga espiritu. Ang ehemplo ni Kristo nagtudlo kanato nga ang usa ka masulub-on nga kasingkasing usa ka hiyas sa pagkadios. Kon ang atong mga kasingkasing masulub-on, hingpit kita nga bukas ngadto sa Espiritu sa Dios ug makahibalo sa atong pagkanagsalig Kaniya sa tanan nga anaa kanato ug sa tanan nga kita mao. Ang sakripisyo nga pinugos kaayo maoy usa ka sakripisyo sa garbo diha sa tanan niini nga matang. Sama sa mainat-inat nga lapok [clay] diha sa mga kamot sa hanas nga magkukulon, ang masulub-on nga kasingkasing mahimong hulmahon ug pormahon diha sa mga kamot sa Agalon” (“Usa ka Masulub-on nga Kasingkasing ug Mahinulsulon nga Espiritu,” Liahona, Nob. 2007, 31–32).
Si Elder D. Todd Christofferson sa Korum sa Napulog Duha ka mga Apostoles misugyot og usa ka paagi nga kita makahalad niini nga sakripisyo ngadto sa Ginoo:
“Makahalad kamo ngadto sa Ginoo ang gasa sa inyong masulub-on, o mabasulon, nga kasingkasing ug sa inyong mahinulsulon o masulundon, nga espiritu. Sa tinuod, mao kini ang gasa sa inyong kaugalingon—kon unsa kamo ug kon unsa kamo mahimo sa maabut.
“Aduna bay butang diha kaninyo o sa inyong kinabuhi nga dili putli o dili takus? Kon inyo kining wagtangon, kana maoy usa ka gasa ngadto sa Manluluwas. Aduna bay maayong batasan o kalidad nga kulang diha sa inyong kinabuhi? Kon inyo kining dawaton ug himoon kini nga kabahin sa inyong kinaiya, naghatag kamo og usa ka gasa ngadto sa Ginoo” (“Kon Kamo Nakabig,” Liahona, Mayo 2004, 12).
Doktrina ug mga Pakigsaad 59:9–15. “Nga kamo moamping sa inyong mga kaugalingon nga walay buling gikan sa kalibutan”
Sa panahon sa Iyang katapusan nga mga takna sa mortalidad, nag-ampo ang Manluluwas nga ang Amahan dili kuhaon ang Iyang mga disipulo “gikan sa kalibutan” kon dili “sila ilikay gikan niadtong dautan” (Juan 17:15). Hapit human sa duha ka libo ka tuig, nakaplagan sa Iyang mga Santos sa Missouri ang ilang mga kaugalingon taliwala sa malapason sa balaod ug tampalasan nga mga tawo, ug misaad ang Ginoo nga sila mahimong magpabilin nga walay buling gikan sa sala ug sa pagkadili matarung sa kalibutan kon sila mosimba ug mopasidungog Kaniya “diha sa [Iyang] balaan nga adlaw” (D&P 59:9).
Si Elder Quentin L. Cook sa Korum sa Napulog Duha ka mga Apostoles mipasabut kon sa unsa nga paagi ang pagbalaan sa adlaw nga Igpapahulay nagtabang kanato nga mawalay buling gikan sa kalibutan: “Ang pagbalaan sa Igpapahulay usa ka matang sa pagkamatarung nga mopanalangin ug molig-on sa mga pamilya, mosumpay nato ngadto sa atong Tiglalang, ug modugang sa kalipay. Ang Igpapahulay mopalayo kanato gikan sa mga walay pulos, dili angay, o imoral. Magtugot kini nga kita maanaa sa kalibutan apan dili iya sa kalibutan” (“Sama sa Barko ug Sama sa Bristol: Pagpakatakus sa Templo—sa Maayo ug sa Lisud nga Panahon,” Liahona, Nob. 2015, 42).
Doktrina ug mga Pakigsaad 59:9. “Mohalad sa inyong mga sakramento diha sa akong balaan nga adlaw”
Si Elder Jeffrey R. Holland sa Korum sa Napulog Duha ka mga Apostoles mipasabut nga ang “usa ka sakrament mahimong usa sa daghang mga panglihok-lihok sa lawas o mga buhat o mga ordinansa nga naghiusa kanato uban sa Dios ug sa iyang walay katapusan nga mga gahum” (“Of Souls, Symbols, and Sacraments,” sa Jeffrey R. Holland ug Patricia T. Holland, On Earth As It Is in Heaven [1989], 193). Ang mga buhat nga nagdala kanato duol sa Dios ug nagpuno kanato uban sa Iyang gahum naglakip sa pag-ampo, pagkanta og mga himno, paghatag ug pagdawat og priesthood nga mga panalangin, pakigbahin og mga pagpamatuod, pagtuon sa mga kasulatan, paghatag og serbisyo, ug pagbag-o sa mga pakigsaad pinaagi sa pag-ambit sa sakrament.
Pinaagi sa pag-apil diha sa ordinansa sa sakrament ug sa pagsimba sa adlaw nga Igpapahulay, makaangkon kita og kalig-on batok sa tintasyon sa sala.
Doktrina ug mga Pakigsaad 59:10. Ngano nga ang Ginoo nagsugo kanato sa pagpahulay gikan sa atong mga kahago?
Gitudlo sa Ginoo ang adlaw nga Igpapahulay isip usa ka adlaw sa pagpahulay gikan sa kabug-at sa atong inadlaw nga mga trabaho. Kini usa ka adlaw alang sa espiritwal ug pisikal nga pagbag-o. Si Presidente James E. Faust (1920–2007) sa Unang Kapangulohan mipatataw sa pipila ka mga panalangin sa pagpahulay gikan sa atong mga kahago sa adlaw nga Igpapahulay: “Sulod sa tibuok kinabuhi nga pag-obserbar, kini klaro ngari kanako nga ang mag-uuma kinsa nagbalaan sa Igpapahulay nga adlaw ingon og mas daghan ang mahuman diha sa iyang uma kay sa siya motrabaho og pito ka adlaw. Ang mekaniko makahuman og daghan ug mas maayong mga hinimo sulod sa unom ka adlaw kay sa pito. Ang doktor, ang abugado, ang dentista, ang scientist makahuman og daghan pinaagi sa pagpaninguha sa pagpahulay diha sa Igpapahulay nga adlaw kay sa iyang gamiton ang kada adlaw sa semana alang sa iyang propesyonal nga trabaho. Motambag ako sa tanang mga estudyante, kon sila makahimo, sa pagplano sa ilang mga schedule aron dili sila magtuon sa Igpapahulay. Kon ang mga estudyante ug ubang mga tigpangita og kamatuoran mobuhat niini, ang ilang mga hunahuna mabanwagan ug ang walay katapusang Espiritu mogiya kanila ngadto sa mga kamatuoran nga ilang gitinguha nga makat-unan. Kini tungod kay ang Dios nagbalaan sa iyang adlaw ug gipanalanginan kini isip usa ka mahangturong pakigsaad sa pagkamatinud-anon. (Tan-awa sa Ex. 31:16.)” (“The Lord’s Day,” Ensign, Nob. 1991, 34).
Importante kini nga handumon nga ang sugo sa Ginoo sa pagpahulay gikan sa temporal nga mga trabaho sa Igpapahulay dili usa ka pagdapit alang sa katapul. Sa Doktrina ug mga Pakigsaad 59:9–13, mitudlo ang Ginoo sa mga Santos sa unsay kinahanglan nilang buhaton sa adlaw sa Igpapahulay. Si Presidente Spencer W. kimball (1895–1985) mitudlo: “Ang Igpapahulay usa ka balaang adlaw nga buhaton ang takus ug balaang mga butang. Ang dili pagtrabaho ug paglingaw-lingaw importante, apan kulang. Ang Igpapahulay nagdasig og makaayo nga mga hunahuna ug mga buhat, ug kon ang usa ka tawo nagpahayahay lamang nga walay gibuhat diha sa Igpapahulay, nakalapas siya niini” (Mga Pagtulun-an sa mga Presidente sa Simbahan: Spencer W. Kimball [2006], 212).
Doktrina ug mga Pakigsaad 59:10. “Mohatag og mga paghalad ngadto sa Labing Halangdon”
Ang paghatag sa atong mga paghalad ngadto sa Labing Halangdon nga Dios mao ang paghinumdom, pagsimba, ug pag-alagad sa Ginoo uban sa tibuok natong mga kasingkasing. Ang mga paghalad nga atong ihatag sa Ginoo sa Iyang balaan nga adlaw nagsalamin sa atong pagbati ug balaan nga pagtahud ug hugot nga pagtuo diha Kaniya. Si Presidente Russell M. Nelson sa Korum sa Napulog Duha ka mga Apostoles mitudlo:
“Unsaon nato pagbalaan ang adlaw nga Igpapahulay? Niadtong mas batan-on pa ko, gitun-an nako ang lista nga gibuhat sa ubang tawo sa mga butang nga buhaton ug mga butang nga dili buhaton sa Igpapahulay. Ulahi na nakong nasayran gikan sa mga kasulatan nga ang akong binuhatan ug kinaiya panahon sa Igpapahulay maoy usa ka timailhan tali kanako ug sa akong Langitnong Amahan. Ubos nianang pagsabut, wala na ko magkinahanglan og listahan sa angay buhaton ug dili angay buhaton. Kon kinahanglan nakong modesisyon nga ang usa ka kalihokan angay ba o dili angay alang sa Igpapahulay, mangutana lang ko sa akong kaugalingon, ‘Unsa man nga timailhan ang gusto nakong ihatag ngadto sa Dios?’ Kana nga pangutana nakapaklaro kaayo sa akong mga pagpili sa adlaw nga Igpapahulay. …
“Unsaon ninyo pagsiguro nga ang inyong kinaiya sa Igpapahulay mopadulong sa kalipay ug kamaya? Agig dugang sa inyong pag-adto sa simbahan, pag-ambit sa sakrament, ug pagmakugihon sa inyong tawag nga moserbisyo, unsa pa ang ubang kalihokan nga makatabang aron ang Igpapahulay makahimuot kaninyo? Unsa nga timailhan ang inyong ihatag sa Ginoo sa pagpakita sa inyong gugma alang Kaniya?” (“Ang Igpapahulay usa ka Kahimut-an,” Liahona, Mayo 2015, 130).
Doktrina ug mga Pakigsaad 59:12. “Mokumpisal sa inyong mga sala … sa atubangan sa Ginoo”
Ang Igpapahulay maoy usa ka adlaw nga mapalandungon ug masusihon sa kaugalingon ug sa pag-angkon sa atong mga sala diha sa atubangan sa Ginoo. Si Elder L. Tom Perry (1922–2015) sa Korum sa Napulog Duha ka mga Apostoles mitudlo:
“Atong gidawat nga tanan kita masayop. Ang matag usa kanato may panginahanglan sa pagkumpisal ug sa pagbiya sa atong mga sala ug mga kasaypanan ngadto sa atong Langitnong Amahan ug sa uban nga tingali atong napasakitan. Ang Igpapahulay naghatag kanato og bililhong oportunidad sa paghalad niining—atong mga sakrament—ngadto sa Ginoo. …
“Si Elder Melvin J. Ballard nagsugyot, ‘Buot kami nga ang matag Santos sa Ulahing mga Adlaw moduol sa lamesa sa sakrament tungod kay dapit kini alang sa pag-imbistiga sa kaugalingon, pagsusi sa kaugalingon, diin kita makakat-on sa pagtul-id sa atong dalan ug sa pagtarung sa atong mga kinabuhi, nagdala sa atong mga kaugalingon nga uyon sa mga pagtulun-an sa Simbahan ug sa atong mga kaigsoonan’ [sa Bryant S. Hinckley, Sermons and Missionary Services of Melvin Joseph Ballard (1949), 150]” (“Ang Igpapahulay ug ang Sakrament,” Liahona, Mayo 2011, 8).
Ang Ginoo maloloy-on ngadto niadtong kinsa “nagkumpisal sa ilang mga sala uban sa mapainubsanon nga mga kasingkasing” (D&P 61:2).
Doktrina ug mga Pakigsaad 59:13–14. “Nga ang inyong pagpuasa mahimo nga hingpit”
Sa adlaw nga Igpapahulay kita kinahanglan nga mohalad sa atong mga kasingkasing sa hingpit ngadto sa Ginoo. Ang Ginoo nagsugo nga gani kita kinahanglan mag-andam sa atong mga pagkaon “uban ang usa ka katuyoan sa kasingkasing” (D&P 59:13), uban sa atong mga tinguha ug mga hunahuna nga nakatutok diha sa mga butang sa Dios. Samtang atong ihalad ang tibuok natong mga kaugalingon ngadto sa Dios, ang atong pagpuasa mahimong hingpit.
Ang Igpapahulay mismo usa ka pagpuasa—usa ka pagpuasa gikan sa temporal nga mga kahago ug kalibutanong mga kabalaka. Sama lamang nga kita nagpugong gikan sa pagkaon ug pag-inom kon nagpuasa, kita naglikay gikan sa atong kaugalingong mga kalipayan sa adlaw nga Igpapahulay aron sa pagsimba ug pag-alagad sa Ginoo sa mas hingpit nga paagi. Si Presidente Russell M. Nelson mitudlo: “Ang dili pagsunod sa imong ‘kaugalingon nga kalipayan’ [Isaiah 58:13] sa Igpapahulay nagkinahanglan og disiplina sa kaugalingon. Mahimong ihikaw ninyo sa inyong kaugalingon ang unsay inyong ganahan. Kon mopili kamo nga malipay ang inyong kaugalingon diha sa Ginoo, dili kamo motratar niini sama sa ordinaryong adlaw” (“Ang Igpapahulay usa ka Kahimut-an,” Liahona, Mayo 2015, 132).
Doktrina ug mga Pakigsaad 59:16–21. “Kadtong dili mokumpisal sa iyang sayop diha sa tanan nga mga butang”
Nagsaad ang Ginoo sa mga panalangin sa yuta ngadto niadtong kinsa nagsunod sa Iyang adlaw nga Igpapahulay nga balaan, “ug kini makapahimuot sa Dios nga siya ang naghatag sa tanan nga mga butang ngadto sa tawo” (D&P 59:20). Bisan pa niana, kita nakasala, o nakapahiubos, sa Dios kon dili kita moila sa Iyang impluwensya sa tanan nga Iyang nahatag kanato ug mopahayag sa atong pagpasalamat ngadto Kaniya. Si Presidente Dieter F. Uchtdorf sa Unang Kapangulohan mipasabut sa importansya sa pag-ila sa impluwensya sa Ginoo diha sa tanang mga butang:
“Wala ba kitay katarungan aron mapuno sa pagkamapasalamaton, bisan unsa pa ang atong mga kahimtang? …
“Pagkabulahan nato kon atong maila ang binuhatan sa Dios sa talagsaong paglala sa kinabuhi. Ang pagpasalamat ngadto sa atong Amahan sa Langit makapalapad sa atong panglantaw ug makapaklaro sa atong panan-aw. Makadasig kini og kamapainubsanon ug makaugmad og kalooy ngadto sa atong isigkatawo ug sa tanang nilalang sa Dios. Ang pagkamapasalamaton usa ka mahinungdanong bahin sa tanang sama kang Kristo nga mga kinaiya! Ang mapasalamatong kasingkasing mao ang tinubdan sa tanang hiyas” (“Mapasalamaton sa Bisan Unsang Kahimtang,” Liahona, Mayo 2014, 77).
Doktrina ug mga Pakigsaad 59:23. “Kalinaw niini nga kalibutan”
Nagsaad ang Ginoo og “kalinaw niini nga kalibutan, ug kinabuhi nga dayon diha sa kalibutan nga umaabut” niadtong kinsa nagbuhat og mga buluhaton sa pagkamatarung (D&P 59:23). Si Elder Quentin L. Cook sa Korum sa Napulog Duha ka mga Apostoles mipasabut sa matang sa kalinaw nga moabut gikan sa matarung nga pagkamasulundon ngadto sa mga sugo sa Ginoo:
“Matinguhaon kitang naglaum ug nag-ampo alang sa kinatibuk-ang kalinaw, apan anaa sa mga indibidwal ug pamilya nga atong makab-ut ang matang sa kalinaw nga mao ang gisaad nga ganti sa pagkamatarung. Kini nga kalinaw usa ka gisaad nga gasa sa misyon ug maulaong sakripisyo sa Manluluwas. …
“Ang kalinaw nga akong gipasabut dili lamang temporaryo nga kahilum. Usa kini ka malungtaron nga lawom nga kalipay ug espirituhanong katagbawan.
“Gihulagway ni Presidente Heber J. Grant ang kalinaw sa Manluluwas niini nga paagi: ‘Ang Iyang kalinaw mohupay sa atong pag-antus, maghiusa sa atong masulub-on nga kasingkasing, mopapas sa atong mga kasilag, moumol diha sa atong mga dughan og usa ka gugma sa atong isigka tawo nga mopuno sa atong mga kalag og kalinaw ug kalipay’ [Mga Pagtulun-an sa mga Prsidente sa Simbahan: Heber J. Grant (2002), 270]” (“Personal nga Kalinaw: Ang Ganti sa Pagkamatarung,” Liahona, Mayo 2013, 33).
Doktrina ug mga Pakigsaad 60: Dugang nga Makasaysayanong Background
Atol sa unang semana sa Agosto 1831, ang mga elder kinsa mibiyahe ngadto sa Missouri mitambong og komperensya sa Simbahan ug miapil diha sa pagpahinungod sa yuta sa Zion ug sa dapit diin ang templo pagatukuron. Nahuman ang ilang mga trabaho, daghan sa mga elder buot nga mobalik ngadto sa Kirtland, Ohio (tan-awa sa The Joseph Smith Papers, Documents, Volume 2: Hulyo 1831–Enero 1833, 35). Nangutana ang mga elder ni Propeta Joseph Smith kon unsa ang kinahanglan nilang buhaton, ug nadawat niya ang pagpadayag nga gi-rekord diha sa Doktrina ug mga Pakigsaad 60.
Doktrina ug mga Pakigsaad 60
Ang Ginoo nagmando sa mga elder sa pagsangyaw sa ebanghelyo samtang sila nagbiyahe balik ngadto sa Ohio
Doktrina ug mga Pakigsaad 60:2. “Sila nagtago sa ilang kahibalo nga Ako mihatag ngadto kanila”
Gipanton sa Ginoo ang mga elder kinsa wala motuman sa ilang responsibilidad sa pagsangyaw sa ebanghelyo. Gigamit nga pakisayran ang Iyang sambingay sa mga talento (tan-awa sa Mateo 25:14–30), ang Ginoo miingon,“Sila nagtago sa kahibalo nga Ako mihatag ngadto kanila, sa [ilang] kahadlok sa tawo” (D&P 60:2). Niini nga pagpadayag, “ang talento” nagpasabut sa usa ka kahibalo ug pagpamatuod sa gipahiuli nga ebanghelyo. Uban niining espiritwal nga mga gasa moabut ang obligasyon sa pagpakigbahin sa kahibalo ug sa pagpamatuod sa usa ka tawo ngadto sa uban.
Si Propeta Joseph Smith (1805–1844) mitudlo nga ang atong “pinakadako ug pinaka-importante nga katungdanan mao ang pagsangyaw sa Ebanghelyo” (Mga Pagtulun-an sa mga Presidente sa Simbahan: Joseph Smith [2007], 397). Si Presidente Dieter F. Uchtdorf mipasabut og mga paagi nga kita makatuman niini nga responsibilidad:
“Mga batan-on nakong mga higala, tingali ang pag-awhag sa Ginoo sa ‘pagbuka sa [inyong] mga ba-ba’ [D&P 60:2] tingali karon maglakip sa ‘paggamit sa inyong mga kamot’ sa pag-blog ug pag-text sa mensahe sa ebanghelyo ngadto sa tibuok kalibutan! Apan palihug hinumdumi, ang tanan sa tukmang panahon, ug sa tukmang dapit.
“… Uban sa mga panalangin sa modernong teknolohiya, atong mapadayag ang pagpasalamat ug kalipay kabahin sa mahinungdanong plano sa Dios alang sa Iyang mga anak sa paagi nga madungog dili lang sa atong mga trabahoan apan libut sa tibuok kalibutan. Usahay ang usa ka hugpong sa mga pulong sa pagpamatuod makapasugod sa mga panghitabo nga maka-apekto sa kinabuhi sa laing tawo hangtud sa kahangturan.
“Ang pinaka-epektibong paagi sa pagsangyaw sa ebanghelyo mao ang pinaagi sa ehemplo. Kon kita magkinabuhi pinasubay sa atong mga pagtuo, ang katawhan makamatikod. Kon ang panagway ni Jesukristo mosidlak sa atong kinabuhi, kon kita malipayon ug may kalinaw sa kalibutan, ang mga tawo gustong mahibalo ngano. Usa sa pinakamahinungdanong wali nga nalitok kabahin sa misyonaryo nga buhat mao kining yanong hunahuna nga napahinungod kang St. Francis sa Assissi: ‘Isangyaw ang ebanghelyo sa tanang panahon ug kon gikinahanglan, gamiti og mga pulong’ [sa William Fay ug Linda Evans Shepherd, Share Jesus without Fear (1999), 22]” (“Naghulat diha sa Dalan sa Damascco,” Liahona, Mayo 2011, 77).
Doktrina ug mga Pakigsaad 60:8. “Ang mga katiguman sa dautan”
Ang hugpong sa mga pulong nga “katiguman sa mga dautan” ingon nga gigamit diha sa Doktrina ug mga Pakigsaad 60:8 ug sa ubang mga pagpadayag (tan-awa usab sa D&P 61:33; 62:5) dili gyud nagpaasabut nga ang tanang mga tawo niini nga mga dapit nakasala sa sobra kaayong pagkadautan. Hinoon, ang hugpong sa mga pulong nagpasabut ngadto sa mga tawo kinsa walay kahibalo o pagsabut sa gipahiuli nga ebanghelyo ni Jesukristo. Ang pagkawalay kahibalo sa mga baruganan ug makaluwas nga mga ordinansa sa ebanghelyo, nagpuyo sila sa gawas sa pakigsaad sa Dios. Tungod niini nga katarungan nagtawag ang Ginoo og mga misyonaryo aron sa pagsangyaw ngadto sa mga kongregasyon [mga katiguman] o mga komunidad sa mga tawo ug nagdapit kanila sa paghinulsol ug sa pagdawat sa mga ordinansa sa kaluwasan.
Doktrina ug mga Pakigsaad 60:13–14. “Ayaw kamo pag-usik sa inyong panahon”
Misugo ang Ginoo sa mga elder sa pagsangyaw sa ebanghelyo samtang sila mibiyahe balik ngadto sa Ohio ug mipasidaan kanila sa dili “pag-usik sa [ilang] panahon” (D&P 60:13). Si Elder M. Russell Ballard sa Korum sa Napulog Duha ka mga Apostoles mihulagway og pipila ka mga paagi nga kita nag-usik sa atong panahon ug ang mga kuyaw sa pagbuhat sa mao:
“Usa sa mga paagi nga si Satanas nagkunhod sa inyong pagka-epektibo ug nagluya sa inyong espiritwal nga kusog mao ang pag-awhag kaninyo sa paggahin og daghang mga panahon sa pagbuhat og mga butang nga gamay kaayo og kapuslanan. Namulong ako sa mga butang sama sa pagpadayon og tan-aw sa telebisyon o mga video, pagdula og mga video game sa tibuok gabii, matag gabii, o pag-surf sa Internet, o paghatag og dako kaayong panahon sa mga sport, mga dula, o ubang makalingaw nga mga kalihokan.
“Ayaw laina ang inyong pagsabut kanako. … Ang mga dula, mga sport, mga kalihokan nga makalingaw, bisan ang telebisyon makapahimudlay ug makapaabtik, ilabi na sa mga panahon nga kamo ubos sa kahago o sa kabug-at sa schedule. Nagkinahanglan kamo og mga kalihokan nga motabang kaninyo sa pagpahimudlay ug sa pagpahulay sa inyong mga hunahuna. …
“Apan namulong ako sa pagtugot og mga butang nga manobra. …
“Usa ka makadaot nga epekto sa pag-usik sa atong panahon mao nga kini mopugong kanato gikan sa pagtutok diha sa mga butang nga importante kaayo. Daghan kaayong mga tawo nga gustong magpuyo lamang ug magpaabut unsay mahitabo sa ilang kinabuhi. Nagkinahanglan kini og panahon sa pagpalambo og mga hiyas nga motabang kaninyo nga mahimong usa ka maayong pagkabalanse nga tawo. …
“… Busa tutuki ang labing maayo kutob sa inyong mahimo kadtong mga butang sa kinabuhi nga mogiya kaninyo balik ngadto sa presensya sa Dios—naghupot sa tanang butang diha sa tukmang balanse niini” (“Be Strong in the Lord,” Ensign, Hulyo 2004, 13–14).
Doktrina ug mga Pakigsaad 61: Dugang nga Makasaysayanong Background
Kaniadtong Agosto 9, 1831, si Propeta Joseph Smith ug 10 ka mga elder mibiya sa Independence, Missouri, nga nagbaroto padulong ubos sa Suba sa Missouri ngadto sa St. Louis. Ang suba lisud nga malawig tungod sa daghang nangatumba nga mga kahoy nga naunlod diha sa suba. Atol sa unang pipila ka mga adlaw sa pagbiyahe, dihay pipila ka panagbangi sa grupo ug mga pagbati sa panagbingkil diha sulod sa pipila ka panahon. Sa ikatulo nga adlaw sa panaw, usa ka naunlod nga kahoy hapit makapatikyaub sa baroto nga gisakyan ni Joseph Smith ug Sidney Rigdon. Sa pag-aghat sa Propeta, ang grupo nagkampo diha sa mga pangpang sa Suba sa Missouri sa usa ka dapit nga gitawag og Mcllwaine’s Bend. Human mibiya sa suba aron sa paghimo og kampo, si William W. Phelps nakakita diha sa adlawng dako “sa Tiglaglag, sa iyang labing makalilisang nga gahum, naglutaw ibabaw sa katubigan” (Manuscript History of the Church, vol. A-1, pahina 142, josephsmithpapers.org). Nianang pagkagabii gihisgutan sa grupo ang ilang mga kalisud, gihusay ang ilang mabingkilon nga mga pagbati, ug nagpinasayloay. Pagkasunod nga buntag nadawat sa Propeta ang pagpadayag nga gi-rekord diha sa Doktrina ug mga Pakigsaad 61.
Si Propeta Joseph Smith ug uban pa nagkampo sa duol niini nga dapit, nga giingon og Mcllwaine’s Bend, diha sa Suba sa Missouri samtang nagbiyahe pinaagi sa tubig ngadto sa St. Louis, Missouri, kaniadtong Agosto 1831.
Doktrina ug mga Pakigsaad 61
Naghatag og pahimangno ug direksyon ang Ginoo ngadto ni Joseph Smith ug sa mga elder nga nagpanaw ngadto sa Ohio
Doktrina ug mga Pakigsaad 61:3. “Mopanaw sa makusog diha sa mga tubig, samtang ang mga lumulupyo sa isig ka daplin nagkahanaw tungod sa pagkawalay pagtuo”
Sa dihang ang mga elder mibiyahe sa “makusog diha sa mga tubig” sa Suba sa Missouri, wala sila makasangyaw sa ebanghelyo ngadto sa mga katawhan nga nagpuyo sa isig ka mga kilid sa suba kinsa “nagkahanaw tungod sa pagkawalay pagtuo” (D&P 61:3). Susama, usahay atong gipasagdan ang mga panginahanglan niadtong naglibut kanato tungod kay kita hilabihan ka nagkapuliki “mibiyahe sa makusog” diha sa atong mga kinabuhi. Si Presidente Thomas S. Monson mitudlo:
“Pila na ba ka higayon nga ang inyong kasingkasing natandog samtang nakasaksi kamo sa panginahanglan sa uban? Kapila na ba kamo nagtinguha nga maoy motabang? Ug gani, kapila na ba ang inadlaw-adlaw nga pagpakabuhi mibalda ug inyo rang gipasagdan ang uban nga maoy motabang, mibati nga ‘ah, sigurado nga may tawo nga moatiman niana nga panginahanglan.’
“Nahimo kita nga hilabihan ka nasakmit sa pagkapuliki sa atong mga kinabuhi. Kon kita pabalikon, hinoon, ug hunahunaon og maayo ang unsay atong gibuhat, mahimo natong makita nga atong gisubsub ang atong mga kaugalingon diha sa ‘gagmay og bili nga mga butang.’ Sa ato pa, kasagaran gayud atong gigahin ang kadaghanan sa atong panahon sa pag-atiman sa mga butang nga dili gayud kaayo mahinungdanon sa kinatibuk-ang plano sa kinabuhi, nagpasagad niadtong mas importante nga mga kawsa” (“Unsa ang Akong Nabuhat alang sa Usa ka Tawo Karon?” Liahona, Nob. 2009, 85).
Doktrina ug mga Pakigsaad 61:4–19. “Sa katapusan nga mga adlaw … Ako mitunglo sa mga tubig”
Ang mga pulong sa Ginoo diha sa Doktrina ug mga Pakigsaad 61:4–19 wala magdili sa mga Santos sa Ulahing mga Adlaw sa pagbiyahe o paglangoy-langoy sa tubig. Sa paghulagway sa tunglo diha sa mga tubig sa katapusang mga adlaw, ang Ginoo tingali nagpasabut ngadto sa mga tudling diha sa basahon sa Pinadayag diin naghulagway si Apostol Juan sa kalaglagan nga mahitabo diha sa mga tubig sa dili pa ang Ikaduhang Pag-anhi ni Jesukristo (tan-awa sa Pinadayag 8:8–11; 16:2–6). Sa Doktrina ug mga Pakigsaad 61, ang Ginoo nagpasabut sa piho ngadto sa kuyaw “niini nga mga tubig,” nagpasabut sa Suba sa Missouri (tan-awa sa D&P 61:5, 18). Sa panahon niini nga pagpadayag, ang mga kuyaw sa Suba Missouri naglakip sa mga aksidente tungod sa mga kalisud sa paglawig sa mga tubig ug natakdan og kolera, usa ka sakit nga kasagarang mikatap pinaagi sa hugaw nga tubig (tan-awa sa “The Way of Journeying for the Saints of Christ,” Evening and Morning Star, Dis. 1832, 105).
Doktrina ug mga Pakigsaad 62: Dugang nga Makasaysayanong Background
Kaniadtong Agosto 13, 1831, si Propeta Joseph Smith ug ang mga elder nga nagbiyahe uban kaniya ngadto sa Kirtland, Ohio, misugat ni Hyrum Smith, John Murdock, Harvey Whitlock, ug David Whitmer didto sa Chariton, Missouri. Kini nga mga elder wala pa makaabut sa Independence, Missouri, tungod kay sa usa ka bahin nagsangyaw sila sa ebanghelyo sa dalan ug sa usa ka bahin tungod kay ang sakit ni John Murdock nakalangan sa ilang biyahe. Sa kadugayan gisaysay ni Joseph Smith nga “human sa malipayon nga mga pagtimbayahay sa panagkita sa usag usa sa mga kaigsoonan” nadawat niya ang pagpadayag nga gi-rekord diha sa Doktrina ug mga Pakigsaad 62 (sa Manuscript History of the Church, vol. A-1, pahina 145, josephsmithpapers.org).
Doktrina ug mga Pakigsaad 62
Gidayeg sa Ginoo ang pagkamatinud-anon sa usa ka pundok sa mga elder nga nagbiyahe ngadto sa Independence, Missouri
Doktrina ug mga Pakigsaad 62:3. “Kamo mga bulahan, kay ang pagpamatuod nga inyong napamulong gitala diha sa langit”
Ang Ginoo midayeg sa mga elder kinsa wala pa makaadto sa Zion sa ilang matinud-anon nga mga pagpamatuod nga ilang gipakigbahin samtang sila nagbiyahe. Lahi sa ubang mga elder nga nagbiyahe uban ni Propeta Joseph Smith, kinsa gipanton sa Ginoo tungod sa wala pagsangyaw sa ebanghelyo (tan-awa sa D&C 60:2–3), kining grupo sa mga misyonaryo makugihon ug malampuson nga nagsangyaw sa ebanghelyo ug naglig-on sa Simbahan samtang sila mipanaw ngadto sa Zion. Kauban niining matinud-anon nga mga misyonaryo mao sila si Levi Hancock, Zebedee Coltrin, Simeon Carter, ug Solomon Hancock. Mibunyag sila og sobra sa usa ka gatus ka mga tawo nga ilang naagian (tan-awa sa The Joseph Smith Papers, Documents, Volume 2: Hulyo 1831–Enero 1833, ed. Matthew C. Godfrey ug uban pa [2013], 46). Mipanalangin ang Ginoo sa pagkamatinud-anon niini nga mga misyonaryo, nag-ingon nga ang ilang mga pagpamatuod “gitala diha sa langit alang sa pagtan-aw sa mga anghel” (D&P 62:3). Dugang pa, mipahayag ang Ginoo nga ang mga sala niini nga mga misyonaryo napasaylo.
Nahimuot ang Ginoo niadtong kinsa mobuka sa ilang mga ba-ba ug mopakigbahin sa ilang pagpamatuod nga Iyang gihatag kanila (tan-awa sa D&P 62:3).
Bisan kon ang pagpasaylo moabut pinaagi sa Pag-ula ni Jesukristo samtang kita naghinulsol ug nagpuyo sumala sa Iyang mga sugo, nagsangyaw sa ebanghelyo ug nagtabang sa uban sa pagduol ngadto sa Manluluwas makatabang kanato sa pagdawat og kapasayloan sa atong mga sala. Si Presidente Spencer W. Kimball (1895–1985) mitudlo: “Misulti ang Ginoo kanato nga ang atong mga sala mas dali nga mapasaylo samtang kita magdala og mga kalag ngadto ni Kristo ug magpabilin nga dili matarug sa pagpamatuod ngadto sa kalibutan, ug sa tinuod matag usa kanato nangita og dugang nga panabang nga mapasaylo sa atong mga sala” (“It Becometh Every Man,” Ensign, Okt. 1977, 5).
Doktrina ug mga Pakigsaad 62:5–8. “Paghukom ug mga pagmando sa Espiritu”
Sa pipila ka mga okasyon lain-laing mga grupo sa mga elder ang nangutana kon sa unsa nga paagi sila kinahanglan nga mobiyahe, unsa nga rota ang ilang agian, unsa nga paagi ang gamiton sa pagbiyahe, o kon mobiyahe ba og dungan o tinagurha. Sa kada usa niini nga higayon ang Manluluwas mipahayag, “Kini walay bali kanako” (D&P 60:5; 61:22; 62:5).
Kabahin niini nga tubag, si Elder David A. Bednar sa Korum sa Napulog Duha ka mga Apostoles mitudlo:
“Ang pahayag sa Ginoo nga ang mao nga mga butang ‘walay bali kanako’ sa sinugdanan ingon og katingalahan. Sa tataw, wala magsulti ang Manluluwas ngadto niini nga mga misyonaryo nga wala Siya magtagad mahitungod sa unsay ilang buhaton. Hinoon, nagtataw Siya sa importansya sa pagbutang og una sa importante nga mga butang ug sa pagtutok diha sa husto nga mga butang. … Gikinahanglan sila nga mogamit og hugot nga pagtuo, mogamit og maayo nga paghukom, molihok sumala sa direksyon sa Espiritu, ug mohunahuna sa labing maayo nga paagi sa pagbiyahe ngadto sa ilang mga misyon. Ang mahinungdanon nga butang mao ang buhat nga sila gitawag sa paghimo; giunsa nila pag-abut didto mahinungdanon apan dili kinahanglanon. …
“Ang labing mapugsanon nga mga paghukom nga sukad atong nahimo mga panagsa tali sa maayo ug sa dautan o tali sa makapadani o dili makapadani nga mga kapilian. Kasagaran, ang atong labing malisud nga mga pagpili tali sa maayo nga mga butang. Niini nga eskriptural nga yugto [nagpasabut ngadto sa D&P 62:7–9], ang mga kabayo, mga asno, ug mga karwahe mahimong sama ka epektibo nga mga kapilian alang sa misyonaryo nga biyahe. Sa samang paagi, kamo ug ako usab mahimo nga moila sa lain-laing mga panahon sa atong mga kinabuhi og labaw kay sa usa nga madawat nga oportunidad o kapilian nga kita makapili sa pagsunod. Kinahanglan nga atong hinumduman kini nga sumbanan samtang kita nagkaduol nianang importante nga mga desisyon. Kon atong ibutang ang importanting mga butang og una sa atong mga kinabuhi—mga butang sama sa pagpahinungod nga pagkadisipulo, pagbalaan sa mga pakigsaad, ug pagsunod sa mga sugo—niana kita mapanalanginan og inspirasyon ug lig-on nga paghukom samtang nagpadayon kita sa agianan nga naggiya kanato balik ngadto sa atong langitnong panimalay” (“A Reservoir of Living Water,” [Brigham Young University fireside, Peb. 4, 2007], 5–6, speeches.byu.edu).
Si Elder Dallin H. Oaks mipasabut nganong ang atong Langitong Amahan nagbiya og daghang mga desisyon sa atong kaugalingon nga paghukom:
“Ang usa ka tinguha nga pagagiyahan sa Ginoo usa ka kalig-on, apan kinahanglan kini nga pagaubanan sa pagsabut nga ang atong Langitnong Amahan nagbiya og daghang mga desisyon alang sa atong personal nga mga pagpili. Ang personal nga paghimo og desisyon usa sa mga tinubdan sa pagtubo nga kita kinahanglan makasinati niini nga mortalidad. …
“Kinahanglan nga atong tun-an ang mga butang diha sa atong mga hunahuna, naggamit sa mga gahum sa pagpangatarungan nga gibutang sa atong Tiglalang diha sulod kanato. Dayon kinahanglan kitang mag-ampo alang sa paggiya ug lihukon kini kon madawat nato kini. Kon kita dili makadawat og paggiya, kinahanglan atong lihokon diha sa atong labing maayo nga paghukom” (“Our Strengths Can Become Our Downfall,” Ensign, Okt. 1994, 13–14).