Kapitulo 18

Doktrina ug mga Pakigsaad 46–49

Pasiuna ug Timeline

Sa tingtugnaw sa 1831, pipila sa mga miyembro sa Simbahan sa Kirtland, Ohio, nabalaka sa dihang ilang nakita ang pipila sa bag-ong mga kinabig nga lain og mga linihokan samtang nag-angkon nga ubos sa impluwensya sa Espiritu. Nangutana si Propeta Joseph Smith sa Ginoo mahitungod niini nga kinaiya ingon man mahitungod sa gibuhat sa mga Santos sa Kirtland sa dili pagpaapil sa dili mga miyembro sa mga miting sa sakrament ug sa ubang mga pagpundok sa Simbahan. Agig tubag, sa Marso 8, 1831, mihatag ang Ginoo sa pagpadayag nga gi-rekord karon diha sa Doktrina ug mga Pakigsaad 46. Niini nga pagpadayag mipasabut ang Ginoo kon unsaon sa pagdumala og mga miting sa Simbahan ug unsaon sa paglikay og paglingla pinaagi sa pagtinguha sa mga gasa sa Espiritu.

Sa wala pa ang Marso 1831, si Oliver Cowdery mao ang tigsulat ni Joseph Smith ug tigrekord alang sa Simbahan. Hinoon, sa dihang gitawag siya og misyon, dili na siya makahimo niini nga mga katungdanan. Sa pagpadayag nga gi-rekord diha sa Doktrina ug mga Pakigsaad 47, gitawag sa Ginoo si John Whitmer sa pagpuli ni Oliver ug sa pagsulat ug paghipos sa kasaysayan sa Simbahan. Atol niining samang panahon, ang mga Santos sa Ohio nagtinguha usab nga mahibalo kon unsaon nila pagtabang ang mga miyembro sa Simbahan nga mibalhin gikan sa New York. Sa pagpadayag nga gi-rekord diha sa Doktrina ug mga Pakigsaad 48, gisultihan sa Ginoo ang mga Santos sa pagtabang sa bag-ong nangabut nga mga kinabig.

Si Leman Copley, usa ka bag-ong kinabig sa Simbahan, gusto nga ang mga misyonaryo magsangyaw sa ebanghelyo ngadto sa mga miyembro sa iyang kanhi relihiyusong grupo, ang mga Shaker. Bisan pa man niana, mipadayon siya sa paghupot sa pipila ka sayop nga mga gituohan sa mga Shaker. Nabalaka bahin sa nagpabilin nga mga gituohan ni Leman, si Joseph Smith nangutana sa Ginoo niadtong Mayo 7, 1831, ug nadawat ang pagpadayag nga gi-rekord karon diha sa Doktrina ug mga Pakigsaad 49. Niini nga pagpadayag giklaro sa Ginoo ang Iyang tinuod nga doktrina ug gisaway ang pipila ka sayop nga mga tinuohan sa mga Shaker.

Tingpamulak sa 1831Ang bag-ong mga kinabig sa Kirtland, Ohio, nagsinati og dili tinuod nga mga pagpadayag.

Marso 8, 1831Ang Doktrina ug mga Pakigsaad 46 nadawat.

Marso 8, 1831Ang Doktrina ug mga Pakigsaad 47 nadawat.

Marso 10, 1831Ang Doktrina ug mga Pakigsaad 48 nadawat.

Marso 1831Gitudlo si John Whitmer sa pagserbisyo isip tigsaysay ug tigrekord sa Simbahan.

Hinapos sa Marso 1831Mibalik si Parley P. Pratt ngadto sa Kirtland gikan sa usa ka misyon didto sa Teritoryo sa Indian ug sa Missouri.

Mayo 7, 1831AngDoktrina ug mga Pakigsaad 49 nadawat.

Mayo 7, 1831Sila si Sidney Rigdon, Parley P. Pratt, ug Leman Copley mibiya sa Kirtland aron sa pagbisita og usa ka komunidad sa mga Shaker.

Paghunahuna mahitungod sa mga talento, mga interes, ug mga kahanas nga anaa kaninyo nga nakapalahi kaninyo sa uban. Pinaagi sa gasa sa Espiritu Santo, ang Langitnong Amahan naghatag og espiritwal nga mga gasa aron sa pagtabang kanato sa pagserbisyo sa uban ug sa pagtukod sa Iyang gingharian. Samtang inyong tun-an ang Doktrina ug mga Pakigsaad 46, pangita og paghulagway sa mga gasa sa Espiritu ug unsaon kaha ninyo pag-angkon niini.

Doktrina ug mga Pakigsaad 46: Dugang nga Makasaysayanong Background

Sa unang mga adlaw sa Simbahan, ang mga Santos sa Kirtland, Ohio, wala mitugot niadtong lahi og tinuohan sa pagtambong og mga miting sa pag-ampo. Kini supak sa panudlo nga gihatag diha sa Basahon ni Mormon nga piho nga nagtudlo nga ang mga sumusunod ni Kristo kinahanglan nga dili magdili ni bisan kinsa sa pagpakigpundok uban sa mga Santos (tan-awa sa 3 Nephi 18:22). Dugang pa, niadtong Hunyo 1829, sa dihang gipundok ni Oliver Cowdery ang usa ka dokumento nga gitawag og “Articles of the Church of Christ” [Mga Artikulo sa Simbahan ni Kristo] (nga gisulat aron sa paghatag og direksyon ngadto sa matinud-anon hangtud ang Simbahan opisyal nga ma-organisar), nagpasabut siya ngadto niini nga panudlo diha sa Basahon ni Mormon sa dihang siya misulat, “‘Ug magpundok ang simbahan sa kanunay alang sa pag-ampo [ug] pangamuyo nga walay isalikway gikan sa inyong mga dapit nga ampoanan apan hinoon dapiton sila sa pag-apil’ [‘Articles of the Church of Christ,’ Hunyo 1829, p. 372 dinhi niini]” (sa The Joseph Smith Papers, Documents, Volume 1: Hulyo 1828–Hunyo 1831, ed. Michael Hubbard MacKay ug uban pa [2013], 281; spelling gi-standardize). Ang buhat sa dili pagpaapil sa mga dili tumutuo sa publiko nga mga miting, sa ingon, usa ka kabalaka, ug, sumala ni John Whitmer, “ang Ginoo miuyon sa pagsulti kabahin niini nga hilisgutan, nga ang iyang mga katawhan mahimong makasabut” (sa The Joseph Smith Papers, Histories, Volume 2: Assigned Histories, 1831–1847, ed. Karen Lynn Davidson [2012], 34). Ang pagpadayag nga misunod (Doktrina ug mga Pakigsaad 46) miklaro sa kabubut-on sa Ginoo. Misugo Siya sa mga Santos “sa dili pagsalikway ni bisan kinsa gikan sa [ilang] mga tigum diha sa publiko” (D&P 46:3).

Agi og dugang niining mga buhat sa dili pagpaapil, pipila sa bag-ong mga miyembro sa Simbahan nagpakita og lain nga mga kinaiya isip kabahin sa ilang pag-ampo. Gi-rekord ni John Whitmer: “Ang pipila maghanduraw sa ilang mga kaugalingon nga diha kanila ang espada ni Laban [tan-awa sa 1 Nephi 4:8–9], ug mobakyaw niini ingon kahanas sa usa ka [sundalo], … ang pipila mopadailos o mopakurog … [diha] sa salog, uban sa katulin sa usa ka bitin, nga ila[ng] gihulagway nga naglawig diha sa sakayan padulong sa mga Lamanites, nagsangyaw sa ebanghelyo. Ug daghang kawang ug binuang nga mga lihok nga walay kahulugan, ug dili angay nga pagahisgutan. Busa ang yawa milingla sa pipila ka maayo ug matinuoron nga mga tinun-an” (sa The Joseph Smith Papers, Histories, Volume 2: Assigned Histories, 1831–1847, 38). Sa pagpadayag nga gi-rekord diha sa Doktrina ug mga Pakigsaad 46, gitudloan sa Ginoo ang mga Santos kon unsaon sa pag-ila tali sa impluwensya sa Espiritu ug nianang mini nga mga espiritu ug giklaro ang tinuod nga katuyoan ug kinaiya sa mga gasa sa Espiritu.

Doktrina ug mga Pakigsaad 46

Nagtudlo ang Ginoo sa mga Santos kalabut sa mga miting sa Simbahan ug sa mga gasa sa Espiritu

Basaha ang Doktrina ug mga Pakigsaad 46:1–6, nga mangita sa tambag nga gihatag sa Ginoo mahitungod sa unsaon ang mga miting sa Simbahan pagdumala.

Doktrina ug mga Pakigsaad 46:2. “Pagdumala sa tanan nga mga tigum ingon nga sila gimandoan ug gigiyahan sa Balaang Espiritu”

Sa panahon nga ang Simbahan gi-organisar, misugo ang Ginoo sa Iyang mga Santos nga “magkatigum sa kanunay” (D&C 20:55). Pinasubay niini nga sugo, ang mga Santos nagtigum sa kanunay alang sa mga miting sa sakrament ug usahay alang sa mga komperensya. Nagkatigum usab sila alang sa “mga miting sa pagkumpirma,” diin ang mga indibidwal kinsa bag-o pang gibunyagan gikumpirma nga mga miyembro sa Simbahan (tan-awa sa D&P 46:6). Kining una nga mga miyembro nakabasa nga ang mga sumusunod ni Kristo diha sa Basahon ni Mormon mi dumala sa ilang mga miting “subay sa paagi sa mga kalihokan sa Espiritu, … kay samtang ang gahum sa Espiritu Santo moagak kanila aron sa pagsangyaw, o sa pag-awhag, o sa pag-ampo, o sa pagpangamuyo, o sa pag-awit, sa ingon kini gihimo” (Moroni 6:9). Gibalik sa Ginoo ang paghatag og gibug-aton niini nga baruganan sa atong panahon, nagsugo sa pagdumala sa mga miting “ingon nga [ang mga lider sa Simbahan] gimandoan ug gigiyahan sa Balaang Espiritu” (D&P 46:2; tan-awa sa D&P 20:45).

Ang mga lider sa Simbahan gikinahanglan sa “pagdumala sa tanan nga mga tigum ingon nga sila gimandoan ug gigiyahan sa Balaang Espiritu” (D&P 46:2).

Doktrina ug mga Pakigsaad 46:3–6. “Dili … pagsalikway ni bisan kinsa”

Diha sa Doktrina ug mga Pakigsaad 46:3–6, gikorihian sa Ginoo ang buhat sa unang mga Santos sa dili pagpaapil niadtong lain og tinuohan gikan sa mga miting sa sakrament ug mga miting sa pagkumpirma. Ang mga miyembro sa Simbahan kinahanglan nga motabang sa tanan kinsa nagtinguha sa pagtambong og publiko nga mga miting sa Simbahan nga mobati nga giabi-abiSi Presidente Russell M. Nelson sa Korum sa Napulog Duha ka mga Apostoles mipasabut: “Tungod kay atong gidapit ang tanan sa pagduol ngadto kang Kristo, mga higala ug mga silingan kanunay nga abi-abihon apan wala paabuta nga moambit sa sakrament. Hinoon, kini wala ginadili. Mopili sila sa ilang mga kaugalingon. Naglaum kita nga ang bag-ong mga nanambong uban kanato kanunay nga mobati nga gikinahanglan ug komportable. Gagmay nga mga bata, isip walay sala nga mga sumusunod sa Pag-ula sa Ginoo mahimong moambit sa sakrament samtang sila nag-andam sa mga pakigsaad nga ilang pagahimoon unya sa ilang kinabuhi” (“Worshiping at Sacrament Meeting,” Liahona, Ago. 2004, 28).

Basaha ang Doktrina ug mga Pakigsaad 46:7–33, nga mangita sa nagkalain-laing mga gasa sa Espiritu nga gihulagway niini nga mga bersikulo, ug hunahunaa hain sa mga gasa ang nasinati ninyo sa inyong kinabuhi.

Doktrina ug mga Pakigsaad 46:7–8. “Aron kamo dili malimbungan pangitaa sa matinguhaon nga paagi ang labing maayo nga mga gasa”

Ang pipila sa mga miyembro sa Kirtland, Ohio, naghimo og makahibulong nga mga kinaiya kon motambong sila og mga miting sa Simbahan, nag-angkon nga ang ilang mga lihok gidasig sa Espiritu Santo. Ang ubang mga miyembro mituo kanila, samtang ang uban mibati nga kini nga mga kinaiya dili iya sa Dios. Sa adlaw nga wala pa ang pagpadayag nga gi-rekord diha sa Doktrina ug mga Pakigsaad 46 nahatag, nadawat ni Propeta Joseph Smith ang pagpadayag nga gi-rekord diha sa Doktrina ug mga Pakigsaad 45. Niini nga pagpadayag gipahinumduman sa Ginoo ang mga miyembro sa Simbahan nga sila makalikay nga malimbungan kon sila “nakadawat sa Balaan nga Espiritu alang sa ilang paggiya” (D&P 45:57). Ang kaaway nagtinguha sa paglimbong sa mga Santos nga aron iyang “malaglag ang buhat sa Dios” ug “ang mga kalag sa mga tawo” (D&P 10:23, 27). Ang iyang mga taktika naglakip sa paggamit sa “dautan nga mga espiritu, o sa mga doktrina sa mga yawa, o sa mga sugo sa mga tawo” (D&P:46:7). Apan ang Ginoo misaad nga kita dili malimbungan kon buhaton nato ang mga butang “sa tanang pagkabalaan sa kasingkasing, maglakaw nga matrung diha sa [Iyang] atubangan” ug “pangitaon … sa matinguhaon nga paagi ang labing maayo nga mga gasa” (D&P 46:7–8). Ang “labing maayo nga mga gasa” nagpasabut sa espiritwal nga mga gasa nga anaa niadtong kinsa nakadawat sa gasa sa Espiritu Santo.

Doktrina ug mga Pakigsaad 46:9–11. Ang espiritwal nga mga gasa alang sa kaayohan niadtong kinsa nahigugma sa Dios ug naninguha sa paghupot sa Iyang mga sugo

Dili ipugos sa Ginoo ang Iyang espiritwal nga mga gasa diha sa Iyang mga anak, apan nagdapit Siya kanila sa “pagpangita … sa matinguhaon nga paagi” alang kanila (D&P 46:8). Gipasabut sa Ginoo nga kini nga mga gasa alang sa kaayohan niadtong kinsa nahigugma Kaniya ug naninguha sa paghupot sa Iyang mga sugo (tan-awa sa D&P 46:9). Naghatag Siya sa espiritwal nga mga gasa aron sa pagpanalangin sa mga indibidwal ug sa Simbahan isip tibuok (tan-awa sa D&P 46:12), dili sa pagtino sa kamatuoran sa ebanghelyo ngadto niadtong kinsa nangita og mga timailhan.

Ang mga gasa sa Espiritu gihatag ngadto niadtong kinsa nakadawat sa gasa sa Espiritu Santo (tan-awa sa D&P 46:9–11).

Si Elder Dallin H. Oaks sa Korum sa Napulog Duha ka mga Apostoles mitudlo mahitungod kon kinsa ang makadawat sa espiritwal nga mga gasa:

“Ang Espiritu ni Kristo gihatag ngadto sa tanang mga tawo nga sila mahibalo sa maayo gikan sa dautan, ug ang mga pagpakita sa Espiritu Santo gihatag aron sa paggiya sa matinguhaon nga mga nangita ngadto sa paghinulsol ug bunyag. Kini pagpangandam nga mga gasa. Unsa ang atong ginganlan og espiritwal nga mga gasa mosunod.

“Ang espiritwal nga mga gasa moabut ngadto niadtong kinsa nakadawat sa gasa sa Espiritu Santo. Ingon sa gitudlo ni Propeta Joseph Smith, ang mga gasa sa Espiritu ‘maangkon pinaagi niana nga paagi’ [ang Espiritu Santo] ug ‘dili mapahimuslan kon wala ang gasa sa Espiritu Santo.’ … (Teachings of the Prophet Joseph Smith, comp. Joseph Fielding Smith, Salt Lake City: Deseret Book Co., 1938, pp. 243, 245; tan-awa usab sa Elder Marion G. Romney sa Conference Report, Abr. 1956, p. 72.)” (“Spiritual Gifts,” Ensign, Sept. 1986, 68).

Ang tanang matinud-anong mga miyembro sa Simbahan aduna sa labing gamay usa ka espiritwal nga gasa. Samtang “dili tanan aduna sa matag gasa nga ihatag ngadto kanila” (D&P 46:11), ang tanang espiritwal nga mga gasa makaplagan diha sa tiningub taliwala sa mga miyembro sa Simbahan, “nga ang tanan makaangkon og kaayohan pinaagi niana” (D&P 46:12). Si Elder Robert D. Hales sa Korum sa Napulog Duha ka mga Apostoles mipasabut kon unsaon nato sa pagtinguha ang mga gasa sa Espiritu:

“Ang unang gikinahanglan alang sa pagtinguha sa mga gasa mahimong nagkinahanglan nga atong sutaon hain nga mga gasa kita nahatagan. …

“Aron mahibaloan ang mga gasa nga kita nahatagan, kita kinahanglan gayud nga mag-ampo ug magpuasa. Kasagaran ang patriyarkal nga mga panalangin nagsulti kanato sa mga gasa nga atong nadawat ug nagpahayag og saad sa mga gasa nga kita makadawat kon kita nagtinguha niini. “Awhagon ko ang matag usa kaninyo sa pagdiskubre sa inyong mga gasa ug sa pagpangita niadto nga makahatag og direksyon sa inyong panginabuhi ug nga mopauswag sa mga buluhaton sa langit” (“Gifts of the Spirit,” Ensign, Peb. 2002, 16).

Ang paghatag og mga gasa sa Espiritu maoy usa ka paagi nga ang Langitnong Amahan nagtabang kanato nga mahimong mas mahisama Kaniya. Si Presidente George Q. Cannon (1827–1901) sa Unang Kapangulohan mipasabut: “Kon bisan kinsa kanato dili hingpit, kini atong katungdanan sa pag-ampo alang sa gasa nga maghimo kanato nga hingpit. Ako aduna bay pagkadili hingpit? Puno ako niini. Unsa ang akong katungdanan? Ang pag-ampo ngadto sa Dios nga hatagan ako sa mga gasa sa pagkorihir niining pagkadili hingpit. Kon usa ako ka masuk-anon nga tawo, katungdanan nako ang pag-ampo alang sa gugmang putli, nga mainantuson, ug mabination. Masinahon ba ako nga pagkatawo? Akong katungdanan ang pagtinguha sa gugmang putli, diin dili masina. Ingon man ang tanan nga mga gasa sa Ebanghelyo. Gituyo kini alang niini nga katuyoan. Walay tawo nga angay nga moingon, ‘Ah, wala na koy mahimo niini; mao na kini ang akong kinaiya.’ Dili siya kahatagan og kaangayan niini, tungod sa rason nga ang Dios misaad nga mohatag og kalig-on sa pagkorihir niining mga butanga, ug aron sa paghatag sa mga gasa nga mowagtang niini. Kon ang usa ka tawo kulang sa kaalam, katungdanan niya ang pagpangayo sa Dios alang sa kaalam. Sama sa tanang butang. Mao kana ang plano sa Dios kalabut sa Iyang Simbahan. Gusto Niya nga ang Iyang mga Santos mahingpit diha sa kamatuoran. Tungod niini nga katuyoan Siya naghatag niini nga mga gasa, ug naghatag niini niadtong kinsa naninguha sa pagpangita niini, nga sila mahimo nga usa ka hingpit nga katawhan diha sa ibabaw sa yuta, bisan pa sa ilang daghan nga mga kahuyang, tungod kay ang Dios nagsaad nga ihatag ang mga gasa nga gikinahanglan alang sa ilang kahingpitan” (“Discourse by President George Q. Cannon,” Millennial Star, Abr. 23, 1894, 260–61).

Doktrina ug mga Pakigsaad 46:13–27. Espiritwal nga mga gasa

AngDoktrina ug mga Pakigsaad 46:13–27 naglista og pipila ka mahinungdanong espiritwal nga mga gasa nga susama niadtong gilista diha sa 1 Mga Taga-Corinto 12:8–11 ug Moroni 10:8–17. Gikinahanglan sa unang mga Santos ang hustong pagsabut sa espiritwal nga mga gasa aron sa pagkorihir sa dili tinuod nga espiritwal nga mga panultihon nga ang pipila sa bag-ong mga kinabig sa Kirtland, Ohio, kanunay nga nagpakita pinaagi sa sobra nga relihiyosong mga kinaiya. Gipasabut sa Ginoo nga pinaagi sa paghinumdom niini nga mga gasa ug sa pagpangita kanila, ang mga miyembro sa Simbahan dili malimbungan (tan-awa sa D&P 46:7–8). Gimandoan niya ang mga Santos nga “ipabilin kanunay sa inyong mga hunahuna unsa kadto nga mga gasa” (D&P 46:10). Mga tuig nga milabay, gibalik og panghimatuod ni Propeta Joseph Smith ang importansya sa espiritwal nga mga gasa diha sa Simbahan sa dihang iyang gisulat ang ikapito nga artikulo sa hugot nga pagtuo, nga naghingalan og daghan sa mga gasa.

Mapakita ang mga gasa sa Espiritu diha sa atong mga kinabuhi sa dili maihap nga mga paagi. Samtang ang Doktrina ug mga Pakigsaad 46:13–27 naglista hapit 14 ka espiritwal nga mga gasa, ingon nga si Elder Bruce R. McConkie (1915–1985) sa Korum sa Napulog Duha ka mga Apostoles mipahayag, “Kini sa walay duha-duha ang tanan sa mga gasa. Sa hingpit nga pagsabut, sila walay katapusan sa gidaghanon ug walay katapusan sa ilang mga pagpakita” (Mormon Doctrine, 2nd ed. [1966], 315).

Namulong kabahin sa dugang nga espiritwal nga mga gasa si Elder Marvin J. Ashton (1915–1994) sa Korum sa Napulog Duha ka mga Apostoles mitudlo:

“Pahisguta ako og pipila ka mga gasa nga dili kanunay masabut o takos tagdon apan importante kaayo. Uban niini tingali ang inyong mga gasa—mga gasa nga dili masabut apan bisan pa niana kini tinuod ug bililhon.

“Atong ribyuhon ang pipila niining dili kaayo klaro nga mga gasa: ang gasa sa pagpangutana; ang gasa sa pagpaminaw; ang gasa sa pagkadungog ug paggamit sa hinay, hinagawhaw nga tingog; ang gasa nga makahimo sa paghilak; ang gasa sa paglikay og panagbingkil; ang gasa nga magkauyon; ang gasa sa paglikay sa kawang nga pagbalik-balik; ang gasa sa pagpangita hain ang matarung; ang gasa nga dili dayon mohukom; ang gasa sa pagpangayo sa Dios og paggiya; ang gasa sa pagkadisipulo; ang gasa sa pag-amuma sa uban; ang gasa nga makahimo sa pagpamalandong; ang gasa sa paghalad og pag-ampo; ang gasa sa paghatag og makapatandog nga pagpamatuod; ug ang gasa sa pagdawat sa Espiritu Santo” (There Are Many Gifts,” Ensign, Nob. 1987, 20).

Doktrina ug mga Pakigsaad 46:13–14. “Ngadto sa uban kini gihatag pinaagi sa Espiritu Santo aron masayud. … Ngadto sa uban kini gihatag sa pagtuo sa ilang mga pulong”

Gitudloan sa Ginoo ang mga Santos sa Kirtland, Ohio, nga ang uban napanalanginan nga masayud, pinaagi sa gahum sa Espiritu Santo, nga si Jesus mao ang Kristo (tan-awa sa D&P 46:13). Ang uban napanalanginan nga motuo sa ilang mga pulong (tan-awa sa D&P 46:14) hangtud nga sila makahibalo alang sa ilang mga kaugalingon. Ang pagtuo, dili pagduda, ang kanunay nga unang lakang ngadto sa pagpamatuod ug lig-on nga pagtuo. Ang pagtuo diha sa pagpamatuod sa uban usa ka gasa sa Espiritu.

Doktrina ug mga Pakigsaad 46:23, 27. Ang gasa sa pag-ila

Pinaagi sa gasa sa Espiritu Santo, kita makasarang alang sa paggiya ug espiritwal nga pagsabut nga makaila o makakita og klaro sa mga butang. Si Presidente George Q. Cannon mipasabut kon nganong importante kini alang sa mga miyembro sa Simbahan sa pagpangita sa gasa sa pag-ila: “Ang gasa sa pag-ila sa mga espiritu dili lamang naghatag sa mga lalaki ug mga babaye kinsa aduna niini sa gahum sa pag-ila sa espiritu nga diin ang uban nahimong hinuptan o na-impluwensya, apan naghatag kanila sa gahum sa pag-ila sa espiritu nga nag-impluwensya kanila mismo. Makahimo sila sa pagmatikod og usa ka mini nga espiritu ug usab nga mahibalo kon ang Espiritu sa Dios nagpuyo sulod kanila. Sa pribado nga kinabuhi kini nga gasa importante kaayo ngadto sa mga Santos sa Ulahing mga Adlaw. Ang pagbaton ug paggamit niini nga gasa sila dili motugot sa bisan unsang dautan nga impluwensya nga mosulod sa ilang mga kasingkasing o sa pag-aghat kanila sa ilang mga hunahuna, ilang mga pulong o ilang mga lihok. Sumpoon nila kini; ug kon ugaling ang ingon nga espiritu nakahupot kanila, diha-diha nga ilang masaksihan ang mga epekto niini ila kining isalikway o, sa laing mga pulong, modumili nga magiyahan o maaghat niini” (Gospel Truth: Discourses and Writings of George Q. Cannon, comp. Jerreld L. Newquist [1987], 157).

Ngadto sa mga lider sa Simbahan naghatag ang Ginoo sa gasa “sa pag-ila sa tanan niadto nga mga gasa basin pa unya og adunay uban diha kaninyo nga magpatuo apan dili gikan sa Dios” (D&P 46:27). Kining linain nga gasa naghimo niini nga posible alang niadtong kinsa nagdumala diha sa Simbahan sa pag-ila tali sa mini nga mga espiritu ug tinuod nga mga pagpakita sa Espiritu Santo.

Doktrina ug mga Pakigsaad 46:24. Ang gasa sa mga pinulongan

Adunay mga nagkalain-laing mga pagpakita sa gasa sa mga pinulongan:

• Dihay mga okasyon sa tibuok kasaysayan sa Simbahan sa dihang ang mga tawo nadasig pinaagi sa Espirirtu sa pagsulti sa pinulongan sa Dios—ang Adamic nga pinulongan nga gihulagway sa modernong pagpadayag isip “putli ug walay mansa” (tan-awa sa Moises 6:5–6, 46). Atol sa mga panghitabo nga nagliyok sa pagpahinungod sa Templo sa Kirtland, daghan sa mga Santos ang nagsulti ug naghubad sa lain-laing mga pinulongan.

• Sa adlaw sa Pentecostes, sa dihang ang gasa gibu-bu sa dili sagad nga gamhanan nga paagi, mga lalaki ug mga babaye gihatagan og gahum pinaagi sa Espiritu sa pagsulti ug pagsabut sa langyaw apan ilado nga mga pinulongan (tan-awa sa Mga Buhat 2:1–6). Ang mga sulugoon sa Ginoo sa tibuok kalibutan nahatagan og linain nga mga pribilehiyo sa regular nga panahon sa pagkat-on og mga pinulongan, nagsulti niini sa larino nga paagi, ug nagpahayag sa mensahe sa kaluwasan ngadto sa matag nasud, kaliwatan, pinulongan, ug katawhan.

• Ang mga tawo nagsulti sa nagkalain-laing mga pinulongan kon sila nagsulti pinaagi sa gahum sa Espiritu Santo, kon sila “nakapamulong sa pinulongan sa mga anghel,” o, sa lain nga pagkasulti, “namulong sa mga pulong ni Kristo” (2 Nephi 31:13; 32:2–3).

Gi-summarize ni Elder Robert D. Hales ang pipila ka mga pasidaan kabahin sa gasa sa mga pinulongan:

“Gisultihan kita sa mga propeta niini nga dispensasyon nga ang pagpadayag alang sa direksyon sa Simbahan dili ihatag pinaagi sa gasa sa mga pinulongan. Ang rason niini mao nga sayon kaayo alang ni Lucifer sayupon pagkopya ang gasa sa mga pinulongan ug libugon ang mga miyembro sa Simbahan.

“Si Satanas adunay gahum sa paglimbong nato kalabut sa pipila ka mga gasa sa Espiritu. Usa nga siya mao ang labing malimbungon mao ang gasa sa mga pinulongan. Gipasabut ni Joseph Smith ug Brigham Young … ang panginahanglan sa pagbantay kon maghunahuna sa gasa sa mga pinulongan.

“‘Kamo mahimong mosulti og mga pinulongan alang sa kaugalingon nimo nga gusto, apan ako kining ihatag isip usa ka lagda, nga kon adauna man gani itudlo pinaagi sa gasa sa pinulongan, kini dili pagadawaton nga doktrina’ (Mga Pagtulun-an ni Propeta Joseph Smith, sel. Joseph Fielding Smith [1976], 465).

“‘Ayaw pagsulti pinaagi sa gasa sa mga pinulongan nga dili makasabut niini, o walay paghubad. Ang demonyo makasulti og mga pinulongan’ (Mga Pagtulun-an, 465).

“‘Ang gasa sa mga pinulongan wala … hatagi og gahum sa pagdiktar … sa Simbahan. Ang tanang mga gasa ug mga tuga nga gihatag sa Ginoo ngadto sa mga miyembro sa iyang Simbahan wala ihatag aron sa pagkontrolar sa Simbahan; apan kini ubos sa pagkontrolar ug paggiya sa Priesthood, ug pagahukman pinaagi niini’ (Discourses of Brigham Young, comp. John A. Widtsoe [1941], 343)” (“Gifts of the Spirit,” 14–15).

Ang atong Langitnong Amahan buot nga mopanalangin kaninyo og espiritwal nga mga gasa. Pahayag og pagpasalamat diha sa inyong mga pag-ampo alang sa mga gasa nga kamo nahatagan, ug pag-ampo nga mapalambo kini nga mga gasa nga mopanalangin sa inyong kinabuhi ug sa inyong pamilya ug motabang kaninyo nga mas maayong moserbisyo sa uban.

Doktrina ug mga Pakigsaad 47: Dugang nga Makasaysayanong Background

Gitawag si John Whitmer sa pagserbisyo isip tigsaysay ug tigrekord (tan-awa sa D&P 47).

Si John Whitmer, usa sa Walo ka mga Saksi sa Basahon ni Mormon, nakatabang ni Propeta Joseph Smith isip usa ka tigsulat sa paghubad sa usa ka bahin sa Basahon ni Mormon ug sa kadugayan sa panahon sa dinasig nga paghubad sa Biblia. Nadaghan ang mga katungdanan ni John human mibiya si Oliver Cowdery niadtong Oktubre 1830 alang sa iyang misyon ngadto sa mga Lamanite. Mitabang si John sa paghimo og mga mugbong sulat sa mga komperensya sa Simbahan ug mipadayon sa pagtigum sa mga pagpadayag nga nadawat ni Joseph Smith ug gikopya kini ngadto sa usa ka manuskrito nga rekord sa basahon nga nailhan isip ang Basahon sa mga Sugo ug mga Pagpadayag. Niadtong Marso 1831, gitudlo ni Propeta Joseph Smith si John Whitmer sa pagsulat sa kasaysayan sa Simbahan. Gisaysay sa kadugayan ni John, “Mas dili hinoon nako buhaton kini apan buhaton ang kabubut-on sa Ginoo, ug kon siya nagtinguha niini, nagtinguha ako nga iya kining ipahibalo pinaagi ni Joseph ang Manalagna” (sa The Joseph Smith Papers, Histories, Volume 2: Assigned Histories, 1831–1847, 36). Ang nagsunod nga pagpadayag ngadto sa Propeta nanghimatuod sa calling ni John Whitmer sa “pagsulat ug paghipos og kanunay nga kasaysayan” sa Simbahan (D&P 47:1). Gidawat ni John ang kabubut-on sa Ginoo ug sa kadugayan miandam og “usa ka nobenta y sais ka pahina nga asoy nga kasaysayan nga una sa tanan naghulagway sa mga panghitabo gikan sa tinglarag sa 1830 ngadto sa mga taliwala sa 1830” (sa The Joseph Smith Papers, Documents, Volume 1: Hulyo 1828–Hunyo 1831, 285).

Doktrina ug mga Pakigsaad 47

Ang Ginoo nagtudlo ni John Whitmer sa pagtipig og kasaysayan sa Simbahan ug sa pagsulat alang sa Propeta

Basaha ang Doktrina ug mga Pakigsaad 47, nga mangita sa tabang nga gisaad sa Ginoo ngadto ni John Whitmer sa iyang buluhaton sa pagtipig og kasaysayan sa Simbahan.

Doktrina ug mga Pakigsaad 47:1. “Pagsulat ug pagtipig og kanunay nga kasaysayan”

Nagsugo ang Ginoo sa Simbahan sa pagtipig og walay sayop nga mga rekord (tan-awa sa D&P 21:1; 47:1–3; 72:5–6; 123:1–6; 127:6–9; 128:4–9). Karon, ang pagtipig ug pagpreserbar og mga rekord usa ka dako nga prayoridad sa Simbahan. Niadtong 2009 ang Simbahan mipahinungod og usa ka bag-ong Church History Library alang sa katuyoan sa pagpreserbar og mga manuskrito, mga basahon, mga rekord sa Simbahan, mga litrato, gipamulong nga mga kasaysayan, patriyarkal nga mga panalangin, arkitektura nga mga drowing, mga pamphlet, mga pamantalaan, mga peryodiko, mga mapa, microfilm, ug audiovisual nga mga materyal. Si Elder Marlin K. Jensen sa Seventy mipasabut kon ngano ang mga paninguha sa pagpreserbar sa kasaysayan sa Simbahan nagpadayon:

“Ang unang katuyoan sa kasaysayan sa Simbahan mao ang pagtabang sa mga miyembro sa Simbahan sa paglig-on sa hugot nga pagtuo diha ni Jesukristo ug sa pagsunod sa ilang sagrado nga mga pakigsaad. Ang pagtuman niini nga katuyoan, gigiyahan kita og tulo ka mahinungdanon nga mga panghunahuna:

“Una, kita maninguha sa pagpamatuod ug sa pagpanalipod sa sukaranan nga mga kamatuoran sa Pagpahiuli.

“Ikaduha, nagtinguha kita sa pagtabang sa mga miyembro sa Simbahan sa paghinumdom sa mahinungdanon nga mga butang nga nabuhat sa Dios alang sa Iyang mga anak.

“Ikatulo, kita adunay eskriptuhanong sugo sa pagtabang og presebar sa gipadayag nga paagi sa gingharian sa Dios. Kini naglakip sa mga pagpadayag, mga dokumento, mga pamaagi, mga proseso, ug mga sumbanan nga naghatg og paagi ug pagpadayon alang sa paggamit sa mga yawe sa priesthood, ang tukma nga pagpalakat sa mga korum sa priesthood, ang pagpahigayon sa mga ordinansa, ug uban pa—kadtong mga butang nga mga kinahanglanon sa kaluwasan” (“There Shall Be a Record Kept among You,” Liahona, Dis. 2007, 28–29).

Doktrina ug mga Pakigsaad 48: Dugang nga Makasaysayanong Background

Natawag si Edward Partridge pinaagi sa pagpadayag nga mahimong unang bishop sa Simbahan ug nahatagan sa responsibilidad sa “pagpangalagad sa kabus ug timawa” (D&P 42:34; tan-awa usab sa D&P 41:9). Naghunahuna sa pag-abut sa mga Santos nga naglangyaw gikan sa New York ngadto sa Ohio, si Bishop Partridge “matinguhaong makahibalo og usa ka butang” mahitungod kon unsaon sa pag-andam sa pagtubag sa ilang mga panginahanglan (John Whitmer, sa The Joseph Smith Papers, Histories, Volume 2: Assigned Histories, 1831–1847, 35). Mga pangutana miabut kalabut kon asa pagatukuron ang siyudad sa Zion. Ang bag-ong mga miyembro sa Simbahan naghunahuna kon kinahanglan ba silang magplano sa pagpabilin og puyo sa Ohio o sa pagpangandam sa pagbalhin na usab ngadto sa bisan asa ang Zion mahimutang. Tungod niini nga mga rason nangayo si Propeta Joseph Smith og direksyon sa Ginoo ug tungod niana nadawat ang pagpadayag nga gi-rekord diha sa Doktrina ug mga Pakigsaad 48.

Basaha ang Doktrina ug mga Pakigsaad 48, nga mangita kon giunsa sa Ginoo pag-andam sa Iyang katawhan sa pagtukod sa Zion.

Doktrina ug mga Pakigsaad 48

Nagsulti ang Ginoo sa mga Santos kon unsaon sa pagtabang ang mga miyembro sa Simbahan kinsa mobalhin gikan sa New York ngadto sa Ohio

Doktrina ug mga Pakigsaad 48:1–3. Panghatag ngadto sa uban

Mitambag ang Ginoo sa mga Santos sa Kirtland sa paggamit sa ilang mga kinitaan sa pagtabang sa bag-ong mga kinabig kinsa umaabut sa Ohio. Ang panudlo mihatag sa mga miyembro sa Simbahan og oportunidad sa pagbansay sa mga baruganan sa pagpahinungod nga gi-outline sa miaging mga pagpadayag (tan-awa sa D&P 38:24–25, 35; 41:5; 42:30). Si Presidente Thomas S. Monson mipakigbahin og usa ka kasinatian nga naghulagway kon unsaon nato sa pagtabang niadtong kinsa nanginahanglan karon:

“Usa ka gabii sa tingtugnaw niadtong 1951, dihay mituktok sa akong pultahan. Usa ka Aleman nga brother gikan sa Ogden, Utah, mipaila sa iyang kaugalingon ug miingon, ‘Ikaw ba si Bishop Monson?’ Gitubag ko siya og oo. Misugod siya sa paghilak ug miingon, ‘Ang akong igsoong lalaki, ang iyang asawa, ug pamilya moanhi dinhi gikan sa Germany. Mopuyo sila diha sa imong ward. Mahimo bang mouban ka kanamo aron tan-awon ang apartment nga among gi-abangan alang kanila?’

“Nagpadulong ngadto sa apartment, misulti siya kanako nga wala siya makakita sa iyang igsoong lalaki sa daghang mga katuigan. Pinaagi sa kalaglagan sa Ikaduhang Gubat sa Kalibutan, ang iyang igsoong lalaki nagmatinud-anon sa Simbahan, makausa nagserbisyo isip usa ka presidente sa branch sa wala pa siya dad-a ngadto sa panggubatan sa Russia.

“Akong gi-obserbahan ang apartment. Kini tugnaw ug mingaw. Ang pintal nangatangtang, ang wallpaper hugaw,ang mga kabinet walay sulod. Usa ka kwarenta boheyas nga bombelya, nagpakita og usa ka linoleum nga salog nagtabon sa usa ka dakong lungag diha sa taliwala. Nagmasulub-on ako. Naghunahuna ako, ‘Unsa ka makalolooy nga pag-abi-abi alang sa usa ka pamilya nga daghan og giantus.’ …

“… Ang sunod nga buntag Dominggo. Sa among miting sa ward welfare committe, usa sa akong mga counselor miingon, ‘Bishop, ingon og magul-anon ka. Naa bay problema?’

“Akong giistorya niadtong diha ang akong kasinatian sa miaging gabii, nagbutyag sa mga detalye sa dili makadani nga apartment. Dihay makadiyut nga kahilum. Dayon si Brother Eardlley, ang lider sa grupo sa mga high priest, miingon, ‘Bishop, miingon ka ba nga ang apartment kulang og kahayag ug nga ang mga kasangkapan sa kusina nagkinahanglan nga ilisan?’ Gitubag ko siya og oo. Mipadayon siya, ‘Kontraktor ko sa elektrisidad. Tugutan ba nimo ang mga high priest niini nga ward sa pag-usab sa linya niana nga apartment? Gusto ko usab nga dapiton ang akong mga supplier sa pag-amut og bag-ong stove ug bag-ong refrigerator. Ako aduna bay pagtugot kanimo?’ …

“Unya si Brother Balmforth, ang presidente sa mga kapitoan, mitubag, ‘Bishop, abi nimo, nagnegosyo ko og karpet. Gusto kong dapiton ang akong mga supplier sa pag-amut og pipila ka karpet, ug ang mga kapitoan dali kaayo nga makapahimutang niini ug kuhaon kanang dunot nga linoleum.’

“Unya si Brother Bowden, ang presidente sa elders korum, misulti. Kontraktor siya sa pamintal. Miingon siya, ‘Ako ang mohatag sa pintura. Mahimo ba ang mga elder mopintal ug mopapilit og wallpaper niana nga apartment?’

“Si Sister Miller, ang presidente sa Relief Society, mao ang sunod nga misulti. ‘Kami nga anaa sa Relief Society dili makaantus og tan-aw sa walay sulod nga mga kabinet. Mahimo ba nga among sudlan kini?’

“Ang tulo ka semana nga misunod kanunay gyud nga mahinumduman. Ingon og ang tibuok ward miapil sa proyekto. Milabay ang mga adlaw, ug sa gitakda nga panahon, ang pamilya miabut sa Germany. Pag-usab diha sa akong pultahan mibarug ang igsoong lalaki nga gikan sa Ogden. Uban sa tingog nga puno sa pagbati, gipaila niya kanako ang iyang igsoong lalaki, ang asawa sa iyang igsoon lalaki, ug ang ilang pamilya. Dayon nangutana siya, ‘Mahimo bang adtoon ug tan-awon ang apartment?’ Samtang kami nagsaka sa hagdanan padulong sa apartment, gibalik niya, Kini dili kaayo maayo, apan mas maayo pa kay sa ila didto sa Germany.’ Siya walay kalibutan unsay kausaban ang nahitabo ug nga daghan kinsa miapil ang anaa sa sulod naghulat sa among pag-abut.

“Miabli ang pultahan ug nagpakita og pagkabag-o sa kinabuhi. Giabi-abi kami og humot sa bag-ong pinintalan nga kahoy ug bag-ong gibutangan og wallpaper nga mga bongbong. Nawala ang kwarenta boheyas nga bombelya, uban sa dunot nga linoleum nga nahayagan niini. Nagtunob kami og karpet nga baga ug nindot. Paglakaw ngadto sa kusina nakita namo ang bag-ong stove ug bag-ong refrigerator. Ang mga pultahan sa kabinet abli pa; apan, kini karon nagpakita sa matag estante nga puno sa pagkaon. Ingon sa nabatasan, ang Relief society mihimo sa ilang trabaho.

“… Ang amahan, nakaamgo nga ang tanan niini iya, mikuha sa akong kamot sa pagpahayag sa iyang pasalamat. Ang iyang pagbati hilabihan kaayo. …

“Panahon na sa pagpauli. Samtang kami nanaog sa hagdanan ug ngadto sa gawas sa hangin sa kagabhion, nagakahulog ang snow. Walay usa ka pulong nga nalitok. Sa katapusan, usa ka batan-ong babaye nangutana, ‘Bishop, gibati nako ang ka mas maayo kay sa akong gibati sukad kaniadto. Makasulti ka ba kanako kon ngano?’

Ako mitubag uban sa mga pulong sa Agalon: ‘Maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako.’ (Mat. 25:40.)” (“A Provident Plan—A Precious Promise,” Ensign, Mayo 1986, 64–65).

Doktrina ug mga Pakigsaad 48:4–6. “Ang dapit dili pa ikapadayag”

Giaghat sa Ginoo ang mga Santos sa pagtigum og kwarta alang sa panahon nga sila nagkinahanglan nga mopalit og yuta sa pagtukod sa dakbayan sa Zion. Niana nga panahon ang Ginoo wala pa mopadayag kon asa ipahimutang ang Zion gawas lang sa pagpahayag nga kini “diha sa mga utlanan sa mga Lamanite” (D&P 28:9). Sulod sa pipila ka mga bulan sa pagpadayag nga gi-rekord diha sa Doktrina ug mga Pakigsaad 48, gipadayag sa Ginoo ngadto sa mga lider sa Simbahan nga ang Zion pagatukuron didto sa Independence, Missouri (tan-awa sa D&P 52:2–3; 57:1–5).

Doktrina ug mga Pakigsaad 49: Dugang nga Makasaysayanong Background

Kapin o kulang 24 ka kilometro sa habagatan-kasadpan sa Kirtland, Ohio, may usa ka kongregasyon nga gipanag-iya sa United Society of Believers in Christ’s Second Coming. Sila kasagarang nailhan isip Shakers tungod sa ilang paagi sa pag-ampo, nga naglakip sa pagyugyog sa ilang mga lawas samtang sila nagkanta, nagsayaw, ug nagpakpak sa ilang mga kamot uban sa musika. Ang mga Shakers nagtuo nga si Kristo mibalik na nganhi sa yuta sa porma sa usa ka babaye, si Ann Lee, kinsa mao ang lider sa kalihokan sa mga Shakers. Ang mga Shakers nagtuo sa hingpit nga dili pagminyo (paglikay gikan sa kaminyoon ug sekswal nga mga relasyon). Wala sila maghunahuna sa bunyag nga mahinungdanon, ug ang pipila nagdili sa pagkaon og karne. Sayo sa 1831, usa ka miyembro sa Shakers, si Leman Copley, nakabig sa Simbahan ug milaum nga ang mga elder sa Simbahan moadto aron sa pagsangyaw sa ebanghelyo taliwala sa iyang kanhiay nga mga kauban. Apan, sama sa bag-ong mga kinabig, mipadayon siya sa paghupot sa pipila sa iyang unang sayop nga mga pagtuo. Ang pagpadayag nga gi-rekord diha sa Doktrina ug mga Pakigsaad 49, nga nadawat ni Propeta Joseph Smith niadtong Mayo 7, 1831, misupak sa daghang mga pagtuo sa mga Shakers. Agi og dugang, sila si Sidney Rigdon, Parley P. Pratt, ug Leman Copley gitawag sa pagsangyaw ngadto sa komunidad sa mga Shakers. Wala madugay human mahatag ang pagpadayag, kining tulo ka mga lalaki mibisita sa mga Shaker ug gitugutan sa pagbasa niini ngadto sa nagpundok nga kongregasyon, apan midumili ang grupo sa mensahe.

Nakigsaad si Leman Copley ubos sa baruganan sa pagpahinungod nga tugutan ang daghan sa naglangyaw nga mga Santos gikan sa New York sa pagpuyo sa iyang umahan, nga nahimutang sa Thompson, Ohio. Apan, human sa mubo nga panahon, gibugto niya ang iyang pakigsaad ug midemanda nga mobiya sila sa iyang yuta. Ang pagtuo ni Leman sa Pagpahiuli nawagtang, ug wala siya sa hingpit makig-uban sa mga Santos human niana nga panahon.

Sa Marso 1831, ang mga misyonaryo nga gikan sa Simbahan mibisita sa komunidad sa Shaker didto sa North Union (Shaker Heights), Ohio (tan-awa sa D&P 49:1).

Doktrina ug mga Pakigsaad 49

Ang Ginoo mitawag nila ni Sidney Rigdon, Parley P. Pratt, ug Leman Copley sa pagsangyaw ngadto sa mga Shaker sa amihanang Ohio.

Basaha ang Doktrina ug mga Pakigsaad 49, nga mangita sa unsay gitudlo niining pagpadayag mahitungod sa tinuod nga pagkatawo ug misyon ni Jesukristo.

Doktrina ug mga Pakigsaad 49:1–4. “Sila nagtinguha nga masayud og tipik sa kamatuoran, apan dili sa tanan”

Ang Ginoo mipasabut nga ang mga Shakers “[mi]tinguha nga masayud og tipik sa kamatuoran, apan dili sa tanan” (D&P 49:2). Bisan og ang mga Shaker naninguha sa pagsunod sa Dios, sa kadugayan sila misalikway sa mensahe sa Pagpahiuli ingon nga gitudlo sa mga misyonaryo kinsa gitawag sa pagpahayag sa pulong sa Ginoo ngadto kanila. Kini importante nga ang mga anak sa Dios modawat sa tanang doktrinal nga mga kamatuoran nga mga kabahin sa mahangturon nga ebanghelyoSi Elder Glenn L. Pace (1940–2017) sa Seventy mihulagway kon giunsa sa pipila ka mga miyembro sa Simbahan karon sa pagpili nga “mahibaloan ang tipik sa kamatuoran” lamang:

“Adunay uban sa atong mga miyembro kinsa nagbuhat og pinili nga pagkamasulundon. Ang propeta dili usa ka tawo nga mopakita og kamatuoran diin gawasnon kitang mokuha ug mopili. … Ang propeta dili maghimo og pagsusi aron matino ang labing popular nga opinyon sa publiko. Iyang gipadayag ang kabubut-on sa Ginoo ngari kanato. …

“Niadtong 1831, ang ubang mga kinabig gustong modala og pipila sa ilang kanhi nga mga gituohan ngadto sa Simbahan uban nila. Ang atong problema karon mao ang mga miyembro kinsa ingon og daling madani sa mga uso sa katilingban (ug sa mabiay-biayon nga mga tawo nga nagbantay kanila) ug gusto nga ang Simbahan mousab sa baruganan niini aron mouyon kanila. Ang mga doktrina nga makaplagan sa gawas sa simbahan ingon og makadani kanila.

“Ang tambag sa Ginoo niadtong 1831 mahinungdanon gihapon karon: ‘Tan-awa, Ako moingon nganha kaninyo, nga sila nagtinguha nga masayud og tipik sa kamatuoran, apan dili sa tanan, kay sila dili matarung diha sa akong atubangan ug kinahanglan gayud nga maghinulsol.’ (D&P 49:2.)

“Kinahanglan natong dawaton ang tibuok nga kamatuoran—gani ang tanan niini—‘isul-ob ninyo ang tibuok hinagiban sa Dios’ (Mga Taga-Efe. 6:11), ug trabaho sa pagtukod sa gingharian” (“Follow the Prophet,” Ensign, Mayo 1989, 26).

Ingon nga gitudlo ni Elder Dallin H. Oaks ang ebanghelyo ni Jesukristo nagkinahanglan kanato sa pagtalikod sa mga kalihokan nga supak sa mga pagtulun-an sa ebanghelyo sa dihang kita nahimong miyembro sa Simbahan:

“Isip paagi sa pagtabang kanato sa pagsunod sa mga sugo sa Dios, ang mga miyembro sa Ang Simbahan ni Jesukristo sa mga Santos sa Ulahing mga Adlaw aduna niini nga atong gitawag og kultura sa ebanghelyo. Kini usa ka talagsaon nga paagi sa kinabuhi, usa ka hugpong sa mga mithi ug mga gipaabut ug mga naandang binuhatan nga komon sa tanang mga miyembro. Kini nga kultura sa ebanghelyo nagagikan sa plano sa kaluwasan, sa mga kasugoan sa Dios, ug sa mga pagtulun-an sa buhing mga propeta. Kini naggiya kanato sa pamaagi sa atong pag-atiman sa atong mga pamilya ug sa pagpakabuhi sa atong indibidwal nga mga kinabuhi. …

“Aron sa pagtabang sa mga miyembro sa tibuok kalibutan, ang Simbahan nagtudlo kanato nga hunongon ang bisan unsang tradisyon o naandang binuhatan sa personal o pamilya nga sukwahi sa mga pagtulun-an sa Simbahan ni Jesukristo ug niining kultura sa ebanghelyo” (“Ang Kultura sa Ebanghelyo,” Liahona, Mar. 2012, 42).

Doktrina ug mga Pakigsaad 49:7. Walay tawo nga nasayud sa takna o adlaw sa Ikaduhang Pag-anhi ni Jesukristo

Ang mga Shaker mituo nga ang Ikaduhang Pag-anhi ni Jesukristo nahitabo na ug nga siya mibalik sa porma sa usa ka babaye nga ginganlan og Ann Lee. Kini nga pagtuo usa ka ehemplo sa bakak nga mga pagtulun-an nga gipanagna sa Manluluwas nga mahimong modagsang sa katapusang mga adlaw:

“Tan-awa … kon adunay bisan kina nga tawo ang moingon nganha kaninyo, Tan-awa, ania si Kristo, o atua didto, ayaw pagtuo kaniya;

“Kay niana nga mga adlaw usab adunay motungha nga mga mini nga Kristo, ug mini nga mga propeta, ug magpakita og dagko nga mga timailhan ug mga kahibulongan, hangtud nga, kon mahimo, sila molingla sa labing pinili, kinsa mga pinili sumala sa pakigsaad. …

“Busa, kon sila moingon nganha kaninyo: Tan-awa, siya atua sa kamingawan; ayaw pag-adto didto: Tan-awa, siya anaa sa tinago nga mga lawak; ayaw pagtuo niini;

“Kay ingon nga ang kahayag sa kabuntagon nagagikan sa silangan, ug mosidlak bisan ngadto sa kasadpan, ug motabon sa tibuok yuta, mao usab ang pag-anhi sa Anak sa Tawo.” (Joseph Smith—Mateo 1:21–22, 25–26).

Si Propeta Joseph Smith (1805–1844) nagpasidaan mahitungod niadtong kinsa nangangkon nga nasayud sa panahon sa Ikaduhang Pag-anhi sa Manluluwas: “Si Jesukristo wala gayud motug-an ni bisan kinsa nga tawo sa tukma nga panahon nga Siya mobalik [tan-awa sa Mateo 24:36; D&P 49:7]. Sigi ug basaha ang mga Kasulatan, ug ikaw dili makakita og bisan unsa nga nagklaro sa takdo nga takna nga Siya mobalik, ug ang tanan nga nagsulti mga bakakon nga magtutudlo” (Mga Pagtulun-an sa mga Presidente sa Simbahan: Joseph Smith, 304).

Doktrina ug mga Pakigsaad 49:15–17. Ang kaminyoon gi-orden sa Dios

Ang mga Shaker naghimo og komunidad nga ang mga lalaki ug mga babaye naglain og puyo ug nagdumili sa pagminyo ug sa pagbaton og mga anak. Ang Apostol Pablo mihulagway sa bakak nga mga pagtulun-an nga mogiya ngadto sa apostasiya sa katapusang mga adlaw, lakip sa “managdili sa pagpangasawa” (tan-awa sa 1 Timoteo 4:1, 3).

Sa usa ka opisyal nga pamahayag nga gi-isyu niadtong 1995, ang Unang Kapangulohan ug ang Konseho sa Napulog Duha ka mga Apostoles namahayag nga “ang kaminyoon tali sa usa ka lalaki ug usa ka babaye gi-orden sa Dios ug ang pamilya mahinungdanon ngadto sa plano sa Tiglalang alang sa walay katapusan nga destinasyon sa Iyang mga anak” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129).

Gipadayag sa Ginoo nga ang “kaminyoon gi-orden sa Dios ngadto sa tawo” (D&P 49:15).

Si Elder L. Tom Perry (1922–2015) sa Korum sa Napulog Duha ka mga Apostoles mipasabut kon ngano nga ang kaminyoon ug ang pamilya importante kaayo:

“Ang kinatibuk-ang pagtulun-an sa atong gipahiuli nga ebanghelyo nasentro sa mga pamilya ug sa bag-o ug walay katapusang pakigsaad sa kaminyoon. …

“Nagtuo kita nga ang relasyon sa kaminyoon ug pamilya magpadayon lapas pa sa lubnganan—nga ang kaminyoon nga gipahigayon niadtong adunay tukma nga awtoridad diha sa Iyang mga templo magpadayon nga balido sa kalibutan nga moabut. Ang atong mga seremonya sa kaminyoon nagwagtang sa mga pulong nga “hangtud bulagon kita sa kamatayon” ug gipulihan sa “alang sa karon ug sa tanang kahangturan.’

“Nagtuo usab kita nga ang lig-on ug tradisyunal nga mga pamilya dili lamang ang sukaranang mga yunit sa lig-ong katilingban, lig-ong ekonomiya, ug lig-ong kultura sa mga mithi—apan usab maoy sukaranang mga yunit sa kahangturan ug sa gingharian ug gobyerno sa Dios. …

“Kini tungod sa atong pagtuo nga ang mga kaminyoon ug mga pamilya mahagturon, isip simbahan, gusto natong mahimong lider ug partisipante sa mga kalihokan sa tibuok kalibutan aron sa paglig-on niini” (“Nganong ang Kaminyoon ug Pamilya Importante—Bisan Asa sa Kalibutan,” Ensign o Liahona, May 2015, 41).

Unsay inyong nakat-unan mahitungod sa Manluluwas ug sa Iyang doktrina gikan sa inyong pagtuon sa Doktrina ug mga Pakigsaad 49? Hain niini nga mga kamatuoran kamo labi nga mapasalamaton? Unsay inyong mabuhat aron sa pagtabang niadtong naglibut kaninyo nga mahibalo ug makasabut sa tinuod nga kinaiyahan ni Jesukristo ug moduol ngadto Kaniya?