“Naʻe ʻi he Kamataʻangá Foki ʻa e Tangatá mo e ʻOtuá’” Puipuituʻa ʻo e Ngaahi Fakahaá (2016)
“Naʻe ʻi he Kamataʻangá Foki ʻa e Tangatá mo e ʻOtuá,” Puipuituʻa ʻo e Ngaahi Fakahaá
“Naʻe ʻi he Kamataʻangá Foki ʻa e Tangatá mo e ʻOtuá.
Mei he konga kimui ʻo Sānualí ʻo aʻu ki ʻEpeleli ʻo e 1833, naʻe kau ai ʻa Siosefa Sāmita mo ha kau tangata kehe ʻe toko 15 ki he 20 ki he Akoʻanga ʻo e Kau Palōfitá, ʻi he falekoloa ʻo Niueli K. Uitenií ʻi Ketilani, ʻi ʻOhaiō. ʻI heʻenau ngaahi fakatahá, naʻa nau hiva mo lotu, mo ako ha ngaahi kaveinga kehekehe ʻo kamata mei he ngaahi meʻa taʻe-olí ʻo aʻu ki he meʻa toputapú, mo fakaʻaongaʻi ʻa e ngaahi meʻafoaki fakalaumālié. ʻI he lolotonga ha taha ʻo e ngaahi kalasi ko ʻení ʻi he ʻaho 27 ʻo Fēpuelí—ko e ʻaho tatau ia naʻe maʻu ai ʻa e fakahā ki he Lea ʻo e Potó—naʻe ueʻi ʻa Tēvita W. Pāteni ʻe he Laumālie Māʻoniʻoní ke ne hivaʻi ha foʻi himi ʻi ha lea taʻe-ʻiloa. Naʻe ʻi ai ha taha naʻe ʻi ai, mahalo ko Sitenei Likitoni, naʻe fakatonuleaʻi ki he toengá. Naʻe fekauʻaki ʻa e himí mo e mata meʻa-hā-mai ʻa ʻĪnoké ʻo hangē ko ʻene hā ʻi he toe lililu ʻe Siosefa Sāmita ʻa e tohi Sēnesí.
Mahalo naʻe meimei ke ʻiloʻi ʻe he tokolahi taha ʻo e kau tangata ʻi he akoʻangá ʻa e mata meʻa-hā-mai ʻa ʻĪnoké. Naʻe hiki ia ʻi ha taʻu ʻe ua kimuʻa pea pulusi ʻi he Evening and Morning Star (ko ha nusipepa ʻi he kamata mai ʻa e Siasí) ʻi ʻAokosi 1832, naʻe ʻomai ʻe he meʻa-hā-maí ha vakai fakalūkufua ki he hisitōlia ʻo e tangatá—ʻi he fakalea ʻo e himi naʻe fakatonuleaʻi ʻa Pātení, naʻe fakahā kia ʻĪnoke “ʻa e meʻa kuo hokó pea naʻe hoko pea ʻoku ʻi ai pea ʻe hoko maí.” Naʻe toe ʻoange foki ʻe he meʻa-hā-maí ki he kau mēmipa ʻo e Siasí ha taha ʻo e ngaahi fuofua fakakaukau ki he moʻui kimuʻa ʻi ha maama fakalaumālié. Naʻe folofola ʻa e ʻEikí ki he palōfita ʻo e kuonga muʻá, “Naʻá ku fakatupu ʻa e māmani, mo e tangatá ʻi he teʻeki ai ke nau ʻi he kakanó” (Mōsese 6:51). Naʻe toe fakaongo mai ʻe he fakatonulea ʻo e himi naʻe fai ʻi he loki akó ʻa e fakalea naʻe fakahaá: “Naʻe mamata ki he taimi naʻe ngaohi ai ʻene tamai ko ʻĀtamá pea naʻe mamata naʻe ʻi ʻitāniti ia kimuʻa ʻoku teʻeki fuatautau ha momoʻi efu ʻi he meʻafuá.”
ʻOku ʻi he toe fakaleleiʻi ʻe Siosefa Sāmita ʻa e Tohi Tapú, ʻo kau ai ʻa e mata meʻa-hā-mai ʻa ʻĪnoké, ha ngaahi fakakaukau maʻongoʻoga fekauʻaki mo e moʻui ʻi he maama fakalaumālié pea mo e fengāueʻaki ʻa e faʻahinga ʻo e tangatá mo e langí. Ka naʻe fakalika mai pē, kae ʻikai fakamatalaʻi fakaʻāuliliki. Te tau lava ke ongoʻi ʻi he himi naʻe fakatonuleaʻí ʻa e fiefia naʻe ongoʻi ʻe he kau fuofua mēmipa ko ʻení ʻi heʻenau fakalaulaulotoa ki he ʻuhinga ʻo e ngaahi fakalika ko ʻení. Ka te tau lava pē ke mateʻi ʻa e meʻa ʻe tō ʻe he ngaahi fakalika ko ení ʻi he fakakaukau ʻa Siosefa Sāmita mo hono ngaahi kaungā ako ʻi he akoʻangá.
ʻI he ʻaho 6 ʻo Meé, ko ha ngaahi uike siʻi pē ia mei he tutuku ʻa e akoʻangá ki he faʻahitaʻu māfaná, naʻe maʻu ʻe Siosefa Sāmita ha fakahā ʻo ʻomai ha ngaahi fakaikiiki lahi ange fekauʻaki mo e maama fakalaumālié. ʻOku maʻu ʻi he taimí ni ʻi he Tokāteline mo e Ngaahi Fuakava 93, pea ʻoku mavahe ai ʻa e fakahaá mei he ngaahi fakakaukau tukufakaholo faka-Kalisitiane angamaheni fekauʻaki mo e natula ʻo e faʻahinga ʻo e tangatá, mo fakaava ai ha ngaahi mālohi fakaofo foʻou ki hotau tuʻunga fakalaumālie ʻi he kuohilí, tuʻunga maaʻusia ʻi he kahaʻú, pea mo ʻetau fekauʻaki mo e ʻOtuá.
Talu mei he senituli hono nimá mo e fokotuʻu ʻe he fakakaukau faka-Kalisitiané ha vanu ʻoku ʻikai meimei lava ʻo foua, ʻi he vahaʻa ʻo e Tupuʻangá mo ʻEne ngaahi fakatupú. Naʻe tui ʻa e kau Kalisitiané ko e faʻahinga ʻo e tangatá, naʻe fakatupu mei he halaʻatā. ʻOku ʻikai ko ha tangata ngāue fakameaʻa ʻa e ʻOtuá ʻokú ne toe fakafōtunga ha ngaahi nāunau kuo ʻosi ʻi ai ka ʻoku nau faikehekehe moʻoni pea kehe mei Heʻene fakatupú—ʻo fakamisiteli mo ʻikai lava ke ʻiloʻi. Ko hono fakamatalaʻi ko ia ʻe he Tohi Tapú ʻa e vā ʻi he mātuʻá mo e fānaú ki hotau vā mo e ʻOtuá naʻe lahi pē ke mahino ko ha lea fakatātā kae ʻikai ko ha fekāingaʻaki tonu. Kapau ʻe toe kehe ha fakakaukau mei heni, ʻi he anga ʻo e fakafuofua ʻa e meimei kau fakakaukau faka-Kalisitiane tokolahi, ko hono tukuhifo ia ʻo e ʻOtuá ke maʻulalo pe hikiʻi hake ʻa e tuʻunga ʻo e faʻahinga ʻo e tangatá, ka ʻoku fakatuʻutāmaki.
Ko e fakahā ʻo e ʻaho 6 ʻo Meé, naʻe ʻikai toe ufi pea mo foʻou, ka naʻe toe motuʻa mo angamaheni pē. Pea hangē ko e ngaahi fakahā lahi ʻa Siosefa Sāmitá, naʻá ne fakafoki mai ha ngaahi moʻoni naʻe mole ʻa ia naʻe ʻiloʻi lelei ʻe he kakai ʻo e tohi tapú, pea ʻi he meʻa ko ʻení ko e ʻAposetolo ko Sioné. Naʻá ne tala naʻe “ʻi he kamataʻangá [ʻa Kalaisi] mo e tamaí,” pea “naʻe ʻi he kamataʻangá foki ʻa e tangatá mo e ʻOtuá.” Naʻá ne fakahalaki ʻa e maʻu fuoloa ko ia naʻe hala ha meʻa naʻe fakahoko ʻaki ʻa e fakatupú: “Ko e ʻatamai potó , pe ko e Maama ʻo e moʻoní, naʻe ʻikai ke fakatupu pe ngaohi, pea ʻoku ʻikai foki ke lava.”
Naʻe ʻomai ʻe he fakahaá ha moʻoni lahi ange fekauʻaki mo e natula ʻo e ʻOtuá mo e natula ʻo e tangatá. ʻOkú ne fakaongo mai ʻa e fakamatala ʻa e Tohi ʻa Molomoná mo e himi ʻa Tēvita Pātení ʻaki hono fakamatalaʻi ʻo e moʻoní ko ha “ʻiloʻi ʻo e ngaahi meʻa ʻo hangē ko honau anga ʻoku ʻi aí, pea naʻa nau ʻi aí, pea te nau hoko ki aí.” Naʻe foaki mai ʻa e ngaahi fakakaukau ko ʻeni ki he kuohilí, lolotongá, mo e kahaʻú ke “lava ʻo mahino mo ke ʻiloʻi ʻa e founga ke lotú mo ʻiloʻi ʻa e meʻa ʻoku ke lotu ki aí.” Naʻe fekauʻaki fakapatonu pē ʻa e fakahaá mo e tuʻunga kimuʻa ʻo e ʻOtuá pea mo e nāunau lāngilangiʻia ʻe lava ke aʻusia ʻe he faʻahinga ʻo e tangatá. Naʻe fakahā kia Siosefa Sāmita ko Sīsū Kalaisí naʻe fakalakalaka ke hoko ʻo hangē ko ʻEne Tamaí. Naʻe ʻikai ke Ne “maʻu mei he fonú ʻi he kamataʻagá” ka naʻe “fai atu mei he ʻaloʻofa ki he ʻaloʻofa” ʻo aʻu ki Heʻene maʻu ʻa e fonu ʻo ʻEne Tamaí. Ko e meʻa tatau pē, ʻoku maʻu ʻe he faʻahinga ʻo e tangatá ha tuʻunga malava faka-ʻOtua. Ko e houʻeiki tangata mo fafine ko ia ʻoku nau tauhi e ngaahi fekau ʻa e ʻOtuá te nau “maʻu ʻa e ʻaloʻofa ki he ʻaloʻofa” kae ʻoua ke nau “maʻu [foki] mei hono fonú pea mo fakalāngilangiʻi ʻiate au ʻo hangē ko au ʻi he tamaí.” ʻOku toe fakafoki mai ʻe he ngaahi fakakaukau ko ʻení ʻa e “ngaahi meʻá ʻi honau tuʻunga [totonú]” ʻa ia ko ha ʻilo motuʻa ki he fengāueʻaki ʻa e ʻOtuá mo ʻEne fānaú pea holoki ai ʻa e vāmamaʻo lahi ʻi he Tupuʻangá mo ʻEne fakatupú ʻa ia naʻe maʻu ʻe he Kāingalotú mei he tukufakaholo faka-Kalisitiané.
Naʻe fakalaulauloto ʻa Siosefa Sāmita ʻi he toenga ʻo ʻene moʻuí ki he ngaahi tūkunga ʻo e ngaahi akonaki fakaofo ʻo e fakahā ko ʻení. ʻI ha ngaahi taʻu kimui mei ai ʻi Nāvū, naʻá ne fakamatalaʻi kakato ʻaupito ʻa e ngaahi moʻoniʻi meʻá ni ʻi heʻene malanga ʻi heʻene konifelenisi fakaʻosí. ʻI hono toe fakaongo atu ʻa e ngaahi lea ʻo e fakahaá, naʻá ne akoʻi ai ko e tangatá mo e fefiné ʻokú na fetākinima taʻengata mo e ʻOtuá mo malava ke tatau mo ia ʻaki haʻana “fakalakalaka mei ha kiʻi meʻa siʻisiʻi ki ha meʻa lahi ʻaupito,” kae ʻoua kuo fāifai pea na nofo “ʻi he fiefia taʻengatá.” Naʻá ne lea ʻo fakapapauʻi mei he fakahaá, ʻo ne akoʻi: “Ko e laumālie, mo e ʻatamai ʻo e tangatá, naʻe tupu ia mei fē? ʻOku pehē ʻe he kakai akó, naʻe ngaohi ia ʻe he ʻOtuá ʻi he kamataʻangá, ka ʻoku ʻikai ke pehē. ʻOku ou ʻiloʻi lelei ange ʻe au. Kuo fakahā mai ia ʻe he ʻOtuá kiate au.”