សក្ដានុពលភាពដ៏ទេវភាពរបស់យើង

សេចក្ដីផ្ដើម

ព្រះវរបិតាសួគ៌បានផ្ដល់ផែនការមួយ ដែលធ្វើឲ្យយើងត្រឡប់ទៅកាន់វត្តមានរបស់ទ្រង់វិញ ហើយប្រែក្លាយដូចជាទ្រង់ ។ ប្រធាន ឌៀថើរ អេស្វ អុជដូហ្វ បានបង្រៀន ៖ « យើងជាបុត្រាបុត្រីរបស់ទ្រង់ ពីមុនយើងបានមកកាន់ពិភពលោកនេះ ហើយយើងនឹងនៅតែជាបុត្រាបុត្រីរបស់ទ្រង់រហូតតទៅ ។ សេចក្ដីពិតជាមូលដ្ឋាននេះ គួរតែផ្លាស់ប្ដូររបៀបដែលយើងមើលឃើញខ្លួនឯង បងប្អូនប្រុសស្រីយើង និងជីវិតនេះផងដែរ » ( “Four Titles,” Ensign ឬ Liahona ខែ ឧសភា ឆ្នាំ ២០១៣ ទំព័រ ៥៨ ) ។ នៅពេលដែលសិស្សបានយល់កាន់តែច្បាស់ពីសក្ដានុពលភាពដ៏ទេវភាពរបស់ពួកគេ នោះពួកគេទំនងជាដោះស្រាយនឹងឧបសគ្គដែលពួកគេប្រឈមនៅក្នុងជីវិតរមែងស្លាប់នេះ បានត្រឹមត្រូវជាងមុន ។

ការអានពីសាវតា

ឌៀថើរ អេស្វ អុជដូហ្វ “Four Titles,” Ensign ឬ Liahona ខែ ឧសភា ឆ្នាំ ២០១៣ ទំព័រ ៥៨-៦១ ។
Gospel Topics, “Becoming Like God,” lds.org/topics ។

យោបល់សម្រាប់ការបង្រៀន

លោកុប្បត្តិ ១:២៧; អេសាយ ៥៥:៨–៩; កិច្ចការ ១៧:២៩; ហេព្រើរ ១២:៩; យ៉ូហាន ទី១ ៣:១; ៤:៨–៩; នីហ្វៃទី១ ៩:៦; នីហ្វៃទី២ ៩:២០; មរ៉ូណៃ ៨:១៨; គោលលទ្ធិ និងសេចក្ដីសញ្ញា ៧៦:៤; ៨៨:៤១; ១៣០:២២

យើងជាបុត្រាបុត្រីនៃព្រះ

សូមអញ្ជើញសិស្សឲ្យស្រមៃថា មិត្តដែលមិនមែនជាសមាជិកម្នាក់ បានសួរពួកគេថា សាសនាចក្រយើងជឿថា ព្រះវរបិតាសួគ៌មានលក្ខណៈបែបណា ។ សូមសុំសិស្សឲ្យចែកចាយដោយសង្ខេប ពីរបៀបដែលពួកគេអាចនឹងឆ្លើយតប ។

សូមសរសរបណ្ដុំបទគម្ពីរខាងក្រោមនេះ នៅលើក្ដារខៀន ឬផ្ដល់ជាក្រដាសចែកមួយ ៖

លោកុប្បត្តិ ១:២៧; គោលលទ្ធិ និងសេចក្ដីសញ្ញា ១៣០:២២

នីហ្វៃទី១ ៩:៦; នីហ្វៃទី២ ៩:២០

អេសាយ ៥៥:៨–៩; គោលលទ្ធិ និងសេចក្ដីសញ្ញា ៨៨:៤១

យ៉ូហាន ទី១ ៣:១; ៤:៨–៩

មរ៉ូណៃ ៨:១៨; គោលលទ្ធិ និងសេចក្ដីសញ្ញា ៧៦:៤

កិច្ចការ ១៧:២៩; ហេព្រើរ ១២:៩

សូមចាត់សិស្សឲ្យសិក្សាបណ្ដុំបទគម្ពីរទាំងនេះមួយចំនួនធំ ហើយរកមើលពីអ្វីដែលបទគម្ពីរទាំងនេះបង្រៀនអំពីព្រះវរបិតារបស់យើងដែលគង់នៅស្ថានសួគ៌ ។ សូមប្រាកដថា បណ្ដុំបទគម្ពីរនិមួយៗ ត្រូវបានចាត់ដល់សិស្ស ។ បន្ទាប់ពីផ្ដល់ពេលគ្រប់គ្រាន់ហើយ សូមអញ្ជើញសិស្សឲ្យចែកចាយពីរបៀបដែលពួកគេអាចនឹងប្រើប្រាស់បទគម្ពីរមួយ ឬច្រើនជាងនោះ ដើម្បីពន្យល់ពីអ្វីដែលពួកគេដឹង ឬជឿអំពីព្រះវរបិតាសួគ៌ ។

តើការដឹងពីលក្ខណៈទាំងនេះរបស់ព្រះវរបិតាសួគ៌ អាចជួយអ្នកឲ្យថ្វាយបង្គំទ្រង់ដោយរបៀបណា ?
តើវានឹងជះឥទ្ធិពលដល់ទំនាក់ទំនងរបស់អ្នកជាមួយទ្រង់យ៉ាងដូចម្ដេចដែរ ពេលអ្នកដឹងថា ព្រះវរបិតាសួគ៌ ជាតួអង្គពិតប្រាកដ ដែលមានរូបអង្គជាសាច់ និងឆ្អឹងដែលមានព្រះជន្មរស់ឡើងវិញ ប្រកបដោយសិរីរុងរឿង ហើយជាព្រះបិតានៃវិញ្ញាណរបស់អ្នក ?
ហេតុអ្វីវាមានប្រយោជន៍ ដែលចងចាំថា ទ្រង់ជាបិតានៃវិញ្ញាណរបស់យើង ពេលយើងថ្វាយបង្គំទ្រង់ ? ( ជាផ្នែកនៃការពិភាក្សានេះ សូមសង្កត់ធ្ងន់ថា ដោយសារព្រះ ជាបិតានៃវិញ្ញាណរបស់យើង នោះសក្ដានុពលដ៏ទេវភាពរបស់យើង គឺដើម្បីប្រែក្លាយដូចជាទ្រង់ ។ វាក៏អាចមានប្រយោជន៍ផងដែរ ក្នុងការចែកចាយសេចក្ដីថ្លែងការណ៍ដូចតទៅនេះ ដែលចេញដោយគណៈប្រធានទីមួយ នៅក្នុងឆ្នាំ ១៩០៩ ក្រោមការដឹកនាំរបស់ប្រធាន យ៉ូសែប អេហ្វ ស្ម៊ីធ [ ឆ្នាំ ១៨៣៨–១៩១៨ ] ៖ « បុរស និងស្ត្រីទាំងអស់ គឺជានិមិត្តរូបអំពីព្រះវរបិតា និងព្រះមាតាជាសាកល ហើយពិតជាបុត្រាបុត្រីនៃអាទិទេព » [ “Gospel Classics: The Origin of Man,” Ensign ខែ កុម្ភៈ ឆ្នាំ ២០០២ ទំព័រ ២៩ ] ) ។

សូមចែកច្បាប់ចម្លងនៃសេចក្ដីថ្លែងការណ៍ខាងក្រោមនេះ ដោយព្យាការី យ៉ូសែប ស៊្មីធ ។ សូមសុំឲ្យសិស្សអានវាដោយស្ងៀមស្ងាត់ ហើយកត់ចំណាំឃ្លាទាំងឡាយ ដែលបង្ហាញពីសារៈសំខាន់នៃការយល់ដឹងថាព្រះជានរណា ។

រូបភាព
ព្យាការី យ៉ូសែប ស៊្មីធ

« ប្រសិនបើមនុស្សមិនយល់ពីលក្ខណៈរបស់ព្រះ នោះពួកគេក៏មិនយល់ពីខ្លួនគេដែរ ។ …

« ព្រះអង្គទ្រង់ធ្លាប់បានរស់នៅដូចជាយើងនៅពេលឥឡូវនេះ ហើយជាបុរសដែលបានតម្កើងឡើង ហើយគ្រងរាជ្យនៅក្នុងស្ថានសួគ៌ឯនាយ ! … ប្រសិនបើវាំងននត្រូវបានបើកចំហរឡើងនៅថ្ងៃនេះ ហើយព្រះដ៏អស្ចារ្យដែលកាន់កាប់ពិភពលោកនេះដោយផ្លូវគោចររបស់វា ហើយដែលតម្កើងពិភពលោកទាំងអស់ និងការណ៍ទាំងឡាយដោយព្រះចេស្ដារបស់ទ្រង់ គឺដើម្បីធ្វើអង្គទ្រង់ឲ្យមើលឃើញនោះ — ខ្ញុំនិយាយថា ប្រិសនបើអ្នកឃើញទ្រង់ថ្ងៃនេះ អ្នកនឹងឃើញទ្រង់ដូចជាមនុស្សដូចយើង — ដូចខ្លួនអ្នក មានរូបរាងកាយពេញលេញជាមនុស្ស រូបកាយ និងភាពដូចនឹងមនុស្ស ដ្បិតអ័ដាមត្រូវបានបង្កើតមកក្នុងគ្រប់បែប រូបរាងដូចនឹងព្រះ ហើយបានទទួលការណែនាំពីទ្រង់ ហើយបានដើរ ទូលនឹងទ្រង់ និងបានប្រែចិត្តជឿទ្រង់ ដូចជាមនុស្សម្នាក់និយាយ និងទាក់ទងជាមួយគ្នាដែរ » ( ការបង្រៀនរបស់ប្រធានសាសនាចក្រ ៖ យ៉ូសែប ស្ម៊ីធ [ ឆ្នាំ ២០០៧ ] ទំព័រ ៤០ ) ។

តើការយល់ច្បាស់ថា ព្រះវរបិតាសួគ៌ជានរណា ជួយយើងឲ្យយល់ច្បាស់ពីខ្លួនយើងយ៉ាងដូចម្ដេចដែរ ? ( នៅពេលសិស្សឆ្លើយ សូមសរសេរគោលការណ៍ដូចតទៅនេះនៅលើក្ដារខៀន ៖ នៅពេលយើងយល់ពីព្រះវរបិតាសួគ៌របស់យើង នោះយើងអាចយល់កាន់តែច្បាស់ពីសក្ដានុពលភាពរបស់យើង ក្នុងការក្លាយដូចជាព្រះវរបិតា ព្រះមាតាសួគ៌របស់យើង ) ។

សូមបង្ហាញសេចក្ដីថ្លែងការណ៍ខាងក្រោមដោយអែលឌើរ ដាល្លិន អេក អូក នៃកូរ៉ុមនៃពួកសាវកដប់ពីរនាក់ ហើយសុំសិស្សម្នាក់អានវាឮៗ ៖

រូបភាព
អែលឌើរ ដាល្លិន អេក អូក

« សូមពិចារណាពីអំណាចនៃគំនិតដែលត្រូវបានបង្រៀននៅក្នុងចម្រៀងជាទីស្រឡាញ់របស់យើង ‹ ខ្ញុំជាកូនរបស់ព្រះ › [ ទំនុកតម្កើង លេខ ១៨៨ ] ។ … នេះជាចម្លើយចំពោះសំណួរក្នុងជីវិតមួយដ៏អស្ចារ្យ ‹ តើខ្ញុំជានរណា ? › ខ្ញុំជាកូនរបស់ព្រះ ដែលមានវង្សត្រកូល ខាងវិញ្ញាណមកពីព្រះវរបិតា ព្រះមាតាសួគ៌ ។ ពូជពង្សនោះ ចង្អុលបង្ហាញពីសក្ដានុពលភាពដ៏អស់កល្បរបស់យើង ។ គំនិតដ៏មានឥទ្ធិពលនោះ ជាថ្នាំប្រឆាំងនឹងជំងឺថប់អារម្មណ៍ដ៏អស្ចារ្យ ។ វាអាចពង្រឹងយើងម្នាក់ៗ ឲ្យធ្វើការជ្រើសរើសសុចរិត និងស្វែងរកអ្វីដែលល្អបំផុតនៅក្នុងខ្លួនយើង » ( “Powerful Ideas,” Ensign ខែ វិច្ឆិកា ឆ្នាំ ១៩៩៥ ទំព័រ ២៥ ) ។

សូមសរសេរប្រយោគខាងក្រោមនេះនៅលើ ក្ដារខៀន ៖

ការចេះដឹងរបស់ខ្ញុំដែលថា ខ្ញុំជាកូនរបស់ព្រះ អាច ជួយខ្ញុំ ពេលដែល ។

ការចេះដឹងរបស់ខ្ញុំដែលថា ខ្ញុំជាកូនរបស់ព្រះ បាន ជួយខ្ញុំ ពេលដែល ។

សូមអញ្ជើញសិស្សឲ្យចែកចាយរបៀបដែលពួកគេនឹងបំពេញប្រយោគនេះ ។

រ៉ូម ៨:១៦–១៧; យ៉ូហាន ទី១ ៣:២; នីហ្វៃទី៣ ១២:៤៨ ។

សក្ដានុពលភាពដ៏ទេវភាពរបស់យើង

សូមប្រាប់សិស្សក្នុងថ្នាក់របស់អ្នកថា ពេលខ្លះយើងឮថា នរណាម្នាក់មាន « សក្ដានុពលភាពដ៏អស្ចារ្យ » ។

តើអ្នកគិតថា ឃ្លានេះមានអត្ថន័យយ៉ាងណា ?

សូមសរសេរសេចក្ដីយោងបទគម្ពីរដូចតទៅនេះនៅលើក្ដារខៀន ហើយសុំសិស្សឲ្យសិក្សាវា ដើម្បីយល់ពីសក្ដានុពលភាពដ៏ទេវភាពរបស់យើង ៖ រ៉ូម ៨:១៦–១៧; យ៉ូហាន ទី១ ៣:២; នីហ្វៃទី៣ ១២:៤៨ ។ អ្នកអាចផ្ដល់យោបល់ដល់សិស្សឲ្យធ្វើសេចក្ដីយោងបទគម្ពីរទាំងនេះ ដោយសរសេរបទគម្ពីរយោងពីរផ្សេងទៀត នៅរឹមទំព័រក្បែរខគម្ពីរនិមួយៗ ។

ដោយផ្អែកលើបទគម្ពីរទាំងឡាយ ដែលយើងសិក្សាអំពីលក្ខណៈរបស់ព្រះ តើឃ្លា « យើងនឹងបានដូចជាទ្រង់ » មានន័យយ៉ាងណាចំពោះអ្នក ?
តើអ្នកគិតថា វាមានន័យយ៉ាងណាដែល « គ្រងមរតកនៃព្រះ »ជាមួយនឹងព្រះគ្រីស្ទ ? ( ក្នុងនាមជាព្រះរាជបុត្រាបង្កើតតែមួយនៃព្រះវរបិតានៅក្នុងសាច់ឈាម នោះវាជាព្រះរាជសិទ្ធិរបស់ព្រះយេស៊ូវគ្រីស្ទ ក្នុងការគ្រងមរតកទាំងអស់ដែលព្រះវរបិតាមាន ។ ពួកអ្នកដែលគោរពប្រតិបត្តិ ហើយទទួលពរជ័យពេញលេញនៃដង្វាយធួនរបស់ព្រះអង្គសង្គ្រោះ ក៏នឹងបានគ្រងមរតកទាំងអស់ដែលព្រះវរបិតាមានផងដែរ [ សូមមើល រ៉ូម ៨:១៤–១៨; កាឡាទី ៣:២៦–២៩; គ. និង ស. ៨៤:៣៨ ] ។ សូមសង្កត់ធ្ងន់លើគោលការណ៍ដូចតទៅនេះ ៖ ផែនការរបស់ព្រះវរបិតាសួគ៌ ផ្ដល់មាគ៌ាមួយសម្រាប់យើង ដើម្បីក្លាយដូចជាព្រះវរបិតា ព្រះមាតាសួគ៌របស់យើង ។ សូមចង្អុលបង្ហាញថា ថ្វីបើមនុស្សមួយចំនួនអាចនឹងរិះគន់លើការជឿរបស់យើង ដែលថាយើងអាចក្លាយដូចជាព្រះ ក៏ការជឿនេះត្រូវបានរកឃើញនៅក្នុងការបង្រៀននៃព្រះគម្ពីរប៊ីបផងដែរ ) ។

សូមសរសេរសំណួរខាងក្រោមនេះនៅលើ ក្តារខៀន ៖

តើអែលឌើរ ដាល្លិន អេក អូក បង្រៀនអ្វីខ្លះ អំពីគោលបំណងនៃជីវិតរមែងស្លាប់របស់យើង ?

សូមអានសេចក្ដីថ្លែងការណ៍ខាងក្រោមនេះដោយអែលឌើរ ដាល្លិន អេក អូក ហើយសុំសិស្សឲ្យរកមើលចម្លើយចំពោះសំណួរនៅលើក្ដារខៀន ៖

រូបភាព
អែលឌើរ ដាល្លិន អេក អូក

« នៅក្នុងសាសនាវិទ្យានៃសាសនាចក្រដែលបានស្ដារឡើងវិញរបស់ព្រះយេស៊ូវគ្រីស្ទ គោលបំណងនៃជីវិតរមែងស្លាប់ គឺដើម្បីរៀបចំយើងឲ្យដឹងពីជោគវាសនារបស់យើង ដែលជាបុត្រា និងបុត្រីនៃព្រះ—ដើម្បីក្លាយដូចជាទ្រង់ ។ … ព្រះគម្ពីរប៊ីបពិពណ៌នាអំពីជីវិតរមែងស្លាប់ថាជា ‹ កូនរបស់ព្រះ › ហើយជា ‹ អ្នកគ្រងមរតកនៃព្រះជាមួយនឹងព្រះគ្រីស្ទ › ( រ៉ូម ៨:១៦–១៧ ) ។ វាក៏ប្រកាសផងដែរថា ‹ ឲ្យតែយើងទទួលរងទុក្ខជាមួយនឹងទ្រង់ចុះ ដើម្បីឲ្យបានតម្កើងឡើងជាមួយនឹងទ្រង់ដែរ › ( រ៉ូម ៨:១៧ ) ហើយថា ‹ កាលណាទ្រង់លេចមក នោះយើងនឹងបានដូចជាទ្រង់ › ( យ៉ូហាន ទី១ ៣:២ ) ។ យើងយកការបង្រៀនរបស់ព្រះគម្ពីរប៊ីបទាំងនេះជាការពិតក្នុងន័យត្រង់ ។ យើងជឿថា គោលបំណងនៃជីវិតរមែងស្លាប់ គឺដើម្បីទទួលបានរូបកាយសាច់ឈាមមួយ ហើយតាមរយៈដង្វាយធួននៃព្រះយេស៊ូវគ្រីស្ទ និងដោយការគោរពប្រតិបត្តិតាមក្រឹត្យវិន័យ និងពិធីបរិសុទ្ធទាំងឡាយនៃដំណឹងល្អដើម្បីធ្វើឲ្យសក្ដិសមនឹងទទួលបានស្ថានភាពសេឡេស្ទាលដែលរស់ឡើងវិញ និងសិរីរុងរឿង ដែលហៅថា ការលើកតម្កើង ឬជីវិតដ៏នៅអស់កល្បជានិច្ច ។ … ( ជោគវាសនានៃជីវិតដ៏នៅអស់កល្បជានិច្ចនេះ ឬជីវិតនៃព្រះ គឺត្រូវបានស្គាល់ដោយមនុស្សទាំងអស់ដែលបានសិក្សាគោលលទ្ធិគ្រីស្ទានពីបុរាណ និងអ្នកដែលជឿលើការលើកឡើងជាទេវតា ឬអាទិទេព ) ។ …

« … សាសនាវិទ្យារបស់យើង ចាប់ផ្ដើមនឹងព្រះវរបិតា ព្រះមាតាសួគ៌ ។ សេចក្ដីប៉ងប្រាថ្នាដ៏ខ្ពស់បំផុតរបស់យើង គឺដើម្បីក្លាយដូចជាទ្រង់ ។ នៅក្រោមផែនការដ៏ពេញដោយមេត្តាករុណារបស់ព្រះវរបិតា ការណ៍ទាំងអស់នេះគឺអាចកើតឡើងទៅបាន តាមរយៈដង្វាយធួននៃបុត្រាបង្កើតតែមួយអង្គរបស់ព្រះវរបិតា គឺជាព្រះអម្ចាស់ និងជាព្រះអង្គសង្គ្រោះរបស់យើង គឺព្រះយេស៊ូវគ្រីស្ទ » ( “Apostasy and Restoration,” Ensign ខែ ឧសភា ឆ្នាំ ១៩៩៥ ទំព័រ ៨៦–៨៧ ) ។

( កំណត់ចំណាំ ៖ អ្នកអាចនឹងត្រូវពន្យល់ថា ការលើកឡើងជាទេវតា និង ការលើកឡើងជាអាទិទេព សំដៅដល់គំនិតដែលថា មនុស្សម្នាក់អាចក្លាយជាព្រះមួយអង្គ ឬត្រូវបានលើកឡើងទៅឯស្ថានភាពដ៏ទេវភាព ) ។

សូមពិភាក្សាចម្លើយរបស់សិស្សចំពោះសំណួរនៅលើក្ដារខៀន ។ បន្ទាប់មកសូមសួរ ៖

តើអ្នកមានគំនិតអ្វីខ្លះ នៅពេលអ្នកពិចារណាថា ផែនការរបស់ព្រះវរបិតាសួគ៌ផ្ដល់ដល់អ្នកនូវឱកាសដើម្បីក្លាយដូចជាទ្រង់នោះ ?
ហេតុអ្វីបានជាដង្វាយធួនរបស់ព្រះយេស៊ូវគ្រីស្ទ ចាំបាច់សម្រាប់យើង ដើម្បីក្លាយដូចជាព្រះ ?

ដើម្បីជំរុញដល់ការពិភាក្សានេះ សូមរំឭកសេចក្ដីថ្លែងការណ៍ខាងក្រោមជាមួយសិស្សរបស់អ្នក ៖

« ពួកបរិសុទ្ធថ្ងៃចុងក្រោយ យល់ពីទំហំដ៏មហិមានៃដង្វាយធួនរបស់ព្រះគ្រីស្ទ ថាវាធ្វើឲ្យសក្ដានុពលភាពដ៏ធំធេងបំផុតរបស់មនុស្សលោកកើតឡើងបាន ។ ដង្វាយធួនរបស់ព្រះគ្រីស្ទ មិនត្រឹមតែផ្ដល់ការអត់ទោសដល់អំពីបាប និងមានជ័យជំនះលើសេចក្ដីស្លាប់ប៉ុណ្ណោះទេ ប៉ុន្ដែវាក៏ប្រោសលោះនូវទំនាក់ទំនងដែលមិនឥតខ្ចោះ ព្យាបាលរបួសខាងវិញ្ញាណ ដែលរារាំងការលូតលាស់ ហើយពង្រឹង និងធ្វើឲ្យបុគ្គលម្នាក់ៗមានលទ្ធភាព អភិវឌ្ឍលក្ខណៈដូចជាព្រះគ្រីស្ទផងដែរ [ សូមមើល អាលម៉ា ៧:១១–១២ ] ។ ពួកបរិសុទ្ធថ្ងៃចុងក្រោយជឿថា វាមានតែតាមរយៈដង្វាយធួននៃព្រះយេស៊ូវគ្រីស្ទប៉ុណ្ណោះ ដែលយើងអាចមានក្ដីសង្ឃឹមដ៏ពិតប្រាកដមួយ ក្នុងការទទួលបាននូវសិរីល្អដ៏អស់កល្បជានិច្ច ហើយថា អំណាចនៃដង្វាយធួនរបស់ទ្រង់ អាចមានបានតែតាមរយៈសេចក្ដីជំនឿលើព្រះយេស៊ូវគ្រីស្ទ ការប្រែចិត្ត បុណ្យជ្រមុជទឹក ការទទួលអំណោយទាននៃព្រះវិញ្ញាណបរិសុទ្ធ និងការស៊ូទ្រាំដល់ទីបំផុតនៅក្នុងការធ្វើតាមការណែនាំ និងគំរូរបស់ព្រះគ្រីស្ទប៉ុណ្ណោះ [ សូមមើល នីហ្វៃទី២ ៣១:២០; មាត្រានៃសេចក្ដីជំនឿ ១:៤ ] ។ ហេតុដូច្នេះហើយ ពួកអ្នកដែលក្លាយដូចជាព្រះ ហើយចូលទៅក្នុងភាពពោរពេញនៃសិរីល្អរបស់ទ្រង់ ត្រូវបានពិពណ៌នាថាជា មនុស្សដែលបាន ‹ ធ្វើឲ្យល្អឥតខ្ចោះ តាមរយៈព្រះយេស៊ូវគ្រីស្ទដ៏ជាអ្នកកណ្ដាលនៃសេចក្ដីសញ្ញាថ្មី ដែលបាននាំមកនូវដង្វាយធួនដ៏ល្អឥតខ្ចោះនេះ តាមរយៈការច្រួចព្រះលោហិតរបស់ព្រះអង្គផ្ទាល់ › [ គ. និង ស. ៧៦:៦៩ ] » ( Gospel Topics, “Becoming Like God,” lds.org/topics ) ។

សូមចែកច្បាប់ចម្លងនៃសេចក្ដីថ្លែងការណ៍ខាងក្រោមដោយប្រធាន ឌៀថើរ អេស្វ អុជដូហ្វ នៃគណៈប្រធានទីមួយ ។ សូមអញ្ជើញសិស្សឲ្យអានសេចក្ដីថ្លែងការណ៍នេះ ហើយគូសចំណាំគំនិតទាំងឡាយ ដែលផ្ដល់ក្ដីសង្ឃឹមដល់ពួកគេ ថាពួកគេអាចឈោងទៅដល់សក្ដានុពលភាពដ៏ទេវភាពរបស់ពួកគេ ។ សូមចង្អុលបង្ហាញថា ប្រធាន អុជដូហ្វ បានផ្ដល់សន្ទុរកថានេះ នៅក្នុងការប្រជុំបព្វជិតភាពនៃសន្និសីទទូទៅមួយ ប៉ុន្តែគំនិតទាំងនេះអាចអនុវត្តបានចំពោះមនុស្សគ្រប់គ្នា ។

រូបភាព
ប្រធាន ឌៀថើរ អេស្វ អុជដូហ្វ

« ងារមួយដែលកំណត់លក្ខណៈយើងគ្រប់គ្នា តាមរបៀបដ៏សំខាន់បំផុតគឺ បុត្រា [ ឬបុត្រី ] នៃព្រះវរបិតាសួគ៌។ មិនថាយើងមាន ឬធ្វើអ្វីផ្សេងក្នុងជីវិតទេ យើងមិនត្រូវភ្លេចថាយើងពិតជាកូនចៅខាងវិញ្ញាណរបស់ព្រះឡើយ ។ យើងជាបុត្រាបុត្រីទ្រង់ ពីមុនយើងបានមកកាន់ពិភពលោកនេះ ហើយយើងនឹងនៅតែជាបុត្រាបុត្រីទ្រង់រហូតតទៅ ។ សេចក្ដីពិតជាមូលដ្ឋាននេះ គួរតែផ្លាស់ប្ដូររបៀបដែលយើងមើលឃើញខ្លួនឯង បងប្អូនប្រុសស្រីយើង និងជីវិតនេះផងដែរ ។ …

« វាអាចជារឿងនាំឲ្យបាក់ទឹកចិត្តនៅពេលខ្លះ ដែលដឹងថាការក្លាយជា [ បុត្រ ] ម្នាក់នៃព្រះមានន័យបែបណា តែយើងបរាជ័យក្នុងការបំពេញសក្ដានុពលភាពរបស់យើង ។ មារសត្រូវចូលចិត្តឆក់យកឱកាសនៃអារម្មណ៍បែបនេះ ។ សាតាំងចង់ឲ្យអ្នកកំណត់ខ្លួនឯងដោយអំពើបាបរបស់អ្នក ជាជាងដោយសក្ដានុភាពអ្នកពីព្រះ ។ បងប្អូនអើយ សូមកុំស្ដាប់វា ។

« យើងទាំងអស់គ្នាធ្លាប់ឃើញក្មេងរៀនដើរ ។ គាត់បោះជំហានខ្លីៗទាំងឃ្លីងឃ្លោង ។ គាត់ដួល ។ តើយើងស្ដីបន្ទោសលើការខិតខំបែបនេះឬ ? ប្រាកដជាពុំមែនហើយ ។ តើឪពុកនឹងដាក់ទោសក្មេងដែលជំពប់ជើងដួលយ៉ាងដូចម្ដេច ? យើងលើកទឹកចិត្ត យើងអបអរ ហើយយើងសរសើរ ដោយសារជំហានខ្លីៗនោះហើយ ទើបធ្វើឲ្យក្មេងប្រែក្លាយដូចជាឪពុកម្ដាយខ្លួន ។

ឥឡូវ បងប្អូនប្រុសទាំងឡាយ បើប្រៀបនឹងភាពឥតខ្ចោះនៃព្រះ យើងជាមនុស្សមិនខុសពីក្មេងដែលចេះដើរតេះតះនោះទេ ។ តែព្រះវរបិតាសួគ៌ជាទីស្រឡាញ់នៃយើងចង់ឲ្យយើងប្រែក្លាយដូចជាទ្រង់ ហើយបងប្អូនប្រុសជាទីស្រឡាញ់ នោះគួរតែជាគោលដៅដ៏អស់កល្បរបស់យើងផងដែរ ។ ព្រះទ្រង់ជ្រាបថាយើងមិនអាចទៅដល់ទីនោះភ្លាមៗបានឡើយ តែដោយមួយជំហានម្ដងៗ » ( “Four Titles,” Ensign ឬ Liahona ខែ ឧសភា ឆ្នាំ ២០១៣ ទំព័រ ៥៨ ) ។

តើការចងចាំអំពីសេចក្ដីពិតដ៏អស់កល្បទាំងនេះ អាចជួយអ្នកឲ្យឈោងទៅដល់សក្ដានុពលភាពដ៏ទេវភាពរបស់អ្នកយ៉ាងដូចម្ដេចដែរ ?
តើការចងចាំពីសេចក្ដីពិតទាំងនេះ មានឥទ្ធិពលលើរបៀបដែលអ្នកប្រព្រឹត្តនឹងសមាជិកនៃក្រុមគ្រួសាររបស់អ្នកយ៉ាងដូចម្ដេចខ្លះ ?
តើការចេះដឹងរបស់អ្នកអំពីសេចក្ដីពិតទាំងនេះ អាចនឹងជះឥទ្ធិពលយ៉ាងដូចម្ដេច លើបំណងប្រាថ្នារបស់អ្នក ដើម្បីស្រាវជ្រាវព័ត៌មានអំពីសមាជិកក្រុមគ្រួសាររបស់អ្នកដែលបានស្លាប់ទៅហើយ ហើយធ្វើពិធីបរិសុទ្ធទាំងឡាយក្នុងព្រះវិហារបរិសុទ្ធសម្រាប់ពួកគាត់ ?

សូមលើកទឹកចិត្តសិស្ស ឲ្យចែកចាយអ្វីដែលពួកគេបានរៀន និងមានអារម្មណ៍ អំឡុងពេលរៀនមេរៀននេះ ជាមួយនឹងសមាជិកក្រុមគ្រួសារ ឬមិត្តភក្ដិម្នាក់ ក្នុងអំឡុងសប្ដាហ៍ខាងមុខនេះ ។ ពួកគេអាចនឹងពិចារណាផងដែរ ពីអ្វីដែលពួកគេអាចធ្វើរាល់ថ្ងៃ ដើម្បីចងចាំជានិច្ចថា ពួកគេជាបុត្ររបស់ព្រះវរបិតាសួគ៌ ហើយដើម្បីដាក់ផែនការកត់ត្រាក្នុងសៀវភៅកំណត់ហេតុ ពីរបៀបដែលការចងចាំដល់សេចក្ដីពិតដ៏ពិសិដ្ឋនេះ ជះឥទ្ធិពលដល់សកម្មភាពទាំងឡាយរបស់ពួកគេ ។

ការអានរបស់សិស្ស

លោកុប្បត្តិ ១:២៧; អេសាយ ៥៥:៨–៩; កិច្ចការ ១៧:២៩; រ៉ូម ៨:១៦–១៧; ហេព្រើរ ១២:៩; យ៉ូហាន ទី១ ៣:១-២; ៤:៨–៩; នីហ្វៃទី១ ៩:៦; នីហ្វៃទី២ ៩:២០; នីហ្វៃទី៣ ១២:៤៨; មរ៉ូណៃ ៨:១៨; គោលលទ្ធិ និងសេចក្ដីសញ្ញា ៧៦:៤; ៨៨:៤១; ១៣០:២២ ។
Gospel Topics, “Becoming Like God,” lds.org/topics ។