1 Cunan ñuca, Nefi, tucui cuzascunata na quilcai ushanichu imacunata ñuca llactapuracunaman yachachishca carca; quilcaipipash, parlaipipash na ushai charij canichu; shuj runa Espíritu Santopaj ushaihuan parlajpica Espíritu Santopaj ushai runacunapaj huahuacunapaj shungucunaman apan.

2 Ashtahuangari riqui, tauca tian paicunapaj shungucunata shinlliyachijcuna Achil Espíritupaj contra, paipa paicunapi na pushtu tian; chaimanda, paicuna tauca cuzascunata shitan quilcashcacunatapash yanga cuzascunapi saquin.

3 Ashtahuangari ñuca, Nefi, quilcani ima quilcashcata, ashtahuanbacha ñuca llactapuracunapa valishca canata. Paicunamanda achil mañashcani cati cati punllapi, ñuca ñavicuna saunata mutiyachin tutapi, paicunamanda; ñuca Diosta fehuan mañani, ñuca yachani ñuca mañaita pai uyahuanga.

4 Ñuca yachani Apunchij Dios achilyachinga ñuca achil mañaicunata ñuca llactapuracunapa ali caipa. Shimicuna irquipi quilcashcacuna paicunapa shinllicuna rurashca canga; caicuna alita rurachinga; yachachishca can paicunapaj taitacunamanda; Jesúsmanda parlan, paipi crichin, tucurinacaman catiriachun, chai na tucurina causai can.

5 Cai shinllilla parlan juchacunamanda, na llulla punchalla na pandanallamanda; chaimanda, pi runapash na fiñangachu cai shimicunamanda imata ñuca quilcashca cani ayapaj espírituhuan cashpalla.

6 Ñuca cushijuni punchalla na pandaipi; ñuca cushijuni ciertopachapi; ñuca cushijuni ñuca Jesúspi; pai ñuca almata ucu pachamanda jatun causachihuarca.

7 Ñuca llactapuracunaman caridadta ñuca charini, Cristopi jatun fepash paipaj jatun shayarinapi tauca almacunata mapa illa tuparisha.

8 Judíocunaman caridadta Ñuca charini—Judío nini, imashpa paicunamanda ñuca shamushca cashpa nini.

9 Charinipash Gentilcunaman caridadta. Ashtahuangari riqui, paicunamanda ni pipapipash na shuyaita chari ushani paicuna Cristohuan ali tucujpilla, quichiji punguta yaicujpi, angosto chaquiñanda purijpi chai pushaj causaiman, chaquiñanpi catijpi imaura paicunapaj ruran na ruran ricuna punlla tucuringacaman.

10 Cunan, ñuca juyashca huauquicuna, Judíocunapash, tucui alpa tucurinacunamandapash, uyaichi cai shimicunata Cristopi crichi; cai shimicunata na crishpaca Cristopi crichi. Cristopi crishpaca cai shimicunapipash cringuichi, caicunaca Cristopaj shimicuna canga, pai ñucaman cuhuashca; tucui runacunapaj huahuacunaman yachachin alita rurachun.

11 Caicuna na Cristopaj shimicuna cashpaca, ricushpa chasquichichi; jipa punllapica Cristo ricuchinga ushaihuan jatun cushijuihuan paipaj shimicuna cajta, chai tucuri punllapi; canguna ñucapash ñavi ñavi cashunchi paipaj jatun shayarina ñaupapi; yachanguichimi ñuca paimanda mandashca cashcata cai cuzascunata quilcachun, masqui irquicashpapash.

12 Taitata achil mañani Cristopaj shutipi ñucanchimanda tauca, tucuillapash, paipaj reinopi quishpirishun jatun tucuri punllapi.

13 Cunan, ñuca juyashca huauquicuna, tucui picunami Israelpaj huasimanda canguichi, tucui alpa tucurinamandapash, cangunaman parlani alpamanda caparijuj shimihuanshna: Cayacaman chai punlla shamungacaman.

14 Canguna Diospaj alicaita na chasquingapa munajcuna, Judíocunapaj shimicunatapash na cazun, ñuca shimicunatapash, Diospaj Llamagupaj shimimanda llujshimunga shimicunatapash, riqui, ñuca mana tucurinacaman cayacaman nini, cai shimicunami cangunata chai tucuri punllapi ricushpa chasquichinga.

15 Alpapi ñuca sellashcani, cangunapaman contra apamushca canga ricushpa chasquichina jatun shayarinapi; Apunchijca shinami mandahuashca, ñuca cazunapacha cani. Shinacapashcachun.