Hisitōlia ʻo e Siasí
ʻOku Lahi Ange ʻa e Ngaahi Koloá ʻi he Tahá

“‘ʻOku Lahi Ange ʻa e Ngaahi Koloá ʻi he Tahá’” Puipuituʻa ʻo e Ngaahi Fakahaá (2016)

“ʻOku Lahi Ange ʻa e Ngaahi Koloá ʻi he Tahá,” Puipuituʻa ʻo e Ngaahi Fakahaá

ʻOku Lahi Ange ʻa e Ngaahi Koloá ʻi he Tahá

T&F 111

Elizabeth Kuehn

ʻI he konga kimui ʻo Siulai 1836, naʻe kamata fononga ai ʻa Siosefa Sāmita ko e Siʻí, Sitenei Likitoni, ʻŌliva Kautele, mo Hailame Sāmita mei Ketilani, ʻi ʻOhaiō, ki he feituʻu fakahahake ʻo e ʻIunaiteti Siteití. ʻI he ngaahi uike kimuʻa pea nau mavahé, naʻe mafatukituki lahi ki he fakakaukau ʻa Siosefá ʻa e ngaahi ngāue fakatuʻasino ʻa e Siasí. ʻI Mīsulí, naʻe kei puke pē ʻe he Kāingalotú ʻenau totonu ki he kelekele naʻe tuli kinautolu mei ai ʻi he Vahefonua Siakisoní, ko ha fakaʻilonga ʻo ʻenau tukupā ke langa ʻa Saioné, ka naʻe ʻikai ke nau ʻilo ha faʻahinga founga te nau lava ʻo toe foki ai. ʻI he taimi tatau, naʻe fuʻu lahi ʻa e moʻua ʻo e Siasí ʻi he hili hono langa ʻo e Temipale Ketilaní. Ko e hā ʻe lava ke fakahokó?

ʻOku ngalingali naʻe hokohoko atu ke kei nofo ʻi he fakakaukau ʻa Siosefa Sāmitá ʻa e ngaahi meʻá ni ʻi he fononga ʻene kiʻi kulupu tokosiʻí ki he Kolo Niu ʻIoké pea mo Positoní. Fakatatau mo ha fakamatala kimui ange, naʻe tala ange kia Siosefa mo ha kau taki kehe ha koloa fufū ʻi Sālemi, ʻi Masasūseti, pea nau ʻamanaki ʻe ʻilo ʻa e koloa ko iá. Naʻe fakatou hoko ʻa e fakaʻamu ki ha fakafiemālie fakapaʻangá mo e hohaʻa ki Saioné ko e ongo konga mahuʻinga ia ʻo e puipuituʻa ki ha fakahā naʻe maʻu ʻe he Palōfitá ʻi Sālemi ʻi he ʻaho 6 ʻo ʻAokosi, 1836.

“ʻOua Te Mou Hohaʻa ki Homou Ngaahi Moʻuá”

Naʻe fakafiemālieʻi ʻe he ʻEikí ʻa Siosefa mo hono ngaahi kaungā fonongá, ʻi he fakahaá: “ʻOua te mou hohaʻa ki homou ngaahi moʻuá, he te u foaki kiate kimoutolu ʻa e mālohi ke totongi ia. ʻOua te mou hohaʻa ʻo kau ki Saione, he te u fai anga[ʻofa] ki ai.” Naʻe fakamahino ʻe he fakahaá naʻe lahi ʻa e ngaahi koloa ʻe maʻu ʻi he koló “ke ʻaonga ki Saione.” Naʻe fakatou kau heni ha ngaahi maʻuʻanga tokoni fakapaʻanga mo e tāpuaki fakalaumālie ʻo ha kau ului, “ʻa ia te u tānaki mei ai ʻi he taimi totonu.” ʻE lava foki ke kau ʻi he ngaahi koloá ha ʻilo mahuʻinga fekauʻaki mo ha “kakai tupuʻa pea mo kinautolu naʻa nau fokotuʻu ʻa e kolo ko ʻení.”

Naʻe muimui ʻa Siosefa mo hono kaungā fononga ʻe toko tolú ki he fakahinohino ʻi he fakahaá ke “kiʻi tatali ʻi he feituʻú ni” pea nofo ʻi ha ngaahi uike lahi ʻi Salemi, ʻo malanga mo ʻaʻahi ki ha ngaahi feituʻu fakahisitōlia ʻi he lolotonga ʻo ʻenau ʻamanaki ke maʻu ha paʻanga ke tokoni ʻi hono totongi ʻa e moʻua ʻo e Siasí mo huhuʻi ʻa Saioné. Ka ʻoku ʻikai ke ʻi ai ha tohi fakamatala ia ʻoku maʻu ʻoku hā ai naʻa nau mamata ki hano fakahoko ʻo e fakahaá ni ʻi ha faʻahinga founga ʻi he taimi naʻa nau foki ai ki Ketilaní.

Ko e meʻa naʻe fakahoko ʻe he ʻEikí ʻi heʻenau fononga ki Salemí ʻoku teʻeki ai pē ke ʻilo. Kuo pehē ʻe ha kakai ʻe niʻihi naʻe ʻikai pē hano ola ʻo e fononga ko ʻení. Naʻe fakamahamahalo ha niʻihi ia mahalo ko e fakahinohino ko ia ʻi he fakahaá ke “fakaʻekeʻeke faivelenga ʻo kau ki he kakai fuoloá mo kinautolu naʻa nau fokotuʻu ʻa e kolo ko ʻení,” naʻe tokoni ʻo teuteuʻi ia ki he ngaahi fakahā mahuʻinga ki he ngāue fakafofonga maʻá e kau pekiá. Ka ʻoku ʻikai ke fakahā ʻe he lekooti fakahisitōliá ia ha meʻa fekauʻaki mo e ongo naʻe maʻu ʻe Siosefa, ʻŌliva, Sitenei, mo Hailame ʻo kau ki he fakahaá, ʻi heʻenau mavahe mei Salemí.

“Ko e Taimi Totonu ʻa e ʻEikí”

Ka naʻe ʻikai ke ngalo ʻa e fakahaá ia. ʻOsi ha taʻu ʻe nima mei ai, naʻe fai ai ʻe Hailame Sāmita mo Uiliami Lao ʻo e Kau Palesitenisī ʻUluakí ha fakahinohino kia ʻEletā ʻIlasitasi Sinou mo Penisimani Uinisesitā, ʻi ha konifelenisi ʻa e Siasí ʻi Siulai 1841, fekauʻaki mo Sālemi. Naʻe kau ʻi he ngaahi fakahinohino ko ʻení ha tatau ʻo e fakahā ʻo ʻAokosi 1836 mo fakahaaʻi ai ʻa e tui ʻa e Kau Palesitenisī ʻUluakí kuo “hokosia ʻa e taimi totonu ʻa e ʻEikí” ke fakahoko ai ʻa e fakahaá pea mo tānaki ʻa e kakai ʻo Sālemí ki Hono puleʻangá.

Naʻe ʻuluaki ʻāmio ʻa ʻIlasitasi Sinou. Naʻe talu ʻene ngāue ʻi ʻEpeleli 1840 ʻi Penisilivēnia, Niu Sēsí, mo ha ngaahi feituʻu kehe ʻi he Matāfanga Fakahahaké ʻo ola lelei ʻaupito pea naʻe ʻosi palani ke foki ki Nāvū ʻi he faʻahitaʻu fakatōlau ʻo e 1841. Naʻá ne lotu ke ʻiloʻi ʻa e finangalo ʻo e ʻEikí, pea naʻe “toutou fafana [ange] ʻa e [Laumālié] ke ʻalu ki Sālemi.” Naʻe toe ʻi ai foki mo haʻane ngāue ke fai ʻi Nāvū, pea naʻá ne fakaʻamu ke foki ki ai. Mahalo naʻe faingataʻa ke ne fakafaikehekeheʻi ʻa ʻene ngaahi fiemaʻu ʻaʻaná mo e ngaahi ueʻi ʻa e ʻEikí.

Naʻe fakakaukau ai ʻa ʻEletā Sinou ke muimui ʻi ha founga fakatohitapu, ʻo talotalo ke mahino pe ko e fē ʻe ʻalu ki aí: Nāvū pe ko Sālemi. Naʻe tuʻo ua ʻene tohoʻi ʻa e talotaló ki—Sālemi—pea tukupā leva ke ʻalu ʻi he vave taha ʻe lavá. Naʻá ne aleaʻi leva ke nofo hono uaifí mo hono ʻofefiné, ʻa ia naʻa nau kaungā fonongá, mo hono tokouá ʻi Unisōketi, ʻi Louti ʻAilani, kae ʻoua kuó ne lava ʻo maʻu ha feituʻu ʻi Sālemi kia kinaua. Naʻe ʻikai ko ha mēmipa ʻo e Siasí ʻa hono tokouá ka naʻe “hangē naʻá ne mahuʻingaʻia ʻi he ngāué” ʻi he taimi naʻe malanga ai ʻa ʻIlasitasi ʻi he feituʻú, pea naʻe fakaʻamu ʻe lava ke tali ʻe hono tokouá ʻa e ongoongoleleí.

“Ko e kau Sola mo e Liʻekina”

ʻI he ʻaho 31 ʻo ʻAokosi 1841, naʻe tuku ai ʻe ʻIlasitasi ʻa hono fāmilí ʻi Louti ʻAilani kae fononga ki Positoni ʻo talitali ai ki he ʻaho 3 ʻo Sepitemá ke aʻu ange ʻa Penisimani Uinisesitā. Naʻe toki fononga leva ʻa e ongo tangatá ki Sālemi. Naʻá ne tohi ʻo pehē, “Naʻá ma tūʻuta atu ko ha ongo sola mo e liʻekina,” ka “naʻá ma falala ki he ʻOtuá ke ne tataki ʻema fonongá.” Naʻe lotu fakamātoato ʻa e ongo faifekaú ʻi he pō ko iá “ke fakaava ʻe he ʻOtuá ʻa e loto ʻo e kakaí kae lava ke ma maʻu ha taha ke fanongo.” ʻI he ʻaho hono hokó naʻá na hoko atu ʻi he tui.

Naʻá na malanga ʻi Positoni mo Sālemi ʻi he ʻahó mo e poʻulí ka naʻe ʻikai ke ʻi ai ha ola lelei. ʻOsi ha uike ʻe taha, naʻe mavahe leva ʻa Penisimani Uinisesitā ki Filatelafia kae hoko atu pē ngāue ʻa ʻIlasitasí ʻi Sālemi, ʻo malanga ʻi he feituʻu naʻe fakaafeʻi ki aí ʻi he lolotonga ʻo e uiké pea ʻi ha holo faka-Meisoni naʻe totongi ʻi he fakaʻosinga ʻo e uiké. Neongo ʻene ngaahi feingá pea mo e tokolahi ʻa e kakai naʻe ōmai ki aí, ko ha tokosiʻi pē naʻe ngali mahuʻingaʻia moʻoni ʻi heʻene pōpoakí. Naʻá ne tohi ai ʻo pehē, “Neongo naʻá ku tuʻuaki ʻi he ngaahi nusipepá mo tufa taʻe totongi homa tuʻasilá ʻi he koló, ka naʻe fuoloa peá u toki maʻu ha kakai ke nau tali au kae ʻikai ō mai pē ʻo fanongo pea nau toe ō pē.”

Naʻe ʻikai ke ola lelei ʻa e ʻuluaki feinga ʻa ʻIlasitasi Sinou ke fakatokangaʻi iá. Naʻe pulusi ha ngaahi fakamatala fakafepaki ki he Siasí ʻe he Faifekau ko A. G. Kāmingi, ko ha faifekau Papitaiso mo e ʻētita ʻo ha nusipepa fakalotofonua naʻe ʻikai ke ne tali ke paaki ʻa e ngaahi tali ʻa ʻEletā Sinoú. Neongo ia, naʻe fāifai pea loto-lelei ʻa Faifekau Kāmingi ke fakahoko ha ngaahi tipeiti ʻiate ia mo ʻEletā Sinou peá ke fakahoko ia ʻi Nōvema. Naʻe fakahoko ʻa e ngaahi tipeití ʻi ha pō ʻe ono, pea naʻe ʻita ai ʻa e kakaí kia Kāmingi he ko ʻene fakakikihí naʻe “meimei ko e laukovi pē mo e taukae.” Naʻe tohi ʻe ʻEletā Sinou ʻo pehē “ko e tefitoʻi lelei naʻe maʻu mei he alea ko iá ko ʻene fakatupu ha tokolahi ke nau fakatotoloʻi ʻa e tokāteliné, ʻa ia naʻa nau mei fakakaukau ʻoku ʻikai mahuʻinga ke ʻiló. Ko ʻeku ngaahi fakataha ʻi heʻene ʻosi iá, naʻe toe tokolahi ange ia ʻi he ngaahi fakataha kimuʻá.”

“Ko e ʻUluaki Fua ʻo e Ngāué”

ʻI he ʻaho 8 ʻo Nōvema, 1841—hili ha māhina ʻe nima nai mei he tohi ʻa Hailame Sāmita mo Uiliami Lao kia ʻIlasitasi Sinou fekauʻaki mo Sālemí—naʻá ne “utu ʻa e ʻuluaki fua ʻo [ʻene] ngaahi ngāué” he naʻe fakahoko ai ʻe ha niʻihi fakafoʻituitui tokosiʻi ʻa e ngaahi fuakava ʻo e papitaisó. Naʻe fakalakalaka vave ʻa e ngāué ʻi he faʻahitaʻu momokó. ʻI he konga kimuʻa ʻo Fēpuelí naʻe aʻu ʻo toko 36 ʻa e kau mēmipa ʻi Sālemí. ʻI ha lipooti kia Hailame Sāmita mo Uiliami Lao, naʻe pehē ai ʻe ʻEletā Sinou, “Kapau naʻe ʻikai ke u ʻiloʻi ʻoku tokolahi e fanga sipi ʻa Sīsū ʻi he koló ni, ʻoku ou tui naʻá ku mei loto-foʻi ʻo ʻikai tatali ke utu ʻa e meʻa naʻá ku toó, he ko e feituʻu pē ʻeni ʻe taha kuo fuoloa ai ʻeku malangá ʻo ʻikai ha papitaiso.”

Naʻe fokotuʻu ʻe ʻIlasitasi Sinou ʻa e kiʻi kolo Sālemí ʻi he ʻaho 5 ʻo Māʻasi 1842, mo ha kau mēmipa pē ʻe toko 53. ʻI heʻene aʻu ki Sune 1842 kuo tupu ʻa e kiʻi koló ʻo aʻu ki ha kau mēmipa ʻe toko 90, ko hanau niʻihi naʻe hiki ki Nāvū mo ha ngaahi feituʻu kehe. Ko e tui ʻa e Kāingalotú ni, naʻe lahi, pea naʻe kau ʻa e fakamoʻui mahakí ʻi he ngaahi meʻafoaki fakalaumālie naʻa nau aʻusiá. ʻI ha konifelenisi ʻi Positoni ʻi Fēpueli 1843, naʻe aʻu ʻa e tokolahi ʻo e kau mēmipa ʻo e kiʻi kolo Sālemí ki he toko 110. Naʻe taaʻimuʻa foki ʻa ʻIlasitasi Sinou ʻi hono fokotuʻu ʻo e fanga kiʻi kolo iiki ange ʻi ha ngaahi feituʻu kehe ʻo Masasūseti, kau ai ʻa e kolo Siaostauní, ʻa ia naʻe ʻi ai hano kāingalotu ʻe toko 32 ʻi he konifelenisi ʻo e 1843. Ko e taimi naʻe mavahe ai ʻa ʻEletā Sinou mo hono fāmilí mei Niu ʻIngilani ʻi he faʻahitaʻu fakatōlau ʻo e 1843, naʻe fononga fakataha mo ia ha kau mēmipa ʻe toko 75 mei “Positoni mo e ngaahi siasi he feituʻu fakahahaké” ki Nāvū.

“ʻOku Lahi Ange ʻi he Koloa Pē ʻe Taha”

ʻI he fakahā fekauʻaki mo Sālemi naʻe fai ʻi he ʻaho 6 ʻo ʻAokosi 1836, naʻe folofola ai ʻa e ʻEikí ʻo pehē ko e koló “ʻoku lahi ange ai ʻa e koloá ʻi he tahá” ke tokoni ʻi he langa hake ʻo e puleʻangá. Neongo ko e kānokato ʻo e talaʻofa ko iá he ʻikai ke ʻiloʻi, ka ko e kakai naʻa nau kau ki he Siasí ʻi he ngāue fakafaifekau ʻa ʻIlasitasi Sinoú naʻe ʻi ai hano ʻaonga tuʻuloa. Naʻa nau tokoni ki hono langa hake ʻo e Siasí ʻi he ʻēlia ʻo Seilemi ʻi Positoní, ʻa ia naʻe hoko ia ko ha feituʻu longomoʻui mo mahuʻinga fakahisitōlia ki he Siasí ʻi he 1840 tupú. Naʻe tokolahi ha niʻihi ʻo e kau ului ko ʻení naʻa nau fakataha hake ki Nāvū, fai ha ngaahi tokoni mahuʻinga ʻi ai, pea nau hiki ki he feituʻu fakahihifó ʻo tokoni ki hono nofoʻi ʻa e vahefonua ʻi he ʻOtu Moʻunga Maká mo ohi hake ai ʻa e ngaahi toʻu tangata hono hoko ʻo e Kāingalotú. Ko e ngāue fakafaifekau ʻa ʻIlasitasi Sinou ʻi Seilemí—ʻo tatau mo ha ngaahi ngāue fakafaifekau lahi—kuo ʻi ai hano ngaahi ʻaonga pea mo kei tāpuakiʻi ʻe he tuí ʻa māmani ʻi he ʻahó ni.

Pea hangē pē ko e kau taki ʻe toko fā ʻo e Siasí naʻa nau fononga ki he Hahaké ʻi he 1836, ʻoku ʻikai ke tau ʻiloʻi pau ʻa e ngaahi koloa naʻe taumuʻa ʻa e ʻEikí ke maʻu mei Seilemí. Ka kia Hailame Sāmita mo ʻIlasitasi Sinou, naʻe feʻunga pē ke na falala ki he ngaahi folofola ʻa e ʻOtuá pea hoko ko ʻEne ongo meʻangāue ʻi he taimi totonu, ʻi he tokoni ke fakahoko ʻa ʻEne ngaahi talaʻofá.

  1. Vakai, Joseph Smith, “History, 1838–1856, volume B-1 [1 September 1834–2 November 1838],” 748–49, josephsmithpapers.org; vakai foki, “Letter from the Editor,” Latter-day Saints’ Messenger and Advocate, Sept. 1836, 372–75.

  2. Ebenezer Robinson, “Items of Personal History of the Editor,” The Return, July 1889, 105–6. Neongo naʻe toki tohi ʻa e fakamatala ʻa Lōpinisoní hili ha vaeauaʻi senituli mei he meʻa naʻe hokó, ko hano ngaahi konga naʻe toki fakatahatahaʻi ia ʻi ha tohi meia Siosefa Sāmita kia ʻEma Sāmita ʻi he ʻaho 19 ʻo ʻAokosi, 1836. Ki ha fakamatala ki he tukufakaholo ʻa e kakai naʻa nau fua nofoʻi ʻa ʻAmeliká ʻi he kumi ki he koloa naʻe tanu ʻi he kelekelé pe fufuuʻi ʻi ha ngaahi falé, vakai, Alan Taylor, “The Early Republic’s Supernatural Economy: Treasure Seeking in the American Northeast, 1780–1830,” American Quarterly, vol. 38, no. 1 (1986), 6–34; Ronald W. Walker, “The Persisting Idea of American Treasure Hunting,” BYU Studies, vol. 24, no. 4 (1984), 429–59. Ki ha fakamatala fekauʻaki mo e kau atu kimuʻa ʻa Siosefa Sāmita ki he tukufakaholo ʻo e kumi koloá, vakai, Richard Lyman Bushman, Joseph Smith: Rough Stone Rolling (New York: Alfred A. Knopf, 2005), 49–52.

  3. “Revelation, 6 August 1836 [D&C 111],” 36, josephsmithpapers.org; vakai foki, Tokāteline mo e Ngaahi Fuakava 111:5–6.

  4. “Revelation, 6 August 1836 [D&C 111],” 35, josephsmithpapers.org; vakai foki, Tokāteline mo e Ngaahi Fuakava 111:2.

  5. “Revelation, 6 August 1836 [T&F 111],” 35, josephsmithpapers.org; vakai foki, Tokāteline mo e Ngaahi Fuakava 111:2.

  6. “Revelation, 6 August 1836 [D&C 111],” 37, josephsmithpapers.org; vakai foki, Tokāteline mo e Ngaahi Fuakava 111:9.

  7. “Revelation, 6 August 1836 [D&C 111],” 36, josephsmithpapers.org; vakai foki, Tokāteline mo e Ngaahi Fuakava 111:7.

  8. “Revelation, 6 August 1836 [D&C 111],” 36–37, josephsmithpapers.org; vakai foki, Tokāteline mo e Ngaahi Fuakava 111:9.

  9. Erastus Snow journal, 1841–1847, 4, Church History Library, Salt Lake City.

  10. Erastus Snow journal, 4.

  11. Tohi ʻa ʻIlasitasi Sinou kia Hailame Sāmita mo Uiliami Lao, Feb. 4, 1842, Erastus Snow Papers, Church History Library, Salt Lake City.

  12. Erastus Snow journal, 10.

  13. Erastus Snow journal, 12.

  14. Erastus Snow letter to Hyrum Smith and William Law, Feb. 4, 1842; naʻe liliu ke fakaonopooni ʻa e sipelá.

  15. Vakai, Erastus Snow journal, 16–17; Erastus Snow letter to Hyrum Smith and William Law, Feb. 4, 1842.

  16. Erastus Snow journal, 17.

  17. Erastus Snow journal, 17.

  18. Erastus Snow letter to Hyrum Smith and William Law, Feb. 4, 1842.

  19. Erastus Snow letter to Hyrum Smith and William Law, Feb. 4, 1842.

  20. Vakai, Erastus Snow journal, 21.

  21. Vakai, Erastus Snow journal, 27.

  22. Erastus Snow journal, 29–30, 35–37.

  23. Journal History, Feb. 9, 1843.

  24. Erastus Snow journal, 44. Ki ha fakamatala lahi ange ki he ngāue fakafaifekau ʻa ʻIlasitasi Sinou ʻi Seilemí, vakai, Kenneth W. Godfrey, “More Treasures Than One: Section 111,” ʻi he Hearken, O Ye People: Discourses on the Doctrine and Covenants (Sandy, Utah: Randall Book, 1984),196–204.

  25. “Revelation, 6 August 1836 [T&F 111],” 37, josephsmithpapers.org; vakai foki, Tokāteline mo e Ngaahi Fuakava 111:10.

  26. Meʻapango pē he ko e tohinoa ʻa ʻIlasitasi Sinoú ʻoku faʻa hiki pē ai ʻa e tokolahi ʻo e papitaisó kae ʻikai ko e ngaahi hingoá, ʻo faingataʻa ai hano ʻiloʻi mo kumi ki he moʻui ʻa kinautolu kotoa naʻe kau ki he Siasí ʻi he lolotonga ʻo ʻene ngāue fakafaifekaú. ʻOku kau ʻiate kinautolu naʻa nau ului koeʻuhi ko ʻene ngāué, ko e fāmili ʻo Siaosi mo Meli ʻElí (vakai, George Alley Family Collection, 19th Century Western and Mormon Americana, L. Tom Perry Special Collections, Harold B. Lee Library, Brigham Young University, Provo, Utah), fāmili ʻo Nātaniela mo Sūsana ʻEsipaí (vakai, Benjamin Ashby autobiography, Church History Library, Salt Lake City), pea mo e fāmili ʻo Hauati mo Tamisoni ʻĪkaní (vakai, Pioneering the West 1846 to 1878: Major Howard Egan’s Diary, ed. William M. Egan [Howard R. Egan Estate, Richmond, Utah: 1917]). Ke ʻilo lahi ange ki ha hako ʻo ʻEsipai ʻi he tukufakaholo ʻo e Tokāteline mo e Ngaahi Fuakava 111 mo e ngāue fakafaifekau ʻa ʻIlasitasi Sinoú, vakai, Kim R. Burmingham, “The ‘Insignificant’ Scripture,” Ensign, Aug. 1990, 47–48.