Ko Niueli K. Uitenī pea mo e Kautaha Uouangatahá

T&F 70, 78, 82, 92, 96, 104

Matthew C. Godfrey

ʻI ʻEpeleli 1834, naʻe fakamolemoleʻi ai ʻe Niueli K. Uitenī, ko e pīsope ʻo e Siasí ʻi Ketilani, ʻOhaioó, mo e tangata pisinisi ʻiloa, ha ngaahi moʻua ange ki ai ʻa ha niʻihi ʻo e kakaí, kau ai ʻa Siosefa Sāmita, Sitenei Likitoni, mo ʻŌliva Kautele. Ko e ngaahi moʻuá ni ko e fakatahaʻi ia ʻo ha taʻu ʻe ua pe lahi ange, ʻi he ngāue fakataha ʻa e kau tangatá ni, ke tataki mo fakapaʻanga ʻa e ngaahi ngāue fakatuʻasino ʻa e Siasí. Kuo lava ʻeni ha taʻu mohu faingataʻa ʻe ua, pea ʻe veteki ʻa e Kautaha Uouangatahá. Naʻe fakamatalaʻi ʻe Uitenī, “Naʻe pehē ʻe Siosefa ko e finangalo ia ʻo e ʻEikí” ke palanisi ʻa e ngaahi ʻakauní “ʻo ʻikai [toe maʻu] ha tupu.” Pea toki pehē leva ʻe Uitenī te ne fakahoko ʻa e meʻa naʻe lea ʻaki ʻe Siosefá.

Talu mei he kamataʻanga ʻo e Fakafoki mai ʻo e Siasí, mo hono ʻoange ʻe he ʻEikí ha ngaahi ngāue kia Siosefa, naʻe fiemaʻu ai ha ngaahi founga fakatuʻasino ke fakahoko. Hangē ko ʻení, ʻi he tokoni fakapaʻanga ʻa Māteni Hālisí, naʻe lava ai ʻe he palōfita kei talavoú ʻo pulusi ʻa e Tohi ʻa Molomoná. Pea ʻi he tupu tokolahi ʻa e Siasí, naʻe tupulaki ai pē mo hono misiona naʻe fakahā maí. Ko hono langa ko ia ʻo e ngaahi kolo ʻo Saioné naʻe fiemaʻu ai ha kelekele mo ha ngaahi maʻuʻanga tokoni. Ko hono talaki ko ia ki māmani ʻa e ongoongolelei kuo fakahaá, naʻe fiemaʻu ai ke ʻi ai ha fale paaki. Naʻe fokotuʻu ʻa e Kautaha Uouangatahá ke ne fakafehokotaki mo fakapaʻanga ʻa e ngaahi ngāue ko ʻeni naʻe fuʻu fiemaʻú.

ʻI hono fokotuʻu ʻo e Kautaha Uouangatahá naʻe ʻi ai ʻa Niueli K. Uitenī, pea ʻi hono vetekí naʻá ne toe ʻi ai pē. ʻI heʻene hoko ko e pīsopé, naʻe kau ai ʻa Uitenī ki ha fakataha ʻa e kau taulaʻeiki lahí ʻi Ketilani ʻi Māʻasi ʻo e 1832. ʻI he fakataha ko iá naʻe maʻu ai ʻe he Palōfita ko Siosefa Sāmitá ha fakahā (ʻoku hoko he taimí ni ko e Tokāteline mo e Ngaahi Fuakava 78) ʻo fakahinohinoʻi ai ʻa Siosefa, Sitenei Likitoni, mo Pīsope Uitenī ke nau fononga ki Mīsuli ke tokangaʻi hono fokotuʻu ʻo “ha kautaha ki he Laukongá mo e Ngaahi Fale Fefakatauʻaki ʻo hoku siasí.” ʻI he taimi ko iá, naʻe fakalele ʻe Sitenei Kilipate, ko ha fakafofonga ʻo Pīsope ʻEtuate Pātilisi ʻi Tauʻataīna, ʻi Mīsuli, ha falekoloa maʻá e Siasí, pea ko e falekoloa ʻo Uitenī ʻi Ketilaní, naʻe toe ngāue ʻaki mo ia ko ha fale tukuʻanga koloa ʻo e Siasí.

ʻIkai ngata aí, naʻe ʻosi fokotuʻu foki ʻe Uiliami W. Felipisi, ko e tangata fai paaki ʻa e Siasí, ha fale paaki ʻi Tauʻatāina, ʻa ia naʻá ne paaki ai ha nusipepa mo lolotonga teuteu ke pulusi ha tohi naʻe fakatahatatahaʻi ai ʻa e ngaahi fakahā ʻa Siosefá ʻa ia naʻe ui ko e Tohi ʻo e Ngaahi Fekaú. Ke tokangaʻi hono pulusi ʻo e Tohi ʻo e Ngaahi Fekaú, naʻe fokotuʻu ʻe ha fakahā ʻi Nōvema 1831—ʻoku hoko he taimí ni ko e Tokāteline mo e Ngaahi Fuakava 70—ʻa Siosefa Sāmita, Sitenei Likitoni, ʻŌliva Kautele, Sione Uitemā, Māteni Hālisi, mo Uiliami W. Felipisi ko e “kau tauhi ʻo e ngaahi fakahaá,” pea ʻe totongi ʻenau ngāué mei he tupu hono fakatau ʻo e tohí. Naʻe fakahā ʻe he ʻEiki kia Siosefa Sāmita mo ha niʻihi kehe ʻi Māʻasi 1832, ʻoku fiemaʻu ke fakafekauʻaki ʻa e fale pākí mo e ngaahi fale tauhiʻanga koloá.

ʻI he lolotonga ʻo e ʻuluaki uike ʻo ʻEpeleli 1832—ʻosi pē ha ngaahi ʻaho siʻi mei hano ʻohofi ʻe ha kau fakatanga ʻa Siosefa Sāmita mo Sitenei Likitoni, ʻo fakaiku ai ki he siʻi mālōlō ʻa e foha pusiaki ʻo Siosefá, ko Siosefa Moatakí—naʻe mavahe atu ʻa Siosefa Sāmita, Niueli K. Uitenī, Sitenei Likitoni, mo ha niʻihi tokolahi kehe ki Tauʻatāina ke fakahoko ʻa e fekau ko ʻení. ʻI he ʻaho 26 ʻo ʻEpelelí, hili pē ha taimi nounou ʻo ʻenau aʻu ki Mīsulí, naʻe ui ʻe he Palōfitá ha fakataha alēlea ʻa e kau taulaʻeiki lahí. Naʻe lau ʻe Sitenei Likitoni ʻi he fakatahá ni ʻa e fakahā ʻo Māʻasi 1832 ki he fakataha alēleá, mo fakahā ai “ʻa e ʻuhinga ʻo hono fekauʻi ke nau haʻu ki he fonuá ni & ke fai ha fakataha alēlea mo e kau Taulaʻeiki lahi ʻi hení.” Naʻe toe ʻoange foki ha fakahā kia Siosefa, ʻo fakamahino lahi ange ʻa e meʻa te nau faí.

Ko e fakahaá ni, ʻi hono ʻuluaki tuʻungá, naʻe pehē ai ʻoku “taau” ke uouangataha ʻa Siosefa Sāmita, Sitenei Likitoni, Niueli K. Uitenī, ʻEtuate Pātilisi, Sitenei Kilipate, Sione Uitemā, ʻŌliva Kautele, Uiliami W. Felipisi, mo Māteni Hālisi ke “ʻi ha aleapau & mo ha Fuakava he ʻikai lava ke maumauʻi ʻi homou ngaahi Lakanga Tauhi ke tokangaʻi ʻa e palopalema [mahino] & ʻo e fefakatauʻakí & mo e Kau Pīsopeliki ʻi he Fonua ko Saioné & pea ʻi he Fonua ko Ketilaní fakatouʻosi.” Naʻe toe pehē foki ʻe he fakahaá—ʻoku hoko he taimí ni ko e Tokāteline mo e Ngaahi Fuakava 82—ko e toko hiva fakafoʻituitui ko ʻení te nau “maʻu ʻa e tuʻunga totonu tatau ki he ngaahi koloá koeʻuhí ko ʻenau tokangaʻi ʻa e ngaahi meʻa fekauʻaki mo homou fatongia tauhí.” Naʻe fakahā ai kuo tuʻutuʻuni ʻe he ʻEikí ʻa e “faʻungá” ni ke hoko “ko ha faʻunga taʻengata kiate kimoutolu & pea kiate kinautolu ʻe Fetongi ʻa kimoutolú.”

ʻIkai ngata aí, naʻe talaange ʻe he fakahaá ki he kau tangatá ke “fehaʻiʻaki” fakataha kinautolu ʻaki ha fuakava ʻo “fakatatau ki he ngaahi Lao ʻo e Fonuá.” Ko hono moʻoní, naʻe pehē ʻe he fakahaá ni ʻe maʻu ʻe he kau mēmipa ʻo e faʻungá ha tokoni maʻanautolu mo honau ngaahi fāmilí mei he ngaahi koloa mo e ngaahi faiʻanga pulusi naʻe fekau ke nau puleʻí pea ke nau kau ʻi ha ngaahi felotoi fakalao te ne fakatahaʻi kinautolu ʻi honau ngaahi fatongia ki he ngaahi moʻua ʻo e kautahá.

Naʻe toe fakataha ʻa e fakataha alēleá ʻi he ʻaho hono hokó pea tuʻutuʻuni ai ko e ongo vaʻa lalahi ʻo e kautahá ko Gilbert, Whitney & Co. (ko e vaʻa fengāueʻaki koloa ia ʻia Niueli K. Uitenī mo Sitenei Kilipate ʻi Tauʻatāiná) mo e N. K. Whitney & Co. (ko e Kautaha ʻa Uitenī ʻi Ketilani). Naʻa nau fokotuʻu ai foki ke faʻu ʻe Felipisi mo Kilipate ʻa e pōnite naʻe fiemaʻu ʻe he kau mēmipa ʻo e kautahá ke fakahū hangē ko e fakahinohino ʻe he fakahaá. ʻI ha ngaahi ʻaho siʻi pē mei ai, fakafuofua ki he ʻaho 1 ʻo Meé, naʻe fakahoko leva ʻa e ʻuluaki fakataha angamaheni ʻa e Kautaha Uouangatahá ʻo ʻi ai kotoa ʻa e kau mēmipá tukukehe pē ʻa Māteni Hālisi. ʻI he fakataha ko ʻení, naʻe fokotuʻu ai ʻa Uitenī mo Kilipate ke na hoko ko e “ongo fakafofonga kuo fili ke na fakafofonga, ʻi he hingoa ʻo e Kautahá ni” pea naʻe tuʻutuʻuni ai ki he kautahá ke nau kole ha nō $15,000 mei he kautaha N. K. Whitney & Co.

ʻI he taʻu ʻe ua hono hokó, naʻe fakahoko ʻe he Kautaha Uouangatahá ha ngāue mahuʻinga ʻi hono fakalele ʻo e Siasí. Makehe mei hono tokangaʻi ʻo e ngaahi fale tukuʻanga koloá mo e ʻōfisi pākí, naʻe toe hoko hono kau mēmipá ko ha poate fakafofonga ʻo ha kau talēkita kia Siosefa Sāmita. Hangē ko ʻení, ko e taimi naʻe fiemaʻu ai ʻe Siosefa, he naʻe kei ʻi ʻOhaiō pē, ha fakamatala fekauʻaki mo e meʻa naʻe hoko ʻi Mīsulí, ʻa ē naʻe fokotuʻu ai ʻa e kolo ʻo Saioné, naʻá ne fakatuʻasila ʻa e ngaahi tohí ki he kau mēmipa ʻo e kautahá. Ko e meʻa tatau pē, naʻe fiemaʻu ʻa e ngaahi koloa ʻa e kautahá ki hono fakapaʻanga ʻo e ngaahi ngāue ʻa e Siasí pea mo foaki ki he kau mēmipa ʻo e kautahá mo honau ngaahi fāmilí ʻa e ngaahi fiemaʻu ʻo e moʻuí.

ʻI he 1833, naʻe tānaki atu ha ongo mēmipa kehe ki he kautahá, ʻi ha fakahā fakatouʻosi. Naʻe tuʻutuʻuni ʻi ha fakahā ʻi Māʻasi 1833—ʻoku hoko he taimí ni ko e Tokāteline mo e Ngaahi Fuakava 92—ke tali ʻa Feletiliki G. Uiliamisi “ki he kautahá” pea ke ne hoko ko “ha mēmipa femoʻuekina.” Pea ʻi Sune 1833, naʻe fekau ʻi ha toe fakahā—ʻoku hoko he taimí ni ko e Tokāteline mo e Ngaahi Fuakava 96—ke hoko ʻa Sione Sionisoni ko ha mēmipa ʻo e kautahá ke lava ʻo tokoni ʻi hono ʻomai ʻeku leá ki he fānau ʻa e tangatá.” Naʻe maʻu ʻe Uiliamisi, ko ha mēmipa ʻo e kau palesitenisī pule ʻo e Siasí, ha kelekele lahi ʻi ʻOhaiō, ʻo tatau mo Sionisoni. Naʻe fakaʻaongaʻi ʻe he Kautaha Uouangatahá ʻa e koloa naʻe maʻu ʻe he ongo tangatá ni ke fakahoko ʻaki hono ngaahi fatongia tauhí.

Lolotonga iá, naʻe kei hoko atu ʻa Niueli K. Uitenī ʻene ngāue ʻi he kautahá. Makehe mei he fakalele hono falekoloa ʻi Ketilaní ko ha fale tukuʻanga koloa ʻo e Siasí, naʻe toe tokangaʻi ʻe Uitenī ʻa e ngaahi moʻua ʻi ha ngaahi konga kelekele lalahi naʻe fakatau ʻi Ketilani naʻe palani ʻa e kau taki ʻo e Siasí ke langa ai ʻa e fale ʻo e ʻEikí. ʻI he meʻa naʻe maʻu mei hono falekoloá, naʻe toe fakahoko ʻaki ʻe Uitenī ha tokoni fakapaʻanga mo ha ngaahi koloa ke tauhi ʻaki ʻa Siosefa Sāmita mo ha niʻihi kehe, pea lahi ai ʻa e moʻuá, naʻe toki fakamolemoleʻi pē ʻe Uitenī ʻi ʻEpeleli ʻo e 1834.

Neongo ia, naʻe aʻu ʻo faingataʻaʻia fakapaʻanga ʻa e Kautaha Uouangatahá ʻi he 1834. Ko e taimi naʻe tuli ai ʻa e Kāingalotú mei he Vahefonua Siakisoní, ʻi Mīsuli ʻi he faʻahitaʻu fakatōlau ʻo e 1833, naʻe mole ai mei he Siasí ha ongo konga mātuʻaki mahuʻinga ʻo e kautahá: ko e ʻōfisi paaki ʻo Felipisí mo e fale tukuʻanga koloa ʻo Kilipaté. ʻIkai ngata aí, naʻe ʻi ai ha moʻua ʻo e Kautaha Uouangatahá mei hono fakatau ʻo e koloa ki he ngaahi fale tukuʻanga koloá, mīsini paaki foʻou ʻi Ketilani, mo e kelekele ki he langa fakalakalaka ʻo Ketilaní.

ʻI he ʻaho 11 ʻo Sānuali 1834, naʻe lotu ai ha kau mēmipa ʻe toko ono ʻo e kautahá, pea kau ai mo Uitenī, [ke āfeitaulalo muʻa ʻa e “ʻEikí ʻo tokoni, ke lava ʻi heʻene ʻAloʻofá, ʻa e pīsope ʻo e Siasí ni ʻo maʻu ha meʻa feʻunga ke totongi ʻa e moʻua kotoa ʻo e Kautahá, ʻi hono taimi totonú.” Ka ʻi heʻene aʻu ki ʻEpeleli ʻo e 1834, naʻe fakatokangaʻi ʻe Uitenī ʻokú ne moʻua ʻaki ha $8,000 koeʻuhí ko hono fatongia ʻi he kautahá. Naʻá ne fiemaʻu ha $4,000 ʻi he māhina ko iá ke tokoni ʻi he totongi ʻo e ngaahi moʻuá, pea ko e toengá, ke totongi ʻosi ʻi Sepitema ʻo e 1834. ʻI heʻenau fehangahangai mo e tuʻunga fakapaʻanga taʻe pau ko ʻení, naʻe ui leva ʻe he Palōfita ko Siosefá ha fakataha ʻa e Kautaha Uouangatahá ʻi he ʻaho 10 ʻo ʻEpeleli 1834, pea naʻe pehē ʻi he fakatahá ʻoku totonu ke tāmateʻi pea nau takitaha tokangaʻi pē honau tufakanga.”

ʻI he ʻaho 23 ʻo Mē 1934, ko e meimei ʻosi ia ha uike ʻe ua mei ai, naʻe ʻoange ʻe he ʻEikí ha fakahā kia Siosefa Sāmita—ʻoku hoko he taimí ni ko e Tokāteline mo e Ngaahi Fuakava 104—naʻe vahe ai ʻa e ngaahi tufakanga ko ʻení ki he kau mēmipa kehekehe ʻo e kautahá. Ko e ngaahi tufakanga tauhí ko ha ngaahi konga kelekele pau naʻe tuku ke tokangaʻi fakataautaha ʻe he kau mēmipa ʻo e kautahá. Hangē ko ʻení, naʻe tuku kia Niueli K. Uitenī ʻa hono ngaahi falé mo e falekoloá, ngaahi kelekele naʻa nau tuʻu aí, pea mo e konga kelekele naʻe tuʻu ai hono fale ngaohi lahé (ashery). Ko e toengá naʻe ʻoange kiate kinautolu ha konga kelekele mo e ngaahi fale naʻe tuʻu ʻi he ngaahi ʻapi naʻe maʻu ʻe Feletiliki G. Uiliamisi mo Sione Sionisoní. Neongo naʻe fakaʻapē ʻa e fakahaá ʻe lava ke kei hoko atu ʻa e Kautaha Uouangatahá ʻi he hili hono vahevahe ʻo e ngaahi tufakangá pea mo toe fokotuʻutuʻu foʻou, ka naʻe mahino ʻa e mate ai pē ʻa e kautahá. Ka, naʻe fetongi leva ʻe he fakataha alēlea māʻolunga Ketilaní, ʻa ia naʻe fokotuʻu ʻi Fēpueli 1834, ʻa e fatongia ki hono puleʻi ʻo e ngaahi ngāue ki he koloa mo e faipulusi ʻa e Siasí.

ʻI he ngaahi pulusinga kimui ʻo e Tokāteline mo e Ngaahi Fuakavá, naʻe ui ai ʻa e Kautaha Uouangatahá ko e “Kautaha Fāitahá,” pea fakahū ha ngaahi hingoa fakapulipuli ʻi he hingoa ʻo e niʻihi naʻe kaú. ʻIkai ngata ai, naʻe liliu mo e fakalea ki he taumuʻa ʻo e kautahá ke ʻoua ʻe fuʻu ʻilonga hono feau ʻo e ngaahi fiemaʻu ʻa e masivá. Naʻe fakahoko ʻení ke maluʻi ʻa kinautolu naʻe kau ʻi he kautahá pea ke tauhi hono ngaahi taumuʻá ʻo ʻoua ʻe fakahāhāholo. Naʻe toe fakafoki ʻa e hingoa ʻo e niʻihi fakafoʻituituí ni ki he ngaahi fakahaá ʻi he 1980 tupú, ka naʻe kei ui pē ʻa e kautahá ia ko e Kautaha Fāitahá ʻi he pulusinga ʻo e Tokāteline mo e Ngaahi Fuakavá ʻi he 2013.

Naʻe iku ʻa e kau ʻa Niueli K. Uitenī ki he Kautaha Uouangatahá, ʻo lahi fau hono moʻuá, ka naʻe ʻikai ke ne teitei fakafōtunga ha faʻahinga loto-mamahi ʻia Siosefa Sāmita pe ko e ʻEikí ʻi he meʻá ni. Naʻe ʻikai ke lekooti ʻe Uitenī ia hono loto fekauʻaki mo hono kaniseli ʻa e paʻanga lahi ʻe $3,600, ka naʻe fakahaaʻi ʻe heʻene kaniseli ʻo e ngaahi moʻuá ʻa ʻene loto-lelei ke muimui ʻi he Palōfitá ʻo aʻu ai pē ki he ngaahi meʻa fakatuʻasinó. Naʻá ne maʻu ʻi hono fatongia ʻi he kautahá ha faingamālie ke ngāue vāofi mo e Palōfita ko Siosefa Sāmitá mo e kau taki kehe ʻo e Siasí ʻo ʻoange ki he Siasí ha ngaahi meʻa ke fakahoko ʻaki hono misioná. Naʻe fakahoko ʻe he Kautaha Uouangatahá ha fatongia mahuʻinga ʻi hono fakalele ʻo e Siasí mei he 1832 ki he 1834—ʻo hangē pē ko e fakahoko ʻe Uitenī ʻa e fatongia mahuʻinga ʻi he lotoʻi kautahá.

1. “Balance of Account, 23 April 1834,” josephsmithpapers.org.

2. “Revelation, 1 March 1832 [D&C 78],” 1, josephsmithpapers.org; vakai foki, Tokāteline mo e Ngaahi Fuakava 78:3–4, 9–11. Ko e taimi naʻe pulusi ai ʻa e fakahā ko ʻení ʻi he pulusinga ʻo e Tokāteline mo e Ngaahi Fuakava ʻo e 1835, naʻe liliu ai ʻa e “kautaha ki he Laukongá mo e Ngaahi Fale Fefakatauʻakí” ki he “kautaha ʻo hoku kakaí, ʻi hono tokangaʻi mo fokotuʻutuʻu ʻa e ngaahi ngāue ʻa e fale tukuʻanga koloá ki he masiva ʻo hoku kakaí.” ʻOku kei tuʻu pē ʻa e fakalea ko ʻení ʻi he fakahaá ʻi he ʻahó ni.

3. “Revalation, 12 November 1831 [D&C 70],” ʻi he Revelation Book 1, 124, josephsmithpapers.org; vakai foki, Tokāteline mo e Ngaahi Fuakava 70:1–8.

4. Joseph Smith, “History, 1838–1856, volume A-1 [23 December 1805–30 August 1834],” 209, josephsmithpapers.org.

5. Minutes, 26–27 April 1832, ʻi he Minute Book 2, 24–25, josephsmithpapers.org.

6. “Revelation, 26 April 1832 [D&C 82],” ʻi he Revelation Book 1, 128, josephsmithpapers.org; vakai foki, Tokāteline mo e Ngaahi Fuakava 82:11–12. Ko e taimi naʻe pulusi ai ʻa e fakahā ko ʻeni ʻi he pulusinga ʻo e Tokāteline mo e Ngaahi Fuakava ʻo e 1835, naʻe fetongi ai ʻa e fakalea “ke tokangaʻi fakahangatonu ʻa e & ngaahi fiemaʻu Fakaekoloa & ʻa e Kau Pīsopelikí ki he “ke tokangaʻi ʻa e ngaahi meʻa maʻá e kakai masivá, mo e meʻa kotoa pē ʻoku fekauʻaki mo e kau pīsopelikí,” pea ʻoku kei tuʻu ʻa e fakalea ko iá ʻi he fakahaá ʻi he ʻahó ni.

7. “Revelation, 26 April 1832 [D&C 82],” ʻi he Revelation Book 1, 129, josephsmithpapers.org; vakai foki, Tokāteline mo e Ngaahi Fuakava 82:17, 20. Fakatokangaʻi ange naʻe liliu ʻa e “firm” ki he “rorder” ʻi he pulusinga ʻo e Tokāteline mo e Ngaahi Fuakava ʻo e 1835 pea ʻoku kei tuʻu pē ko e “order” ʻi he Tokāteline mo e Ngaahi Fuakava ʻo e ʻaho ní.

8. “Revelation, 26 April 1832 [D&C 82],” ʻi he Revelation Book 1, 129, josephsmithpapers.org; vakai foki, Tokāteline mo e Ngaahi Fuakava 82:15.

9. Minutes, 26–27 April 1832, ʻi he Minute Book 2, 25, josephsmithpapers.org.

10. Minutes, circa 1 May 1832, ʻi he Minute Book 2, 26, josephsmithpapers.org.

11. Vakai, hangē ko ʻení, Joseph Smith, “Letter to Edward Partridge and Others, 30 March 1834,” ʻi he Oliver Cowdery Letterbook, 30–38, josephsmithpapers.org.

12. “Revalation, 15 March 1833 [D&C 92],” ʻi he Revelation Book 2, 55; vakai foki, Tokāteline mo e Ngaahi Fuakava 92:1–2. Fakatokangaʻi ange naʻe liliu ʻa e “kautahá (firm)” ki he “founga maau (order)” ʻi he taimi naʻe pulusi ai ʻa e fakahā ko ʻení pea ʻoku kei tuʻu pē ia ʻi he ʻahó ni.

13. “Revelation, 4 June 1833 [D&C 96],” ʻi he Revelation Book 2, 61, josephsmithpapers.org; vakai foki, Tokāteline mo e Ngaahi Fuakava 96:6–8. Fakatokangaʻi ange naʻe liliu ʻa e “kautahá” ki he “founga maau (order)” ʻi he taimi naʻe pulusi ai ʻa e fakahā ko ʻení pea ʻoku kei tuʻu pē ia ʻi he ʻahó ni.

14. Vakai, Geauga Co., Ohio, Deed Records, 1795–1921, vol. 17, 360–61, microfilm 20,237, U.S. and Canada Record Collection, Family History Library, Salt Lake City; vakai foki, “Revelation, 27–28 December 1832 [D&C 88:1–126],” ʻi he Revelation Book 2, 45–46, josephsmithpapers.org; vakai foki, Tokāteline mo e Ngaahi Fuakava 88:119.

15. “Prayer, 11 January 1834,” ʻi he Joseph Smith, Journal, Nov. 1832–Dec. 1834, 43–45, josephsmithpapers.org.

16. Newel K. Whitney, “Order from Newel K. Whitney, 18 April 1834,” josephsmithpapers.org.

17. Joseph Smith, “Journal, 1832–1834,” Apr. 10, 1834, page 71, josephsmithpapers.org.

18. “Revelation, 23 April 1834 [D&C 104],” ʻi he Book of Commandments Book C, 25–29, josephsmithpapers.org.

19. Vakai, Max H Parkin, “Joseph Smith and the United Firm: The Growth and Decline of the Church’s First Master Plan of Business and Finance, Ohio and Missouri, 1832–1834,” BYU Studies, vol. 46, no. 3 (2007), 33–34.

20. David J. Whittaker, “Substituted Names in the Published Revelations of Joseph Smith,” BYU Studies, vol. 23, no. 1 (Winter 1983), 103–12.