“Hihifo Mamaʻo mo ʻĀtama-ʻonitai-ʻĀmani,” Puipuituʻa ʻo e Ngaahi Fakahaá (2016)
“Hihifo Mamaʻo mo ʻĀtama-ʻonita-ʻĀmani,” Puipuituʻa ʻo e Ngaahi Fakahaá
Hihifo Mamaʻo mo ʻĀtama-ʻonitai-ʻĀmani
ʻI he lolotonga ʻo e ngaahi māhina fakaʻosi ʻo e 1837, naʻe kamata ke uesia ʻe he hē-mei-he-moʻoní ʻa e Siasí ʻi Ketilani, ʻi ʻOhaiō. Naʻe tokolahi ha Kāingalotu naʻa nau fuʻu loto-mamahi ʻi he fuʻu mole lahi fakapaʻanga tupu mei he mate ʻa e Kirtland Safety Society (Sōsaieti Malu ʻa Ketilaní) pea kamata ke nau fakasītuʻaʻi ʻa e tuʻunga fakatakimuʻa fakatuʻasino mo fakalaumālie ʻo e Palōfitá. Naʻe kau ʻi he kau loto taʻe-fiemālié ha kau mēmipa ʻe niʻihi ʻo e Kōlomu ʻo e Kau ʻAposetolo ʻe Toko Hongofulu Mā Uá mo e Kau Fitungofulú, pea pehē mo e Kau Fakamoʻoni ʻe Toko Tolu ki he ngaahi lauʻi peleti ʻo e Tohi ʻa Molomoná. ʻI Sānuali 1838, tupu mei he mafola lahi ʻa e hē mei he moʻoní mo e tuʻu fakatuʻutāmaki ʻo e fakamamahí, naʻe maʻu ai ʻe Siosefa Sāmita mo Sitenei Likitoni ha fakahinohino fakalangi ke taʻofi ʻena ngāue ʻi Ketilaní ka na hola ki Hihifo Mamaʻo, ʻi Mīsuli. Neongo naʻe pehē ʻe he fakahaá kuo “ʻosi e ngāue ʻa [Siosefa] ʻi he feituʻu ko ʻení,” ka ko e mavahe mei Ketilaní naʻe mahino ʻoku ʻikai ko e mavahe pē mei hona ʻapí, ka mei he siteiki lahi taha ʻo e Siasí pea mo hono ʻuluaki temipale pē ʻe tahá. Neongo ia, naʻe naʻinaʻi kia Siosefa mo Sitenei ke na “tuʻu hake pea mo ʻalu ki ha fonua te u fakahā kiate kimoua ʻio ko ha fonua ʻoku fonu ʻi he huʻakau mo e hone.”
ʻI heʻena fakaofi atu ki Hihifo Mamaʻó, hili ʻa e “fononga lōloa & mo fakaongosiá,” naʻe fakafetaulaki mai kia Siosefa mo Sitenei ʻa e Kāingalotu ʻo Mīsulí “ʻo nau talitali lelei mo loto-māfana kimaua ki he uhouhonga ʻo honau sōsaietí.” Ka naʻe tuʻu fakatuʻutāmaki ʻa e ongoongo ko ia ki he māvahevahe ʻi he lotoʻi Siasí ʻi Hihifo Mamaʻó ʻo fakameleʻi ʻa e feohi fiefiá. ʻI ha ʻaho ʻe fā kimuʻa pea tūʻuta atu ʻa e Palōfitá ʻi he ʻaho 14 ʻo Māʻasí, naʻe tuʻusi ʻe he fakataha alēleaʻanga māʻolunga ʻo e siteiki Hihifo Mamaʻó ʻa e ongo tangata taʻe-fie-auna ko Uiliami W. Felipisí mo Sione Uitemā, ko e ongo tokoni ʻi he kau palesitenisī fakasiteiki ʻo e siteiki Mīsulí. Naʻe tukuakiʻi kinaua ki heʻena maʻu ha paʻanga mei hono fakatau ʻo e kelekele naʻe fakataumuʻa ke tānaki ki ai ʻa e Kāingalotú ki Hihifo Mamaʻo pea mo e meʻa naʻá na fai ʻi he Vahefonua Siakisoní naʻe fehangahangai mo e fakahā kimuʻá. Naʻe teʻeki ai foki fakahoko ʻe he fakataha alēleá ia ha fakatonutonu kia Tēvita Uitemā, ko e palesiteni ʻo e kau palesitenisī fakasiteiki ʻo Mīsulí, pe ko e tokoni palesiteni ko ʻŌliva Kautelé ʻi ha ngaahi tukuakiʻi kehe. Ka naʻa nau tatali pē ke toki aʻu atu ʻa Siosefa ke fai ha sio ki he ngāue pango ko ʻení. Naʻe fakatou tuʻusi ʻa Uitemā mo Kautele ʻi he konga kimuʻa ʻo ʻEpelelí 1838.
Ko e Kumi ha Potu moʻó e Kāingalotu Ketilaní
Naʻe tupulaki ʻa Hihifo Mamaʻo ʻo hoko ko e tefitoʻi nofoʻanga ia ʻo e Kāingalotu ʻi Mīsulí, ʻi he hili hono tuli ʻo e Kāingalotú mei he Potu Fonua Keleí mo Leí ʻo kamata ʻi he kongaloto ʻo e 1836. ʻI he taimi ʻo e tūʻuta atu ʻa Siosefa ʻi he 1838, ko e tokolahi ʻo Hihifo Mamaʻó, naʻe toko 4,900 mo ha “ngaahi ʻapi ʻe 150, ngaahi fale fakatau koloa mōmoa ʻe fā, ngaahi falekoloa fakafāmili ʻe tolu, ngaahi fale-ngāue tuki ukamea, hōtele ʻe ua, ko ha fale paaki pea mo ha fuʻu faleako lahi naʻe toe fakaʻaongaʻi ko ha falelotu mo ha falehopo.” Naʻe mahuʻinga ʻaupito ʻi he taimi pē ko iá ke kumi ha kelekele ki he taimi ʻe tūʻuta atu ai ʻa e Kāingalotu masivesiva Ketilaní ki Mīsulí. ʻI he ʻaho 26 ʻo ʻEpeleli 1838, naʻe ʻi ai ha fakahā—ʻoku hoko he taimí ni ko e Tokāteline mo e Ngaahi Fuakava 115—naʻá ne ʻomai ha fakahinohino ki he Kau Palesitenisī ʻUluakí, kau pīsopelikí, mo e fakataha alēleaʻanga māʻolunga ʻi Hihifo Mamaʻó. Makehe mei he teke ke hoko atu hono langa ʻo Hihifo Mamaʻó pea mo e langa ʻo ha temipale aí, naʻe fakahinohinoʻi ʻe he fakahaá “ke kotofa mo ha toe ngaahi potu kehe foki ke hoko ko e ngaahi siteiki ʻi he ngaahi potu fonua takatakaí, ʻo fakatatau mo hono fakahā ki heʻeku tamaioʻeiki ko Siosefá, mei he taimi ki he taimi.”
Naʻe tataki ʻa e kau taki ʻo e Siasí fakatatau mo e maʻu ʻo ha kelekele maʻamaʻá ʻi heʻenau fekumi ki he “ngaahi feituʻu kehe” ko ʻeni ke fokotuʻu ai ha ngaahi siteiki foʻou ʻi he vāhengá. Neongo naʻe teʻeki ai nofoʻi ha konga lahi ʻo e Potufonua Kalatiuelá, ka naʻe ʻosi saveaʻi ʻa e fonuá, ʻo ʻikai toe moʻulaloa ia ki he ngaahi lao maluʻi kimuʻá. Naʻe fakaʻatā ʻe he ngaahi lao ia ko ʻení ʻa e kau nofo foʻoú ke nau maʻu mo langa ʻi he ngaahi konga kelekele teʻeki ai saveaʻí ʻo ʻikai tomuʻa fai ha totongi. ʻI he lao ko ʻení, ko kinautolu ko ia ʻoku ʻikai ke ʻi ai haʻanau paʻaga feʻungá, te nau ngāueʻi ʻa e kelekele kuo maʻú pea ʻe ʻoange leva kiate kinautolu ʻa e ʻuluaki totonu ke nau fakatau ʻa e kelekelé ʻo ka hili hano saveaʻi pea toki fakatau mei he puleʻangá. Naʻe matamatalelei ki he kau taki ʻo e Siasí ʻa e vāhenga toki fokotuʻu foʻou ʻo Tēvisí, ʻa ia ʻoku tuʻu pē he tokelau ʻo e Vāhenga Kalatiuelá, ke hoko ko ha feituʻu ke fakatahataha mai ki ai ʻa e Kāingalotu masivesiva ʻi he fakatokelau ʻo Mīsulí.
ʻI he ʻaho 8 ʻo Mē 1838, naʻe taki atu ʻe Siosefa Sāmita ha kulupu ko e kau taki ʻo e Siasí ʻo kau ai ʻa Sitenei Likitoni, Tōmasi B. Māʻasi, mo Tēvita W. Pāteni (kotoa kinautolu mei he Kōlomu ʻo e Kau ʻAposetolo ʻe Toko Hongofulu Mā Uá), Pīsope ʻEtuate Pātilisi, pea mo ha niʻihi kehe ki he “ngaahi fonua ʻi he tokelaú ko e taumuʻá ke Fokotuʻutuʻu ha ngaahi siteiki ʻo Saione, fakaʻilongaʻi ha ngaahi Feituʻu & ke fakatahataha ki ai ʻa e Kāingalotú ʻa ia ʻe ʻaonga ki he masivá, pea mo hono langa hake ʻo e Siasi ʻo e ʻOtuá.” Naʻa nau fononga fakatokelau ki he Vahefonua Tēvisí ʻi ha ngaahi ʻaho lahi, ʻo aʻu ki he feituʻu ʻo e Vaitafe Lahí (Grand River), ʻa ē naʻe fakamatalaʻi ʻe he kalake ʻa Siosefa Sāmita ko Siaosi W. Lōpinisoní ko “ha feituʻu ʻoku “lahi[,] fakaʻofoʻofa[,] mo lolotó.” Lolotonga ʻenau fonongá, naʻe ʻiloʻi ai ʻe he kau fonongá ha fonua naʻe “tokolahi” ai ʻa e fanga monumanu kaivaó ʻo kau ai ʻa e “Tiá, Pīpií, Moá, Tia Kaivaó (elk), &alā meʻa pehē” pea faliki ʻa e ngaahi toafa mamaé ʻi he mohukú. Ko e fonuá naʻe “mahu moʻoni ʻi he huʻakaú mo e honé.”
Ko e Potu ʻe Haʻu Ki ai ʻa ʻĀtamá
Neongo naʻe feau ʻe he mahu lahi ʻo e Vehfonua Tēvisí ʻa e ngaahi fiemaʻu fakataimi ʻa e Kāingalotu naʻe fakatahataha maí, ka naʻe toe fakahinohino foki ʻe he fakahaá ʻa e Kāingalotú ki ha feituʻu ʻoku lahi hono mahuʻinga fakalaumālié. ʻI he kumi ko ia ʻa Siosefa, Sitenei, mo Siaosi W. Lōpinisoni ki ha feituʻu ke fokotuʻu ai ha nofoʻanga fakakolo ofi ki he Vaitafe Lahí, naʻa nau aʻu mai ai ki ha foʻi tafungofunga ʻiloa naʻe ui ko Sipilingi Hila. ʻI he fononga ko ʻení, naʻe maʻu ai ʻe Siosefa ʻa e fakahā ʻoku ʻiloa he ʻahó ni ko e Tokāteline mo e Ngaahi Fuakava 116, ʻa ia naʻá ne fakamalaʻi ʻa e feituʻú ko ʻĀtamai-ʻonitai-ʻĀmani, “koeʻuhí he naʻá ne folofola, ko e potu ia ʻa ia ʻe haʻu ki ai ʻa ʻĀtama ʻo ʻaʻahi ki hono kakaí, pē ʻe ʻafio ai ʻa ia naʻe ʻi Muʻa ʻi he ngaahi ʻahó, ʻo hangē ko ia naʻe lau ki ai ʻa Taniela ko e Palōfitá.”
Naʻe ʻilo pē foki ʻe he Kāingalotú ʻa ʻĀtama-ʻonitai-ʻĀmani mei ha ngaahi fakahā kimuʻa kia Siosefa Sāmita, ʻa ia naʻe ʻosi pulusi ʻi ha ngaahi taʻu lahi kimuʻa ʻi he pulusinga ʻo e Tokāteline mo e Ngaahi Fuakava ʻo e 1835. Naʻe fakamatalaʻi ʻe he ʻEikí ʻi he vahe ko ia ʻoku hoko he taimí ni ko e Tokāteline mo e Ngaahi Fuakava 107, ko e ngaahi taʻu fakaʻosi ko ia ʻo ʻĀtamá, naʻá ne ui hono hako angatonú ki he “teleʻa ʻo ʻĀtama-ʻonitai-ʻĀmaní,” ʻo ne “foaki ai kiate kinautolu ʻene tāpuaki fakaʻosí.” Naʻe toe fakamatalaʻi ʻe he fakahaá naʻe “hā mai ʻa e [ʻEikí] kiate kinautolu” mo “[fai] ha fakafiemālie ki a ʻĀtama.” Koeʻuhí naʻe “fonu [ʻa ʻĀtama] ʻi he Laumālie Māʻoniʻoní,” naʻá ne kikite ai ʻo kau ki hono hakó ʻo “aʻu ki he toʻu tangata fakamuimuitahá.” Makehe mei he ngaahi fakamtala ʻi he Tokāteline mo e Ngaahi Fuakavá, ko e kupuʻi lea ko ʻení kuo hoko ko ha konga angamaheni ʻo e ngaahi lotu moihū ʻa e Kāingalotú ʻo fou ʻi ha himi naʻe faʻu ʻe Uiliami W. Felipisi ʻoku ui ko e “ʻĀtama-ʻonitai-ʻĀmaní.” Naʻe kau ʻa e himi ko ʻení ʻi he ngaahi ʻuluaki himi ʻa e Kāingalotú naʻe fakatahatahaʻi ʻe ʻEma Sāmita pea pulusi ʻi he ngaahi ʻuluaki māhina ʻo e 1836, pea naʻe hivaʻi ʻe he Kāingalotú ʻa e himi ko ʻení ʻi hono fakatapui ʻo e Temipale Ketilaní.
Naʻe fokotuʻu mai ʻe he fakahā foʻoú ha fatongia mahuʻinga kia ʻĀtama fiekauʻaki mo ʻĀtama-ʻonitai-ʻĀmani, ʻi he ngaahi meʻa ʻe hoko kimuʻa ʻi he Hāʻele ʻAnga Ua Mai ʻa e ʻEikí. ʻI hono fakamaʻalaʻala ʻa e vīsone ʻa Taniela ʻi he Ngaahi ʻAho Kimuʻá (vakai, Taniela 7:9, 13–14), naʻe fakamatalaʻi ai ʻe Siosefa Sāmita kimui “kuo pau ke tuʻu ʻi muʻa ʻiate ia [ʻĀtama] ʻa kinautolu kotoa pē naʻa nau maʻu ʻa e ngaahi Kií ʻi he fuʻu Fakataha lahi ko ʻení. … ʻE tuʻu ʻi muʻa ʻiate ia ʻa e Foha ʻo e Tangatá [Kalaisi] & ʻe foaki ai kiate ia ʻa e nāunau & pule.—ʻe foaki ai ʻe ʻĀtama hono tufakanga tauhí kia Kalaisi, ʻa ē naʻe foaki kiate ia ke ne pukepuke ʻa e ngaahi Kī ʻo e ʻUnivēsí, ka te ne kei maʻu pē hono tuʻunga ko e ʻulu ki he fāmili ʻo e faʻahinga ʻo e tangatá.”
Ko e Tānaki ki ʻĀtama-ʻonitai-ʻĀmaní
ʻI he fakahā ko ia ʻo e tuʻuʻanga ʻo ʻĀtama-ʻonitai-ʻĀmaní kia Siosefa Sāmitá, naʻe fakakoloaʻi ʻe he ʻEikí ʻa e Vahefonua Tēvisí ʻaki ha hisitōlia fakalaumālie pea mo ha kahaʻu fakalaumālie foki. ʻI ha taimi naʻe hangē ʻe holofa ai hono langa ʻo e puleʻanga ʻo e ʻOtuá ʻi he funga māmaní, tupu mei he hē mei he moʻoní mo e hikihiki holó, naʻe fakamanatu ʻe he fakahaá ni kia Siosefa mo e Kāingalotú honau fatongia ʻi he mafola ʻa e hisitōlia toputapú. Naʻe ʻikai ke toe ngāue tāfataha pē ʻa e kau taki ʻo e Siasí ke fokotuʻu ha feituʻu maʻá e Kāingalotu Ketilani kumi hūfangá mo ha niʻihi pē naʻe loto ke kau ʻi he tānakí, ka naʻa nau toe kau foki ʻi he tānaki ʻo e kau angatonú ki he feituʻu ʻe fakafoki ai ʻe ʻĀtama hono fatongia tauhí ki he ʻEikí kimuʻa ʻi he Hāʻele ʻAnga Ua Maí.
ʻI he foki pē ʻa Siosefa ki Hihifo Mamaʻo ʻi he ʻaho 21 ʻo Mē 1838, naʻá ne fakahoko leva he taimi pē ko iá ha fakataha alēlea “ke fakahoko ki he kau takí ʻa e taumuʻa ʻo ʻemau fonongá ke ʻiloʻi pe ʻoku fakapotopoto ke ō leva ki he fonua ʻi he tokelaú … ke maʻu ʻa e kelekele ʻi he vaitafe lahí.” Hili hono fakahaaʻi ʻe he kau takí ʻenau ongo ʻo fekauʻaki mo e kaveingá ni, “naʻe fokotuʻu leva ʻa e fehuʻí ʻe Palesiteni Sāmita pea naʻe loto-taha kotoa ke fakapaupauʻi ʻoku maʻu ʻa e kelekele ʻi he vaitafé pea ʻi he vahaʻa ʻo e feituʻu ko ʻení mo Hihifo Mamaʻó.” Hili ha uike ʻe nima mei ai, ʻi he ʻaho 28 ʻo Sune 1838, ʻi he hoko ʻa Siosefa Sāmita ko e sea leʻoleʻó, naʻe fokotuʻu leva ʻa e siteiki ʻĀtama-ʻonitai-ʻĀmani ʻo Saioné pea ui ʻa Sione Sāmita ko e palesiteni. Naʻe tohi ʻe he tokoni ua ʻo Sione Sāmita ko Laimani Uaití, ko e taha ʻo e kau fuofua Kāingalotu naʻa nau nofoʻi ʻa e Vahefonua Tēvisí ʻo pehē: “ʻOku hanga ʻe he fonua fakaʻofoʻofá ni mo hono ngaahi tuʻamelie lelei ki he kahaʻú ʻo tohoakiʻi mai ha fuʻu kau hikifonua mātuʻaki tokolahi. Kuo teʻeki ai ke u fakatokangaʻi naʻe toe tokosiʻi ange ʻa e kau ōmaí mo e kau hiki atú ʻi he toko tolungofulú ʻi he ʻaho, ʻi he lolotonga ʻo e ngaahi māhina ʻe tolu ʻo e faʻahitaʻu māfaná.” Naʻe lekooti ʻe Uaiti ʻi ʻOkatopa naʻe laka hake ʻi he “ngaahi fale ʻe uangeaú” naʻe langa ʻi ʻĀtama-ʻonitai-ʻĀmani pea ko ha “ngaahi fāmili ʻe fāngofulu ʻoku nofo pē ʻi heʻenau ngaahi salioté.”
“Ko e Ngaahi Meʻa Mahuʻinga Angé”
Neongo hono fokotuʻu ʻo e siteiki foʻou ko ʻeni ʻo Saioné pea mo e ui ke nofoʻi ʻa e fakatokelau ʻo Mīsulí, ka naʻe ʻi ai ha niʻihi naʻe faingataʻa ke liʻaki honau ngaahi ʻapi ʻi Ketilaní. Naʻe faifai pea aʻu ki he ngaahi māhina ʻo e faʻahitaʻu māfana ʻo e 1838, kuo kamata ke fononga mai ʻa e tokolahi taha ʻo e Kāingalotu tui māteaki ʻi Ketilaní ki Mīsuli. Naʻe ʻilonga pē ʻa e ʻikai ke kau ʻi he Kāingalotu ko ʻeni naʻe hiki maí ʻa Uiliami Maʻake mo Niueli K. Uitenī, ko ha pīsope mo ha tangata pisinisi tuʻumālie. Naʻe ʻikai ke ʻuluaki kau fakataha ʻa e ongo tangatá ni mo e kāingalotu ʻi Mīsulí ke fakamāʻopoʻopo ʻenau ngaahi meʻa fakapisinisi ʻi Ketilaní. Naʻá na faingataʻaʻia ke liʻaki ʻa e nonga naʻe maʻu ʻi heʻena ngaahi pisinisi fakatuʻasinó mo e koloá.
ʻI he ʻaho 8 ʻo Siulai 1838, naʻe maʻu ai ʻe Siosefa Sāmita ha fakahā (ʻoku hoko he taimí ni ko e Tokāteline mo e Ngaahi Fuakava 117) naʻe fekauʻi hangatonu ai ʻa Maʻake mo Uitenī ke na “ōmai, ʻo ʻikai [toe] tatali.” Naʻe ui ʻe he fakahaá ʻa Maʻake ke ne “pule ʻi he lotolotonga ʻo hoku kakaí ʻi he kolo ko Hihifo Mamaʻó,” ʻo fakakaukau ke hoko ko e palesiteni foʻou ʻo e kau palesitenisī ʻo e siteiki Mīsulí. Naʻe fakahinohinoʻi ʻe he fakahaá ʻa Uitenī ke “haʻu ki he fonua ko ʻĀtama-ʻonitai-ʻĀmaní, pea hoko ko ha pīsope ki hoku kakaí.” Naʻe fehuʻi ʻe he fakahaá, ʻo fakaʻaongaʻi ʻa e fōtunga ʻo e fonua tupuʻa ʻo ʻĀtamá pea mo e ngaahi tāpuaki taʻe-fakangatangata naʻe talaʻofa ki he hako ʻo ʻĀtamá: “ʻIkai koā ʻoku ʻi ai ha potu ʻoku feʻunga hono lahí ʻi he ngaahi moʻunga ʻo ʻĀtama-ʻonitai-ʻĀmaní, pea ʻi he ngaahi potu tokalelei ʻo ʻOlaihā Sainehaá, pe ko e fonua naʻe nofo ai ʻa ʻĀtamá, ka ʻoku mou … manumanu ki he meʻa ʻa ia ko e kiʻi momoʻi meʻá, kae taʻe-tokanga ki he ngaahi meʻa mahuʻinga angé?” Naʻe vahe ʻa ʻŌliva Kelenisā ke ne fakamaau ʻa e ngaahi ʻakauni ʻa e Siasí ʻi Ketilaní pea naʻá ne ʻave ha tohi kia Maʻake mo Uitenī ʻoku ʻi ai ʻa e fakahaá. ʻI he tohí, naʻe fakahaaʻi ai ʻe he Kau Palesitenisī ʻUluakí ʻa ʻenau falala te na loto-lelei ke talangofua ki he fakahaá pea “ngāue ʻo fakatatau ki ai.” Naʻe fakatou talangofua ʻa Maʻake mo Uitenī ki he fakahinohinó, peá na siʻaki ʻena ngaahi koloa ʻi Ketilaní. Naʻe iku ʻo na kau fakataha mo e Kāingalotú ʻo fakahoko ʻa e “ngaahi meʻa mahuʻinga ange” ʻo e tokoni ki he ngaahi fiemaʻu ʻa e Kāingalotú.
Aofangatukú
ʻI hono kotoa ʻo e faʻahitaʻu māfana ʻo e 1838, naʻe kei hokohoko atu pē ʻa e tānaki ʻa e Kāingalotú ki Hihifo Mamaʻó, ki ʻĀtamai-ʻonitai-ʻĀmani, mo ha ngaahi nofoʻanga kehe ʻo e Kāingalotú ʻi he fakatokelau ʻo Mīsulí. Fakatatau mo e fekau ʻi he ʻaho 4 ʻo Siulai, 1838 ke langa ʻa Hihifo Mamaʻó, naʻe fakatoka ai ʻa e ngaahi makatuliki ʻo e temipalé ʻi he kolo ko iá. Naʻe vave pē hono fili ha feituʻu ki ha temipale ʻi ʻĀtama-ʻonitai-ʻĀmaní. Neongo ia, naʻe taimi nounou pē ʻa e melino mo e mahu naʻe maʻu ʻe he Kāingalotú ʻi he fakatokelau ʻo Mīsulí. Naʻe fakaiku ʻa e taʻe-fefalalaʻaki lahi mo e huʻuhuʻu ʻi he vahaʻa ʻo e kakai Mīsulí mo e Kāingalotú ʻi ʻAokosi ʻo e 1938, ʻo nau fetāʻaki. Naʻe ʻi ai ha ngaahi fefanaʻaki lahi naʻe ʻiloa ko e Tau ʻa Mīsuli mo e Māmongá naʻe fakaiku ʻo tuku pilīsone ai ʻa Siosefa Sāmita pea tuli mo e Kāingalotú mei Mīsulí. Hili hono tuli ʻo e Kāingalotú mei honau siteití, naʻe fakavave hifo he taimi pē ko iá ʻa e kakai ʻo Mīsulí ke maʻu ʻa e kelekele mo e ngaahi koloa ʻa e kau Māmongá. Neongo te nau lava ʻo hoko atu ʻo fokotuʻu ha toe kolo ʻo e fuakava mo langa ha temipale fakaʻofoʻofa ʻi Nāvū, naʻe kei ʻamanaki pē ʻa e Kāingalotú te nau foki mai ʻi ha ʻaho ʻo toe maʻu honau ngaahi konga kelekele toputapu ʻi Mīsulí kimuʻa ʻi he Hāʻele ʻAnga Ua Maí.