1 Cunan ñuca, Nefi, achil villachicunata tucuchini, ñuca juyashca huauquicuna. Ñuca na quilcai ushanichu ashtahuangari huaquin cuzascunata, imata ñuca yachani ciertopacha yalinga; na quilcaita ushanichu ashtahuangari ñuca huauqui Jacobpaj huaquin shimicunata.

2 Chaimanda, cuzascuna ñuca quilcashca shinalla ali cahuan, shinapash huaquin shimicunata parlanapacha cani Cristopaj yachajuicunata; chaimanda, ñuca cangunaman parlasha punchalla na pandanalla, ñuca achil villaicunapaj punchalla na pandanallahuan.

3 Ñuca alma cushijun punchalla na pandanallapi; cashna laya Apunchij Diosca runacunapaj huahuacunaman ruran paipaj ruraita. Apunchij Diosca yuyaita punchallayachin; runacunaman parlan paicunapaj shimirimaicunapi, paicuna yuyaipi chasquichun.

4 Chaimanda, canguna yarichun munani achil villachijmanda pitami Apunchij ricuchihuarca, pai Diospaj Llamaguta bautizanga, pimi cai pachapaj juchacunata anchuchinga.

5 Cunan, Diospaj Llamagu, achil cashpata, minishtirca yacuhuan bautizashca canata, tucui ali ruranacunata pactachingapa, Oh shinaca, ashtahuanmari ñucanchicari minishtinchi, na achil caimanda, bautizarishca canata, ari, yacuhuanbash!

6 Cunan, cangunata tapusha, ñuca juyashca huauquicuna, imashnata Diospaj Llamagu pactachirca tucui ali ruranacunata yacuhuan bautizarishca cashpa?

7 Yachanguichichu pai achil cashcata? Ashtahuangari masqui pai achil cashpapash, pai ricuchirca runacunapaj huahuacunaman, aicha caimanda pimandallata Taitapaj ñaupapi humillarin, Taitaman testifican cazuj cangapa paipaj rurachunbacha saquishcacunata alichishpa.

8 Chaimanda, pai yacuhuan bautizarishca jipa Espíritu Santo shuj palomashna paipaj jahuaman uriajumurca.

9 Cutin, cai ricuchin runacunapaj huahuacunaman chaquiñan quichijita, pungupaj angostotapash, maitami paicuna yaicuna can, pai ali ricuchita churashca paicunapaj ñaupapi.

10 Runacunapaj huahuacunaman nin: Ñucata catihuaichi. Chaimanda, ñuca juyashca huauquicuna, Jesústa catita ushanchichu, Taitapaj rurachunbacha saquishcacunata alichingapa munashca cashpalla?

11 Taitaca nirca: Arrepentirichi, arrepintirichi, ñuca Juyashca Churipaj shutipi bautizarichi.

12 Churipaj shimipash ñucapaman shamurca, nishpa: Maijan ñuca shutipi bautizarijmanga, Taitaca Espíritu Santota cunga, ñucamanshna; chaimanda, ñucata catihuaichi, cuzascunata ruraichipash imashna ñuca rurajta canguna ricushca canguichi.

13 Chaimanda, ñuca juyashca huauquicuna, ñuca yachani Churita catishpaca, shungupaj tucui munaihuan, na nij tucushpa rurashpa Diospaj ñaupapi umachishpa, ashtahuangari ciertopacha munaihuan, cangunapaj juchacunamanda arrepentirishpa, Taitaman testificashpa canguna Cristopaj shutita apangapa munashca cashpa, bautismohuan—ari, catishpa cangunapaj Apunchijta cangunapaj Jatun Quishpichijta yacuman uriajushpa, paipaj shimi nishcashna, riqui, jipaman chasquinguichi Espíritu Santota; ari, jipaman shamun ninapaj bautismo Espíritu Santopatapash; jipaman ángelcunapaj shimirimaicunahuan parlai ushanguichi, Israelpaj Achilta caparishpa alicachichi.

14 Ashtahuangari, riqui, ñuca juyashca huauquicuna, shinami Churipaj shimi shamuhuarca, nishpa: Cangunapaj juchacunamanda arrepentirishpa, Taitaman testificashpa ñuca rurachunbacha saquishcacunata alichingapa munashca cashpa, yacuhuan bautizarishpa, ninapaj bautismota Espíritu Santopatapash chasquishpa cashpa, parlai ushanguichi shuj mushuj shimirimaihuan, ari, ángelcunapaj shimirimaihuanbash, cai jipa na nihuajpica, na rijsishca cashparapash ali canguichiman carca.

15 Ñuca uyarcani Taitapamanda shuj shimirimaita, nishpa: Ari, ñuca Juyashcapaj shimicunaca ciertopacha fielpachapash can. Pi tucurinacaman catiriashpaca, quishpirishca canga.

16 Cunan, ñuca juyashca huauquicuna, caimanda ñuca yachani shuj runa tucurinacaman catiriashpaca, causaj Diospaj Churipaj ali ricuchita catishpa, pai quishpirita ushanga.

17 Chaimanda, ruraichi ñuca nishca cuzascunata cangunapaj Apunchij cangunapaj Jatun Causachij ruranacunata ricushcacunata; caimandami ricuchihuashca, canguna yachachun maijan punguta yaicuna canguichi. Chai yaicuna punguca canmi arrepentimiento yacupi bautismopash; shinashpa shamun cangunapaj juchacunata anchuchi ninahuan Espíritu Santohuanbash.

18 Shinashpa quichiji angostopash chaquiñanbi canguichi chai mana tucurina causaiman pushan; ari, cai punguta yaicushpaca; ari, Taitamanda Churimandapash rurachunbacha saquishcacunahuan rurashcanguichimi; Espíritu Santota chasquinguichi, pimi testifican Taitamanda churimandapash, pai rurashca nishcapachata pactachingapa, ñanman yaicujpica paita chasquingichimi.

19 Cunan, ñuca juyashca huauquicuna, quichiji angostopash chaquiñanman yaicushpaca, tapungapa munaiman tucuichu rurashca can? Riqui, cangunaman nini, Na; cunangaman na chayamushcanguichu ashtahuangari Cristopaj shimimandalla, paipi shinlli fehuan, confiashpa tucuillapacha paipaj ali ruraicunapi pimi ushaita charin quishpichingapa.

20 Chaimanda, atirishpa ñaupaman Cristopi shinlli catinapacha canguichi, shuj alipacha punchapamba shuyaita charishpa, Diosta juyaita tucui runacunatapash. Chaimanda, atirishpa ñaupaman catishpaca, Cristopaj shimita ninan munanayai jahuapi chasquishpa, tucurinacaman catiriashpa, riqui, Taita shina nin: Na tucurina causaita charinguichimi.

21 Cunan, riqui, ñuca juyashca huauquicuna, ñanga caimi can; shuj ñan na tianllu shutipash jahua pacha urai cushca imamanda runa quishpirishca canga Diospaj reinopi. Cunan, riqui, cai Cristopaj yachajuicuna can, shujlla ciertopacha Taitapaj yachajui, Churipajpash, Espíritu Santopajpash, paicuna shuj Diosllami can, na tucurita charin. Shinacapashcachun.