1 Cunan ñuca, Jacob, cangunaman cutin parlani, ñuca juyashca huauquicuna, cai ali malqui imamanda ñuca parlashca cani.

2 Riqui, nishcapachacuna ñucanchi chasquishca nishcapachacuna can ñucanchipaj aicha caimanda; chaimanda, imashna ñucaman ricuchishca can tauca ñucanchipaj huahuacuna huañunga aichapi na crimanda, shina cajpipash, Diosca taucacunahuan alicanga; ñucanchi huahuacuna cutinlla apamushca canga, paicuna chasquichun imami paicunaman cunga ciertopacha yachajuita paicunapaj Jatun Causachijta.

3 Chaimanda, cangunaman nini, cai minishtirishcapacha can Cristo—caina tuta ángelca parlahuarca cai paipaj shuti cagrijta—Judíocunamanda shamunga, picunahuan tucui pachapaj pushtumanda yalishca na alita rurajcunahuan; paita cruzpi chacatanga—cashnami cana ñucanchi Diosca, na cutishuj jatun llacta cai alpapi tianllu paicunapaj Diosta cruzpi chacatangapaca.

4 Shuj jatun llactacunapi juyailla ruraita ricuchinacunata rurajpica paicuna arrepentiringa, yachangapash pai paicunapaj Dios cajta.

5 Ashtahuangari supercheríacunamanda na ali ruraicunamandapash Jerusalénmandacunaca paita na cazujcuna tucunga, pai cruzpi chacatarishca cachun.

6 Chaimanda, paicunapaj na ali ruraicunamanda, tucuchicuna, ninan yarjaicuna, ninan unguicuna, yahuar jicharicuna paicunapa jahuaman shamunga; picuna na tucuchi tucushcacunaca tucui jatun llactacunaman caiman chaiman shitai tucushca canga.

7 Ashtahuangari riqui, Apunchij Diosca shina nin: Imaura punlla shamujpi paicuna ñucapi cringami, ñuca Cristo cajta, ñuca rurashcani conveniota paicunapaj taitacunahuan paicuna aichapi cutinlla apamushca cagrijta, alpa jahuapi, paicunapa chasquina alpaman.

8 Yalishca jipa paicuna tandanajushca canga unaita caiman chaiman shitai tucushcamanda, mama cocha islacunamanda, cai alpamanda chuscundi ladocunamanda; Gentilcunapaj jatun llactacuna jatun canga ñuca ñavipi, Dios nin, paicunata apaimanda chasquina alpacunaman.

9 Ari, Gentilcunapaj jatun mandajcuna paicunapa viñachij taitacuna canga, paicunapa mandaj huarmicunaca chuchuchij mamaman tigranga; chaimanda, Apunchijpaj nishcapachacunaca Gentilcunapaca jatun can, pai caita parlashca can, pita fiñaita ushan?

10 Ashtahuangari riqui, cai alpa, Dios nin, shuj cangunapa chasquina alpa canga, Gentilcunaca alpa jahuapi achilyachishca canga.

11 Cai alpaca shuj libre causana alpa canga Gentilcunapa, jatun mandajcuna cai alpa jahuapi na tiangachu, Gentilcunamanda jatarij.

12 Ñuca shinlliyachisha cai alpata tucui shuj jatun llactacunamanda.

13 Pimi Siónhuan macanajujca huañungami, Dios nin.

14 Pimi shuj jatun mandajta jatarichijpi huañungami, ñuca, Apunchijca jahua pachapa jatun mandaj, paicunapa jatun mandaj casha, paicunapa na tucurinacaman shuj micha casha, ñuca shimicunata uyajcunapaca.

15 Chaimanda, cai yuyaimanda, ñuca conveniocuna pactachishca canga imata ñuca rurarcani runacunapaj huahuacunaman, paicuna aichapi cajpillata rurashami, ñuca minishtishapacha tucuchingapa pacalla yanallapaj ruranacunata, huañuchijcunapaj, millanayaicunapajpash.

16 Chaimanda, pimi Siónhuan macanajun, ishcandi Judío Gentilpash, ishcandi esclavo librepash, ishcandi jaripash huarmipash, huañungami; paicunami tucui alpapaj rameracuna can; picunami ñucahuan na cajcunaca ñucapaj contrami, ñucanchi Dios nin.

17 Ñuca pactachishapachami ñuca ninapachacunata runacunapaj huahuacunaman rurashcata, ñuca caita rurasha paicuna aichapi cajpillata—

18 Chaimanda, ñuca juyashca huauquicuna, ñucanchi Dios cashna nin: Ñuca llaqui yalichisha quiquinba cati aillucunata Gentilcunapaj maquimanda; shina cajpipash, Gentilcunapaj shungucunata amujyachisha, paicuna canga shuj taita laya paicunapa; chaimanda, Gentilcunaca achilyachishca canga yupai tucushcapash canga Israelpaj huasipi.

19 Chaimanda, ñuca cai pambata quiquinba cai aillucunaman achilyachishca canga, picuna quiquinba cati aillucunahuan yupai tucushcacunaca, na tucurinacaman, paicunapa chasquina pamba canga; caica shuj ajllashca pamba, Dios nihuan, tucui shuj pambacunamanda yali, chaimanda ñuca munaica canmi tucui runacuna chaipi causajcunaca ñucata cungurishpa adorahuachun, Dios nin.

20 Cunan, ñuca juyashca huauquicuna, ricuimanda caita ñucanchi llaquij Dios ñucanchiman cushca ninan jatun yachajuicunata cai cuzascunamanda, paita yarishunchi, ñucanchi juchacuna ladoman saquishunchi, ñucanchi umacunata ama urai cumuchishun, ñucanchica na llujchishpa cachashca canchichu; shina cajpipash, ñucanchi chasquina pambamanda carcushpa cachai tucushcanchi; ashtahuangari pushai tucushca canchi shuj ashtahuan ali pambaman, Apunchijca jatun mama cochata ñucanchipa chaquiñanda rurarca, ñucanchica canchi mama cochapaj shuj isla jahuapi.

21 Ashtahuangari jatun can Apunchijpaj ninapachacuna picuna mama cochapaj isla jahuapi cajcunaman; chaimanda islacuna nin ashtahuangunapash tiangarami, chaicunapi causangapashmi ñucanchi huauquicuna.

22 Riqui, Apunchij Diosca Israelpaj huasimanda huaquinbi huaquinbi pushashca can, paipaj munashcahuan munashcauraspash. Cunan riqui, Apunchijca yaringa tucui picuna shicanyamushcacunata, chaimanda ñucachitapash yaringami.

23 Caimanda, cangunapaj shungucuna cushijuichi, yarichi canguna imata rurangapapash librecuna canguichi—mana tucurina huañui ñanda ajllangapa nacashpaca mana tucurina causana ñanda.

24 Chaimanda, ñuca juyashca huauquicuna, cangunallata ali tucuichi Diospaj munaihuan, na ayapaj munaihuan, aichatapash, yarichi, canguna Dios-huan ali tucushpa jipa, Diospaj ninan juyaihuan chaihuanlla chaicashcamandalla canguna quishpirishca canguichi.

25 Chaimanda, Dios jatarichinga huañuimanda cutin causarinapa ushaimanda mana tucurina huañuimandapash shujpa juchacunamanda huañuipa ushaihuan, cangunata chasquishca cachun Diospaj mana tucurina reinopi, canguna cungurishpa paita alicachinguichi Diospaj ninan juyaimanda. Shinacapashcachun.