16 Capítulo
Isaías Apunchijta ricun—Isaíaspaj juchacuna perdonashcacuna can—Pai cayashca can achil villachingapa—Achil villachin Cristo yachachishcacunata Judíocuna na cazun—Shuj puchushca tigramunga—Isaías 6-huan parijashpa ricui. Nara 559–545 C.Ñ.
1 Uzías jatun mandaj huañushca huatapi, ñuca ricurcanipash Apunchij shuj jatun vichai alsashca jatun tiarina jahuapi tiajujta, paipaj churajunapa urachaquipash achil huasipi junda mandarishca carca.
2 Jatun tiarina jahuapica serafincuna tiarca; sujta alascunata charirca shujllangaman; ishcaihuanga paipaj ñavita quilparirca, ishcaihuanga paipaj chaquita quilparirca, ishcaihuanga pai jahuata rirca.
3 Shuj caparirca cutishujta, nircapash: Achil, achil, achil, can Tucuita Mandaj Apunchijca; tucuilla alpami paipaj punchalla caihuan junda.
4 Huasita charina pungucuna cuyurirca paipaj shimi caparijpi, huasi cushnihuan jundashca carca.
5 Jipaman nircani: Ay ñucamanda! ñuca tucurishca cani; ñuca cani shuj runa mapa shimicaracunahuan; shuj llactapuracunapaj mapa shimicaracunapa chaupipi causani; ñuca ñavicuna ricushca can Jatun Mandajta, Tucuita Mandaj Apunchijta.
6 Jipaman chai serafincunamanda shuj ñucapaman jahuata shamurca, shuj japirijuj carbónda paipaj maquipi charishpa, chaitaca tenazacunahuan altarmanda japishca carca;
7 Chaihuan ñuca shimita tacarirca, nircapash: Riqui, cai quiquinba shimicarata tacarishca can; quiquinba na ali ruraicuna quichushca can, quiquinba juchacuna maillashca.
8 Ñuca uyarcanipash Apunchijpaj shimita, nijujta: Pitashi cachasha, pishi ñucanchimanda ringa? Jipaman ñuca nircani: Ñuca caipi cani; ñucata cachahuai.
9 Pai nirca: Ri cai llactapuracunata ni—Uyaichipacha, ashtahuangari paicuna na yuyaipi chasquin; ricuichipacha, ashtahuangari paicuna na sentirca.
10 Saqui cai llactapuracunapaj shungucuna shinlliyachun, tapai paicunapaj rinricunata, paicunapaj ñavicuna vichashca cachun—na cashpa ricunman paicuna ñavihuan, uyanman paicunapaj rinricunahuan, paicuna shungucunahuan yuyaipi chasquinman, tigrarishca canga jambishcapash canga.
11 Jipaman nircani: Apunchij, imauracaman? pai nirca: Llactacuna tucuchishca causajcuna illa cangacaman, huasicunapash runa illa, pambapash tucuilla jichushca cangacaman;
12 Apunchijca runacunata caruman carcushca cajpi, ima shuj jatun jichushca pamba chaupipi tianga.
13 Ashtahuangari chungamanda shuj tiangara, paicuna tigramunga, micui tucushca canga, terebintoshna, shuj encinashna, paipaj minishtirishcapachaman alichin imaura fangacuna llujshi callarijpi; chaimanda achil muyuca paipaj minishtirishcapacha canga.