Mga Kapanguhaan
Makahimo Kita Niini!
Pagpili og mga tahas ug i-drama ang mosunod.
MARIA: Wow, epektibo gyud diay ni! Sa katapusan nakasabut na ko.
DIEGO, BANA NI MARIA: Unsay imong gipasabut? Unsay epektibo?
MARIA: Ang tanan mihaum gyud. Dose ka semana ang milabay, sa dihang misugod mi og tambong sa among self-reliance nga grupo, wala koy ideya nga makapalambo ni sa atong negosyo. Ang mga commitment nga among gisunod, ang mga butang nga among nakat-unan sa among self-reliance nga grupo—tanan nasabtan na nako!
DIEGO: Oo, mao sab sa akong grupo sa job search self-reliance. Duna na koy maayong trabaho ron sa ospital. Uban sa akong kita sa trabaho ug sa imong negosyo sa itlog, makahimo na gyud ta sa pagsangkap sa atong pamilya. Haum gyud ang tanan.
MARIA: Diego, dili lang ni akong negosyo. Ato ning negosyo. Salamat sa pagkugi nimo sa imong trabaho ug dayon pagtabang nako sa atong negosyo.
DIEGO: Negosyo usab ni sa Ginoo. Atong gipahinungod ang atong mga paningkamot sa negosyo ngadto Kaniya, migamit og hugot nga pagtuo sa Manluluwas, ug nag-ampo alang sa atong negosyo.
MARIA: Gikinahanglan natong tan-awon og maayo ang atong negosyo sa itlog. Nakig-istorya ta sa mga kustomer ug sa ubang mga tag-iya og negosyo aron masayran unsay gusto sa mga tawo. Kahinumdom ka? Atong naamguhan nga kinahanglan natong mobaligya og gatas uban sa mga itlog.
DIEGO: Oo, ug gitan-aw sab nato asa ta mokuha sa atong mga itlog ug gatas. Nakahukom ta nga dili maayo nga ideya alang nato nga mokuha og kanding alang sa gatas. Mas maayo nga mopalit og lab-as nga gatas gikan ni Pedro, kinsa naa nay pipila ka mga kanding.
MARIA: Dayon nakat-on kita unsaon nga mokita og kwarta kada adlaw. Akong gisubay ang tanan nga atong gigasto ug ang gibayad sa mga tawo kanato. Mas midako ang atong kita sa dihang atong gisugdan ang home delivery.
DIEGO: Ug nagsubay sab ko kon pila ang atong gasto ug pila ang atong kita alang sa atong pamilya. Makabayad na ta sa mga school supply sa mga bata.
MARIA: Gitabangan kita ni Naomi sa paghunahuna unsaon nga makabaligya og daghan. Gisugdan nato sa pagpangutana ang atong mga kustomer, pagpaminaw kanila, ug paghimo og mga sugyot. Giawhag nato ang mga kustomer nga mopalit og dugang mga itlog ug mopalit og gatas. Nindot kadto nga ideya nga gamiton si Sophia alang sa home delivery. Mas nailhan nato og maayo ang atong mga kustomer ug nahimong mga higala sa kadaghanan kanila.
DIEGO: Dayon tungod sa bag-ong mga kustomer, nagkinahanglan kita og dugang mga itlog kada adlaw, ug nakat-on kita kabahin sa paghulam og kwarta para makakuha og dugang mga manok. Maayo gani wala nato dayuna ang unang loan. Dili unta kita makabayad. Nagkinahanglan lang ta og gamay nga loan aron mopalit og pipila ka buok nga dugang mga manok.
MARIA: Tan-awa?! Ang tanan mihaum gyud. Karon magpadayon lang ta sa pagpangita og mga paagi nga maminusan ang atong galastuhan ug mapadako ang atong halin.
DIEGO: Oo. Makahimo kita niini!
Balik ngadto sa pahina 184
Ang Akong Negosyo sa Lima ka Minuto
Ang facilitator kinahanglang mobasa sa mosunod samtang ang ubang mga sakop sa grupo magsunod diha sa pahina 187.
MARIA: Medyo gikulbaan ko nga mopresentar, pero nakaila na kaayo ko ninyo ron. Ma-ok ra ko. Bahin 1—Akong ihulagway ang akong negosyo. Ang akong negosyo mao ang pagbaligya og mga itlog ug gatas. Nagsugod lang ko og mga itlog pipila ka bulan ang milabay. Gipun-an nako og gatas human nako masayri nga ang akong mga kustomer gusto niini. Duna na sab koy home-delivery service karon. Mas maayo ang dagan sa akong negosyo sukad miapil ko niining self-reliance nga grupo.
MARIA: Ang Bahin 2 may kalabutan sa mga pangutana sa semana. Ang tanang mga pangutana nakatabang kanako. Apan kon mopili ra ko og usa, ang pangutana nga labing nakapalambo sa akong negosyo mao ang pagbulag sa akong kwarta sa negosyo ug sa personal. Sa wala pa na, ang bisan unsang kwarta nga akong makita sa negosyo masagol sa akong personal nga kwarta ug magasto. Dili kadto maayo. Karon bulagon na nako sila.
MARIA: Bahin 3—pinansyal nga mga rekord ug tinigum. Nakatigum ko og kwarta ka 9 sa 12 ka semana. Nakatipig ko og pinansyal nga mga rekord sa akong negosyo sa milabayng 8 ka mga semana. Gibuhat ko usab kana sa akong personal nga mga rekord. Nagplano ko nga ipadayon ang pagtipig og mga rekord. Ganahan gyud kong makahibalo pila ang akong kinitaan ug pila ang akong nagasto. Malipayon usab ko kaayo nga adunay kwarta nga tinigum. Wala gyud ko niana kaniadto. Makahupay kanako nga masayud nga anaa kana.
MARIA: Ok, karon sa bahin 4—pagpadayon sa pagpalambo sa akong negosyo. Daghan kaayo ko og nakat-unan sa milabay nga 12 ka semana. Gusto ko nga padayon nga makat-on. Moapil ko sa grupo sa mga tag-iya og negosyo sa stake.
MARIA: Katapusang bahin. Ang bahin 5 usa ka tumong sa negosyo. Sulod sa usa ka tuig, gusto nako nga ang akong negosyo adunay igong cash flow nga makaabang ko og pwesto sa labing busy nga parte sa merkado. Makatabang kana kanako nga mapalambo og maayo ang akong negosyo.
Salamat kaninyong tanan. Nakatabang gyud mo nako nga mapalambo ang akong negosyo!
Balik ngadto sa pahina 187