Դաս 13. Դասարանի նախապատրաստական նյութ. Սեռական մտերմության աստվածային պարգևը և սուրբ պատասխանատվությունը Հավերժական ընտանիքը. Ուսուցչի նյութ
Դաս 13. Դասարանի նախապատրաստական նյութ. Հավերժական ընտանիքը. Ուսուցչի նյութ
Դաս 13․ Դասարանի նախապատրաստական նյութ
Սեռական մտերմության աստվածային պարգևը և սուրբ պատասխանատվությունը
Մարդու սեռական զգացմունքների ունակությունը սուրբ նվեր է, որը կենտրոնական է փրկության ծրագրի համար: Այնուամենայնիվ, սեռական պատկերներով և իրարամերժ ուղերձներով հագեցած աշխարհում հեշտ է անորոշություն կամ շփոթմունք զգալ սեռական զգացմունքների ունակության իմաստի և նպատակի վերաբերյալ: Ուսումնասիրելիս ձգտեք ավելի լավ հասկանալ, թե ինչ սուրբ և կարևոր դեր է խաղում սեռական մտերմությունը Երկնային Հոր երջանկության ծրագրում և քննարկեք, թե ինչպես կարող է այս գիտելիքը օրհնել ձեր կյանքը:
Բաժին 1
Ինչպե՞ս կարող եմ օրհնվել՝ հասկանալով, որ սեռական մտերմությունը կարող է լինել ամուսնության գեղեցիկ և սուրբ մաս
Մեր Երկնային Հայրը մեզ տվել է սեռական ցանկություններ և սերունդ տալու զորություն: Առաջին Նախագահության նախագահ Դալլին Հ. Օուքսը բացատրել է. «Մահկանացու կյանք ստեղծելու զորությունը Աստծո կողմից իր զավակներին տրված ամենավեհ զորությունն է» (“The Great Plan of Happiness,” Ensign, Nov. 1993, 74): Տասներկու Առաքյալների Քվորումից երեց Դեյլ Գ. Ռենլանդը և քույր Ռութ Լիբբերտ Ռենլանդը ուսուցանել են. «Մեր կողմից սեռական զգացմունքների ունակության պատշաճ արտահայտումը հնարավոր է դարձնում, որ Աստծո ծրագիրը տարածվի երկրի վրա և հավերժության մեջ՝ հնարավորություն տալով մեզ նմանվել մեր Երկնային Հորը» (“The Divine Purposes of Sexual Intimacy,” Ensign, Aug. 2020, 16):
Երկնային Հոր երջանկության ծրագրում նախատեսված է, որ «ամուսնու և կնոջ միջև ֆիզիկական մտերմությունը լինի գեղեցիկ և սուրբ: Այն կարգված է Աստծո կողմից՝ երեխաների ստեղծման ու ամուսնու և կնոջ միջև սիրո արտահայտման համար» (General Handbook: Serving in The Church of Jesus Christ of Latter-day Saints, 38.6.5, ChurchofJesusChrist.org): Տասներկու Առաքյալների Քվորումից երեց Դեյվիդ Ա. Բեդնարը նաև բացատրել է. «Մտերիմ հարաբերությունները … մեր աստվածային էության և ներուժի գերագույն արտահայտություններից մեկն են, և ամուսնու և կնոջ միջև հուզական ու հոգևոր կապերի ամրապնդման միջոց» («Մենք հավատում ենք մաքրաբարո լինելուն», Լիահոնա, մայիս 2013, 42):
Սեռական մտերմությունը կնոջը և ամուսնուն ավելի սերտ կապելու կարևոր միջոց է: Սեռական մտերմությունը կարող է վերաբերել նաև մտավոր, հուզական և հոգևոր մտերմությանը:
Եդեմի պարտեզում Ադամն ու Եվան սկսեցին սովորել ամուսնության մեջ մտերմության կարևորության մասին:
Ուսումնասիրեք դասին նախապատրաստվելիս
Կարդացեք Ծննդոց 2.18, 21–24-ը և քննարկեք, թե ամուսնությունն ինչպես է նախատեսում միավորել ամուսնուն և կնոջը մտավոր, հուզական, հոգևոր և ֆիզիկական առումներով: (Նշում. Այս համատեքստում կողը կարող է խորհրդանշել մերձավորությունն ու գործընկերությունը, հարել նշանակում է կառչել կամ մոտ մնալ, իսկ «մեկ մարմին» [հատված 24] կարող է նշանակել մտավոր, հուզական, հոգևոր և սեռական միություն:)
Տասներկու Առաքյալների Քվորումից երեց Ջեֆրի Ռ. Հոլլանդը հետևյալն է ուսուցանել ամուսնության մեջ «մեկ մարմին» դառնալու վերաբերյալ.
Մարդկային մտերիմ հարաբերությունը պահված է ամուսնացած զույգի համար, որովհետև այն բացարձակ միության գերագույն խորհրդանիշն է, ամբողջություն և միություն՝ կարգված ու սահմանված Աստծո կողմից: Եդեմի պարտեզից սկսած՝ ամուսնությունը նախատեսված է որպես տղամարդու և կնոջ լիակատար միաձուլում՝ նրանց սրտերի, հույսերի, կյանքերի, սիրո, ընտանիքի, ապագայի և ամեն ինչի: Ադամը Եվայի մասին ասաց, որ նա ոսկոր է իր ոսկորից, և մարմին է իր մարմնից, և նրանք միասին պետք է լինեն «մեկ մարմին» իրենց համատեղ կյանքում [տես Ծննդոց 2.23–24]: (“Personal Purity,” Ensign, Nov. 1998, 76)
Խորհեք դասին նախապատրաստվելիս
Ինչպե՞ս կարող են ամուսինն ու կինն օրհնվել՝ սեռական մտերմությունը դիտարկելով որպես «իրենց սրտերի, հույսերի, կյանքերի, սիրո, ընտանիքի, ապագայի և ամեն ինչի» միաձուլման խորհրդանիշ:
Բաժին 2
Դիտարկելով ֆիզիկական մարմինն այնպես, ինչպես Աստված է տեսնում, ինչպե՞ս կարող եմ մեծացնել մաքրաբարոյության օրենքով ապրելու իմ ցանկությունն ու պարտավորությունը
Աստված կարգել է, որ սեռական մտերմությունը գեղեցիկ և սուրբ դեր կատարի ամուսնության մեջ, ինչի շնորհիվ «[Նա պատվիրել է], որ ծնունդ տալու սուրբ զորությունը պետք է օգտագործվի միայն այն տղամարդու և կնոջ միջև, որոնք օրինական ձևով ամուսնացած են որպես ամուսին և կին» («Ընտանիք. Հայտարարություն աշխարհին», ChurchofJesusChrist.org): Տերը պատվիրում է մեզ բարոյապես մաքուր լինել մեր մտքերում, ցանկություններում և գործողություններում: Սա ներառում է՝ զերծ մնալ սեռական հարաբերություններից մինչև ամուսնանալը և լիովին հավատարիմ լինել ամուսնության մեջ (տես Ելից 20.14, Ալմա 39.3–5, Վարդապետություն և Ուխտեր 59.6): Այս պատվիրանը հայտնի է որպես մաքրաբարոյության օրենք:
Կարևոր է հիշել, որ մեր մարմինները անկախ չեն մեր հոգիներից: Տերն ուսուցանել է, որ «ոգին ու մարմինը՝ մարդու հոգին են» (Վարդապետություն և Ուխտեր 88․15)։ Մարմնի և ոգու միջև կապի վերաբերյալ երեց Հոլլանդն ուսուցանել է.
Մարմինը հոգու էական մասն է: Վերջին Օրերի Սրբերի այս հատկանշական և շատ կարևոր վարդապետությունն ընդգծում է, թե ինչու է սեռական մեղքն այդքան լուրջ: Մենք հայտարարում ենք, որ նա, ով օգտագործում է ուրիշի աստվածատուր մարմինը, առանց աստվածային պատժի չարաշահում է այդ անհատի հոգին, չարաշահում է կյանքի կենտրոնական նպատակը և գործընթացները: (“Personal Purity,” 76)
Պողոս Առաքյալը լրացուցիչ բացատրություն է տվել մարմնի և հոգու սուրբ կապի մասին, երբ ուսուցանել է, որ «մարմինը պոռնկության համար չէ [ամուսնությունից դուրս սեռական գործունեության համար], այլ Տիրոջ համար. և Տերը մարմնի համար» (Ա Կորնթացիս 6.13):
Ուսումնասիրեք դասին նախապատրաստվելիս
Կարդացեք Ա Կորնթացիս 6.19–20-ը և փնտրեք, թե ինչպես է Տերը դիտարկում մեր ֆիզիկական մարմինները:
Խորհեք դասին նախապատրաստվելիս
Ինչու՞ է մոլորեցնող այն փաստը, որ սեռական մտերմությունը դիտարկվում է որպես ֆիզիկական փորձառություն, որը նախատեսված է ֆիզիկական հաճույք ապահովելու համար:
Բաժին 3
Ի՞նչ կարող եմ անել՝ մաքրաբարոյության օրենքով ապրելու իմ ունակությունը մեծացնելու համար
Աստծո բոլոր պատվիրանների նման մաքրաբարոյության օրենքը նախատեսված է մեզ ավելի մեծ խաղաղություն և երջանկություն պարգևելու համար: Օրինակ՝ սուրբ գրություններն օգնում են մեզ հասկանալ, որ մաքրաբարոյության օրենքով ապրելը կարող է մեծացնել մեր վստահությունը Աստծո ներկայության հանդեպ, պաշտպանել մեզ զգացմունքային տառապանքներից և վատ հարաբերություններից ու կանխել Հոգու կորուստը (տես Վարդապետություն և Ուխտեր 121.45, Հակոբ 2.31–35, Վարդապետություն և Ուխտեր 42.23, 63.16): Պահելով մաքրաբարոյության օրենքը՝ կարող ենք պաշտպանել մեզ վնասակար հիվանդություններից և ապահովել, որ երեխաները ծնվեն ամուսնական կապերի մեջ:
Սեռական զգացմունքներ ունենալը նորմալ է: Կարևոր է սովորել, թե ինչպես ուղղորդել այդ զգացմունքները Տիրոջ հավանությամբ: Նույնիսկ, եթե դուք ունեք լավագույն մտադրությունները, գուցե կան պահեր, երբ գայթակղվում եք՝ անտեղի ենթարկվելով ձեր սեռական ցանկություններին: Երբ գայթակղություն զգաք, դիմեք Տիրոջը, և Նա «ելքն էլ կ’պատրաստէ, որ կարողանաք համբերել» (Ա Կորնթացիս 10.13, տես նաև Ալմա 13.28):
Հիշեք՝ «այսինքն՝ Հիսուս Քրիստոսը … գիտի թուլությունը մարդու, և թե ինչպես սատարի նրանց, ովքեր փորձվում են» (Վարդապետություն և Ուխտեր 62.1): Երբ դիմում եք Տիրոջը օգնությանը, փնտրեք Նրա առաջնորդությունը գործնական քայլերի վերաբերյալ, որոնք կարող եք ձեռնարկել, որ «սանձես բոլոր քո կրքերը, որ դու լցվես սիրով» (Ալմա 38.12):
Քույր Վենդի Վ. Նելսոնը՝ նախագահ Ռասսել Մ. Նելսոնի կինը, ուսուցանել է.
Անձնական մաքրությունը իսկական սիրո բանալին է։ Որքան մաքուր լինեն ձեր մտքերը և զգացումները, ձեր խոսքերն ու գործերը, այնքան ավելի մեծ կլինի իսկական սեր տալու և ընդունելու ձեր ունակությունը: …
… Արեք այն, ինչ անհրաժեշտ է՝ ձեր մտքերը, զգացմունքները, խոսքերը և գործողությունները մաքուր պահելու համար: Հրավիրեք Հոգուն՝ առաջնորդելու ձեզ: Նա կօգնի ձեզ։ …
… Ճշմարտությունն այն է, որ որքան մաքուր լինեք, այնքան ավելի հրաշալի կլինի ձեր ամուսնական մտերմությունը: (“Love and Marriage” [worldwide devotional for young adults, Jan. 8, 2017], ChurchofJesusChrist.org)
Տասներկու Առաքյալների Քվորումից Երեց Նիլ Լ. Անդերսենը հետևյալ խորհուրդն է տվել այն անհատներին, որոնց հարաբերությունները դառնում են ավելի լուրջ.
Դուք գիտեք, որ ունեք ուժեղ ֆիզիկական հույզեր և կրքեր, որոնք պետք է վերահսկվեն և խնամքով կառավարվեն: … Ստեղծեք ձեր սահմանները: Այդ սահմանները խորը տեղադրեք այն ամենի միջև, ինչ անում եք միասին, որպեսզի դրանք չանցնեք կամ հեռացնեք, երբ միմյանց նկատմամբ ուժեղ զգացմունքներ ունենաք: (“Complete Honesty, Unselfish Humility” [Brigham Young University–Idaho devotional, Feb. 14, 2017], byui.edu)
Եթե դուք խախտել եք մաքրաբարոյության օրենքը, հիշեք, որ Հիսուս Քրիստոսի հանդեպ ձեր հավատքի և անկեղծ ապաշխարության միջոցով Տերը կարող է ներել ձեզ և դարձյալ մաքրել ձեզ (տես Եսայիա 1.16–18, Վարդապետություն և Ուխտեր 58.42–43): Դուք նաև պետք է զրուցեք ձեր եպիսկոպոսի կամ ճյուղի նախագահի հետ: Նա լիազորված է օգնել ձեզ՝ ձեր մեղքի համար լուծում գտնելով Տիրոջ հետ, և նա կարող է ձեզ լրացուցիչ օգնություն և աջակցություն ցուցաբերել:
Գրի առեք ձեր մտքերը
Նոթատետրում կամ գրառումների ծրագրում գրանցեք այն սահմանափակումները կամ սահմանները, որոնք դուք սահմանել եք կամ պետք է սահմանեք, որպեսզի օգնեք պահպանել ձեր և նրանց սեռական մաքրությունը, ում հետ հանդիպում եք: Եթե ամուսնացած եք, ի՞նչ սահմաններ եք դրել, որպեսզի լիովին հավատարիմ մնաք ձեր կողակցին: