1 Cunan riqui, ñuca juyashca huauquicuna, cangunaman parlangapa munani; ñuca, Nefi, na saquishachu canguna Gentilcunata yali ali rurajcunami canchi yuyanajuchun. Riqui, Diospaj rurachunbacha saquishcacunata alichishpallami na tucuilla paicunashna tucuringuichi; cai parlashca shimicunamanda canguna na minishtinguichichu Gentilcuna tucuillapacha tucuchishca can yangapa.

2 Riqui, cangunaman ninimi tauca Gentilcunamandami arrepentirishpa Apunchijpaj convenio llactapuracuna canga; tauca Judíocuna na arrepentirishpaca llujchishpa cachai tucushca canga; Apunchijca na conveniota ruranllu ashtahuangari maijan arrepentirijhuanlla paipaj churipi crijhuan, pimi Israelpaj Achil.

3 Cunan, ñuca ashtahuan achil villachisha Judíocunamanda Gentilcunamandapash. Ñuca parlashca quilcashca llujshimushca jipa, Gentilcunaman quilcashca cajpica, sellashcapash Apunchijpaj munaipa, quilcashca shimicunapi tauca cringa; paicuna apanga ñucanchi cati aillucunapaj puchucunaman.

4 Ñucanchi cati aillucunapaj puchucuna ñucanchita yachanga, imashna Jerusalénmanda shamushcata, paicuna punda Judío taitacunamanda miramushcacuna can.

5 Jesucristopaj quishpiringapa villaicuna paicunaman villashca canga; chaimanda, paicuna cutinlla apamushca paicunapaj taitacunapa yachaiman, Jesucristopaj yachaimanbash, imami paicunapaj taitacunahuan tiarca.

6 Shinashpa cushijunga; paicuna yachanga caica Diospaj maquimanda paicunapaj shuj achil yachi can; paicunapaj yanalla piji carashna paicunapaj ñavimanda urmai callaringa; tauca miraicuna paicunahuan nara yalijpi, paicuna mapa illa canga shuj munanayai llactapuracuna cashpalla.

7 Yalishca jipa Judíocuna caiman chaiman picuna shitai tucushca can Cristopi cri callaringapash; paicuna tandanajui callaringa alpajahualla; tauca imashna Cristopi crijpi shuj munanayai llactapuraman tigranga.

8 Yalishca jipa Apunchij Dios callaringa paipaj ruraita tucui jatun llactacunapi, reinocunapi, shimi rimaicunapi, llactapuracunapipash, paipaj llactapuracunata cai alpapi cutinlla apamunga.

9 Ali caihuan Apunchij Dios huajchacunaman ricushpa chasquichinga, alpamanda mansocunamanda pactahuan rimai tucunga. Alpata chugrichinga paipaj shimipaj varahuan; paipaj shimicarapaj samaihuan na alita rurajcunata huañuchinga.

10 Punllaca ñapash shamujun Apunchij Dios llactapuracunahuan shuj jatun shujman shujman tandanajuchinga, na alita rurajcunata pai tucuchinga; pai huacaichinga paipaj llactapuracunata, ari, shina na alita rurajcunata ninahuan tucuchina cashpapash.

11 Ali ruranapash paipaj lomocunapaj chumbicuna canga, tucuita pactachinacuna paipaj riñóngunapapash chumbicuna.

12 Shinashpa loboca llamaguhuan causanga; leopardoca huahua chivohuan sirijunga, chicohuan, huahua leónhuan huasipi charina animalhuan tandanajunga; shuj uchilla huahua paicunata pushanga.

13 Huarmi huagra osahuan micunga; paicunapaj huahuacuna pacta siriringa; leónbash ujshata micunga buey laya.

14 Chuchuju huahuapash áspidpaj utujupi pujllanga, chaira chuchu quichushca huahuapash paipaj maquita víboracuna causaj ucuman churanga.

15 Paicuna na chugrichinga na tucuchingapash tucui ñuca achil urcupi; alpaca Apunchijpaj yuyaipi chasquishcacunahuan junda canga imashna yacucuna jatun mama cochata quilpanshna.

16 Chaimanda, tucui jatun llactacunapaj cuzascunaca rijsichishca canga; ari, tucui cuzascuna runacunapaj huahuacunaman rijsichishca canga.

17 Imapash na pacalla can ashtahuangari achil yachaj chayachingapa; yanallapaj rurana na tianllu ashtahuangari michapi ricuchina; imapash na sellashca can cai alpapi ashtahuangari safarishca canga.

18 Chaimanda, tucui cuzascuna runacunapaj huahuacunaman achil yachaj chayachishca canga chai punllapi achil yachaj chayachishca canga; Satanás na ashtahuan ushaita charinga runacunapaj huahuacunapaj shungucunapi, ashtaca punllacunapi. Cunan, ñuca juyashca huauquicuna, ñuca shimirimaicunata tucuchini.