Magkat-on

Gusto ba ako niini nga negosyo?

Oras:I-set ang timer sa 60 minutos alang sa seksyon nga Magkat-on

Tan-awa:“A Bigger Truck?” (Walay video? Basaha ang pahina 42.)

Basaha:Kon kining duha ka tawo makadala og 200 ka mga melon sa usa ka kargada, ang pagkwenta maingon niini:

Presyo sa pagbaligya: 200 (200 ka melon × 1)

Presyo sa pagpalit: -200 (200 ka melon × 1)

Ginansya: 0

Hisguti:Makatabang ba ang mas dako nga truck? Ngano o nganong dili man?

Basaha:MGA PANGUTANA SA SEMANA—Unsaon nako pagpalit ang akong produkto ug pagpresyo niini?

MGA BUHATUNON SA SEMANA—Mangita ko og tinubdan sa akong produkto ug mopili og presyo.

Basaha:Sa panahon niini nga miting, magkat-on ug magpraktis kita sa mga kahanas nga makatabang nato sa pagtubag niini nga mga pangutana ug mopahigayon niini nga mga buhatunon.

Praktisa:Dayon, niini nga semana, makat-on kamo unsaon sa pakig-istorya sa mga tig-suplay aron “mopalit og barato,” o mopalit sa ubos nga presyo. Makat-on usab kamo unsaon sa pagtakda og presyo aron “mobaligya og mahal,”—gipasabut nga, makaginansya.

Atong basahon ang seksyon nga Mga Galastuhan ug Pagbaligya sa Business Success Map.

Unsaon man nako nga makaginansya?

Basaha:Ang mga tawo nga namaligya og melon kinahanglan nga mokita na sa ilang negosyo sa melon.

Presyo sa pagbaligya: 200 (200 ka melon × 1)

Presyo sa pagpalit: -200 (200 ka melon × 1)

Ginansya: 0

Adunay duha ka paagi nga makaginansya.

Presyo sa pagbaligya: 200 (200 ka melon × 1)

Presyo sa pagpalit: -100 (200 ka melon × .5)

Ginansya: 100

Ipaubos ang presyo sa pagpalit (ang presyo nga inyong gibayad sa tig-suplay).

Presyo sa pagbaligya: 300 (200 ka melon × 1.5)

Presyo sa pagpalit: -200 (200 ka melon × 1)

Ginansya: 100

Patas-i ang presyo sa pagbaligya (ang presyo nga bayaran sa kustomer).

Usahay mabuhat ninyo ang duha: palit og barato ug baligya og mahal!

Presyo sa pagbaligya: 300 (200 ka melon × 1.5)

Presyo sa pagpalit: -100 (200 ka melon × .5)

Ginansya: 200

Ang malampusong mga tag-iya og negosyo mopalit og barato ug mobaligya og mahal.

Basaha:Limitado ang atong kontrol sa presyo sa pagbaligya o sa atong galastuhan. Aduna kitay pipila ka kontrol. Ang malampusong mga tag-iya og negosyo maningkamot nga mapasaka ang presyo sa pagbaligya ug mapaubos ang presyo sa pagpalit.

Hisguti:Sa inyong hunahuna ang mga negosyo ba diin kamo mopalit og pagkaon, gas, ug mga sinina nakaginansya?

Basaha:Aniay laing rason nga mopalit og barato ug mobaligya og mahal. Ang tanang mga negosyo aduna pay daghang gasto kay sa bili lang sa produkto.

Hunahunaa ang mga tawo nga namaligya og melon. Pananglitan nakat-on sila nga mopalit og barato ug mobaligya og mahal. Sa gihapon, aduna pa silay ubang galastuhan, sama sa transportasyon ug mga sweldo. Ribyuha kini.

300 (200 ka melon × 1.5)

-100 (200 ka melon × 5)

-20 (abang sa truck)

-20 (gasolina)

-150 (sweldo sa duha ka tawo)

10 GINANSYA

Basaha:Pinaagi sa pagpalit og barato ug pagbaligya og mahal, ang mga tawo nakabayad sa mga galastuhan, nakasweldo sa ilang kaugalingon, ug nakaginansya pa og gamay. Nagsugod na kini sa pagkahimong tinuod nga negosyo!

Hisguti:Kon anaa ka sa negosyo nga pangserbisyo, unsay imong mabuhat sa pagkontrolar sa galastuhan ug mas makaginansya?

Unsaon nako pagpaminos sa galastuhan?

Tan-awa:“Don’t Close Your Business” (Mga bahin I ug II) (Walay video? Basaha ang pahina 43.)

Hisguti:Unsay inyong buhaton? Pila ka mga tig-suplay ang inyong kinahanglanon?

Unsaon nako pagpakigtrabaho sa mga tig-suplay?

Basaha:Importante kaayo nga makig-istorya kita sa atong mga tig-suplay.

Tan-awa:“Talking to Suppliers” (Walay video? Padayon sa pagbasa.)

Basaha:Niining semanaha, pakig-istorya sa mga tawo nga makasuplay kanimo sa imong produkto o mga sagol sa imong produkto. Kon nagtanyag ka og serbisyo, pakig-istorya sa mga tawo nga makatabang kanimo sa paghatag sa imong serbisyo. Isulat ang imong nakat-unan sa notebook sa imong negosyo.

Praktisa:Uban sa partner, praktisa ang mga pangutana nga imong ipangutana sa mga tig-suplay niining semanaha. Ipasabut sa imong partner ang matang sa tig-suplay nga kinahanglan nimong pakig-istoryahan alang sa imong negosyo. Pagpulipuli sa pagpangutana ug paghatag og makatabang nga feedback. Isulat diha sa imong notebook sa negosyo. Pangutana og pihong mga pangutana nga makatabang kanimo sa pagpalambo sa imong negosyo.

PASIUNA: Hello, Ako si ____ (pangalan). Ug ikaw? Naghunahuna ko nga magsugod og negosyo diin magkinahanglan ko sa mga produkto nga imong gisuplay. Makapangutana ba ko?

PRODUKTO

• Unsa nga mga produkto ang dali mahalin alang kanimo?

• Ngano sa imong pagtuo nga ang mga tag-iya og negosyo mopalit sa unsay imong gisuplay?

• Unsaon nimo pagsusi sa kalidad? (Sulayi pag-obserba ang kalidad.)

• Pila ang imong masuplay? Duna ba kay mga limitasyon sa produksyon?

PRESYO

• Pila man ang imong baligya? Mohatag ka og diskwento?

• Giunsa nimo pagdesisyon niini nga mga presyo?

• Sa imong hunahuna unsay mahitabo kon imong usbon ang mga presyo?

PAGBALIGYA, KOMPETINSYA

• Motabang ba ka sa imong mga buyer sa pagbaligya sa produkto?

• Kinsa man ang kusog mopalit sa imong produkto? Nganong nagmalampuson sila?

• Kinsa ang imong mga kakompetinsya? Unsa man ang lahi kanila?

Idugang ang bisan unsa nimo nga mga pangutana. Siguroa nga makapasalamat ka kanila ug isulat ang imong nakat-unan!

Hisguti:Kon ang tanan nakapraktis na bisan kausa lang, hisguti kini sa tanan:

Unsay inyong buhaton samtang makig-istorya kamo sa mga tig-suplay karong semanaha? Aduna pa ba kamoy dugang ikapangutana kanila? Isulat ang inyong mga hunahuna dinhi o sa notebook sa inyong negosyo.

Unsaon nako pagdeterminar sa akong presyo aron makaginansya?

Basaha:Ang matag negosyo kinahanglang mas dako ang kitaon kay sa gastuhon niini. Nasayud kita unsaon sa pakig-istorya sa mga tig-suplay aron makakita og de-kalidad nga mga produkto sa ubos nga presyo, o paliton og barato. Karon, unsaon man nato sa pagdeterminar sa presyo, o pagbaligya og mahal? Sa atong paghimo niini nga desisyon karong semanaha, ang matag usa kanato mahimong mangutana:

• Unsay labing maayong presyo nga akong makuha gikan sa akong mga tig-suplay?

• Unsa man ang uban nakong galastuhan? (Mga utility, mga suplay, abangan, ubp.)

• Pila man ang akong i-sweldo sa akong kaugalingon ug sa uban?

• Unsaon man nako sa pagdugang og bili ug paghimo sa akong produkto nga lahi? Ang kasayon, serbisyo, kamahigalaon, ug kalidad makadugang og bili ug makahimo nako nga lahi.

• Pila man ang ipabayad sa mga kakompetinsya? Makapabayad ba ko og mahal base sa nadugang nga bili?

• Base niining tanan, pila man ang ginansya nga akong mahimo aron ang akong negosyo molambo ug molampus? Maayo ang mas daghan!

Praktisa:Uban sa partner, basaha ang mosunod ug hisguti kon pila ang andam nga bayaran sa mga kustomer ni Grace alang sa iyang tubig.

Nagtuo si Grace nga ang iyang binotelyang tubig mas bililhon—aduna siyay paagi nga magpabilin kining bugnaw ug nindot ang iyang pwesto. Ang iyang mga kompetinsya wala motanyag og bugnaw nga tubig; dili usab nindot ang ilang mga pwesto.

Si Grace mopalit og tubig sa tag:	5 ang botelya
Ang iyang galastuhan sa sweldo, transportasyon, ug pag-deliver:	2 ang botelya
Ang mga kompetinsya mobaligya sa mga kustomer sa tag:	8–10 ang botelya
Kinahanglang makaginansya siya og dako kutob sa mahimo:	? ang botelya

Sultihi ang grupo sa presyo nga inyong nahukman nga maoy i-presyo ni Grace sa iyang tubig ug ngano.

Hisguti:Unsaon pagkadiskobre ni Grace kon pila ang andam nga bayaran sa mga kustomer?

Unsaon ninyo pagkontrolar sa mga galastuhan, pagdugang sa bili, ug pagdeterminar sa saktong presyo aron makaginansya ang inyong negosyo?