“Sēmisi Kovili pea mo e ‘Tokanga ki Māmaní’” Puipuituʻa ʻo e Ngaahi Fakahaá (2016)
“Sēmisi Kovili pea mo e ‘Tokanga ki Māmaní’” Puipuituʻa ʻo e Ngaahi Fakahaá
Sēmisi Kovili pea mo e “Tokanga ki he Māmaní”
ʻI he kotoa ʻo e ngaahi tala-fakatātā ʻa Sīsuú, ʻoku ʻikai ke ʻi ai ha taha te ne fakahaaʻi ʻa e fakatuʻutāmaki ʻo e tuʻunga fakaākonga faka-Kalisitiané ʻo toe mahino ange ʻi he tala-fakatātā ʻo e tangata tūtuuʻí (vakai, Mātiu 13:3–23). Naʻe kamata kātoa ʻa e ngaahi tengaʻi ʻakau ʻi he talanoá ke tupu ʻāfaʻafa, ka naʻe ʻikai ke tō kātoa ʻi he kelekele naʻe lelei ʻo feʻunga ke ne fakatupulaki ʻa e ivi malava ko iá. Ko e ngaahi tengaʻi ʻakau naʻe tō ki he kekelekele leleí naʻa nau maʻu ʻa e meʻakai naʻe fiemaʻu ke fakatupu ha ngaahi aka loloto mo mafolá pea tekeʻi ai ʻa e ngaahi meʻa tuʻu fakatuʻutāmaki ki heʻenau tupú. Ko e ngaahi tengaʻi ʻakau kehé naʻe ʻikai ke nau fuʻu monūʻia. Naʻe mokulu ha niʻihi ʻi he veʻehalá; ʻoku ʻikai fuʻu mahino moʻoni ai ʻa e folofola ʻa e ʻOtuá, pea hanga ʻe he tokotaha angakoví ʻo toʻo vave ʻa e ngaahi tengaʻi ʻakaú. Pea mokulu ʻa e niʻihi ʻi he potu makamaka, pea ʻikai ke ʻi ai hano aka feʻunga, pea mae ia ʻi he vela ʻa e laʻaá. Fakaʻosí, naʻe mokulu ha ngaahi tengaʻi ʻakau ʻi ha ngaahi ʻakau talatala. Naʻe fakatātā ʻe Sīsū ʻa e tuʻunga faingataʻaʻia ʻo e ngaahi tengaʻi ʻakau ko ʻení kiate kinautolu ʻoku nau fanongo ki he folofolá ka ʻoku fakakāsiaʻi ʻe he fakatauele ʻo e koloá mo e “tokanga ki māmaní” (Mātiu 13:22).
ʻOku fakahoʻata ʻe he Tokāteline mo e Ngaahi Fuakava 39 mo e 40 ʻa e fakalea ʻo e tala fakatātā ko ʻení ʻi hono fakamatalaʻi ʻa e talanoa ʻo Sēmisi Kovilí, ko ha faifekau Metotisi naʻá ne fakahaaʻi haʻane mahuʻingaʻia lahi ʻi he Siasí, kae taimi nounou pē. ʻOku hangē ʻa Kovili ko e ngaahi tengaʻi ʻakau ʻi he talanoá, naʻe kamata mo ha ivi lahi ke tupu. Naʻe fanauʻi ia ko ha foha ʻo ha tamai naʻe faifekau Papitaiso mo ha faʻē Metotisi ʻi Keitemi, ʻi Masasūseti ʻi he 1770, pea hoko ʻa Kovili ko ha tangata malanga fefonongaʻaki ʻi he Siasi Metotisi ʻEpisikoupoló ʻi he 1791. Naʻá ne fononga holo ʻi Lisifila, Konetikati, pea aʻu ʻo mali mo nofo ʻi Paukipisī, ʻi Niu ʻIoke.
Naʻe ʻiloa ʻa Kovili ʻi he ʻātakai ʻo e Metotisí ko ha tangata tuʻu maʻu mo falalaʻanga. ʻI he 1820 tupú, kuó ne hoko ko ha taki ʻi he siasi Metotisi foʻoú. (Naʻe tuʻu hake ʻa e kau Metotisi foʻoú ke fakafepakiʻi ʻa e anga fakamāmani naʻa nau sio ʻoku hū mai ki honau siasí ʻi he taimi naʻe kamata ke liʻaki ai ʻe he siasi Metotisi totonú hono fakaʻaongaʻi ʻo e ngaahi meʻafoaki fakalaumālié.) Kimuʻa pea nau kau ki he Siasi ʻo e Kau Māʻoniʻoni ʻi he Ngaahi ʻAho Kimui Ní, naʻe lau ʻe Pilikihami ʻIongi, Uilifooti Utalafi, mo Sione Teila kinautolu ko e kau Metotisi foʻou. ʻI he 1826, naʻe hoko ai ʻa Kovili ko e palesiteni ʻo e Konifelensi ʻa Niu ʻIoke ʻo e Sōsaieti Metotisí, ko ha kulupu naʻe mavahe mei he Metotisí naʻá ne fakatahaʻi ha niʻihi tokosiʻi. Naʻá ne hoko kimui ko ha fakafofonga fakatau tohi ʻi Niu ʻIoke Siti ki he ngaahi tohi naʻe pulusi ʻe he kau fakafepaki ki he ngaahi kautaha lotu motuʻá.
Naʻe malanga ʻa Kovili ʻi he feituʻu takatakai ʻi Lisimoní, ʻa ia naʻe maile ʻe 45 ki he fakahahake ʻo Feieti, Niu ʻIoké, ʻi he taimi naʻá ne ʻalu ai ki ha konifelenisi ʻa e Kāingalotu ʻo e Siasí ʻi Feieti ʻi he konga kimuʻa ʻo Sānuali 1831. Naʻe lolotonga mavahe ʻa e Siasí mei Niu ʻIoke ʻi he taimi ko iá, pea ʻosi toe maʻu mo e ui ke nau nofo ʻi ʻOhaiō ʻi ha fakahā (vakai, T&F 37:3).
Naʻe saiʻia ange ʻa Kovili ia ʻi he ngaahi akonaki ʻa e Siasí ʻi he ui ko ia ke fai ʻa e hikí. Ko hono moʻoní, naʻe hangē naʻe ofiofi ke ne uluí. Naʻá ne kiʻi tatali ʻi ha ngaahi ʻaho siʻi, ʻo talanoa mo e kau taki ʻo e Siasí, pea fuakava ki he ʻOtuá ke talangofua ki he ui ke fakatomala mo papitaisó.
Naʻe maʻu ʻe Siosefa Sāmita ha fakahā ʻi he ʻaho 5 ʻo Sānuali 1831, ko e ui ʻo Kovili ke kau fakataha mo e Kāingalotú ʻi heʻenau hiki ki ʻOhaioó. Naʻe pehē ʻe he fakahaá, “Kuo ui koe ke ke ngāue ʻi heʻeku ngoue vainé & ke langa hake hoku Siasí.” ʻE fakafiemālieʻi ʻe ha lea pehē ha faʻahinga tangata malanga Metotisi pē, ka naʻe kiʻi ongo fefeka ʻa e veesi hono hokó: “Vakai, ko e moʻoni, ʻoku ou pehē kiate koe, ʻoku ʻikai ui koé ke ke ʻalu ki he ngaahi fonua fakahahaké, ka ʻoku ui koe ke ke ʻalu ki ʻOhaiō.” Naʻe ʻosi malanga ʻa Kovili ʻi he taʻu ʻe 40 tupu ʻi he fakahahake ʻo Niu ʻIoké. Ka ko ʻeni kuo toe kole ke ʻalu ki he tafaʻaki ʻe tahá ʻo malanga ai.
Naʻe fakatokanga ʻa e fakahā ʻi he ʻaho 5 ʻo Sānualí kia Kovili naʻá ne fakafisingaʻi ʻa e ʻEikí ʻi he kuohilí. Pea hangē pē ko e tengaʻi ʻakau naʻe mokulu ʻi he ʻakau talatalá, naʻe tuku ʻe Kovili ʻa e “tokanga ki māmaní” ke ne fakakāsiaʻi ʻa e tengaʻi ʻakau naʻe finangalo ʻa e ʻEikí ke toó.
Kuo pau pē naʻe ʻosi ʻiloʻi ʻe Kovili kapau ʻe hiki ki he hihifó ʻe motuhia ai ʻene ngaahi fetuʻutaki loloto mo lahi kuó ne ngāueʻi ʻi heʻene maʻuʻanga moʻuí. Ko hano ongo foha ʻe toko ua naʻá na hoko ko ha ongo tangata malanga Metotisi, pea naʻe hanga ʻe hono ngaahi taʻu ngāue ʻi Niu ʻIoke Sití ʻo ʻai ke fetuʻutaki ai mo e kau taki mālohi taha ʻo e kautaha lotú. Kuo pau ke liʻaki kātoa ʻa e ngaahi fakalāngilangi kuó ne maʻu ʻi heʻene moʻuí. Naʻe siʻi ange ʻi he houa ʻe 48 hono fakakaukauʻi ʻe Kovili he ʻikai ke hiki ki ʻOhaioó. Naʻe toe ʻi ai mo ha fakahā ʻe taha naʻá ne fakamahinoʻi mai kuo fakafisingaʻi ʻe Kovili ʻa e ui ʻa e ʻEikí: naʻe pehē: “Naʻe tali fiefia [ʻe Kovili] ʻa e folofolá & naʻe ʻahiʻahiʻi leva ia ʻe Sētane & ko e manavahē ki he fakatangá & mo e tokanga ki māmaní naʻe fakatupunga ʻa ʻene fakasinga ʻa e folofolá.”
Hili ʻo ʻene mahuʻingaʻia taimi nounou ʻi he Siasí, naʻe toe foki pē ʻa Kovili ki hono tuʻunga kimuʻá. Naʻá ne malanga mo ne maʻu ha kau ului ki he tui faka-Metotisí ʻi Niu ʻIoke ʻo aʻu ki he 1836, pea foki mai leva ki Niu ʻIoke Siti. Naʻá ne nofo ai pē ʻo aʻu ki heʻene mālōlō ʻi Fēpueli 1850. ʻI he taimi ko iá kuo hiki ʻa e Kāingalotú ia ʻo toe mamaʻo ange ki he hihifó, ʻo fakalaka atu ʻi he ʻOtu Moʻunga Maká ki he feituʻu pakukā ʻo e Toafa Lahí.