ពួកព្យាការី និងពួកសាវកប្រកាសយ៉ាងឧឡារិក

សេចក្ដីផ្ដើម

« ក្រុមគ្រួសារ ៖ ការប្រកាសដល់ពិភពលោក » ចាប់ផ្ដើមជាមួយនឹងសេចក្ដីថ្លែងនេះ ៖ « យើងជាគណៈប្រធានទីមួយ និងក្រុមប្រឹក្សានៃពួកសាវកដប់ពីរនាក់ នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ សូមប្រកាសជាឧឡារិកថា … » ( Ensign ឬ Liahona ខែ វិច្ឆិកា ឆ្នាំ ២០១០ ទំព័រ ១២៩ ) ។ ព្យការីនៅគ្រប់សម័យកាន់កាប់ត្រួតត្រា មានទំនួលខុសត្រូវមួយ ក្នុងការប្រកាសពីព្រះទ័យរបស់ព្រះអម្ចាស់ និងក្នុងការព្រមានពីលទ្ធផលនៃអំពើបាប ។ មេរៀននេះ នឹងជួយសិស្សឲ្យយល់ពីតួនាទីរបស់ព្យាការី ក្នុងនាមជាអ្នកយាម ដែលព្រមានយើងអំពីវិបត្តិភ័យដែលត្រូវបានមើលឃើញជាមុន ។

ការអានពីសាវតា

អិម រ័សុល បាឡឺដ “Stay in the Boat and Hold On!” Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ៨៩–៩២ ។
ហិនរី ប៊ី អាវរិង “Finding Safety in Counsel,” Ensign ខែ ឧសភា ឆ្នាំ ១៩៩៧ ទំព័រ ២៤-២៦ ។
ខារ៉ុល អេហ្វ ម៉ាកខន់ឃី “Live according to the Words of the Prophets,” Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ៧៧–៧៩ ។

យោបល់សម្រាប់ការបង្រៀន

អេសេគាល ៣៣:១–៧; គោលលទ្ធិ និងសេចក្ដីសញ្ញា ១:៤–៥, ១១, ១៤

អ្នកយាមនៅលើប៉ម

រូបភាព

ប៉មយាម

សូមបង្ហាញសិស្សនូវរូបភាពនៃប៉មយាម ហើយសួរពួកគេ ថាបើពួកគេអាចកំណត់ពីអត្តសញ្ញាណនៃសំណង់នៅក្នុងរូបភាព ។ សូមពន្យល់ថា សំណង់នោះគឺជាការចម្លងពីប៉មយាមពីបុរាណ ។ ( វិធីសាស្ត្រមួយទៀត បើមាននៅក្នុងភាសារបស់អ្នក សូមបង្ហាញនាទីទីមួយនៃវីដេអូ « អ្នកយាមនៅលើប៉ម (Watchman on the Tower) »lds.org/media-library ) ។ សូមសួរសិស្សថា មានអ្វីខ្លះដែលអ្នកយាមអាចនឹងសម្លឹងរកមើល ហើយហេតុអ្វីបានជាវាសំខាន់ ដែលពួកគេត្រូវបំពេញកាតព្វកិច្ចរបស់ខ្លួន ។

សូមអញ្ជើញសិស្សអាន អេសេគាល ៣៣:១–៣ ហើយរកមើលទំនួលខុសត្រូវរបស់អ្នកយាមម្នាក់ ។

តើអ្វីជាទំនួលខុសត្រូវរបស់អ្នកយាម ? ( ដើម្បីព្រមានមនុស្សអំពីគ្រោះថ្នាក់ដែលនឹងមកដល់ ) ។

សូមឲ្យសិស្សម្នាក់អាន អេសេគាល ៣៣:៤–៧ ឮៗ ។

តើកាតព្វកិច្ចអ្វីខ្លះ ដែលព្រះអម្ចាស់បានប្រទានទៅឲ្យអេសេគាល ?
តើពួកព្យាការីទាំងឡាយដូចជាអ្នកយាមនៅលើប៉មយ៉ាងដូចម្ដេច ? ( វាអាចជាប្រយោជន៍ ក្នុងការឲ្យសិស្សអាន គោលលទ្ធិ និងសេចក្ដីសញ្ញា ១:៤-៥, ១១, ១៤ ដើម្បីជួយពួកគេឲ្យយល់ថា ព្យាការីសម័យទំនើបបម្រើជាអ្នកយាម ។ អ្នកអាចផ្ដល់យោបល់ដល់សិស្សឲ្យធ្វើសេចក្ដីយោងបទគម្ពីរទាំងនេះទៅ អេសេគាល ៣៣:៤–៧ ។ សូមពិចារណាក្នុងការចង្អុលបង្ហាញថា អែលឌើរ អិម រ័សុល បាឡឺដ នៃកូរ៉ុមនៃពួកសាវកដប់ពីរនាក់ បានប្រកាសថា « ក្នុងនាមជាសាវករបស់ព្រះអម្ចាស់យេស៊ូវគ្រីស្ទ វាគឺជាកាតព្វកិច្ចរបស់យើង ក្នុងការធ្វើជាអ្នកយាមនៅលើប៉ម » [ “Beware of False Prophets and False Teachers,” Ensign ខែ វិច្ឆិកា ឆ្នាំ ១៩៩៩ ទំព័រ ៦២ ] ) ។

សូមថ្លែងទីបន្ទាល់អំពីគោលលទ្ធិដូចតទៅនេះ ៖ ព្រះវរបិតាសួគ៌បានហៅព្យាការីថ្ងៃចុងក្រោយទាំងឡាយ ដើម្បីព្រមានយើងអំពីគ្រោះថ្នាក់ដែលនឹងមកដល់ ។

ដើម្បីពង្រឹងដល់គោលលទ្ធិនេះ សូមបង្ហាញសេចក្ដីថ្លែងការណ៍ខាងក្រោមដោយប្រធាន ហិនរី ប៊ី អាវរិង នៃគណៈប្រធានទីមួយ ហើយឲ្យសិស្សម្នាក់អានវាឮៗ ៖

រូបភាព
ប្រធាន ហិនរី ប៊ី អាវរិង

« វាហាក់បីដូចជាគ្មានទីបញ្ចប់នៃព្រះបំណងរបស់ព្រះអង្គសង្គ្រោះ ដើម្បីដឹកនាំយើងទៅទីសុវត្ថិភាពឡើយ ។ ហើយរបៀបដែលទ្រង់បង្ហាញផ្លូវដល់យើងគឺខ្ជាប់ខ្ជួនជានិច្ច ។ ទ្រង់អំពាវនាវតាមវិធីច្រើនយ៉ាង ដើម្បីវានឹងបានទៅដល់អស់អ្នកដែលមានឆន្ទៈនឹងទទួលវា ។ ហើយវិធីទាំងនោះតែងមានការរួមបញ្ចូលនូវការផ្ញើសារតាមរយៈមាត់របស់ព្យាការីទ្រង់ នៅពេលណាដែលមនុស្សមានភាពសក្តិសមនឹងមានព្យាការីនៃព្រះក្នុងចំណោមពួកគេ ។ ពួកអ្នកបម្រើដែលមានសិទ្ធិអំណាចទាំងនោះ តែងតែទទួលខុសត្រូវចំពោះការព្រមានដល់មនុស្ស ដោយប្រាប់ពួកគេពីផ្លូវទៅកាន់ទីសុវត្ថិភាព » ( “Finding Safety in Counsel,” Ensign ខែ ឧសភា ឆ្នាំ ១៩៩៧ ទំព័រ ២៤ ) ។

តើនៅពេលណាដែលអ្នកមានអារម្មណ៍ថា អ្នកត្រូវបានការពារដោយការធ្វើតាមដំបូន្មានដែលប្រកបដោយការព្យាករ ?
តើដំបូន្មានអ្វីខ្លះ ដែលអ្នកបានឮពីពួកសាវក និងពួកព្យាការីសម័យទំនើបទាំងឡាយ ដែលអាចនាំមកនូវការការពារខាងវិញ្ញាណដល់ក្រុមគ្រួសារនោះ ?
តើនៅក្នុងរបៀបណា ដែលការប្រកាសអំពីក្រុមគ្រួសារ ជាសំឡេងមួយនៃការព្រមានពីព្រះវរបិតារបស់យើងដែលគង់នៅឋានសួគ៌ ?

អេម៉ុស ៣:៦-៧

ព្យាការី និងសាវក ជួយយើងឲ្យយល់អំពីទស្សនវិស័យរបស់ព្រះអម្ចាស់ចំពោះក្រុមគ្រួសារ

សូមចែកចាយសេចក្ដីថ្លែងការណ៍ខាងក្រោម ដោយ អែលឌើរ អិម រ័សុល បាឡឺដ នៃកូរ៉ុមនៃពួកសាវកដប់ពីរនាក់ ។ សូមសុំឲ្យសិស្សរកមើលរបៀបទាំងឡាយ ដែលព្យាការីជ្រាបពីគ្រោះថ្នាក់នៅក្នុងពិភពលោកសព្វថ្ងៃនេះ ។

រូបភាព
អែលឌើរ អិម រ័សុល បាឡឺដ

« ខ្ញុំបានឮថា អ្នកខ្លះគិតថាថ្នាក់ដឹកនាំសាសនាចក្ររស់ ‹ ដាច់ពីគេឯង › ។ អ្វីដែលគេភ្លេចនោះគឺថា យើងគឺជាបុរស និង ស្ត្រីមានបទពិសោធន៍ច្រើន ហើយយើងធ្លាប់បានរស់នៅទីកន្លែងជាច្រើន ហើយធ្វើការជាមួយមនុស្សមានសាវតាខុសៗគ្នាជាច្រើន ។ ការចាត់តាំងរបស់យើងសព្វថ្ងៃ នាំឲ្យយើងធ្វើដំណើរពេញពិភពលោក ទៅជួបនឹងថ្នាក់ដឹកនាំនយោបាយ ថ្នាក់ដឹកនាំសាសនា អាជីវកម្ម និងសប្បុរសធម៌ទាំងឡាយពេញទូទាំងពិភពលោក ។ ទោះជាយើងធ្លាប់បានទស្សនាសេតវិមាននៅទីក្រុង វ៉ាស៊ីនតោន ឌី.ស៊ី និងបានជួបថ្នាក់ដឹកនាំប្រទេស [ និងសាសនា ] នានាលើសាកលលោកក្ដី ក៏យើងធ្លាប់បានចុះសួរសុខទុក្ខដល់ [ គ្រួសារ និងមនុស្ស ] ដែលខ្សត់ខ្សោយបំផុត នៅលើផែនដីផងដែរ ។ …

« ពេលអ្នកគិតឲ្យបានច្បាស់ពីជីវិត និងការបម្រើរបស់យើង អ្នកនឹងយល់ស្របថា យើងជួបប្រទះ ហើយដកពិសោធន៍លើផែនដីតាមរបៀបជាច្រើនដែលមនុស្សខ្លះពុំមាន ។ អ្នកនឹងទទួលស្គាល់ថា យើងពុំរស់ ‹ ដាច់ពីគេឯង › ជាងមនុស្សភាគច្រើនឡើយ ។ …

« … មានអ្វីមួយ ស្ដីពីប្រាជ្ញាផ្ទាល់ខ្លួន និងប្រាជ្ញារួមគ្នារវាង [ ថ្នាក់ដឹកនាំសាសនាចក្រ ] ដែលនឹងផ្ដល់ការលួងលោមចិត្តខ្លះៗ ។ យើងបានដកពិសោធន៍នូវការណ៍ទាំងអស់នោះហើយ រួមទាំងមានលទ្ធផលពីច្បាប់សាធារណៈ និងគោលនយោបាយនានា ការខកចិត្តផ្សេងៗគ្នា និងសោកនាដកម្ម និងមរណភាពក្នុងគ្រួសារយើងផ្ទាល់ជាច្រើន ។ យើងយល់ពីអ្វីដែលកើតឡើងក្នុងជីវិត » ។ ( “Stay in the Boat and Hold On!” Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ៩០ ) ។

តើបទពិសោធន៍ដ៏ទូលំទូលាយរបស់ថ្នាក់ដឹកនាំសាសនាចក្រ អាចនឹងជួយពួកលោកនៅក្នុងតួនាទីរបស់ពួកគេក្នុងនាមជាអ្នកយាម ដោយរបៀបណា ?

សូមពន្យល់ថា ព្យាការីអាចទទួលបានអ្វីមួយដែលសំខាន់ឆ្ងាយហួសពីបទពិសោធន៍ជីវិតនេះទៅទៀត ដើម្បីជួយពួកលោកឲ្យបំពេញកាតព្វកិច្ចដ៏ទេវភាពដែលត្រូវបានប្រទានឲ្យពួកលោក ។ សូមឲ្យសិស្សម្នាក់អាន អេម៉ុស ៣:៦–៧ ឮៗ ។ សូមចង្អុលបង្ហាញដល់សិស្សថា ការបកប្រែដោយយ៉ូសែប ស្ម៊ីធ ផ្លាស់ប្តូរពាក្យ « បានធ្វើ » ទៅជា « បានដឹង » នៅក្នុង ខ ៦ ហើយពាក្យ « តែ » ទៅជា « ទាល់តែ » នៅក្នុង ខ ៧ ( សូមមើលលេខយោងនៃខទាំងពីរនេះ ) ។ ការពិភាក្សានេះ អាចជាឱកាសដ៏អស្ចារ្យមួយសម្រាប់អ្នក ដើម្បីលើកទឹកចិត្តសិស្សឲ្យប្រើលេខយោង អំឡុងពេលការសិក្សាព្រះគម្ពីរផ្ទាល់ខ្លួនរបស់ពួកគេ ។

តើ អេម៉ុស ៣:៦–៧ បង្រៀនអ្វីខ្លះ អំពីព្យាការី ?

សូមចែកចាយនិយមន័យដូចតទៅនេះជាមួយសិស្ស ៖ ព្យាការី « គឺជា « បុរសម្នាក់ដែលត្រូវបានហៅដោយព្រះ ហើយថ្លែងជំនួសព្រះ ។ ក្នុងនាមជាសារទូតរបស់ព្រះ ព្យាការីម្នាក់ ទទួលបាននូវព្រះបញ្ញត្តិ ការព្យាករ ហើយទទួលវិវរណៈទាំងឡាយមកពីព្រះ ។ … ព្យាការីម្នាក់ ប្រកាសបដិសេធអំពើបាបទាំងស្រុង ហើយទាយទុកពីផលវិបាករបស់វា » ( សេចក្ដីណែនាំដល់បទគម្ពីរទាំងឡាយ « ព្យាការី » scriptures.lds.org ) ។

សូមចម្លងដ្យ៉ាក្រាមខាងក្រោមដាក់លើក្ដារខៀន ៖

រូបភាព

ដ្យ៉ាក្រាមទស្សនវិស័យ

សូមទុកពេលឲ្យសិស្សមួយភ្លែត ដើម្បីពិចារណា និងពិភាក្សាលើដ្យ៉ាក្រាមនេះ ។ អ្នកអាចនឹងចង់ពន្យល់ថា ដ្យ៉ាក្រាមនេះបង្ហាញពីទសន្សវិស័យរបស់ព្រះអំពីក្រុមគ្រួសារ ដែលនៅជុំវិញជីវិតមុនផែនដី ជីវិតរមែងស្លាប់ និងជីវិតក្រោយពីជីវិតរមែងស្លាប់ ។ តាមរយៈវិវរណៈ ព្យាការីទទួលទស្សនវិស័យដែលកាន់តែទូលំទូលាយ ហើយជាការតបស្នងទៅវិញ ពួកលោកជួយយើងពង្រីកទស្សនវិស័យ និងការយល់ដឹងរបស់យើង ។

តើដ្យ៉ាក្រាមនេះ បង្ហាញពីមូលហេតុដែលយើងនឹងមានភាពឈ្លាសវៃដែលសិក្សាការប្រកាសអំពីក្រុមគ្រួសារ យ៉ាងដូចម្ដេចដែរ ? ( សូមសរសេរគោលការណ៍ដូចតទៅនេះនៅលើក្ដារខៀន ៖ដោយការសិក្សាការប្រកាសអំពីក្រុមគ្រួសារ យើងអាចរៀនពីទស្សនវិស័យរបស់ព្រះវរបិតាយើងអំពីក្រុមគ្រួសារ ) ។

សូមឲ្យសិស្សយកក្រដាស « ក្រុមគ្រួសារ៖ ការប្រកាសដល់ពិភពលោក » របស់ពួកគេចេញមក ។ សូមសង្កត់ធ្ងន់លើឃ្លាចាប់ផ្ដើម ៖ « យើងជាគណៈប្រធានទីមួយ និងក្រុមប្រឹក្សានៃពួកសាវកដប់ពីរនាក់ នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ សូមប្រកាសជាឧឡារិក ។ … » សូមទុកពេលឲ្យសិស្សពីរបីនាទី ដើម្បីមើលការប្រកាសអំពីក្រុមគ្រួសារ ដោយរកមើលភស្ដុតាងដែលថា ទស្សនវិស័យរបស់ព្រះអំពីអាពាហ៍ពិពាហ៍ និងក្រុមគ្រួសារ ខុសពីទស្សនវិស័យរបស់លោកិយ ។ សូមអញ្ជើញសិស្សឲ្យចែកចាយអ្វីដែលពួកគេបានរកឃើញ ហើយរាយចម្លើយរបស់សិស្សនៅលើក្ដារខៀន ។

គោលលទ្ធិ និងសេចក្តីសញ្ញា ៩០:១-៥

ការធ្វើតាមដំបូន្មានរបស់ព្យាការីនៅក្នុងការប្រកាសអំពីក្រុមគ្រួសារ នឹងរក្សាយើងឲ្យមានសុវត្ថិភាព

ចូរអញ្ជើញសិស្សឲ្យស្រាវជ្រាវគោលលទ្ធិ និង សេចក្ដីសញ្ញា ៩០:១-៣ ដើម្បីមើលឃើញនូវអ្វីដែលព្រះអម្ចាស់បានប្រទានដល់ព្យាការី យ៉ូសែប ស្ម៊ីធ ។

តើព្រះអម្ចាស់បានប្រទានអ្វីដល់យ៉ូសែប ស្ម៊ីធ ? ( កូនសោនៃនគរ ដែលតំណាងឲ្យសិទ្ធិទាំងឡាយនៃគណៈប្រធាន ឬសិទ្ធិអំណាចដើម្បីដឹកនាំនគររបស់ព្រះនៅលើផែនដីនេះ ) ។
តើនរណាកាន់កូនសោដដែលទាំងនោះ នៅសព្វថ្ងៃនេះ ? ( សមាជិកនិមួយៗនៃគណៈប្រធានទីមួយ និងកូរ៉ុមនៃពួកសាវកដប់ពីរនាក់ ) ។

សូមអញ្ជើញសិស្សម្នាក់ឲ្យអាន គោលលទ្ធិ និងសេចក្ដីសញ្ញា ៩០:៤-៥ ឮៗ ។ សូមសុំឲ្យសិស្សក្នុងថ្នាក់រកមើលអ្វីដែលព្រះអម្ចាស់បានសន្យា ថានឹងបានមកដល់សាសនាចក្រតាមរយៈព្យាការី ។ ( ព្រះអម្ចាស់បានមានព្រះបន្ទូលថា សាសនាចក្រនឹងទទួលបាន « ព្រះបន្ទូល » ។ សូមប្រាប់សិស្សថា « ព្រះបន្ទូល » មានន័យថា « វិវរណៈ » ) ។

តើការព្រមានអ្វីខ្លះ ដែលព្រះអម្ចាស់បានប្រទានដល់ពួកបរិសុទ្ធ នៅក្នុង ខ ៥ ?
តើគោលការណ៍អ្វីខ្លះ ដែលយើងអាចរៀនមកពីការព្រមាននេះ ? ( ចម្លើយទាំងឡាយគួរតែបង្ហាញពីការយល់ដឹងអំពីគោលការណ៍ដូចតទៅនេះ ៖ បើយើងរាប់វិវរណៈទាំងឡាយដែលព្រះប្រទានឲ្យតាមរយៈពួកព្យាការីរបស់ទ្រង់ជាឥតការ នោះយើងនឹងជំពប់ ហើយដួល ។ សូមពិចារណាអំពីការសរសេរគោលការណ៍នេះនៅលើក្ដារខៀន ) ។

សូមបង្ហាញសេចក្ដីថ្លែងការណ៍ដូចតទៅនេះដោយស៊ិស្ទើរ ខារ៉ុល អេហ្វ ម៉ាកខន់ឃី នៃគណៈប្រធានយុវនារីទូទៅ និងអែលឌើរ អិម រ័សុល បាឡឺដ នៃកូរ៉ុមនៃពួកសាវកដប់ពីរនាក់ ៖

រូបភាព
ខារ៉ុល អេហ្វ ម៉ាកខន់ឃី

© Busath.com

« យើងអាចជ្រើសរើសមិនអើពើ មិនខ្វាយខ្វល់ មិនគោរព ឬបះបោរទាស់នឹងបន្ទូលនៃព្រះគ្រីស្ទ ដែលបាននិយាយដោយពួកអ្នកបម្រើដែលបានតែងតាំងរបស់ទ្រង់ ។ ប៉ុន្តែ ព្រះអង្គសង្គ្រោះ បានបង្រៀនថា អ្នកទាំងឡាយដែលធ្វើដូច្នោះ នឹងត្រូវកាត់ចេញពីរាស្ត្រនៃសេចក្ដីសញ្ញារបស់ទ្រង់ [ សូមមើល នីហ្វៃទី៣ ២០:២៣ ] » ( ខារ៉ុល អេហ្វ ម៉ាកខន់ឃី “Live according to the Words of the Prophets,” Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ៧៩ ) ។

រូបភាព
អែលឌើរ អិម រ័សុល បាឡឺដ

« ខ្ញុំបានសង្កេតឃើញនៅក្នុងការបម្រើរបស់ខ្ញុំថា ជនដែលវង្វេង [ ហើយ ] ភាន់ច្រឡំ គឺជាជនដែលជានិច្ចកាល … ភ្លេចខ្លួនថា ពេលគណៈប្រធានទីមួយ និងកូរ៉ុមនៃពួកដប់ពីរនាក់ ថ្លែងឡើងក្នុងសំឡេងតែមួយ នោះវាគឺជាសំឡេងនៃព្រះអម្ចាស់សម្រាប់គ្រានោះ ។ ព្រះអម្ចាស់រំឭកយើងថា ‹ ទោះដោយជាសំឡេងរបស់យើងផ្ទាល់ ឬក៏ដោយសំឡេងនៃពួកអ្នកបម្រើរបស់យើងក្តី គឺដូចតែគ្នា › [គ. និង ស. ១:៣៨] » ( អិម រ័សុល បាឡឺដ “Stay in the Boat and Hold On!” ទំព័រ ៩០ ) ។

តើអ្វីខ្លះដែលអាចជាកត្តាជំរុញមួយចំនួន ដែលធ្វើឲ្យមនុស្សម្នាក់រាប់ដំបូន្មានដែលមានក្នុងការប្រកាសអំពីក្រុមគ្រួសារថាជាឥតការ ?
តើពរជ័យអ្វីខ្លះ ដែលអ្នក ឬអ្នកផ្សេងទៀតទទួលបាន តាមរយៈការស្ដាប់តាមដំបូន្មានដែលមានក្នុងការប្រកាសអំពីក្រុមគ្រួសារ ?
តើការគិត និងអារម្មណ៍អ្វីខ្លះដែលអ្នកមាន ទាក់ទងនឹងព្យាការីថ្ងៃចុងក្រោយ ដែលអ្នកអាចចែកចាយជាមួយសិស្សក្នុងថ្នាក់ ?

សូមថ្លែងទីបន្ទាល់ថា ការប្រកាសអំពីក្រុមគ្រួសារ គឺជាការប្រកាសដ៏បំផុសគំនិតមួយ មកពីសំឡេងរួបរួមគ្នានៃព្យាការី អ្នកមើលឆុត និងអ្នកទទួលវិវរណៈទាំងដប់ប្រាំនាក់ ។ សូមលើកទឹកចិត្តសិស្សឲ្យចាប់យកឱកាស ពេញមួយវគ្គសិក្សា ដើម្បីអធិស្ឋានសុំទីបន្ទាល់មួយដែលកាន់តែជ្រាលជ្រៅ អំពីសេចក្ដីពិតដែលមាននៅក្នុងការប្រកាសអំពីក្រុមគ្រួសារ ។

ការអានរបស់សិស្ស

អេសេគាល ៣៣:១–៧; អេម៉ុស ៣:៦–៧; គោលលទ្ធិ និងសេចក្ដីសញ្ញា ១:៤–៥, ១១, ១៤, ៣៧–៣៨; ៩០:១–៥; ១២៤:១២៥–១២៦ ។
ហិនរី ប៊ី អាវរិង “Finding Safety in Counsel,” Ensign ខែ ឧសភា ឆ្នាំ ១៩៩៧ ទំព័រ ២៤-២៦ ។