1 Cunan ñuca, Nefi, ashata cai shimicunamanda parlasha imatami ñuca quilcashcani, chaicunata Isaíaspaj shimihuan parlashca can. Riqui, Isaías parlarca tauca cuzascunata maijan shinlli carca yuyaipi chasquingapa ñuca llactapuracunapa; imashpa paicuna na yacharcachu Judíocunapi achil villachina laya.

2 Imashpa Ñuca, Nefi, na yachachishcani tauca cuzascunata Judíocunapaj layapi; paicunapaj rurashcacunaca yanallapaj ruranacuna carca, paicunapaj ruraicunaca millanayaipaj ruraicuna carca.

3 Chaimanda, ñuca quilcani ñuca llactapuracunaman, tucui picunami chasquinga cunanmanda jipa cai cuzascunata imatami ñuca quilcani, paicuna Diospaj ricushpa chasquichinacunata yachai ushanga, tucui jatun llactacunaman shamujta yachachun, imashna pai parlashca shimimanda.

4 Chaimanda, Uyaichi, Oh ñuca llactapuracuna, picunami canguichi Israelpaj huasi, rinrita cui ñuca shimicunaman; Isaíaspaj shimicuna na cangunapaman punchalla canllu, shina cajpipash na pandai punchalla can tucui picunami achil villachinapaj espírituhuan jundashca cajcunapa. Ashtahuangari ñuca shuj achil villaita cuni, ñucapi caj espírituhuan; chaimanda ñuca achil villachigrini na pandai punchalla cai ñucahuan cashca imaura Jerusalénmanda ñuca taitahuan shamushcamandapacha; riqui, ñuca alma cushijun ñuca llactapuracuna na pandai punchalla caipi, paicuna yachajui ushachun.

5 Ari, ñuca alma Isaíaspaj shimicunapi cushijun, Jerusalénmanda shamurcani, Judíocunapaj cuzascunata ñuca ñavicuna ricushca can, ñuca yachani Judíocunaca yuyaipi chasquirca achil villachijcunapaj cuzascunata, na tianllu shuj llactapuracuna yuyaipi chasquishca imata Judíocuna parlashcata paicunashna, na caimanda paicuna yachajushca carca Judíocunapaj cuzascunata paicunapaj laya.

6 Ashtahuangari riqui, ñuca, Nefi, na yachachishcani ñuca huahuacunata Judíocunapaj layata; ashtahuangari riqui, ñucamandallata Jerusalénpi causashcani, chaimanda ñuca lado muyundi llactacunamanda yachani; ñuca huahuacunaman ashata villashcani Diospaj ricushpa chasquichinacunata, imacuna Judíocunapata yalishcata, ñuca huahuacunaman, tucui imata Isaías parlashca carca, chaicunata na ñuca quilcanichu.

7 Ashtahuangari riqui, ñuca catini ñucapapacha achil villaicunahuan, ñucapaj na pandana punchallahuan; imapimi ñuca yachani runaca na pandaita ushan; shina cajpipash, punllacunapi Isaíaspaj achil villaicuna pactashca cajpi runacunaca ciertopacha yachanga, punlla imaura chaicuna yalijpi.

8 Chaimanda, runacunapaj huahuacunapa valishca can, na shinachu yajcunapaca, ñuca parlasha paicunamanbacha, shimicunaca ñucapapacha llactapuracunamanlla cachun; ñuca yachaimanda caicuna paicunapa shuj jatun valishca canga tucuri punllacunapi; chai punllapica paicuna yuyaipi chasquinga; chaimanda, ñuca quilcashca paicunapa ali canga.

9 Judíocunamanda imashna shuj miraicuna tucurishca can na ali ruraimanda, shinallata shuj miraimanda cutishuj miraicaman tucuchi tucushca paicunapaj na ali ruraicunamanda; nipipash na tucuchi tucushca cashcachu imaura Apunchijpaj achil villachijcuna villashca cashpaca.

10 Chaimanda, paicunaman nishcami carca tucuchinacunamanda paicunapaman shamunata, ñuca taita Jerusalénda saquishca jipalla; shina cajpipash, paicunapaj shungucunata shinlli yachirca; ñucapaj achil villaihuan paicuna tucuchi tucushca carca picunami Babiloniaman apai tucushcacunalla na.

11 Cunan caita ñuca parlani espíritu ñucapi caimanda. Masqui paicuna apai tucushcamanda cutin tigramujpipash, Jerusalénpaj alpata charin; chaimanda, paicuna cutinlla apamui tucushca canga cutin paicunapa chasquina alpaman.

12 Ashtahuangari, riqui, paicuna macanajuicunata charinga, ninan macanajuicuna shamugrin ninajujta; imaura punlla shamunga Taitapaj Shujlla Churi, ari, jahua pachapaj alpapash Taita, paicunaman aichapi ricurimunga, riqui, paicuna na cringa, paicunapaj na ali ruraicunamanda, paicunapaj shinlli shungucunamanda, paicunapaj cungacunapash na cuyurijcuna caimandapash.

13 Riqui, paicuna paita cruzpi chacatanga; pai shuj utujupi quimsa punllacunata churashca jipa pai huañuimanda causaringa, paipaj alascunapi jambinahuan; tucui paipaj shutipi crishpaca Diospaj reinopi quishpirishca can. Chaimanda, ñuca alma cushijun paimanda achil villachishpa, paipaj punllata ñuca ricushca cani, ñuca shungu paipaj achil shutita jatunyachin.

14 Riqui yalishca jipa Mesías huañuimanda causarishca jipa, paipaj llactapuracunaman ricurishca cashpa, paipaj shutipi cringapa munajcunaman, riqui, Jerusalén cutin tucuchishca canga; ay picunami macanajun Dios-huan paipaj iglesiapaj llactapuracunahuanbash.

15 Chaimanda, Judíocuna tucui jatun llactacunaman caiman chaiman shitai tucushca canga; ari, Babiloniapash tucuchishca canga; chaimanda, Judíocuna cutishuj jatun llactacunahuan caiman chaiman shitai tucushca canga.

16 Paicuna caiman chaiman shitai tucushca jipa, Apunchij Dios paicunata llaquichishpa shuj jatun llactacunahuan tauca miraicunata, ari, shuj miraimanda cutishuj miraiman paicunata Cristopi crichun yarichishca cangacaman, Diospaj Churi, shujpa juchacunamanda huañuna, cai can nimaipi tucuri tucui runacunapa—imaura punlla shamujpica paicuna Cristopi cringa, paipaj shutipi Taitata adoran, mapa illa shungucunahuan maillashca maquicunahuan, na shuj Mesíasta ashtahuan shuyan, shinashpa chai tiempo, punlla shamungami cai cuzascunata crinapacha minishtirishca canga.

17 Apunchijca cutin maquita chutanga paipaj llactapuracunata cutinlla apamungapa paicunapaj chingashca urmashca caimanda. Chaimanda, pai rurashpa catinga shuj juyaillapacha rurai shuj juyailla ricurinatapash runacunapaj huahuacunaman.

18 Chaimanda, paicunaman paipaj shimicunata apamunga, chai tucuri punllapi chai shimicuna paicunata ricushpa chasquichinga, caicuna cushca can paicunata crichingapa ciertopacha Mesíasta, pitami paicuna na cazurca; crichingapapash ama shuyachun ashtahuan shuj Mesías shamunata, shujca na shamungachu, na cashpa shuj na ciertopacha Mesías llactapuracunata pandachingapa; achil villachijcuna parlarca shujlla Mesías tiajta, chai Mesíasmi Judíocunahuan na cazui tucunga.

19 Achil villachijcunamanda shimicunahuan, Mesías shamun sujta patsaj huatacuna jipa ñuca taita Jerusalénmanda llujshishca punllamanda; achil villachijcunamanda shimicunahuan, Diospaj ángelpaj shimicunahuanbash, paipaj shutica cangami Jesucristo, Diospaj Churi.

20 Cunan, ñuca huauquicuna, ashtahuan punchalla parlashcani canguna na pandai ushachun. Imashna Apunchij Dios causan Israelcunata llujchimurca Israelta Egipto llactamanda, Moisésman ushaita curca pai jatun llactacunata jambichun paicuna venenoso serpientecunahuan picai tucushca jipa, pai jatarichishca serpienteta ricujpi, paiman ushaita curcapash rumita huajtajpi yacu llujshimuchun; ari, riqui cangunaman ninimi, imashna cai cuzascuna na llulla can, shinami Apunchij Dios causan, na tianllu cutishuj shuti jahua pachapi cushca, caica Jesucristollami, chaimanda ñuca parlashca cani, paimandami runacuna quishpirishca caita ushanga.

21 Chaimanda, Apunchij Dios ñucaman nishcapacha caimanda, cai ñuca quilcashca cuzascunaca alchishpa charishca canga na chingangapash, ñuca cati aillucunaman chasquichishca canga, shuj miraimanda cutishuj miraiman, Joséman nishcapacha pactashca cachun, paipaj cati aillucunaca imaurapash na huañungachu imaura cai alpa tiangacaman.

22 Chaimanda, cai cuzascuna ringa shuj miraimanda cutishuj miraiman imaura cai alpa tiangacaman; Diospaj munashca munaihuan; jatun llactacuna paicuna charinajujcunaca ricushpa chasquichishca canga imashna quilcashca shimicunahuan.

23 Ñucanchi ruranchi utsia mascashpa quilcangapa, ñucanchi huahuacunata crichingapa, ñucanchi huauquicunatapash, Cristopi crichun, Dios-huan ali tucushca cachun; imashpa ñucanchi yachanchi ninan juyaihuan quishpirishca canchi, tucui ñucanchi rurai ushashcata rurashca jipa.

24 Masqui Cristopi crishpapash, Moiséspaj catichunbacha saquishcacunata alichinchi, na shaijushpa Cristopi shuyanchi, imaura catichunbacha saquishcacuna pactashca cangacaman.

25 Caipami catichunbacha saquishcacuna cushca cashca; chaimanda catichunbacha saquishcacuna ñucanchipaca huañushca can, Cristopi ñucanchi femanda causachishca canchi; shina cashpapash ñucanchica catichunbacha saquishcacunata alichinchi rurachunbacha saquishcacunamanda.

26 Ñucanchica Cristomanda parlanchi, Cristopi cushijunchi, Cristomanda yachachinchi, Cristomanda achil villachinchi, quilcanchi ñucanchi achil villachijcuna laya, ñucanchi huahuacuna yachai ushachun maiman rinata mascashpa paicunapaj juchacunata anchuchichun.

27 Chaimanda, ñucanchi parlanchi catichunbacha saquishcacunamanda ñucanchi huahuacuna yachai ushachun catichunbacha saquishcacuna ñana catijta; paicuna, ñaupaman ricuchun chai causaita maijan Cristopi can, yachachun imapa catichunbacha saquishcacunata cushca cashcata. Cristopi catichunbacha saquishcacuna pactashca jipa, paicunapaj shungucunata ama shinlliyachichun imaura catichunbacha saquishca na catishpa tucurina cana cajpi.

28 Cunan riqui, ñuca llactapuracuna, canguna canguichi shuj shinlli shungu llactapuracuna; chaimanda, parlashcani cangunaman ashtahuan punchalla, canguna ama panda yuyaipi chasquinguichi. Ñuca parlashca shimicunaca canga shuj testimonio cangunapaj contra; caicuna tucui can maijan runaman ali ñanda yachachingapa; ali ñanga can Cristopi crina na paita na ninapash; paita na nishpaca achil villachijcunatapash catichunbacha saquishcacunatapash na ninajunguichichu.

29 Cunan riqui, cangunaman nini ali ñanga canmi Cristopi crina, na paita na nina; Cristoca Israelpaj Achil can; chaimanda paipaj ñaupapi urai cumurina canguichi, paita adoranapash tucui ushaihuan, yuyaihuan, shinlli caihuanbash, tucui almahuan; shinashpa nimamanda na shitai tucunguichichu.

30 Shinapacha, ima minishtirishca cangacaman, ruranacunaca alichinapacha canguichi Diospaj ordenanzacunatapash imaura Moisésman cushca catichunbacha saquishca pactachishca cangacaman.