“‘Ko ha Pīsope ki he Siasí’” Puipuituʻa ʻo e Ngaahi Fakahaá (2016)
“Ko ha Pīsope ki he Siasí,” Puipuituʻa ʻo e Ngaahi Fakahaá
“Ko ha Pīsope ki he Siasí”
ʻI he fahaʻitaʻu fakatōlau ʻo e 1830, naʻe aʻu atu ai ha kau talavou ʻe toko fā, ʻoku fakafuofua naʻa nau meimei taʻu uofulu pe taʻu uofulu tupu siʻi, ki he matapā ʻo e falekoloa tatā ʻo ʻEtuate Pātilisí ʻi Penisivili ʻi ʻOhaiō. ʻI he fanongo ko ia ʻa Pātilisi ki he talanoa fakaofo ʻa e kau tangatá ki he fakafoki mai ʻo e mafaí pea mo e fakahā mai ʻo ha folofola foʻoú, naʻá ne ui kinautolu ko e kau kākā mo tuli ke nau ō. Ka naʻe hili ʻenau oó, naʻe fekau ʻe Pātilisi ha taha ʻo ʻene kau ngāué ke ʻalu ʻo kumi ʻa e kau tangatá ke fakatau mai ha tatau ʻo e tohi naʻa nau ō holo mo iá, ʻa e Tohi ʻa Molomoná.
Naʻe lolotonga fekumi ʻa Pātilisi mo hono uaifi ko Litiá ki he siasi ko ē ʻokú ne akoʻi mahinongofua ʻa e ongoongolelei ʻo e Fuakava Foʻoú pea mo ʻomai ha fakamoʻoni ki ha mafai fakalangi ke tataki ʻa e siasí. ʻI he ako ko ia ʻe Litia ʻa e ngaahi pōpoaki ʻa e kau faifekaú, naʻá ne fakatokangaʻi ʻa e e moʻoni naʻá ne ʻilo mei he Tohitapú ʻi heʻenau ngaahi akonakí pea naʻá ne papitaiso leva. Naʻe ʻikai pē ke tui ʻa ʻEtutate Pātilisi ia, ka ʻi he hili ʻo ʻene fononga ki Niu ʻIoke ke feʻiloaki mo e Palōfita ko Siosefá, naʻá ne toe papitaiso mo ia.
Ko e meimei taimi tatau ʻeni naʻe maʻu ai ʻe Siosefa Sāmita ha fakahā naʻe palōmesi ange ai ʻa e ʻEikí kia ʻEtuate Pātilisi ʻo pehē, “te ke Maʻu hoku Laumālié, ʻa e Laumālie Māʻoniʻoní, ʻa ia ko e fakafiemālié, ʻa ia te ne akoʻi koe ʻi he ngaahi meʻa fakamelino ʻo e Puleʻangá.” ʻI he fakamahinoʻi ko ʻení, naʻe ui ai ʻe he ʻEikí ʻa Pātilisi “ke malanga ʻaki ʻeku Ongoongoleleí ʻo hangē ko e leʻo ha Talupité.” Naʻe mavahe leva ʻa Pātilisi ke vahevahe ʻene tui foʻou naʻe maʻú mo ʻene ongomātuʻá pea mo e ngaahi tokouá mo e tuofāfiné ʻi Masasūseti. Neongo naʻe ʻikai ke tali ʻe he konga lahi ʻo hono fāmilí ʻa ʻene pōpoakí, ka naʻe fakahoko pē ʻe Pātilisi ʻa e fekau ke malangaʻi ʻa e ongoongoleleí kiate kinautolú.
ʻI he foki mai ʻa Pātilisi ki ʻOhaiō ʻi he ʻaho 4 ʻo Fēpueli 1831, naʻe maʻu ʻe Siosefa Sāmita ha fakahā (ʻoku hoko ʻi he taimí ni ko e Tokāteline mo e Ngaahi Fuakava 41) ʻo ui ʻa ʻEtuate Pātilisi ko e fuofua pīsope ia ʻi he Siasi māhina pē ʻeni ʻe 10. Ko e tuʻunga ʻo e pīsopé ko e taha ia ʻo e ngaahi fuofua tuʻunga ʻi he lakanga fakataulaʻeikí naʻe fakafoki mai ʻi he kuonga ko ʻení, pea, hangē ko e ngaahi tuʻunga kehé, ko e ʻiloʻi ko ia ʻo e ngaahi fatongia ʻo e pīsopé naʻe hoko mai ia ʻi he ʻotu lea ki he ʻotu lea. ʻOku ʻikai hangē ko e kau pīsope ʻo e ʻaho ní, he naʻe fakahinohino kia Pātilisi ke ʻoua naʻa “fakanofo [pē ia] ko ha pīsope ki he Siasí” kae toe “tukuange [foki] ʻene fefakatauʻakí & fakamoleki hono taimí kotoa ʻi he ngaahi ngāue ʻa e Siasí.”
ʻI he ʻikai ha tohi tuʻutuʻuni pea ʻikai ke ʻi ai ha ngaahi sīpinga moʻui ke muimui ki aí, mahalo naʻe fifili ʻa Pātilisi pe ko e hā koā ʻa e “ngaahi ngāue ʻa e Siasí” naʻe fiemaʻu ke ne fakahokó. Ko e meʻa mālié, hili ha ngaahi ʻaho siʻi mei ai, naʻe maʻu ʻe Siosefa ha fakahā (naʻe ui ʻe he fuofua kāingalotu ʻo e Siasí “ko e Fonó”) ʻa ia naʻe ʻi ai ha fakamatala lahi ange ki he ngaahi fatongia ʻo Pātilisi ʻi heʻene hoko ko e pīsopé.
ʻI he fakahā ko ʻení (ʻoku maʻu he taimí ni ʻi he Tokāteline mo e Ngaahi Fuakava 42), naʻe fekauʻi ʻe he ʻEikí ke fakatapui kotoa ʻe he Kāingalotú ʻenau koloá kiate Ia ʻo fakafou ʻi he pīsiopé mo hono ongo tokoní “ʻaki ha fuakava mo ha Tohi Aleapau ʻa ia ʻe ʻikai lava ʻo maumauʻi.” Pea ʻe maʻu ʻe he tokotaha ʻokú ne fai ʻa e fakatapuí ha fatongia mei he pīsopé ʻe “feʻunga kiate ia mo hono fāmilí.” ʻOku tuku ki he pīsopé ke ne tokangaʻi ha faʻahinga toenga koloa ʻi ha fale tukuʻanga koloa ke “foaki ki he masivá mo e faingataʻaʻiá,” ke fakatau ʻaki ha ngaahi konga kelekele, pea mo langa ʻa Saione.
Naʻe fehangahangai ʻa Pātilisi mo e taha ʻo hono ngaahi fatongia mafatukituki ko ha pīsopé, ʻi he tūʻuta mai ʻa e Kāingalotú ki ʻOhaiō, ʻa ia naʻe fekauʻi ke nau hola mei Niu ʻIoké. Naʻe tuku ki a Pātilisi ke ne tokangaʻi hono fakanofonofo kinautolu ki he ngaahi kelekele ʻe hoko ko honau tofiʻá. Naʻe loto ʻa Līmani Kopelī ko ha mēmipa ʻo e Siasí he kamatá, ke fakaʻatā e Kāingalotu mei Kolesivili, Niu ʻIoké, ke nofo ʻi hono kelekele ʻeka ʻe 759 ʻi Tomisoni, ʻOhaioó, fakafuofua ʻoku maile ʻe 29 mei Ketilani, pea naʻe fiemaʻu ʻe Pātilisi ha fakahā pau ange ki he founga ke fakanofonofo ʻaki e Kāingalotu Kolesivilí ʻi he kelekele ʻo Kopelií. Ko e tali ki aí, naʻe fakahoko ʻe he ʻEikí ha ngaahi fakahinohino kia Pātilisi ʻo fakafou ʻia Siosefa Sāmita. ʻOku maʻu ʻa e ngaahi fakahinohino ko ʻení ʻi he taimí ni ʻi he Tokāteline mo e Ngaahi Fuakava 51. Naʻe akoʻi ʻe he ʻEikí ʻa Pātilisi ko e taimi te ne vahevahe ai ʻa e kelekelé ki he Kāingalotu ʻi Kolesivilí, te ne hanga ʻo “vahe ki he Kakaí ni ʻa honau kongá, ko e tangata kotoa pē ke maʻu tatau ʻo fakatatau ki honau fāmilí, ʻo fakatatau ki he ngaahi anga ʻo ʻenau nofó & mo ʻenau ngaahi fiemaʻú.” Neongo naʻe kei maʻu ʻe Pātilisi ha kelekele ʻi Peinisivili pea ʻikai ke ne toe fiemaʻu ha kelekele, ka naʻe talaange ʻi he fakahaá ko e fetongi ʻo ʻene feilaulauʻi ʻene ngāue taimi kakato ko e tokotaha fakatau tataá kae hoko ko ha pīsopé, kuo pau ke ne fakaʻaongaʻi ʻa e ngaahi koloa mei he fale tukuʻanga koloá ke tokoniʻi hono fāmilí.
ʻE lau leva hono moʻui ʻaki ʻa e fono ʻo e fakatapauí ko ha faingamālie. Ka naʻe ʻikai ke pehē ʻa e vakai ia ʻa e taha kotoa. Naʻe ʻikai fuoloa kuo kaniseli ʻe Kopilī ia ʻa ʻene loto ke nofoʻi ʻe he Kāingalotú hono kelekelé pea kapusi ʻa e Kāigalotu Kolesivilí mei hono kelekelé, ʻo ʻikai ke nau toe ʻilo pe te nau oó ki fē. ʻI he ʻaho 10 ʻo Suné, naʻe fakamatala ha fakahā (Tokāteline mo e Ngaahi Fuakava 54 he taimi ní) ki heʻenau hohaʻá ʻi ha founga fakaʻohovale: naʻe ui ai kinautolu ke nau hiki ʻosi ki Mīsuli, naʻe maile ʻe 800 tupu mei ai.
ʻI he meimei taimi tatau naʻe teuteu foki ʻa Siosefa Sāmita, ʻEtuate Pātilisi, mo ha niʻihi kehe ke mavahe ʻi ha fononga ki Mīsuli, ko e feituʻu naʻe fai ʻa e ʻamanaki ke tuʻu ai ʻa e kolo ko Saioné ʻi he kahaʻú. Naʻe mavahe ʻa Pātilisi mo fakakaukau te ne foki mai pē hili ha ngaahi māhina siʻi. Ka ʻi he aʻu atu ʻa e kau faifekaú ki Tauʻatāina, ʻi Mīsulí, ko ha kolo langa foʻou ʻi he feituʻu fakahihifo ʻo e siteití, naʻe maʻu ai ʻe Siosefa Sāmita ha fakahā (ʻoku maʻu ʻi he taimí ni ʻi he Tokāteline mo e Ngaahi Fuakava 57) ʻo fakahaaʻi ai ʻe hoko ʻa Tauʻatāina ko e senitā ia ʻo Saione ʻi ha ʻaho ʻamuí. Naʻe toe maʻu foki ʻi he fakahaá ha fakahinohino fakaofo: “Ko e poto [ia] ke fakatau mai ha kelekele ʻe he kāingalotú & mo e konga kelekele kotoa pē foki ʻoku tuʻu ʻi he fakahihifó, ʻio, ʻo aʻu ki he [kauʻāfonua fakahihifo ʻo Mīsulí,] Kae ʻumaʻá foki mo e kelekele kotoa ʻoku ʻātakaiʻi ʻe he ngaahi Toafá.” Naʻe toe fakahinohino ʻe he ʻEikí ʻo pehē, “Pea tuku ke tuʻu ʻa ʻeku tamaioʻeiki ko ʻEtuate [Pātilisí] ʻi he lakanga kuó u fili ia ki aí, pea vahevahe ki he kāingalotú ʻa honau tofiʻá, ʻo hangē ko ʻeku fekaú.” Naʻe ui leva ʻe he ʻEikí ha niʻihi fakafoʻituitui tokolahi ke nau nofo ʻi Mīsuli ʻo langa hake ʻa Saione. Naʻe kehe foki ʻa e ngaahi palani ia ʻa Pātilisí he naʻe kau ia ʻiate kinautolu ʻe “nofo mo honau ngaahi fāmilí ʻi he Fonua ʻo Saioné ʻi he vave taha ʻe lavá, ke fakahoko ʻa e ngaahi meʻá ni, ʻio ʻo hangē ko ʻeku leá.”
Naʻe fai ʻe Pātilisi ha tohi ki hono uaifi ko Litiá, ʻi ha ngaahi ʻaho siʻi mei ai ʻo fakahā ange ʻa e ongoongo ko iá he ʻikai ke ne foki ange ki ʻOhaiō ʻi he faʻahitaʻu māfana ko iá ka naʻá ne kole ange kia Litia ke fononga ange ia mo ʻena fānau fefine ʻe toko nimá ke nau feʻiloaki ʻi he kauʻāfonua Mīsulí. ʻIkai ngata aí, naʻe ʻikai ke foki ʻa Pātilisi ki ʻOhaiō ke tokoni ke nau hiki mai ʻi he faʻahitaʻu fakatōlau ko iá, kae faitohi pē, “Kuo pau ke u ʻi heni au pe ko Brother Kilipate ke kau ʻi he ngaahi fakatau ʻe fakahoko ʻi Tīsemá & ʻi he taʻemahino pe ʻe lava ke u foki kei taimi maí kuó u pehē ai ʻe fakapotopoto ange ke u nofo pē heni ʻi he taimí ni neongo ʻoku fepaki ia mo e meʻa [naʻá ku] ʻamanaki ki aí.” Naʻá ne toe fakatokanga ange ko e taimi ʻe aʻu mai ai ʻa Litia kiate ia ʻi Mīsulí, “Kuo pau ke tau faingataʻaʻia & ʻe lahi mo e fusimoʻomó ʻi heni ʻa ia ko ha meʻa naʻe ʻikai ke u anga & koe ki ai ʻi ha ngaahi taʻu [lahi].” ʻI heʻene muimui ki he fakahinohino ke na fealeaʻaki mo e ʻEikí, naʻá ne fokotuʻu ange ʻa e founga ʻe lava ai ke ne fakahoko mo ʻena fānau fefiné ʻa e fonongá, mo fokotuʻu ange ke ne fakahoko leva ʻo fakatatau mo ʻene fakakaukau naʻe lelei tahá. Naʻe talangofua mo loto-fiemālie ʻa Litia ki he fakahā ke hikí, ʻo fakamāʻopoʻopo hono ʻapí pea fakatahatahaʻi siʻene fānau ʻe toko nimá ke nau fononga fakahihifo ko ha feituʻu kuo teʻeki ai ke ne sio ai kimuʻa.
Naʻe nofo ʻamanaki Pātilisi ʻi Mīsuli, ki ha tūʻuta vave mai ʻa e Kāingalotu Kolesivilí mo ha niʻihi tokolahi kehe ʻe muimui mai ai, pea muimui leva ʻa Pātilisi ki he fakahinohino ʻa e ʻEikí ke teuteu “ke [vahevahe] ki he kāingalotú honau tofiʻá,” ʻo kamata ke fakatau ha kelekele ʻi loto ʻi he uike ʻe ua mei heʻenau tūʻuta ki Mīsulí. ʻI he taimi naʻe fakanofonofo ai ʻe Pātilisi ʻa e Kāingalotú ki honau kelekelé, naʻá ne muimui ki he ngaahi fakahinohino naʻá ne maʻu ʻi Meé “[ko e taimi] te ne tuʻutuʻuni ai ki ha tangata ʻa hono kongá, ke ne ʻoange kiate ia ha tohi ʻokú ne fakapapauʻi ange ki ai hono kongá.”
ʻI heʻene tali ʻa e fakahā ko ʻení, naʻe paaki ai ʻe Patilisi ha tohi fakapapau naʻe konga ua. ʻI he konga ʻuluakí, naʻá ne lekooti fakalelei ai ʻa e kelekele mo e koloa naʻe hanga ʻe he Kāingalotú fakafoʻituitui pe fāmilí ʻo “tuku ʻi he ʻao ʻo e Pīsopé.” Tānaki atu ki aí, naʻe lekooti fakalelei ʻe Pātilisi ʻa e konga hono ua ʻo e tohi fakapapau ki he kelekelé pe koloa ʻoku tauhi ʻe he mēmipa takitaha—ʻo fakatatau pē ki he meʻa naʻa nau fakatapuí. Naʻe tuku leva ki he mēmipa takitaha ha “Fatongia Tauhi ki heʻene koloá, pe ko ia kuó ne maʻu [mei hono fakatapuí].”
Naʻe hoko ʻa Pātilisi ko e fakafofonga ʻo e ʻEikí ki ha kāingalotu tokolahi naʻa nau fili ke moʻui ʻaki ʻa e fono ʻo e fakatapuí mo tali ʻa e fakaafe ʻa e ʻEikí ke fakahoko ʻa e ngaahi tefitoʻi moʻoni ʻo e ngāue fakatauhí, tauʻatāina ke filí, mo ʻekeʻi meiate kita ʻa e meʻa ʻokú te fai pe ʻikai ke faí. Naʻe mahino pē naʻe ʻikai ke loto ʻa e taha kotoa ke nau moʻui ʻaki ʻa e fonó. Naʻe fakatau pē ʻe ha niʻihi ia honau kelekele ʻiate kinautolu pē. Ko ha niʻihi, naʻe hangē ko Kopilī mo ha tangata ʻe taha ko Peiti, ʻo foaki ha kelekele pe paʻanga pea toe liliu ʻena fakakaukaú ʻo loto ke toe fakafoki mai. Naʻe ui ʻa Pātilisi ke tokoni ki hono hiki hake mo fakalotolahiʻi ʻa e Kāingalotu naʻe fakatoupīkoí pea mo e Kāingalotu naʻa nau tali leleí. Hili hono maʻu ʻo e fono ʻo e fakatapuí, naʻe tohi ʻe Sione Uitemā: “Naʻe ʻaʻahi ʻa Pīsipe ʻEtuate Pātilisi ki he siasí ʻi he fanga kiʻi koló, he naʻe ʻi ai ha niʻihi naʻe ʻikai ke nau fie tali ʻa e Fonó.”
Naʻe manatuʻi kimui ʻe he ʻofefine ʻo Pātilisí ko ʻEmelī Tou Pātilisí ʻa e ngaahi faingataʻa ʻo e ngāue mo e Kāingalotu naʻe ʻikai haohaoá, “ʻI heʻeku vakai atu mo manatuʻi ʻa e fatongia kāfakafa naʻe hilifaki ki heʻeku tangataʻeikí ko e ʻuluaki Pīsopé—ʻa ʻene masivá mo e fusimoʻomó, ʻa e ngaahi tukuakiʻi loi ʻo e kau takí, ʻa e fakamaauʻi ʻo e masivá, pea mo e fakatanga ʻa homau ngaahi filí—ʻoku ʻikai haʻaku toe fifili ki he ʻuhinga ʻo siʻene mate vavé.” Naʻe ʻosi fakatokanga pē ʻa e tāpuaki fakapēteliake ʻo Pātilisí kiate ia, “Te ke fua pē ho fatongiá kae ʻoua kuó ke toki foʻi mo loto ke tukuange koe mei ai ke ke lava ʻo mālōlō ʻi ha kiʻi vahaʻa taimi.”
Makehe mei heʻene fefaʻuhi mo e ngaahi vaivai fakaetangata ʻo e niʻihi kehé, naʻe toe fehangahagai ʻa Pātilisi mo e natula moʻoni ʻo hono tuʻunga hingá. Ko e taimi naʻe fehangahangai ai ʻa Pātilisi mo e pole ʻo hono langa ʻo Saione ʻaki ha ngaahi maʻuʻanga tokoni siʻisiʻí, naʻá ne veiveiua moʻoni pe ʻe lava ʻo ola lelei ʻa e ngāué ni. Ko e talí, naʻe fakatokanga ange ʻa e ʻEikí ki ai, “Ka ʻo kapau ʻe ʻikai te ne fakatomala mei heʻene ngaahi angahalá, ʻa ia ko e taʻetuí & kui ʻo e lotó, tuku ke ne tokanga telia naʻá ne hinga.” Naʻe fakahaaʻi ʻe he tohi ʻa Pātilisi kia Litia ʻi ʻAokosi 1831 ʻa ʻene ongoʻi veiveiua ʻi hono fatongiá. Naʻá ne tohi ʻo pehē, “ʻOkú ke ʻiloʻi pē ʻoku ʻi ai hoku fatongia mahuʻinga, he ʻoku faʻa valokiʻi au & ʻoku ou ongoʻi he taimi ʻe niʻihi ʻo hangē kuo pau ke u hinga, ka ʻe ʻikai tuku ʻa e ngāué, ka ʻoku ou manavasiʻi he ko hoku tuʻungá ʻoku fuʻu māʻolunga ia ʻi he meʻa ʻoku ou lava ʻo fai ke hōifua ki ai ʻeku tamai fakalangí.” Naʻá ne kole fakamātoato ki hono uaifí, “Lotua mai au ke ʻoua te u hinga.”
Hili ha taʻu ʻe ua mei ai, ʻi Siulai 1833, naʻe hū mai ha kau fakamoveuveu loto-ʻita ki he ʻapi ʻo Pātilisí, naʻá ne lolotonga tangutu pē mo hono uaifí mo ʻena kiʻi tamasiʻi kei uike pē ʻe tolú pea naʻe tauhingoa pē ki ai ko ʻEtuate Pātillisi ko e Siʻí. Naʻa nau toho ia ki he loto kolo ʻo Tauʻatāiná ʻo nau haha ia mo vali ʻaki ʻa e valitā vela mo e fulufuluʻi moa. Hili ha ʻaho ʻe tolu, naʻe ʻalu taʻe manavahē ʻa Pātilisi mo ha kau tangata kehe ʻe toko nima ʻo loto ke foaki ʻenau moʻuí ko ha totongi huhuʻi ki he toenga ʻo e Kāingalotú, ʻi ha feinga ke taʻofi hano toe fakamamahiʻi ʻo e Kāingalotú. Naʻe ʻikai ke tali ʻenau kolé, pea naʻe fakamālohiʻi ai ʻa e kau tangatá ke nau loto ke mavahe mei he Vahefonua Siakisoní. Hili ha ngaahi uike siʻi mei ai, naʻe tohi ʻa Pātilisi ki hono ngaahi kaungāmeʻa ʻi ʻOhaioó, “ʻOku ou ongoʻi loto-fiemālie ke fakaʻaongaʻi e toenga ʻeku moʻuí ʻi he ngāue ʻa hoku ʻEiki monūʻiá.”
Naʻe hanga ʻe he ngaahi fakahā ʻi hono ui ʻa Pātilisi ko e pīsopé mo fakamatalaʻi hono ngaahi fatongia ʻi he lakanga ko iá ʻo fakafōtunga ʻa e toenga ʻo ʻene moʻuí. Naʻá ne kei hoko atu pē ko e pīsope ʻi he taimi naʻe ʻi Mīsuli ai ʻa e Kāingalotú pea aʻu ki he vahaʻa taimi ʻo ʻenau ʻi ʻIlinoisí. Lolotonga ʻa e langa ha ʻapi maʻa hono fāmilí ʻi he faʻahitaʻu failau ʻo e 1840, naʻe puke ʻa Pātilisi. Naʻá ne mālōlō ʻi he ʻaho 27 ʻo Mē 1840, kae kei moʻui pē hono uaifí mo e fānau ʻe toko nima naʻe ʻi he taʻu 6 ki he 20.
Ko e taimi naʻe ui ai ʻa Pātilisi ko e pīsopé, naʻe fakamatalaʻi ia ʻe he ʻEikí ko ha taha ʻoku “maʻa hono lotó ʻi hoku ʻaó, he ʻokú ne tatau mo Nātaniela ʻo e kuonga muʻá, ʻa ia ʻoku ʻikai ke ʻiate ia ha kākā.” Naʻe fakamatalaʻi ʻe Tēvita Petikulū ko ha mēmipa ʻi he kamata mai ʻa e Siasí ʻo pehē ko Pātilisí “ko ha tangata anga fakamatāpule moʻoni, ʻi heʻene maʻu ʻa e Lakanga Māʻolunga ko iá, ʻaki ʻa e ngeia lahi, pea hangē ko hono fakamatalaʻi ʻe he Fuakava Foʻoú, ko ha tangata ʻoku ui ki he Lakanga ʻo e Pīsopé, ʻoku totonu ke ne fotu fakamātoato, mo faʻa fakaukaukau, ka ke angalelei mo fotungofua, pea naʻe pehē pē foki mo hono fāmilí.” Naʻe tohi ʻa W. W. Felipisi ʻo kau kia Pātilisi ʻo pehē ko ha “toko siʻi pē te nau lava ʻo tui hono pulupulú mo ha faʻahinga anga fakaʻeiʻeiki pehē. Ko ha tangata faitotonu, pea naʻá ku ʻofeina ia.” Hili ha māhina ʻe valu mei he pekia ʻa Pātilisí, naʻe fakahā ʻe he ʻEikí ko e ʻuluaki pīsope faivelenga ʻo e Siasi kuo fakafoki maí, ʻokú ne ʻiate Ia.