1 Ashtahuangari, riqui, tucuri punllacunapi, nacashpaca Gentilcunapaj punllacunapi—ari, riqui Gentilcunapaj jatun llactacuna Judíocunapash, ishcandi picunami cai pambaman shamunga picunami shuj pambacunapi cajcunapash, ari, tucui cai alpapaj pambacunapi, riqui, paicuna machanga na ali ruraicunahuan tucui millanayai layacunahuanbash—

2 Imaura punlla shamujpi paicuna ricuj shamui tucushca canga Tucuita Mandaj Apunchijhuan, culun nijcunahuan alpamama chujchuicunahuanbash, shuj jatun bullahuanbash, ninan tamiahuanbash, ninan huairahuanbash, rupajuj illachingapa ninahuanbash.

3 Siónhuan macanajuj tucui jatun llactacunaca, paita llaquichijca, tuta achil muscuipaj shuj muscui laya canga; ari, cai paicunapaj canga, shuj yarjai muscujuj runashna, riqui pai micun ashtahuangari rijcharijpica paipaj alma chusha can; shuj yacunayachishca muscujuj runashna, riqui pai ufian ashtahuangari rijcharijpica riqui pai irqui can, paipaj alma micunayaita charin; ari, shinami canga tucui jatun llactacunapaj ashtacapacha tandanajushca Siónpaj Urcuhuan macanajujcunaca.

4 Riqui, tucui canguna na ali rurajcuna, cangunallata saquichi manllarichipash, shinlli caparinguichi, caparishpa mañanguichipash; ari, machashca canguichi ashtahuangari na vinohuan, urmangapashna tucunguichi ashtahuangari na shinlli ufianahuan.

5 Riqui, Apunchijca cangunapi jichashca ninan puñuipa espírituta. Riqui, cangunapaj ñavicunata vichashcanguichi, achil villachijcunata na cazushcanguichi; mandajcunatapash, videntetapash pai pacashca cangunapaj na ali ruraicunamanda.

6 Yalishca jipa Apunchij Dios michaman llujchimunga cangunaman shuj quilcashcapaj shimicunata, chai shimicunaca puñunajujcunapaj shimicuna canga.

7 Riqui quilcashcaca sellashca canga; quilcashcapica Diospamanda shuj achil ricuchishca canga, cai pacha callarimanda tucurinacaman.

8 Chaimanda, cuzascuna sellashca caimanda, sellashca cuzascuna na cushca canga na alita rurashca punllacunapi llactapuracunapaj millanayaicunapash. Chaimanda quilcashcata paicunamanda alichishca canga.

9 Ashtahuangari quilcashcata shuj runaman cushca canga, pai cunga quilcashcapaj shimicunata, chaicunaca alpapi puñunajujcunapaj shimicuna can, pai shujman cunga cai shimicunata;

10 Ashtahuangari sellashca shimicuna na cushca cangachu, quilcashcatapash na cungachu. Quilcashcataca Diospaj ushaihuan sellashca canga, sellashca achil ricuchishcata quilcashcapi alichishca canga imaura Apunchijpaj paipaj propio punllacaman; riqui, paicuna tucui cuzascunata achil yachaj chayachinga cai pacha rurashcamanda tucurinacaman.

11 Punlla shamungami quilcashcapa shimicuna sellashca cashcacuna huasi jahuacunapi liishca canga; chaicuna Cristopaj ushaihuan liishca canga; tucui cuzascuna runacunapaj huahuacunaman achil yachaj chayachishca canga, imacuna paicunahuan na tiashcacuna, imacuna tianapash cai alpa tucurinacaman.

12 Chaimanda, punlla imaura quilcashca cushca cajpi runaman pimanda parlashcani, quilcashca pacashca canga cai alpapaj ñavimanda, pipaj ñavipash na ricungachu quimsa ricushcata nijcunalla caita ricunga, Diospaj ushaihuan, ashtahuanbash piman quilcashcata cushcamanda; paicuna testificanga quilcashca ciertopachata chaipi tiaj cuzascunatapash.

13 Ashtahuan shujcuna na ricungachu, huaquinlla imashna Diospaj munaihuan, paipaj shimicunata runacunapaj huahuacunaman testimoniota cungapa; Apunchij Diosca nishca can fielcunapaj shimicunaca parlanga cai cashcashnalla huañushcacunamanda.

14 Chaimanda, Apunchij Dios catinga quilcashcapaj shimicunata michaman llujchishpa; pai munashca tauca ricushcata nijcunapaj shimicunapi paipaj shimi nishcata churanga; ay pimi Diospaj shimi nishcata na cazuj!

15 Ashtahuangari riqui, yalishca jipa Apunchij Dios ninga pimanmi quilcashcata cunga: Japi cai shimicuna na sellashcacunata caicunata shujman cui, ali yachajushcaman ricuchichun, nishpa: Caita lii, quiquinda achil mañani. Ali yachajushca ninga: Quilcashcata caiman apamui, ñuca liisha.

16 Cunan, cai pachapaj ali caipa charijyangapapash paicuna caita nin, na Diospaj punchapamba caipa.

17 Runaca ningami: Ñuca na quilcashcata apamui ushani, cai sellashca can.

18 Ali yachajushcaca ninga: Ñuca caita na liita ushani.

19 Chaimanda yalishca jipa, Apunchij Diosca quilcashcata cutin apanga chaipi tiaj shimicunatapash na ali yachajushcaman; runa na ali yachajushca ninga: Ñuca na ali yachajushca cani.

20 Apunchij Dios paita ninga: Ali yachajushcacuna na caicunata liingachu, paicuna caicunata na cazushca can, ñuca ushani ñucapaj ruranata ruraita; chaimanda quiquin liingui shimicunata imata ñuca cugrini.

21 Ama tacarichu cuzascuna maijan sellashca can, ñuca ricuchisha ñucapaj propio punllapi; runacunapaj huahuacunaman ricuchisha ñuca ushajta ñucapaj ruranata ruraita.

22 Chaimanda, imaura shimicunata ñuca mandashcata liishca cajpi, quiquinman nishcapacha ricushcata nijcunatapash chasquijpi, shinashpa quilcashcata cutin sellangui, ñuca munaicunapa pacangui, ñuca alchishpa charisha shimicunata imata quiquin na liishcata, ñuca jatun yachaipi runacunapaj huahuacunaman tucui cuzascunata achil yachaj chayachingacaman.

23 Riqui, ñuca Dios cani; ñuca cani shuj Dios juyailla ruraita ricuchijpaj; cai alpaman ricuchisha ñuca paillata cani, caina, cunan, imaurapash na tucurinacaman; runacunapaj huahuacunaman na rurani ashtahuangari paicunapaj femanda.

24 Cutin yalishca jipa Apunchijca ninga shimicunata liijman piman cushca canga:

25 Shinapacha cai llactapuracuna quimirihuan paicunapaj shimicunahuan, paicunapaj shimicaracunahuan alicachihuan, ashtahuangari paicunapaj shungucunata ñucapamanda caruyachishca can, paicuna ñucata manllan chaicuna runacunapaj mandaicunamanda yachachishca can—

26 Chaimanda, ñuca catisha rurashpa shuj juyaillapacha ruraita cai llactapuracunapi, ari, shuj juyaillapacha rurai shuj juyailla ricurinatapash, yachajcunapacha canchi yajcuna ali yachajushcacunapaj jatun yachaicunapash huaglinga, ali yuyaita charijcunapaj yuyaipi chasquishcacuna pacajushca canga.

27 Ay maijanguna paicunapaj pacalla ruranata Apunchijpamanda pacangapapacha munajcuna! Paicunapaj ruraicuna yanallapimi can; paicuna nin: Pita ñucanchita ricun, pita ñucanchita rijsin? Paicuna ninbash: Ciertopacha, jahuapi quiquinba rurai cuzascunata ucuman tigrachina manda, rurana turushna yashca canga. Ashtahuangari, paicunaman ricuchisha, Tucuita Mandaj Apunchij nin, ñuca rijsini tucui paicunapaj ruraicunata. Paipaj maquihuan rurashca ningacha, pai na rurahuarcachu? Nacashpa llambuchishpa rurashca rurajta ningachu, pai na yuyaipa chasquinata charinllu?

28 Ashtahuangari riqui, Tucuita Mandaj Apunchij nin: Runacunapaj huahuacunaman ricuchisha cunamanda ashalla punllapi Líbano shuj ali fucuj pambaman tigranga; ali fucuj pambaca shuj sachami canga.

29 Chai punllapi rinrihuan na uyajpash quilcashcapaj shimicunata uyanga, ñausapaj ñavicunapash yanamanda yanalla ucumanda ricunga.

30 Mansocunapash miranga, paicunapaj cushijui Apunchijpi canga, runacunahuan huajchacunapash Israelpaj Achilpi cushijunga.

31 Chaimandami imashna Apunchij causan paicuna ricunga manllanayai caj yangaman tigrachishca can, asishpa ricujca tucuchishca can, tucui na ali ruraicunapa mascajcuna anchuchi tucushcacuna can;

32 Picuna shuj runata shuj shimimanda pandata rurachin, pungupi rimashpa tucuchijujta shuj huatanata mandan, ali rurajta shuj ladoman churan shuj yanga cuzasmanda.

33 Chaimanda, Apunchijca shina nin, pimi Abrahamda jatun causachirca, Jacobpaj huasimanda nin: Jacob cunan ama pingai tucushca canga, paipaj ñavipash na quillulla tigranga.

34 Ashtahuangari imaura pai paipaj huahuacunata ricujpi, ñuca maquicunapaj ruraita, paipaj chaupipi ñuca shutita achilyachinga, Jacobpaj Achilta achilyachingapash, Israelpaj Diosta manllanga.

35 Espíritupi pandashcacunapash shamunga yuyaipi chasquinaman, na cazushcacunapash na llulla yachajuicunata yachajungapa.