1 Chai punllaca ñuca cantasha ñuca ali juyashcaman shuj ñuca juyashcapa cantota, paipaj uvas chagramanda. Ñuca ali juyashca charirca shuj uvas chagrata shuj ali fucujpacha uchilla urcupi.

2 Sancarca, rumicunata tandachirca, tarpurca ajllashca uvas chagrata, chai, chaupipi shuj jatun torreta rurarca, uvas capijtapash chaipi rurarca; uvas fucunga yashpa pai shuyarca, chaica sacha uvasta fucuchirca.

3 Cunan, Oh Jerusalénpi causajcuna, Judápaj runacuna, ricuchishpa chasquichichi, ñuca achil mañani, ñucahuan ñucapaj uvas chagrahuanbash.

4 Imata ashtahuan rurana carcani ñuca uvas chagrata ñuca na rurashcata? Chaimanda, imaura ñuca shuyarcani uvas fucunga yashpa chaica sacha uvas fucurca.

5 Cunan; ñuca nigrini imata ñuca uvas chagrata ruragrini—Ñuca sancashcata anchuchigrini, chaica micui tucushca canga; paipaj pircata faquigrini, tucuchi tucushca canga;

6 Ñuca tucuchisha; na cuchushca canga na allashcapash; ashtahuangari chaipi viñanga cashacuna na ali jihuacunapash; ñuca mandashapash fuyucuna ama chaipi tamiachun.

7 Uvas chagra Tucuita Mandaj Apunchijpaca Israelpaj huasimi, Judápaj runacunaca paipa munanayai plantagu; pai shuyan ricushpa chasquichinata, riqui, llaquichina; ali ruranapa, ashtahuangari riqui, shuj capari.

8 Ay paicunaman huasihuan huasihuan quimichin, imaura na pushtu tiangacaman, paicunalla tiarishca canga chaupi pambapi!

9 Ñuca rinricunapi, nin Tucuita Mandaj Apunchij, ciertopacha tauca huasicuna pipash illa canga, jatun juyailla llactacuna causajcuna illa canga.

10 Ari, chunga acres uvas chagra shuj bato fucunga, shuj homer muyuca shuj efa fucunga.

11 Ay tutamandapacha jatarijcuna, picuna shinlli ufianata mascan, ansayangacaman catin, vino paicunata nina aparinshna machachinga!

12 Arpa, guitarrashnalla, uchilla tambor, flauta, vinopash paicunapaj ninan micuicunapi tian; ashtahuangari Apunchijpaj rurashcata na ricun, paipaj maquicuna rurashcacunata na ricun.

13 Chaimanda, ñuca llactapuracuna huatai tucushcashnaman rishca can, yachajuicunata na charimanda; ninan yarjaita yalin alicachi tucushca runacuna, taucapachacuna yacunayaimanda chaquin.

14 Chaimanda, ucu pacha paipaj shimita mirachin usharishcata pascan; paipaj punchalla cai, ashtacacuna, ali rijsi tucushca, cushijuicuna, chaiman urai shamunga.

15 Yanga runa urai pushamushca canga, shinlli runa humillarishca canga, ninan jariyashca ñavicuna vichai alsashcacuna humillarishca canga.

16 Ashtahuangari Tucuita Mandaj Apunchijca jatun alicachishca canga ricushpa chasquichinapi, Dios pimi Achil can ali ruraicunapi achilyachishca canga.

17 Chaica llamagucuna paicunapaj layapi micunga, ali viracunapaj saquishca pushtucunataca na rijsishcacuna micunga.

18 Ay picunami na ali ruraicunata yanga jariyanapa huatanacunahuan aisan, juchatapash caica shuj shinlli cabiahuan cajpishna;

19 Pimi nin: Utsia ri, ñapash ruraichi, ñucanchi caita ricui ushangapa; Israelpaj Achil consejocunata quimiri shamui, ñucanchi rijsingapa:

20 Ay picunami na alita alimi nishpa shutichin, yanallata micha nin, michata yanalla nin, jayata mishqui nin, mishquita jaya nin!

21 Ay picunami paicunamandallata yachajcunapacha canchi yajcuna, paicunamandallata ali yuyaita charinchi yajcuna!

22 Ay picunami vinota ufiangapa jariyashcacuna can, shinlli runacuna ufianacunata chapujcuna;

23 Pimi alicachin na ali ruranata alicachishpa cungapa, ali rurajcunata quichun paicunapaj ali caita!

24 Chaimanda, imashna nina tucuchinbacha jupata, rupajuj nina illachin ujshata, paicunapaj sapi ismuicuna canga, paicunapaj sisacuna alpashna ringa; Tucuita Mandaj Apunchijpaj catichunbacha saquishcacunata shitashca caimanda, Israelpaj Achilpaj shimita yangapi churarca.

25 Chaimanda, Apunchijpaj fiñaica japirirca paipaj llactapuracunahuan, paipaj maquita paicunapaman chutashpa, chugrichirca; uchilla urcucuna chujchurca, huañushcacuna chaupi ñangunapi shitashca carca. Tucui caicunahuan paipaj fiñai na tucurirca, ashtahuangari paipaj maquica chutashcara can.

26 Pai shuj bandera laya tucui jatun llactacunaman carumanda vichai alsanga, alpa tucurinamanda paicunata silbanga; riqui, paicuna utsia ñapash shamunga; paicunapi shaijujcuna nitijajcunapash na tiangachu.

27 Pipash na samangachu na puñungapash; paicunapaj lomocunapaj chumbicuna na safashca cangachu, chaquipi churajunata huatarinacunapash na fitishca cangachu;

28 Paicunapaj flechacuna filo canga, tucui paicunapaj arcocuna chutashcalla, caballocunapaj chaqui cascocunaca shinlli rumicunashna canga, ruedacunaca huaira acapanashna, paicunapaj shinlli caparipash shuj leónshna.

29 Shinlli caparinga huahua leóncunashna; ari, paicuna shinlli caparinga, presapaman shitaringa, ali pushtuman apanga, pipash na quichungachu.

30 Chai punllapi paicuna shinlli caparinga mama cocha shinlli caparinshnalla; alpata ricujpica, riqui, yanalla llaquirinapash, michapash yanayanga paipaj jahua pachacunapi.