Punaoa
E Mafai Ona Tatou Faia Lenei Mea!
Filifili tofiga ma faatino le vaega lenei.
MARIA: Auoi, e aoga moni lava lenei mea! Ua iu lava ina ou vaai i ai.
TOALUA O MARIA, DIEGO O le a le mea o loo e talanoa i ai? O le a le mea e aoga?
MARIA: E fetaui lelei lava mea uma. I le sefululua vaiaso talu ai, ina ua matou amata ona o i la matou vaega o le ola-tutoatasi, na leai sou mafaufau o le a tele lona aoga e faaleleia ai lau pisinisi. O tautinoga na matou tausia, o mea na matou aoaoina i la matou vaega o le ola-tutoatasi—e sao lelei uma lava.
DIEGO: Ioe, na ou maua foi lena mea i lau vaega o le sailia o galuega o le ola-tutoatasi. Ua i ai nei sau galuega lelei i le falemai. Faatasi ai ma le tupe maua mai lau galuega ma lau pisinisi fuamoa, o le a iu lava ina tatou mafai ona tausia lo tatou aiga. E fetaui lava mea uma.
MARIA: Diego, e le na o la’u pisinisi. O la tatou pisinisi. Faafetai ia te oe mo le galue malosi i lau galuega ona fesoasoani lea ia te au i la tatou pisinisi fuamoa.
DIEGO: O le pisinisi foi a le Alii. Ua tatou faapaiaina a tatou taumafaiga faapisinisi ia te Ia, faaaoga le faatuatua i le Faaola, ma tatalo e uiga i la tatou pisinisi.
MARIA: Sa tatou manaomia le vaai ma le faaeteete i la tatou pisinisi fuamoa. Sa tatou talanoa i tagata faatau ma isi faipisinisi e fuafua ai mea e mananao ai tagata. Manatua? Na tatou iloaina e tatau ona tatou faatauina le susu ma a tatou fuamoa.
DIEGO: Ioe, ma na tatou vaai po o fea tatou te maua ai a tatou fuamoa ma le susu. Na tatou filifili e le o se manatu lelei mo i tatou le faatau mai o se oti mo le susu. E sili ai le faatau mai o le susu fou ia Pedro, lea ua i ai ni nai ana oti.
MARIA: Ona tatou aoaoina lea le ala e maua ai tupe i aso uma. Ua ou faamaumauina mea uma ua matou faaaluina ma le aofai ua totogi mai e tagata ia i matou. Ua matou mauaina le tele atu o tupe ina ua matou amataina tiliva i le fale.
DIEGO: Ma na ou faamaumauina foi pe fia na matou faaaluina ma pe fia ua matou mauaina mo lo matou aiga. Ua mafai nei ona matou totogi meaaoga a tamaiti.
MARIA: Na fesoasoani Naomi ia i matou e fuafua le ala e tele atu ai mea e faatau. Na matou amata ona fai atu fesili ia matou tagata faatau, faalogo ia i latou, ma fai atu ni fautuaga. Na matou uunaia tagata faatau e faatau nisi fuamoa ma faatau susu. O se manatu maoae lena e auina atu Sofia mo le tiliva i fale. E tatau ona tatou iloa atili a tatou tagata faatau ma avea ma ni uo i le tele o i latou.
DIEGO: Ona o le toatele o tagata faatau fou, sa matou manaomia le sili atu o fuamoa i aso uma, ma ua matou aoao e uiga i le nonoina o tupe ia maua ai nisi moa. Ou te fiafia matou te lei faia lena nonogatupe muamua. Semanu matou te le mafai ona fai peimeni. Sa matou manaomia na o se tamai nonogatupe e faatau ni nai moa.
MARIA: Vaai?! E fetaui lelei lava mea uma. Pau le mea tatou te manaomia nei o le faaauau ona vaai ini auala e faaitiitia ai a tatou tau ma faateleina le tele tatou te faatauina atu.
DIEGO: Ioe. E mafai ona tatou faia lenei mea!
Toe foi i le itulau 184
Lau Pisinisi i le Lima Minute
E tatau ona faitau le fautua i le vaega lenei ao mulimuli i ai isi tagata o le vaega itulau 187.
MARIA: Ua fai si ou fefe e aoao atu, ae ua ou masani lelei ia te outou. O le a ou seki a. Vaega 1—E tatau ona ou faamatalaina lau pisinisi. O lau pisinisi o le faatauina o fuamoa ma le susu. Na ou amata na o fuamoa i ni nai masina talu ai. Na ou faaopoopo le susu ina ua ou iloa na manaomia e au tagata faatau. E i ai nei foi lau auaunaga o le tiliva i le fale. O lau pisinisi ua sili atu le lelei talu ona ou alu i lenei vaega o le ola-tutoatasi.
MARIA: Vaega 2 o loo i ai fesili o le vaiaso. O fesili uma lava na fesoasoani ia te au. Ae afai ou te filifilia se tasi, o le fesili na sili ona faaleleia lau pisinisi o le tuu eseeseina o tupe o le pisinisi ma tupe patino. Ae lei faia o lena, soo se tupe ou maua i lau pisinisi na fefiloi ma au tupe patino ma na faaaluina uma. Sa le lelei. O lenei ua ou tuu eseeseina.
MARIA: Vaega 3—faamaumauga o tupe ma teugatupe. Sa mafai ona ou teuina tupe i le 9 vaiaso mai le 12. Na ou tausia faamaumauga o tupe mo lau pisinisi mo le 8 vaiaso sosoo talu ai. Na ou faia foi lena mea mo au faamaumauga patino. Ua ou fuafua e faaauau le tausia o faamaumauga. Ou te manao moni lava e iloa pe fia ou te maua ma pe fia ou te faaaluina. Ou te matuai fiafia lava ua i ai se tupe i teugatupe. E lei i ai lava muamua. Ou te maua ai le toafilemu i le iloaina o loo i ai iina.
MARIA: Ua lelei, mo le vaega 4—faaauau le faaleleia o lau pisinisi. Ua matuai tele mea ua ou aoaoina i le 12 vaiaso talu ai. Ou te manao e faaauau ona aoao. O le a ou auai i le vaega a le matou siteki o faipisinisi.
MARIA: Vaega mulimuli. Vaega 5 o se sini o le pisinisi. I le tasi le tausaga, ou te manao i lau pisinisi ia lava le faaaluga o tupe ia mafai ai ona ou lisiina se avanoa i le vaega e sili ona pisi i le maketi. O le a fesoasoani lena ia te au i le faaolaina atili o lau pisinisi.
Faafetai tele, ia te outou uma. Na outou fesoasoani moni lava ia te au e faaleleia lau pisinisi!
Toe foi i itulau 187