“Ko e Manatua ʻo e Pekia Fakamaʻatá,” Puipuituʻa ʻo e Ngaahi Fakahaá (2016)
“Ko e Manatua ʻo e Pekia Fakamaʻatá,” Puipuituʻa ʻo e Ngaahi Fakahaá
Ko e Manatua ʻo e Pekia Fakamaʻatá
Ko e taimi naʻe mavahe ai ʻa Siosefa mo Hailame Sāmita ki he fale fakapōpula ʻi Kātesí, ʻi ʻIlinoisi, ke talitali ki ha hopo fakalaó, ko ha tokosiʻi pē naʻa nau mahamahalo ko e mavahe fakaʻosi ʻeni ʻa e toko uá ni mei hona ʻapí. Ko Siosefá naʻe ʻosi tuku-pōpula, fakatangaʻi, mo fakamanamanaʻi kimuʻa ʻe fakapoongi, ka naʻe kei foki mai maʻu pē ke hoko atu hono taki ʻo e Kāingalotú. Mo Hailame foki, kuó ne kātekina ha ngaahi vahaʻa taimi naʻe fakatangaʻi fakataha ai mo e Kāingalotú pea faʻa hao maʻu pē mo mateuteu ke toe langa mo tuiaki atu kimuʻa.
Ka ʻi he hoʻatā efiafi ʻo e ʻaho 27 ʻo Sune 1844, naʻe ʻohofi ai ʻe ha kau fakatanga fakamoveuveu ʻa e Fale Fakapōpula Kātesí ʻo fakapoongi fakatouʻosi kinaua.
Naʻe fuʻu ʻohovale ki he Kāingalotu ʻi Nāvuú ʻa e ongoongo ʻo e pekia fakamamahi ʻa e ongo tautehiná. Naʻe mole ʻi he ʻaho pē taha ʻa honau palōfitá mo ʻenau pēteliaké. Naʻe toe hoko pē foki ʻa Siosefa mo Hailame ki ha tokolahi, ko hanau kaungāmeʻa mo e faʻifaitakiʻanga, ko ha ongo tangata naʻá na tokoniʻi mo tāpuakiʻi kinautolu ʻi he taimi ʻo e faingataʻá. ʻI he ngaahi ngaahi ʻaho, uike, mo e māhina hili hona fakapōngí, naʻe fiu feinga ʻa e Kāingalotú pē ʻe fakamatalaʻi fēfeeʻi ʻa ʻenau fefaʻuhi mo ʻena pekiá. Naʻe tuʻu ʻena ngaahi tohí, ngaahi tohinoá, mo e ngaahi tohi ki he kakaí, fakataha mo e ngaahi fakaʻapaʻapa naʻe paaki kia Siosefa mo Hailamé, hangē ko e taha kuo fakangofua ko e folofola ʻi he Tokāteline mo e Ngaahi Fuakava 135, ko ha fakamoʻoni ki he misiona ʻo e ongo tangata naʻá na ngāue faivelenga kakato pea mo silaʻi ʻena fakamoʻoní ʻaki hona totó.
Ngaahi Tohí
Naʻe tokolahi ha Kāingalotu ʻi Nāvū naʻe ʻi ai hanau ngaahi kaungāmeʻa mo e kau mēmipa honau fāmilí naʻa nau ʻi ha feituʻu mamaʻo ʻaupito mei he koló ʻi he taimi ʻo e fakapoó. Naʻe ʻiate kinautolu ai ʻa e fatongia faingataʻa ke ʻoange ʻa e ongoongó ki siʻona ngaahi ʻofaʻangá.
Naʻe tohi ʻa Vilate Kimipolo ki hono husepāniti ko Hīpá, ʻa ia naʻe ʻi he fakahahake ʻo e ʻIunaiteti Siteití, ke tuʻuaki ʻa e fili palesiteni ʻa Siosefá, “He ʻikai ke u feinga ke fakamatalaʻi atu ʻa e meʻa kuo mau tofanga aí.” “ʻOfa ange ke ʻoua naʻa tuku ʻe he ʻOtuá ke u toe sio ha meʻa tatau mo ia. … Naʻe mamahi ʻa e loto kotoa, pea naʻa mo e ngaahi hala lalahi ʻo Nāvuú ʻoku hangē ʻoku nau tauangaʻá.” Pea tatau mo e tokolahi, naʻá ne fakahaaʻi ʻa ʻene hohaʻa fekauʻaki mo e tuʻu fakatuʻutāmaki ke hoko atu ʻa e ngaohikovia ʻo e Kāingalotú. Naʻe fakatokanga kia Hiipa, “ʻE ngatá ʻa fē, ko e ʻEikí pē ʻokú ne ʻafioʻí.”
Naʻe tohi ʻa ʻAlamaila Meki Kouvi, ko ha kāinga (cousin) ʻo e ongo tautehina Sāmitá, ki hono fāmilí fekauʻaki mo ʻene mamata ki he sino ʻo Siosefa mo Hailamé ʻi hono fakafoki ki Nāvuú. Naʻá ne tohi ʻo pehē, “ʻE tonu ange hoʻomou fakakaukau ki he meʻa ʻoku mau ongoʻí ʻi he meʻa te u lava ʻo fakamatalaʻí, ko e kiʻi meʻa pē ʻeni te u lava ʻo talaatú naʻe ʻikai ke fakatokangaʻi ha fofonga ʻe taʻe-tangi he ʻaho ko iá, ʻi he fuʻu kakai tokolahi naʻe fakatefua aí. Naʻe feʻunga pē ia ke ne fakamolū ha loto ʻoku fefeka ʻi heʻeta vakai ki he siʻi [ʻeʻepa] ʻa e ongo palōfita ʻa e ʻEikí.”
Naʻe kau foki ʻa Sela M. Kimipolo, ʻa ia naʻe ʻi ai hano fatongia mahuʻinga ʻi hono fokotuʻu ʻo e Fineʻofá, ʻi he faʻahinga naʻe mamata ki he fakafoki mai ʻo e ongo pekiá ki he koló. Naʻá ne tohi ki hano kaungāmeʻa ʻo pehē, “ʻE lava ke lelei ange hano fakalaulaulotoa ʻa e ʻata hono talitali ʻo e ongo sino pekiá ki Nāvuú ʻi hano fakamatalaʻi, he naʻe ʻikai ke teitei ngaohi ʻa e pení ʻo taau ke ne fakamāuʻi totonu.” Neongo naʻe mei taʻe-malava ke fakahoʻata tonu ʻa e mamahi ʻa e fuʻu koló kotoa, ka naʻe feinga ʻa Kimipolo ke ne fakamatalaʻi e mamahi siʻa fefine: he naʻá ne ʻalu ke tangutu mo Lusi Meki Sāmita. Naʻe manatuʻi ʻe Sela Kimipolo ʻene pukepuke ʻa e nima ʻo Lusi Meki Sāmitá ʻoku tetetete mo fanongo ki heʻene fehuʻi pē mo tangi, “ʻOku nau lava fēfē ʻo fakapoongi siʻeku ongo tamaiki tangata fakaʻofá, ʻOiauē, ʻoku anga fēfē ʻenau lava ʻo fakapoongi kinauá he ʻokú na mātuʻaki mahuʻinga?”
Ngaahi Tohinoá
Naʻe feinga ha kau faʻu tohi ʻe niʻihi ke lekooti fakaikiiki ʻa e pekia fakamaʻatá pea mo e anga ʻenau meʻa naʻa nau faí, ʻaki ʻenau hiki ha ngaahi fakamatala kimui ʻi heʻenau ngaahi tohinoá. Naʻe ʻikai ke nau nofotaha ʻi he foʻi momenití pea mo e ngaahi hohaʻa ʻo e taimi pē naʻe hoko aí, ʻo hangē ko ia naʻe faʻa fai ʻe he ngaahi faitohí, ka naʻe feinga ʻa e ngaahi fakamatala ʻi he tohinoá ke hiki ʻa e ngaahi fakaikiiki mahuʻingá maʻá e ngaahi toʻu tangata ʻi he kahaʻú mo ʻai ke ʻuhinga mālie fakalaumālie ʻa e meʻa fakamamahí. ʻI heʻenau kumi ki ha fakamatala pe sīpinga kimuʻa ʻo e mole honau ongo takí, naʻe faʻa kumi tokoni ʻa e Kāingalotú ki he Tohi Tapú. Naʻe fakahoa ʻe ha niʻihi tokolahi ʻa e fakapoó ni ki he ngaahi meʻa naʻe hoko ʻi he tohi tapú, mei hono fakapoongi ʻo ʻĒpelí ki he Tutuki ʻo Sīsū Kalaisí. Naʻa nau faʻa lau ʻa Siosefa mo Hailame ʻokú na kau ʻi ha kau mate fakamaʻata tokolahi “naʻe fakapoongi koeʻuhí ko e folofola ʻa e ʻOtuá, pea mo e fakamoʻoni naʻá na maʻú” ʻoku fakamatalaʻi ʻi he tohi Fakahaá. ʻI heʻene peheé, naʻa nau tui kuo lau fakataha ʻa e ongo tautehiná mo kinautolu ʻoku tautapa ki he langí, “ʻE fēfē hono fuoloa ʻe ʻEiki māʻoniʻoni mo angatonu, ʻa e ʻikai ke ke fakamāuʻi mo sāuni ai homau totó kiate kinautolu ʻoku nofo ʻi māmaní?”
Naʻe fakatupu ʻe he ngaahi meʻa naʻe hoko ʻi Kātesí ke fakafonu ai ʻe Siosefa Filitingi ha ngaahi peesi lahi ʻo ʻene tohinoá ʻaki ha fakamatala ki he moʻui, misiona, pea mo e pekia ʻa Siosefa Sāmitá. Naʻe tohi ʻe Filitingi ʻo pehē ko e tūʻuta mai ko ia ʻa e sino ʻo e ongo pekia fakamaʻatá “nae hoko ia ko e meʻa molumalu taha kuo faifaiange pea Mātaʻia ʻe hoku Matá. Neongo ʻene “faʻa [laukonga] ki he kau pekia fakamaʻata ʻo e kuonga muʻá,” naʻe tohi ʻe Filitingi kuó ne hoko tonu ʻi he taimí ni ko ha fakamoʻoni ki he “toko 2 ʻo e kau Tangata maʻongoʻonga taha naʻe silaʻi ʻa e Moʻoni naʻa nau maʻu mo akoʻí ʻaki honau Totó.” ʻI he ikuʻangá, naʻá ne tui, ʻe lau fakataha ʻa Siosefa mo Hailame“ mo e kau pekia fakamaʻata ʻo Sīsū Kalaisí.”
Makehe mei heʻene vakai ki he kau pekia fakamaʻata ʻo e kuohilí ke maʻu ha mahinó, naʻe tokanga ʻa Filitingi ki he kahaʻu ʻo e ngāue ʻa e ʻEikí. Naʻá ne tohi ʻo pehē, “Kuo fakahoko ʻe Siosefa mo Hailame ʻa e meʻa kotoa naʻe lava ke na faí, pea fakatoka ʻa e Fakavaʻe ʻo e ngāue lahi ʻo e ngaahi ʻAho fakaʻosí.” ʻI he makatuʻunga ko iá, naʻe ʻiloʻi pau ai ʻe Filitingi, ko e ngāue naʻe moʻui mo mateakiʻi ʻe Siosefa mo Hailamé ʻe “lava ke fakaʻosi ʻe he kau ʻAposetolo ʻe toko 12 ʻa ia kuo ʻosi fakahinohinoʻi ʻi he meʻa kotoa pē ʻoku kau ki he Puleʻanga ʻo e ʻOtuá ʻi Māmaní.”
Naʻe lekooti ʻe Sina Hanitingitoni Sēkope ʻa ia naʻe sila kia Siosefa Sāmita ʻi he mali tokolahí, ʻa ʻene ʻohovale ʻi heʻene sio ki he “[sino] pekia ʻo e [ongo] Pekia fakamaʻatá,” mo pehē “naʻe ʻikai ke teitei lavelave-ʻiloa ʻe hoku lotó te u mātā tonu ʻi he meʻa fakalilifu ko ʻení.” Naʻe hiki ʻe Sēkope ʻi heʻene tohinoá ʻa e mole lahi ki he fāmili ʻo e ongo tangatá, kakaí, faʻahinga ʻo e tangatá pea pehē foki ki he Siasí, ka ne fakamatalaʻi ʻa Siosefa mo Hailame naʻe ʻikai ko e “Palōfita mo e Pēteliake pē ʻo e Siasi ʻo e Kau Māʻoniʻoni Kimui Ní,” ka ko ha “ongo husepāniti angaʻofa,” “ongo [Tamai] loto-ʻofa,” “ongo taki fakapolitikale fakaʻapaʻapaʻi,” mo e “kaungāmeʻa ki he faʻahinga ʻo e tangatá.”
Ka kia Sēkope, ko hono fakapoongi ʻo Siosefa mo Hailamé ko ha fakamoʻoni ia ki he fonu angahala ʻa e māmaní. ʻI heʻene tohinoá, naʻá ne lotua ai ke fakamahino ʻe he ʻOtuá ʻa e toto taʻe-halaia [kuo] lilingí” mo ʻekea pe “ko e hā hono fuoloa e tangi ʻa e ngaahi uitoú mo e fānau paeá ki muʻa peá ke toki sāuni ʻa e māmaní mo fakangata ʻa e [angakoví]”? ʻI he ʻaho 4 ʻo Siulaí, meimei ko ha uike ia ʻe taha mei he fakapoó, naʻe pehē ʻe Sēkope ko e ʻAho Tauʻatāina ʻeni ki he ʻIunaiteti Siteití, peá ne fakafaikehekeheʻi leva ʻa e tauʻatāina mo e fakamaau totonu faka-ʻAmeliká mo e fakapoongi fitaʻa ʻo e ongo tautehiná. Naʻá ne tohi ʻo pehē, “Ko e fuka ʻo e tauʻatāiná naʻe fakaʻeiʻeikí kuo tō.” “Ko e fonua naʻe [pōlepole] ʻi he [tauʻatāiná] ʻoku [fakameleʻi] ʻeni ʻaki e toto taʻe-halaia.”
Naʻe tohi ʻe Uiliami Keleitoni, ko ha tokotaha hikifonua mei Pilitānia mo e taha ʻo e kau kalake ʻa Siosefa Sāmitá, ʻi heʻene tohinoá, ha fakamatala mātuʻaki fakaʻāuliliki ʻo e founga naʻe fakapoongi ai ʻa Siosefa mo Hailamé, ko ha fakamatala naʻe fakatahtahaʻi mei ha ʻinitaviu ʻo Uiliami Lisiate, Sione Teila, mo ha niʻihi kehe naʻe ʻi ai tonu. Hili ʻene vakaiʻi ʻa e fakamoʻoní, naʻe tukuakiʻi ʻe Keleitoni ha konga lahi ʻo e fakapoó ki he kau ngāue ʻo e puleʻangá, kau ai ʻa e kōvana ʻo ʻIlinoisí, ʻa Tōmasi Footi. Naʻe pehē ʻe Keleitoni, “Kuo tukupā ʻa ʻene tuí pea mo e tui ʻa e Siteití ʻoku totonu ke maluʻi kinautolu mei he kovi kotoa pē.” Neongo ia, ko e kau sōtia naʻe totonu ke nau maluʻi ʻa Siosefa mo Hailamé naʻa nau kaungā-fai kinautolu mo e kau fakatangá. Pea hangē ko Sina Sēkopé, naʻe fakatokangaʻi ʻe Keleitoni ia ha fuʻu faikehekehe lahi ʻi he tauʻatāina fakalotu ʻa ʻAmeliká mo e meʻa moʻoni naʻe tofanga ai ʻa e Kāingalotú. Naʻá ne tohi ai ʻo pehē, “Kuo mole ʻa e tauʻatāiná. Naʻá ne toki tānaki fakamahinoʻi mai naʻe “ʻikai ke fai ha kātoanga fakapuleʻanga ia ʻi Nāvū” ʻi he ʻaho 4 ʻo Siulaí. ʻI he mole ʻa ʻene falala ki he puleʻangá, naʻe tafoki ai ʻa Keleitoni ki he ʻOtuá. Naʻá ne tohi ʻo pehē, “ʻOku mau hanga hake ki hoʻo ʻafió ke ʻi ai ha fakamaau totonu”.
Maau
Naʻe vahevahe ʻe ha niʻihi ʻo e Kāingalotú ʻenau fakafeangai ki he meʻa naʻe hokó ʻaki hano pulusi ha maau ʻi he Times and Seasons, ko ha nusipepa naʻe fakalele ʻe he Siasí. Naʻe kau ʻi he kau faʻu maau ʻiloá ha niʻihi hangē ko ʻIlisa R. Sinoú, Uiliami W. Felipisi, Sione Teila, mo Paʻale P. Pālati pea pehē ki ha Kāingalotu ʻoku ʻikai ke maʻu honau hingoá. Naʻe kehekehe pē ʻa e ngaahi ongo naʻe tukutaha ki ai e tokanga ʻa e kau faʻu punaké. Naʻe hā ʻi he faʻu ʻa Uiliami W. Felipisi ʻo e “ʻOku Mau Fakamāloó” ʻa e tukufakaholo kuo tuku ʻe Sosefá mo ʻene ʻunaloto ki heʻene ngāue ʻi he tafaʻaki ʻe taha ʻo e veilí. ʻOku tala ʻe he faʻu ʻa Sione Teila ʻo e “Fakafoki Mai Muʻa Hoku Palōfita ʻOfeiná (O Give Me Back My Prophet Dear)” ʻa ʻene fakaʻānaua fekauʻaki mo e siʻi mole ʻa e ongo tautehina ʻofeiná. Naʻe pulusi ʻeni mo ha ngaahi maau kehe ko ha fakalea mo ha ngaahi fakafasi manakoa naʻe fokotuʻu. Naʻe toki fakakau atu kimui ha ngaahi maau siʻi ki he tohi himi ʻa e Kāingalotú pea ʻoku kei hivaʻi pē ia he ʻahó ni.
Ko ha lahi ʻo e ngaahi māú naʻa nau tuifio ʻa e mamahi mo e ʻita ʻi he fakapoó ʻo kau ai ʻa e kau mate fakamaʻata ʻi he kuohilí, ʻo aʻu kia Sīsū Kalaisi. Naʻe tohi ʻe ʻIlisa R. Sinou ʻi heʻene maau naʻe pulusi ʻi he pulusinga ʻo e Times and Seasons, he ʻaho 1 ʻo Siulai 1844, ʻa ia naʻá ne talaki ʻa e fakapoó:
ʻOku pulonga ʻeni ʻa Saione—ʻo ne tēngihia ha taki ʻi māmani:
Kuo Pekia ʻa e Palōfitá mo e Pēteliaké!
Ko e ngāue kovi taha ʻoku ʻilo ʻe he faʻahinga ʻo e tangatá pe tēvoló
Kuo telio siʻi ongo tautehiná ʻo pulia, talu pē mei Kālevale!
Kuó na fakamoʻoniʻi, naʻá na taha ʻi heʻena moʻuí,—pea ʻokú na kei taha pē ʻi he maté
Ko e mālohi ʻo ʻena feohí—ʻa ʻena ʻofa moʻoní:
Naʻá na fai-pau ki hona misioná, peá na kei tuʻu ʻaliʻaliaki ʻo aʻu ki he maté,
Fakamatala fakaʻētita
ʻI hono vahevahe ʻe he tokolahi ʻo e Kāingalotú ʻenau faʻu mo e tali fakataautaha ki he meʻa fakamamahi naʻe hokó ʻi ha ngaahi tohi, tohinoa, mo e ngaahi māú, naʻe ongoʻi ʻe he kau taki mo e kau fakafofonga ʻo e Siasí ha fatongia ke lipooti mo fakamatala ki he ongo pekiá ʻi ha ngaahi fakamatala fakaʻētita, pea ʻi heʻenau fai iá ʻoku nau feinga ai ke tuku atu ha ongoongo mo ha fakafiemālie ki he Kāingalotu ʻi he potu kotoa pē. ʻI he ʻaho 1 ʻo Siulaí, naʻe fakakau atu ai ʻe he ongo ʻAposetolo ko Uiliate Lisiaté mo Sione Teila ʻa hona hingoá ki ha fakamatala ʻi he Times and Seasons ʻa ia naʻe fai ʻe he ʻētita faiongoongo ʻo e nusipepá ko Uiliami W. Felipisí, he naʻá na ʻi he Fale Fakapōpula Kātesí mo e ongo tautehiná, ʻi he taimi naʻe ʻohofi ai ʻe he kau fakatangá. Naʻe kole ʻe he fakamatala fakaʻētitá ki he Kāingalotú ke nau “pīkitai ki heʻenau tui naʻe ʻoange kiate kinautolu ʻi he ngaahi ʻaho kuo ʻosí” pea fokotuʻu ʻa Siosefa mo Hailame ʻi he laine ʻo e kau pekia fakamaʻata ʻo e tohi tapú. Naʻe fakamanatu ʻe he kau tangata ʻe toko tolú ni ki he Kāingalotú ko e “fakapoongi ko ia ʻo ʻĒpelí; ko e fakapoongi ʻo e kakai e laungeaú; ko e toto angatonu ʻo e kau palōfitá kotoa, meia ʻĒpeli kia Siosefa, kuo luluku ʻaki ia ʻa e taʻataʻa lelei taha ʻo e ʻAlo ʻo e ʻOtuá, ko e fakaʻilonga mahino ʻo e fakamolemole ʻo e angahalá, ʻokú ne ʻave pē ʻa e tauteá ki he ngataʻanga ʻo e moʻui ʻa e taha kotoa, pea ʻe hoko atu; pea monūʻia ā ka kinautolu te nau faivelenga ki he ngataʻangá.”
ʻI he pulusinga hoko ʻo e Times and Seasons, naʻe pulusi ai ʻe Felipisi ha fakamatala fakaʻētita lōloa ange ʻo kau ki he fakapoó naʻe kau ai ha lipooti ʻo e ngahi lea ʻa Siosefa ʻi heʻene mavahe ke ʻalu ki Kātesí. Naʻe pehē ai ʻe he Palōfitá, “ʻOku ou ʻalu ʻo hangē ha lami ke tāmateʻi; ka ʻoku nonga hoku lotó ʻo hangē ko e pongipongi malū ʻi he faʻahitaʻu māfaná: ʻoku ou maʻu ʻa e konisēnisi ʻoku ʻataʻatā mei he fai hala ki he ʻOtuá pea ki he kakai kotoa pē: Te u mate ʻoku ou taʻe-halaia.” Naʻe toe lipooti foki ʻe Felipisi ko e “kupuʻi lea fakaʻosi ʻa Siosefá ko e ‘ʻE ʻEiki ko hoku ʻOtua!’” ʻI he meimei taimi tatau hono pulusi ʻe Felipisi ʻene tohi fakaʻētitá, naʻe tohi ʻe Uiliate Lisiate ia haʻane fakamatala fakaʻauliliki pē ʻaʻana ki he fakapoó, ʻa ia naʻe kau ai hono fuofua lipooti ʻo e ngaahi lea fakaʻosi ʻa Hailamé: “Ko ha tangata mate au.” Naʻe pulusi e fakamatala ʻa Lisiaté ʻi he ʻaho 24 ʻo Siulai 1844, ʻi he nusipepa fakalotofonua ʻo Nāvuú.
Ko e Tokāteline mo e Ngaahi Fuakavá
Neongo naʻe fakakaukau ha kakai tokolahi mei tuʻa ʻe mate ʻa e Siasí ʻi he ʻosi hono fakapoongi ʻo Siosefa mo Hailamé, ka naʻe kei hoko atu pē ngāue ʻa e ʻOtuá neongo ʻa siʻena pekiá. ʻI he taʻu ʻe ua fakaʻosi ʻo e moʻui ʻa Siosefá, naʻe ngāue e kau taki ʻo e Siasí ʻi ha pulusinga foʻou ʻo e Tokāteline mo e Ngaahi Fuakavá. Pea kimuʻa pē pea pekia ʻa Siosefa mo Hailamé, naʻá na ʻosi fakahā mo ʻamanaki ko e ʻaho ʻo e pulusí ʻi he kongaloto ʻo e māhina ko Siulai, 1844.
Naʻe kiʻi toloi siʻi hono pulusí koeʻuhí ko e taʻe-manonga naʻe hoko kimuʻa pea mo e hili ʻa e ngaahi meʻa ʻi he Fale Fakapōpula Kātesí. ʻI he ʻosi siʻi pē ʻa e fakapoó, naʻe fai ha tuʻutuʻuni ke fakahoko ʻa e pākí kae toe tānaki atu ha vahe kehe ke “fakaʻosi” ʻa e tohí ʻaki ha fakamatala fekauʻaki mo e pekia ʻa e ongo tautehiná. ʻOku ngalingali naʻe tohi ʻa e fakamatalá ʻi Siulai pe ʻAokosi, koeʻuhí he naʻe pulusi pea fakaʻaongaʻi ʻa e tohí ʻi Sepitema. Ko e fakamatala ko ʻení ʻoku ui ko e “Ko Hono Fakapoongi ʻo Siosefa mo Hailame Sāmitá,” kuo fakatahatahaʻi pea tali ko e folofola ʻi he Tokāteline mo e Ngaahi Fuakava 135.
Talu mei he kamata ʻo e senituli 20, mo e fakakaukau ʻa e kau fai-fakamatalá mo e kau taki ʻo e Siasí naʻe hiki ʻa e fakamatalá ʻe Sione Teila, ko ha ʻAposetolo mo e pule ʻi he ʻōfisi pākí. Naʻe ʻikai pē ke teitei pehē ko ha ngāue ʻeni ʻa Teila ʻi he lolotonga ʻo ʻene kei moʻuí, neongo ia, mahalo pē ko ha ngāue ʻa Teila, Lisiate, Felipisi, pe ko ha taha pē naʻe tokoni ʻi he ʻōfisi paaki ʻo Nāvuú. ʻOku tatau ai pē pe ko hai ʻoku ʻaʻana ʻa e fakamatalá, ka naʻe fakaʻaongaʻi lahi ʻe he fakamatalá ʻa e fakamoʻoni siotonu ʻa Teila mo Lisiaté pea toe toʻo mei he ngaahi fakamatala fakaʻētita kimuʻá pea mo e ngaahi fakamatala naʻe pulusi ʻe he Siasí, ʻa ia naʻá na tokoni ʻi hono tohí. Pea hangē pē ko e ngaahi fakamatala naʻe ʻosi pulusi kimuʻá, naʻe toe fakaongo mai ʻe he fakamatala ko ʻení ʻa e taumuʻa ʻo e fakapoó, taʻehalaiá, mo e fakamaau fakalangí—ko ha ngaahi kaveinga naʻe toe hā tatau ʻi he ngaahi tohi fakafoʻituitui ʻa e Kāingalotú.
Koeʻuhí naʻe fiemaʻu ʻa e ngaahi mīsini pākí ke nau fakahū ʻa e fakamatalá ki ha meʻa kuo ʻosi taipeʻi (ka naʻe teʻeki paaki), naʻe paaki ai ʻa e kongá ʻi ha mataʻitohi mata iiki ange, ʻo kehe mei he toenga ʻo e pulusingá pea ʻi ai ha peesi ia ʻe taha mo e konga ʻi he vahaʻa ʻo e vahé mo e fakahokohoko fakamotuʻaleá. Koeʻuhí ko hono fakahū ki he Tokāteline mo e Ngaahi Fuakavá, naʻe lahi ai hano lau mo fakaʻaongaʻi ʻa e fakamatala ko ʻení pea kuo hoko ia ko e fakamatala hisitōlia fakaʻofisiale ki he pekia ʻa Siosefa Sāmita mo hono taʻokete ko Hailamé.