Pasiuna

KINI NGA GRUPO makatabang ba NAKO sa pagsugod o pagpalambo og negosyo?

Dili sayon ang pagsugod ug pagpalambo og negosyo, pero ang imong grupo sa self-reliance motabang nimo nga makakat-on aron makahimo og maalamon nga mga desisyon bahin sa negosyo. Sa mga miting sa grupo, mo-commit ka sa paghimo og piho nga mga buhatunon. Ang grupo mohatag nimo og bag-ong mga ideya ug moawhag nimo. Ang tumong niini nga grupo dili lang ang pagtabang nimo sa imong negosyo; kini motabang usab nimo nga molihok nga mas masulundon ug mas may pagtuo sa Ginoo ug makadawat sa Iyang gisaad nga mga panalangin sa temporal ug espiritwal nga self-reliance.

Unsa KINING grupo sa self-reliance?

Ang grupo sa self-reliance lahi sa kasagaran nga mga klase, mga leksyon, ug mga workshop sa Simbahan. Walay mga tigtudlo, mga lider, o mga tigbansay. Ang mga sakop sa grupo dungan nga magkat-on ug mosuporta ug modasig sa usag usa. Tanan kita manubag sa atong mga commitment ug magtinambagay kita sa pagsulbad sa mga problema.

“Walay problema sa pamilya, ward, o stake nga dili masulbad kon mangita kita og mga solusyon diha sa pamaagi sa Ginoo pinaagi sa pagtinambagay—tinuoray nga pagtinambagay—sa usag usa.”

M. Russell Ballard, Counseling with Our Councils, rev. ed. (2012), 4

UNSAY buhaton sa mga sakop sa grupo?

Atol sa mga miting, ang mga sakop sa grupo mo-commit sa paglihok. Kita dili lamang magkat-on apan usab mobuhat sa mga butang nga makapahimo nato nga self-reliant. Mohimo kita og mga commitment, magtinabangay sa pagtuman sa mga commitment, ug mo-report sa atong kalamboan. Tungod kay ang grupo naglihok isip usa ka council, importante nga motambong sa mga miting kanunay ug moabut sa saktong oras. Dad-a kanunay kini nga workbook ug ang mga booklet nga My Foundation: Principles, Skills, Habits ug ang My Path to Self-Reliance. Ang kada miting sa grupo mokabat og mga duha ka oras. Ang pagbuhat sa atong mga commitment mokabat og usa ngadto sa duha ka oras kada adlaw.

Unsay buhaton sa facilitator?

Ang mga facilitator dili mga eksperto sa negosyo o sa pagtudlo. Dili sila mangulo o motudlo sa grupo. Igo lang sila nga motabang sa grupo nga masunod sa tukma ang mga materyal kon unsay nakasulat niini. Ang self-reliance specialist sagad maoy mo-facilitate sa mga miting sa grupo; hinoon, ang mga sakop sa grupo mahimong i-assign sa pag-facilitate human sa pipila ka semana, kon gikinahanglan. Aron makat-on og dugang, tan-awa sa Leader Guide ug sa mga video diha sa srs.lds.org.

Certificate of Completion

Ang mga sakop sa grupo nga mitambong og mga miting ug mituman sa mga commitment mahimong kwalipikado nga makadawat og duha ka mga certificate gikan sa LDS Business College: usa ka certificate sa business entrepreneurship (tan-awa sa mga pahina 197–98 alang sa mga kinahanglanon) ug usa ka self-reliance certificate (tan-awa sa pahina 29 sa My Foundation).