Punaoa

Pisinisi i luga o se Fasi Laau

Filifili tofiga ma faatino le vaega lenei.

FAATULAGAGA: E toatolu ni tagata lotovaivai o loo nofonofo i se nofoa ae sau loa se tagata lona fa ma nofo i lalo.

FAAMATALAUPU: O le a la se pisinisi faamanuiaina? O le uiga atoa uma lava o le fesoasoani i tagata e foia o latou faafitauli. O le malamalama i tagata faatau. Afai e i ai se tasi o i ai se manaoga ma e fesoasoani ia i latou e foia, o le a latou TOTOGI oe. Ma e lelei lena! Ae faapefea ona ou iloa manaoga o tagata faatau?

TAGATA LONA 4: Talofa. Ei, o loo ou taumafai e amata se pisinisi. Pe i ai se tasi o outou na faia muamua se pisinisi?

ISI TAGATA: “Ioe.” “Ioe.” “Ioe.”

TAGATA LONA 4: Oi, lelei tele. O a na pisinisi?

TAGATA 1: Ia, vaai, ou te fiafia i pea, o lea na ou faatau ai pea i luga o se fasi laau. E pei o se fagafao, ua e iloa. Tatau ona alofa lea ia i latou. Fafaga i latou i lago.

TAGATA LONA 4: E moi?

TAGATA 1: Ioe.

TAGATA LONA 4: O a mai la?

TAGATA 1: Ia, e le lelei. E foliga mai e le malamalama i ai tagata. Ma e taufeu i nisi taimi.

TAGATA LONA 4: Lelei, ae a oe?

TAGATA LONA 2: Ioe, ou te lelei tele i le kuka.

TAGATA LONA 4: Kuka?

TAGATA LONA 2: Sao. O lea na ou tuu ai lenei lisi o mea manaomia mo le pata i luga o se fasi laau.

TAGATA LONA 4: Luga o se fasi laau?

TAGATA LONA 2: Ioe. E afifi malulu i se totila [panikeke Mekisiko]. Ou te matuai lelei lava i le faiga.

TAGATA LONA 4: O a mai la mo oe?

TAGATA LONA 2: Na taulia ni panikeke se lua … ia, e tasi.

TAGATA LONA 4: Ma oe?

TAGATA LONA 3: Ioe, o lea na ou matauina ai tagata i le auala i taimi eseese o le aso. Ma na ou fai atu ni fesili ia i latou. Ma na ou matauina mea na latou faatau ma le taimi ma le tau. Ma na ou talanoa i tagata na faatauina atu oloa e uiga i mea na lelei ma e lei lelei. Sa ou fiafia i se pisinisi meaai, aua e faigofie ona fai, ma ou te fiafia i meaai ma ou te fiafia i tagata.

TAGATA LONA 4: E moi? Na e faia uma na mea?

TAGATA LONA 3: Ioe, mo ni nai aso. Sa matuai manaia lava.

TAGATA LONA 4: Ou te mautinoa na manaia! O a mea na e iloaina ai?

TAGATA LONA 3: Ia, sa ou ofo. Na ou iloa ai o le aoauli ma afiafi, e mananao tagata i sina mea suamalie ma faigofie ae le taugata tele ma malie—se meaai mama e tuuina atu ia i latou se lifi pe faasoa atu i se uo po o latou aiga. O lea na ou taumafai ai ni nai mea ma talanoa i nisi tagata.

TAGATA LONA 4: Ma na e maua la se tali?

TAGATA LONA 3: Ioe. Na ou iloaina afai ou te tuu se fai i luga o se fasi laau ona faasukalati lea i sina sukalati, le ituaiga sao, ona faaopoopo lea i ai o nei faatulutulu, o le a fiafia i ai tagata—ae maise lava pe a i ai i le nofoaga sao i le taimi sao.

TAGATA LONA 4: E moi?

TAGATA LONA 3: Ioe, na ma faatauina atu ma lau uo le 400 i aso muamua e lua ma na tele ni tupe na maua ai. Na matuai fetaui lelei ma manaoga o tagata: sa faigofie ma maua ai tupe mama.

TAGATA LONA 4: Auola! O le a le mea na sosoo ai?

TAGATA LONA 3: Ua ou fiu.

TAGATA LONA 4: Fiu?

TAGATA LONA 3: Ioe, e tele galuega i aso vevela.

TAGATA LONA 4: Mmmm. Pe afaina la pe a ou faaaogaina lau auala?

TAGATA LONA 3: Leai. Mo oe ia fai uma a. Alu sao a i ai.

FAAMATALAUPU: Maimoa. Fai ni fesili.

• Iloa tagata faatau.

• Galue malosi, sue ni tupe.

• Olioli i fa’i!

Toe foi i itulau 18

Filifiliga o le Pisinisi Sao

Feauauai i le faitauina o parakalafa nei.

Pe o le a faapefea ona e filifilia le pisinisi sao mo oe? Pe afai e i ai sau pisinisi, e faapefea ona e iloa pe o le sao lea? O fesili autu nei e fa o le a fesoasoani ia te oe e fai le filifiliga sili.

(1) O a mea e mananao tagata e faatau … (2) e mafai ona ou saunia, (3) o se pisinisi e mafai ona faigofie ona ou amataina, ma (4) o le a faateleina ai lau tupe maua ma fesoasoani ia te au ia sili atu le ola-tutoatasi.

Pe i se isi faaupuga, ou te manaomia le fai o lau filifiliga e faalagolago i (1) tagata faatau ma oloa, (2) ou lava tomai, mea e fiafia i ai, ma aafiaga, (3) le siosiomaga, e aofia ai tauvaga, faioloa ma tupe, ma (4) le malosiaga mo oloa ma tupe mama.

O se faataitaiga lea. Na faaalu e Maria ni nai tausaga e auauna atu ai i faleaiga ma faletalimalo. Ae o lana tupe maua sa le tumau. Ma sa lei lava ana tupe e fesoasoani ai i lona aiga ma o latou manaoga. O lea, i le faaopoopo atu i lana galuega o se e vaaia laulau o le faleaiga, na ia filifili e amata sana ia lava pisinisi. Ae o le fea?

I le amata ai i le fesili tasi, na manatua e Maria na ia faalogo i kuka i faleaiga eseese o faitio pe a le lava a latou fuamoa e sili ona lelei, ma fou. O lea na ia iloa ai o se faafitauli. Lua, na tausia e lona tama ni moa ma na ia iloa ni mea lilo mai ia te ia e uiga i le faateleina o fuamoa e maua. Na ia iloa foi o se galuega faigata tele! Tolu, na te lei iloa tele e uiga i le tauvaga, ae na ia iloa e mafai ona ia amata laitiiti i se nofoaga taalaelae e lata i lona aiga ina ia le taugata tele. Fa, ma na ia iloa le tau na totogi e faleaiga mo fuamoa, o lea na ia fuafua ai e mafai ona ia maua se tupe mama lelei pe a lava fuamoa na te faatau atu.

Pe mafai ona e vaai pe na faapefea e nei fesili e fa ona fesoasoani ia te ia e mafaufau i le filifiliga o le pisinsisi sao?

Ae, na manaomia pea e Maria nisi tali. Na manaomia lona aoaoina o nisi mea se tele e uiga i ana tagata faatau,le tauvaga, faioloa, faiga o tau, ma e oo lava i tomai e faagaoioia ai le pisinisi. O fea e mafai ona ia alu i ai mo se fesoasoani? O le a faapefea ona ia faia le isi laasaga e fai ai se filifiliga?

O le a se mea o le a e faia ia maua ai faamatalaga e te manaomia e fai ai filifiliga lelei?

Toe foi i itulau 18

Aoao e uiga i Isi Pisinisi Faapea

Ina ia tausia au tautinoga, asiasi ma maimoa i pisinisi e pei o lea e te ono amataina (au pisinisi faatauva). O a mea o lelei mo i latou? O a mea e le lelei tele? Talanoa i tagata o loo faagaoioia pisinisi. Ina ia aloese mai lagona o le faatautava, talanoa i tagata i fafo atu o lau eria.

Faaaoga fesili i lalo. Faaopoopo nisi fesili. Faia e pei o se talanoaga. Ia mautinoa e faaali atu lou agaga faafetai.

Faia lenei mea i aso uma o lenei vaiaso (vagana ai le Aso Sa). Faamaumau a latou tali ma mea e te aoaoina i lau tusifaamatalaga.

FAAFEILOAIGA: Talofa, o au o___ (igoa). Lau susuga? O loo ou i ai i se vasega pisinisi ma o loo matou aoaoina pe faapefea ona manuia pisinisi. Pe mafai ona ou fai atu ni fesili?

MANAOGA O TAGATA FAATAU, OLOA

• O a mea e sili ona faatau e au tagata faatau?

• Aisea e te manatu ai o au tagata faatau e faatauina au oloa?

• O ai au pisinisi faatauva? O le a se mea e tulaga ese ai lau pisinisi?

FAIOLOA, TUPE MAMA

• O fea e te aumaia ai au oloa? Pe i ai nisi faioloa?

• Pe e te manatu e mafai ona e maua se tau e pau atu pe a faatele ona e faatauina mai i le taimi e tasi?

• O le a lau tau? Na faapefea ona e filifili i lenei tau? Pe o maua ni au tupe mama?

• O le a le mea o le a tupu pe a e sii pe faapau au tau?

FAATAU

• Mata e fia e mafai ona e faatau atu i aso uma?

• E faapefea ona e maua ni tagata faatau fou?

• O le a le taua o lou nofoaga?

• O a ni mea na avea ma ni ki i lou manuia? Tele ai le faatigaulu?

Aoao e uiga i Tagata Faatau e Tutusa

Talanoa i tagata o e e faatau i pisinisi e pei o lena e te ono amataina. Matauina i latou ma aoao mea uma e te mafaia.

Faaaoga fesili i lalo. Faaopoopo nisi fesili. Faia e pei o se talanoaga. Ia mautinoa e te faaalia le agaga faafetai.

Faia i aso uma o lenei vaiaso (vagana ai le Aso Sa). Faamaumau a latou tali ma mea na e aoaoina i lau tusifaamatalaga.

FAAFEILOAIGA:Talofa, o au o___ (igoa). Lau susuga? O loo ou i ai i se vasega pisinisi ma o loo matou aoaoina e uiga i tagata faatau. Pe mafai ona ou fai atu ni nai fesili?

MANAOGA O TAGATA FAATAU, OLOA

• O a mea e te faatau mai lenei pisinisi?

• Afai e te mafaia, o le a se mea e te suia e uiga i lenei oloa? E uiga i le pisinisi?

• Pe na e faatauina lenei oloa i se isi nofoaga? Pe na sili atu le lelei po o le leaga? Aisea?

FAATAU, TUPE MAMA

• O a mea e te manao ai e faatau lenei oloa iinei?

• O a mea o le a e manao ai e faatau nisi mea se tele?

• Pe o talafeagai le tau? Pe o le a e faatau nisi oloa e tele pe a pau le tau?

• Pe o le a e faatauina pea le tele lena pe a latou siiina le tau?

• Pe taua le nofoaga?

MEA NA MATAUINA (Aua le faia fesili nei; matau tagata faatau e iloa ai tali.)

• Pe o le toetele o i latou o tamaitai po o alii pe fefiloi?

• Pe laiti pe matutua atu i latou?

• Pe foliga mai e tele atu pe laitiiti a latou tupe?

• O le a le taimi o le aso latou te faatau ai?

• E fia latou te faatauina?