1 Cunan, riqui, ñuca huauquicuna, cangunaman parlashcani, Espíritu tangajpi; chaimanda, ñuca yachani ciertopacha caicuna yalinga.

2 Cuzascuna quilcashca canga chai quilcashca runacunapaj huahuacunaman jatun valishca canga, ashtahuanbacha ñucanchi cati aillucunapa, paicuna Israelpaj huasipaj shuj puchu can.

3 Cai yalishca jipa chai punllapi shayachishca iglesiacunaca, na Apunchijman, imaura shuj ninga cutishujman: Riqui, ñuca, ñuca Apunchijpaj cani; cutishujcunapash ninga: Ñuca, ñuca Apunchijpaj cani; shujllangaman maijan iglesiacunata shayachishcacuna shina ninga, na Apunchijman—

4 Paicuna fiñanajunga caishuhuan chaishuhuan; paicunapaj sacerdotecuna fiñanajunga caishuhuan chaishuhuan, paicuna yachachinga paicunapaj yachajushcacunahuan, Espíritu Santota na nin, pimi ima ninata villan.

5 Paicuna Diospaj ushaita na nin, Israelpaj Achilta; paicuna llactapuracunaman nin: Uyaichi ñucanchita, uyaichi ñucanchi yachachishcata; riqui cunan Dios na tianllu, Apunchijca Jatun Causachijca paipaj ruraita tucuchishca can, paipaj ushaita runacunaman cushca can;

6 Riqui, uyaichi ñuca yachachishcata; Apunchijpaj maquihuan juyailla ruraita ricuchishca tianmi nijpica, ama cringuichichu; cai punllaca pai shuj Dios juyailla ruraita ricuchijpaj ñana canllu; paipaj ruraita tucuchishca can.

7 Ari, tauca nijcuna tianga: Micuichi, ufiachi, cushijuichi, cayaca ñucanchi huañugrinchi; alimi cashunchi.

8 Tauca nijcunapash tianga: Micuichi, ufiachi, cushijuichi; shina cashpapash, Diosta manllai—pai alipi llujchinga shuj uchilla juchata rurajpi; ari, ashata llullai, shimicunahuan shujcunata umachi, quiquingunapaj ladolla causajcuna urmachun huaicuta rurai; caipica na jucha tianllu; tucui cai cuzascunata ruraichi, cayapa ñucanchi huañushunchi; shina culpayucuna cajpica, Dios ñucanchita huaquin astita cunga, tucurijpica Diospaj reinopi quishpirishca cashun.

9 Ari, tauca tianga cashna layapi yachachinga, llulla, yanga juizu illa yachajuicunata, paicunapaj shungucuna yapa jariyashcacuna canga, paicunapaj pacalla ruranata Apunchijpamanda pacangapapacha munanga; paicunapaj ruraicuna yanallapi canga.

10 Santocunapaj yahuarca alpamanda caparinga paicunapaj contra.

11 Ari, tucuicuna ñanmanda llujshishca can; huaglishcacuna can.

12 Jariyaimanda, llulla yachachijcunamanda, llulla yachajuicunamanda, paicunapaj iglesiacuna huaglimushca can, vichai alsarishcacuna can; paicuna jariyaimanda punguishcacunashna can.

13 Huajchacunata shuhuan paicunapaj fino achil pushtucunamanda; huajchacunata shuhuan paicunapaj fino churajunacunamanda; shungupi mansocunata huajchacunatapash na ricunayachishpa catin, paicuna jariyaimanda punguishcacunashna can.

14 Paicuna shinlli shungucuna jahuamanda ricunajujcuna; ari, jariyaimanda, na alita ruraicuna, millanayaicuna, fornicacióncuna, tucuicuna chingangapa rishca, huaquinlla na chingashca, picuna Cristopaj humilde discípulocuna can; shina cashpapash, paicuna pushai tucushca can, tauca viajecunapi pandata ruran imashpa runacunapaj yachachishcacunata yachajushca caimanda.

15 Oh yachajcuna, ali yachajushcacuna, charijcuna, paicunapaj shungucuna yapa jariyaimanda punguishcashna cajcuna, tucui llulla yachajuicunata yachachijcuna, tucui fornicacióncunata rurajcuna, Apunchijpaj ali ñanda huaglichijcuna, ay, ay, ay paicuna canga, Tucui Ushaita Charij Apunchij Dios nin, paicuna ucu pachaman shitai tucushcacuna canga!

16 Ay picuna alita rurajcunata ladoman churan yanga cuzasmandapash ima ali cajta plitujcuna, ninpash cai na imapash valinllu! Punlla shamungami Apunchij Dios cai pachapi causajcunata ñapash ricuj shamunga; chai punllapi paicuna na ali ruraicunapi yapata mirashcapica huañungami.

17 Ashtahuangari riqui, cai alpapi causajcuna paicunapaj na ali ruraicunamanda millanayaicunamanda arrepentirijpica paicuna na tucuchishca cangachu, Tucuita Mandaj Apunchij nin.

18 Ashtahuangari riqui, jatun millanayai iglesiaca, tucui alpapaj ramera, alpaman urmangapacha, caipaj urmaica jatunbacha canga.

19 Ayapaj reino chujchungapacha, paipaj catijcunaca arrepentirina yuyaita rijchachinga, nacashpaca aya charinga paipaj mana tucurina huatanacunahuan, paicuna tangashca canga fiñangapa, tucuringapash;

20 Riqui, chai punllapica pai ninanda millayachinga runacunapaj huahuacunapaj shungucunata, paicunata tangashca canga fiñachun imalla ali cajcunapaj contra.

21 Shujcunata pai sumaj causaichi ninga, muspachishpa samachinga aichapi alicaihuanshna, paicuna ninga: Siónpi Tucui alimi can; ari, Sión ali mirarin, tucui alimi—ayaca paipaj almacunata shina llullan, alilla ricushpa paicunata ucu pachaman pushan.

22 Riqui, shujcunata pandachin, paicunaman ucu pacha na tianllu nin; paicunaman ningapash: Ñuca na aya canichu, na tianllu—rinricunapi shina alillagu ninga, paipaj manllanayai huatanacunahuan japingacaman, chaimanda na cacharirina tianllu.

23 Ari, paicuna huañuihuan japi tucushca can, ucu pachahuan; huañuipash, ucu pachapash, ayapash tucuicuna paipaj ushaipi urmashcacuna Diospaj jatun tiarina ñaupaman shamungapachami, ricushpa chasquichishca canga paicunapaj rurashcacunamanda, chaimanda paicunaman pushtuta alichishcaman ringapacha, shuj nina azufrepash cochamanbash, caica na tucurinata chari llaqui apana can.

24 Chaimanda, ay pimi Siónpi samashca canga!

25 Ay pimi caparin: Tucui alimi!

26 Ari, ay pimi runacunapaj yachachishcacunata uyashca canga, Diospaj ushaitapash na nishca, Espíritu Santopaj dontapash!

27 Ari, ay pimi nin: Ñucanchi ña chasquishca canchi, ashtahuan na minishtinchichu!

28 Tucuripipash, ay tucui picuna chujchun, Diospaj ciertomanda fiñashcacuna can! Riqui, rumipi huasichishca caj cushijuihuan chasquinmi; pimi shuj tʼiyulla pushtupi huasichishca urmasha yashpa chujchun.

29 Ay pimi ninga: Diospaj shimita chasquishca canchi, ñucanchi na ashtahuan Diospaj shimita minishtinchichu, ña yapalla charinchi!

30 Riqui, Apunchij Diosca shina nin: Runacunapaj huahuacunaman cushami jila jila jahuapi, yachachishca yachachishca jahuapi, ashagu caipi ashagu chaipi; achilyachishcacuna canga maijanguna ñuca consejocunata uyajcuna, ñuca mandashcacunata rinrita mañachishpa uyan, paicuna jatun yachaita yachajunga; maijan chasquijmanga ashtahuan cusha; maijan nijcunaman: Ashtacata charinchi, charishcatapash quichushca canga.

31 Llaquinayai can pimi shunguta runapi churaj, nacashpaca paipaj rigrata aichata ruran, runacunapaj yachachishcacunata uyan, paicunapaj yachachishcacuna Espíritu Santopaj ushaihuan cushca cajpilla ali canga.

32 Ay Gentilcuna, Tucuita Mandaj Apunchij Dios nin! punllan punllan masqui ñuca rigrata chutashca casha, ñucata na nihuanga; shina cajpipash, ñuca paicunata ali caihuan casha, Apunchij Dios nin, paicuna arrepentirijpi ñucapaman shamujpi; ñuca rigra chutashca canga tucui punlla, Tucuita Mandaj Apunchij Dios nin.