Kapitulo 20
Doktrina ug mga Pakigsaad 51–56
Pasiuna ug Timeline
Ang mga Santos gikan sa Colesville, New York, miabut sa Ohio kaniadtong Mayo 1831, ug si Bishop Edward Partridge ang responsable sa pagpahimutang sa ilang kapuy-an. Aron sa pagtabang og giya ni Bishop Partridge, ang Ginoo mihatag ni Propeta Joseph Smith sa pagpadayag nga gi-rekord diha sa Doktrina ug mga Pakigsaad 51. Niini nga pagpadayag gitudloan sa Ginoo si Bishop Partridge kon unsaon pag-organisar ang mga pagkatinugyanan sa mga kabtangan ug salapi diha sa mga Santos.
Kaniadtong Hunyo 3–6, 1831, ang mga elder sa Simbahan nagpundok alang sa usa ka komperensya. Sa katapusang adlaw sa komperensya, mihatag ang Ginoo kang Joseph Smith sa pagpadayag nga gi-rekord diha sa Doktrina ug mga Pakigsaad 52. Niini nga pagpadayag gisulti sa Ginoo nga ang sunod nga komperensya pagahimoon sa Missouri ug misaad nga Iyang ipahibalo didto ang dapit sa yuta nga kabilin sa mga Santos. Mitudlo ang Ginoo og pila ka mga elder sa pagbiyahe nga magpares ngadto sa Missouri ug gitudloan sila kon unsaon nila sa pagbiyahe ug pagsangyaw sa ebanghelyo. Mipadayag usab ang Ginoo og sundanan alang sa pag-ila sa tinuod nga mga sumusunod ni Jesukristo.
Sa mga adlaw nga misunod sa Hunyo 1831 nga komperensya, nadawat ni Propeta Joseph Smith ang mga pagpadayag nga gi-rekord diha sa Doktrina ug mga Pakigsaad 53–56. Kini nga mga pagpadayag naglakip og mga panudlo alang sa mga miyembro sa Simbahan kinsa nagpuyo sa Ohio apan sa dili madugay mobalhin ngadto sa Missouri. Niini nga mga pagpadayag, ang Ginoo misulti ngadto nila ni Sidney Gilbert, Newel Knight, ug William W. Phelps, ug mihatag kanila og mga panudlo nga piho ngadto sa ilang mga buluhaton ug mga talento diha sa Simbahan.
Sa sayong bahin sa Hunyo 1831, si Ezra Thayre ug si Thomas B. Marsh gitawag og usa ka misyon ngadto sa Missouri (tan-awa sa D&P 52:22). Apan, tungod sa garbo ug kahakog, dili andam si Ezra sa pagbiya kauban ni Thomas. Sa pagpadayag nga gi-rekord diha sa Doktrina ug mga Pakigsaad 56, gibakwi sa Ginoo ang tawag ni Ezra Thayre ug mitawag ni Selah J. Griffin sa pag-uban ni Brother Marsh.
-
Mayo 14, 1831Ang mga Santos sa Colesville, New York, miabut sa Ohio ug gidapit sa pagpuyo isip usa ka grupo diha sa uma ni Leman Copley sa Thompson, Ohio.
-
Mayo 20, 1831Ang Doktrina ug mga Pakigsaad 51 nadawat.
-
Mayo–Hunyo 1831Gisugdan ni Leman Copley ang pagpapahawa sa mga Santos kinsa namuyo sa iyang yuta.
-
Hunyo 3–6, 1831Usa ka komperensya sa Simbahan ang gipahigayon didto sa Kirtland, Ohio. Atol sa komperensya si Joseph Smith nakakita sa Dios Amahan ug ni Jesukristo ug ang unang mga high priest niini nga dipensasyon gi-orden.
-
Hunyo 6–15, 1831Ang Doktrina ug mga Pakigsaad 52–56 nadawat.
-
Hunyo 19, 1831Si Joseph Smith, Sidney Rigdon, ug ang uban mibiya sa Ohio alang sa ilang unang panaw ngadto sa Missouri.
Doktrina ug mga Pakigsaad 51: Dugang nga Makasaysayanong Background
Daghan sa unang mga Santos nga mibalhin gikan sa New York ngadto sa Ohio miabut pinaagi sa bapor didto sa Fairport Harbor diha sa baybayon sa Lake Erie, pipila lamang ka mga kilometro gikan sa Kirtland.
Sa hinapos sa Diyembre 1830 ug sayo sa Enero 1831, nadawat ni Propeta Joseph Smith ang mga pagpadayag gikan sa Ginoo nga nagtudlo sa mga Santos sa pagpundok diha sa Ohio (tan-awa sa D&P 37:1, 3; 38:32). Ang Colesville Branch, nga naglangkob og kapin sa 60 ka mga miyembro sa Simbahan, maoy usa sa tulo ka mga grupo sa mga Santos nga mibiya sa New York aron magpundok ngadto sa Ohio. Mibiya sila gikan sa Colesville, New York, sa tunga-tunga sa Abril 1831 uban ni Newel Knight isip ilang lider. Human sa usa ka bulan nga taas nga panaw nga milakip og mga kalangan tungod sa kangil-ad sa panahon, miabut sila sa Ohio mga tunga-tunga sa Mayo. Sumala ni Newel Knight, sa ilang pag-abut “gitambag kini nga ang Colesville Branch magpabiling magpundok ug moadto sa [usa] ka silingang lungsod nga gitawag og Thompson, ingon nga usa ka tawo nga ginganlan og [Leman] Copley nanag-iya o dako-dako nga luna sa yuta didto nga iyang gihagad nga ang mga Kaigsoonan papuy-on” (sa The Joseph Smith Papers, Documents, Volume 1: Hulyo 1828–Hunyo 1831, ed. Michael Hubbard MacKay ug uban [2013], 315; spelling ug punctuation gi-standardize). Nangayo si Bishop Edward Partridge og panudlo kon unsaon pagsangkap sa bag-ong miabut nga mga Santos, busa si Joseph Smith nangutana sa Ginoo. Agi og tubag, kaniadtong Mayo 20, 1831, nadawat sa Propeta ang pagpadayag nga gi-rekord diha sa Doktrina ug mga Pakigsaad 51.
Doktrina ug mga Pakigsaad 51
Nagtudlo ang Ginoo ni Bishop Edward Partridge sa pagdumala sa temporal nga mga panginahanglan sa mga Santos
Doktrina ug mga Pakigsaad 51:1–2. “Ipahimutang sumala sa akong mga balaod”
Nangutana si Bishop Edward Partridge kon unsaon pagtuman sa labing maayo ang temporal nga mga panginahanglan sa mga miyembro sa Colesville Branch, ug misugo ang Ginoo kaniya sa pagpahimutang kanila “sumala sa akong mga balaod” (D&P 51:2). Naghatag ang Ginoo sa pipila Niya ka mga sulugoon sa awtoridad ug responsibilidad sa pagdumala ug pagpadagan sa espiritwal ug temporal nga buhat sa kaluwasan diha sa Simbahan. Kini nga katungdanan sa pag-organisar sa buhat mahinungdanon; mipahayag ang Dios nga ang Iyang balay mao “ang balay sa kahusay, … ug dili usa ka balay sa kagubot” (D&P 132:8; tan-awa usab sa D&P 88:119). Niini nga kahimtang, gitudloan si Bishop Partridge sa pag-organisar sa mga Santos sumala sa balaod sa pagpahinungod aron matubag ang mga panginahanglan sa mga mibalhin.
Doktrina ug mga Pakigsaad 51:3–6. “Tuguti nga ang akong sulugoon nga si Edward Partridge … motudlo ngadto niini nga mga katawhan sa ilang mga bahin, matag tawo managsama”
Gisugo sa Ginoo si Bishop Edward Partridge sa pagpatuman sa balaod sa pagpahinungod diha sa mga pamilya kinsa mibalhin gikan sa New York ug nagpuyo sa yuta ni Leman Copley. Kini nga mga pamilya kinahanglan nga mopahinungod sa ilang mga kabtangan ug mga kapanguhaan “uban sa pakigsaad ug sa sulat-kasabutan” (D&P 42:30). Si Bishop Partridge dayon “motudlo sa tawo sa ilang mga bahin” (D&P 51:3), nagpasabut nga siya mohatag sa matag pamilya og bahin sa mga kapanguhaan sumala sa ilang mga panginahanglan, mga gusto, ug mga kahimtang—sa pipila ka mga higayon kini mahimong daghan pa kay sa gipahinungod sa pamilya. Ang bishop gikinahanglan nga mopakita ngadto sa matag pamilya og usa ka sulat-kasabutan nga nagpahayag nga ang bahin o kabilin nga ilang nadawat nagpaila sa ilang pribado nga pagkatinugyanan. Bisan unsa nga sobra kinahanglan nga tipigan ni Bishop Partridge ug gamiton sa pagtabang sa kabus ug sa timawa diha sa Simbahan.
Ang proseso sa pagpahinungod sa kabtangan kinahanglan nga pagahimoon sumala sa baruganan sa kabubut-on, ingon nga gipasabut diha sa Hunyo 1833 nga sulat ngadto ni Bishop Partridge ug gipirmahan nila ni Joseph Smith, Sidney Rigdon, Frederick G. Williams, ug Martin Harris: “Ang matag tawo kinahanglan gayud nga iyang kaugalingong maghuhukom [kon] unsa ang gidaghanon nga iyang itugot ubos sa pagkontrolar sa Bishop. … Ang butang sa pagpahinungod kinahanglan gayud nga pagahimoon pinaagi sa kasagarang panag-uyon sa duha ka partido—Kay, ang paghatag sa Bishop og gahum sa pagsulti kon pilay anaa sa matag tawo ug ang [matag tawo] kinahanglan nga ma-obligar sa pagsunod sa paghukom sa Bishop, mao ang paghatag ngadto sa Bishop og dugang nga gahum kay sa unsay anaa sa usa ka Hari, ug sa laing bahin, sa pagpasulti sa matag tawo unsay ilang gikinahanglan ug ang Bishop [kinahanglang] ma-obligar sa pagsunod uban sa iyang paghukom, mao ang paglabay sa Zion ngadto sa kalibug ug sa paghimo og usa ka Ulipon ngadto sa Bishop. Ang tinuod mao, kinahanglon gayud nga adunay katimbang o panimbang nga gahum tali sa bishop ug sa mga tawo, ug sa ingon panag-uyon ug kaayo magpabilin taliwala kaninyo. Busa, kadtong mga tawo nga nagpahinungod og kabtangan ngadto sa Bishop sa Zion, ug unya nagdawat usab og kabilin, kinahanglan gayud nga magpakita sa makatarunganong paagi ngadto sa Bishop nga siya [nanginahanglan] ingon kadaghan sama sa iyang gipangayo” (diha sa The Joseph Smith Papers, Documents, Volume 3: Pebrero 1833–Marso 1834, ed. Gerrit J. Dirkmaat ug uban [2014], 153; spelling ug punctuation gi-standardize).
Doktrina ug mga Pakigsaad 51:15–17. “Tuguti sila nga molihok diha niini nga yuta alang sa mga katuigan”
Tungod kay ang hugot nga pagtuo ni Leman Copley nawagtang ug giputol niya ang iyang pakigsaad sa pagpahinungod sa iyang yuta, ang mga Santos sa Colesville mipuyo sa iyang uma sa Thompson, Ohio, sulod lamang sa pipila ka mga semana. Ang Doktrina ug mga Pakigsaad 51:16 nagpaila nga ang Ginoo nahibalo nga ang ilang pagpuyo igo lamang “alang sa mubo nga panahon.” Bisan pa niana, mitambag Siya sa mga Santos sa pagtrabaho ug pagpuyo ingon og sila maanaa diha sulod sa mga katuigan. Ang kadaghanan sa mga Santos sa Colesville misunod niini nga mga panudlo. Sa panahon sa ilang mubo nga pagpuyo ilang gihawanan ang yuta, gitamnan og mga tanom, ug gisugdan ang pagtukod og mga balay, ang tanan diin ilang gibiyaan sa dihang si Leman Copley mipugos kanila sa pagpahawa. Sa wala madugay ang Ginoo misugo sa Colesville Branch sa pagbalhin ngadto sa Missouri aron pagtabang sa pagpahimutang sa Zion (tan-awa sa D&P 54; 58:6–7).
Gidak-on sa uma ni Leman Copley sa Thompson (karon Madison), Ohio, diin iyang gidapit ang mga Santos nga gikan sa Colesville, New York, sa pagpuyo.
Doktrina ug mga Pakigsaad 51:19. “Matinud-anon, makiangayon, ug maalamon nga tinugyanan”
Ang mga Santos sa Colesville Branch mihimo og daghang mga sakripisyo sa pagbiya sa ilang mga panimalay sa New York ug mibalhin ngadto sa Ohio ingon nga gisugo sa Ginoo. Wala madugay human sila miabut, gipapahawa sila gikan sa yuta ni Leman Copley ug gisugo sa pagbalhin na usab—niini nga panahon mga 1,448 ka kilometro kasadpan sa Jackson County, Missouri. Ang saad nga “kinsa kadto nga makita nga matinud-anon, makiangayon, ug maalamon nga tinugyanan makasulod ngadto sa himaya sa iyang Ginoo, ug makapanunod sa kinabuhi nga dayon” (D&P 51:19) sa tinuod nakatabang sa paglig-on sa pagsalig sa mga Santos diha sa Ginoo atol niining malisud nga panahon.
Diha sa Doktrina ug mga Pakigsaad, ang mga pulong nga tinugyanan ug pagkatinugyanan mga kauban sa balaod sa pagpahinungod ug nagpasabut ngadto sa mga kapanguhaan o mga yuta nga gihatag sa Ginoo ngadto niadtong kinsa nakapahinungod sa tanan uban sa usa ka pakigsaad. Si Elder Quentin L. Cook sa Korum sa Napulog Duha ka mga Apostoles mitudlo nga ang mga pagkatinugyanan personal usab nga mga responsibilidad ug mga katungdanan nga kita aduna:
Nagpuyo kita sa makuyaw nga mga panahon nga ang daghan nagtuo nga kita walay tulubagon ngadto sa Dios ug nga kita walay personal nga responsibilidad o pagkatinugyanan alang sa atong mga kaugalingon o sa uban. Daghan sa kalibutan mitutok sa kaugalingon pagtagbaw, nagtagbaw sa ilang kaugalingong mga tinguha, ug nahigugma sa kalipayan labaw sa ilang paghigugma sa pagkamatarung. Dili sila motuo nga sila magbalantay sa ilang igsoon. Diha sa Simbahan, hinoon, kita nagtuo nga kining mga pagkatinugyanan usa ka sagradong pagsalig. …
“… Ang mga baruganan sa pagkamay-tulubagon ug pagkatinugyanan adunay dako nga kahulugan sa atong doktrina.
“Diha sa Simbahan, ang pagkatinugyanan dili limitado ngadto sa usa ka temporal nga pagsalig o responsibilidad. Gitudlo ni Presidente Spencer W. Kimball: ‘Kita mga tinugyanan sa atong mga lawas, mga salabutan, mga pamilya ug mga kabtangan. … Ang matinud-anong tinugyanan mao ang usa ka tawo kinsa nagbansay og matarung nga pagmando, nag-amuma sa iyang kaugalingon nga pamilya, ug nag-atiman sa mga kabus ug timawa’ [‘Welfare Services: The Gospel in Action,’ Liahona, Abril. 1977, 78]. …
“Kalabut sa atong pagkatinugyanan alang sa atong mga pamilya, gitudlo sa pipila nga kon kita mo-report ngadto sa Manluluwas ug mangutana Siya kanato sa paghatag og subay sa atong yutan-ong mga responsibilidad, duha ka importanting mga pangutana may kalabutan sa atong mga pamilya. Ang una mao ang atong relasyon sa atong kapikas, ug ang ikaduha mahitungod sa matag usa sa atong mga anak. …
“Sa tanan natong mga paningkamot sa pagkatinugyanan, sundon nato si Jesukristo. Maninguha kita sa pagsunod unsay Iyang gisugo kanato nga buhaton, pinaagi sa Iyang mga pagtulun-an ug sa Iyang ehemplo. …
“Ang akong panghinaut mao nga ang matag usa kanato mo-ribyu tagsa-tagsa ug isip mga pamilya sa mga pagkatinugyanan diin kita adunay responsibilidad ug pagkamay-tulubagaon. Nag-ampo ako nga atong buhaton ang mao nahibalo nga kita sa katapusan may tulubagon ngadto sa Dios” (“Stewardship—a Sacred Trust,” Ensign o Liahona, Nob. 2009, 91, 93–94).
Doktrina ug mga Pakigsaad 52: Dugang nga Makasaysayanong Background
Sa katapusan sa Mayo 1831, hapit tanan nga mga miyembro sa Simbahan sa New York gikan sa Palmyra, Fayette, ug Colesville nga mga area mibalhin ngadto sa Ohio agi og pagsunod sa sugo sa Ginoo. Niadtong Hunyo 3–6, 1831, usa ka kinatibuk-ang komperensya sa Simbahan gihimo pinaagi sa nagsunod-sunod nga mga miting didto sa Kirtland, Ohio. Kini nga komperensya ingon og usa ka katumanan sa Pebrero 1831 nga pagpadayag diin ang Ginoo mipahayag nga ang “mga elder [anciano] sa akong simbahan kinahanglan nga pagatawgon nga maghiusa, gikan sa silangan ug gikan sa kasadpan, ug gikan sa amihanan ug gikan sa habagatan” (D&P 44:1). Kon ang mga elder mapamatud-an nga matinud-anon ug naggamit sa hugot nga pagtuo, misaad ang Ginoo nga “mobu-bu sa [Iyang] Espiritu diha kanila” (D&P 44:2).
Atol sa komperensya “ang Ginoo mipakita sa iyang gahum ngadto sa hingpit nga katagbawan sa mga santos” (Manuscript History of the Church, vol. A-1, pahina 118, josephsmithpapers.org). Daghan ang mipamatuod nga ilang nakita ang Dios diha sa panan-awon atol sa miting (tan-awa sa The Life of Levi Hancock, gikutlo sa Karl Ricks Anderson, Joseph Smith’s Kirtland: Eyewitness Accounts [1989], 107–8). Miingon si Lyman Wight nga iyang nasaksihan “ang tataw nga mga pagpakita sa gahum sa Dios sama ka yano sa nahimo niadtong adlaw sa pentecostes,” nga nag-apil “sa pagpang-ayo sa masakiton, pagpapahawa sa mga yawa, pagsulti og wala mahibaloi nga mga pinulongan, pag-ila og mga espiritu, ug pagpanagna uban sa dakong gahum” (sa The Joseph Smith Papers, Documents, Volume 1: Hulyo 1828–Hunyo 1831, 322; spelling gi-standardize). Ang tigsaysay sa Simbahan nga si John Whitmer misulat: “Ang Espiritu sa Ginoo nahulog diha ni Joseph sa talagsaon nga paagi. Ug si [Joseph] nanagna nga si Juan ang Tigpadayag anaa uban sa napulo ka mga tribo sa Israel … aron sa pag-andam kanila alang sa ilang pagbalik gikan sa dugay nga pagkatibulaag” (sa The Joseph Smith Papers, Histories, Volume 2: Assigned Histories, 1831–1847 ed. Karen Lynn Davidson ug uban pa [2012], 39; spelling ug capitalization gi-standardize).
Atol usab sa komperensya, ang Propeta Joseph Smith mi-orden sa pipila ka mga elder ngadto sa katungdanan sa high priest. Kini mao ang unang mga ordinasyon ngadto sa katungdanan sa high priest sa gipahiuli nga Simbahan. Mipahayag ang Propeta, “Klaro kaayo nga ang Ginoo mihatag kanato og gahum katimbang sa trabaho nga atong pagabuhaton, ug ang kalig-on sumala sa lumba nga gibutang sa atong atubangan, ug ang grasya ug panabang sigun sa atong panginahanglan” (Mga Pagtulun-an sa mga Presidente sa Simbahan: Joseph Smith [2007], 426).
Bisan og ang mga miyembro sa Simbahan nga diha sa komperensya may hingpit nga malipayong espiritwal nga mga kasinatian, gi-rekord ni John Whitmer nga ang kaaway diha usab: “Samtang ang Ginoo mibu-bu sa iyang espiritu diha sa iyang mga sulugoon, ang Yawa mipahimulos sa higayon sa pagpahibalo sa iyang gahum, [ug] iyang gigapos si Harvey Whitcock … aron dili siya makasulti.” Gipadayag sa Ginoo ang paagi sa kaaway ngadto sa Propeta, ug si Joseph “mimando sa yawa diha sa ngalan ni Kristo ug siya mibiya sa among hingpit nga kalipay ug kahupay” (sa The Joseph Smith Papers, Histories, Volume 2: Assigned Histories, 1831–1847, 40–41; spelling ug punctuation gi-standardize).
Sa katapusang adlaw sa komperensya, Hunyo 6, nadawat ni Propeta Joseph Smith ang pagpadayag nga gi-rekord diha sa Doktrina ug mga Pakigsaad 52. Pila ka tuig ang milabay misulat siya sa usa ka pamantalaan sa Simbahan nga kini nga pagpadayag nadawat “pinaagi sa langitnong panan-awon” (sa The Joseph Smith Papers, Documents, Volume 1: Hulyo 1828–Hunyo 1831, 327).
Doktrina ug mga Pakigsaad 52
Ang Ginoo misugo sa pipila ka mga lider sa Simbahan sa pagbiyahe ngadto sa Missouri ug naghatag og usa ka sundanan sa paglikay nga malimbungan
Doktrina ug mga Pakigsaad 52:1–5. “Ang yuta nga inyong kabilin”
Sa dihang ang pagpadayag nga gi-rekord diha sa Doktrina ug mga Pakigsaad 52 gihatag, ang mga Santos mahinamong nagpaabut sa pagtukod sa siyudad sa Zion, nga gipanagna diha sa mga kasulatan (tan-awa sa Ether 13:3–6; D&P 28:9; Moises 7:62). Sa usa ka pagpadayag nga gihatag kaniadtong Marso 1831, misaad ang Ginoo nga Iyang ipadayag ang nahimutangan sa yuta nga paliton sa mga Santos alang sa usa ka kabilin (tan-awa sa D&P 48:4–6). Sila kinahanglan nga magpundok diha niini nga yuta ug itukod ang siyudad sa Zion, o ang Bag-ong Jerusalem. Ang siyudad himoon nga usa ka dapit nga dangpanan ug kahilwasan alang sa mga Santos (tan-awa sa D&P 45:64–71). Kaniadtong Hunyo 1831 gitudloan sa Ginoo si Propeta Joseph Smith ug Sidney Rigdon sa pag-adto sa Missouri ug sa paghimo sa sunod nga komperensya sa Simbahan didto. Sa higayon nga atua na didto, kon sila matinud-anon, misaad ang Ginoo sa pagpadayag sa yuta nga ilang kabilin. Bisan og ang Ginoo misulti sa mga Santos nga ang yuta sa pagkakaron gigamit sa mga “kaaway,” misaad Siya nga “mopadali sa pagtukod sa dakbayan [Zion] niana nga panahon” (D&P 52:42–43). Ang gipasabut sa Ginoo nga mga kaaway sa mga Santos nagpaila sa pagkontra ug pagdumot nga masinati sa mga miyembro sa Simbahan gikan sa lokal nga mga lumulupyo sa Missouri samtang misugod sila sa pagpundok didto sa Jackson County, Missouri.
Doktrina ug mga Pakigsaad 52:9–10, 33–34. Itudlo unsay napadayag ngadto sa mga apostoles ug mga propeta
Ingon nga gi-rekord diha sa Doktrina ug mga Pakigsaad 52, mitawag ang Ginoo og 26 ka mga lalaki, agi og dugang ngadto ni Propeta Joseph Smith ug Sidney Rigdon, sa pagbiyahe isip mga misyonaryo ngadto sa Missouri. Gitudloan sila sa pagbiyahe sa hapit 1,448 ka mga kilometro nga panaw pinaagi sa lain-laing agianan, nagsangyaw, ug nagbunyag sa maagian. Gigiyahan sila sa Ginoo sa pagtudlo sa “walay lain nga mga butang gawas niana nga gisulat sa mga propeta ug sa mga apostoles, ug kana nga gitudlo kanila pinaagi sa Maghuhupay pinaagi sa pag-ampo diha sa hugot nga pagtuo” (D&P 52:9; tan-awa usab sa Mosiah 18:18; 25:21–22). Ang mga propeta sa ulahing mga adlaw nag-awhag usab sa mga miyembro sa Simbahan sa pagsalig sa mga pulong sa mga propeta ug sa paggiya sa Espiritu Santo kon magtudlo sa doktrina sa ebanghelyo.
Namulong ngadto sa mga magtutudlo sa relihiyon diha sa Simbahan, si Presidente J. Reuben Clark Jr. (1871–1961) sa Unang Kapangulohan mitudlo:
“Ang inyong labing dako nga tinguha, ang inyong labing importante ug bugtong nga buluhaton, mao ang pagtudlo sa ebanghelyo ni Ginoong Jesuskristo ingon nga gipadayag niining ulahing mga adlaw. Kamo kinahanglang magtudlo niini nga ebanghelyo, naggamit isip inyong mga tinubdan ug mga awtoridad ang sumbanan nga mga kasulatan sa Simbahan ug ang mga pulong niadtong kinsa gitawag sa Dios sa paggiya sa Iyang katawhan niining ulahing mga adlaw. Kamo dili … mosal-ut diha sa inyong pagtudlo sa inyong kaugalingong lahi nga pilosopiya, walay pagsapayan unsa ang tinubdan niini o unsa ka makahimuot o makatarunganon kini nganha kaninyo. …
“Kamo dili … mousab sa mga doktrina sa Simbahan o moilis niini kay kini gipahayag ug anaa sa sumbanan nga mga kasulatan sa Simbahan ug pinaagi niadtong kansang awtoridad mao ang pagpadayag sa hunahuna ug kabubut-on sa Ginoo ngadto sa Simbahan” (The Chartered Course of the Church in Education, rev. ed. [booklet 2004; pakigpulong ngadto sa Church Educational System religious educators, Ago. 8, 1938], 10).
Doktrina ug mga Pakigsaad 52:14–21. “Ako mohatag nganha kaninyo og sumbanan sa tanan nga mga butang”
Atol sa komperensya nga gihimo sa Hunyo 3–6, 1831, nasaksihan sa mga elder sa Simbahan ang kalainan tali sa mga pagpakita sa dautan ug sa gahum sa Dios. Sa katapusang adlaw sa komperensya, mipadayag ang Ginoo ngadto sa mga elder og usa ka sumbanan alang sa pag-ila tali niadtong kinsa mga limbongan o mga impostor ug niadtong kinsa matarung nga mga sulugoon sa Dios (tan-awa sa D&P 52:14–21). Mihatag Siya og mga ehemplo sa mga bunga niadtong kinsa naghago o nagbuhat uban ang Espiritu sa Dios. Uban sa miaging mga panudlo (tan-awa sa D&P 43:1–7; 46:7–8; 50:1–25), kini nga pagpadayag mitabang sa paghupay sa kagubot taliwala sa mga lider ug sa mga miyembro sa Simbahan kalabut sa dili tinuod nga mga espiritu ug sa nagpasulabi nga kinaiya o mga nabatasan sa pagsimba. Si Elder Paul E. Koelliker sa Kapitoan mitudlo:
“Niadtong Hunyo 1831, dihang natawag ang unang mga lider sa Simbahan, si Joseph Smith giingnan nga ‘si Satanas anaa sa tanan nga bahin niini nga yuta, ug siya naglihok aron sa paglimbong sa mga nasud.’ Sa pagbatok niining makabalda nga impluwensya, ang Ginoo miingon nga Siya mohatag nato og ‘sumbanan sa tanan nga mga butang, nga [kita] dili malimbungan’ (D&P 52:14).
“Ang mga sumbanan mao ang mga sundanan, mga giya, balik-balik nga mga lakang, o mga dalan nga sundon aron mapahiangay sa katuyoan sa Dios. Kon sundon, makahimo kini natong mapaubsanon, maabtik, ug kaila sa tingog sa Balaang Espiritu gikan sa tingog nga makabalda kanato ug modala nato palayo” (“Tinuod Siya nga Nahigugma Kanato,” Liahona, Mayo 2012, 16).
Doktrina ug mga Pakigsaad 52:33–34. “Siya nga matinud-anon, ang mao panalipdan ug panalanginan”
Kadtong kinsa gitawag sa pagsangyaw sa ebanghelyo samtang sila mibiyahe ngadto sa Missouri gisaaran nga kon sila magmatinud-anon ang Ginoo mobantay kanila ug mopanalangin kanila “uban sa daghan nga bunga” (D&P 52:34). Si Bishop Edward Partridge usa niadto nga gitawag sa pagbiya sa iyang pamilya ug mibiyahe ngadto sa Missouri. Ang asawa ni Bishop Partridge, si Lydia nagbilin og usa ka istorya sa mga kahimtang diin ang iyang bana, si Edward, nakadawat niining mapadayagon nga mando. Ang ilang mga anak natakdan og tipdas gikan sa pipila sa bag-ohay nga miabut nga mga miyembro sa New York nga nagpuyo uban sa ilang pamilya. Misulat siya nga ang ilang ‘kinamagulangang anak nga babaye nasakit og hilanat sa baga, ug samtang grabe na siya, ang akong bana gitawag pinaagi sa pagpadayag nga mokuyog sa uban ngadto sa Missouri aron mangita og dapit nga kapundukan sa mga Santos, ang mga dili tumutuo naghunahuna nga tingali nabuang na siya o dili siya moadto. Ug naghunahuna ako sa akong kaugalingon nga ako adunay rason nga maghunahuna nga nagsugod na ang akong mga pagsulay, ug sa ingon [kini] nahitabo, apan kini nga pagsulay sama sa uban gisundan og mga panalangin kay ang among anak nga babaye naayo.’ (Partridge, Genealogical Record, 6.)” (sa The Joseph Smith Papers, Documents, Volume 1: Hulyo 1828–Hunyo 1831, 330).
Doktrina ug mga Pakigsaad 52:39–40. “Hinumdumi diha sa tanan nga mga butang ang kabus ug ang timawa”
Ang mga elder sa Simbahan kinsa wala sugoa sa pag-adto og mga misyon mag-amuma alang sa mga miyembro sa Simbahan ug, sa labing piho, sa “paghinumdom diha sa tanang mga butang ang kabus ug ang timawa, ang masakiton ug ang nag-antus” (D&P 52:40). Mipasabut ang Ginoo nga ang pag-amuma sa kabus ug sa masakiton usa ka kinaiya sa Iyang mga disipulo. Sa Iyang tibuok mortal nga pangalagad, ang Manluluwas nag-amuma sa masakiton ug sa nag-antus, nag-ayo ug naghupay kanila. Nangalagad Siya ngadto sa kabus ug sa timawa, nag-alima kanila sa pisikal ug espiritwal nga paagiSi Presidente Gordon B. Hinckley (1910–2008) mitudlo kon unsa ang atong mabuhat sa paghinumdom niadtong nanginahanglan:
Sa paghinumdom nga mag-uban diha sa atubangan sa Ginoo sa mga kabus, sa mga timawa, ug sa mga dinaugdaug, adunay maugmad, nga wala damha apan sa tinud-anay, usa ka gugma alang sa uban nga labaw sa kaugalingon, usa ka pagtahud alang sa uban, usa ka tinguha sa pag-alagad sa mga panginahanglan sa uban. Ang usa ka tawo dili makahangyo sa Dios sa pagtabang sa usa ka silingan nga anaa sa kalisud kon walay gibati nga kadasig sa pagbuhat og usa ka butang sa iyang kaugalingon ngadto sa pagtabang niana nga silingan. …
“Nakadungog ako og usa ka bantugang tawo nga miingon niadtong usang adlaw, ‘Akong giayo ang pinulongan sa akong mga pag-ampo. Kay sa moingon, ‘Panalangini ang mga kabus ug ang masakiton ug ang timawa,’ karon ako moingon, ‘Amahan, pakitaa ako kon unsaon sa pagtabang ang kabus ug ang masakiton ug ang timawa, ug hatagi ako sa determinasyon sa pagbuhat sa mao’”(Teachings of Gordon B. Hinckley [1997], 457–58).
Doktrina ug mga Pakigsaad 53: Dugang nga Makasaysayanong Background
Si Sidney Gilbert kasosyo sa negosyo ni Newel K. Whitney sa N. K. Whitney and Company nga tindahan didto sa Kirtland, Ohio. Si Sidney ug ang iyang pamilya uban sa mga kinabig kinsa miapil sa Simbahan sa Kirtland. Kaniadtong Hunyo 8, 1831, duha ka adlaw human sa komperensya sa Simbahan, giduol ni Sidney Gilbert ang Propeta, nagtinguha nga mahibalo unsa ang gusto sa Ginoo kaniya nga buhaton. Nangutana si Joseph Smith sa Ginoo ug nadawat ang pagpadayag nga gi-rekord diha sa Doktrina ug mga Pakigsaad 53.
Si Sidney Gilbert kasosyo sa negosyo ni Newell K. Whitney. Human ang pipila ka mga Santos mibalhin ngadto sa Missouri, mipadagan siya og tindahan sa Simbahan diha niini nga lugar sa Independence, Missouri.
Doktrina ug mga Pakigsaad 53
Ang Ginoo mitawag ni Sidney Gilbert sa pagsangyaw sa ebanghelyo ug mibiyahe ngadto sa Missouri
Doktrina ug mga Pakigsaad 53:1–4. “Mosalikway sa kalibutan”
Mibiya sa Sidney Gilbert sa Kirtland, Ohio, sa hinapos sa Hunyo 1831 aron mosunod sa sugo sa Ginoo sa pagsangyaw sa ebanghelyo ug sa “pagkatinugyanan” ngadto sa Simbahan (D&P 53:4). Human moabut sa Missouri sa ting-init sa 1831, iyang gitukod ang usa ka komersyal nga tindahan ug, isip tinugyanan alang sa Simbahan, mitabang ni Bishop Edward Partridge sa pagpamalit og yuta alang sa pagkatinugyanan ug sa mga building sa Simbahan (tan-awa sa D&P 57:6, 8). Misugo ang Ginoo ni Sidney nga “mosalikway sa kalibutan” (D&P 53:2); siya kinahanglan nga mosunod sa mga sugo, mobiya sa iyang negosyo sa Kirtland aron mobiyahe ngadto sa Missouri, ug mogamit sa iyang gasa alang sa negosyo sa pagtabang nga matukod ang gingharian sa Dios diha sa yuta sa Zion. Ang sugo sa Ginoo nga mobiya sa kalibutan wala magpasabut nga si Sidney mopalayo sa iyang kaugalingon gikan sa kalibutanSi Elder M. Russell Ballard sa Korum sa Napulog Duha ka mga Apostoles mipasabut:
“Diha sa Simbahan, kanunay natong isulti ang panultihon: ‘Mahimong ania sa kalibutan apan dili iya sa kalibutan.’ …
“Tingali kinahanglan nga isulti nato ang panultihon … isip duha ka managlahi nga mga pahimangno. Una, ‘Pagmahimong ania sa kalibutan.’ Pagpanginlabut; pagpakisayud. Tinguhaa ang pagkamasinabtanon ug kamauyunon ug sabta ang pagkalain-lain. Paghimo og makahuluganong mga kontribusyon sa katilingban pinaagi sa pagserbisyo ug pag-apil. Ikaduha, ‘Pagmahimong dili iya sa kalibutan.’ Ayaw sunda ang sayop nga dalan o mokompromiso aron sa pag-uyon o pagdawat sa dili matarung.
“… Bisan pa sa tanang kadautan sa kalibutan, ug bisan pa sa tanang pagbatok ngadto sa maayo nga atong makaplagan sa naglibut kanato, kita kinahanglang dili mosulay sa pagdala sa atong mga kaugalingon o sa atong mga anak sa gawas sa kalibutan. Miingon si Jesus, ‘Ang gingharian sa langit sama sa igpapatubo,’ o libadura. (Mat. 13:33.) Kita gikinahanglan nga mobayaw sa kalibutan ug motabang sa pagbuntog sa kadautan nga naglibut kanato” (“The Effects of Television,” Ensign, Mayo 1989, 80).
Doktrina ug mga Pakigsaad 54: Dugang nga Makasaysayanong Background
Sa dihang ang mga Santos nga gikan sa Colesville, New York, miabut sa Kirtland, Ohio, kaniadtong Mayo 1831, gitambagan sila sa pag-adto sa silingan nga dapit sa Thompson, “kay usa ka tawo nga ginganlan og [Leman] Copley nanag-iya og daku-dako nga yuta didto nga iyang gitanyag nga ipa-okupar sa mga Kaigsoonan” (Newel Knight, sa The Joseph Smith Papers, Documents, Volume 1: Hulyo 1828–Hunyo 1831, 315; spelling gi-standardize). Si Leman sa una miuyon sa pagtugot sa mga Santos gikan sa New York sa pagpuyo sa iyang yuta agi og ilis sa paghimo og mga kaayohan sa iyang yuta. Wala madugay human sa ilang pag-abut, ang mga miyembro sa Colesville Branch misugod sa pagtanom ug pagtukod diha sa 307.16 ka ektarya nga umahan. Wala madugay human niana, nadawat ni Propeta Joseph Smith ang pagpadayag nga gi-rekord diha sa Doktrina ug mga Pakigsaad 51, nagtudlo niadtong kinsa namuyo sa Thompson sa pagbansay sa balaod sa pagpahinungod.
Samtang misugod ang mga Santos sa pagpuyo diha sa iyang yuta, mibiyahe si Leman Copley kauban sa ubang mga misyonaryo ngadto sa North Union, Ohio, sa pagsangyaw sa ebanghelyo ngadto sa United Believers in Christ’s Second Appearing (Shakers), usa ka relihiyosong grupo nga si Leman kauban sa wala pa siya mipasakop sa Simbahan (tan-awa sa D&P 49). Wala molampos ang misyon, ug misugod si Leman sa pagduda sa iyang pagpamatuod sa mensahe sa gipahiuli nga Simbahan. Wala madugay, mi-konsulta siya ni Ashbel Kitchell, ang lider sa mga Shaker,ug nagkuyog sila nga miadto sa uma ni Leman ug gisultihan ang mga Santos nga kinahanglan silang mopahawa. Wala tumana ni Leman ang pakigsaad nga iyang gihimo ngadto sa Ginoo nga iyang ipahinungod ang iyang uma. Gi-rekord ni Joseph Knight Jr. nga bisan sa paghimo og mga kaayohan diha sa yuta ni Leman sulod sa mubong panahon nga mipuyo ang mga Santos didto, “kinahanglan kaming mopahawa sa iyang [kang Copley] nga uma ug mobayad og saysenta dolyares nga damyos” (sa The Joseph Smith Papers, Documents, Volume 1: Hulyo 1828–Hunyo 1831, 335). Wala mahibalo unsa ang buhaton, si Newel Knight ug ang ubang mga elder gikan sa grupo sa Colesville miadto sa Propeta alang sa paggiya. Nangutana si Joseph ngadto sa Ginoo kaniadtong Hunyo 10, 1831, ug nadawat ang pagpadayag nga gi-rekord diha sa Doktrina ug mga Pakigsaad 54.
Doktrina ug mga Pakigsaad 54
Nagtudlo ang Ginoo sa mga Santos sa Colesville nga mobiya sa Ohio ug mobalhin ngadto sa Missouri
Doktrina ug mga Pakigsaad 54:3–6. Ang gilapas nga pakigsaad “walay hinungdan ug walay kapuslanan”
Ang desisyon ni Leman Copley sa paghingilin sa mga miyembro sa Colesville Branch gikan sa iyang yuta usa usab ka desisyon sa paglapas sa sagradong pakigsaad nga iyang gihimo sa pagpahinungod sa iyang yuta ngadto sa Ginoo. Ang mga Santos gikan sa New York naghimo usab og pakigsaad sa pagpahinungod sa tanan nga sila aduna (tan-awa sa D&P 51). Sa kaalaot, ang pagdumili ni Leman sa pagtuman sa iyang pakigsaad naghimo niini nga imposible alang sa mga Santos sa Colesville sa pagtuman sa ilang pakigsaad; busa, ang Ginoo mipahayag nga ang pakigsaad “nahimong walay hinungdan ug walay kapuslanan” (D&P 54:4). Ang Ginoo mipasabut usab og grabe nga mga sangputanan alang niadtong kinsa milapas sa ilang mga pakigsaad ug misaad og kalooy ngadto niadtong kinsa mituman sa ilang mga pakigsaad (tan-awa sa D&P 54:5–6).
Si Elder Jeffrey R. Holland sa Korum sa Napulog Duha ka mga Apostoles mitudlo mahitungod sa importansya sa paghimo ug pagtuman sa mga pakigsaad:
“Ang mihimo ug mituman lamang sa mga pakigsaad ang makaangkon sa talagsaong mga panalangin sa celestial nga gingharian. Oo, kon kita maghisgot mahitungod sa pagtuman sa mga pakigsaad, kita naghisgut kabahin sa kasingkasing ug kalag sa atong katuyoan sa pagkamortal.
“Ang pakigsaad usa ka kinahanglanon nga espirituhanong kontrata, usa ka sagrado nga saad ngadto sa Dios atong Amahan nga kita magpakabuhi ug maghunahuna ug maglihok sa usa ka piho nga paagi—ang paagi sa Iyang Anak, ang Ginoong Jesukristo. Isip ganti, ang Amahan, ang Anak, ug ang Espiritu Santo nagsaad kanato sa talagsaong kanindot sa kinabuhing kinabuhi. …
“… Kon kita gusto gayud nga magmalampuson sa atong mga calling, kon gusto nato ang agianan sa matag tabang ug matag kaayo ug matag panalangin gikan sa Amahan, kon kita gusto sa pultahan sa langit nga bukas kaayo aron kita makadawat sa mga gahum sa pagkadiosnon, kita kinahanglang motuman sa atong mga pakigsaad!” (“Pagtuman sa mga Pakigsaad: Usa ka Mensahe alang Niadtong Moserbisyo og Misyon,” Liahona, Ene. 2012, 2–4).
Doktrina ug mga Pakigsaad 54:7–10. “Lakaw … karon ug biya sa yuta”
Ingon nga gibiyaan nila ang ilang mga panimalay sa New York usa ka bulan lamang ang milabay, ang mga miyembro sa Colesville Branch usab wala nay dapit nga kapuy-an. Agi og tubag ngadto niini nga kabalaka, mihatag ang Ginoo og laing sugo alang kanila sa pagbalhin—niini nga higayon ngadto sa Missouri, hapit 1,448 ka kilometro ang gilay-on. Bisan og kini nga sugo malisud alang niini nga grupo nga kapin sa 60 ka matinud-anong mga miyembro sa Simbahan, ang Ginoo misugo sa mga Santos sa “pagpailub diha sa kalisdanan hangtud Ako moabut” ug mipahayag, “Tan-awa, Ako moabut sa labing madali, ug ang akong ganti ania uban kanako” (D&P 54:10). Agi og pagsunod ngadto sa sugo sa Ginoo, ang mga Santos sa Colesville, gipangulohan ni Newel Knight, mibiya sa Ohio ug miabut sa Independence, Missouri, sa katapusan sa Hulyo 1831. Sila usa sa unang mga Santos sa Ulahing mga Adlaw kinsa mipundok ngadto sa yuta sa Zion.
Doktrina ug mga Pakigsaad 55: Dugang nga Makasaysayanong Background
Si William W. Phelps usa ka manunulat, editor sa pamantalaan, ug tigmantala sa dihang siya gibunyagan nga miyembro sa Simbahan niadtong Hunyo 1831.
Sa dihang si Propeta Joseph Smith nangandam sa pag-adto sa Missouri kaniadtong Hunyo 1831, miabut si William W. Phelps sa Kirtland, Ohio, gikan sa Canandaigua, New York. Nakatrabaho si William isip usa ka editor sa pamantalaan, manunulat, ug tig-imprinta. Kaniadtong Abril 1830, mipalit si William og usa ka kopya sa Basahon ni Mormon gikan ni Parley P. Pratt. Human mabasa ug matandi ang Basahon ni Mormon sa Biblia, mihukom siya sa pag-apil sa gipahiuli nga Simbahan. Sa wala madugay misulat siya, “Bisan pa man ang akong lawas wala mabunyagi ngadto niini nga simbahan hangtud … Hunyo, 1831, apan ang akong kasingkasing atua didto gikan sa panahon nga akong nasinati ang basahon ni Mormon” (sa The Joseph Smith Papers, Documents, Volume 1: Hulyo 1828–Hunyo 1831, 337). Human miabut si William sa Kirtland kauban sa iyang asawa ug mga anak, ang Propeta nangayo sa kabubut-on sa Ginoo kabahin ni William Phelps ug nadawat ang pagpadayag nga gi-rekord diha sa Doktrina ug mga Pakigsaad 55. Dayon human nadawat sa Propeta kini nga pagpadayag kaniadtong Hunyo 14, 1831, gibunyagan ug gi-orden isip usa ka elder si William W. Phelps. Wala madugay human niana mipanaw siya ngadto sa Missouri kauban sa Propeta aron mopuyo didto ug nagsugod sa pagtrabaho nga siya gitawag sa pagbuhat.
Doktrina ug mga Pakigsaad 55
Nagtudlo ang Ginoo ni William W. Phelps kalabut sa iyang calling diha sa Simbahan
Doktrina ug mga Pakigsaad 55:4. “Ang buluhaton sa pag-imprinta, ug pagpili ug pagsulat sa mga basahon”
Si William W. Phelps usa ka ehemplo kon sa unsa nga paagi ang Ginoo nag-andam og mga tawo sa paglig-on sa Iyang gingharian kon sila andam sa pagsunod Kaniya. Mitawag ang Ginoo diha ni William sa paggamit sa iyang mga talento ug kasinatian isip usa ka manunulat, editor, ug tigmantala sa pagtabang ni Oliver Cowdery sa paghimo “sa buluhaton sa pag-imprinta, ug pagpili ug pagsulat sa mga basahon alang sa mga tulunghaan niini nga simbahan” (D&P 55:4). Naapil si William sa daghang mga paningkamot sa pagsulat alang sa Simbahan ug pagmantala ug pag-imprinta sa gisulat niini nga mga basahon. Sa Missouri, gi-imprinta niya ang Book of Commandments ug ang unang pamantalaan sa Simbahan, The Evening and the Morning Star. Wala madugay mitabang siya sa pag-andam ug sa pag-imprinta sa 1835 nga edisyon sa Doktrina ug mga Pakigsaad ug ang unang hymnbook sa Simbahan. Gisulat usab niya ang mga pulong sa daghang mga himno sa Santos sa Ulahing mga Adlaw, lakip sa “The Spirit of God,” “Praise to the Man,” ug “Redeemer of Israel.”
Doktrina ug mga Pakigsaad 56: Dugang nga Makasaysayanong Background
Si Ezra Thayre usa ka unang kinabig ngadto sa gipahiuli nga ebanghelyo. Human mibalhin gikan sa New York ngadto sa Kirtland, Ohio, gitudloan si Thayre sa pagpuyo ug pagtrabaho uban ni Joseph Smith Sr. diha sa uma ni Frederick G. Williams, kinsa nag-alagad og misyon sa Missouri. Kaniadtong Hunyo 6, 1831, ang Ginoo mitawag ni Thomas B. Marsh ug Ezra Thayre sa pagbiyahe ngadto sa Missouri ug sa pagsangyaw sa ebanghelyo diha sa agianan (tan-awa sa D&P 52:22). Siyam ka adlaw ang milabay, andam si Thomas sa pagbiya kauban sa ubang mga elder nga nagbiyahe ngadto sa Missouri. Si Ezra, hinoon, dili andam, nagbiya ni Thomas nga walay kauban. Giduol ni Thomas si Propeta Joseph Smith, nagtinguha nga mahibalo kon unsa ang buhaton. Ang Propeta nangutana sa Ginoo kaniadtong Hunyo 15, 1831, ug nadawat ang pagpadayag nga gi-rekord diha sa Doktrina ug mga Pakigsaad 56. Dili kini klaro kon unsa ang nakapugong ni Ezra Thayre sa pagtuman sa iyang misyon. Bisan pa niana, sa pagpadayag ngadto ni Joseph Smith, misugo ang Ginoo ni Ezra nga “maghinulsol sa iyang garbo, ug sa iyang pagkadawo ug mosunod sa nag-una nga sugo” nga gihatag diha sa usa ka pagpadayag kabahin sa iyang mga katungdanan diha sa uma ni Frederick G. Williams(D&P 56:8). Ang pagpadayag nagpahayag usab nga “walay pagkabahin diha sa [kang Williams nga] yuta” (D&P 56:9). Si Ezra Thayre tingali nakabayad aron sa pagsulbad sa bahin sa utang sa yuta ug mihangyo og legal nga titulo sa usa ka bahin sa uma. Ang posible nga kabalaka ni Ezra sa pagpahimutang sa iyang pinansyal nga mga kaayohan mahimong nagpasabut sa iyang kakulang og pagkaandam sa pagbiya uban ni Thomas B. Marsh sa ilang misyon ngadto sa Missouri. (Tan-awa sa The Joseph Smith Papers, Documents, Volume 1: Hulyo 1828–Hunyo 1831 309–14, 339–40.)
Doktrina ug mga Pakigsaad 56
Gibakwi sa Ginoo ang pagmisyon ni Ezra Thayre ug nagpasidaan sa mga Santos mahitungod sa kahakog ug garbo
Doktrina ug mga Pakigsaad 56:4–7. “Ako, ang Ginoo, nagsugo ug nagbakwi, ingon nga kini maayo kanako”
Ang Dios makapahayag ug makabakwi sa mga sugo, apan Siya motahud sa atong kabubut-on ug motugot kanato sa pagsunod o dili pagsunod sa Iyang mga sugo. Kon kita dili mosunod sa mga sugo sa Ginoo, Siya mobaton kanato nga may tulubagon. Hunahunaa kon giunsa sa mosunod nga mga panig-ingnan paghulagway sa pahayag nga “Ako ang Ginoo nagsugo ug nagbakwi, ingon nga kini maayo kanako” (D&P 56:4): Tungod kay gitugutan ni Ezra Thayre ang kalibutanong mga kabalaka sa pagpugong kaniya sa pagtuman sa iyang misyon, gibakwi sa Ginoo ang iyang calling ug mitawag og lain nga kauban alang kang Thomas B. Marsh (tan-awa sa D&P 56:5, 8). Misugo ang Ginoo sa mga Santos sa Colesville sa pagpuyo diha sa Thompson, Ohio, apan tungod kay gilapas ni Leman Copley ang iyang pakigsabut sa pagtugot sa mga Santos nga mopuyo sa iyang uma, misugo ang Ginoo kanila sa pagpanaw ngadto sa Missouri (tan-awa sa D&P 54:7–8). Gitawag og misyon si Newel Knight (tan-awa sa D&P 52:32), apan gibakwi kana nga tawag ug gisultihan siya sa pagpadayon sa paggiya sa mga Santos sa Colesville ug sa pagtabang kanila sa pagbalhin ngadto sa Missouri (tan-awa sa D&P 54, ulohan sa seksyon; D&P 54:2, 7–8). Human mabakwi sa Ginoo ang sugo alang ni Newel sa pagsangyaw sa ebanghelyo uban ni Selah Griffin, misugo Siya ni Selah sa pagkuyog hinoon ni Thomas B. Marsh ngadto sa Missouri (tan-awa sa D&P 56:5–6).
Doktrina ug mga Pakigsaad 56:14–18. “Kamo adunay daghan nga mga butang nga buhaton ug pagahinulsulan”
Mipahibalo ang Ginoo sa mga sala nga gikinahanglan sa mga Santos nga pagahinulsulan nga nagpugong kanila sa pagpuyo sa balaod sa pagpahinungod. Kay sa mangita sa pagbuhat sa kabubut-on sa Ginoo ug pagtukod sa Iyang Simbahan ug gingharian sa Iyang paagi, sila nagbuhat sa ilang kaugalingon nga kabubut-on.
Si Elder Bruce R. McConkie (1915–1985) sa Korum sa Napulog Duha ka mga Apostoles mitudlo: “Ang kaputli sa kasingkasing usa ka timailhan sa kaputli sa kalag. Sila mao kinsa ang midawat og kapasayloan sa ilang mga sala diha sa katubigan sa bunyag; kinsa, human sa bunyag, nagpuyo sa paagi nga makadawat og kapasayloan sa mga sala; kinsa naghimo nga ang ilang mga sala nalimpyo gikan sa ilang mga kalag ingon og pinaagi sa gahum sa Espiritu Santo. Sila mga mahinadlokon sa Dios ug matarung nga mga kalag; ug nagpakaputli, makasarang sila sa pagtan-aw ug sa pagpakig-uban sa ubang putli nga mga binuhat, ang labing taas kinsa mao ang Ginoo sa Kaputli” (A New Witness for the Articles of Faith [1985], 492).