Aoao

O i tatou o se vaega o le “Faleteuoloa a le Alii”

Taimi:Seti le taimi i le 60 minute mo le vaega o le Aoao.

Faataitai:Fai ni vaega taitoatolu. Sii tou nofoa ma faafesagai i le tasi ma le isi.

1. O le tasi o outou e tatau ona tau atu i isi se mea na ausia. E mafai ona e fai atu: “Na tuuina mai ia te au le taui o le ‘auaunaga sili’ i le galuega,” po o “Na ou auauna atu i se misiona” (po o se isi valaauga i le Ekalesia), po o “O au o se tina.”

2. Ia, i le vave la te mafaia, e tatau ona tau atu e le isi toalua tomai ma malosiaga na manaomia e ausia ai lena faamanuiaga. E tatau ona tasi le la minute. Afai na e fai mai, “Na ou auauna atu i se misiona,” o isi e mafai ona vave fai atu, “O oe la o se toa, o se tamaitiiti aoga lelei, galue malosi, o se taitai, o se galue i le vafealoai, e lelei le faatu sini, lelei ma tagata, o se faiaoga, o se fuafua lelei, ma e mafai ona faia mea faigata.”

3. Toe fai lenei mea mo tagata taitoatasi.

Talanoa: O le a sou lagona ao talanoa isi e uiga i au taleni ma tomai?

Faitau:O tomai ma malosiaga uma tatou te maua oni vaega o le faleteuoloa a le Alii.

Talanoa: Faitau le mau i le itu taumatau. Pe mafai e la tatou vaega ona galulue faatasi ma “saili mea e fiafia i ai” isi tagata o le vaega?

“Ma o nei mea uma ua mo le manuia o le ekalesia a le Atua soifua, ina ia mafai e tagata taitoatasi ona faalelei atili ana taleni, ina ia mafai e tagata taitoatasi ona maua ni isi taleni, ioe, e sautuaselau lava, e lafo i le faleteuoloa o le Alii … E saili ai e tagata taitoatasi le lelei o lē la te tuaoi, ma faia mea uma ma le manatu tasi i le mamalu o le Atua.”

Mataupu Faavae ma Feagaiga 82:18-19

Faataitai:Sei tatou faia la tatou faatinoga muamua o se vaega. Sei tatou faaaluina le lima minute ma filifili le igoa o la tatou vaega.

Tusi le igoa o le vaega i lalo:

O a mea o le a tatou faia i lenei vaega?

Faitau:O le a tatou galulue faatasi o se vaega e fesoasoani le tasi i le isi e amata ma faaola a tatou pisinisi. E i ai foi sa tatou sini e tele atu—ia ola-tutoatasi ina ia sili atu ai ona mafai ona tatou auauna i isi. Pe a mafai ona tatou tausia i tatou lava, e mafai loa ona sili atu la tatou fesoasoani i isi tagata.

Maimoa:Maimoa i le tala manuia “Samuel: Computer Repair.” (Afai e te le maua le vitio, faaauau pea le faitau i lalo.)

Faataitai:I le isi 12 vaiaso o le a e taliina fesili nei o le pisinisi. Faitau Faatasi, fesili o pisinisi ia o le a taliina i lenei vaega o le ola-tutoatasi.

VAIASO	E FAAPEFEA ONA AMATA LAU PISINISI	VAIASO	E FAAPEFEA ONA FAAOLA LAU PISINISI
1	E faapefea ona ou amataina pe faaola lau pisinisi?	7	E faapefea ona ou faaolaina lau pisinisi?
2	O a mea e mananao tagata e faatau?	8	E fia ou te gafatia e faagalue e faaola ai lau pisinisi?
3	E faapefea ona ou faatau mai au oloa ma fai tau e faatau atu ai?	9	E faapefea ona ou iloa pe ua tatau ona ou faaaogaina se nonogatupe e faaola ai lau pisinisi?
4	E faapefea ona ou iloa o loo maua ni tupe mama o lau pisinisi?	10	E faapefea ona ou faatosina mai nisi tagata faatau ma faia pau talafeagai?
5	E faapefea ona ou tuueseeseina tupe o lau pisinisi ma tupe o le aiga?	11	O le a faapefea ona ou faateleina au tupe mama?
6	O faapefea le alualu i luma o lau pisinisi?	12	E faapefea ona ou faaauau le faaleleia o lau pisinisi?

Faitau:O vaiaso taitasi, o le a tatou faia ni tautinoga, faatinoga, auai i a tatou fonotaga i le taimi sao, ma lipoti i le vaega. Ao tatou galulue ma le vaega, o le a tatou manuia faatasi! O fesili nei ma faatinoga o lenei vaiaso.

Faitau:FESILI O LE VAIASO—O fea e tatau ona taulai i ai au taumafaiga e amata pe faaola ai lau pisinisi?

FAATINOGA O LE VAIASO—Faaaoga le Faafanua o le Pisinisi Manuia i aso uma e aoao ai po o fea e taulai i ai au taumafaiga e amata ma faaola lau pisinisi.

O le vaega o totoe o lenei fonotaga o le a fesoasoani ia i tatou e tali lenei fesili ma fai lenei faatinoga.

E mafai faapefea ona ou pulea ma le atamai au tupe?

Faitau:O le ola-tutoatasi e aofia ai le faaalu laitiiti nai lo le tupe maua ma ia i ai ni tupe i teugatupe. O teugatupe e mafai ona fesoasoani ia i tatou e tali atu i tupe faaalu faafuasei pe fesoasoani ia i tatou e tausia i tatou lava ma o tatou aiga pe a faaitiitia a tatou tupe maua faafuasei. O se vaega o lenei vaega, tatou te tautino atu i le teuina o tupe i vaiaso uma, e tusa lava pe o se siliva se tasi pe lua.

Talanoa: I nisi eria, o se manatu lelei le teu o tupe i se faletupe. I nisi eria, e le o se manatu lelei, e pei o se atunuu ua maualuga le tau o le soifuaga pe ua faaletonu faletupe. Pe o lelei le tulaga o teugatupe i faletupe i lau eria? O fea faletupe e sili pasene mo teugatupe?

Faitau:O se isi vaega o le ola-tutoatasi o le saoloto lea mai aitalafu patino. O nonogatupe patino e masani ona tele atu le faaalu nai lo le mea e mafai ona tatou totogia. Ua fautua mai perofeta ia i tatou e aloese mai aitalafu patino, ma a o sili atu lo tatou ola-tutoatasi o le a faaitiitia ma aveese aitalafu patino. Ae ui i lea, o aitalafu patino atonu e atamai i nisi tulaga. O se vaega o lenei vaega, o le a tatou aoao pe faapefea ona tatou iloa le taimi e mafai ai e se nonogatupe ona fesoasoani ia i tatou e faaola la tatou pisinisi.

O faalavelave faafuasei faafomai e masani ona tele tupe totogi e alu ai. O inisiua ma polokalama faalesoifua maloloina a le malo e mafai ona fesoasoani e puipuia mai nei tau. O le saini mo inisiua po o se polokalama faalesoifua maloloina a le malo e mafai ona avea o se vaega taua o lo tatou ala i le ola-tutoatasi.

Talanoa: O nisi ituaiga o inisiua (e pei o inisiua faalesoifua maloloina ma inisiua o le ola)e faigofie atu ona maua ma e sili atu le fesoasoani nai lo isi ituaiga o inisiua. O nisi fai inisiua e lelei ao isi e le faamaoni. O a inisiua e sili i lau eria?

O le a faapefea ona avea au ma se faipisinisi faamanuiaina?

Faataitai:Ua lisiina e le Faafanua o Pisinisi Manuia mea e fai e faipisinisi faamanuiaina. Sue sau paga. Sue i le Faafanua o Pisinsi Manuia i le itulau mulimuli i lenei tusigaluega.

Feauauai i le faitauina o le pe faapefea ona maua tali a faipisinisi faamanuiaina i le fesili ‘O a mea e mananao tagata e faatau?”

Talanoa: E mafai faapefea e le Faafanua o Pisinisi Manuia ona fesoasoani ia te oe ia avea o se faipisinisi faamanuiaina?

Faitau:

I lenei tusi o galuega, pe a tatou vaai i lenei faailoga, tatou te iloa ai o lenei mataupu faavae o loo i luga o le Faafanua o Pisinisi Manuia.

O le Faafanua o Pisinisi Manuia e le na o mo la tatou fonotaga. Tatou te faaaogaina soo i le vaiaso. Soo se taimi lava tatou te feagai ai ma se faafitauli po o se avanoa, tatou te vaai i la tatou Faafanua o Pisinisi Manuia e vaai po o le a le mea o le a fai e le faipisinisi faamanuiaina.

O le a faapefea ona ou faaleleia lau pisinisi?

Faitau:O faipisinisi faamanuiaina e mafai ona faamatalaina manino a latou pisinisi. O lenei mea e fesoasoani ia i latou e taulai atu i le mea e maua ai tupe ma na e leai se tupe e maua ai. E fesoasoani foi ia i latou e maua ai le fesoasoani mai isi, e pei o isi faipisinisi pe mai tagata fai nonotupe. O faipisnisi faamanuiaina e faamaumau le alualu i luma o a latou pisinisi.

O lenei vaiaso, avane se tusifaamatalaga mo lau pisinisi. O le a e faaaoga lenei tusifaamatalaga e tusi ai ou manatu ma auala mo lau pisinisi ma tausia ai faamaumauga o tupe faaaoga o lau pisinisi. O le a matou faaaoga tusifaamatalaga i la tatou fonotaga ma i le vaiaso.

I lenei tusi o galuega, pe a tatou vaai i lenei faailoga, e faamanatu mai ia i tatou e tusi ia tatou tusifaamatalaga.

E faapefea ona ou matauina se pisinisi ma mafaufau i pisinisi manuia?

Faitau:I le avea ai ma se vaega o le faatinoga o tautinoga o lenei vaiaso, o le a tatou aoao e faaaoga le Faafanua o Pisinisi Manuia e matau ai se pisinisi ma vaai pe o ia mulimuli i mataupu faavae mo le manuia.

Faataitai:Ia fai ni vaega taitoatolu. Sii nofoa ma faafesagai i le tasi ma le isi. I le faaaogaina o le Faafanua o Pisinisi Manuia, mulimuli i nei faatonuga:

1. Faailoa se pisinisi o le lotoifale tou te iloa uma lava se mea e uiga i ai. Ona fai lea e le tagata e toatasi se fesili mai le faafanua. Mo se faataitaiga, “I le faleoloa meafale, pe foliga mai e iloa e le pule mea e mananao tagata e faatau?” Po o, “Pe foliga mai na te iloa le ala e faatau atu ai?”

2. O isi e faaalu se minute pe lua e tali ai le fesili e tusa ai ma lo latou malamalama i le pisinisi ma mataupu faavae mai le faafanua. Mo se faataitaiga, “Ioe, e iloa e le pule mea e faatau e tagata.” Po o, “Leai, e le iloa lelei e le pule le ala e fai ai le pau talafeagai.”

3. Toe fai lenei mea faatolu pe faafa.

4. Ia, talanoa e uiga i lau lava pisinisi. Pe o e faia mea e fai e faipisinisi faamanuiaina?

Faataitai:Faatasi ai ma se paga, sue i itulau 13–14. Faitau ma talanoaina le ala o le a e matauina ai pisinisi i lenei vaiaso.

Aisea e finagalo ai le Alii ia tatou ola-tutoatasi?

Talanoa: Aisea e finagalo ai le Alii ia tatou ola-tutoatasi?

Faitau:Faitau le upusii i le itu taumatau.

“Ina ia faapaiaina o lona uiga o le vaetofia lea po o le tuuina atu o se mea e paia, ma tuuto atu i faamoemoega paia.”

D. Todd Christofferson, “Toe Manatunatuga i se Olaga Faapaiaina,” Ensign po o le Liahona, Nov. 2010, 16

Talanoa: E mafai faapefea e a tatou taumafaiga e amata pe faaola se pisinisi ona faia se “faamoemoega paia,” e pei ona saunoa i ai Elder Christofferson?

Faitau:Ua i ai i le Alii le mana e fesoasoani ia i tatou ina ia ola-tutoatasi. Ua ia fetalai mai, “Aua faauta, o Aʼu o le Atua; ma o Aʼu o se Atua o vavega” (2 Nifae 27:23). Ao tatou tuuto, pe faapaiaina, a tatou taumafaiga ia tatou pisinisi i le faamoemoe paia o le ola-tutoatasi, o le a taitaia e le Alii i tatou e ala i musumusuga. Ao tatou faaalia lo tatou faatuatua i le faalogo ma usitai i uunaiga, o le a faia e le Alii Ana vavega ma faia mea e sili atu ia tatou taumafaiga nai lo le mea e mafai ona tatou faia e i tatou lava.