Mga Kapanguhaan
Ayaw Patya ang mga Manok: Bahin 1
Pagpili og mga tahas ug i-drama ang mosunod.
SETTING: Si Maria dunay daghang mga manok ug makabuhi sa iyang pamilya pinaagi sa pagbaligya og mga itlog sa lokal nga mga tindahan ug mga restawran. Si Mateo, igsoong lalaki ni Maria, mibisita.
MATEO: Maria!
MARIA: Hi, Mateo. Kumusta ka?
MATEO: Maayo ra. Wow! Tan-awa kana nga mga itlog. Nindot ang dagan sa imong negosyo!
MARIA: Oo, ug mapasalamaton ko. Akong gigamit ang mga butang nga akong nakat-unan sa grupo sa self-employment. Akong gituman ang akong mga commitment ug kini epektibo! Ang Ginoo mipanalangin gyud namo. Duna nay resulta ang pagkugi.
MATEO: Maayo na. Tingali moapil sad ko og grupo. Lain pay ato, duna sad koy maayong balita! Nakakita na ko og apartment alang sa akong pamilya! Duna na mi tubig—ug bintana! Gawas lang nga wala koy igong kwarta karon. Kinahanglan ko og 1000 aron makabalhin. Dili ko gusto nga mawala kini nga lugar, Maria. Saktong lugar gyud to namo. Makatabang ka nako?
MARIA: Mateo, gusto kong motabang nimo, ug tingali makahatag ko nimo sa 1000, apan kinahanglan nakong ibaligya ang akong mga manok.
Balik ngadto sa pahina 66
Ayaw Patya ang mga Manok: Bahin II
Pagpuli-puli og basa sa mosunod nga mga paragraph.
Hunahunaa nga nagtrabaho ka sa usa ka hotel. Makakuha ba ka og kwarta gikan sa hotel bisan unsang orasa? Makakuha ba og kwarta ang imong igsoong lalaki bisan unsang orasa kon nagkinahanglan siya niini? Tingali prisohon nila siya!
Karon hunahunaa ang imong negosyo. Ang imong negosyo kinahanglang molambo ug mouswag aron makatuman ka sa sugo nga mahimong self-reliant. Ang imong negosyo usa ka himan nga magamit sa Ginoo sa pagpanalangin kanimo. Kon kini magmalampuson, makahimo ka sa pagpanalangin og daghan pa. Mao nga, unsaon nimo pagpanalipod ang imong negosyo sa pagtabang niini nga magmalampuson? Mokuha ba ka og kwarta gikan sa imong negosyo bisan unsang orasa alang sa personal nga mga panginahanglan? Sa imong igsoong lalaki o silingan?
Ania ang importanting butang nga hinumduman: ikaw ug ang imong negosyo lahi! Kinahanglang dunay lahi nga mga lugar nga butangan sa kwarta sa negosyo ug personal nga kwarta. Mahimong mogamit ka og lahi nga mga box o lahi nga mga bank account. Kinahanglan usab nga mobuhat ka og lahi nga mga rekord alang sa kwarta sa negosyo ug personal nga kwarta: lahi nga lugar ug lahi nga rekord.
Apan karon, unsaon nimo pagkuha og kwarta gikan sa imong negosyo alang sa imong pamilya?
Nan, unsaon man ni kon nagtrabaho ka alang sa uban? Kana nga tawo o negosyo mosuweldo nimo, di ba? O kon ikaw usa ka ahente, ang negosyo tingali mohatag nimo og komisyon. Ang imong suweldo o komisyon mao ang imong kinitaan—ug mobayad ka og ikapulo niini nga kinitaan. Dayon mahimo na kang mogasto alang sa imong personal nga mga panginahanglan, sama sa pagkaon o sinina— o bisan sa pagtabang sa imong igsoong lalaki.
Isip tag-iya og negosyo, kinahanglang suweldohan nimo ang imong kaugalingon—kada semana, pananglit. Kon walay igong cash sa imong negosyo aron masuweldohan, mahimo gihapon nimong bayran ang imong kaugalingon og komisyon—porsinto sa halin. Bisan hain, ang suweldo o komisyon mao ang imong personal nga kinitaan. Mobayad ka og ikapulo niini nga kinitaan. Ug dayon imong magamit ang nahibilin alang sa pagkaon, abangan, tambal ug tinigum.
Kining yanong lakang— ang pagbulag sa imong kwarta sa negosyo ug sa personal—manalipod nimo ug sa imong negosyo. Ang imong negosyo molambo ug magmalampuson. Ug makahibalo ka unsa nga kwarta ang gikan sa imong personal nga account ang imong magamit ug mapakigbahin.
Balik ngadto sa pahina 67
Ayaw Patya ang mga Manok: Bahin III
Pagpili og mga tahas ug i-drama ang mosunod.
MARIA: Mateo, kon akong ibaligya ang akong tanang mga manok, kahibalo ka unsay mahimo niini sa akong negosyo, di ba? Wala na koy mga itlog nga ikabaligya. Ug ang akong negosyo mabangkaruta. Ug dayon unsaon nako pagpakaon ang akong pamilya. Pasayloa ko. Manghinaut ko nga nakasabut ka nga dili ko dayon makakuha og kwarta gikan sa akong negosyo kon nagkinahanglan ko niini. Nagsuweldo lang ko sa akong kaugalingon. Ang nahibilin nga kwarta gamiton aron magpadayon ang negosyo ug pagtabang niini nga molambo, aron kami mahimong self-reliant. Kinahanglang mahimo ming self-reliant aron makapanalangin sa uban.
MATEO: Nakasabut ko.
MARIA: Hinoon, duna koy 200 gikan sa akong personal nga tinigum nga akong ikahatag nimo, kon kini makatabang.
MATEO: Sa tinuod dako kana og ikatabang. Salamat, Maria.
MARIA: Way sapayan. Nalipay ko nga makatabang og gamay!
Balik ngadto sa pahina 67
Ang Imong Negosyo nga Tubig: Mga tubag
Balik ngadto sa pahina 70