1 Llujshimungami shuj vara Isaípaj troncomanda, shuj malqui paipaj sapicunamanda tigrashpa viñamunga.

2 Apunchijpaj Espíritu paipaj jahuapi canga, jatun yachaipa espíritu yachajuipapash, cushiyachina espíritupash ushai, yachajunamanda espíritupash Apunchijpaj manllaipash;

3 Ñapash yachajunga Apunchijpaj manllaipi; pai na ricushpa chasquichingachu ñavi ricuihuan, na rimanga paipaj rinricunahuan uyaimanda.

4 Ashtahuangari ali caihuan pai ricushpa chasquichinga huajchacunata, pacta alpapaj mansocunata rimanga; paipaj shimipaj varahuan alpata chugrichinga; paipaj shimicara samaihuan na alita rurajcunata huañuchinga.

5 Ali ruranapash paipaj lomocunapaj chumbicuna canga, tucuita pactachinacuna paipaj riñóngunapapash chumbicuna.

6 Lobopash llamaguhuan causanga, leopardoca huahua chivohuan sirijunga, chicuhuan huahua leónhuan huasipi charina animalhuanbash tandanajunga; shuj uchilla huahua paicunata pushanga.

7 Huagrapash osopash pariju micunga; paicunapaj viñanaju huahuacuna tandanajushpa siriringa; leónbash buey laya ujshata micunga.

8 Chuchuju huahuapash áspidpaj utujupi pujllanga, chaira chuchu quichushca huahuapash paipaj maquita víboracuna causaj ucuman churanga.

9 Paicuna na chugrichinga na tucuchingachu ñucapaj tucui achil urcupi, alpaca junda canga Apunchijpaj yachajunacunahuan, imashna yacucuna jatun mama cochata quilpaj laya.

10 Chai punllapi shuj Isaípaj sapi tianga, chaica churashca tiajunga llactapuracuna shuj bandera laya; caita Gentilcuna mascanga; paipaj samana pushtu punchapamba canga.

11 Yalishca jipa chai punllapi Apunchijca paipaj llactapurapaj puchushca saquirishcata maquita chutanga catipi tigrachimungapa, Asiriamanda, Egiptomanda, Patrosmanda, Cusmanda, Elammanda, Sinarmanda, Hamatmanda, jatun mama cochapaj islacunamanda.

12 Pai vichai alsanga shuj banderata tucui jatun llactacunaman, shujllapi tandachinga Israelpaj calpachishcacunata, Judápaj caiman chaiman llujchishpa cachashcacunata alpapaj chuscundi ladocunamanda tandachinga.

13 Efraínpaj envidiapash tucuringa, Judápaj na ricunayachijcuna anchuchi tucushca canga; Efraín ñana envidianga Judáta, Judá ñana llaquichinga Efraínda.

14 Ashtahuangari paicuna angashpa Filisteocunapaj rigra jahuapi indi huashajuj ladoman ringa; paicuna tandanajushpa shuhuanga indi llujshij ladomandacunata; Edom Moabpash paicunapaj jahuapi maquita churanga; Ammónba huahuacuna paicunata cazunga.

15 Apunchijca Egipcio jatun mama cochapaj jalluta tucuilla tucuchinga; paipaj ushai huairahuan paipaj maquita rijuj yacuman chutanga, canchis uchilla rijuj yacucunata chugrichinga, runacunata purishpa chaquishcapi yalichinga.

16 Tianga shuj jatun ñan Asiriamandapacha paipaj llactapurapaj puchushcacunapa, imashna Israelpa tiarca chai punllapi Egipto llactamanda llujshimujpi.