Hisitōlia ʻo e Siasí
Ko ha ʻĀngelo pea mo ha Talaʻofa

“Ko ha ʻĀngelo pea mo ha Talaʻofa,” Puipuituʻa ʻo e Ngaahi Fakahaá (2016)

Ko ha ʻĀngelo pea mo ha Talaʻofa

T&F 2

Keith A. Erekson

ʻI he efiafi 22 mo e 23 ʻo Sepitema 1823, naʻe hoko ai ha fuʻu liliu lahi ki he moʻui ʻa Lusi Meki Sāmitá. ʻI he ʻaho 22 ʻo Sepitemá, naʻe foki mai ki ʻapi hono foha ko Siosefá ʻoku fakatou fiefia mo ongosia hili haʻane ngāue ʻi he ngoué. Naʻe manatuʻi ʻe Lusi “ko e taimi naʻe fakataha kotoa ai ʻa e fāmilí,” naʻe talaange ʻe Siosefa kiate kinautolu naʻe toutou ʻaʻahi mai ha ʻāngelo kiate ia ʻi he pō kimuʻá kakato. Naʻe ʻikai ko ha fuofua taimi pē ʻeni kuo maʻu ai ha fakahinohino fakalangi ʻe Siosefa, ka ʻi he hili ʻo ʻene ʻuluaki mata meʻa-hā-mai ʻi he taʻu ʻe tolu kimuʻá, naʻe ʻosi talaange pē ʻe Siosefa kia Lusi ʻa ʻene loto ke ʻoua ʻe kau ki hono siasi Pelesipiteliané pe ko ha toe faʻahinga siasi pē. ʻI he taimi ko iá, naʻe hoko atu pē ʻene moʻuí ʻi he founga angamahení.

Ko e ngaahi ʻaʻahi ʻa Molonaí naʻá ne ʻuluaki ʻai ʻa e ngaahi aʻusia fakalaumālie fakafoʻituitui ʻa Siosefá ke hoko ko ha tefito ʻo e talanoa fakafāmilí. ʻI he pongipongi ʻo e ʻaho 22 ʻo Sepitemá, naʻe fuʻu ongosia fau ʻa Siosefa mei heʻene aʻusia ʻi he pō kakató pea naʻe faingataʻa ke ne lava ʻo fakakakato ʻene fanga kiʻi fatongia ʻi heʻene ngāue mo ʻene tangataʻeikí mo hono tokoua ko ʻAlaviní, ka naʻe kei momou pē ke ne talaange ʻa e meʻa naʻe hokó. ʻE tui ange nai ʻene tamaí kiate ia? Koeʻuhí naʻe ʻikai ke ʻoange ʻe Siosefa ha ʻuhinga ki heʻene ongosiá, naʻe fakakaukau ai ʻa Siosefa Sāmita ko e Lahí ʻoku puke hono fohá pea fekau ke ne foki ki ʻapi ke mālōlō. Ka kimuʻa pea aʻu ʻa Siosefa ki he falé, naʻe toe hā mai ʻa e ʻāngeló ʻo fakahinohinoʻi ʻa Siosefa ke ne tala ki heʻene tamaí pea mo fakapapauʻi ange ʻe tui pē ʻene tamaí kiate ia. Naʻe loto ʻa Siosefa ʻi he efiafí, ke ne vahevahe ʻa e talanoa ʻo e ʻaʻahi mai ʻa e ʻāngeló mo e kotoa ʻo hono fāmilí.

Naʻa nau tokanga ʻaupito ki he meʻa naʻe hoko ki aí. Neongo iá, ʻi he taimi naʻe kamata fakamatalaʻi ai ʻe Siosefa ʻa e meʻa naʻe hokó, naʻe fakatokangaʻi ʻe hono taʻokete lahi ko ʻAlaviní ʻa e ongosia ʻa Siosefá peá ne fokotuʻu ange ki he fāmilí ke “nau mohe, pea ʻā hengihengia ke fakaʻosi ʻetau ngāue ʻo e ʻahó” pea toki foki mai ki ha “efiafi lōloa mo fakafiefia” ʻi he pō hono hokó, te nau lava kātoa ai ʻo “tangutu hifo ke fanongo.” Naʻe teuteuʻi vave ʻe Lusi ʻa e meʻatokoni efiafí ʻi he ʻaho hono hokó, pea kātoa mai ʻa e fāmilí kotoa kimuʻa ʻi he teʻeki tō ʻa e laʻaá—ko e tangataʻeikí, fineʻeikí, ngaahi foha ʻe toko ono, mo e ʻofefine ʻe toko tolu. Naʻe manatuʻi ʻe Lusi naʻe hili ʻa e fakatokanga ange kuo teʻeki hokosia ʻa e taimi ke vahevahe ai ʻa e pōpokaki kuó ne maʻú mo māmaní, “naʻe kamata fakamatala mai leva ʻe Siosefa kiate kimautolu ʻa e ngaahi meʻa nāunauʻia kuo fakahaaʻi ʻe he ʻOtuá kiate iá.”

ʻOku ʻomai ʻe he Tokāteline mo e Ngaahi Fuakava 2 ha kiʻi konga siʻi pē ʻo e ngaahi foʻi lea ʻe lauiafe ʻe iku lea ʻaki mo tohi fekauʻaki mo e ngaahi ʻaʻahi ʻa e ʻāngelo ko Molonaí kia Siosefa Sāmitá. Naʻe tataki ia ʻe he ngaahi fakahinohino ʻa Molonaí ki ha kiʻi moʻunga ofi ʻo ne maʻu ai ha hisitōlia toputapu ʻo e kakai ʻo e kuonga muʻá naʻe nofo ʻi he ongo ʻAmeliká, naʻe hiki ʻi he ngaahi lauʻi peleti koula. ʻI ha taimi, te ne liliu ai ʻa e lekōtí ʻi he meʻafoaki mo e mālohi ʻo e ʻOtuá pea pulusi ia ko e Tohi ʻa Molomoná. Neongo ia, naʻe hoko ʻa e ngaahi efiafi ko ia ʻi Sepitema ʻo e 1823 ko ha taimi naʻe kamata ke tafoki ai honau lotó ki he ngaahi talaʻofa ʻo e kuonga muʻá pea mo e ngāue ke fakahoko kimuʻa pea toe liu mai ʻa Sīsū Kalaisi ki māmaní.

‘I he Nima ʻo ‘Ilaisiaá

Naʻe tohi pe tokangaʻi ʻe Siosefa hono hiki ʻo ha fakamatala ʻe fā ʻo e ngaahi ʻaʻahi mai ʻa e ʻāngeló. ʻOku fakamahinoʻi ʻe he ngaahi fakamatala ko iá ko e pōpoaki ʻa Molonaí ʻoku ope atu ia ʻi he ui pē ke maʻu ʻa e ngaahi lauʻi peleti koulá. ʻI ha taha ʻo ʻene ngaahi fakamatala kimuí, naʻe pehē ai ʻe Siosefa naʻe lau ʻe he ʻāgelo ko Molonaí mei he tohi ʻa Malakaí, ʻĪsaiá, Ngāué, mo Sioeli pea pehē foki ki ha “ngaahi potu-folofola lahi kehe” (Siosefa Sāmita—Hisitōlia 1:36–41); pea ʻi ha fakamatala ʻe taha, naʻe pehē ai ʻe Siosefa “naʻá ne fakamatalaʻi ʻa e ngaahi kikite lahi kiate au.” Naʻe fakamatala ʻe ʻŌliva Kautele ha konga lahi ange ʻo e ngaahi meʻá ni ʻi he taimi naʻá ne fakamatalaʻi ai ʻa ʻene aʻusia ʻo e fanongo ki hono fakamatalaʻi ʻe Siosefa ʻa e ngaahi ʻaʻahi maí. Naʻe meimei ke liunga tolu ʻa e lahi ʻo e ngaahi foʻi leá ʻi he fakamatala lōloa taha ʻa Siosefá, he naʻe fakalau ʻe ʻŌliva ha ngaahi potu-folofola kehekehe meia Teutalōnome, ʻĪsaia, mo Selemaia ko e fakavaʻe ki ha pōpoaki aofaki kau ki he fakaava ʻo e ngaahi langí, fakafoki mai ʻo e mafai fakalangí mo e ngaahi fuakavá, tānaki ʻo ʻIsilelí, pea mo e teuteu ki he Hāʻele ʻAnga Ua Mai ʻa Sīsū Kalaisí. Naʻe toki pehē ʻe ʻŌliva kimui “ʻoku fuʻu faingataʻa moʻoni ke fakamatalaʻi ha ʻinitaviu lōloa mo ha talafekau fakalangi, tukukehe kapau ʻoku tokoniʻi ia ʻi he taimi pē ko iá ʻaki ʻa e meʻafoaki ʻo e tataki fakalaumālié.”

Ne ʻosi atu ha ngaahi taimi, pea toki kamata ke mahuʻinga makehe ki he Kāingalotú ʻa e potufolofola meia Malakaí ʻo kau ki he foki mai ʻa ʻIlaisiaá. Ko ʻIlaisiaá ko ha palōfita mātuʻaki mālohi ia ʻo e Fuakava Motuʻá he naʻá ne tāpuni ʻa e langí ke ʻoua naʻa ʻuha, ui hifo ʻa e afi mei he langí, liuliunga ʻa e meʻakai ʻa e uitoú, pea fokotuʻu ha kiʻi tamasiʻi mei he maté (vakai, 1 Ngaahi Tuʻi 17–18). Ka ko hono liliuʻi fakaofo ia ʻo ʻikai ke ne aʻusia ʻa e maté (vakai, 2 Ngaahi Tuʻi 2) pea mo e talaʻofa te ne foki maí he ʻokú ne tākiekina mālohi ʻa e ngaahi tukufakaholo faka-Siú mo faka-Kalisitiané. ʻOku tuku ʻe he kau Siú ha ipu maʻa ʻIlaisiā ʻi he tēpile ʻo e Laka Atú, ko e fakaʻilongaʻi ko ha fakamelomelo mahuʻinga ia ki he fakalelei ʻo e faʻahinga ʻo e tangatá, ki he fakafoki mai ʻo e fale ʻo Sēkopé, pea mo e kuonga fakamīsaiá. Naʻe pehē pē mo hono lau ʻe he kau Kalisitiane ʻo e kuonga muʻá ʻa ʻIlaisiā ko e fakamelomelo ʻo e Mīsaiá mo hiki hake ia ko ha faʻifaʻitakiʻanga ki he lotú. Naʻe lekooti ʻe he Fuakava Foʻoú hano fakahoko ʻa e taha ʻo e ngaahi talaʻofa ko ʻení ʻi he taimi naʻe hā ai ʻa ʻIlaisiā mo Mōsese ʻi he Moʻunga ʻo e Liliú.

Ko e ngaahi fakahinohino ʻa Molonaí naʻe ʻikai ko e fanongo fakaʻosi pē ia ʻa Siosefa fekauʻaki mo ʻIlaisiaá. Naʻe ʻilo ʻe Siosefa ʻi he fakalau ʻa e taimí, ko e founga hokohoko ki he maʻu fakahā, ʻa ia ʻe hoko ko e fakaʻilonga mahuʻinga ʻo e Fakafoki mai ʻo e Ongoongoleleí, ko e “ʻotu lea ki he ʻotu lea, ʻa e akonaki ki he akonaki, ko e siʻi ʻi heni pea siʻi ʻi hena” (2 Nīfai 28:30). ʻOku kau ʻi he Tohi ʻa Molomoná ha talanoa ʻo e vahevahe ʻe Sīsū ʻa e kikite ʻa Malakai kia ʻIlaisiā mo ha niʻihi ʻo e kakai ʻo e ongo ʻAmeliká ʻi he kuonga muʻá (vakai, 3 Nīfai 25), pea faʻa toe vakai ʻa Siosefa ki he potufolofolá, ko ha konga ia ʻo ʻene toe siviʻi fakalaumālie ʻa e Tohi Tapú. Naʻe fakamatalaʻi ʻe ha fakahā ʻe taha ʻi ʻAokosi 1830 naʻe maʻu ʻe ʻIlaisiā “ʻa e ngaahi kī ʻo e mālohi ke liliu ʻa e loto ʻo e ngaahi tamaí ki he fānaú” (T&F 27:9) pea ko e taha ʻi ha ngaahi māhina siʻi mei ai, naʻe fakamatala ki he haʻu moʻoni ʻa ʻIlaisiaá (vakai, T&F 35:4). ʻOku lekooti ʻe he tohinoa ʻa Siosefa Sāmitá naʻe hā mai ʻa ʻIlaisiā ʻi he Temipale Ketilaní, ʻi ʻEpeleli 1836, ʻo fakahaaʻi ai “[kuo] hokosia moʻoni ʻa e taimi” ki heʻene foki maí, ke ne “[fakatou] liliu ʻa e loto ʻo e ngaahi tamaí ki he fānaú” pea ke foaki ange kiate ia “ʻa e ngaahi kī ʻo e kuonga ko ʻení” (T&F 110:14–16). ʻI Nāvuú, naʻe liliu ai ʻe he fakafoki mai ʻo e papitaiso maʻá ʻa e kau pekiá e fakakaukau ʻa ha Kāingalotu tokolahi ki heʻenau ngaahi kuí pea fokotuʻu ai ha fehokotaki ʻi he ngaahi toʻu tangata ʻo e kuohilí mo e lolotongá. Talu mei he taimi ko iá, mo e fakafekauʻaki ʻe ha Kāingalotu tokolahi ʻa e laumālie ʻo ʻIlaisiaá mo e ngaahi ouau ʻo e temipalé pea mo e ngāue hisitōlia fakafāmilí.

Neongo ia, ko e talaʻofa ko ia ki he foki mai ʻa ʻIlaisiaá, ʻoku ʻikai ko e ngāue fakatemipalé pē mo e hisitōlia fakafāmilí. Ko e Fakafoki Mai ko ia ʻo e Ongoongoleleí, ko hano fakafoki mai ia ʻo e mafai mei he kuonga muʻá ki he ngaahi toʻu tangata ʻo onopōní, ko hano fakahoko ia ʻo e kikite ʻa Malakaí, ʻa ia naʻe toe fakamatalaʻi pē ʻe he ʻāngelo ko Molonaí ʻi he 1823. ʻI he taʻu fakaʻosi ʻo ʻene moʻuí, naʻe akoʻi ai ʻe Siosefa Sāmita “ko e laumālie, mālohi mo e uiuiʻi ʻo ʻIlaisiaá, ke mou maʻu ʻa e mālohi ke maʻu ʻa e ngaahi kī ʻo e fakahaá, ngaahi ouaú, ngaahi potó, ngaahi mālohí pea mo e ngaahi fakakoloa ʻo e kakato ʻo e Lakanga Taulaʻeiki Faka-Melekisētekí pea mo e puleʻanga ʻo e ʻOtuá ʻi he mamaní” koeʻuhí ke mou lava ʻo “fakahoko ʻa e ngaahi ouau kotoa [ʻo e] puleʻanga ʻo e ʻOtuá.” Pe hangē ko hono fakamatalaʻi fakanounou ʻe Siosefa ʻi ha meʻa ʻe taha, “ko e fuakava ko ia naʻe fai ʻe he ʻOtuá mo e kakai ʻIsileli ʻo e kuonga muʻá kuo ofi ke fakahoko.”

Naʻe kau ʻa Lusi Sāmita ʻi he kau fuofua fanongo ki he pōpoaki ʻa Molonaí mo ne ongoʻi ʻa e anga ʻo ʻene ʻomai hono fāmilí ke nau toe vāofi angé. ʻI he fakaʻaosinga ʻo siʻene moʻuí, naʻe manatu ʻa Lusi naʻe hanga ʻe he ngaahi talanoa efiafi ko iá “ʻo fakatupu haʻamau fiefia lahi” mo fakamahino ʻe hanga ʻe he ʻOtuá “ʻo ʻomai kiate kimautolu ha ʻilo haohaoa ki he palani ʻo e fakamoʻuí pea mo e huhuʻi ʻa e fāmili ʻo e faʻahinga ʻo e tangatá.” Naʻe hanga ʻe he ngaahi ʻaʻahi ko ia ʻa Molonai ki heʻene tamasiʻí ʻo fai ha meʻa fakahisitōlia mahuʻinga lahi, ʻo kamataʻi ai ʻa e ngāue ʻo e Fakafoki mai ʻo e Ongoongoleleí, fakafieʻiloaki ʻa Siosefa ki he Tohi ʻa Molomoná, mo fakatoka ʻa e fakavaʻe ki he foki mai ʻa ʻIlaisiaá, pea mo ha ngāue lahi ange ke fakafehokotaki ʻa e fānau ʻa e ʻOtuá ko ha fāmili ki taimi pea mo ʻitāniti.

  1. Lucy Mack Smith, Biographical Sketches of Joseph Smith the Prophet, and His Progenitors for many Generations (Liverpool: Published for Orson Pratt by S. W. Richards, 15, Wilton Street, 1853), 81–83.

  2. Lucy Mack Smith, Biographical Sketches, 82–84. Vakai foki, Siosefa Sāmita—Hisitōlia 1:48–50.

  3. Lucy Mack Smith, Biographical Sketches, 84.

  4. Vakai, Joseph Smith, “History, circa Summer 1832,” 4–5, josephsmithpapers.org; Joseph Smith, Journal, 9–11 November 1835,” 24–26, josephsmithpapers.org; Joseph Smith, “History, 1838–1856, volume A-1 [23 December 1805–30 August 1834],” 5–7, josephsmithpapers.org; Joseph Smith—History 1:27–50; Joseph Smith, “‘Church History,’ 1 March 1842,” 707–8, josephsmithpapers.org.

  5. Joseph Smith, “Journal, 9–11 November 1835,” 24–25, josephsmithpapers.org.

  6. Vakai, Oliver Cowdery, “Letter VI,” Messenger and Advocate, vol. 1, no. 7 (Apr. 7, 1835), 108–12 (manuscript copy in “Letter VI,” in “History, 1834–1836,” 71–78, josephsmithpapers.org; Kent P. Jackson, “Moroni’s Message to Joseph Smith,” Ensign, Aug. 1990, 13–16.

  7. Oliver Cowdery, “Letter VI,” Messenger and Advocate, vol. 1, no. 7 (Apr. 7, 1835), 112.

  8. Vakai, Richard J. Clifford, “Elijah,” The Oxford Companion to the Bible, ed. Bruce M. Metzger and Michael D. Coogan (New York: Oxford University Press, 1993), 183; R. Glenn N. Wooden, “Elijah,” ʻi he Eerdmans Dictionary of the Bible, ed. David Noel Freedman (Grand Rapids, MI: William B. Eerdmans Publishing Company, 2000), 397.

  9. Vakai, Mātiu. 16:13–14; Maʻake 6:14–15; 8:27–28; Luke 9:7–8; Sēmisi 5:17. ʻOku ui ʻe he Fuakava Foʻoú ʻa ʻIlaisiā ko e ʻIlaiase ʻa ia ko e tuʻunga faka-Kalisi ia ʻo hono hingoa faka-Hepeluú.

  10. Vakai, Mātiu 17:3; Maʻake 9:4; Luke 9:30.

  11. Naʻe fakamamafaʻi ʻe he fakamatala ʻa Siosefa Sāmita ʻi he 1838 ki he ʻaʻahi ʻa Molonaí ʻa e kehekehe ʻo e kikite ʻa Malakai ʻo kau kia ʻIlaisiaá (Siosefa Sāmita—Hisitōlia 1:36–39). Naʻe ʻikai ke kau ʻa e ngaahi kehekehe ia ko iá ʻi he fakamatala ʻo e 3 Nīfai 25 pe Liliu ʻa Siosefa Sāmitá, pea ʻikai foki ke ʻasi ia ʻi he tohi ʻa Siosefa naʻe fai ʻi he 1842. ʻI hono toʻo mei he Malakai 4 ʻo e Tohi Tapu ʻa e Tuʻi ko Sēmisí, naʻe pehē pē ʻe Siosefa, “Mahalo naʻá ku mei lava ʻo fai ha liliu mahino ange ki he meʻá ni, ka ʻoku mahinongofua feʻunga pē ʻa ʻene tuʻu he taimi ní ke feʻunga mo ʻeku taumuʻá” (T&F 128:18).

  12. Joseph Smith, “History, 1838–1856, volume E-1 [1 July 1843–30 April 1844],” 1920, josephsmithpapers.org.

  13. Joseph Smith, “‘Church History,’ 1 March 1842,” 707, josephsmithpapers.org.

  14. Lucy Mack Smith, Biographical Sketches, 84.