“‘Ko ha Fale maʻa Hotau ʻOtuá’” Puipuituʻa ʻo e Ngaahi Fakahaá (2016)
“Ko ha Fale maʻa Hotau ʻOtuá,” Puipuituʻa ʻo e Ngaahi Fakahaá
“Ko ha Fale maʻa Hotau ʻOtuá”
Naʻe maʻu ʻe Siosefa Sāmita ha fakahā ʻi he ʻaho 1 ʻo Sune 1833, ʻa ia naʻe ʻi ai ha valoki fefeka. Naʻe folofola ʻa e ʻEikí, “Kuo mou fai ha angahala mamafa ʻaupito kiate au, ʻa ia ko e ʻikai te mou tokanga ʻi he ngaahi meʻa kotoa pē ki he fekau lahí, ʻa ia kuó u fai kiate kimoutolu ʻo kau ki hono langa ʻo hoku falé.” Naʻe maʻu ʻa e “fekau lahí” ʻi ha māhina ʻe nima kimuʻa ia ʻi ha fakahā mātuʻaki lōloa naʻe ui ʻe Siosefa ko e “lou ʻōlivé” (ʻoku hoko he taimí ni ko e Tokāteline mo e Ngaahi Fuakava 88). Naʻe fakahinohino ai ki he Kāingalotú ke nau “fokotuʻutuʻu ʻa [kinautolu]” pea fokotuʻu “ha fale ʻo e lotu, ko ha fale ʻo e ʻaukai, ko ha fale ʻo e tui, ko ha fale ʻo e ako, ko ha fale ʻo e nāunau, ko ha fale ʻo e maau, ko ha fale ʻo e ʻOtuá.”
Fakataha mo e ngaahi fakahinohino ke “feakoʻiʻaki ʻiate kimoutolu” pea “fekumi ki he ʻiló, ʻio, ʻi he ako pea ʻi he tui fokí,” naʻe mahino ai kia Siosefa Sāmita mo e kau kaumātuʻa ʻi Ketilaní ko e fakahā ko ʻení ke ʻoatu ha fekau pau ʻe ua. Naʻe pau ke nau “langa ha fale ʻo e ʻOtuá, & fokotuʻu ha akoʻanga maʻá e kau Palōfitá.” Naʻe kamata fakahoko ʻe Siosefa Sāmita mo e Kāingalotu ʻi Ketilaní ʻa e fakahinohinó ni ʻi he taimi pē ko iá, kae hangē ko e fakamahino ʻe he fakahā ʻi he ʻaho 1 ʻo Suné, naʻe teʻeki ai ke nau fuʻu ʻiloʻi ʻa e ʻuhinga taupotú pe ko e fuʻu feilaulau lahi ʻe fiemaʻu ki aí.
“ʻIkai Te Mou Tokanga”
ʻI loto ʻi ha ngaahi uike pē ʻo e fakahā lou ʻōlivé, naʻe kamata ʻa e Akoʻanga ʻo e Kau Palōfitá, ʻa ia naʻe fakataha ai ha kau tangata ʻe toko 25 ʻi ha kiʻi loki ʻi ʻolunga ʻi he Falekoloa ʻo Niueli K. Uitenií (vakai, Nathan Waite, “Ko ha ʻApiako pea mo ha Fakakoloaʻi: T&F 88, 90, 95, 109, 110,” ʻi he peesi 174 ʻo e tohi ko ʻení). Naʻe toloi ʻa e akó ʻi ha kiʻi vahaʻa taimi ʻi ʻEpeleli 1833, pea naʻe tuku leva ʻa e tokanga ʻa Siosefá mo e kau tangatá ki he ngaahi tafaʻaki fakangāue ki hono fakahoko ʻo e fakahaá. Naʻe ʻikai fuoloa kuo aofangatuku ʻa e ngaahi fakatau kelekelé, pea naʻe fokotuʻu ha kau tangata ke nau tokangaʻi ʻa e ngaahi ngāue kehekehe ʻi he ngaahi kelekele ko iá. ʻI he ʻaho 4 ʻo Meé, naʻe fakataha ai ha konifelenisi ʻa e kau taulaʻeiki lahí ke fakakaukauʻi “hono mahuʻinga ke langa ha faleako ko e taumuʻa ke nofo ai ʻa e kau Kaumātuʻa ʻoku totonu ke nau hū mai ke akoʻi kinautolu ki heʻenau ngāué.” Naʻe fokotuʻu ʻa Hailame Sāmita, Sēleti Kāta, mo Leinolitisi Kahuni ko “ha kōmiti ke tānaki ha ngaahi totongi [ngaahi foaki], ʻo fakataumuʻa ki hono Fokotuʻu ha faʻahinga langa pehē.”
Neongo ʻe ʻiloa ʻa e falé ko e Temipale Ketilaní, ka naʻe ʻikai ke ʻilo ʻe he Kāingalotu ʻi he 1833 ko ʻenau langá ha temipale. Naʻa nau ʻosi lau pē ʻi he Tohi Tapú mo e Tohi ʻa Molomoná fekauʻaki mo e ngaahi temipalé, ka naʻe kei siʻisiʻi pē ʻenau ʻilo ki aí. ʻI he taʻu ʻe ua kimuʻá, naʻe fakamahino mai ai ʻe ha fakahā, ʻe langa ha temipale ʻi he Vahefonua Siakisoni, Mīsulí. Naʻe tokoni ʻa Siosefa Sāmita tonu ki hono fokotuʻu ʻo e makatulikí ʻi he 1831, ka naʻe ʻikai ke ʻi ai ha fuʻu fakalakalaka ʻe hoko, pea naʻe ʻomi ʻe he ngaahi fakahā kimui aí ha kiʻi meʻa siʻi pē ki he taumuʻa ʻo e ngaahi temipalé.
ʻOku hā mei he ngaahi lekooti ʻo e faʻahitaʻu failau ʻo e 1833, naʻe fakakaukau ʻa e Kāingalotú ia ko e “fale” Ketilaní ko ha “fale ako” pē, ʻo ʻikai haʻane fekauʻaki mo e fekau ke langa ha temipale ʻi Saioné. Ka ʻi he fakahā ʻo e ʻaho 1 ʻo Suné naʻe pehē ai naʻe ʻikai ke feʻunga ʻa e “tokanga” ʻa Siosefa Sāmita mo e Kāingalotú ki he fiemaʻu fakavavevave pe ko e mahuʻinga ʻo e fekaú.
Ko e fakahā ko iá (ʻoku hoko he taimí ni ko e Tokāteline mo e Ngaahi Fuakava 95) naʻá ne fakamahino mai ʻa e taumuʻa ʻoku lahi angé. Naʻe fakahaaʻi ai ʻe hanga ʻe he ʻEikí ʻi he “falé” ʻo “fakakoloaʻi ai ʻa kinautolu kuó u filí ʻaki ʻa e mālohi mei ʻolunga”—ʻo fakafehokotaki ai hono langa ʻo e falé mo e talaʻofa ʻo ha fakakoloa ʻo e mālohi. Naʻe fakamahinoʻi ai ʻa e tafaʻaki ki loto ʻo e falé—fute ʻe 55 hono fālahí pea fute ʻe 65 hono lōloá—pea fakamatalaʻi ʻa e ngāue ʻo e faliki ʻi ʻolunga mo lalo ʻo e “lotoʻā ʻi lotó,” ko ha kupuʻi lea naʻá ne fakaʻaiʻai ʻa e ngaahi ʻīmisi ʻo e temipale fakatohitapu ʻi Selusalemá. Naʻe toe talaʻofa foki ʻe he fakahaá ha fakahinohino lahi ange. He ʻikai ke langa ʻa e falé ʻo “tatau mo e founga ʻa e māmaní,” kae “tuku ke langa ia ʻo tatau mo e anga te u fakahā atu ki ha toko tolu ʻo kimoutolú, ʻa ia te mou fili mo fakanofo ki he mālohi ko ʻení.”
Naʻe fakanofo ai ʻa Siosefa Sāmita mo hono ongo tokoní, ʻa Sitenei Likitoni mo Feletiliki G. Uiliamisi, ke nau “maʻu ha mape pe ko e anga hono langa ʻo e konga ki loto ʻo e falé.” Naʻe fakamatalaʻi kimui ʻe Uiliamisi ʻa e meʻa-hā-mai naʻe hokó. Naʻá ne manatuʻi, “Naʻa mau tūʻulutui, ʻo ui ki he ʻEikí, pea naʻe lava ke mau mamata ofi ki he Falé: ʻa ia ko au naʻá ku ʻuluaki fakatokangaʻí. Hili ia pea mau toki mamata fakataha ki ai. ʻI he hili ʻo ʻemau vakai lelei ki he tafaʻaki ki tuʻá, naʻe hangē naʻe tētē mai pē ʻa e falé ʻi ʻolunga ʻiate kimautolu.” Naʻá ne pehē, ko e falé ʻi heʻene ʻosí, naʻe “hangē naʻe tatau tofu pē mo e meʻa kotoa naʻá ku mamata ki aí.”
Ko e fehuʻi mahuʻinga ʻe taha naʻe tali ʻe he meʻa-hā-mai ko ʻení ko e ʻū naunau ko ia ke fakaʻaongaʻi ki hono langa ʻo e falé. Naʻe manatuʻi ʻe Lusi Meki Sāmita ha fakataha alēlea ʻa ia naʻe pehē ai ʻe fuʻu mamafa ke langa ha fale ‘osi faʻu pea toki fokotuʻu (frame building); ko ia naʻe fokotuʻu ai ke langa pē ha fale ʻakau. Naʻe fakamanatu ange ʻe Siosefa Sāmita kiate kinautolu “ʻoku ʻikai ko ʻenau langa ha fale moʻonautolu pē pe ko ha toe tangata, ka ko ha fale maʻá e ʻOtuá.” Naʻá ne pehē, “ʻE ngaahi tokoua, te tau langa koā ha fale ʻakau pē maʻa Hotau ʻOtuá? ʻIkai, ngaahi tokoua, ʻoku ʻi ai haʻaku palani ʻoku lelei ange ai. ʻOku ou maʻu ʻa e palani ki he fale ʻo e ʻEikí meiate Ia tonu.” Naʻe manatuʻi ʻe Lusi ha pehē ʻe Siosefa ʻe fakahā ʻe he palani ko ʻení kiate kinautolu ʻa e “faikehekehe ʻi heʻetau ngaahi fakaʻutoʻutá mo ʻEne Ngaahi Fakakaukaú.” Naʻe “fiefia” ʻa e kau tangatá ʻi he taimi naʻe fakamatalaʻi ai ʻe Siosefa ʻa e palaní kakato, ʻa ia naʻe palani ʻi ha fōtunga ʻo ha fale maka.
Ko ha Palani ki ha “Kolo ʻo e Siteiki ʻo Saioné”
Naʻe fakalahi ʻe he ngaahi meʻá ni ʻa e vīsone ʻa Siosefa Sāmita mo e Kāingalotú ki he fōtunga e fale ʻo e ʻEikí ʻe langa ʻi Ketilaní; naʻe tokoni mo ha ngaahi fakahā kehe ke mahino ai ʻa Saione mo hono tuʻunga fakasiokālafí. ʻI Suné, hili ia ha uike ʻe tolu mei hono maʻu ʻe he kau palesitenisií honau fatongia ke maʻu ʻa e finangalo ʻo e ʻEikí fekauʻaki mo e palani ʻo e fale ʻo e ʻEikí ʻi Ketilaní, naʻa nau ʻomi leva ha mape ki he kolo ʻo Saione naʻe fokotuʻu ke tuʻu ʻi Mīsulí, ʻa ia ne fokotuʻu ai ʻa e temipalé ʻi lotomālie pea kau ai mo ha tā fakatātaaʻi ʻo hono lahí, fōtungá, mo hono fuatakaí. Naʻe tuʻutuʻuni ʻe he kau palesitenisií ki he kau taki ʻi Mīsulí ke nau langa ʻo fakatatau mo e ngaahi sīpingá ni ʻi he “taimi pē ko iá ʻi Saione.”
Lolotonga iá, naʻe fakahinohino ʻe ha fakahā he ʻaho 4 ʻo Sune 1833 (ʻoku hoko he taimí ni ko e Tokāteline mo e Ngaahi Fuakava 96), ke tokangaʻi ʻe Pīsope Niueli K. Uitenī ʻa e kelekele ʻe langa ai ʻa e fale ʻo e ʻEikí ʻi Ketilaní. ʻE hoko ʻa Ketilani ko e “kolo ia ki he siteiki ʻo Saioné”—ko ha feituʻu tānakiʻanga hono ua ne fakataipe ki he feituʻu tānakiʻanga ʻi Mīsulí. Pea hangē ko e fakahinohino naʻe fakahoko mai ʻi he fakahā he ʻaho 2 ʻo ʻAokosi 1833 (ʻoku hoko he taimí ni ko e Tokāteline mo e Ngaahi Fuakava 94), ʻe meimei ke faitatau pē ia mo e palani ki Mīsulí, ʻo tuʻu ʻi lotomālie ʻa e fale ʻo e ʻEikí, ʻo hangē pē ko e hoko ʻa e temipalé ko e ʻelito ʻo e kolo ʻo Saione naʻe palani ki aí. Naʻe toe fiemaʻu foki ʻi he fakahaá ke langa mo ha fale kehe ʻe ua—ko ha “fale” ki he kau palesitenisií pea mo e taha ki he faiʻanga paaki—ke langa pē he tafaʻaki ʻo e temipalé ʻi he lotomālie ʻo e koló. Naʻe toe ʻi ai foki ha fakahā ʻi he ʻaho 2 ʻo ʻAokosí (Tokāteline mo e Ngaahi Fuakava 97) naʻe toe ʻomai ai ʻa e fekau ke langa ha “fale” ʻi Saione (Mīsuli), “ʻo hangē ko e sīpinga kuó u ʻoatu kiate kimoutolú.” Kuo pau ke “langa fakatoʻotoʻo” ia ko ha feituʻu ʻo e fakafetaʻi mo e ako.
Naʻe tā ʻe he kau palesitenisií, ʻo tataki ʻe he ngaahi fakahaá, ha mape fakasiokālafi ʻo Ketilani pea toe fakaleleiʻi ʻa e mape ki he kolo ko Saione ʻi Mīsulí. Naʻa nau ʻave ʻa e palani naʻe toe fakaleleiʻí mo ha ngaahi tatau ʻo e fakahaá ki he kau taki ʻi Mīsulí, ka ʻi he taimi naʻe aʻu atu ai ʻa e tohí, kuo kamata ʻa e fetāʻaki ʻa e kau fakatangá. ʻI ha ngaahi māhina siʻi pē, kuo fakamālohiʻi ʻa e kau mēmipa ʻo e Siasí ke nau mavahe mei he Vahefonua Siakisoní pea taʻofi leva ha toe faʻahinga palani ki hano langa ʻo ha temipale.
Ko e palani langa kolo ko ia ʻa Siosefa Sāmitá, naʻe ʻikai ke makehe ia ʻi he senituli 19 ʻi ʻAmelika. Naʻe ui kinautolu ko e “taha ʻo e ngaahi sīpinga ʻo ha ngaahi palani lahi ʻo e koló” ʻi he lolotonga ʻo e kuonga ne vave ai hono nofoʻi ʻa e feituʻu fakahihifó pea mo e langa fakalakalaka ʻo e koló. Ko e palani ko ia ki he kolo ko Saioné naʻe mei faitatau pē ia mo e palani ʻo e ngaahi kolo kehé—naʻe tā ʻi he sīpinga fakaveimau mo fokotuʻutuʻu fakalōloa ki he hahaké mo e hihifó pea mo e tongá ki he tokelaú, mo ha ngaahi hala puleʻanga fālalahi pea ʻatā lahi mo e ngaahi kongá. Ka naʻe ʻi ai ha ha faikehekehe mahuʻinga: ko e loto kolo ʻo Saioné naʻe fakatefito ia ʻi he ngaahi temipalé, kae ʻikai ko e ʻū falekoloá. Ko ha feituʻu ʻo e tānakiʻanga, ʻe ōmai ʻa e kau uluí ke nofo ʻi ha feituʻu ʻoku toptuapu pea mafola atu mei ai ʻa e kau faifekaú ke malangaʻi ʻa e ongoongoleleí—ʻa ia ʻe lava ke tānaki mai ki ai ha kakai tokolahi ange. ʻE hanga ʻe he tūkunga fakasiokālafi mo fakalaumālie ko ʻeni naʻe fokotuʻu ʻi he faʻahitaʻu māfana ʻo e 1833 ʻo tākiekina ʻa e ngaahi kolo ʻo e Kau Māʻoniʻoni ʻi he Ngaahi ʻAho Kimui Ní ʻi he toenga ʻo e senitulí pea toe ope atu mei ai.
“Ko e Maʻuʻanga Ivi pē Taha ki Heʻetau Ngaahi Fakakaukaú Kotoa”
Hili ʻa e ngaahi fakamamahi ʻi Mīsulí, naʻe kamata ke toe vave ange ʻa e ngaahi ngāue ki hono langa e fale ʻo e ʻEikí ʻi Ketilaní. Fakatatau ki he fakahā naʻe ʻosi fakamatalaʻi ʻi muʻá, ko e kōmiti ko ia naʻe fokotuʻu kimuʻa ʻo Hailame Sāmita, Leinolitisi Kahuni, mo Sēleti Katá, kuo ui ʻeni ko e “kōmiti langá,” pea fakalahi mo honau fatongiá mei he feinga paʻangá ki he langá. Naʻe pau ke nau “fakahoko he taimi pē ko iá ʻa hono kamata langa ʻo e Falé pe fakatau mai ʻa e naunaú, ʻa e Maká, Pilikí, Papá &ngaahi alā meʻa pehē.” Naʻe lekooti ʻe Hailame Sāmita ʻi heʻene tohinoa ʻo e ʻaho 7 ʻo Suné, “Naʻe kamata ʻi he ʻahó ni ʻa e teuteu ki hono langa ʻo e Fale ʻo e ʻEikí.”
ʻE hoko hono langa ʻo e temipalé ko ha pole lahi ia ki he Kāingalotú. ʻI he faʻahitaʻu māfana ʻo e 1833, naʻe toko 150 pē ʻa e kau mēmipa ʻo e Siasí naʻe nofo ʻi he feituʻu ko iá. Naʻe ʻikai ke ʻi ai ha taha ʻiate kinautolu te ne maʻu ha fakaʻilonga fakaako angamaheni ke tokangaʻi ha fuʻu langa lahi ʻe fiemaʻu ai ha ngāue lahi pehē—naʻe ʻikai ke ʻi ai ha taha fakahinohino langa pe ʻenisinia langa ʻiate kinautolu pe ko ha taha taukei tā-palani ke ne tā ʻa e ngaahi palaní. Naʻe ʻosi nounou pē ʻa e paʻangá ia, pea ko hono langa ʻo ha fuʻu fuʻu fale lahi mo fakaʻofoʻofa peheé ʻoku fakafuofua hono fakamolé ki he $40,000, ʻe lahi fusimoʻomo ai ʻa e ivi fakapaʻanga ʻo e Siasí ʻi he taʻu ʻe tolu ka hokó.
Neongo naʻe fakamahino mai ʻe he fakahaá ʻa e lahi mo e fatongia pea mo ha ngaahi tafaʻaki ʻe niʻihi ʻo hono fōtungá, ka ko e ngaahi ʻelemēniti kehé naʻe tuku pē ia ki he kau takí mo e kau ngāue ʻi he langá. Naʻe hā mei he mape ʻo e langá naʻa nau ngāue ʻaki pē ʻenau taukeí mo ʻenau ngaahi fakafuofua fekauʻaki mo e fōtunga ʻo ha fale ʻo e siasí. Naʻe fakahoʻata ʻe hono fōtungá ʻa e sīpinga manakoa ʻo e ngaahi langa motuʻa ʻa e kau Kalisí. Pea hangē ko e kau tufunga tokolahi ʻo e kuonga ko iá, naʻa nau fakaʻaongaʻi ha ngaahi fuo kehekehe mei he ʻū tohi fakahinohino langa angamahení. Naʻe fekauʻaki lahi ʻa e ngaahi matapā sioʻata māʻolunga fakahihifí mo e ngaahi falelotú, pea ne hoko ʻa e tauá mo e ngaahi tumuʻaki tauá ko ha fōtunga angamaheni ʻo e ngaahi ʻapisiasi ʻo Niu ʻIngilaní.
ʻI he faʻahiitaʻu fakatōlau ko iá, naʻe ʻosi ʻa e fakavaʻe holisi maká, ka naʻe ʻikai fuoloa kuo tuʻu ʻa e langá. Naʻe ʻikai ke lava ʻe he kau ngāue ʻi he tāʻanga piliki ʻa e Siasí ʻo tā ha piliki feʻunga ʻoku taau mo lelei ke fakaʻaongaʻi ʻi he langá. Naʻe fai leva ha tuʻutuʻuni ke “taʻofi hono langa ʻo e temipalé ʻi he faʻahitaʻu momokó koeʻuhí ko e ʻikai ke ʻi ai ha ʻū naunaú kae fai ha teuteu pea ʻai ke maau ʻa e meʻa kotoa ke toe hoko atu e langá ʻi he kamata pē ʻo e faʻahitaʻu failaú.”
Ko e konga lahi hono fakahoko ʻo e langá naʻe kamata ia ʻi ʻEpeleli 1834, ʻi he tūʻuta mai ʻa ʻAtemasi Mīleti, ko ha papi ului mei Kānata mo ha taukei ʻi he tufunga ʻaki e maká. Ko e tokoni mahuʻinga ʻa Mīletí ko ʻene fokotuʻu ke fakaʻaongaʻi ʻa e maka motumotú pea toki fakafonufonu ʻaki e sitakó kae tuku ʻa e langa ʻaki e pilikí he naʻe fuʻu mamafa ange ia. Naʻe muimui ʻa e Kāingalotú ki heʻene fakahinohinó ʻo langa ʻa e holisí ʻaki ʻa e maka petepete, ne ʻomi mei he keliʻanga maka ofi maí, pea toki tanu ʻaki ʻa e sitakó ke fakaʻofoʻofa.
Naʻe hoko ʻa e faʻahitaʻu failau mo e faʻahitaʻu māfana ʻo e 1834 ko ha ongo faʻahitaʻu faingataʻa ki hono langa ʻo e temipalé koeʻuhí naʻe fononga ʻa e konga lahi taha ʻo e kau tangata ʻi he koló mo Siosefa Sāmita ki Mīsuli ʻi he ʻApitanga ʻo ʻIsilelí, ʻo ʻamanaki ke tokoniʻi ʻa e Kāingalotu kuo tuli ʻe he kau fakatanga fakamamahí mei honau ngaahi ʻapí. ʻI he mavahe ʻa e kakai tangatá, naʻe hoko atu leva ʻe he kakai fefiné ʻa e ngāué. Naʻe tā maka ha niʻihi, kae angi ʻe he niʻihi ʻa e fanga pulú mo toho ʻa e maká, pea tuitui, lalanga, mo niti ha niʻihi ke ngaohi ha vala maʻá e kau ngāué.
Naʻe mahino ʻi he foki mai ʻa Siosefa Sāmita mo e tokolahi taha ʻo e kau tangatá mei he ʻApitanga ʻo ʻIsilelí ʻe hoko ʻa e toe langa ʻo e temipalé ko e tefitoʻi ngāue ʻi Ketilani. Naʻe hoko ʻa Siosefa ko e “pule ngāue ʻi he keliʻanga maka ki he temipalé” mo ngāue ʻi he langá “ʻi he taimi naʻá ne ʻatā ai mei he ngaahi fatongia kehé.” ʻI Fēpueli 1835, naʻe ʻosi tuʻu ʻa e ngaahi holisí pea kamata leva ʻa e ngāue ki he ʻató. Naʻe fai ha fakataha ʻi he ʻaho 7 ʻo Māʻasi 1835, ʻa ia naʻe fakahā ai ʻe Siosefa Sāmita ʻene houngaʻia ʻiate kinautolu “kuo nau fakamavaheʻi mo fakatapui kinautolu ki he langa ʻo e falé pea pehē ki heʻenau ngāue [ki hono langa ʻo e temipalé].” Naʻe tāpuakiʻi leva ʻe Sitenei Likitoni ha niʻihi fakafoʻituitui ʻe toko 120 naʻa nau tokoni ki hono langa ʻa e fale ʻo e ʻEikí ʻi heʻenau ngāué mo e fakatapuí.
ʻI he faʻahitaʻu fakatōlau ko iá, naʻe ʻi ai ha fiemaʻu vivili lahi ange ke fai mo ʻosi ʻa e temipalé. Naʻe fakamatalaʻi ʻe Lusi Meki Sāmita ʻa e fai māteaki ʻa e kau mēmipa ʻo e Siasí ki he ngāué. Naʻá ne pehē, “ʻOku taha pē ʻa e maʻuʻanga tokoni ki heʻetau fakakaukaú kotoa, ʻa ia ko e langa ʻa e fale ʻo e ʻEikí.” Naʻe taki ʻe Tulūmeni ʻEnisolo, ko ha tangata ako tufunga mei Palovitenisi, Louti ʻAilani, ʻa e ngāue fakatufunga ki he fungavaka ʻo e falé. Naʻe fakaʻaongaʻi ʻe Pilikihami ʻIongi mo hono tokoua ko Siosefá ʻa ʻena taukei tufungá ki hono ngaohi mo fokotuʻu ʻo e ngaahi matapā sioʻatá. Naʻe ʻi ai mo ha tokoua ʻo Pilikihami ʻIongi ko Lolenisou naʻe ngāue mo ʻAtemasi Mīleti ʻi hono sitako ʻa e tafaʻaki ki tuʻá, ko ha ngāue mohu faingataʻa ʻi he ʻea ʻo e faʻahitaʻu momokó. Naʻe tokangaʻi hono palasitaaʻi ʻo lotó ʻe Sēkope Pamu, ko ha tufunga taukei naʻá ne toe ngaohi foki mo e ʻū tuʻunga malangá pea mo tā-tongitongi ʻa e papa fakaʻofoʻofa ʻi he konga ki laló. Naʻe fokotuʻutuʻu fakalelei ʻa e ngaahi sitoú ke nau fakamāfanaʻi ʻa loto pea mo tokoni ki hono fakamōmoa ʻo e palasitaá.
Naʻe ngāue ʻa e houʻeiki fafiné ki hono ngaohi ʻo e veili ʻe tautau mei he ʻaofí ke ne vahevahe ʻa e konga ki lalo ʻo e holó pea mo ngaohi mo ha ngaahi teuteu naunau fale kehe ki he temipalé. Naʻe “fakahoko [kimui ʻe Siosefa Sāmita] ha tāpuaki ki he Houʻeiki Fafiné ʻi heʻenau loto-tauʻatāina ke fakahoko ʻi he fiefia moʻoni ʻenau ngāue tokoni ke ngaohi ʻa e veili ki he fale ʻo e ʻEikí.” Naʻe tokoni foki mo e fānaú ʻaki hono tufi ʻa e ngaahi tisi mo e meʻa sioʻata mafahifahí, ʻa ia naʻe tānaki atu ki he sitakó ke tokoni ke ngingila ia ʻi he laʻaá.
“Ko ha Potu ke Fakahā ai Ia”
Naʻe fakaʻosi fakakongokonga ʻa e konga ki loto ʻo e temipalé, pea ʻi he ʻosi ʻa e ngaahi lokí, naʻe kamata leva ke fakaʻaongaʻi ia ʻe he kau taki ʻo e Siasí mo e kau mēmipá ki ha ngaahi taumuʻa kehekehe. ʻI he taimi tatau, naʻe ngāue taʻetuku ʻa Siosefa Sāmita ke teuteuʻi fakalaumālie ʻa e Kāingalotú ki he ngaahi meʻa fakalaumālie naʻe talaʻofa ʻi he ngaahi fakahaá. Naʻá ne lekooti ʻi heʻene tohinoa ʻo e ʻaho 30 ʻo Sune 1836, ʻo pehē, “Naʻá ku foki ki ʻapi kuó u fuʻu ongosia ʻi he hohaʻa taʻe-tuku & ngāue ki hono fokotuʻutuʻu [maau] ʻa e kau Maʻu Mafaí & ʻi he feinga ke fakahaohaoaʻi kinautolu ki he fakataha molumalú ʻo fakatatau mo e fekau ʻa e ʻEikí.” ʻI ha ngaahi ʻaho siʻi kimuʻa ai, lolotonga ʻa e faʻahinga teuteu peheé, naʻe maʻu ʻe Siosefa ha meʻa-hā-mai ki he puleʻanga fakasilesitialé (Tokāteline mo e Ngaahi Fuakava 137); mo ha ngaahi taumalingi fakalaumālie kehe he lolotonga ʻo e vahaʻa taimi ko ʻení ʻo maʻu ai ha kiʻi ʻata ʻo e ngaahi aʻusia maʻongoʻonga ange ʻe hoko maí.
Ko ha momeniti fakafiefia mo fakafiemālie ki he fuofua Kāingalotú ʻa hono fakatapui ʻa e fale ʻo e ʻEikí. Kuo hāsino ʻa e ngaahi fakahā ʻi he taʻu ʻe tolu kimuʻá ʻo fakafou ʻi ha ngaahi feilaulau ʻo e ngāue mo ha ngaahi maʻuʻanga tokoni taʻe-mafakatataua. ʻI he lotu fakatapuí ʻoku maʻu ʻi he taimí ni ʻi he Tokāteline mo e Ngaahi Fuakava 109, naʻe tautapa ai ʻa Siosefa Sāmita ʻo pehē, “ʻOku mau kole ki hoʻo ʻafió, ʻe ʻEiki, ke ke tali ʻa e falé ni, ko e ngāue ʻo e nima ʻo kimautolu ko hoʻo kau tamaioʻeiki, ʻa ia naʻá ke fekau ke mau langá; he ʻokú ke ʻafioʻi ʻoku mau fai ʻa e ngāué ni ʻi he fuʻu faingataʻa lahi: pea ʻi heʻemau masivá kuo mau foaki ai mei heʻemau koloá ke langa ha fale ki ho huafá, koeʻuhí ke maʻu ha potu ʻe he Foha ʻo e Tangatá ke fakahā ai ia ki hono kakaí.”
Naʻe hoko moʻoni mai ʻa e ngaahi fakahā naʻe talaʻofa maí. Naʻe hā mai ʻa e Fakamoʻuí ʻo fakahā ʻa ʻene tali ʻa e temipalé, pea naʻe foaki mai ʻe ha kau talafekau fakalangi kehe ʻa e ngaahi kī ʻo e lakanga fakatauaʻeikí kia Siosefa Sāmita mo ʻŌliva Kautele. Naʻe fakaava ʻe he ngaahi meʻa fakaofo ko iá ʻa e hala ki ha ngaahi fakahā mo e ngaahi ouau fakatemipale ʻi he kahaʻú. ʻI he fakahaaʻi ʻe he Kāingalotú ʻa ʻenau loto-fiemālie ke langa ha fale moʻo e ʻEikí, naʻa nau toki kamata ako ai ke ʻilo ʻa e taumuʻa ʻo e ngaahi temipalé.