“Ko e Fakafoki Mai ʻo e Faʻunga he Kuonga Muʻá,” Puipuituʻa ʻo e Ngaahi Fakahaá (2016)
“Ko e Fakafoki Mai ʻo e Faʻunga he Kuonga Muʻá,” Puipuituʻa ʻo e Ngaahi Fakahaá
Ko e Fakafoki Mai ʻo e Faʻunga he Kuongamuʻá
ʻI Mē ʻo e 1829, naʻe tūʻulutui ai ʻa Siosefa Sāmita mo ʻŌliva Kautele ʻi he veʻe Vaitafe Sesikuehaná. Naʻá na toki lau pē fekauʻaki mo e papitaisó ʻi he 3 Nīfaí peá na fiemaʻu ke ʻilo pe te na maʻu ʻi fē ʻa e mafai naʻe foaki ʻe Sīsū ki Heʻene kau ākonga he kuongamuʻá. Ko e tali ko ia ki heʻena lotú ko e hā mai ʻa Sione Papitaiso ʻo hilifakinima ki hona ʻulú ke foaki ʻa e mafai naʻá na fiemaʻú, ke na fefaipapitaisoʻaki ai. Naʻe tapou kimui ʻa Kautele ki hono kaungāmeʻa ko W. W. Felipisí, “Kiʻi fakakaukau taimi nounou, ki he fiefia lahi homa lotó pea ʻi he ʻohovale ko iá, ʻoku pau naʻá ma punou … ʻi heʻema maʻu mei hono nimá ʻa e lakanga fakataulaʻeiki māʻoniʻoní.”
Ka ko e fakafoki mai ko ia ʻo e mafai lakanga fakataulaʻeikí naʻe ʻikai hoko fakataha mo e fakafoki mai ʻo e faʻunga ʻo e lakanga fakataulaʻeikí. Naʻe lava ha kau maʻu lakanga fakataulaʻeiki fakafoʻituitui ke fakahoko ʻa e ngaahi ouaú, ka ʻe lava fēfē ke nau ngāue fakataha ke fakahoko ʻa e ngāue ʻa e ʻEikí?
Tokangaʻi ʻo e Konifelenisí
Ko e lahi ʻo e ngaahi siasi mālohi ʻi he fakatokelau ʻo Niu ʻIoké ʻi he 1830 tupú naʻe fakahoko ʻenau pisinisí ʻi ha ngaahi konifelenisi fakakuata ʻa e kau kaumātuʻá, pea ʻi hono ʻuluaki taʻú naʻe muimui ʻa e Siasí ki he sīpinga angamaheni ko iá. Hili hono fokotuʻu ʻo e siasí ʻi ʻEpelelí, naʻe fakahoko ʻe he kau taki ʻo e Siasí ha konifelenisi ʻi Sune mo Sepitema ke lipooti e fakalakalaka ʻa e Siasí pea mo fakahoko ʻa e pisinisí. Naʻe fakakau ʻa e founga ko ʻeni hono fakahoko ʻo e ngaahi konifelenisi fakakuatá ʻi he Ngaahi Fakamatala mo e Ngaahi Fuakava ʻo e Siasí (ʻoku hoko he taimí ni ko e Tokāteline mo e Ngaahi Fuakava 20) ʻi he taimi naʻe lekooti ai kinautolu ʻi he tohi ʻo e ngaahi fakahā ʻa e Siasí naʻe hiki tohinimá.
Ka ʻi he 1831, naʻe mahino ʻaupito ko e ngaahi konifelenisi ʻa e Siasí ʻe ʻikai ko ha ngaahi fakataha angamaheni pē. ʻI he konifelenisi he fuofua taʻu ko iá, naʻe maʻu ha fakahā (ʻoku hoko he taimí ni ko e Tokāteline mo e Ngaahi Fuakava 38) naʻe fokotuʻutuʻu mai ai ʻa e ngaahi ngāue mo ha ngaahi taumuʻa pau ke ngāueʻi ʻe he Siasí. Naʻe ʻikai fuoloa kuo fakahoko ha ngaahi konifelenisi ke tulituli hake ki he tupulekina vave ʻo e ngāue ʻa e ʻEikí: pea mei ʻAokosi ki Tīsema ʻo e 1831, naʻe lekooti ai ʻa e miniti ʻo ha konifelenisi ʻe 26—ko e ʻavalisi ia ʻo ha konifelenisi ʻe taha pe lahi ange ʻi he uike.
Naʻe fakamamafaʻi ʻe he Palōfitá ʻi ha taha ʻo e ngaahi konifelenisi ko ʻení ʻa e fiemaʻu ke hiki mei he ngaahi founga angamahení ki he “mahino ʻo e founga tataki ʻo e ngaahi fakatahá ʻi he taki ʻa e Laumālie Māʻoniʻoní.” ʻI he faikehekehe ʻa e palani mo e ngaahi palopalema ki he fakatonutonu naʻe fehangahangai mo e Siasí, naʻe fiemaʻu leva ʻe he Siasi foʻoú ni ʻa e fekoekoeʻí mo e tataki fakalaumālié. Ka ʻo kapau naʻe fuʻu lahi ʻa e pisinisi ke fai ʻe he ngaahi konifelenisi fakakātoa ʻa e kau kaumātuʻá, ko hai leva te ne fatongia ʻaki ha faʻahinga palopalema ʻoku hoko?
Ko e Faʻunga ʻo e Fakataha Alēleá
Naʻe tokoni ha fakahā naʻe maʻu ʻi he ʻaho 11 ʻo Nōvema 1831 (kuo hoko he taimí ni ko e Tokāteline mo e Ngaah Fuakava 107:60–100), ke mahino ki he Kāingalotú ʻa e founga ke fakaʻaongaʻi ai ʻa e mālohi ki hono vahevahe ʻa e ueʻi fakalaumālié mo kei fua ʻa e ngaahi fiemaʻu mamafa ʻo hono fakalele ʻo e Siasí. Naʻe ʻi ai ha faʻahinga pau ʻo e ngaahi palopalemá naʻe tuku ki he pīsopé, ʻa ia te ne ala ui ai hono ongo tokoní ke tokoni ange ʻi hono ngaahi fatongiá. Ko ha palesiteni ʻo e lakanga fakataulaʻeiki māʻolungá te ne fakakaukauʻi ʻa e ngaahi palopalema faingataʻa angé, ʻo tokoni ki ai ha kau talaʻeiki lahi ʻe toko 12, ko hano ngaahi tokoni. ʻE lava foki ke ui mai ʻa e kau palesiteni ʻo e kaumātuʻá, kau taulaʻeikí, kau akonakí, mo e kau tīkoní ke nau fakataha alēlea mo ʻenau ngaahi kulupú.
Ka ko hono tokoniʻi ʻo e founga konifelenisi angamahení ʻaki ha founga fakataha alēlea ʻoku ʻikai anga ʻakí, naʻe hoko ia ko ha founga naʻe māmālie. Naʻe ʻikai ke vave hono fili ʻo e kau palesiteni ki he ngaahi kulupú takitaha, pea naʻe ʻikai ke tatau ʻa e kau kalaké ʻi hono fakafaikehekeheʻi ʻo ha konifelenisí mo ha fakataha alēleá. ʻI Siulai ʻo e 1832, naʻe “fakaleleiʻi ai ʻe he [kāingalotu Misulí] ʻa e founga mo e anga hono tokangaʻi ʻo e Siasi ʻo Kalaisí,” ʻo hangē ko ʻene hā ʻi he fakahā ʻi Nōvemá, “ke fakahoko ia he taimí ni,” ka naʻe ʻikai ke nau fili ha palesiteni ʻo e kau kaumātuʻá ka nau toki fai pē ʻi Sepitema. Pea neongo naʻe ʻosi hikinimaʻi ia ko e palesiteni ʻo e lakanga fakataulaʻeiki māʻolungá mo ʻosi fili mo ha ongo tokoni, naʻe pau ke toe fakatahaʻi mai ʻe Siosefa Sāmita ʻa e kau taulaʻeiki lahi naʻe faingamālié ke nau hoko ko ha fakataha alēlea kakato ʻa e palesitení ʻi he taimi kotoa pē ʻe fiemaʻu aí.
Naʻe toe ʻi ai pē foki mo ha ngaahi palopalema fakaʻulungaanga ia ʻo kinautolu naʻe kau ki he ngaahi fakatahá. Ko hono moʻoní, naʻe ʻi ai ha niʻihi naʻa nau fefanafanahi, mahino ʻenau taʻe-fiemālié, pea aʻu ʻo nau mavahe ʻi he lolotonga ʻo ha fakataha alēlea. Naʻe toe ʻai foki ʻe he ngaahi fakakaukau hala fakafoʻituituí mo e ngaahi vaivaí ke faingataʻa ke maʻu ʻa e finangalo ʻo e ʻEikí.
Naʻe tali ʻe Siosefa Sāmita ko hono foʻui ʻa e ngaahi tōnounou ko ʻení. Naʻá ne pehē ʻi ha fakataha alēlea ʻi Fēpueli 1834 “Kuo teʻeki ai tuʻo taha ke u tangutu ʻi ha fakataha alēlea ʻi he ngaahi founga kotoa ʻoku totonu ke fakahoko ai ha fakataha alēleá, pea mahalo kuó ne taʻofi ai ʻa e Fakataha Alēleá ʻi ha ngaahi tāpuaki, pe ngaahi tāpuaki lahi.” Naʻá ne toki feinga leva ke “fakaʻaliʻali ʻa e fokotuʻutuʻu ʻo e fakataha alēlea ʻi he ngaahi ʻaho ʻo e kuongamuʻá ʻo hangē ko hono fakahā kiate ia ʻe ha meʻa-hā-maí.” Ko e meʻa-hā-mai ko ia ʻa e Palōfitá ki ha fakataha alēlea ʻi Selusalema naʻe tokangaʻi ʻe he ʻAposetolo ko Pitá mo hono ongo tokoní, naʻe hoko ia ko ha sīpinga ki hono fokotuʻu ʻo e ʻuluaki fakataha alēlea māʻolungá, pea naʻe hoko ia ko ha sīpinga ki he ngaahi fakataha alēlea kehe ʻi he Siasí fakakātoa. ʻOku fakahaaʻi ʻe he ngaahi minití ha niʻihi ʻo e ngaahi fōtunga mahuʻinga ʻo e fakataha alēleá—hangē ko e totonu ʻa ha taha naʻe tukuakiʻi ke maʻu ha vaeua ko ha kau taukapó—naʻe tali kimui ko e folofola ʻoku ʻi he Tokāteline mo e Ngaahi Fuakava 102.
Kimuʻa pea fakahoko ʻe he fakataha alēleá ʻene ʻuluaki fakatonutonú, naʻe tāpuakiʻi ʻe Siosefa Sāmita hono ongo tokoní. Hoko aí, naʻe hanga ʻe he ongo tamaí—ʻe Siosefa Sāmita ko e Lahí mo Sione Sionisoni—ʻo tāpuakiʻi hona takitaha fohá. Pea hangē ko e fengāueʻaki fakataha ʻa e ngaahi konifelenisí mo e faʻunga tupulaki ʻo e fakataha alēleá, naʻe fengāueʻaki fakataha ʻa e faʻunga pule ʻo e lakanga fakataulaʻeikí ʻi he Siasí moe lakanga fakataulaʻeiki ʻoku fakatefito ʻi he fāmilí.
Ngaahi Kōlomú
Hili ha uike mei hono fokotuʻu ʻo e fakataha alēlea ʻi Ketilaní, kuo aʻu mai ʻa Paʻale P. Pālati mo Laimani Uaiti mei Mīsuli ke kole ha fakahinohino ki he Kāingalotu kuo tuli mei honau ngaahi ʻapí. Ko e tali ki hona fonongá, naʻe palani ai ʻe Siosefa Sāmita mo e fakataha alēlea māʻolungá haʻanau fononga ke tokoniʻi kinautolu.
Naʻe fakatou fakaʻaongaʻi ʻe Siosefa Sāmita ha taimi lahi ʻi he lolotonga ʻo hono kei uki ha kau tangata mo tānaki ha paʻanga ʻi he ngaahi kolo fakahahake ʻo e Siasí ki he meʻa naʻe iloa ko e ʻApitanga ʻo Saioné, pea mo ʻenau fononga mei ʻOhaiō ki Mīsulí, ʻi he fanga kiʻi kolo iiiki ange ʻo e Siasí. Naʻe tokoni ʻa e faʻunga ʻo e fakataha alēleá ke fakamavahevaheʻi ʻa e ngaahi fiemaʻu ʻo e ngāue ʻa e Siasí ki he taimi ʻo e kau maʻu lakanga fakataulaʻeiki ʻi he ngaahi senitā ʻo e Siasí, ka kuo siʻi ha meʻa naʻe fai ke fokotuʻutuʻu ʻa e lakanga fakataualaʻeiki ʻi ha feituʻu lalahi, pea mo ʻai ke faitatau ʻa e ongo teifoʻi senitā ʻo e Siasí, mo faitokonia ʻa e ngaahi fiemaʻu ʻa e fanga kiʻi kolo tuʻu mamaʻo angé. Naʻe fiemaʻu ha toe fakahā lahi ange.
Naʻe fokotuʻu ha toe fakataha alēlea māʻolunga ʻe taha ʻi Mīsuli, ʻa ia naʻe tānaki fakataha ki ai ha kāingalotu tokolahi ʻo e Siasí ʻo ofi ki he feituʻu naʻe palani ki Saioné, ʻo fakatatau pē ki he ʻuluaki sīpingá. Naʻe toe tāpuakiʻi ʻe Siosefa Sāmita ʻa e palesiteni ʻo e fakataha aleaʻangá mo hono ongo tokoní, pea toe tāpuakiʻi ai ʻe ha ongo tamai ʻa hona ongo fohá—ka ʻi he taimi ko ʻení ko Pita Uitemā ko e Lahí mo Siosefa Naiti ko e Lahí. Ka ko e hā ʻa e meʻa ʻoku totonu ke fai ki he fanga kiʻi kolo iiki ange ʻo e Siasí? Hili ʻenau foki mei Mīsuli ʻi he ʻosi ʻa e ʻApitanga ʻo Saioné, naʻe fokotuʻu ha ongo kulupu foʻou ʻo e lakanga fakataulaʻeikí: ko e Kōlomu ʻo e Kau ʻAposetolo ʻe Toko Hongofulu Mā Uá, ʻa ia ʻe kau ʻi honau fatongiá ʻa e hoko ko ha “fakataha alēlea māʻolunga pule fefonongaʻaki” ki he fanga kiʻi kolo ʻo e Siasí, pea mo e Kau Fitungofulu, te nau tokoniʻi ʻa e Toko Hongofulu Mā Uá. Makehe mei he tokoni ki he ngaahi kolo lolotonga ʻo e Siasí, naʻe pau ke toe malangaʻi ʻe he Toko Hongofulu Mā Uá mo e Kau Fitungofulú ʻa e ongoongoleleí ʻi he funga ʻo e māmaní mo fokotuʻu ha ngaahi kolo foʻou.
ʻI he faʻahitaʻu failau ʻo e 1835, naʻe fekau atu ai ʻa e Kau ʻAposetolo toki ui foʻou ʻe Toko Hongofulu Mā Uá ke ngāue fakafaifekau ke “puleʻi” ʻa e ngaahi kolo ʻo e Siasí ʻi he fakahahaké. Kimuʻa pea nau mavahé, naʻe ʻoange ʻe Siosefa Sāmita kiate kinautolu ha fakahinohino fakaikiiki ki he fokotuʻutuʻu ʻo e lakaga fakataulaʻeikí ʻa ia ʻoku maʻu he taimí ni ʻi he Tokāteline mo e Ngaahi Fuakava 107. Naʻe fakamahino ʻe he ngaahi fakahinohino ko ʻeni ki he Toko Hongofulu Mā Uá ʻa e fengāueʻaki ʻi he lakanga fakataulaʻeikí. Naʻa nau fakamaʻalaʻala ʻa e hisitōlia mo e ngaahi fatongia ʻo e lakanga taulaʻeiki faka-Melekisētekí mo e lakanga taulaʻeiki faka-ʻĒloné. Naʻa nau fakataukeiʻi ʻa e fakakaukau ʻo ha “kōlomu” ke ne fakamatalaʻi ʻa e ngaahi fatongia makehé pea mo e ngaahi mafai fekauʻaki ʻo e Kau Palesitenisī ʻUluakí, Kau ʻAposetolo ʻe Toko Hongofulu Mā Uá, Kau Fitungofulú, mo e ngaahi fakataha alēlea māʻolungá. Naʻa nau kole foki ke fakanofo ha kau pēteliake ke paotoloaki ʻa e faʻunga angamaheni ʻo e lakanga fakataulaʻeikí fakataha mo e faʻunga fakatakí.
Ko e Hikinimaʻi ʻo e Faʻunga Foʻoú
ʻI he faʻahitaʻu failau mo e faʻahitaʻu māfana ʻo e 1835, naʻe tānaki ai ha vahe ʻe fā ki he faʻunga ʻo e lakanga fakataulaʻeikí ʻi he kamataʻanga ʻo ha Tokāteline mo e Ngaahi Fuakava foʻou, ʻi he ʻosi pē ʻa e talamuʻaki naʻe fakahaá. Ko e ʻuluakí ko e Ngaahi Fakamatala mo e Ngaahi Fuakava ʻo e Siasí (ʻoku hoko he taimí ni ko e Tokāteline mo e Ngaahi Fuakava 20). Naʻe hoko mai ai e naunau foʻou mei he fakahinohino ki he Toko Hongofulu Mā Uá, ʻa ia naʻe fakatahaʻi mo ha konga naʻe fakaleleiʻi mei he fakahā ʻi Nōvema 1831 ʻi he ngaahi fakataha alēlea ʻo e lakanga fkataulaʻeikí ki ha foʻi vahe pē ʻe taha (ʻoku maʻu he taimí ni ʻi he Tokāteline mo e Ngaahi Fuakava 107). Naʻe fika tolu mai e fakapapau mo e fuakava ʻo e lakanga fakataulaʻeikí (ʻoku maʻu he taimí ni ʻi he Tokāteline mo e Ngaahi Fuakava 84). Naʻe hoko mai leva ʻa e ngaahi miniti ʻo e ʻuluaki fakataha aleaʻanga māʻolungá, pea fakatonutonu ʻaki ha fakamatala fakamahino ki he fatongia ʻo e Kōlomu ʻo e Kau ʻAposetolo ʻe Toko Hongofulu Mā Uá. Naʻe hoko fakataha ʻa e ngaahi vahe ko ʻení ko ha faʻahinga tohi-tuʻutuʻuni ki hono puleʻi ʻo e Siasí.
ʻI he ʻaho 17 ʻo ʻAokosi ʻo e 1835, naʻe fakangofua ai ʻe he kau mēmipa ʻo e Siasí ʻa e Tokāteline mo e Ngaahi Fuakavá ʻo tali ʻa e faʻunga kuo fakahā ko ʻeni ʻo e lakanga fakataulaʻeikí. ʻI he māhina ʻe fitu hono hokó, naʻe fakahoko ai ʻe he kau taki ʻo e Siasí ha ngaahi ngāue ke fakakakato ʻa e ngaahi tuʻungá kae lava ʻo fokotuʻutuʻu kakato ʻa e ngaahi kōlomu ʻo e lakanga fakataulaʻeikí ke hikinimaʻi ʻi he fakatapui ʻo e Temipale Ketilaní.