Nefipaj Cati Quilcashca

1 Cunan yalishca jipa ñuca, Nefi, ñuca huauquicunaman yachachita tucuchishca cashpa, ñuca taita, Lehipash tauca cuzascunata paicunaman parlarca, villarcapash, imashna jatun cuzascunata Apunchij paicunamanda rurashca carca Jerusalénpaj alpamanda paicunata llujchimunamanda.

2 Parlarcapash yacucunata shamunajushpa paicunapaj na cazuicunamanda, Diospaj llaquinacunapash paicunapaj causaicunata huacaichimanda, paicuna ama mama cochapi langai tucuchun.

3 Paicunaman parlarcapash cushapacha nishca alpamanda, maijan paicuna chasquishca carca—imashna ñucanchiman llaquij Apunchij villachijushcalla can Jerusalénpaj alpamanda pacajushpa calpachun.

4 Chaimanda, riqui, pai nirca, ñuca shuj achil muscuita ricushca cani, chaipi ñuca yachani Jerusalénca tucuchishca can; Jerusalénpi cashpaca ñucanchipash huañushca canchiman carca.

5 Ashtahuangari, pai nirca, masqui ñucanchipaj llaquicunata yalishpapash, shuj cushapacha nishca alpata chasquishcanchi, shuj alpa tucui shuj alpacunamanda yalishpa ajllashca; shuj alpa imashna Apunchij Dios ñucahuan conveniota rurarca shuj alpa ñucapaj cati aillucunapa chasquina cachun. Ari, Apunchijca cai alpata cuhuashca conveniopi, ñuca huahuacunamanbash na tucurinacaman, tucui shujcuna picunami shuj llactacunamanda Apunchijpaj maquihuan pushamushcacunapash.

6 Chaimanda, ñuca, Lehi, achil villachini ñucapi caj Espíritu mandaimanda, cai pambamanga pipash na shamungachu Apunchijpaj maqui pushamushca cajpilla.

7 Chaimanda, cai pamba achilyachishca can paiman pimi pushamushca. Imashpapash paicuna paita sirvinga rurachunbacha saquishcacunahuan imata pai cushca can, paicunapa cai shuj libre causana pamba cachun; chaimanda, paicuna nimaura huatai tucushcashna caiman na pushamushca cangachu; shina tucujpica, na ali ruraicunamanda canga; na alicuna ashtacapacha tiajpica paicunamanda pambapash llaquichishca canga, ashtahuangari ali rurajcunamandaca caica achilyachishca canga na tucurinacaman.

8 Riqui, cai jatun yachai can cai pambata shuj jatun llactacunamanda na yachashca cachunra; riqui, tauca jatun llactacuna cai pambaman jundamungami, chaica na pushtu tiangachu shuj chasquinapa.

9 Chaimanda, ñuca, Lehi, shuj ninapachata chasquishca cani, imashpapash picunami Apunchij Dios Jerusalénpaj alpamanda pushamujpica paipaj rurachunbacha saquishcacunata alichijpica, paicuna cai alpa jahuallapi ali miranga; paicuna tucui shuj jatun llactacunamanda alichishca canga, paicuna cai pambata paicunapalla charichun. Shina paipaj rurachunbacha saquishcacunata alichijpica paicuna achilyachishca canga cai alpa jahuapi, paicunata pipash na fiñachingachu, na cashpaca paicunapaj chasquinataca na quichungachu; paicuna ali alichishca causanga na tucurinacaman.

10 Ashtahuangari riqui, punlla shamujpica paicuna na crishpa asha asha chingarijpica, paicuna Apunchijpaj maquimanda cashna jatun achil yachishcacunata chasquishca jipa—cai alpata rurashcata yachaita charimanda, tucui runacuna, yachai jatun juyailla Apunchijpaj rurashcacunata cai pachata rurashcamandapacha; paicunaman ushaita charimanda cushca tucui cuzascunata femanda rurachun; tucui rurachunbacha saquishcacunata charishpa callarimandapacha, paipaj na tucurina alicaihuan cai juyailla cusha nishca alpaman pushamushca caimanda—riqui, ñuca nini, punlla shamujpica paicuna na cazujpica Israelpaj Achilta, na llulla Mesíasta, paicunapaj Jatun Causachijta paicunapaj Dios, riqui, paipaj ricushpa chasquichinacunaca maijan ali can paicunapaj jahuapi samanga.

11 Ari, pai cutishuj jatun llactacunata pushamunga, paicunaman ushaita cunga, paicunapaj charishca alpacunata quichunga, pai ruranga paicuna shitashca chugrichishcapash cachun.

12 Ari, shuj miraimanda cutishuj miraiman yalijpi yahuar talicuna, shinlli llaquicunapash paicunapurapi tianga; chaimanda, ñuca churicuna, ñuca munani canguna yaringuichiman; ari, ñuca munani canguna ñuca shimi nicunata cazunguichiman.

13 Oh canguna rijcharinguichiman; shuj sumaj puñuimanda rijcharichi, ari, ucu pachapi puñuimandapash, chaspirichi manllanayai huatanacunamanda imami cangunata huatashca charin, chai huatanacunaca runacunapaj huahuacunata charin, chai paicuna urai huatai tucushcashnaman apai tucushca canga mana tucurina huajcha huaicuman jatun llaquimanbash.

14 Rijchari! alpamanda jatarichi, shuj chujchujuj taitapaj shimicunata uyaichi, caipaj cuerpota canguna ñapacha pambanguichi chiri upalla pambana pushtupi, chaimandaca nimaijan purij na tigramuita ushan; shuj asha punllacunapilla tucui alpapaj ñanda ñuca risha.

15 Ashtahuangari riqui, Apunchijca ñuca almata ucu pachamanda jatun causachishca can; ñuca ricushcani paipaj punchapamba caita, ñuca cani pillushca paipaj juyai rigracunapi mana tucurinacaman.

16 Ñuca mañani canguna yarishcanguichiman pactachinata catichunbacha saquishcacunata Apunchijpaj ricushpa chasquichinacunatapash; riqui, caimi ñuca almapaj jatun nanai cashca callarimanda.

17 Ñuca shungu llaquirinahuan nitishca can huaquinbi huaquinbi, ñuca manllashcani, cangunapaj shungucuna shinlliyaimanda Apunchijca cangunapaj Dios paipaj tucuilla fiñai cangunapaman ricungapa shamunga, chaica canguna llaquichishca tucuchishcapash canguichi na tucurinacaman;

18 Nacashpaca, cangunapaman shuj llaquichicuna shamunga tauca miraicunacaman; cangunapash ricuj shamui tucushca canguichi espadahuan, ninan yarjaihuanbash, millanayachishca canguichi pushai tucushca ayapaj munaihuan ayapaj huatai tucushcashna canahuanbash.

19 Oh ñuca churicuna, cai cuzascuna ama yalipashcanman, ashtahuangari cangunaca shuj ajllashca munashca Apunchijpaj llactapuracuna canguichi. Ashtahuangari riqui, paipaj munai rurashca canga; paipaj ñangunaca ali rurana can na tucurinacaman.

20 Pai nishca can: Shinapacha canguna ñuca rurachunbacha saquishcacunata alichishpaca canguna cai pambapi ali miranguichi; ashtahuangari shinapacha canguna na ñuca rurachunbacha saquishcacunata alichishpaca ñuca ñaupamanda anchuchi tucushca canguichi.

21 Cunan ñuca alma cangunamanda cushijuchunga, ñuca shungu cangunamanda cushijuihuan cai pachata saquichunga, ñuca ama nanaihuan llaquirinahuanbash pambana pushtuman apai tucuchunga, jatari alpamanda, ñuca churicuna, jaricuna caichi, shinlli caichi shuj yuyaillapi shuj shungullapi tucui cuzascunapi tandanajushca, ama huatai tucushcashnaman pushai tucunguichi;

22 Canguna ama llaquichishca canguichiman shuj llaquinayai llaquihuan; canguna ama apamushcanguichiman cangunapaman shuj ali Diospaj na alicachinata, tucuchinacaman, ari mana tucurina tucuchinacaman ishcandi almapa cuerpopapash.

23 Rijcharichi, ñuca churicuna; churajuichi ali ruranapaj macanajungapashna churajunata. Chaspirichi huatanacunamanda imahuan canguna huatashca canguichi, yanallamanda llujshimuichi, jatarichi alpamanda.

24 Ama na cazui ashtahuan canba huauquita, paipaj achil ricuicuna sumajpacha cashca can, pimi rurachunbacha saquishcacunata alichishca carca imaura ñucanchi Jerusalénda saquishcamanda; pimi Diospaj maquicunapi shuj imatalla rurana cashca can, ñucanchita pushamungapa cai cushapacha nishca alpaman; na paimanda cashpaca, ñucanchi huañunchiman carca jichushca pambapi yarjaihuan; shina cajpipash, canguna paipaj causaita quichungapa munashcanguichi; ari, pai cangunamanda ninan llaquirinahuan llaqui yalishca.

25 Ñuca cangunamanda ninandapacha manllani chujchunipash, cangunamanda imashpapash pai cutin llaqui yalinga; riqui, canguna paita juchachishcanguichi, ushaita autoridadtapash charingapa mascarca nishpa; ashtahuangari paica Diospaj punchapamba caita mascashca can, canguna mana tucurina ali caipallata.

26 Canguna huasharimashca canguichi pai cangunahuan ima cashcata nij cangunahuan cashca caimanda. Ninguichi paica yapata riman; canguna ninguichi paica ñucanchita fiñan; ashtahuangari riqui, paipaj yapata rimaica Diospaj shimipaj ushai carcami, imami paipi carca; canguna fiñaita shutichishca ciertopacha carca, imashna Diospi can, imata pai na jarcai usharca, ricuchishpa shinllipacha cangunapaj na ali ruraicunata.

27 Caica minishtirishcapacha can Diospaj ushaica paihuan cachun, pai cangunata mandajujpipash canguna cazuchun. Ashtahuangari riqui, pai na carcachu, ashtahuangari Apunchijpaj Espíritu carca imami paipi carca, chaica paipaj shimita pascarca parlachun chaimanda pai na vichai usharcachu.

28 Cunan ñuca churi, Lamán, Lemuel, Sam ñuca churicunapash picunami Ismaelpaj churicuna canguichi, riqui, canguna Nefipaj shimita cazushpaca na tucuringuichichu. Canguna paita cazujpica ñuca cangunaman saquini shuj achil yachita, ari, ñuca callari achil yachita.

29 Ashtahuangari canguna paita na cazujpica ñuca callari achil yachita anchuchisha, ari, ñuca achil yachica, paipaj jahuapi saquishca canga.

30 Cunan, Zoram, ñuca parlani: Riqui, quiquinga Labánpaj sirvij runa cangui; shina cajpipash, quiquin Jerusalénpaj alpamanda pushamui tucushca cangui, ñuca yachani quiquinga ñuca churi, Nefipaj shuj ciertopacha ali rijsi cangui na tucurinacaman.

31 Chaimanda, quiquin ali fiel cashca caimanda quiquinba cati aillucuna achilyachishca canga paipaj cati aillucunahuan, paicuna taucapacha punllacunata cai alpa jahualla charijyashpa causanga; nimapash, paicunapaj na ali ruraicunallami, huaglichinga na saquingapash paicunapaj charij caita cai alpa jahualla na tucurinacaman.

32 Chaimanda, canguna Apunchijpaj rurachunbacha saquishcacunata alichishpaca, Apunchijca cai alpata achilyachishca can ali caipa quiquinba cati aillucuna ñuca churipaj cati aillucunahuan.