Talamuʻakí

ʻOku tui ʻa e Kāingalotu ʻo e Ngaahi ʻAho Kimui Ní ki ha ʻOtua ʻofa ʻoku folofola ki Heʻene fānaú “ʻo tatau pē ʻi he ngaahi kuongá ni mo e ngaahi kuonga ʻi muʻá, pea tatau pē ʻi he ngaahi kuonga ʻi muʻá mo e ngaahi kuonga ʻe hoko maí” (1 Nīfai 10:19). ʻOku hā ʻa e tefitoʻi moʻoni mahuʻinga ko ʻeni ʻo e ongoongolelei kuo fakafoki maí ʻi he folofola ʻa e Kau Māʻoniʻoni ʻi he Ngaahi ʻAho Kimui Ní, ʻa ia ʻoku ʻi ai ʻa e ngaahi lekooti ʻo e fengāueʻaki ʻa e ʻOtuá mo ʻEne fānaú ʻi he kuohilí, pea pehē foki ki Heʻene ngaahi folofola kia Siosefa Sāmita mo e kau palōfita kehe ʻi he ngaahi ʻaho kimui ní.

Ko e tohi Tokāteline mo e Ngaahi Fuakavá ko ha fakamoʻoni ia ki he taumalingi hokohoko mai ʻa e fakahaá. ʻOku tali ʻe he vahe takitaha ha ngaahi fehuʻi mahuʻinga, fakahā mai ha ngaahi moʻoni mahuʻinga, pe fai mai ha fakahinohino ʻoku lava ke faí. Ko e ngaahi fakahaá ni ko e fua ia ʻo e fefolofolai hokohoko ʻi he ʻEikí mo Hono kakaí. Ka ʻi he ngaahi meʻa lahi, ʻoku ʻi he Tokāteline mo e Ngaahi Fuakavá pē ha vaeua ʻo e fefolofolaí—ko e fakahā ʻo e ngaahi tali ʻa e ʻEikí. ʻI he foungá ni, ʻoku makehe ai ʻi he ngaahi tohi folofola ʻa e Kāingalotu ʻi he Ngaahi ʻAho Kimui Ní. ʻI he Tohi Tapú, Tohi ʻa Molomoná, mo e Mataʻi Tofe Mahuʻingá, ko hono akoʻi ʻo e ongoongoleleí ʻoku faʻa fakahaaʻi ia ʻaki ha talanoa. ʻOku ʻomai ʻe he talanoá ha fanga kiʻi fakalika ʻoku tokoni ke tau fakaʻuhingaʻi ʻa e ngaahi akonakí mo fakatokangaʻi ʻa e founga ʻo ʻenau tākiekina ʻa e moʻui ʻa e houʻeiki tangata mo fafine ʻo e folofolá. Ka ʻoku ʻikai ke ʻi he Tokāteline mo e Ngaahi Fuakavá ʻa e ngaahi talanoa ki he puipuituʻa ʻo e ngaahi fakahaá.

Neongo ko e ngaahi ‘uluʻi vahé naʻe fakaleleiʻi ʻi he 2013 pea ʻokú ne ʻomi ha puipuituʻa maʻá e ngaahi fakahaá, fakahinohino, mo ha ngaahi fanongonongo ʻi he Tokāteline mo e Ngaahi Fuakavá, ka ʻoku ʻikai ke nau fakamatalaʻi kakato. Ko e hā ʻa e ngaahi fehuʻi naʻá ne fakatupu ʻa e ngaahi fakahaá? Ko e hā e ʻuhinga ʻo e ngaahi tali ʻa e ʻEikí kiate kinautolu naʻe fai ki ai ʻa e fakahaá? Naʻe tali fēfē ʻe kinautolu naʻa nau fanongo ki he ngaahi fahaaá ʻa e ngaahi akonaki foʻoú? Ko e Puipuituʻa ʻo e Ngaahi Fakahaá ko hano fakatahatahaʻi ia ʻo ha ngaahi talanoa ʻoku feinga ke ne tali ʻa e ngaahi fehuʻi ko ʻení. Naʻe fai ʻeni mei he anga ʻo e vakai ʻa ha kakai naʻa nau foua kinautolu ʻi honau puipuituʻa totonú, ʻoku ʻomi ʻe he ngaahi fakamatalá ni ha ʻilo ki he ʻuhinga ʻo e ngaahi fakahaá pea mo tokoni ke tau vakai kiate kinautolu ʻi ha fakakaukau ʻoku foʻou.

Ko e ngaahi talanoa ʻi he fakatahatahaʻi ko ʻení, ʻa ia ʻoku fai ʻi he meimei vahe kotoa ʻi he Tokāteline mo e Ngaahi Fuakavá, naʻe hiki ia ʻe he kau faihisitōlia ʻi he Potungāue Hisitōlia ʻa e Siasí. ʻI hono fakamatalaʻi ʻo e ngaahi talanoa ko ʻení, ʻoku fakatou fakaʻaongaʻi ai ʻe he kau fatu tohí ʻa ʻenau tui ki he ongoongolelei kuo fakafoki maí mo ʻenau ako mo e taukei ʻi he hisitōlia ʻo ʻAmeliká mo e hisitōlia ʻo e Kau Māʻoniʻoni ʻi he Ngaahi ʻAho Kimui Ní. Naʻe mātuʻaki mahuʻinga ʻaupito ki he ngaahi fakamatala ko ʻení ʻa e Polōseki ki he Ngaahi Pepa ʻa Siosefa Sāmitá (Joseph Smith Papers Project), ʻa ia kuó ne ʻomai ha fakavaʻe ki ha ngaahi poto fakaʻāuliliki ʻoku totonu ke faʻu kotoa mei ai hono fakaʻuhingaʻi fakahisitōlia ʻo e moʻui mo e ngāue ʻa Siosefa Sāmitá. Ko e ngaahi fakamatala mahuʻinga ki he Ngaahi Pepa ʻa Siosefa Sāmitá ʻi he Puipuituʻa ʻo e Ngaahi Fakahaá ʻoku meimei ke nau taki ʻa e kau laukongá ki he ngaahi tohi mo e ngaahi fakamatala naʻe fakangofua ʻi he josephsmithpapers.org.

ʻOku mau fakatauange he ʻikai ngata pē ʻi hano ʻoatu ʻe he ngaahi fakamatalá ni ki he kau mēmipa ʻo e Siasí ha mahino lahi ange ki he ngaahi fakahaá, kae kau foki ʻi ai mo ha houngaʻia lahi ange ʻi he founga ʻo e folofola ʻa e ʻOtuá ki Heʻene fānaú “i heʻenau vaivaí, ʻo fakatatau mo ʻenau leá, koeʻuhí ke mahino ia kiate kinautolu” (T&F 1:24).