“Ko e Ngaahi Tokoni ʻa Māteni Hālisí,” Puipuituʻa ʻo e Ngaahi Fakahaá (2016)
“Ko e Ngaahi Tokoni ʻa Māteni Hālisí,” Puipuituʻa ʻo e Ngaahi Fakahaá
Ko e Ngaahi Tokoni ʻa Māteni Hālisí
ʻI he 1827, naʻe aʻu ʻa Māteni Hālisi ki ha tuʻunga moʻui fakafiemālie ʻi Palemaila, ʻi Niu ʻIoke. ʻI he ngaahi taʻu ʻe 14, naʻá ne maʻu ha ʻeka ʻe 320 ʻo e kelekele faama, naʻá ne ngaohi kinautolu ke maʻu ai haʻane tupu ʻi heʻene ngāue mālohí mo e ngaahi fakakaukau fakaeonopōní, peá ne langa haʻane fuʻu ʻapi fakaʻofoʻofa. Naʻe mali mo Lusi Hālisi ʻi he 1808, pea naʻe ʻi ai haʻana fānau ʻe toko nima, ko hanau toko tolu naʻe moʻui ʻo hoko ko ha kakai lalahi. Naʻe ʻikai ke taʻe-fakatokangaʻi ʻe he ngaahi kaungāʻapi ʻo Mātení ʻa hono talēnití mo ʻene tuʻumālié, he naʻa nau fakakaukau ko ha taha “moʻumoʻua, taha faama ngāue mālohi, poto ʻi he fikaʻi ʻo ʻene pisinisí, fakapotopoto ʻi heʻene tōʻongá, pea … mo ha tangata tuʻumālie ʻi māmani.”
Kuo taʻu 45 ʻeni mo fiefia ʻi he fua ʻo ʻene ngāué mo e fakaʻapaʻapa ʻa hono kaungā ngāué, pea fakakaukau leva ʻa Māteni ke totongi ha taha ke ne tokangaʻi ʻene fāmá ʻi ha ngaahi māhina kae lava ʻo kiʻi ʻeveʻeva. Ka ʻi he kamata pē ke ne fakakaukauʻi ʻa e fononga ko ʻení, naʻe ʻaʻahi mai ʻa Lusi Meki Sāmita ki ai, ʻo ne fakamatalaʻi ange ha ngaahi ongoongo mālie.
Naʻe ʻosi meimei ke ʻiloʻi kotoa ʻe Māteni Hālisi ia ʻa e talanoá: Naʻe hā ha ʻāngelo kia Siosefa Sāmita, ʻo fakahā kiate ia ʻoku ʻi ai ha lekooti ʻi ha ʻū lauʻi peleti ukamea fakakuonga muʻa naʻe tanu ʻi ha kiʻi moʻunga ofi ki hono ʻapí. ʻI ha taʻu ʻe tolu, naʻe fakaongoongo ai ʻa Siosefa mo tatali.
Kuo haʻu ʻeni ʻa Lusi Sāmita ke talaange kia Māteni kuo fāifai pea maʻu ʻe heʻene tamasiʻí ʻa e ʻū lauʻi peletí mei he ʻāngeló pea ʻokú ne taumuʻa ke liliu kinautolu. Naʻe ʻikai ke ʻi ha tuʻunga ʻa Siosefa mo hono fāmilí ke totongi ʻa e pulusi ʻo e liliú, ka naʻe lava ia ʻe Māteni. Naʻe kole ai ʻe Lusi Meki Sāmita kia Māteni pe ʻe lava ʻo ʻeva mai kia Siosefa. Naʻe loto ki ai ʻa Māteni, pea vili ai hono uaifi ko Lusi Hālisí ʻoku totonu ke haʻu mo ia.
ʻOku ngalingali naʻe lau pē ʻe Siosefa Sāmita ko Māteni Hālisí ko hano kaumeʻa. Naʻá ne ʻosi fakamatala kimuʻa kia Māteni kau ki he ngaahi ʻaʻahi mai ʻa e ʻāngeló kiate iá pea mo e ʻi ai ha ʻū lauʻi peletí. ʻOku mahino naʻe fetongi ʻe Māteni ʻa ʻene anga fakakaumeʻá; he naʻá ne totongi ia ko ha taha ngāue lauʻaho ʻi heʻene fāmá mo ʻilo ko ha taha falalaʻanga ia.
Ka ʻoku mahalo pē naʻe ʻi ai ha ngaahi veiveiua ʻa Māteni. Naʻá ne toki talaange kimui ki ha tokotaha fai ʻinitaviu ko e taimi naʻá ne fuofua fanongo ai ki he talanoa fekauʻaki mo e ʻū lauʻi peletí, naʻe fakakaukau pē ia ko hano maʻu pē ʻe Siosefa mo hono ngaahi kaungāmeʻa kumi paʻangá ha tikatele palasa motuʻa. Neongo ia, ko ha tangata lotu ʻa Māteni. Naʻe aʻu ʻo fakakaukau ha niʻihi ʻoku laulaunoa ʻene ngaahi fakakaukaú, mo ʻikai mahuʻinga pea ui ia ko ha “vale fie mata meʻa-hā-mai.” Mahalo ko ʻene tui tauʻatāina ki he hoko ʻa e meʻa ʻoku ʻikai fakanatulá ʻi he moʻui fakaʻahó naʻe lava ai ke ne tali ʻa e ngaahi talanoa ʻa Siosefá. Naʻe fai pau ʻa Lusi Hālisi ki heʻene palōmesi ke ʻaʻahi kia Siosefá, pea aʻu ʻo ne loto ke ne tokoni ke fakapaʻanga ʻa e liliu ʻo e ʻū lauʻi peletí. Neongo ia, naʻe kei fakatoupīkoi ʻa Māteni, mahalo ko haʻane fiemaʻu ha taimi ke ne fakakaukauʻi ai.
ʻI he lolotonga ʻo e faʻahitaʻu fakatōlaú mo e konga kimuʻa ʻo e faʻahitaʻu momokó, naʻe feinga tuʻo lahi ha ngaahi kaungāʻapi loto-tāufehiʻa ke kaihaʻasi ʻa e ʻū lauʻi peletí meia Siosefa. ʻI he tūkunga pelepelengesi ko ʻení, naʻe fakakaukau ai ke hiki mo hono uaifi ko ʻEmá, ki he ʻapi ʻo ʻene [ʻEma] ongomātuʻá ʻi Hāmoni, ʻi Penisilivēniá. ʻOku tatau ai pē pe ko e hā ʻa e tupuʻanga ʻo e fakatoupīkoi ʻa Māteni kimuʻá, naʻe fakaiku ʻo ne loto ke tokoni kia Siosefa. Naʻe feʻiloaki mo ia ʻi ha fale talifononga ʻi Palemaila, peá ne ʻoange ha $50 siliva, mo pehē ange, “ʻOku ou ʻoatu [ʻeni] kiate koe ke fai ʻaki e ngāue ʻa e ʻEikí.” Ko e taimi naʻe vili ai ʻa Siosefa ke ʻai pē ko ha noó, naʻe toe fakapapauʻi ange ʻe Māteni ʻa ʻene loto ke foaki tauʻatāina ki he ngāué.
ʻI he taimi ko ʻení, naʻe kamata ke fakaveiveiua ʻa Lusi Hālisi ʻi he talanoa ʻa Siosefá, ʻo mahalo koeʻuhí ko ʻene kei vilitaki ke ʻoua naʻa fai ha sio ki he ʻū lauʻi peletí. Naʻe hanga ʻe he fakamahamahalo ko ʻení ʻo ʻai ia [Lusi] ke ne fehiʻa ʻi he fakalalahi ʻo e tokanga mo e feohi ʻa Māteni mo Siosefá. Naʻe ʻosi tamele pē ʻa e vā ia ʻo Māteni mo hono uaifí, pea toe fakatupu ʻe heʻene [Māteni] poupouʻi ʻa Siosefa Sāmitá ke na toe vāmamaʻo ange.
“ʻE ʻIkai Te U Lava ʻo Lau ha Tohi Kuo Fakamaʻu”
Hili ha taimi nounou mei he tūʻuta atu ʻa e fāmili Sāmitá ki Hāmoní, naʻe ʻaʻahi hake ʻa Māteni kiate kinaua ʻo fakahaaʻi ʻene loto ke tokoni kia Siosefá. Naʻá ne fokotuʻu ange ke ne fononga ki he hahaké ki Niu ʻIoke Siti mo ha tatau ʻo e ngaahi mataʻitohi mei he ʻū lauʻi peletí ke fakaʻaliʻali ki ha kau ako mataotao. Mahalo naʻá ne fiemaʻu ha ngaahi fakapapauʻi makehe ki he moʻoni ʻo e ʻū lauʻi peletí, pe naʻe fakakaukau ʻe tokoni ha fakamoʻoni mei ai ke nau lava ʻo nō ha paʻanga ke pulusi ʻa e liliú. Neongo pe ko e hā, ka naʻá ne vivili naʻe ueʻi ia ʻe he ʻEikí ke ne fakahoko ʻa e fonongá.
“ʻI he taimi ko ʻení, naʻe ʻikai ke fuʻu ʻilo lahi ʻa Siosefa pe ko Māteni ki he lea fakafonua ʻi he ʻū lauʻi peletí. Naʻe ngata pē ʻena ʻiló ʻi he meʻa naʻe fakahā ʻe he ʻāngelo ko Molonaí kia Siosefá: ko ha lekooti faka-ʻAmelika ia ʻi he kuongamuʻá. ʻI heʻene peheé, naʻe ʻikai ke ne kumi ha taha poto ʻi he lea faka-ʻIsipité (ka naʻe toki ʻilo kimui ʻe Siosefa ko e lea fakafonua ʻi he ʻū lauʻi peletí naʻe ui ko e “lea faka-ʻIsipite foʻou”), ka naʻe ʻalu ʻa Māteni ia ki ha kau poto kehekehe he naʻe mahuʻingaʻia ia ʻi he ngaahi meʻa fakakuongamuʻá, tautautefito ki he ngaahi koloa ʻAmelika motuʻá.
Naʻá ne mavahe ʻi Fēpueli 1828, ʻo huʻu ki Niu ʻIoke Siti, naʻá ne afe ʻi ʻAlapanī ke ʻaʻahi kia Lūtelo Palātisi—ko ha taha naʻe nofo kimuʻa ʻi Palemaila pea ko ha kaungāmeʻa foki ia ʻo e fāmilí naʻe faʻa fefolauʻaki holo ʻi he Hahake Ofí mo ʻIsipite. Naʻe kolea ʻe Mātini ʻene fakakaukau fekauʻaki mo ha taha ke ʻalu ki ai fekauʻaki mo e liliú pea toki hoko atu ki Niu ʻIoke, ke talanoa mo Samuela L. Mitiseli, ko ha taukei ʻi he leá mo e taha ʻo e kau poto tuʻukimuʻa ʻi he anga fakafonua ʻAmelika he kuongamuʻá. Hili ʻene vakavakaiʻi ʻa e ngaahi mataʻitohí, ʻoku mahino naʻe fekau ʻe Mitiseli ʻa Māteni ke ʻalu kia Sālesi ʻAnitoni, ko ha palōfesa kei talavou ʻi he kalamá mo e leá ʻi he ʻUnivēsiti Kolomupiá. Naʻe tānaki ʻe ʻAnitoni ʻa e ngaahi talanoa mo ha ngaahi lea ʻa e Kau ʻInitia ʻAmeliká ke pulusi pea naʻe vēkeveke ke ne vakaiʻi ʻa e tohi naʻe haʻu mo Mātení.
Naʻe pehē ʻe Māteni naʻe fakahā ʻe ʻAnitoni ʻoku moʻoni ʻa e ngaahi mataʻitohí kae tālunga ʻene ʻilo ʻa e founga naʻe maʻu ai ʻe Siosefa Sāmita kinautolú. Naʻá ne fokotuʻu ange ke ʻomi ʻe Māteni ʻa e ʻū lauʻi peletí kiate ia. Naʻe ʻikai ke tali ʻeni ʻe Māteni, pea talaange leva ʻe ʻAnitoni, ʻo ne toe fakaleaʻi ha veesi mei he tohi ʻa ʻĪsaiá, “ʻOku ʻikai ke u lava ʻo lau ha tohi kuo fakamaʻu.” Neongo naʻe fakaʻikaiʻi kimui ʻe ʻAnitoni ʻa e fakaikiiki ʻo e fakamatala ʻa Māteni ki heʻena talanoá, ka ʻoku tau ʻiloʻi ʻeni: Naʻe foki mai ʻa Māteni mei heʻenau talanoa mo e kau poto ʻo e hahaké kuó ne fakapapauʻi lahi ange ʻi ha toe taimi, ko Siosefa Sāmitá naʻe ui ʻe he ʻOtuá pea ko e ʻū lauʻi peletí mo e ngaahi mataʻitohí naʻe fakakuonga muʻa ia. Naʻá na lau ʻa e ʻaʻahi ko ʻeni kia ʻAnitoní ko hano fakahoko ia ʻo e kikite ʻa ʻĪsaiá (ʻoku toe fakamatala pē ʻi he Tohi ʻa Molomoná) ki ha “tohi kuo [fakamaʻu], ʻoku ʻoange ʻe ha tangata ki ha toko taha ʻoku poto, ʻo pehē, ʻOku ou kole kiate koe, ke ke lau ʻa e meʻá ni, pea ʻokú ne pehē, ʻOku ʻikai te u faʻa fai ia he kuo [fakamaʻu] ia.”
“Ke Taʻofi e Lau ʻa e Kau Valé”
ʻI he lolotonga ʻo e faʻahitaʻu failaú mo e kamata ʻa e faʻahitaʻu māfana ʻo e 1828, naʻe tohi ʻa Māteni kae lau ange ʻe he tangata kikite kei talavoú ʻa e liliú. Neongo naʻe ngali fakaofo kiate ia ʻa e ngāué, ka naʻe kei tokanga pē ʻa Māteni ke maluʻi ia mei hano kākaaʻi. Naʻá ne fetongi ʻi ha taimi ʻe taha ʻa e foʻi maka kikite ʻa Siosefá ʻaki ha foʻi maka kehe ke sio pe ʻe fakatokangaʻi ʻe Siosefa ʻa e faikehekehé. Ko e taimi naʻe ʻikai ke lava ai ʻa Siosefa ʻo hoko atu ʻa e liliú, naʻe toki vetehia leva ʻe Māteni ʻa ʻene kākaá pea fakafoki ʻa e foʻi maka kikité. Ko e taimi naʻe fehuʻi ange ai ʻe Siosefa pe ko e hā naʻá ne fai ai iá, naʻe fakamatalaʻi ange ʻe Māteni naʻá ne fiemaʻu ke “taʻofi e lau ʻa e kau valé, ʻa ia naʻa nau talaange ki ai naʻe ʻosi ako maʻuloto ʻe he Palōfitá ʻa e ngaahi sētesi ko iá pea ko ʻene toe lau ange pē kinautolu.”
Neongo naʻe aʻu ʻo tui moʻoni ʻa Māteni, ka naʻe liliu hono uaifí ʻo fakafepaki ʻaupito. Naʻe mahino ʻaupito ʻa e ʻuhinga ʻo e hohaʻa lahi ʻa Lusi Hālisí, telia naʻa fakahoko ʻe Māteni ha meʻa fakatuʻutāmaki fakapaʻanga ke tokoni ʻi he pulusi ʻo e tohí, pea naʻa manukiʻi ʻe hono ngaahi mahení ʻa e kau hono husepānití ʻi he meʻa naʻa nau fakakaukau ko ha faʻufaʻu kākā, pea kuo ʻikai toe tokanga ai ʻa Māteni ki he anga hono lotó tuʻunga ʻi heʻene ngaahi fakakaukaú. Naʻe toe fakamamahi foki ki ai hono fakafepakiʻi ia ʻe Siosefa ʻi heʻene feinga kotoa pē ke sio ki he ʻū lauʻi peletí, pea naʻá ne fakakinaʻi lahi ai ʻa Māteni ke ne fakahaaʻi ange ha fakamoʻoni ʻoku lava ʻa Siosefa ʻo fai ʻa e liliú.
Ke holoki e hohaʻa ʻa Lusí, naʻe kole ai ʻe Māteni kia Siosefa ke ne “fehuʻi ki he ʻEikí ʻi he ʻŪlimí mo e Tūmemí” pe te ne [Māteni] lava ʻo “ʻave ʻa e ngaahi meʻa naʻe liliú ki hono ʻapí ʻo fakaʻaliʻali kinautolu” ki hono uaifí mo ha niʻihi kehe. Naʻe loto ʻa Siosefa ke fakafiemālieʻi ʻa Māteni koeʻuhí ko ʻene anga fakakaungāmeʻa ange kiate ia “ʻi he taimi naʻe hangē ai ʻoku ʻikai ha kaungāmeʻa ʻi māmani ke poupouʻi mo kaungāongoʻi mo iá.”
Naʻe fai ʻe Siosefa ʻa e fehuʻí maʻa hono kaungāmeʻá. Naʻe pehē ʻe Siosefa, “Ko e talí kuo pau ke ʻoua naʻa ʻalu mo ia. Naʻe ʻikai ke fiemālie ʻa [Māteni] ʻi he tali ko ʻení, peá ne loto ke u toe fehuʻi. Naʻá ku fai ia, pea naʻe tatau pē ʻa e talí mo ia ʻi muʻá. Ka naʻe ʻikai pē ke ne fiemālie, kae vili taʻeʻunua pē ke u toe fehuʻi fakaʻosi. Hili haʻane ngaahi kole lahi, naʻá ku toe fehuʻi leva ki he ʻEikí, pea naʻe ʻomai ha ngofua ke ʻalu mo ia ʻi ha ngaahi makatuʻunga pau.” Naʻe fiemaʻu ke fakaʻaliʻali pē ʻe Māteni ʻa e ʻū laʻipeesi kuo liliú ki hono uaifí, ongomātuʻá, tokouá, mo e tuofefine ʻi he fonó.
Naʻe foki fiefia lahi ʻa Māteni ki hono ʻapí mo e ʻū laʻipeesi naʻe hikí ʻo fakaʻaliʻali kinautolu ki hono uaifí. Neongo ia, ka naʻe ʻikai ke ne tokangaʻi ʻa e tatau mahuʻingá ni ʻo fakatatau ki he fekau naʻe fai kiate iá, pea ʻikai fuoloa kuo mole ia. Ko e founga pau naʻe mole aí ʻoku fakamahamahaloʻi pē. Ko ha talanoa ʻe taha naʻe faʻa sasalá tokua naʻe toʻo ʻe Lusi ʻa e ʻū laʻipēsí mei he tesi ʻa Mātení ʻo tutu, neongo naʻá ne fakaʻikaiʻi haʻane kaunga ki heʻenau puliá. Naʻe mahaloʻi ʻe ha niʻihi, ʻo kau ai ʻa Siosefa Sāmita naʻe kau fakapulipuli ki heni ʻa Lusi Hālisi pe mahalo mo ha niʻihi kehe.
Naʻe feinga ʻa Māteni ʻi he tafaʻaki kotoa pē ke toe maʻu ʻa e ʻū laʻipēsí, mo manavahē ʻi he fakakaukau ke ne fakahā kia Siosefa ʻa e meʻa kuo hokó. Naʻe aʻu ʻo ne “hae ʻa e ʻū mohengá mo e piló” ka naʻe ʻikai pē hano ola. Ko e taimi naʻe haʻu ai ʻa Siosefa ki he ʻapi ʻo ʻene ongomātuʻá ʻi he hili ha ngaahi uiké, mo vēkeveke ke maʻu ha ongoongó, naʻe luelue māmālie mo fakatoupīkoi atu ʻa Māteni ʻi ha maile ʻe tolu ki he ʻapi ʻo e fāmili Sāmitá ʻi Manisesitaá. ʻI heʻene fakaofi atú, naʻá ne luelue “māmālie ʻaupito ki he falé, kae sio fakamamaʻu pē hono fofongá ki he kelekelé. Ko e taimi naʻá ne aʻu mai ai ki he matapā ʻo e ʻaá, naʻe ʻikai ke ne fakaava ia kae kaka ki he funga ʻaá ʻo tangutu fuoloa ai kae fakapuliki hono matá ʻaki hono tataá.”
Naʻe fāifai peá ne toki hū atu, pea ʻikai ke ne fie kai ʻa e meʻakai efiafi naʻa nau teuteu maʻaná, naʻe ʻikai fuoloa kuó ne “puke hono ongo nimá ʻaki hono ongo tafaʻaki ʻulú mo kalanga ʻi ha leʻo mamahi, ‘ʻOiauē! Kuo mole hoku laumālié!’” Naʻe mahino leva kia Siosefa ʻi he taimi ko iá ʻa e meʻa kuo hokó. Naʻá ne vili ke toe foki ʻa Māteni ʻo fakasio ʻa e ʻū laʻipeesi kuo liliú, ka naʻe fakapapauʻi ange pē ʻe Māteni he ʻikai pē ke toe felave ka fai hano kumi.
ʻI he ongosia mo loto-foʻi ʻa Siosefá, naʻá ne foki ki Hāmoni peá ne kiʻi luelue siʻi atu mei hono ʻapí, ʻo lotua ha ʻaloʻofa. Naʻe hā mai ʻa e ʻāngeló ʻo toe ʻoange kia Siosefa ʻa e ʻŪlimí mo e Tūmemí, pe ongo meʻa liliu, naʻe ʻuluaki maʻu kimuʻa ʻe Siosefa fakataha mo e ʻū lauʻi peletí ka naʻe toʻo koeʻuhí ko ʻene “[fakakinaʻi] ʻa e ʻEikí ʻi heʻene toutou kole pe ʻe lava ke ʻalu ʻa Māteni Hālisi mo e ʻū laʻipēsí.” Naʻe maʻu ʻe Siosefa ʻa e ngaahi fuofua fakahaá ʻi hono fakaʻaongaʻi ʻo e ʻŪlimí mo e Tūmemí, pea ʻoku kei maʻu pē hano tatau.
Naʻe hanga ʻe he fakahā ʻoku ʻiloa he taimí ni ko e Tokāteline mo e Ngaahi Fuakava 3, ʻo valokiʻi ʻa Siosefa: “Hono ʻikai tuʻo lahi ʻa hoʻo maumauʻi ʻa e ngaahi fekau mo e ngaahi fono ʻa e ʻOtuá, pea mo hoʻo fakavaivaiʻi koe ki he ngaahi fakalotoʻi ʻa e tangatá he vakai naʻe ʻikai totonu ke ke manavahē ki he tangatá ʻo lahi ange ʻi he ʻOtuá.” Neongo ia, ka naʻe ʻomi ʻe he fakahaá ha ʻamanaki lelei: “Manatu ʻoku ʻaloʻofa ʻa e ʻOtuá. Ko ia, fakatomala mei he meʻa kuó ke faí ʻa ia ʻoku fepaki mo e fekau naʻá ku fai kiate koé, pea ʻoku kei fili pē koe, pea ʻoku toe ui koe ki he ngāué.”
“Te U Toki Tuku Kiate Ia Ke Ne Mamata”
Naʻe nofo ʻa Māteni Hālisi ʻi hono ʻapí ʻi Palemaila ʻo lau māhina, mo loto-mafasia ʻi he mole ʻa e ʻū laʻipēsí. Naʻá ne toe fuʻu loto-mamahi foki ʻi heʻene ʻiloʻi naʻe feinga ʻa hono uaifí mo ha niʻihi kehe ke maumauʻi e ongoongo ʻo Siosefa Sāmitá mo tala ko ha taha kākā ia naʻá ne feinga ke maʻu e paʻanga ʻa Mātení. ʻI heʻene fakaʻānaua ke fai ha fakalelei mo mafasia ʻi he ngaahi ongoongo fekauʻaki mo e ngaahi meʻa fakatupu moveuveu ko ʻení, naʻá ne ʻalu ai kia Siosefa Sāmita ʻi Hāmoni ʻi Māʻasi 1829.
Naʻe fiefia ʻa Māteni, he kuo fakamolemoleʻi ʻa Siosefa, pea naʻá ne teuteu ke hoko atu ʻa e liliú. Naʻe toe kole leva ʻe Māteni kia Siosefa ha faingamālie ke mamata ki he ʻū lauʻi peletí. Naʻá ne fiemaʻu ha fakamoʻoni pau ʻoku “maʻu ʻe Siosefa ʻa e ngaahi meʻa ʻa ia naʻá ne fakamoʻoni naʻá ne maʻú,” mahalo ke taʻofi ʻaki ʻene kei veiveiuá pea mo tokoni ke ne fakalotoʻi ʻa Lusi. Naʻe maʻu ʻe Siosefa ha fakahā moʻo Māteni, ʻoku maʻu he ʻahó ni ʻi he Tokāteline mo e Ngaahi Fuakava 5. Naʻe fakahā ai ʻe he ʻEikí ʻe ui ha kau fakamoʻoni ʻe toko tolu ke nau mamata mo fakamoʻoniʻi ʻa e ʻū lauʻi peletí. Naʻe fiefia ʻa Māteni, he naʻe palōmesi ange ʻa e ʻEikí kiate ia “kapau te ne ʻalu atu & punou hifo ʻi hoku ʻaó & fakavaivaiʻi ia ʻi he fuʻu lotu lahi & tui, ʻi he fakamoʻomoʻoni ʻo hono lotó te u toki tuku kiate ia ke ne mamata ki he ngaahi meʻa ʻokú ne holi ki aí.” Naʻe toe fakamahino foki ʻe he fakahaá ʻe fakamoʻoniʻi ʻa e moʻoni ʻo e tohí ʻe hono pōpoakí kae ʻikai ko e ʻū lauʻi peletí, pea ʻe tokolahi ha kakai he ʻikai ke nau tui neongo ai pē kapau ʻe hanga ʻe Siosefa Sāmita ʻo “fakahā kiate kinautolu ʻa e ngaahi meʻa kotoa pē.”
Naʻe toe kamata fakamātoato ʻa e ngāue ki he liliú ʻi he ʻaho 5 ʻo ʻEpeleli 1829, ʻi he taimi naʻe toki tūʻuta foʻou atu ai ʻa ʻŌliva Kautele ʻo fua ʻa e fatongia ko e tangata tohí. Naʻe hoko atu ʻa Siosefa mo ʻŌliva ʻi he meʻa naʻe ngata ai kimuʻa ʻa Siosefa mo Mātení, ʻo ofi ki he kamataʻanga ʻo e tohi ʻa Mōsaiá. Kae ʻi Meé, ʻi heʻena meimei aʻu ki he ngataʻanga ʻo e Tohi ʻa Molomoná ʻo hangē ko ia ʻoku tau maʻu he taimi ní, naʻá na fifili pe ʻoku totonu nai ke na toe liliu ʻa e konga naʻe molé. Ke tali ʻa e fehuʻi ko ʻení, naʻe ʻoange ʻe he ʻEikí kia Siosefa Sāmita ha fakahā ʻe taha, ʻoku maʻu he taimí ni ʻi he Tokāteline mo e Ngaahi Fuakava 10. Naʻe fakamahino ʻe he fakahaá ʻa e meʻa naʻe tailiili ki ai ʻa Siosefa ko ha faʻufaʻu kākaá: “Vakai, kuo fakahū ia ʻe Sētane ki honau lotó ke nau liliu ʻa e ngaahi lea ʻa ia kuó ke pule ke tohí.” Neongo ia, ka naʻe fakapapauʻi ange ʻe he ʻEikí kia Siosefa kuó Ne ʻosi teuteu fuoloa mai ha founga ke fakaleleiʻi ʻaki. Naʻe fekauʻi ʻa Siosefa ke ʻoua te ne toe liliu ʻa e konga naʻe molé kae fetongi ʻaki ia hano liliu ʻo e “ngaahi peleti ʻa Nīfaí,” ʻa ia ʻoku fakamatala ki ha vahaʻataimi tatau. Ko ia ai, ʻe hanga ʻe he ʻEikí ʻo veuveuki ʻa e ngaahi palani ʻa e kau faʻufaʻu kākaá mo fakahoko e ngaahi lotu ʻa e kau tauhi lekooti ʻo e kau Nīfaí he kuongamuʻá, ʻa ia naʻa nau fakaʻamua ke “ʻomai ʻa e ngaahi tohí ni ki he kakai [ko ʻení].”
“Kuo Mamata Tonu Hoku Matá”
ʻI he fakaofiofi ke kakato ʻa e liliú, naʻe kole fakataha ʻe Māteni, ʻŌliva Kautele mo Tēvita Uitemā kia Siosefa ʻa e faingamalie ke nau hoko ko e kau fakamoʻoni ki he ʻū lauʻi peletí, naʻe palōmesí. Naʻe toe fehuʻi ʻe Siosefa pea maʻu ai ʻa e fakahā ʻoku maʻu he taimí ni ʻi he Tokāteline mo e Ngaahi Fuakava 17, ʻo palōmesi ange ki he kau tangatá takitaha te nau siotonu ʻi he ʻū lauʻi peletí kapau te nau “falala ki heʻeku leá” ʻaki “ʻa e loto-fakamātoato moʻoni.”
ʻOku ʻikai ha toe veiveiua naʻe fiefia ʻaupito ʻa Māteni Hālisi ʻi he mahino te ne lava ʻo mamata ki he ʻū lauʻi peletí, ka ʻi Sune ʻo e 1829, ʻi he feinga ʻa e kau tangata ʻe toko tolú ke lotu mo lava ʻo mamata ki he ʻū lauʻi peletí mei he ʻāngeló, naʻe ʻikai ke nau lava ʻi he kamataʻangá. Naʻe manavasiʻi ʻa Mātení “naʻa ʻoku tupunga ʻa e ʻikai ke maʻu ʻa e meʻa naʻa mau fakaʻamu ki aí mei heʻene ʻi aí.” Naʻe mavahe leva ʻa [Māteni], pea hili pē ha kiʻi taimi nounou kuo hā mai ʻa e ʻāngeló ʻo fakahā kia Uitemā mo Kautele ʻa e ʻū lauʻi peletí. Naʻe kumi ʻe Siosefa ʻa Māteni ʻo maʻu atu ki ha feituʻu naʻe kiʻi mamaʻo atu. Naʻá ne lotu pē ʻiate ia, pea toki kau atu ʻa Siosefa mo ia. Naʻe ʻikai fuoloa kuó ne maʻu ʻa e fakahā kuó ne fakaʻamua fuoloá. Hili ʻene mamata tonu ki he ʻū lauʻi peletí, naʻá ne kaila, “Kuo feʻunga, kuo feʻunga he kuo mamata tonu hoku matá, kuo mamata tonu hoku matá.”
“ʻOua Naʻá ke Mānumanu ki Hoʻo Koloa ʻAʻaú”
ʻI hono fakaivia ʻa Māteni ʻe he aʻusia fakaofo mo e tui moʻoní, naʻá ne toe tukupā leva ke ne fai ha tokoni fakapaʻanga ki hono pulusi ʻo e Tohi ʻa Molomoná. Naʻe ʻosi fakatalanoa ʻa Siosefa Sāmita ki ha kau faipaaki tokolahi ʻi Palemaila mo Losesitā, ʻi Niu ʻIoke. Naʻá ne fakaʻamu ke ne lava ʻo fakalotoʻi ʻa ʻEkipeti B. Kalanitini ʻo Palemailá ke ne paaki ʻa e tohí, pea naʻe hoko atu heni ʻe Māteni mo Kalanitini ʻa e aleá. Ko e mahuʻinga ʻa Kalanitiní ko e $3,000 ki he paaki mātuʻaki mata lalahi ʻo ha tatau ʻe 5,000, ka he ʻikai te ne fakatau mai ʻa e taipé pe kamata ʻa e pākí kae ʻoua kuo “palōmesi ange [ʻe Siosefa mo Māteni] ke maluʻi ʻa e totongi hono pākí.” Naʻe pau ai ke momoi ʻe Māteni ʻa e meimei kotoa ʻo ʻene koloa naʻá ne maʻu ha totonu fakalao ki aí.
Ne fakaeʻa ʻe he momeniti ʻo e fili ko ʻení ʻa e lahi ʻo e falala ʻa Māteni Hālisi kia Siosefa Sāmitá mo ʻene tui ki he Tohi ʻa Molomoná. ʻI he fiemaʻu fakahinohino ʻa Mātení, naʻá ne talanoa ai mo Siosefa, ʻo maʻu ai ʻe Siosefa ha toe fakahā ʻe taha. ʻOku ʻiloa he ʻahó ni ko e Tokāteline mo e Ngaahi Fuakava 19, pea naʻe naʻinaʻi ʻa e fakahaá kia Māteni, “ʻOua naʻá ke mānumanu ki hoʻo koloa ʻaʻaú, kae foaki loto-fiemālie ia ki hono paaki ʻo e Tohi ʻa Molomoná.” ʻI he ʻaho 25 ʻo ʻAokosi 1829, naʻá ne tuku nō ai hono kelekelé kia Kalanitini ko e totongi ʻo e pulusí. Naʻe fakatumutumu hono ngaahi kaungāʻapí ʻi he fie “liʻaki [ʻe honau kaungāmeʻa fakapotopotó] ʻa e taha ʻo e ngaahi faama lelei taha ʻi honau feituʻú” ke maluʻi ʻa e pulusí.
Ko hono moʻoní, naʻe ʻamanaki ʻa Māteni ke toe maʻu ʻene faama naʻe tuku noó ʻaki hano fakatau atu ʻa e ʻū tatau ʻo e Tohi ʻa Molomoná. ʻI Sānualí, naʻe fakamoʻoni hingoa ai ʻa Siosefa Sāmita ʻi ha aleapau mo Māteni, ʻo foaki kia Māteni ʻa e “totonu tatau” ke ne fakatau atu ʻa e ʻū tatau ʻo e Tohi ʻa Molomoná kae ʻoua kuó ne maʻu kakato ʻa e totongi ʻo hono pākí. Naʻá ne kamata leva ke fakatau atu ʻa e tohí ʻi he taimi pē ko ia naʻe ʻatā mai ai ʻi Māʻasi 1830. Ka ko e pangó, he naʻe ʻikai ke lelei hono fakatau atú ʻo hangē ko e meʻa naʻá ne ʻamanaki ki aí.
Naʻe lipooti ʻe Siosefa Sāmita haʻane fakatokangaʻi he konga kimui ʻo Māʻasi 1830 ʻa e tangata mamahi ko Māteni Hālisí ofi ki Palemaila. Fakatatau ki he fakamatala ʻa Siosefa Naití, naʻe lolotonga toʻo ʻe Māteni ha ʻū tatau lahi ʻo e Tohi ʻa Molomoná. Naʻá ne pehē, “ʻOku ʻikai ke lava ʻo fakataua ʻa e ʻū Tohí he ʻoku ʻikai fiemaʻu ia ʻe ha Taha,” peá ne talaange leva kia Siosefa, “ʻOku ou Fiemaʻu ha Fekau [mei he ʻEikí].” Naʻe tali ʻe Siosefa ʻo ne fakahinohino ʻa Māteni ki he fakahā kimuʻá: “Fai pē ʻa e fekau kuó ke ʻosi maʻú.” Naʻe toe talaange pē ʻe Māteni, “Ka kuo pau ke u maʻu ha fekau.”
Naʻe ʻikai ke ne maʻu ha toe fekau. Neongo ia, ka naʻe talangofua ʻa Māteni ki he fakahā kimuʻá, ʻo fāifai peá ne fakatau atu ha konga feʻunga ʻo ʻene koloá ke totongi ʻaki ʻa e moʻuá. ʻI heʻene fai iá, naʻá ne hoko ai ko e tokotaha tokoni fakapaʻanga lahi taha ki he Tohi ʻa Molomoná pea pehē ki he kamataʻanga ʻo e Siasí. Naʻe hala ha taha ʻi he ngaahi kaungāmeʻa kei talavou ange mo masiva ange ʻo Siosefa Sāmitá naʻá ne mei lava ʻo fakahoko ʻa e foaki mātuʻaki mahuʻingá ni.