Mga Kapanguhaan
Baligya, Baligya, Baligya
Pagpuli-puli og basa sa mosunod.
NARRATOR: Nahinumdom ka ni Kwame, ang tawo nga dunay mga tinuhog nga saging? Nakakita siya og negosyo nga daw malampuson kaayo. Ug siya nailhan nga usa ka banggiitang salesman. Nan perpekto kadto nga panagpares, di ba?
Gihimo niya ang lamiang saging ug nakahukom nga magsugod og sayo. Miadto dayon siya sa usa ka eskina duol sa iyang balay ug gibuhat ang iyang pinakamaayo. Apan walay tawo nga mihunong. Sa sige niya og paningkamot, nagkagrabe na hinuon. Misugod na gani siya og singgit sa mga tawo:
“Hoy, lamian kini nga pagkaon! Lami gyud kaayo! Mao gyud ni inyong gusto! Okey, hatagan mo nako og duha alang sa presyo sa usa! Hoy. …”
Pero ang mga tawo wala gani motan-aw niya. Nasagmuyo kaayo siya mao nga miuli siya sa wala pay tingpaniudto. Unsa may sayop?
Si Kwame milingkod ug naghunahuna. Pakyas ba siya? Bati ba kadto nga produkto? Kadtong tawo nga mihatag niya og ideya—bakakon ba siya? Dayon nahinumdom siya sa gisulti nianang tawo bahin sa iyang market research uban sa mga kustomer—unsay ilang ganahan, ang oras sa adlaw, ang mga lokasyon, unsa sila mamalit kauban ang mga higala—unsay importante kanila! Si Kwame ganahan kaayo nga makabaligya nga iyang nalimtan kon unsay labing importante—pagsulbad sa problema alang sa mga kustomer!
Mao nga misugod na usab siya ug kini ang iyang gibuhat
—Naghulat siya hangtud sa hapon ug gabii sa dihang ang mga tawo ganahan og makaon.
—Mipili siya og lokasyon diin daghang mga tawo ang nagkuyog.
—Nakahukom siya sa pagpatukar og malipayong musika aron makakuha sa pagtagad ug mikanta pa gani siya duyog niini—nga talagsaon gayud! Maayo na lang kay ang mga tawo misugod na sa pagpahiyum.
—Ug mihatag siya og pipila ka libre nga sampol sa mga babaye nga gilibutan sa mga higala—ug dayon gipangutana sila og kusog kon ganahan ba sila niini. Misalir kana!
Sa pagsaka sa halin, nakahukom pa gani siya nga sulayan og mas taas nga presyo—ug walay usa nga mireklamo! Dayon gisulayan niya ang mga discount sa dinaghan, pero mipaminos kana sa iyang ginansya ug wala mopasaka sa halin, mao nga gihunong niya. Ug nakakat-on siya sa lisud nga paagi kon unsa kadugay molungtad ang frozen nga pagkaon sa iyang cooler—ang mga kustomer dili ganahan og nag-umog nga saging!
Sa pag-uli niya sa balay nianang gabhiona, daghan kaayo siya og mga ideya bahin sa bag-ong mga poster alang sa “Singing Banana Man.” Pwede siya sa mga party! Pwede siya sa mga festival! Maka … ah, medyo nasobrahan siya sa iyang gibati. Pero nakita ba ninyo giunsa niya pagkakat-on sa pagdugang og bili alang sa iyang mga kustomer?
Balik ngadto sa pahina 148
Marketing?
Pagpili og mga tahas ug i-drama ang mosunod.
NAOMI: Hoy, Maria. Gusto lang kong mohapit ug moingon nga ganahan kaayo mi nga makapalit og mga itlog gikan nimo. Kombenyente kaayo ni!
MARIA: Salamat, Naomi! Ang pagpalipay sa akong mga kustomer importante kanako.
NAOMI: Kumusta ang negosyo?
MARIA: Morag maayo man. Nakig-istorya ko sa akong mga kustomer—ug sa laing mga tag-iya og negosyo. Ug daghan kog nakat-unan. Gani, akong nakat-unan nga pwede kong mobaligya og gatas uban sa mga itlog.
NAOMI: Kumusta man na?
MARIA: Ah, okey ra. Pero dili pa kaayo daghan ang moanhi. Gusto kang mosulay og pamaligya para nako?
NAOMI: Dili ko uy! Ang among negosyo naglambo ug busy kaayo ming tanan. Duna koy higala nga mitabang namo sa pipila ka mga ideya sa marketing, ug ang halin hapit madoble!
MARIA: Marketing?
NAOMI: Oo. Nagsugod mi pinaagi sa paghunahuna pa bahin sa among mga kustomer ug unsaon pagpangita og dugang mga tawo nga pareha nila. Dayon gitestingan namo ang pipila ka mga ideya ug nakakita mi og tulo nga misalir gyud. Nagpadayon lang mi sa pagsulay ug pagtesting.
MARIA: Nakasulay ko og usa ka paagi.
NAOMI: Unsa kana?
MARIA: Usa ka lalaki ang miabut ug gipapalit ko og mga business card.
NAOMI: Nakatabang ba kini?
MARIA: Dili nako, pero sigurado nga misalir kini sa lalaki nga mibaligya sa mga kard!
NAOMI: Paminaw, makatabang ko nimo sa pagtrabaho sa pipila ka mga ideya sa marketing kon ganahan ka … ug dili ko mamaligya nimo og bisan unsa.
MARIA: Ah, maayo nang paminawon da!
Balik ngadto sa pahina 152
Palihug Palit!
Pagpili og mga tahas ug i-drama ang mosunod.
NARRATOR: Usa ka kustomer ang mipadulong sa tindahan ni Maria.
MARIA: [Sa iyang hunahuna] Sa katapusan, duna na gyuy kustomer. Palihug palit! Palihug.
SAMUEL: [Sa iyang hunahuna] Nagtutok gayud kanang babaye nako. Dili ba ko pwedeng mangumpra nga dili lang tan-awon og maayo?
MARIA: [Sa iyang hunahuna] Palihug palita kanang mga itlog! Nagkinahanglan ko og kwarta.
SAMUEL: [Sa iyang hunahuna] Lain na man ni paminawon. Molakaw na lang ko.
MARIA: [Sa iyang hunahuna] Unsa? Dili! Mokita unta ko og maayo niana.
[Sa kusog, misinggit siya] Duna ba koy matabang nimo?
SAMUEL: Wala, salamat.
NARRATOR: Laing kustomer ang mipadulong ni Maria.
LUCIA: [Sa iyang hunahuna] Duna siguro ni sila dinhi sa akong gikinahanglan. Kinahanglan nakong tan-awon.
MARIA: [Sa iyang hunahuna] Maayo, laing kustomer. Morag kwartahan siya tan-awon. Palihug, palit.
[Sa kusog] Duna ba koy matabang nimo?
LUCIA: Nagtan-aw tan-aw lang ko.
MARIA: Nagkinahanglan ka og mga itlog? Kining mga itlog gikan sa pinakamaayo nga mga manok … ug duna pud koy fresh milk.
[Sa iyang hunahuna] Maka-afford siya niini. Siguro paliton niya ang tanan.
LUCIA: Dili. Dili … kana … ang akong gipangita.
MARIA: Duna pa koy dugang gatas.
LUCIA: Dili, salamat.
MARIA: Siguro kinahanglan nimo kining paliton. Presko ug limpyo kini ug kini ang pinakamaayo sa …
LUCIA: Okey ra. Salamat; molakaw na ko.
Balik ngadto sa pahina 154
Pangutana, Paminaw, Sugyot
Pagpili og mga tahas ug i-drama ang mosunod:
MARIA: Hi, Ako si Maria. Unsay imong ngalan?”
SILVIA: Ako si Silvia.
MARIA: Nianhi ka ba para sa sale? Nagtanyag mi og usa ka libreng itlog kon mopalit ka og lima!
SILVIA: Oo, salamat.
MARIA: Giunsa nimo pagkahibalo bahin sa sale?
SILVIA: Gisultihan ko sa akong higala bahin niini. Miingon siya nga mihatag kuno mo og libre nga mga itlog ug gatas kagahapon. Ug miingon siya nga presko kini!
MARIA: Maayo. Nalipay ko nga giganahan siya niini. Ang among mga produkto pirmeng presko ug lami. Ah, pila man ka itlog ang imong gikinahanglan?
SILVIA: Nagkinahanglan ko og … um … siguro lima.
MARIA: Maayo, kuhaon nato kini para nimo. … Pero nakabantay ko nga nagduha-duha ka. Naghunahuna kon pilay kuhaon?
SILVIA: Ah, oo. Ang pamilya sa akong igsoong lalaki mobalhin sa amo ugma. Wala ko kahibalo kon unsaon nako sa pagpakaon sa tanan. Apan wala siyay laing opsyon.
MARIA: Mao ba. Ah, mapanalanginan ka tungod sa pagtabang. Unsa may imong lutoon?
SILVIA: Dili ko sigurado. Naghunahuna ko nga gamiton ang among tinigum aron ipalit og gamay nga karne aron ipares sa itlog. Kinahanglan lang gyud nako kining inaton.
MARIA: Nakasabut ko. Wala pud mi igo para sa daghang karne, mao nga mogamit ra ko sa among itlog. Sagulan nako og mga utanon ug dugangan og gatas. Duna koy gatas dinhi, ug ang akong higala sa atbang sa karsada dunay presko nga mga utanon. Makapakaon na ka og daghan sa minos nga gasto nianang paagiha. Ganahan ka ba og ekstra nga itlog ug gatas? Mas madugangan kini … pero minos pa gihapon kay sa karne!
SILVIA: Ah, maayo kana nga ideya. Salamat! Onse ka ba-ba nga pakan-on! Oo, gusto kong mopalit og ekstra nga itlog ug gatas.
MARIA: Para sa onse ka tawo, mosugyot ko og walo … ug makakuha gihapon ka og libre nga usa!
SILVIA: Ah, siguro mobalik ko ugma.
MARIA: Okey ra na. Nia lang ko dinhi alang nimo. Pero, dili na ka makakuha nianang libre nga itlog. Pwede ba nako kining masulod sa bag alang nimo karon?
SILVIA: Okey, sakto ka. Angay lamang kini. Salamat.
Balik ngadto sa pahina 154