Hisitōlia ʻo e Siasí
Sese Kause: Tokoni ki he Palōfitá

“Sese Kause: Tokoni ki he Palōfitá,” Puipuituʻa ʻo e Ngaahi Fakahaá (2016)

“Sese Kause: Tokoni ki he Palōfitá,” Puipuituʻa ʻo e Ngaahi Fakahaá

Sese Kause: Tokoni ki he Palōfitá

T&F 81

Robin Scott Jensen

Naʻe foua ʻe he Siasi ʻi he kamataʻangá ha ngaahi liliu mahuʻinga ki hono fokotuʻutuʻú ʻi ha kiʻi vahaʻa taimi nounou. ʻE lava ke muimuiʻi ʻa e ngaahi liliu ko ʻení ʻi hano lau ʻa e ngaahi fuofua fakahā naʻe fai ki ha niʻihi fakafoʻituitui ʻi he Tokāteline mo e Ngaahi Fuakavá. Ki he kau laukonga ʻo onopōní, ko ha niʻihi ʻo e ngaahi ʻuluaki fakahaá ʻoku lau ki ha ngaahi faʻunga pe niʻihi fakafoʻituitui ʻoku ʻikai fuʻu ʻiloʻi. Ko e taha ʻo e faʻahinga fakahā peheé, naʻe fai ia ʻi he ʻaho 15 ʻo Māʻasi 1832 (ʻoku hoko ʻi he taimí ni ko e Tokāteline mo e Ngaahi Fuakava 81), naʻe fai ia ki ha taha mātuʻaki taʻe-ʻiloa ʻi he hisitōlia ʻo e Siasí: ko Sese Kause. Naʻe fanauʻi ʻa Sese Kause ʻi he 1784 ʻi Penisilivēnia pea nofo ʻi ha taimi ʻi Tilauea. Naʻá ne kau ki he Sōsaieti ʻo e Ngaahi Kaungāmeʻá (ko e kau Kueká) ʻi he 1806, mali mo Maʻata Sionisoni ʻi he 1815, pea hiki ki ʻOhaiō ʻi he taʻu hono hokó. Hili ha taʻu ʻe nima mei ai, naʻá ne toe foki pē ki Tilauea. Hili ʻa e siʻi mālōlō hono ʻuluaki uaifí ʻi he 1828, naʻá ne hiki ke ofi ange ki hono kāingá—ʻa ia naʻa nau hoko ko e kau mēmipa ʻo e Sōsaieti Fakatahataha ʻo e Kakai Tui ki he Toe Hā Mai ʻa Kalaisí (kau Sieká)—ki ha tokoni ʻi hono tauhi ʻene fānaú. ʻI he 1829, naʻá ne kau ai ki he tui ʻa e kau Sieká. Naʻá ne toe mali ʻi he 1830 kia Mineva ʻIlisa Pailami pea nofo ʻi ha kolo Sieka ʻi he ʻIunioni Noate, ʻŌhaioó, ʻi ha maile pe ʻe 15 mei Ketilani ʻi ʻŌhaiō.

Ko e founga naʻe papitaiso ai ʻa Sesé ʻoku ʻikai ʻiloʻi, ka naʻe vave ʻene maʻu ʻa e falala ʻa Siosefa Sāmitá pea aʻu ʻo ʻiloa ʻi he Siasí. Naʻe fokotuʻu ʻi he ʻaho 8 ʻo Māʻasi 1832, ʻi ʻOhaiō ʻa Kause mo Sitenei Likitoni ko e ongo tokoni kia Siosefa Sāmita ʻi he kau palesitenisī foʻou naʻe toki fokotuʻu ʻo e kau palesitenisī ʻo e lakanga fakataulaʻeiki māʻolungá. Naʻe ʻosi fakahoko foki hono fokotuʻu ʻo Siosefa ko e palesiteni ʻo e lakanga fakataulaʻeiki māʻolungá ʻi Sānuali. Naʻe hoko ʻa e kau palesitenisī ko ʻení ko e fakamelomelo ia ki he Kau Palesitenisī ʻUluaki ʻo e Siasí.

Naʻe ʻikai ke ngata pē ʻi he hoko ʻa Kause ko e tokoni kia Siosefa Sāmitá, ka naʻe toe ngāue fakafaifekau foki, ʻo fononga ki Mīsuli ʻi ha ngāue ʻa e Siasí, pea hoko ko ha tangata tohi kimui ange ʻi hono toe fakatonutonu ʻo e Tohi Tapú, naʻe ʻiloa kimui ko e Liliu ʻa Siosefa Sāmitá. Hangē ko e kau fuofua mēmipa tokolahi kehe ʻo e Siasí, naʻá ne fakahaaʻi ʻa ʻene māteakiʻi ʻa ʻene tui fakalotu foʻoú ʻi heʻene ngāue ʻi he tokoniʻi ʻa e fokotuʻu ʻo Saioné.

Naʻe hoko foki ʻa Sitenei Likitoni, ʻa ia naʻe papitaiso ʻi ʻOhaiō ʻi he konga kimui ʻo e 1830 mo ʻosi hoko ko ha tangata tohi kia Siosefa Sāmitá, ko ha tupuʻanga mo e maʻuʻanga ʻo ha ngaahi fakahā lahi. Neongo ia ko e fakahā ʻoku hoko he taimí ni ko e Tokāteline mo e Ngaahi Fuakava 81, ko e ʻuluaki fakahā ia naʻe fakapatonu kia Sese Kausé. Neongo ʻoku ʻikai ke fuʻu mahino pe naʻe kole fakahangatonu ʻe Kause ha fakahā meia Siosefa Sāmita, ka ʻoku ʻomi ʻe he fakamatalá ha fakamaʻalaʻala mahuʻinga ki he ngaahi fatongia ʻo Kausé, ʻo ʻikai ngata pē ʻi heʻene ko ha mēmipa ʻo e Siasí ka ko ha tokoni kia Siosefa Sāmita.

Naʻe tala ʻe he fakahaá kia Kause (mo kinautolu te nau lau ʻi he kahaʻú) ko e “ngaahi kī ʻo e puleʻangá” ko e meʻa ia ʻa e kau palesitenisī ʻo e lakanga fakataulaʻeiki māʻolungá—ʻa ia ʻi heʻene tuʻu pehení, ko Siosefa Sāmita pē. Naʻe toe pehē foki ʻi ai ʻe tāpuekina ʻa Kause kapau te ne “faivelenga ʻi he fai ʻo e faleʻi, ʻi he lakanga” naʻe fokotuʻu ia ki aí.

Naʻe tonu ke “fakahoko ʻe [Kause] ʻa e lelei taupotu tahá ki [hono] kāingá,” ʻo kau ai ʻa e lotu ʻi he kakaí mo e malanga ʻaki ʻo e ongoongoleleí ki he kakai teʻeki siasí foki. Naʻe fakahā ange ki ai, ʻe “fakatupulekina ʻe he meʻá ni ʻa e nāunau ʻo ia ko ho ʻEikí.” Pea kapau te ne kei “faivelenga ʻo aʻu ki he ngataʻangá,” te ne maʻu ha “kalauni ʻo e mouʻi-taʻe-faʻa-maté.”

Mahalo naʻe fakaʻohovale lahi, he naʻe tuʻusi ʻa Kause mei he Siasí naʻe teʻeki ai ʻosi ha taʻu mei he naʻinaʻi ange ʻa e fakahaá ke ne kātaki ki he ngataʻangá. ʻOku hoko ʻene pulia taʻeʻiloa ko ia mei he ngaahi lekooti fakahisitōliá ʻi he hili ʻene ngāue fakafaifekau mo Sēpeti Kolotilini ʻi ʻAokosi 1832 ke faingataʻa ai haʻane mahino ʻa e ʻuhinga naʻe mavahe aí. Koeʻuhí ko hono puipuituʻa ʻi he tui ʻa e kau Kueká mo e kau Sieká, ʻoku malava pē naʻá ne maʻu ha ngaahi taʻe-fefiemālieʻaki fakalotu mo Siosefa Sāmita pe ko ha kau mēmipa kehe ʻo e Siasí—ʻo tautautefito ki he kei hoko atu ʻa Siosefa ke fakatonutonu ʻa e tokāteline ʻo e Siasí ʻaki ʻa e ngaahi fakahaá.

ʻE maʻu ʻe he kau lau ʻi onopooni ʻo e Tokāteline mo e Ngaahi Fuakava 81 ʻa e hingoa ʻo Sese Kausé, ʻi he kinikini ʻataʻatā pē ʻo e vahé. ʻI he taimi naʻe pulusi ai ʻa e fakahaá ʻi he pulusinga ʻo e Tokāteline mo e Ngaahi Fuakavá he 1835, kuo ʻosi fetongi ʻa e hingoa ʻo Kausé ʻaki ha hingoa ʻo ha tangata naʻe ui ke ne fetongi ia: ko Feletiliki G. Uiliamisi. Ko e ngaahi tatau kimui ʻo e Tokāteline mo e Ngaahi Fuakavá naʻe kei tuʻu pē ai ʻa Uiliamisi ko e tokotaha naʻá ne maʻu ʻa e fuakava ko ʻení. Ko Uiliamisí, ʻa ia naʻá ne fetongi ʻa Kause ko ha tokoni ʻi Sānuali 1833, ko ha taha naʻe fuofua papi ului mo ha taha poupou kia Siosefa Sāmita. Pea hangē ko Kause mo Likitoní, naʻe toe hoko pē ʻa Uiliamisi ko ha tangata tohi mo ha kalake kia Siosefa Sāmita.

Ko e ngaahi lekooti ʻo e ngaahi fuofua fakahā ʻa Siosefa Sāmita naʻe tohí, naʻe fai ha liliu ki ai ʻi he taimi naʻe teuteuʻi ai ʻe he kau fuofua taki ʻo e Siasí ʻa e fakamatala ʻo e ngaahi fakahaá ke pulusi ʻi he Tokāteline mo e Ngaahi Fuakavá ʻi he 1835. Naʻe ʻuhinga ʻa e ngaahi liliú he naʻe ʻi ai ha niʻihi ʻo e ngaahi fakahaá naʻe ʻikai ke nau fakahoʻata ʻa e tuʻunga lolotonga ʻo e houalotu ʻa e Siasí pe mahino fakatokāteliné. Ko e taimi naʻe teuteuʻi ai ʻe he kau ʻētitá ʻa e fakahaá ke pākí, ʻoku ngalingali naʻe ʻikai ke nau lau ʻa e fakahā ʻi he Tokāteline mo e Ngaahi Fuakava 81 ko ha faleʻi pē ki ha taha fakafoʻituitui, ka ko ha fakahā fakalūkufua ki ha tokoni te ne poupouʻi ʻa Siosefá. Pea koeʻuhí naʻe ʻosi mavahe ʻa Sese Kause mei he Siasí, ʻoku mahino pē ʻe fetongi ʻe he kau ʻētitá ʻa e hingoa ʻo Uiliamisí.

ʻI ha ngaahi tūkunga ʻe niʻihi, naʻe hoko ai ʻa e ngaahi ʻuluaki fakahaá ko ha ngaahi ʻata nounou ʻi ha taimi, ʻo ʻomai ai ki he kau laukonga ʻo onopōní ha fakalika ki he anga hono fatu ʻe he hokohoko ʻo e maʻu fakahaá ʻa e kamataʻanga ʻo e Siasí. ʻOku toe ʻaonga lahi ange ʻa e fakahaá ʻi ha ngaahi founga kehe. ʻE lava ke lau he ʻahó ni ʻa e Tokāteline mo e Ngaahi Fuakava 81 ʻo ʻikai ko ha fakahā fakapatonu pē ki ha fuofua mēmipa ʻo e Siasí, ka ko ha toe faleʻi foki ki ha faʻahinga taha pē ʻoku loto-fiemālie ke poupouʻi ʻa e palōfitá.

  1. Naʻe liliu kimui ange ʻa e hingoa ʻo e tokotaha naʻe haʻana ʻa e fakahā ko ʻení. Vakai ki he fakamatala ʻi laló.

  2. Vakai, Erin B. Jennings, “The Consequential Counselor: Restoring the Root(s) of Jesse Gause,” Journal of Mormon History, vol. 34, no. 2 (Spring 2008), 182–227.

  3. Joseph Smith, “Note, 8 March 1832,” josephsmithpapers.org; Matthew C. Godfrey, Mark Ashurst-McGee, Grant Underwood, Robert J. Woodford, and William G. Hartley, eds., Documents, Volume 2: July 1831–January 1833, vol. 2 of the Documents series of The Joseph Smith Papers, ed. Dean C. Jessee, Ronald K. Esplin, Richard Lyman Bushman, and Matthew J. Grow (Salt Lake City: Church Historian’s Press, 2013), 201–4.

  4. ʻOku ʻikai ke maʻu ʻa e miniti ki he konifelenisi ko ʻeni ʻo Sānuali 1832. Vakai, “Minutes, 26–27 April 1832,” josephsmithpapers.org.

  5. “Revelation, 15 March 1832 [D&C 81],” josephsmithpapers.org; Documents, Volume 2: July 1831–January 1833, 207–8.

  6. Joseph Smith, “Journal, 1832–1834,” Dec. 3, 1832, josephsmithpapers.org; Dean C. Jessee, Mark Ashurst-McGee, and Richard L. Jensen, eds., Journals, Volume 1: 1832–1839, vol. 1 of the Journals series of The Joseph Smith Papers, ed. Dean C. Jessee, Ronald K. Esplin, mo Richard Lyman Bushman (Salt Lake City: Church Historian’s Press, 2008), 10.

  7. Zebedee Coltrin journal, folder 0002, image 41, Church History Library, Salt Lake City.

  8. Vakai, talateu fakahisitōlia ki he “Doctrine and Covenants, 1835,” josephsmithpapers.org; vakai foki, Robin Scott Jensen, Richard E. Turley Jr., and Riley M. Lorimer, eds., Revelations and Translations, Volume 2: Published Revelations, vol. 2 of the Revelations and Translations series of The Joseph Smith Papers, ed. Dean C. Jessee, Ronald K. Esplin, and Richard Lyman Bushman (Salt Lake City: Church Historian’s Press, 2011), 301–10.