Hisitōlia ʻo e Siasí
Ko ha Ngāue Fakafaifekau ki he kau Leimaná

“Ko ha Ngāue Fakafaifekau ki he kau Leimaná,” Puipuituʻa ʻo e Ngaahi Fakahaá (2016)

“Ko ha Ngāue Fakafaifekau ki he kau Leimaná,” Puipuituʻa ʻo e Ngaahi Fakahaá

Ko ha Ngāue Faifekau ki he kau Leimaná

T&F 28, 30, 32

Richard Dilworth Rust

ʻI ha fakahā naʻe fai mai kimuʻa pea toki ʻosi hono liliu ʻo e Tohi ʻa Molomoná, naʻe folofola ai ʻa e ʻEikí ʻo pehē naʻe fakatolonga ʻa e ngaahi lauʻi peletí “ke maʻu ʻe he kau Leimaná ʻa e ʻilo ki heʻenau ngaahi Tamaí & koeʻuhí ke nau ʻiloʻi ʻa e ngaahi talaʻofa ʻa e ʻEikí, pea ke nau lava ʻo tui ki he Ongoongoleleí & falala ki he ngaahi ngāue lelei ʻa Sīsū Kalaisí.” ʻI heʻene hoko ko e tefitoʻi sikalaipe ʻo e Tohi ʻa Molomoná, naʻe ʻiloʻi ai ʻe ʻŌliva naʻe fakatautautefio hono hiki ʻo e tohí “ki he kau Leimaná,” ʻa ia ko “ha toenga ʻo e fale ʻo ʻIsilelí.” Naʻe taau ai ʻa ʻŌliva Kautele, ʻi Sepitema 1830, hili ʻa e māhina ʻe ono mei hono pulusi ʻo e Tohi ʻa Molomoná ke hoko ko e fuofua tokotaha naʻe fakahinohino ʻi he fakahaá ke “ʻalu ki he kau Leimaná & Malangaʻi ʻeku Ongoongoleleí.”

Naʻe fakahaaʻi foki ʻe ha toe kau fuofua ului kehe kimuʻa “ha holi lahi” ʻi heʻenau fakaʻapaʻapaʻi “ʻa e toenga ʻo e fale ʻo Siosefá—ko e kau Leimana naʻe nofo ʻi he hihifó, ʻi heʻenau ʻiloʻi naʻe maʻongoʻonga ʻa e ngaahi taumuʻa ʻa e ʻOtuá ki he kakai ko iá.” Ko e tali ki he ngaahi fakaʻamu ko iá, naʻe maʻu ai ʻe Siosefa Sāmita ha toe fakahā, ʻa ia naʻe ui ai ʻa Pita Uitemā ko e Siʻí ke ʻalu fakataha mo hono tokoua ʻi he fono ko ʻŌliva Kautelé. Naʻe fakahinohinoʻi ia ʻe he ʻEikí ke “fakaava ho ngutú ke fakahā ʻa ʻeku ongoongoleleí” pea ke “tokanga ki he ngaahi lea & akonaki ʻa ho Tokouá” he kuo foaki kiate ia ʻa e mālohi “ke langa hake hoku siasí ʻi he lotolotonga ho Kāinga ko e kau Leimaná.”

ʻI he māhina hono hokó, ʻi ʻOkatopa 1830, naʻe toe ui ai ʻa Paʻale P. Pālati mo Saipa Pitasoni ke na ō ki he “maʻomaʻonganoá ki he lotolotonga ʻo e kau Leimaná.” Ke tokoniʻi kinautolu ʻi he ngāue faingataʻá ni, naʻe talaʻofa ange ai ʻa e ʻEikí te Ne “ʻalu mo kinautolu pea te u ʻi honau lotolotongá.”

Koeʻuhí ko e Lao ki Hono Hiki ʻo e Kau ʻInitiá naʻe tali ʻi Mē 1830, ko e vahefonua foʻou naʻe hiki ki ai ʻa e kau ʻInitia ʻAmeliká naʻe pau ke ʻi Kenisesi mo ʻOkalahoma ʻo e ʻaho ní. Ko ia, naʻe palani leva ʻa e kau faifekau ko ʻeni ki he kau Leimaná ke nau fononga fakahihifo mei Tauʻatāina, ʻi Mīsuli, ki he Vahefonua ʻo e Kau ʻInitiá.

Kimuʻa peá ne mavahe atu ʻi he ngāue fakafaifekau ko ʻení, naʻe fakamoʻoni hingoa ʻa ʻŌliva Kautele ʻi ha fuakava ke ʻaʻeva anga fakatōkilalo ʻi he ʻao ʻo e ʻOtuá pea ke fai ʻa e “ngāue nāunauʻiá ni ʻo fakatatau ki hano fakahinohinoʻi au ʻe he Laumālie Māʻoniʻoní.” Naʻe fakamoʻoni hingoa pehē foki mo hono ngaahi kaungā fononga ʻe toko tolú te nau tokoniʻi faivelenga ʻa Ōliva Kautele “ʻi he meʻá ni.” Ko e taimi naʻa nau mavahe aí, naʻa nau ʻave ha ngaahi tatau lahi ʻo e Tohi ʻa Molomoná ke tufa ki heʻenau kau fanongó.

Naʻe tohi ʻe Paʻale P. Pālati ʻi hono piokālafí, naʻe lolotonga ʻo ʻene kei ʻi Niu ʻIoké, naʻe ʻaʻahi ʻa e kau faifekau ʻe toko faá ki “ha ʻInitia ʻo e matakali [Seneká] naʻe nofo ofi ki Pafalō; mo fakaʻaongaʻi ha vaeuaʻi ʻaho mo kinautolu, ʻo fakahinohinoʻi kinautolu ke nau ʻilo ki he lekooti ʻo ʻenau ngaahi kuí.” Ko e vakai atu ki aí, ko e lavameʻa lahi taha ʻo ʻenau ngāue fakafaifekaú naʻe hoko ia ʻi heʻenau ngaahi fefonongaʻakí. ʻOku fakamatala ʻa Pālati ki he hoko atu ʻenau fonongá kae ʻoua kuo nau afe ʻi Menitoa, ʻi ʻOhaiō, ke feʻiloaki mo Sitenei Likitoni, ko e “kaungāmeʻa mo e faiako kimuʻa ʻa [Pālati] ʻi he Sōsaieti Papitaiso Foʻoú.” Naʻa nau foaki ki ai ha Tohi ʻa Molomona, ʻa ia naʻá ne palōmesi ange te ne lau, pea nau toki akoʻi ʻa e ongoongolelei kuo fakafoki maí ki ha ngaahi ʻapi lahi ʻi he feituʻu ko iá. Ko e ola ʻo e meʻá ni, “naʻe iku ōmai ai ʻa Misa Likitoni mo ha niʻihi kehe tokolahi … ʻo mau papitaiso kinautolu mo nau maʻu ʻa e meʻafoaki ʻo e Laumālie Māʻoniʻoní ʻi he hilifaki ʻo e nimá.” ʻOku fakamatalaʻi ʻe Pālati ʻa e anga hono fakatupu ʻe he “ongoongo ki hono ʻiloʻi ʻo e Tohi ʻa Molomoná pea mo e ngaahi meʻa fakaofo naʻe hoko fekauʻaki mo iá” ha “loto-tokanga mo e fiefia … ʻi Ketilani, pea mo e ngaahi vāhenga ofi atu aí. Naʻe ʻākilotoa kimautolu ʻe he kakaí ʻi he poʻulí mo e ʻahó, pea ʻikai ai ke mau toe maʻu ha taimi ke fai ai ha mālōlō mo mavahe. Naʻe fakahoko ʻa e ngaahi fakatahá ʻi ha ngaahi feituʻu kehekehe, pea tokolahi ha kakai naʻa nau ōmai ʻo kole ke mau fakataha. … ʻI ha uike ʻe ua pe tolu mei heʻemau tūʻuta atu ki he feituʻú ni mo e ngaahi ongoongó, naʻa mau papitaiso ha kakai ʻe toko teau uofulu mā fitu.” Naʻe kau ʻi he niʻihi naʻa nau fakafeʻiloaki ki he ongoongoleleí ʻa ʻAisake Mōlī, Sione Mētoki, Laimani Uaiti, mo ʻEtuate Pātilisi.

Naʻe ʻikai ha ʻamanaki ʻe ola lelei peheni ʻa Ketilani ka naʻe hoko ia ko ha meʻa lelei lahi ki he kahaʻu ʻo e Siasí. Naʻe vave ʻa e hoko ʻa Ketilani ko ha fuofua feituʻu tānakiʻanga mahuʻinga ʻo e kau mēmipa ʻo e Siasí pea ʻe hoko kimui ko e feituʻu ki he fuofua temipale ʻo e Siasí. Naʻe toe maʻu foki mei he kulupu ʻo e kau ului ʻi Ketilaní ha kau taki faka-Siasi tokolahi. Ko e ʻiloa taha ʻiate kinautolú, ko Likitoni, ʻa ia naʻe hoko kimui ko ha tokoni kia Siosefa Sāmita. Naʻe kau ha taha ului foʻou ʻe taha mei he feituʻu Ketilaní, ko Feletiliki G. Uiliamisi, naʻe kau atu ki he kau faifekau ʻe toko faá ʻi heʻenau fonongá.

Neongo ko honau tefitoʻi fatongiá ke malanga ki he ngaahi matakali tuʻufonuá, ka naʻe kei akoʻi pē ʻe Kautele mo hono kaungā faifekaú ʻa e niʻihi kehe naʻa nau fetaulaki ʻi heʻenau fonongá. Naʻe kau ʻi he ngaahi fuofua felōngoaki ko ʻení ʻi ha fakataha mo e kau Sieká ʻi ʻIunioni Tokelau ʻi ʻOhaiō. Naʻe toe ʻi ai mo ha felōngoaki fika ua mo e kau Sieká ʻi he Kolo ʻIunioní, ʻoku laumaile pē ki he fakatokelau ʻo Sinisinatí. ʻI he ongo felōngoakí ni takitaha, naʻe tuku ai ʻe he kau faifekaú ha ngaahi Tohi ʻa Molomona ki he kau Sieká, pea neonogo naʻe mahino naʻe ʻikai ke fuʻu ola lelei ʻa e foungá ni: ka naʻe lau ha taha ʻo e ngaahi tohí ʻe Lisiate Mekinemā, ko ha tokotaha naʻe nofo ʻi he Kolo ʻIunioní peá ne pehē, “Ko e hā pē ha faʻahinga lelei ʻe lava ke maʻu ʻe he kau ʻInitiá mei he tohi ko ʻeni ʻa Molomoná, ʻoku mahino, ko kitautolú ʻoku ʻikai ke tau lava ʻo maʻu ha meʻa.”

Naʻe faingataʻa ʻenau fononga ko ia ʻi he konga kimui ʻo Tīsemá ʻo aʻu ki Sānualí, koeʻuhí ko e meʻa naʻe ui “ko e faʻahitaʻu momoko ʻo e sinou lahí.” Naʻe fakamatalaʻi ʻe Paʻale P. Pālati ʻa e pau ke kiʻi nofo ʻa e kau faifekaú ʻi ha ngaahi ʻaho siʻi ʻi ʻIlinoisi koeʻuhi ko e kiʻi fuofuoloa ʻa e ngaahi matangi mālohí “pea ʻi he lolotonga iá, naʻe aʻu ʻa e matolu ʻo e sinoú ʻi ha ngaahi feituʻu ʻe niʻihi ki he meimei mita ʻe tahá.” ʻI he fakafeʻātungiaʻi ko ia ʻe he ʻaisi ʻi he vaitafé ʻa ʻenau ngaahi ʻuluaki palaní, naʻe fulihi leva ʻenau fonongá ʻo fononga lalo, hangē ko e tohi ʻe Pālatí, “ʻi ha maile ʻe tolungeau ʻi he ngaahi toafa mamaé mo hē holo ʻi he sinoú—ʻikai ha hala; siʻi ʻa e ngaahi falé pea vā mamaʻo; pea momoko fau mo e angi ʻa e matangí mei he tokelau hihifó ʻi heʻene faʻaki maʻu pē ki homau matá pea ongo vevela ʻo ne meimei tatala ʻa e kilí mei he matá. … Hili ha fuʻu ongosia lahi mo ha ngaahi faingataʻaʻia, naʻa mau tūʻuta kotoa ki Tauʻatāina ʻi he vahefonua Siakisoní, ʻi he tafaʻaki fakahihifo taha ʻo Mīsuli pea mo e ʻIunaiteti Siteití ʻoku teʻeki ke nofoʻí.”

ʻI he tūʻuta pē ʻa e kulupú ki Tauʻatāiná, naʻe nofo leva ʻa Pita Uitemā ko e Siʻí mo Saipa Pitasoni ke ngāueʻi ha paʻanga kae hoko atu ʻa ʻŌliva Kautele, Paʻale P. Pālati, mo Feletiliki G. Uiliamisi ki he Vahefonua ʻo e [Kau] ʻInitiá. Naʻa nau ʻuluaki malanga ki he kau Sōnií pea toki hoko ki he kau Telaueá. Naʻe lea ʻa ʻŌliva Kautele ʻo fakafou ʻi ha tokotaha fakatonulea,ʻo vahevahe ʻa e pōpoaki mahuʻinga ʻo e Tohi ʻa Molomoná. Ko ha konga ʻo ʻene pōpoakí, hangē ko hono lekooti ʻe Paʻale P. Pālatí, “naʻe fekauʻi ʻe he ʻEikí ʻa Molomona mo Molonai, ko e ongo tangata poto mo e palōfita fakaʻosí, ke fufuuʻi ʻa e Tohí ʻi he kelekelé, ke fakatolonga mo malu ai, pea ʻe toki maʻu mo fakahā ia ʻamui ki he kau tangata hinehina te nau maʻu ʻa e fonuá, ke nau toe fakaʻilo atu ia ki he tangata kili kulokulá [ʻInitiá]; ke lava ʻo fakafoki kinautolu ke ʻilo ʻa e finangalo ʻo e Laumālie Lahí mo ʻEne hōifuá.”

Naʻe tali lelei ia ʻe he kau ʻInitia Telaueá, pea kole ʻe honau ʻeikí ke foki ange ʻa e kau faifekaú ʻi he faʻahitaʻu failaú pea “te mou lau kiate kimautolu mo akoʻi lahi ange kimautolu fekauʻaki mo e Tohi ʻo ʻemau ngaahi kuí mo e finangalo ʻo e Laumālie Lahí.” Neongo iá, koeʻuhí ko ha tuʻutuʻuni ʻa ha fakafofonga mei he puleʻangá, naʻe tuli ai ʻa e kau faifekaú mei he Vahefonua ʻo e Kau ʻInitiá. Naʻe ʻikai ke ola lelei ʻenau feinga ke maʻu ha fakangofua meia Uiliami Kalaké, ko e pule lahi ki he ngaahi meʻa ʻa e kau ʻInitiá ʻi he feituʻu ko iá, pea ʻikai leva ke toe lava ʻa e kau faifekaú ʻo malanga ʻi he Vahefonua ʻo e Kau ʻInitiá.

Neongo naʻe ngata ai ʻa e ngāue fakafaifekau ki he kau Leimaná, ka naʻe tokoni ia ke ne fokotuʻutuʻu ʻa e ngāue ki he Siasi kei langalanga haké ʻi he ngaahi taʻu hoko maí. Kuo fokotuʻu ʻe he kau faifekaú ʻa e Siasí ʻi he feituʻu Ketilaní, mo nau teuteuʻi ʻa e founga ke ʻalu ai ʻa Siosefa Sāmita ki ʻOhaiō ʻi he konga kimuʻa ʻo e 1831 pea toki ui ʻa e Kāingalotu ʻi he hahaké ke nau hiki mai ki ai mo kinautolu foki. ʻI he konga kimui ʻo e 1831, naʻe fononga ai ʻa Siosefa ki he Vahefonua Siakisoní, ʻo ne fakaʻilongaʻi ʻa e tuʻuʻanga ʻo e Selusalema Foʻoú, pea ʻi he ʻaho 3 ʻo ʻAokosi 1831, naʻe fakatoka ai ha makatuliki ʻo e temipalé, ʻo ofi ki he falehopo ʻo Tauʻatāiná.

  1. “Revelation, July 1828 [D&C 3],” ʻi he Revelation Book 1, 2, josephsmithpapers.org; vakai foki, Tokāteline mo e Ngaahi Fuakava 3:19–20. Naʻe lau ʻe he kau fuofua mēmipa ʻo e Siasí, ko e kau ʻInitia ʻAmeliká kotoa ko e hako moʻoni ia ʻo e kakai ʻi he Tohi ʻa Molomoná. ʻOku fakamahino ʻe he talateu ki he Tohi ʻa Molomoná ko e kau Leimaná naʻa “nau kau ʻi he ngaahi kui ʻa e kau ʻInitia ʻAmeliká.”

  2. Peesi ʻuluaki ʻo e Tohi ʻa Molomoná.

  3. “Revelation, September 1830–B [D&C 28],” ʻi he Revelation Book 1, 41, josephsmithpapers.org; vakai foki, Tokāteline mo e Ngaahi Fuakava 28:8.

  4. “History, 1838–1856, volume A-1 [23 December 1805–30 August 1834],” 60, josephsmithpapers.org.

  5. “Revelation, September 1830–D [D&C 30:5–8],” ʻi he Revelation Book 1, 42, josephsmithpapers.org; vakai foki, Tokāteline mo e Ngaahi Fuakava 30:5–6.

  6. “Revelation, October 1830–A [D&C 32],” ʻi he Revelation Book 2, 84, josephsmithpapers.org; vakai foki, Tokāteline mo e Ngaahi Fuakava 32:2–3.

  7. “Covenant of Oliver Cowdery and Others, 17 October 1830,” 1, josephsmithpapers.org; pulusi ʻi he Ohio Star, vol. 1, no. 49 (Dec. 8, 1831), 1.

  8. “Covenant of Oliver Cowdery and Others,” 1.

  9. The Autobiography of Parley Parker Pratt; One of the Twelve Apostles of The Church of Jesus Christ of Latter-Day Saints, ed. Parley P. Pratt Jr. (Chicago: Law, King, and Law, 1888), 49. Naʻe toki malanga kimui ʻa Kautele mo hono kaungā faifekaú ki he kau ʻInitia Uaianitotí, ofi ki Senitasikī, ʻi ʻOhaiō.

  10. The Autobiography of Parley Parker Pratt, 49.

  11. The Autobiography of Parley Parker Pratt, 50.

  12. The Autobiography of Parley Parker Pratt, 50.

  13. Fakaʻaongaʻi ʻi he Christian Goodwillie, “Shaker Richard McNemar: The Earliest Book of Mormon Reviewer,” Journal of Mormon History, vol. 37, no. 2 (Spring 2011), 144; naʻe fakatonutonu ʻa e fakaʻilonga leá.

  14. The Autobiography of Parley Parker Pratt, 54–55.

  15. The Autobiography of Parley Parker Pratt, 58.

  16. Fakaʻaongaʻi ʻi he The Autobiography of Parley Parker Pratt, 44.

  17. Vakai, Leland H. Gentry, “Light on the ‘Mission to the Lamanites,’” BYU Studies, vol. 36, no. 2 (1996–97), 229.

  18. Ko ha fakahā naʻe fakahoko mai ʻi he ʻaho 20 ʻo Siulai 1831, ʻo fakamahinoʻi “ko e potu ʻoku uí ni ko Tauʻatāiná ko e loto mālié ia, & pea ko e potu ki he temipalé ʻoku tuʻu fakahihifo ʻi ha konga kelekele ʻoku ʻikai mamaʻo mei he falehopó” (“Revelation, 20 July 1831 [D&C 57],” ʻi he Revelation Book 1, 93, josephsmithpapers.org; vakai foki, Tokāteline mo e Ngaahi Fuakava 57:3).